Ovimbaka Vio Yerusalãi

Tu sokololi ovina vimue via pita konyima. Nehemiya okuti ukuenje umue wa Soma Aretasesete, wa kala u Isareli kuenda wa kala ko Persia volupale luo Siusana. Manji a Nehemiya wa tunda ko Yuda lasapulo ãvi hati: ‘Omanu vana va tiukila ko Yerusalãi ka va kolelepo. Ovimbaka violupale kuenda olombundi vina va Bavulono va nyõla ka via tumbuluiwile.’ Nehemiya wa sumuile calua. Eye wa yonguile oku enda ko Yerusalãi oco a va kuatise kuenje wa likutilila oco soma o wecelele oku enda.

Noke, soma wa limbuka okuti Nehemiya wa sumua. Soma wa popia hati: ‘Lalimue eteke nda ku muile ndoco. Nye ci kasi oku pita love?’ Nehemiya wa popia hati: ‘Ocipala cange ka ci sumua ndati osimbu imbo liange, o Yerusalãi lia linga alunda?’ Soma wa pula hati: ‘Nye o yongola okuti oco ndu ku lingila?’ Vepuluvi liaco, Nehemiya wa linga ohutililo yo vutima. Noke wa popia hati: ‘Linga ohenda, ecelela okuti ngenda ko Yerusalãi oku ka tumbulula ovimbaka.’ Soma Aretasesete wa sapuila Nehemiya okuti citava oku enda kuenje wa linga esokiyo liokuti Nehemiya o kolapo vungende waye unene. Eye wa lingisavo Nehemiya oco a kale nguluvulu yo Yuda kuenda wa eca kokuaye avaya oku linga apito o volupale.

Eci Nehemiya a pitĩla ko Yerusalãi wa kũlĩhĩsa ovimbaka violupale. Noke wongolola ovitunda kuenda olombiali kuenje wa va sapuila hati: ‘Eci cĩvi. Tu sukila oku fetika oku linga upange.’ Omanu va tava kuenje va fetika oku tumbulula ovimbaka.

Pole, vamue pokati kovanyãli va va Isareli va fetika oku va yola epembe kuenje va popia vati: ‘Ombulu yimue yi pondola oku undumũhila lulelu ocimbaka cavo covawe.’ Olonalavayi ka via kapeleko olondaka viaco kuenje viamamako oku tunga. Ovimbaka via kula kuenda via pama.

Ovanyãli va nõlapo oku tunda kolonepa via litepa kuenda oku katukila o Yerusalãi ocipikiki. Eci va Yudea va yeva ovina viatiamẽla kongombo yaco, va kuata usumba. Pole, Nehemiya wa va sapuila hati: ‘Ko ka kuati usumba. Yehova o kasi letu.’ Nehemiya wa kapa olondavululi oco vi teyuile olonalavayi kuenje ovanyãli ka va tẽlele oku va katukila.

Vokuenda kueci ci soka 52 koloneke, ovimbaka kuenda olombundi via tungiwa. Nehemiya wambata va Lewi vosi ko Yerusalãi oco va ka tumbike onembele. Eye wa va sokiya vovimunga vivali violonjimbi. Ovo va londa kocimbaka ca kala ocipepi lolosikata Viombundi Yokono noke va ñuala olupale okuti vamue va enda kondio vakuavo kepĩli. Ovo va sika alumbeta, olosimbalu, olohalupa kuenda va imbila Yehova ovisungo. Esera wa enda locimunga cimue kuenda Nehemiya wa endavo locimunga cikuavo toke eci va lisanga vonembele. Omanu vosi ci kale alume akãi lomãla, va eca ovilumba ku Yehova kuenda va linga ocipito. Ocileñi colondaka viavo viesanju, via ponduile oku yevala kupãla.