UKANDA WATETE WA YOANO

1 Tu vu soneheli eci catiamẽla ku una wa kala tunde kefetikilo, una tua yeva, tua vanja lovaso etu, tua mola kuenda tua lamba lovaka etu, tu vu soneheli eci catiamẽla kondaka yomuenyo,+ 2 (ocili, omuenyo ko pui wa tu situluiwa kuenda etu tua ci mola kuenje tu ci imbila uvangi+ loku ci lomboluila kokuene. Omuenyo ko pui waco,+ wa tunda ku Isia kuenje wa tu situluiwa), 3 Etu tua siata oku vu sapuili eci tua mola, leci tua yeva+ okuti, vu likuatavo omunga kumue letu ndeci etu tu likuete omunga kumue la Isia kuenda Lomõlaye Yesu Kristu.+ 4 Omo liaco, tu kasi oku vu soneheli ovina evi oco esanju lietu li suepo.

5 Eli olio esapulo tua yeva kokuaye kuenje tu kasi oku li sapuila kokuene okuti: Suku ocinyi+ kuenda vokuaye* ka muli owelema. 6 Nda tu popia hati: “Tu likuete omunga kumue laye,” pole, handi tu endela vowelema, tu kasi oku kemba kuenda ka tu kasi oku kuama ocili.+ 7 Pole, nda tu kasi oku endela vocinyi ndeci eye muẽle a kasi vocinyi, tu likuete omunga kuenda osonde ya Yesu Omõlaye yi tu yelisa kakandu etu osi.+

8 Nda tu popia hati: “Ka tu kuete ekandu,” tu kasi oku likemba etu muẽle+ kuenda ocili ka ci kasi vokuetu. 9 Pole, nda tu litavela akandu etu, eye wa koleliwa haeye ukuesunga oco a ecele akandu etu loku tu yelisa kekambo liosi liesunga.+ 10 Nda tu popia hati: “Ka tu kuete ekandu,” tu kasi oku u lingisa ohembi kuenda ondaka yaye ka yi kasi vokuetu.

2 Atumãla tuange, ñasi oku vu soneheli ovina evi okuti ka vu lingi ekandu. Pole, nda umue wa linga ekandu, tu kuete oñuatisi* yimue yi kasi kumue la Isia okuti, Yesu Kristu+ ukuesunga.+ 2 Eye ocilumba+ cakandu* etu+ cina ci tu linalisa la Suku okuti, hakandu etuko lika, pole, la-a oluali luosi.+ 3 Kuenje tu limbuka okuti tuo kũlĩha, nda tu amamako oku pokola kovihandeleko viaye. 4 Una o popia hati: “Ndo kũlĩha,” pole, ndaño ndoco ka pokola kovihandeleko viaye, ohembi kuenda ocili ka ci kasi vomunu waco. 5 Pole, una o pokola kondaka ya Kristu, o limbukiwa okuti o kuetele Suku ocisola cocili.+ Nda tua ci lingavo, tu ka lekisa okuti tu kasi vomunga kumue laye.+ 6 Una o popia okuti o kasi vomunga kumue laye, o sesamẽla oku endaenda ndeci Yesu a endaenda.+

7 A vamanji wa soliwi, si kasi oku vu soneheli ocihandeleko cokaliye, te ocihandeleko cimue cosimbu, cina vu kasi laco tunde kefetikilo.+ Ocihandeleko caco cosimbu, ondaka wa yevi. 8 Handi vali, ndi kasi oku vu soneheli ocihandeleko cokaliye, haico cocili vokuaye kuenda vokuene, momo owelema u kasi oku pita kuenje ocinyi cocili ci kasi ale oku nina.+

9 Una o popia okuti o kasi vocinyi, pole, o suvuka+ manjaye, eye handi o kasi vowelema.+ 10 Una o sole manjaye, amamako oku kala vocinyi+ kuenda vokuaye ka kuli lacimue ci koka ocilondokua. 11 Puãi, una o suvuka manjaye, o kasi vowelema haeye o kasi oku endela vowelema+ kuenda ka kũlĩhĩle oku a kasi oku enda,+ momo owelema wa tekãvisa ovaso aye.

12 Atumãla, ñasi oku vu soneheli, omo akandu ene a ecelua mekonda lionduko yaye.+ 13 A va isia, ñasi oku vu soneheli omo ene wa kũlĩhi una o kasi tunde kefetikilo. Ene amalẽhe, ñasi oku vu soneheli omo wa yuli ondingaĩvi.+ Ene atumãla, ndi vu soneheli omo wa kũlĩhi Isia.+ 14 A va isia, ñasi oku vu soneheli omo ene wa kũlĩhi una o kasi tunde kefetikilo. Ene amalẽhe, ndi vu soneheli omo wa pami+ kuenda ondaka ya Suku yi kasi oku amamako vokuene,+ haene wa yuli ondingaĩvi.+

15 Ko ka soli oluali ndaño ovina vi kasi voluali.+ Nda umue o sole oluali, ocisola ca Isia ka ci kasi vokuaye;+ 16 momo ovina viosi vi kasi voluali—oloñeyi vietimba,+ oloñeyi viovaso,+ oku litunila ovina viomuenyo*—ka vi tundi ku Isia, puãi vi tunda voluali. 17 Handi vali, oluali lu kasi oku pita loloñeyi vialio,+ pole, una o linga ocipango ca Suku, o kala otembo ka yi pui.+

18 Atumãla, yilo oyo owola ya sulako kuenje ndeci wa yevi okuti ku kasi oku iya antikristu,*+ ndaño cilo kua molẽha ale va antikristu* valua,+ omo liuvangi waco, tua kũlĩha okuti yilo oyo owola ya sulako. 19 Ovo va tunda pokati ketu, pole, ka va tiamẽlele kokuetu;+ momo nda va tiamẽlele kokuetu, nda vamamako oku kala pokati ketu. Puãi va tunda oco ci lekise okuti havosiko va tiamẽla kokuetu.+ 20 Ene wa wavekiwi la una o kola+ kuenje vosi yene wa ci kũlĩhi. 21 Ndi vu soneheli, si ci lingila omo okuti ka wa kũlĩhĩli ocili,+ pole, momo wa ci kũlĩhi kuenda ka kuli uhembi u tunda kocili.+

22 Ohembi helie, nda hayunako o likala okuti Yesu hayeko Kristu?+ Omunu waco eye antikristu, una o likala Isia kuenda Omõla.+ 23 Wosi o likala Omõla ka taviwa la Isia.+ Pole, wosi o popia okuti o tava Komõla+ o taviwavo la Isia.+ 24 Catiamẽla kokuene, ovina wa yevi tunde kefetikilo, vi amameko oku kala vokuene.+ Nda ovina wa yevi tunde kefetikilo viamamako oku kala vokuene, vu kamamakovo vomunga kumue Lomõla kuenda vomunga kumue la Isia. 25 Handi vali, eci a tu likuminya ceci—omuenyo ko pui.+

26 Ndi vu soneheli ovina evi viatiamẽla kuava va kasi oku seteka oku vu yapuisi. 27 Kuenje catiamẽla kokuene, oku wavekua eye a ku waveki+ lakuo ku amameko vokuene kuenda ka vu sukila vali okuti umue o vu longisi; pole, oku wavekua eye a ku waveki lakuo, ku vu longisi ovina viosi+ kuenda kuocili, hakuhembiko. Ndeci okuo kua ku longisi, amamiko oku kala vomunga kumue laye.+ 28 Omo liaco, atumãla, amamiko oku kala vomunga kumue laye oco okuti, eci eye a situluiwa tu kuata utõi woku vangula+ kuenje ka tu u yanduluka losõi ketukuluko liaye. 29 Nda wa kũlĩhi okuti eye ukuesunga, wa kũlĩhĩvo okuti wosi o lingainga esunga wa citiwa laye.+

3 Limbuki ocisola calua Isia a siata oku lekisa kokuetu+ okuti, tu tukuiwa omãla va Suku!+ Ocili, tumãla vaye muẽle. Eli olio esunga lieci oluali ka lua tu kũlĩhĩlile,+ momo oluo ka luo kũlĩhĩle.+ 2 A vamanji wa soliwi, cilo tumãla va Suku,+ pole, handi ka ca situluiwile ndomo tu ka kala.+ Tua kũlĩha okuti eci eye a situluiwa tu ka kala ndeye, momo tu ko mola ndomo eye a kasi. 3 Wosi o kuete elavoko liaco vokuaye,+ o liyelisa ndeci eye muẽle a yela.

4 Wosi o lingainga ekandu, o kasivo oku tomba ocihandeleko kuenda ekandu li lomboloka oku tomba ocihandeleko. 5 Ene wa kũlĩhĩvo okuti, eye wa situluiwa oco a maleko akandu etu+ kuenda vokuaye ka muli ekandu. 6 Omunu wosi amamako oku kala vomunga kumue laye ka lingainga ekandu;+ wosi o lingainga ekandu ko muile, ale oku u kũlĩha. 7 Atumãla, ko ka eceleli okuti umue o vu yapuisi; una o lingainga esunga, ukuesunga, ndeci eye ukuesunga. 8 Una o lingainga ekandu wa tunda Keliapu, momo Eliapu li lingainga ekandu tunde kefetikilo.*+ Eli olio esunga lieci Omõla a Suku a situluiwila, oco a nyõle* ovilinga Vieliapu.+

9 Wosi wa citiwa la Suku, ka lingainga ekandu,+ momo ombuto* Yaye yamamako vokuaye kuenda eye ka lingainga ekandu momo wa citiwa la Suku.+ 10 Omãla va Suku, lomãla Veliapu va limbukiwa ndoco: Wosi ka lingainga esunga ka tundi ku Suku, ndaño una ka sole manjaye.+ 11 Momo eli olio esapulo wa yevi tunde kefetikilo liokuti, tu sukila oku li sola pokati;+ 12 handeciko Kaini, una wa tunda kondingaĩvi kuenje wa ponda manjaye.+ Momo lie o pondela? Momo ovilinga viaye vĩvi,+ pole, via manjaye via kala viesunga.+

13 A vamanji, ko ka komõhi omo oluali luo suvuki.+ 14 Tua kũlĩha okuti tua kala ndu tua fa, pole, cilo tu kasi lomuenyo,+ momo tu sole vamanjetu.+ Una ka sole, amamako voku fa.+ 15 Wosi o suvuka manjaye, omondi+ kuenda wa kũlĩhi okuti, layimue omondi yi kuata omuenyo ko pui.+ 16 Tua kũlĩha ocisola, momo eye wa eca omuenyo waye mekonda lietu+ kuenda tu sesamẽlavo oku eca ovimuenyo vietu omo lia vamanjetu.+ 17 Puãi wosi o kuete ukuasi woluali lulo kuenje o mola okuti manjaye wa kambela cimue, pole, ndaño ndoco o likala oku lekisa ohenda kokuaye, ocisola ca Suku camamako ndati vokuaye?+ 18 Atumãla, ka tu ka soli londaka pamue lelimi,+ pole, te lovilinga+ kuenda locili.+

19 Omo liaco, tu ka kũlĩha okuti tua tiamẽla kocili kuenda tu ka tulisa ovitima vietu kovaso aye, 20 olonjanja viosi eci ovitima vietu vi tu pisa, momo Suku wa velapo, ovitima vietu vi sule kuenda eye wa kũlĩha ovina viosi.+ 21 A vamanji wa soliwi, nda ovitima vietu ka vi tu pisa, tu kuete elianjo lioku vanguila kovaso a Suku;+ 22 kuenda cosi tu pinga, tu ci tambula kokuaye,+ momo tu kasi oku pokola kovihandeleko viaye kuenda tu kasi oku linga ovina vi u sanjuisa. 23 Ocili okuti, ocihandeleko caye ceci cokuti: tu kuata ekolelo vonduko Yomõlaye Yesu Kristu+ kuenda tu lisola pokati+ ndeci eye a tu ĩha ocihandeleko. 24 Handi vali, una o pokola kovihandeleko viaye, amamako oku kala vomunga kumue laye kuenda eye o kala vomunga kumue lomunu waco.+ Kuenje omo liespiritu a tu ĩha, tua kũlĩha okuti eye amamako oku kala vomunga kumue letu.+

4 A vamanji wa soliwi, ko ka tavi kesapulo* liosi li molẽha+ ndu okuti lia tunda ku Suku, puãi kũlĩhĩsi asapulo* aco oco vu limbuki nda a tunda muẽle kokuaye,+ momo ovaprofeto valua vesanda va molẽha voluali.+

2 Vu kũlĩha okuti esapulo lia tunda ku Suku lonjila eyi: Esapulo liosi li limbuka okuti Yesu Kristu weyile palo posi ndomunu, lia tunda ku Suku.+ 3 Pole, esapulo liosi ka li limbuka Yesu, ka lia tundile ku Suku.+ Handi vali, eli esapulo lia antikristu,* lina wa yevi okuti lia kala oku iya+ kuenje cilo li kasi ale voluali.+

4 Atumãla, ene wa tundi ku Suku kuenje wa yuli ovaprofeto vesanda,+ momo una o kasi vomunga kumue lene+ wa velapo okuti, una o kasi vomunga kumue loluali o sule.+ 5 Ovo va tunda voluali;+ eli olio esunga lieci va popela ovina vi tunda voluali kuenje oluali lu va yevelela.+ 6 Etu tua tunda ku Suku. Wosi wa kũlĩha Suku, o tu yevelela;+ wosi ka tundi ku Suku, ka tu yevelela.+ Eci ci tu kuatisa oku limbuka esapulo liocili lesapulo liesanda.+

7 A vamanji wa soliwi, tu amamiko oku li sola pokati,+ momo ocisola ci tunda ku Suku kuenda wosi o sole wa citiwa la Suku, haeye wa kũlĩha Suku.+ 8 Wosi ka sole ka kũlĩhĩle Suku, momo Suku eye ocisola.+ 9 Ocisola ca Suku ca situluiwa ndoco kokuetu okuti, Suku wa tuma Omõlaye wongunga+ voluali oco tu kuate omuenyo pocakati caye.+ 10 Ocisola ka ci lomboloka okuti, etu tua sola Suku, puãi Suku eye wa tu sola kuenda wa tuma Omõlaye ndocilumba cakandu*+ etu cina ci tu linalisa la Suku.+

11 A vamanji wa soliwi, nda Suku wa tu sola ndoco, tu sesamẽlavo oku li sola pokati.+ 12 Lomue wa la mola Suku.+ Nda tu amamako oku li sola pokati, Suku amamako oku kala vokuetu kuenda ocisola caye vokuetu ci suapo.+ 13 Omo liondaka eyi, tua kũlĩha okuti tu kasi oku amamako oku kala vomunga kumue laye kuenda eye o kasi vomunga kumue letu, momo eye wa tu ĩha espiritu liaye. 14 Handi vali, etu muẽle tua ci mola kuenda tu imba uvangi wokuti Isia wa tuma Omõlaye Ndupopeli woluali.+ 15 Wosi o limbuka okuti Yesu Omõla a Suku,+ Suku amamako oku kala vomunga kumue laye kuenda omunu waco o kala vomunga kumue la Suku.+ 16 Tua kũlĩha kuenda tua kolela kocisola Suku a tu kuetele.+

Suku ocisola+ kuenda wosi amamako vocisola, amamako oku kala vomunga kumue la Suku kuenje Suku amamako oku kala vomunga kumue laye.+ 17 Omo liaco, ocisola ca suapo vokuetu, oco tu kuate elianjo lioku vangula*+ keteke liesombiso, momo ndeci eye a kasi, haico tu kasivo voluali lulo. 18 Kocisola ka kuli usumba,+ pole, ocisola ca lipua ci lupuisa* usumba, momo usumba u tu tateka. Ocili okuti, wosi o kuete usumba, ocisola ka ca suilepo vokuaye.+ 19 Etu tu sole, momo eye wa tu sola tete.+

20 Nda umue o popia hati: “Ndi sole Suku,” pole, lopo o kasi oku suvuka manjaye, ohembi.+ Momo una ka sole manjaye+ a lete, ka pondola oku sola Suku una ka lete.+ 21 Kuenje tu kuete ocihandeleko eci ca tunda kokuaye cokuti, wosi o sole Suku, o sukilavo oku sola manjaye.+

5 Omunu wosi o tava okuti Yesu eye Kristu, omunu waco omõla a Suku+ kuenda wosi o sole Suku o sole omãla va Suku. 2 Omo liovina viaco, tu kũlĩha okuti tu sole omãla va Suku eci tu sola Suku+ loku tẽlisa ovihandeleko viaye. 3 Eci oco ci lomboloka ocisola ca Suku okuti, tu pokola kovihandeleko viaye;+ puãi ovihandeleko viaye ka vi lemi,+ 4 momo wosi* wa citiwa la Suku o yula oluali.+ Kuenje eyulo lia yula oluali, ekolelo lietu.+

5 Helie o tẽla oku yula oluali?+ Hayunako hẽ o kolela okuti Yesu Omõla a Suku?+ 6 Yesu Kristu eye una weya pocakati covava losonde; eye keyile lika lovava,+ pole, weya lovava kuenda losonde.+ Kuenje espiritu limba uvangi,+ momo espiritu olio ocili. 7 Kuli ovina vitatu vi situlula ocili catiamẽla ku Yesu: 8 espiritu,+ ovava+ kuenda osonde;+ kuenje ovina viaco vitatu vi litava.

9 Nda tu tava kuvangi womanu, uvangi wa Suku wa velapo. Momo owu owo uvangi Suku a eca okuti, uvangi a eca watiamẽla Komõlaye. 10 Omunu o kolela Omõla a Suku, o kuete uvangi vokati kaye muẽle. Omunu ka kolela Suku, u lingisa ohembi,+ momo eye ka kolelele kuvangi wa eciwa la Suku watiamẽla Komõlaye. 11 Kuenje uvangi waco wowu wokuti, Suku wa tu ĩha omuenyo ko pui+ kuenda omuenyo waco u kasi Vomõlaye.+ 12 Una o tava Omõla, o kuete omuenyo waco; una ka tava Omõla a Suku, ka kuete omuenyo waco.+

13 Ndi vu soneheli ovina evi oco vu kũlĩhi okuti, omo wa koleli onduko Yomõla a Suku,+ vu kuete omuenyo ko pui.+ 14 Eli olio ekolelo* tu kuete kokuaye+ okuti, nda tu pinga ovina viosi vi likuata locipango caye, eye o tu yeva.+ 15 Kuenje nda tua kũlĩha okuti eye o tu yeva kovina viosi tu pinga, tua kũlĩha okuti tu tambula ovina tuo pinga, momo tua vi pinga kokuaye.+

16 Nda umue o lete manjaye okuti o kasi oku linga ekandu limue ka li tuala kolofa, eye o sukila oku u likutililako kuenje Suku o ka eca omuenyo kokuaye.+ Eci ci tiamisiwila ku vana ka va lingi ekandu li tuala kolofa. Pole, kuli ekandu li tuala kolofa.+ Catiamẽla kekandu liaco, si pingi oco a likutilileko omunu waco. 17 Ovilinga viosi vi li patãla lesunga, ekandu,+ puãi kuli ekandu limue okuti ka li tuala kolofa.

18 Tua kũlĩha okuti wosi wa citiwa la Suku, ka lingainga ekandu, puãi una wa citiwa la Suku* u lava kuenda ondingaĩvi ka yu lambi.*+ 19 Tua kũlĩha okuti tua tiamẽla ku Suku, puãi oluali luosi lu kasi povaka ondingaĩvi.+ 20 Pole, tua kũlĩha okuti Omõla a Suku weya+ kuenda wa tu ĩha elomboloko* oco tu kuate ukũlĩhĩso wa una okuti ukuacili. Kuenje etu, tu kasi vomunga kumue la una okuti ukuacili+ pocakati Comõlaye Yesu Kristu. U eye Suku yocili haeye omuenyo ko pui.+ 21 Atumãla, li lavi koviteka.+