UKANDA WATETE KU VA TESALONIKE

1 Ame ndi Paulu kuenda Siluano*+ la Timoteo+ tu tuma ukanda owu kokuene vu kasi kekongelo lia va Tesalonike lina li kasi vomunga kumue la Suku Isia kuenda Ñala Yesu Kristu:

Ohenda ya piãla kuenda ombembua yi kale lene.

2 Olonjanja viosi tu pandula Suku eci tu vu tukuli vosi yene volohutililo vietu,+ 3 momo tu amamako oku ivaluka upange wene wekolelo kuenda alikolisilo ene ocisola, lepandi liene, omo lielavoko liene+ ku Ñala yetu Yesu Kristu kovaso a Suku yetu Isia. 4 Momo a vamanji wa soliwi la Suku, tua kũlĩha okuti, eye wo nõli, 5 omo olondaka viwa tu kasi oku kunda ka vieyile kokuene lolondaka lika, pole, vieyavo lunene, lespiritu sandu kuenda lekolelo lia pama, ene muẽle wa kũlĩhi ndomo tua tuwile eci tua kala pokati kene oco tu vu kuatisi. 6 Kuenje wa lingi olosetukuli vietu+ kuenda via Ñala,+ omo wa tavi ondaka lohali yalua+ lesanju liespiritu sandu, 7 omo liaco, wa lingi ongangu yiwa koloñame viosi via Yesu ko Makedonia kuenda ko Akaya.

8 Tu eca olopandu omo lioku kunda kuene, omo ondaka ya Yehova* ka ya lisanduile lika ko Makedonia kuenda ko Akaya, pole, ya lisanduilavo kovitumãlo viosi kuenda ekolelo liene ku Suku kolonepa viosi,+ omo liaco, ka tu kuete vali lacimue coku popia. 9 Momo ovo muẽle vamamako oku sapula eci catiamẽla konjanja yatete tua vangula lene kuenda ndomo wa pongolokeli ku Suku poku siapo oviteka viene+ oco vu lingi apika va Suku yocili haeye o kasi lomuenyo, 10 loku lavoka Omõlaye o tunda kovailu,+ una eye a pindula kuava va fa okuti, Yesu una o tu popela konyeño yi laika oku iya.+

2 A vamanji, ene wa kũlĩhi ciwa okuti, oku iya kuetu kokuene oku vu nyuli kua kuata onima.+ 2 Momo ndaño tete tua talisiwa ohali loku tatiwa lãvi ko Filipoi+ ndeci wa ci kũlĩhi, tua kuata utõi omo lia Suku yetu oco tu vu sapuili olondaka viwa via Suku+ pokati kalambalalo* alua. 3 Momo elungulo tu eca ka li tundi kovisimĩlo viesanda, ale kevĩho, pamue kelimbi, 4 pole, omo okuti tua taviwa la Suku oco tu kundikiwe olondaka viwa, tu vangula, pole, ka tu ci lingila oku sanjuisa omanu, te Suku una o kũlĩhĩsa ovitima vietu.+

5 Omo liaco, ene wa kũlĩhi okuti ka tua la tukula olondaka viombambe, ale oku liviaviaya locimãho coku lekisa ocipululu;+ Suku ombangi yaco! 6 Ka tua sandiliyile ulamba womanu, ci kaile kokuene, ale ku vakuavo, ndaño okuti, omo tuvapostolo va Kristu nda tuo kokeli ocilemo.+ 7 Pole, eci tua kala pokati kene tuo tati lohenda ndeci ina a tata locikembe* omãla vaye. 8 Omo tuo kuateli ohenda, ka tua nõlele* lika oku vu sapuili olondaka viwa via Suku, pole, tuo wĩhivo ovimuenyo vietu,+ momo vu soliwe calua letu.+

9 A vamanji, ocili okuti, ene wivaluki upange kuenda alikolisilo etu. Eci tuo kundili olondaka viwa via Suku, tua talavaya utanya luteke+ oco ka tu ka linge ocilemo kokuene. 10 Ene kumue la Suku vu cimbila uvangi ndomo tua kala vakuacili, vakuesunga, haetu tua puile eko kokuene wa tavi. 11 Ene wa kũlĩhi ciwa ndomo tua enda oku vu lunguli loku vu lembeleki kuenda oku vu lunguli omunu lomunu pokati kene+ ndeci isia umue+ a linga lomãla vaye, 12 oco okuti, vu amamako oku endaenda lonjila yimue yi sanjuisa Suku,+ una wo kovongi Vusoma+ kuenda vulamba waye.+

13 Omo liaco, eli olio esunga lieci ka tu liwekelapo oku pandula Suku,+ momo eci wa tambuli ondaka ya Suku, yina wa yevi kokuetu, ka wa yi taveli ndondaka yomanu, pole, ndomo ci kasi ocili okuti, ondaka ya Suku, yina yi kasivo oku talavaya vokuene wa tavi. 14 Momo ene a vamanji, wa lingi olosetukuli viakongelo a Suku o ko Yudea ana a kasi vomunga kumue la Kristu Yesu, momo wa talisiwi ohali peka lia vakuafeka yene+ ovina vimuamue ovo va kasi oku talisiwa peka lia va Yudea, 15 vana okuti, va ponda Ñala Yesu+ kumue lovaprofeto kuenda va tu lambalala.+ Handi vali, ovo ka va kasi oku sanjuisa Suku, pole, va patãla eci ci kuatisa omanu vosi, 16 osimbu va tu tateka oku vangula lomanu vakualofeka oco va popeliwe.+ Kuenje ovo otembo yosi va linga akandu alua. Pole, oku sulako onyeño yaye* yeya kokuavo.+

17 A vamanji, eci tua tepiwa* kokuene, ndaño vokatembo kamue (ketimba, pole, kovitima vietu hakoko) omo lionjongole yetu yalua, tua likolisilako oku vu moli ketimba.* 18 Eli olio esunga lieci tua yonguilile oku iya kokuene, ocili, ame ndi Paulu nda ci seteka onjanja yatete leyi yavali; pole, Satana wa tateka onjila yetu. 19 Pole, lipi elavoko lietu, pamue esanju, ale ekolowa lioku lipandiya kovaso a Ñala yetu Yesu ketukuluko liaye? Siti ene?+ 20 Ocili muẽle ene vulamba wetu haene vusanju lietu.

3 Omo okuti ka tua ponduile vali oku talamẽla asapulo atiamẽla kokuene, tua nõlapo okuti, hĩse oku kala ño ko Atenai;+ 2 kuenje tua tuma Timoteo+ manjetu haeye ondingupange ya Suku* yolondaka viwa viatiamẽla ku Kristu, oco a vu kolisi* loku vu lembeleki catiamẽla kekolelo liene, 3 oco okuti, lomue pokati kene o hongua* omo liohali yaco. Momo ene muẽle wa kũlĩhi okuti ka tu tẽla oku yuvula ohali yaco.*+ 4 Momo eci tua kala lene, tua enda oku vu sapuili okuti, tu laika oku tala ohali kuenda eci oco ca siata oku pita ndomo wa ci kũlĩhi.+ 5 Eli olio esunga lieci okuti, omo lionjongole yalua yoku kũlĩha eci catiamẽla kokuene, nda tuma Timoteo+ oco a kũlĩhĩse ekolelo liene, momo nda kuata usumba wokuti pamue vu yapuisiwa Luyonji+ kuenda upange wetu u linga wolivova.

6 Pole, cilo Timoteo wa tunda kokuene+ oku iya kokuetu kuenda wa tu ĩha esapulo liwa liatiamẽla kekolelo liene kuenda kocisola cene okuti, olonjanja viosi vu kasi oku amamako oku tu ivaluka kuenda vu kuete onjongole yalua yoku tu mola ndeci etu tu kuetevo lene. 7 A vamanji, eli olio esunga lieci okuti, kovitangi* vietu viosi, lohali, tua lembelekiwa mekonda liene kuenda lekolelo vu lekisa.+ 8 Momo nda ene wa talami ngõ vu Ñala, letuvo tu pamisiwa.* 9 Tu pondola oku eca ndati olopandu ku Suku catiamẽla kokuene omo liesanju lialua tu yevite kovaso a Suku yetu mekonda liene? 10 Utanya luteke tu likutilila lutima wosi oco tu vu moli okuti, tu vokiya kueci ca kamba oco ekolelo liene li pame.+

11 Kaliye Suku yetu haeye Isia kuenda Ñala yetu Yesu, va tu yuluile onjila oco tu iye kokuene. 12 Handi vali, Ñala a ecelele okuti ocisola vu likuetele omunu lomunu kuenda la vosi ci livokiya,+ ndeci ocisola tu vu kueteli, 13 oco eye a pamise ovitima viene okuti, ene vu pua eko kuenda vu kola kovaso a Suku yetu+ haeye Isia, ketukuluko lia Ñala yetu Yesu+ kumue lolosandu viaye viosi.

4 Oku sulako a vamanji, ndeci wa tambuli onumbi kokuetu ndomo vu pondola oku enda okuti vu sanjuisa Suku,+ ndeci vu kasi ale oku enda, tu vu pingi kuenda tu vu livondeli vu Ñala Yesu okuti, amamiko oku ci linga. 2 Momo wa kũlĩhi olonumbi* tuo wĩhi pocakati ca Ñala Yesu.

3 Omo liaco, ocipango ca Suku ceci okuti, vu kola+ kuenda vu yuvula evĩho liukahonga.*+ 4 Omunu lomunu a kũlĩhe ndomo a lava etimba liaye*+ loku kola+ kuenda lesumbilo, 5 halokulivelako oloñeyi viukahonga+ ndeci ca siata pokati ka vakualofeka vana okuti, ka va kũlĩhĩle Suku.+ 6 Lomue ka ka linge eci ka ca sungulukile ale oku linga cimue cĩvi manjaye catiamẽla kondaka yaco, momo Yehova* o ka nyõla ovina evi viosi, ndeci tua ci popele ale tete, loku vu lunguli lutõi. 7 Momo Suku ka tu kovongelele evĩho, te oku kola.+ 8 Omo liaco, wosi ka sumbila elongiso eli, ka patãla omanu, te Suku+ una wo wĩhi espiritu sandu liaye.+

9 Pole, catiamẽla koku sola vamanji+ ka ci sukila okuti tu vu soneheli, momo ene muẽle vu longisiwa la Suku oku lisola pokati.+ 10 Ocili okuti, vu kasi oku ci lingila vamanji vosi ko Makedonia. Pole, a vamanji, tu vu vetiyi oku amamako oku ci linga. 11 Kuati ocimãho coku kala lombembua,+ loku tata ovina viene muẽle+ kuenda oku linga upange lovaka ene,+ ndeci tuo handeleki, 12 oco okuti, wendaendi lesunguluko kovaso omanu vana ka va tiamẽlele kekongelo Liakristão+ kuenje ka vu kambela cimue.

13 Handi vali, a vamanji ka tu yongola okuti vu kala vonumbi kueci catiamẽla kuava va pekela kolofa+ oco okuti, ka vu sumui ndeci ci lingainga omanu ka va kuete elavoko.+ 14 Momo nda tua kolela okuti, Yesu wa fa kuenda wa pinduiwa,+ vana va pekelavo kolofa pocakati ca Yesu, Suku o ka va nena komuenyo oco va kale kumue laye.+ 15 Eci oco tuo sapuili omo liondaka ya Yehova* okuti, etu tu kasi lomuenyo okuti tu popeliwa ketukuluko lia Ñala, ka tu livangela oku pinduiwa kovaso ya vana va pekela tete kolofa; 16 momo Ñala o ka loka kilu loku vilikiya lolukandi londaka yungelo unene,+ lolumbeta lua Suku kuenje vana va fa vomunga kumue la Kristu, ovo va ka pinduiwa tete.+ 17 Noke etu tu kasi lomuenyo, haetu tu ka popeliwa, tu kambatiwa kumue lavo valende+ oku lisanga la Ñala vilu;+ kuenje tu ka kala la Ñala otembo yosi.+ 18 Omo liaco, amamiko oku li lembeleka pokati lolondaka evi.

5 Cilo a vamanji, catiamẽla kolotembo lovovo, ka ci sukila oku vu soneheli cimue. 2 Momo ene muẽle wa kũlĩhi ciwa okuti, eteke lia Yehova*+ liya muẽle ndocimunu kuteke.+ 3 Eci omanu va popia vati, “Tu kuete ombembua kuenda tua kolapo!” enyõleho liya kokuavo ocipikipiki+ ndolongembia viukãi o laika oku cita; kuenje lomue pokati kavo o ka puluka. 4 Pole, ene a vamanji, ka vu kasi vowelema oco okuti, eteke liaco liu sangi ndeci ocinyi cutanya ci sanga ocimunu, 5 momo ene vosi vumãla vocinyi haene vumãla vutanya.+ Etu ka tua tiamẽlele kuteke ndaño kowelema.+

6 Kuenje ka tu ka pekeli ndeci ci linga omanu vakuavo,+ pole, tuamamiko oku lavulula+ loku kuata uloño woku sokolola.+ 7 Momo vana va pekela, va ci linga luteke kuenda vana va kolua va ci lingavo luteke.+ 8 Pole, catiamẽla kokuetu tua tiamẽla kutanya, tuamamiko oku kuata uloño woku sokolola kuenda tu wali ociteyuilo covonete cekolelo, locisola kuenda elavoko lieyovo ndocikoko,+ 9 momo Suku ka tu nõlelele onyeño, pole, te oku kuata eyovo+ pocakati ca Ñala yetu Yesu Kristu. 10 Eye wa tu fila+ oco okuti, ci kaile tua pasuka, ale tua pekela* tu kala komuenyo kumue laye.+ 11 Omo liaco, amamiko oku li vetiya* pokati loku li pamisa pokati+ ndeci vu kasi ale oku ci linga.

12 Kaliye a vamanji tu vu pingi okuti, sumbili vana va talavaya calua pokati kene haivo vo songuili vu Ñala kuenda vo lunguli; 13 lekisi ocisola calua kokuavo loku va kapako omo liupange wavo.+ Kali lombembua omunu lukuavo.+ 14 Handi vali, a vamanji tu vu vetiyi oco vu lunguli* vana va sina,+ loku lembeleka vana va sumua,* oku kuatisa vana va hongua kuenda oku pandikisa la vosi.+ 15 Lomue pokati kene ka ka fetuluinye umue cĩvi leci cĩvi,+ pole, olonjanja viosi likolisiliko oku linga eci ciwa komunu lomunu kuenda komanu vosi vakuavo.+

16 Olonjanja viosi sanjuki.+ 17 Likutilili olonjanja viosi.+ 18 Eci olopandu omo liovina viosi.+ Momo eci oco ocipango ca Suku kokuene pocakati ca Kristu Yesu. 19 Ko ka tateki upange* wespiritu lia Suku vokuene.+ 20 Ko ka tati leselula ovitumasuku.+ 21 Kũlĩhĩsi ovina viosi;+ kakateli kueci ciwa. 22 Yuvuli ũvi wosi.+

23 Ndi likutilila okuti Suku una eca ombembua o ka vu lingisi okuti vu kola kupange waye. A vamanji, espiritu lomuenyo kuenda etimba liene li kole kolonepa viosi, li teyuiwe, loku pua eko ketukuluko lia Ñala yetu Yesu Kristu.+ 24 Una wo kovongi, wa kolelua kuenje o ka ci tẽlisa muẽle.

25 A vamanji, amamiko oku tu likutililako.+

26 Lamisipo vamanji vosi lesipulo li kola.

27 Ndu pingi vonduko ya Ñala okuti, ukanda ulo u tangiwe ku vamanji vosi.+

28 Ohenda ya piãla ya Ñala yetu Yesu Kristu yi kale lene.