Osapalalo yo Bavele

Noke Yetande omãla va Noha kumue lakãi vavo va kuata omãla valua. Kuenje epata liavo lia livokiya calua kuenda va lisanduila kolonepa viosi violuali, ndomo Yehova a va tumile oku linga.

Pole, omanu vamue vakuepata liaco ka va pokuile ku Yehova. Ovo va popia vati: “Tu litungili olupale kuenda osapalalo okuti, utue walio u pitĩla kovailu kuenda tu lilingili onduko ya kemãla.”

Yehova ka sanjukilile ovina omanu vaco va kala oku linga. Omo liaco, wa va tateka oku linga upange waco. Wa kũlĩha eci Yehova a linga? Vocipikipiki eye wa tatamisa upopi womanu vaco okuti va vangula alimi a litepa. Omo okuti lomue wa kuata elomboloko lieci ukuavo a popia, ovo va liwekapo oku tunga. Olupale luaco ovo va tunga, lueya oku tukuiwa okuti Bavele, ci lomboloka “Ombuanja.” Noke omanu va fetika oku lisanduila kolonepa viosi violuali. Pole, ovo vamamako oku linga ovina ka via sungulukile kovitumãlo kuna va lisanduila. Anga hẽ ka kua kalele vali omunu umue wa solele Yehova? Vocipama ci kuãimo tu ka ci konomuisa.