Rahava wa Seleka Olondavululi

Eci olondavululi via va Isareli via endele kolupale luo Yeriko, ovio via kala vonjo yukãi umue o tukuiwa hati, Rahava. Soma yo Yeriko wa ci yeva kuenje wa tuma asualali konjo ya Rahava. Rahava wa seleka olondavulu vivali kolusoka luonjo kuenje wa tuma asualali konjila yikuavo. Rahava wa sapuila olondavululi hati: “Nda kũlĩha okuti, Yehova o laika oku eca ofeka yilo kokuene. Cilo, lisili lame. . . . Popeli omuenyo wa isiange, wa ina yange, wa vamanjange alume, wa vamanjange akãi lowu wa vosi va tiamẽla kokuavo.”

Kuenje olondavululi vio sapuila viti: “Tu ka eca omuenyo wetu omo liene!” Viamisako viti: “Ka tu ka kuata eko omo liohuminyo eyi ove wa tu lingisa oku lisila nda eci tu iñila vofeka yilo kua kutile ukolo owu wohusu ponjanela wa tu lowisila.”

Rahava wa lowisila olondavululi ponjanela yaye lukolo. Ovio via enda kolomunda kuenje oko via salama oloneke vitatu osimbu ka via endele ku Yehosua. Noke va Isareli va yoka Olui Yordão kuenje va lipongiyila oku tambula ofeka. O Yeriko ya kala olupale luatete ovo va tambula. Yehova wa va sapuila oco va ñuale imbo onjanja yimosi veteke okuti, va ci linga vokuenda kuoloneke epandu. Keteke liepanduvali ovo va ñuala imbo olonjanja epanduvali. Ovitunda via sika anguena kuenda asualali va kaluka lolukandi. Ovimbaka violupale via kupuka! Pole, onjo ya Rahava yina ya kala kocimbaka ka ya kupukile. Rahava kumue lepata liaye va popeliwa momo va kolelele Yehova.