Ungelo Gabriele o Nyula Maria

Elisavete wa kuata umue ngadiaye o tukuiwa hati, Maria, una wa kala volupale luo Nasara ko Galilea. Maria wa likuminyiwile oku kueliwa la Yosefe okuti wa kala kalupindelu. Eci Elisavete a tẽlisa olosãi epandu vioku mina, ungelo Gabriele wa molẽha ku Maria. Eye wo sapuila hati: ‘Kalunga a Maria. Yehova wa ku sumũlũisa.’ Maria ka kuatele elomboloko liolondaka viaco. Noke Gabriele wo sapuila hati: ‘O mina kuenda o ka cita omõla umue ulume, kuenje u luka hati, Yesu. Eye o ka viala Ndosoma. Usoma waye ka u ka sulila.’

Maria wa popia hati: ‘Ame ndufeko wosombo. Ndi pondola oku cita ndati omõla umue?’ Ungelo Gabriele wa popia hati: ‘Lacimue okuti ka ci tẽliwa la Yehova. Espiritu sandu liya kokuove kuenje o ka cita omõla umue ulume. Ngandiove Elisavete we minavo.’ Kuenje Maria wa popia hati: ‘Ame ndupika wa Yehova. Ci tẽlisiwe vokuange ndomo wa ci popia.’

Maria wa enda volupale lumue kolomunda, oco a ka nyule Elisavete. Eci Maria o lama, Elisavete wa yeva okuti oñaña vimo liaye ya lisenga. Elisavete wa yukisua lespiritu sandu kuenje wa popia hati: ‘A Maria, Yehova wa ku sumũlũisa. Esumũlũho limue linene oku kala la ina ya Ñala yange, vonjo yange.’ Maria wa popia hati: ‘Ame ndi sivaya Yehova lutima wange wosi.’ Maria wa kala la Elisavete ci soka olosãi vitatu, noke wa tiukila konjo yaye ko Nasara.

Eci Yosefe a limbuka okuti Maria we mina wa yonguile oku u siapo. Pole, ungelo umue wa molẽha kokuaye vonjoi yimue kuenje wa popia hati: ‘A Yosefe, ku ka kuate usumba woku likuela laye. Eye ka lingile cimue cĩvi.’ Omo liaco, Yosefe wambata Maria konjo yaye oco a linge ukãi waye.