UKANDA WAVALI KU TIMOTEO

1 Ame ndi Paulu, upostolo wa Kristu Yesu omo liocipango ca Suku ndomo ci likuata lohuminyo yomuenyo yi kasi vu Kristu Yesu,+ 2 ndi sonehela Timoteo omõla wa soliwa:+

Ohenda ya piãla, ocali, lombembua vi tunda ku Suku Isia kuenda ku Kristu Yesu Ñala yetu, vi kale love.

3 Ndi pandula Suku, una ñasi oku lingila upange u kola lowanji wutima wa yela, ndeci vakukululu yange va linga okuti, lalimue eteke ndi liwekapo oku ku ivaluka vapingilo ange uteke lutanya. 4 Eci ndi ivaluka asuelẽla ove, ñuata ongeva yoku ku mola, oco ndi kuate esanju lialua. 5 Momo ndi ivaluka ekolelo liove+ okuti haliombambeko, ekolelo lina lia kala tete vu nyokulu yove Loisi kuenda vu ina yove Eunike kuenje nda kolela okuti, halio o kuetevo.

6 Omo liaco, ndu ku ivaluisa oco amameko oku kuata ombili poku talavaya longavelo ya Suku, yina wa tambula eci nda ku kapa ovaka.+ 7 Momo ongusu ya pama ya Suku ka ya tu ĩhile utima wusumba,+ pole, ya tu ĩha utima wunene,+ wocisola kuenda wolondunge. 8 Omo liaco, ku ka kuate osõi yoku imba uvangi watiamẽla ku Ñala yetu+ ale uvangi watiamẽla kokuange, ndimandekua yimue mekonda liaye, pole, catiamẽla kokuove, pandikisa kohali+ omo liolondaka viwa poku kolela kunene wa Suku.+ 9 Eye wa tu popela, loku tu kovonga+ oco tu linge olosandu, hamekondako liovilinga vietu, te omo liocipango caye kuenda ohenda ya piãla.+ Eci ca tu ĩhiwa tunde osimbu vu Kristu Yesu, 10 puãi cilo ca molẽha ciwa mekonda lietukuluko Liupopeli wetu okuti, Kristu Yesu+ una wa imũla oku fa+ kuenje wa nena ocinyi komuenyo+ kuenda eci ka ci fi+ pocakati colondaka viwa,+ 11 vina nda nõliwila oku kala ukundi, upostolo kuenda ulongisi.+

12 Eli olio esunga lieci ame ndi kasililivo oku tala ohali omo liovina evi,+ pole, si kuete osõi.+ Momo nda kũlĩha Una nda kolela kuenda nda kolela okuti, eye o tẽla oku teyuila ovina viosi ndo kundika toke keteke lia sokiyiwa.+ 13 Kakatela kongangu* yolondaka viocili*+ vina wa yeva kokuange lekolelo kuenda locisola vi tunda koku kala vomunga kumue la Kristu Yesu. 14 Lava eci ca ku kundikiwa omo liespiritu sandu, lina li kasi vokuetu.+

15 Ove wa kũlĩha okuti, omanu vosi voluvumba luo Asia+ va ndi yanduluka, oku kongelamo Fungelo, la Hermogene. 16 Ñala a lekise ohenda ku vakuanjo ya Onesiforo,+ momo eye olonjanja vialua wa ndi lembeleka kuenda ka kuatele osõi omo ndi kasi kalienge. 17 Pole, eci eye a kala ko Roma, wa ndi sandiliya calua toke eci a ndi sanga. 18 Ñala a ecelele okuti eye o sanga ohenda ku Yehova* keteke lia sokiyiwa. Kuenje ove wa kũlĩha ciwa upange wosi eye a linga vo Efeso.

2 Omo liaco, amõlange,+ amamako oku kuata ongusu pocakati cohenda ya piãla yi kasi vu Kristu Yesu; 2 kuenda ovina wa yeva kokuange okuti valua va vi imbila uvangi,+ ovina viaco vi kundika kalume va koleliwa vana okuti, noke va tẽla oku vi longisa ku vakuavo. 3 Catiamẽla kokuove, pandikisa kohali+ ndesualali liwa+ lia Kristu Yesu. 4 Lomue omunu o kasi ndesualali o sakalala* lomĩlu* yoku sanga onganyu, oco a sanjuise u wo sonehisa kusualali. 5 Ndaño kolomapalo, omunu o tambula lika ekolowa nda wa linga olomapalo viaco ndomo ci likuata lolonumbi.+ 6 Ongunja yi talavaya calua, oyo yi sesamẽla oku lia tete kapako. 7 Sokolola lutate kueci ñasi oku popia; kuenje Ñala o ka ku ĩha elomboloko* kovina viosi.

8 Ivaluka okuti Yesu Kristu wa pinduiwa kuava va fa+ kuenda eye wa kala ocitumbulukila ca Daviti,*+ ndomo ci likuata lolondaka viwa ndi kunda,+ 9 momo oco ñasilili oku tala ohali loku kapiwa kalienge ndondingaĩvi.+ Puãi ondaka ya Suku ka ya kutiwile.+ 10 Omo liaco, ñasi oku amamako oku pandikisa kovina evi viosi mekonda liava va nõliwa+ oco okuti, ovo va kuatavo epopelo, lina liyilila pocakati ca Kristu Yesu kumue lulamba ka u pui. 11 Ondaka eyi ya koleliwa: Ocili okuti, nda tu fila kumuamue, tu ka muĩlavo kumue omuenyo;+ 12 nda tuamamako oku pandikisa, tu ka vialavo kumosi ndolosoma;+ nda tu u likala, eye o ka tu likalavo;+ 13 nda tua siapo oku kala vakuekolelo, eye amamako oku kala ukuekolelo, momo eye ka pondola oku li likala eye muẽle.

14 Amamako oku va ivaluisa ovina evi, loku va pindisa* kovaso a Suku okuti, ka va liyaki omo liolondaka okuti, ocina cimue ka ci kuete esilivilo, momo ci kapa kohele* vana va yevelela. 15 Likolisilako oco o taviwe la Suku, ndondingupange ka yi kuete lacimue cu kutisa osõi, loku talavaya ciwa londaka yocili.+ 16 Puãi yuvula olombangulo ka vi kuete esilivilo okuti vi tomba ovina vi kola,+ momo ovio vi kamamako oku sinĩla Suku, 17 kuenje olondaka viavo vi ka lisandula ndepute liosembuembue.* Humeneo, la Filetu vamue pokati kavo.+ 18 Alume vaco, va yapuka vocili, loku popia okuti epinduko lia lingiwa+ ale kuenda va kasi oku nyõla ekolelo lia vamue. 19 Handi vali, ociseveto ca pama ca Suku ci tãi kuenda ci kuete ondimbukiso yokuti: “Yehova* wa kũlĩha ava va tiamẽla kokuaye”+ kuenda yokuti: “Vosi vana va kolela konduko ya Yehova*+ va sukila oku siapo ovina okuti haviesungako.”

20 Vonjo yimue yinene ka muli lika ovikuata* viulu, levi viopalata, pole, mulivo viavaya kuenda viotuma, vimue via sumbiwa vikuavo ka via sumbiwile. 21 Kuenje nda umue o litepa levi via sulako, o linga ocikuata* ca sumbiwa, ci kola, ci kuete esilivilo ku muẽle yaco, haico ca pongiyiwila upange wosi uwa. 22 Omo liaco, tila oloñeyi viovomalẽhe, sanda esunga, ekolelo, ocisola kuenda ombembua la vana va vilikiya Ñala lutima wa yela.

23 Handi vali, yuvula olondaka viuveke levi vioku lipatãla,+ omo wa kũlĩha okuti vi koka uyaki. 24 Momo upika wa Ñala ka sukila oku yaka, pole, o sukila oku unjuka* la vosi,+ oku loñolõha koku longisa kuenda oku likandangiya eci a tatiwa lãvi,+ 25 loku longisa lumbombe vana ka va tava kovina o popia.+ Citava okuti, Suku o va ĩha utima woku likekembela,* u tuala kukũlĩhĩso wa suapo wocili,+ 26 okuti olondunge viavo viyamo kuenje va puluka konjanjo Yeliapu omo okuti, va kuatiwile laye oco va linge ocipango caye.+

3 Kũlĩha okuti koloneke via sulako,+ ekalo li ka tĩla calua halio li koka ohele. 2 Momo omanu va ka linga vakuakulisola ovo muẽle, vakuakusola olombongo, vakuakulipanda, vakuakulivelisapo, vakuakupopia atonãi, vakuakusinĩla olonjali, vakualutukãi, havakuaciliko, 3 ka va ka kuata ocisola la vangandiavo, vakuamanya, vakualundi, ka va ka tẽla oku likandangiya, olongangala, ka va ka sola eci ciwa, 4 olomakuli, vakualonamãlãla, vakuepela, vakuakusola ayele okuti Suku ci sule, 5 va ka li lekisa ndu okuti va sumbila Suku, pole, va ka likala unene waye+ vomuenyo wavo; kuenje litepa lavo. 6 Momo pokati kavo pa tunda alume va yapuisa omanu volonjo loku liyombaika kuenje va kambata kupika akãi va hongua haivo va lemẽlelua* loku songuiwa loloñeyi vialua, 7 ndaño va lilongisa otembo yosi, lopo ka va tẽla oku sanga ukũlĩhĩso wa suapo wocili.

8 Ndeci Jane, la Jambre va tamalãla la Mose, alume vaco vamamakovo oku tamalãla locili. Ovo va vĩhisua vutima kuenje Suku wa va pisa, momo ka va kasi oku enda ndomo ci likuata lekolelo. 9 Puãi ka va ka enda kupãla, momo uveke* wavo u ka limbukiwa la vosi, ndeci ca pita la Jane kuenda Jambre.+ 10 Pole, ove wa kuama lutate alongiso ange, ovilinga viange,+ ovimãho viange, ekolelo liange, epandi liange, ocisola cange, oku pandikisa kuange, 11 alambalalo kuenda olohali ndevi nda talisiwa ko Antiokea,+ ko Ikoniyu,+ lo ko Lustra.+ Nda pandikisa kalambalalo aco kuenje Ñala wa ndi yovola kovina viaco viosi.+ 12 Ocili, vosi vana va yongola oku ambata omuenyo umue woku sumbila Suku ndolondonge via Kristu Yesu, va ka lambalaliwavo.+ 13 Puãi omanu vãvi kuenda olohembi va kamamako oku linga eci cĩvi, oku yapuisa loku yapuisiwa.+

14 Ove puãi, amamako lovina wa lilongisa haivio wa vetiyiwa oku tava,+ momo ove wa kũlĩha omanu va ku vi longisa, 15 omo okuti tunde vutila+ wa kũlĩha ovisonehua vi kola,+ vina vi ku kuatisa oku kuata olondunge vi ku tuala kepopelo pocakati cekolelo li kasi vu Kristu Yesu.+ 16 Ovisonehua viosi vi Kola, vi tunda ku Suku+ kuenje ovio vi silivila koku longisa,+ koku pisa, koku suñamisa ovina* koku pindisila vesunga,+ 17 oco okuti ukuenje wa Suku o loñoloha loku liangiliyila upange wosi uwa.

4 Ndu ku handeleka kovaso a Suku kuenda kovaso a Kristu Yesu una o ka sombisa+ vana va kasi lomuenyo lava va fa,+ eci a molẽha ciwa+ kuenda eci eya Vusoma waye:+ 2 Kunda ondaka;+ ci linga lonjanga, ci kaile kotembo yiwa ale kotembo yovitangi; lemẽla,+ lungula, vetiya lepandi liosi kuenda luloño woku longisa.+ 3 Momo ku keya otembo yimue okuti, omanu ka va ka tava kelongiso liocili,*+ puãi omo lioku kuama olonjongole viavo muẽle, va ka liongoluila alongisi oco va yeve eci ovatũi avo a sanjukila oku yevelela.*+ 4 Ovo va ka liwekapo oku yeva ocili, oco va yevelele ovolandu esanda. 5 Amamako oku lava uloño wove woku sokolola kovina viosi, pandikisa kohali,+ linga upange wukundi,* tẽlisa ciwa upange wove u kola.+

6 Momo ñasi ale ndocilumba coku nyua ci kasi oku pesiwa kutala+ kuenda otembo yange yoku yovuiwa+ yi kasi ocipepi. 7 Nda yaka uyaki uwa,+ nda mala oku yoloka,+ nda kuama ekolelo. 8 Cilo Ñala una o sombisa lesunga,+ wa ndi selekela ekolowa.+ Ekolowa liaco, li eciwa ku vana okuti vakuesunga. Eye o ka li eca kokuange ndonima keteke liaco.+ Eye ka ka li eca lika kokuange, pole, o ka li eca ku vosi vana va lavoka oku molẽha kuaye.

9 Likolisilako oco ndopo o ndi nyule. 10 Momo Dema+ wa njanduluka omo lioku sola oluali lulo* kuenje wa enda ko Tesalonike, Kreske wa enda ko Galatia, Tito ko Dalmatiya. 11 Luka eye lika o kasi lame. Enju la Marko, momo o ñuatisi yiwa kokuange kupange woku kunda. 12 Pole, nda tuma Tukiko+ ko Efeso. 13 Eci wiya, nenele osembele nda sia ko Torasi ku Karpo kuenda oviña, ca piãla enene oviña viovipa.

14 Alexandro uteli wosipi wa ndinga calua cĩvi. Yehova* o ko fetuluinya ndomo ci likuata lovilinga viaye.+ 15 Lovevo lunguka laye, momo wa patãla calua esapulo lietu.

16 Kekanga liange liatete lomue wa nundila olunda, pole, vosi yavo va njanduluka, Suku ka ka va pisile ekandu liaco. 17 Pole, Ñala wa talama ocipepi lame, yu wa nyĩha ongusu oco ndi kunde ciwa olondaka viwa okuti, olofeka viosi vi ci yeva;+ kuenje nda yovuiwa la Ñala vomẽla wohosi.+ 18 Ñala o ka ndi yovola kũvi wosi kuenda o ka ndi popela oco ndi iñile Vusoma waye wo kilu.+ Kokuaye ku kale ulamba otembo ka yi pui. Amene.

19 Eca ovilamo viange ku Priska, la Akuila+ kuenda ku vakuanjo ya Onesiforo.+

20 Erasto+ wa siala ko Korindo, pole, nda sia Trofimo+ ko Miletu okuti o kasi oku vela. 21 Likolisilako oku iya osimbu ombambi ka ya fetikile.

Eubulo wa ku tumisa ovilamo kuenda Pudeni, la Linu, la Klaudia kuenda vamanji vosi va ku tumisavo ovilamo.

22 Ñala a kale lespiritu o lekisa. Ohenda yaye ya piãla yi kale lene.