Yehova Lalimue Eteke a Ivalele Yosefe

Osimbu Yosefe a kala vokayike, Fareo soma yo Kegito, wa lota onjoi yimue okuti lomue wa tẽla oku situlula elomboloko liaco. Umue pokati kapika vaye, wa sapuila Fareo okuti Yosefe o pondola oku situlula elomboloko lionjoi yaye. Vepuluvi liaco, Fareo wa tuma oku vilikiya Yosefe.

Fareo wa pula Yosefe hati: ‘O tẽla hẽ oku situlula elomboloko lionjoi yange?’ Yosefe wa tambulula Fareo hati: “Vokuenda kuanyamo epanduvali, vofeka yosi Yegito mu ka kala okulia kualua. Pole, noke lianyamo aco, kuiya anyamo epanduvali onjala. Kaliye Fareo a sande omunu umue wa koleliwa haeye ukualondunge kuenda u kapa kocikele coku songuila ofeka Yegito.” Fareo wa popia hati: “Ove muẽle o kala usongui wonjo yange! Ndu ku ĩha ocikele coku kala usongui wofeka yosi Yegito!” Yosefe wa kũlĩhĩle ndati elomboloko lionjoi ya Fareo? Ocili okuti, Yehova wa kuatisa Yosefe.

Vokuenda kuanyamo epanduvali, Yosefe wongolola okulia kualua. Noke kueya oku kala onjala yalua vofeka yosi, ndomo Yosefe a ci popele. Omanu va tunda kolonepa vialua oco va lande okulia ku Yosefe. Isiaye Yakoba, eci a yeva okuti Kegito kuli okulia, wa tuma ekũi liomãla vaye oco va endeko oku ka landa okulia.

Omãla va Yakoba va enda ku Yosefe kuenje eye wa va limbuka vonjanja yaco. Pole, va huvaye ka vo limbukile. Ovo va kekamẽla Yosefe ndeci a lotele vonjoi eci a kala umalẽhe. Yosefe wa yonguile oku kũlĩha nda va huvaye handi vo suvuka. Kuenje Yosefe wa va sapuila hati: “Ene vulondavululi! Weyi kulo oku kũlĩhĩsa olonepa viofeka ka vi kuete eteyuilo!” Ovo va tambulula vati: “Sio! Akuenje vove va kasi 12 komãla. Vosi yetu tumãla wulume umosi kofeka yo Kanana kuenda kuasula wa siala la isietu.” Noke Yosefe wa va sapuila hati: “Ndi neneli manjene kuasula oco olondaka viene vi linge viocili.” Omo liaco, va tiukila konjo ku isiavo.

Eci okulia kuepata lia Yakoba kua pua, eye wa tuma omãla vaye oku tiukila Kegito. Onjanja eyi ovo vambatavo Benjamini manjavo kuasula. Oco Yosefe a seteke vahuvaye, wa kapa okopo yaye yopalata vonjeke ya Benjamini kuenda wa va lundila okuti va nyana okopo yaco. Eci apika va Yosefe va sanga okopo vonjeke ya Benjamini, vahuvaye va saluka. Noke ovo va pinga ku Yosefe oco a va kangise, okuti Benjamini hayeko.

Cilo Yosefe wa limbuka okuti va huvaye va pongoloka kovituwa. Yosefe ka tẽlele vali oku likandangiya. Kuenje wa fetika oku lila loku va sapuila hati: “Ame Yosefe. Isiange handi o kasi lomuenyo?” Vahuvaye va komõha calua. Pole, Yosefe wa va sapuila hati: “Ko ka liveteli evelo omo lioku ndandisa Kegito; momo Suku wa numa kovaso yene oco omuenyo wene u popeliwe. Kaliye kuendi lonjanga, kopi isiange u neni kulo.”

Ovo va enda konjo oco va sapuileko isiavo esapulo liwa kuenda oku u nena Kegito. Ndaño okuti Yosefe kuenda isiaye tunde eci va litepa pa pita anyamo alua, pole, veya oku kala vali kumosi.