Ovo ka va Tẽlisile Ohuminyo Yavo

Yehova wa sapuila Mose hati: “Lamanela kokuange komunda kuenje oko o kala. Ndu ku ĩha avaya ovawe a kuete ovihandeleko.” Mose wa lamanẽla Komunda Sinai kuenje wa kalako eci ci soka 40 kovotanya lovoteke. Osimbu Mose a kala komunda yaco, Yehova wa soneha ekũi Liovihandeleko kovitale vivali viovawe kuenje wa vi eca ku Mose.

Noke yoloneke vimue, va Isareli va fetika oku sima okuti Mose wa va yanduluka. Ovo va sapuila Arone vati: ‘Tu yongola omunu umue o tu songuila. Tu tungile osuku yimue!’ Arone wa popia hati: ‘Neni kokuange ovimbilingu viulu.’ Eye wa yengulula ulu waco kuenje wa tunga ociñumañuma congombe. Omanu va popia vati: “A Isareli, eyi oyo o Suku yove, yina ya ku songuila poku tunda kofeka Yegito!” Va Isareli va fetika oku fendela ociñumañuma culu kuenda va linga ocipito cimue. Anga hẽ ca sungulukile oku ci linga? Sio, momo omanu va likuminyile oku fendela lika Yehova. Pole, cilo va kasi oku nyõla ohuminyo yaco.

Yehova wa mola ovina via kala oku pita kuenje wa sapuila Mose hati: “Kuende, loka, momo omanu vove vana wa songuila poku tunda kofeka Yegito, va linga ekandu linene.” Mose wa loka komunda kuenda wambata ovitale vivali viovawe.

Eci Mose a pitĩla ocipepi locilombo, wa yeva omanu va kala oku imba. Noke wa mola okuti omanu va kasi oku piluka kuenda oku kekamẽla ociñumañuma. Ovina viaco via temisa calua Mose. Eye wa kupuila posi ovitale vivali viovawe kuenje via tetoka. Vepuluvi liaco, wa nyõla ociñumañuma caco. Kuenje Mose wa pula Arone hati: “Omanu ava va ku yapuisa ndati oco o va kokele ekandu linene?” Arone wa popia hati: “Ku ka teme. Ku ka teme a ñala yange. Ove wa kũlĩha ciwa okuti, omanu ava va tekela lika koku linga eci cĩvi. . . . Noke nda wimba vondalu kuenje mua tunda ociñumañuma eci conãle.” Arone ka kuatele esunga lioku linga ocina caco. Omo liaco, Mose wa tiukila vali Komunda Sinai kuenda wa livondela ku Yehova oco a ecele omanu vaco.

Yehova wa ecela omanu vana va kuatele onjongole yoku u pokola. O tẽla hẽ oku limbuka esunga lieci va Isareli va sukililile oku pokola kocikele ca Mose coku songola?