Ohundo Yesu a Lingila Komunda

Yesu noke yoku nõla 12 kovapostolo, wa loka komunda kuenje wa enda pocitumãlo cimue pa liongoluila omanu valua. Omanu vaco va tunda ko Galilea, ko Yudea, ko Turo, ko, Sidono, ko Suria kuenda kolonepa vikuavo vio ko Yordão. Ovo va nena omanu va kala oku vela kuenda vana va kuatiwile lolondele. Yesu wa va sakula vosi. Noke wa tumãla ocipepi lomunda kuenje wa fetika oku longisa. Eye wa lombolola eci tu sukila oku linga nda tu yongola oku kala akamba va Suku. Tu sukila oku limbuka okuti, tu sukila ekuatiso lia Yehova kuenda oku lilongisa oku u sola. Pole, ka tu pondola oku sola Suku nda ka tu sole omanu vakuavo. Tu sukila oku tata ciwa omanu vosi kuenda oku lekisa esunguluko kokuavo ndaño muẽle kovanyãli vetu.

Yesu wa popia hati: ‘Ka vu sukila lika oku sola akamba vene. Pole, vu sukilavo oku sola ovanyãli vene kuenda oku ecela omanu lutima wene wosi. Nda wa sumuisa omunu umue, kuende kokuaye kuenje pinga ongecelo. Tata vakuene ndeci o yongola okuti va ku tatavo.’

Yesu wa ecavo komanu elungulo lia sunguluka liatiamẽla kovokuasi. Eye wa popia hati: ‘Oku kala ekamba lia Yehova ca velapo vali okuti, oku kuata olombongo vialua ci sule. Ocimunu cimue ci pondola oku nyana olombongo viove, pole, lomue o pondola oku nyana ukamba o kuete Yehova. Liwekipo oku sakalala leci vu lia, leci vu nyua ale leci vu wala. Tali olonjila. Suku olonjanja viosi o vĩha eci vi lia. Oku sakalala calua ka ci vokiya oloneke viomuenyo wene. Ivaluki okuti, Yehova wa kũlĩha ovina vu sukila.’

Omanu lalimue eteke va muile umunu umue o longisa ndeci Yesu a longisa. Asongui vetavo ka va longisile kokuavo ovina viaco. Momo lie Yesu a kalela ulongisi umue wa velapo? Momo ovina viosi a longisa via tunda ku Yehova.