UKANDA WATETE KU TIMOTEO

1 Ame ndi Paulu, upostolo wa Kristu Yesu omo liocihandeleko ca Suku Upopeli wetu kuenda ca Kristu Yesu elavoko lietu,+ 2 ndi sonehela Timoteo*+ okuti, omõla wocili+ vekolelo:

Ohenda ya piãla, ocali, lombembua vi tunda ku Suku Isia kuenda ku Kristu Yesu Ñala yetu, vi kale love.

3 Ndeci nda ku vetiya oku kala ko Efeso eci nda laikele oku enda ko Makedonia, cilo hu vetiya vali okuti o handeleka omanu vamue oco ka va ka sandeke alongiso esanda, 4 ndaño oku yevelela asapulo esanda+ kuenda oku konomuisa ovikoti via vakukululu. Ovina viaco ka vi kuete esilivilo,+ pole, vi koka lika atatahãi, ka vi nena lacimue ci tunda ku Suku ndomo ci likuata lekolelo. 5 Ocili okuti, ocimãho conumbi eyi,* ocisola+ ci tunda kutima wa yela kuenda kowanji uwa wutima lo kekolelo+ okuti, haliombambeko. 6 Kuenje vamue omo lioku likala ovina viaco, va likongela kolombangulo vĩvi.+ 7 Ovo va yongola oku kala alongisi+ vovihandeleko, pole, ka va kuete elomboloko liovina va popia, ale liovina va vangula lekolelo lialua.

8 Tua kũlĩha okuti Ocihandeleko ca sunguluka lika nda ci kapiwako ciwa, 9 poku limbuka okuti ocihandeleko ka ci tumbikiwila omunu ukuesunga, pole, te vana vakuakutomba ovihandeleko,+ vakuesino, vakuakutomba Suku, vakuakandu, vana havakuaciliko,* vakuevĩho, vakuakuipaya va isiavo, ale va ina yavo, olomondi, 10 vakuevĩho liukahonga,* alume vakuakulipekela lalume,* vakuakuambata utiku, olohembi, vana ka va tẽlisa olohuminyo viavo* kuenda ovina viosi vi patãla elongiso liocili,*+ 11 ndomo ci likuata lolondaka viwa viulamba wa Suku ukuesanju, vina nda kundikiwa.+

12 Ndi pandula Kristu Yesu Ñala yetu, una wa nyĩha unene, omo a ndi tenda okuti nda koleliwa poku ñundika upange u kola,+ 13 ndaño kosimbu nda kala ukuakupopia Suku atonãi, ukuakulambalala kuenda ukuakutondala.+ Puãi nda lekisiwa ohenda, momo nda kala vonumbi kuenda sia kuatele ekolelo. 14 Pole, ohenda ya piãla ya Ñala yetu kumue lekolelo kuenda ocisola, via livokiya calua vu Kristu Yesu. 15 Olondaka evi via koleliwa kuenda vi sesamẽla oku taviwa okuti: Kristu Yesu weya voluali oku popela vakuakandu.+ Pokati kavo, ame ñuetepo vali ekandu.+ 16 Pole, nda lekisiwa ohenda oco okuti pocakati cange, ndu okuti ñuetepo vali ekandu, Kristu Yesu o lekisa epandi liaye liosi poku ndi lingisa ndongangu ku vana va laika oku kolela kokuaye oco va kuate omuenyo ko pui.+

17 Kaliye ku Soma yonahũlũlua+ okuti ka fi,+ ka muiwa lovaso,+ haeye lika Suku,+ ku kale esumbilo kuenda ulamba otembo ka yi pui. Amene.

18 Amõlange a Timoteo, ndu ku ĩha onumbi* eyi, ndomo ci likuata lovitumasuku via lingiwa viatiamẽla kokuove okuti, mekonda liavio ove amamako oku yaka uyaki uwa,+ 19 poku kakatela kekolelo kuenda kowanji uwa wutima,+ vina vamue va likala kuenda ekolelo liavo lia nyõleha ndonaviyu ya teka. 20 Humeneo+ la Alexandro, vamue pokati kavo kuenje ame nda va eca ku Satana+ oco va longisiwe poku pindisiwa okuti, ka va popi Suku etonãi.

2 Catete, ndi pinga okuti vu lombelako omanu vosi loku va likutililako kuenda oku va lingilako apingilo, loku va ecelako olopandu, 2 ci lingilivo olosoma kuenda vosi vana va kasi kolomangu via velapo,*+ oco tu kali lomuenyo umue wonjuka haiwo wombembua, loku sumbila Suku lutima wosi kuenda lombili.+ 3 Ovina viaco, viwa kuenda via sunguluka kovaso a Suku Upopeli wetu,+ 4 una o yongola okuti omanu vosi va popeliwa+ kuenda va kuata ukũlĩhĩso wa suapo wocili. 5 Momo kuli Suku umosi lika+ kuenda mitakati umosi+ pokati ka Suku lomanu+ okuti, omunu waco Kristu Yesu,+ 6 una wa lieca ndocisembi coku yovola vosi*+—kuenje eci oco ci ka imbiwa uvangi kotembo ya sokiyiwa. 7 Oco ku eciwe uvangi waco,+ nda nõliwa oku kala ukundi kuenda upostolo+—ñasi oku vangula ocili, si kasi oku kemba—nda nõliwilavo oku kala ulongisi wa vakualofeka+ catiamẽla kekolelo kuenda kocili.

8 Kuenje ndi yongola okuti, kovitumãlo viosi alume vamamako oku kola kuenda oku tulika ovaka avo poku likutilila+ okuti, ka va ci lingi lonyeño+ pamue loku hoya.+ 9 Cimuamue haico okuti, akãi va sukila oku liposuisa, luwalo wa sunguluka,* lesunguluko kuenda lolondunge, halokuvindako esinga lonjila yimue ka ya sungulukile, pamue lulu, ale lolomota viondongo, pamue luwalo wa tĩla calua,+ 10 pole, ndeci ca sesamẽla kakãi va popia okuti va fendela Suku,+ pocakati covilinga viwa.

11 Ukãi osimbu a longisiwa, o sukila oku ũha* kuenda oku lekisa epokolo kulume.+ 12 Si ecelela okuti ukãi o longisa, pamue o viala ulume, pole, amameko oku ũha.*+ 13 Momo Adama eye wa lulikiwa tete, noke Eva.+ 14 Handi vali, Adama ka yapuisiwile, ukãi eye wa yapuisiwa+ kuenje wa linga ukuekandu. 15 Pole, ukãi o ka popeliwa omo lioku cita omãla,+ nda eye* wamamako vekolelo, vocisola kuenda oku kola loku kuata olondunge.+

3 Ondaka eyi ya koleliwa: Nda ulume umue o kasi oku likolisilako oku sanda ocikele coku kala mitavaso,+ o yongola upange uwa. 2 Mitavaso a pue eko, a linge ulume wukãi umosi, a likandangiye kovituwa, a kale ukualondunge,*+ ukuotate, ukuakuyekisa akombe,+ a loñolõhe koku longisa,+ 3 ka ka kale oholua,+ ka ka linge ongangala,* pole, a sunguluke,+ ka ka kale ukuavama+ kuenda ka ka kale ukuakusola olombongo,+ 4 a songuile ciwa epata liaye muẽle, a pokuise omãla vaye okuti va lekisa ovituwa viwa loku kuata esumbilo,+ 5 (momo nda ulume umue ka tẽla oku songuila epata liaye muẽle, o ka tẽla ndati oku tata ekongelo lia Suku?), 6 hayunako wa tava ndopo,+ oco ka ka lipande loku litunula kuenda oku kupukila veyambulo lia sokiyiwila Eliapu. 7 Handi vali, vana ka va kasi vekongelo te vo wimbila uvangi uwa,*+ oco ka ka pembuiwe* loku kupukila vonjanjo yimue Yeliapu.

8 Oloñuatisi viekongelo, laviovo vi kale omanu va sumbiwa, ka vi ka kale lalimi avali,* ka vi ka nyue ovinyu yalua, ka vi ka livele onganyu yevĩho,+ 9 vi kakatele kelumbu li kola liekolelo lowanji wutima wa yela.+

10 Handi vali, ovo va setekiwe tete nda va tẽla* oku tẽlisa ocikele caco; kuenje nda ka va kuete eko+ va pondola oku kala oloñuatisi viekongelo.

11 Akãi lavovo va linge vakuacili, ka va ka linge vakualombonde,+ va likandangiye kovituwa, va koleliwe kovina viosi.+

12 Oloñuatisi viekongelo vi linge alume wukãi umosi, vi songuile ciwa omãla vavo kuenda epata liavo muẽle. 13 Momo alume vana va vumba lonjila yimue ya sunguluka, va kasi oku sandiliya oluhimo luwa kuenda va pondola oku vangula lutõi walua catiamẽla kekolelo liavo vu Kristu Yesu.

14 Ame ñasi oku ku sonehela ovina evi ndaño okuti, ndi lavoka oku iya ndopo kokuove, 15 oco okuti nda nda tumãla, ove o kũlĩha ndomo o sukila oku lekisa ovituwa via sunguluka vepata lia Suku+ okuti, ekongelo lia Suku o kasi lomuenyo, hailio ongunji kuenda eteyuilo liocili. 16 Ocili okuti, elumbu li kola lioku vumba Suku linene: ‘Eye wa situluiwa ketimba,+ wa tendiwa ndukuesunga vespiritu,+ wa molẽhela kovangelo,+ wa kundiwila pokati kolofeka,+ wa taviwa voluali+ kuenje wa tambuiwa kovailu lulamba.’

4 Ondaka* yi tunda ku Suku yi popia okuti kovaso yoloneke, vamue va ka yapuka vekolelo, loku yevelela asapulo esanda a molẽha ndu okuti a tunda ku Suku*+ kuenda alongiso olondele, 2 omo liombambe yomanu va vangula uhembi+ haivo, owanji wutima wavo wa kakuiwa ndu okuti locivela ca sanya. 3 Ovo va pisa oku kuela+ loku handeleka omanu oku yuvula oku lia+ ovina Suku a lulika oco vi liwe+ lolopandu la vana va kuete ekolelo+ haivo va kũlĩha ciwa ocili. 4 Momo oviluvo viosi via Suku viwa+ kuenda lacimue ci nyehũiwa+ nda ci tambuiwa lolopandu, 5 momo ovina viaco, vi kolisiwa pocakati condaka ya Suku kuenda cohutililo.

6 Poku eca elungulo liaco ku vamanji, ove o ka linga ondingupange yiwa ya Kristu Yesu, una wa tekuiwa lolondaka viekolelo kuenda vielongiso liwa lina ove wa siata oku kuama lekolelo.+ 7 Pole, yuvula ovolandu esanda+ ndeci ana a lomboluiwa lakãi va kuka. Handi vali, li pindisa ove muẽle kuenda kuata ocimãho coku sumbila Suku. 8 Momo oku pokuisa etimba* ku kuete esilivilo litito, pole, oku sumbila Suku ku silivila kovina viosi, momo ku tu likuminya oku tu kuatisa komuenyo wetu cilo kuenda komuenyo wetu wo kovaso yoloneke.+ 9 Ondaka eyi ya koleliwa kuenda yi sesamẽla oku taviwa lutima wosi. 10 Eli olio esunga lieci tu talavayela calua loku likolisilako,+ momo tua tiamisila elavoko lietu ku Suku o kasi lomuenyo una okuti, Upopeli+ womanu vosi,+ ca piãla enene ku vakuekolelo.

11 Amamako oku eca olonumbi evi loku vi longisa. 12 Lalimue eteke ku ka ecelele okuti umue oku lavisa omo wumalẽhe. Pole, lekisa ongangu yiwa ku vakuekolelo koku vangula, kovituwa, kocisola, kekolelo kuenda koku pua etondelo.* 13 Toke eci njiya, amamako oku litumbika koku tangela omanu,+ koku lungula* kuenda koku longisa. 14 Ku ka sepule ongavelo o kuete, yina ya ku ĩhiwa pocakati cocitumasuku, eci ocimunga cakulu vekongelo ca ku kapa ovaka.+ 15 Sokolola* kovina evi; litumbika kokuavio okuti, omanu vosi va limbuka muẽle oku amako kuove. 16 Li lava ove muẽle, lavavo oku longisa kuove.+ Pandikisa kovina evi, momo poku ci linga o ka li popela ove muẽle kuenda vana va ku yeva.+

5 Ku ka vangule lukulu wendamba loku kelõha.+ Pole, u tenda nda isiove, amalẽhe alume va tenda nda vamanjove alume, 2 akãi akulu va tenda nda va ina yove, amalẽhe akãi nda vamanjove akãi, lutima wa yela.

3 Kapako* ovimbumba vina okuti ovimbumba muẽle.*+ 4 Nda ocimbumba cimue ci kuete omãla, ale olonekulu, vi li longise tete oku sumbila Suku vepata liavo+ kuenda oku tiuwila kolonjali viavo, lo kolosekulu viavo eci ovio vi sesamẽla,+ momo eci oco ca sunguluka kovaso a Suku.+ 5 Ukãi okuti ocimbumba muẽle kuenje ka kuete cimue, o tiamisila elavoko liaye ku Suku+ kuenda amamako lapingilo kumue lolohutililo utanya luteke.+ 6 Pole, ocimbumba cina ci kasilili lika oku tẽlisa olonjongole* viaye, ndaño ci kasi lomuenyo, ca fa ale. 7 Amamako oku eca olonumbi evi* oco okuti, ovio ka vi pisiwa. 8 Ocili okuti, nda umue ka eci ku vana vatiamẽla kokuaye ovina va sukila, ca piãla enene ku vakuepata liaye muẽle, o likala ekolelo kuenda omunu una ka kuete ekolelo wo velapo.+

9 Ocimbumba cukãi ci sonehiwe kulala nda ca tẽlisa ale 60 kanyamo, nda okuti wa kala ukãi wulume umosi, 10 nda o kuete oluhimo luovilinga viwa,+ nda wa tekula omãla,+ nda wa yekasaile akombe,+ nda wa enda oku sukula olomãhi violosandu,+ nda wa enda oku kuatisa vana va suka+ kuenda nda wa enda oku lekisa ombili kupange wosi uwa.

11 Handi vali, ku ka sonehe kulala ovimbumba amalẽhe, momo eci olonjongole viavo vioku lipekela vi tateka ukamba wavo la Kristu, va yongola oku kuela. 12 Kuenje ovo va ka pisiwa omo va siapo ekolelo liavo liatete.* 13 Handi vali, va lingavo ovisiãi, loku enda konjo lanjo; ocili, ka va lingile lika ovisiãi, pole, va lingavo vakualombonde, haivo va litenga vovitangi viamãle,+ loku popia ovina ka va sesamẽla oku vi popia. 14 Omo liaco, ndi yongola okuti ovimbumba amalẽhe vi kuela,+ vi cita omãla,+ vi tata epata liavo okuti, ka vi eci kunyãli evelo lioku sepula. 15 Ocili okuti, ovimbumba vimue via yapuisiwa ale kuenje via kuama Satana. 16 Nda manji umue ukãi o kuete vakuepata liaye okuti ovimbumba, a va kuatise, oco ekongelo ka li ka kale locilemo caco. Kuenje eci cecelela okuti, ekongelo li tata ovimbumba vina okuti ovimbumba muẽle.*+

17 Akulu vekongelo vana va songola ciwa,+ va sesamẽla esumbilo lialua,+ ca piãla enene vana va talavaya calua koku vangula kuenda koku longisa.+ 18 Momo ocisonehua ci popia citi: “Ku ka munĩhe* omẽla wongombe osimbu yi kasi oku sasa olomema”+ kuendavo citi: “Onalavayi yi sesamẽla ofeto yayo.”+ 19 Ku ka tave kondaka yoku pindika* ukulu umue wekongelo, te lika nda kuli olombangi vivali ale vitatu.+ 20 Vana va linga ekandu+ va pisila+ kovaso yomanu vosi, oco ci kale ndelungulo ku vakuavo.* 21 Ndu ku handeleka kovaso a Suku, la Kristu Yesu kuenda kovangelo va nõliwa, oco o pokole kolonumbi evi okuti, ku kuata olonepele ale ocame.+

22 Lalimue eteke, ku ka kape lonjanga ovaka kulume umue;*+ ndaño oku litenga vakandu a vakuene; kuenje amamako oku pua etondelo.

23 Ku ka nyue vali ovava,* puãi nyuapo kamue ovinyu omo liuvei wove wo vimo kuenda ovovei akuavo wa siata oku kuata.

24 Akandu omanu vamue a kũlĩhĩwa lowiñi kuenje a tuala kesombiso, pole, akandu omanu vakuavo a limbukiwa noke.+ 25 Cimuamue haico okuti, ovilinga viwa, vi kũlĩhĩwa lowiñi+ kuenje vina ka vi kũlĩhĩwa, ka vi pondola oku amamako oku solekiwa.+

6 Vana okuti apika, vamameko oku tenda vacime cavo okuti va sesamẽla esumbilo lialua+ oco okuti, onduko ya Suku lalongiso aye lalimue eteke vi tombiwa.+ 2 Handi vali, vana okuti vacime cavo vakuetavo, ka va ka va tombe omo okuti vamanji. Pole, va sukila oku vumba ciwa, momo vana va tava la vana va soliwe ovo va tambula ekuatiso liupange wavo uwa.

Amamako oku longisa ovina evi, loku eca alungulo a-a. 3 Nda omunu umue o sandeka alongiso esanda, haeye ka tava kelongiso liocili*+ lina li tunda ku Ñala yetu Yesu Kristu, ndaño kalongiso a lekisa ndomo tu vumba Suku,+ 4 eye o kuete epela loku litunula kuenda ka kuete elomboloko lalimue.+ Eye o mamõha loku lipatãla lolondaka.+ Ovina evi, vi koka onya, ema, alundi,* ekambo lioku kolela vakuavo, 5 oku lihoya calua omo liovina vitito lomanu vana vakuavitima via vĩha,+ haivo ka va kuete elomboloko liocili kuenda va sima okuti oku vumba Suku okuo onjila yimue yoku kuata onganyu.+ 6 Ocili okuti, koku vumba Suku ku tunda onganyu yalua,+ nda tua sanjukila eci tu kuete. 7 Momo ka tua nenele lacimue voluali kuenda ka tu pondolavo oku ambata lacimue.+ 8 Omo liaco, nda tu kuete okulia* luwalo,* tu sanjuka lovina viaco.+

9 Puãi vana va nõlapo oku kala olohuasi, va wila veyonjo lo vonjanjo+ kuenda voloñeyi vĩvi haivio viuveke vi tuala omanu kenyõleho.+ 10 Momo ocisola coku sola olombongo oco olumbombo luovina viosi vĩvi kuenje vamue poku sandiliya ocisola caco, va yapuisiwa vekolelo kuenda va litoma lohali yalua.+

11 Omo liaco, okuenje wa Suku, yuvula ovina evi. Pole, sanda esunga, loku sumbila Suku, kuata ekolelo, ocisola, epandi kuenda esuluviko.+ 12 Yaka uyaki uwa wekolelo; kakatela komuenyo ko pui una wa kovongiwila kuenda wa li situluila kovaso yolombangi vialua.

13 Kovaso a Suku una eca omuenyo kovina viosi kuenda kovaso a Kristu Yesu una wa imba uvangi uwa kovaso a Pondiu Pilato,+ ndu ku handeleka 14 oco okuti, o pokola kolonumbi lonjila yimue okuti o pua eko kuenda ku pisiwa toke ketukuluko lia Ñala yetu Yesu Kristu,+ 15 lina okuti una wa sumũlũisiwa haeye Ñala Ukuonene, a ka lekisa votembo ya sokiyiwa. Eye Osoma ya vana va viala ndolosoma kuenda Ñala ya vana va viala ndoloñala,+ 16 una okuti eye lika ka fi,+ haeye o kasi vocinyi+ okuti, lomue amẽlako, una okuti lomue wa lo mola kuenda lomue o tẽla oku u mola.+ Kokuaye ku kale esumbilo lunene ka u pui. Amene.

17 Lungula* vana okuti olohuasi violuali lulo* oco ka va ka lipande* okuti, ka va tiamisila elavoko liavo kukuasi u pua pua,+ te ku Suku, una o tu ĩha ĩha ovina viosi tu sanjukila.+ 18 Va sapuila oco va linge ovina viwa, oco va kale olohuasi viovilinga viwa, vakuacali,* loku lipongiyila oku li tepela la vakuavo+ 19 kuenda oku li solekela ukuasi wa kolapo okuti, ociseveto ciwa co kovaso yoloneke,+ oco va kakatele komuenyo wocili.+

20 A Timoteo, lava eci ca ku kundikiwa,+ yuvula olombangulo viaño vina vi tomba ovina vi kola kuenda yuvula “ukũlĩhĩso” wesanda u tunda kolondaka vi patãla ovina viocili.+ 21 Omo lioku lekisa ukũlĩhĩso waco, vamue va yapuka vekolelo.

Ohenda ya piãla yi kale lene.