Yehova wa Lekisa Epandi ku Yona

Volupale luo Suria ko Ninivei omanu va kala olondingaĩvi. Yehova wa sapuila uprofeto waye Yona oco a ende ko Ninivei oku lungula omanu okuti va pongoloka kovituwa viavo. Pole, Yona wa tilila konjila yikuavo. Eye wa londa vonaviyu yimue yenda ko Tarsisi kuenje wa enda la vakuanaviyu.

Osimbu onaviyu ya kala vokalunga, kueya ehunguhungu limue linene kuenje vakuanaviyu va kala lusumba walua. Ovo va likutilila kolosuku viavo loku pula vati: “Helie o kasi oku tu kokela ohali yosi eyi?” Kuenje Yona wa va sapuila hati: ‘Ame ñuete eko. Ndi kasi oku tila eci Yehova a ndi tuma oku linga. Njeluli kuenda njimbi vokalunga, oco ka tulumũhe.’ Vakuanaviyu ka va yonguile oku imba Yona vokalunga, pole, Yona wa lipilika. Eci va imba Yona vokalunga ehunguhungu lia tulumũha.

Yona wa sima okuti o laika oku fa. Osimbu a kala oku vomba kosi yokalunga, wa likutilila ku Yehova. Kuenje Yehova wa tuma ombisi yimue yinene. Oyo ka ya pondele Yona, pole, yo wina. Vimo liombisi Yona wa likutilila hati: “Ndi tẽlisa eci nda likuminya.” Yehova wa popela Yona vimo liombisi vokuenda kuoloneke vitatu kuenje wa lingisa okuti ombisi yi sanjela Yona kongongo.

Omo okuti Yehova wa yovola Yona, eci ci lekisa hẽ okuti ka tiukilile vali ko Ninivei? Sio. Yehova wa sapuila Yona oco a ende vali ko Ninivei. Konjanja eyi Yona wa pokola. Eye wa enda kuenje wa sapuila omanu vaco olondingaĩvi hati: “Pa kamba lika oloneke 40 kuenje o Ninivei yi ka nyõliwa.” Noke kua pita ocina cimue okuti ka ca lavokawaile. Va Ninivei va yevelela kuenje va pongolola ovituwa viavo. Soma yo Ninivei wa sapuila omanu vaye hati: ‘Vilikiyi Suku, kuenda likekembeli.’ “Helie wa kũlĩha nda Suku yocili o litiukamo koku linga eci a yonguile kuenje o liwekapo oku lekisa onyeño yaye yalua oco tu puluke kenyõleho?” Eci Yehova a mola okuti omanu va likekembela, ka nyõlele vali o Ninivei.

Yona wa temele omo okuti olupale ka lua nyõliwile. Sokolola ndoco: Yehova wa lekisile epandi kuenda ohenda ku Yona, pole, Yona ka lekisile ohenda komanu vo ko Ninivei. Omo liaco, Yona wa enda kosamua yolupale kuenje wa tumãla pulembo luolungu lumue kuenje wa fungula. Noke ocikũla ca kukuta kuenje Yona wa tema calua. Omo liaco, Yehova wo sapuila hati: “Ove wa kuatela ohenda olungu kua kũlile, ndaño oku u kulisa. Oco hẽ, si kuatelavo ohenda olupale lunene luo Ninivei?” Nye Yehova a yonguile oku popia lolondaka evi? Va Ninivei va kuatele vali esilivilo okuti ovikũla vi sule.