UKANDA KU VA KOLOSAI

1 Paulu, upostolo wa Kristu Yesu omo liocipango ca Suku kuenda Timoteo+ manjetu, 2 ndi sonehela kokuene vulosandu haene vamanji vakuekolelo vekongelo lio ko Kolosai vu kasi vomunga kumue la Kristu:

Ohenda ya piãla kuenda ombembua ya Suku Isietu vi kale lene.

3 Olonjanja viosi tu pandula Suku Isia ya Ñala yetu Yesu Kristu eci tu vu likutililiko, 4 tunde eci tua yeva ekolelo liene vu Kristu Yesu kuenda ocisola vu kuetele olosandu viosi, 5 omo lielavoko lioku tambula eci co selekiwili kovailu.+ Ene wa yevi ale eci catiamẽla kelavoko liaco pocakati cesapulo liocili liolondaka viwa, 6 lina lieya kokuene. Ndeci olondaka viwa vi kasi oku ima epako, loku kula voluali luosi,+ cimuamue haico ci kasi oku lingiwa pokati kene, tunde keteke wa yevi ocili kuenda wa kũlĩhi ciwa ohenda ya piãla ya Suku vocili. 7 Eci oco wa lilongisi ku Epafra haeye ukuenje wa soliwa letu+ kuenda ondingupange ya koleliwa ya Kristu, una o vu kuatisi pomangu yetu. 8 Eye wa tu sapuilavo ocisola vu tu kueteli ci tunda kekuatiso liespiritu lia Suku.

9 Eli olio esunga lieci okuti, tunde eci tua ci yeva, ka tua la liwekapo oku vu likutililiko,+ loku pinga oco vu yukisui lukũlĩhĩso wa suapo+ wocipango caye, lolondunge viosi kuenda lelomboloko li eciwa lespiritu,+ 10 okuti, wendaendi ndeci ca sesamẽla ku Yehova* loku u sanjuisa calua osimbu vu amamako oku ima epako kupange wosi uwa kuenda oku vokiya ukũlĩhĩso wa suapo wa Suku;+ 11 Tu likutililavo oco vu pamisiwi lunene wosi ndomo ci likuata lulamba waye wa piãla oco okuti,+ vu amamako lepandi lesanju kuenda ka vu liwekapo, 12 osimbu vu eca olopandu ku Isia una wa ku ĩhi evelo lioku panga onepa kocipiñalo colosandu+ vina vi kasi vocinyi.

13 Eye wa tu popela kuviali wowelema+ kuenda wa tu sondoluila kuviali Womõlaye a sole, 14 okuti, poku feta ocisembi Omõlaye wa tu yovola kuenda wa ecela akandu etu.+ 15 Eye esetahãlo lia Suku una ka muiwa lovaso,+ haeye uveli woviluvo viosi;+ 16 momo ovina viosi via lulikiwa pocakati caye, ci kaile vio kovailu, ci kaile vio posi, ovina vi muiwa levi ka vi muiwa,+ ci kaile ovialo, ci kaile ovonene, pamue olombiali. Ovina viosi via lulikiwa pocakati caye+ kuenda viatiamẽla kokuaye. 17 Pokati kovina viosi,+ eye wa lulikiwa tete kuenda ovina viosi vikuavo via lulikiwa pocakati caye, 18 kuenda eye utue wetimba okuti, ekongelo.+ Eye efetikilo liovina viosi, haeye uveli wava va fa,+ omo liaco, eye, eye omunu watete kovina viosi; 19 momo Suku wa sanjukila okuti, eye o suapo kovina viosi,+ 20 kuenje pocakati ca Kristu, inalisa kokuaye ovina viosi vikuavo+ poku linga ombembua omo liosonde+ a pesela kuti wekangiso,* ci kaile ovina vio posi, ci kaile vio kovailu.

21 Kuenje ene okuti, kosimbu wa kaili ocipãla la Suku kuenda wa kali ovanyãli omo ovisimĩlo viene via tiamisiwilile lika kovilinga vĩvi, 22 cilo, eye wa linalisa omo lioku fa kua una wa eca etimba liaye ndocilumba, oco a vu lekisi okuti, vu kola kuenda wa pui etondelo, haene ka vu kuete eko kovaso a Suku,+ 23 eci ca lingiwila oco wamamiko vekolelo,+ loku sevetiwa vociseveto+ kuenda vu talama ngõ+ okuti, ka vu yapuisiwa velavoko liolondaka viwa wa yevi vina via kundiwila komanu vosi va kasi vemẽhi lilu.+ Ame ndi Paulu nda linga ondingupange yolondaka viaco viwa.+

24 Ame cilo, ndi sanjukila ohali yange omo liene+ kuenda ñasi oku tala ohali ndeyi ya Kristu, pole, handi sia tẽlisile ohali yaco vonduko yetimba ya Kristu okuti,+ ekongelo.+ 25 Nda vumba ekongelo liaco ndomo ci likuata locikundi+ ca nyĩhiwa la Suku mekonda liene okuti, oku kunda ondaka ya Suku, 26 elumbu li kola+ lia sitikiwile tunde koluali lua pita*+ kuenda kovitumbulukila via pita. Pole, cilo lia siata oku situluiwa kolosandu viaye,+ 27 Suku wa situluila olofeka elumbu li kola+ lina lieyuka ulamba kuenda ukuasi wespiritu. Elumbu liaco, Kristu una o kasi vomunga kumue lene okuti, elavoko liulamba waye.+ 28 Yesu, eye una tu sapula poku lungula vosi kuenda oku longisa omanu vosi lolondunge viosi kuenje tu lekisa okuti, omanu vosi va suapo vomunga kumue la Kristu.+ 29 Locimãho eci, ndi talavaya calua poku likolisilako lekuatiso liunene eye a nyĩha.+

2 Momo ndi yongola okuti, vu kũlĩha ndomo ñasi oku likolisilako mekonda liene, la vana va kasi ko Laodikea+ kuenda ku vosi ka va ndi muile.* 2 Eci ca lingiwila oco ovitima viavo vi lembelekiwe+ kuenje va kala vomunga yimuamue yocisola+ kuenda va kuata ukuasi wosi u tunda kelomboloko liavo okuti lia koleliwa, oco va kuate ukũlĩhiso wa suapo welumbu li kola lia Suku okuti, elumbu liaco Kristu.+ 3 Vokuaye mua solekiwa ukuasi wosi wolondunge kuenda wukũlĩhĩso.+ 4 Ñasi oku ci popela oco okuti, lomue o vu yapuisi lolondaka viuhembi. 5 Ocili okuti, ndaño si kasiko ketimba, pole, ñasi lene vovisimĩlo viange, nda sanjuka omo lioku mola ndomo vu kasi oku enda ciwa+ kuenda ekolelo vu kuetele Kristu lia pama.+

6 Kuenje ndeci wa tavi Kristu Yesu Ñala, amamiko oku endela vomunga kumue laye, 7 okuti, ndeci wa lilongisi,+ ekolelo liene vu Kristu li sukila oku vu pamisi+ loku vu kolisi nduti okuti, olombombo vialio via pama posi. Kuenje ekolelo liene li supoke eci weci olopandu ku Suku.+

8 Lunguki okuti, lomue o vu yapuisi* pocakati colondunge violuali+ lovisimĩlo viaño haivio vi yapuisa vina via kunamẽla kovisila viomanu ndomo ci likuata lovina viaño violuali okuti, ka via tundile ku Kristu; 9 momo oku yuka kuosi kuovituwa via Suku via tunga vu Kristu.+ 10 Kuenje ene ka vu pumbi cimue mekonda liaye una okuti, eye utue wuviali kuenda wunene wosi.+ 11 Omo liukamba wene laye wa seviwivo evamba okuti, hevambako lia lingiwa lovaka poku liyovola ketimba liositu,+ pole, evamba liaco lia tiamẽla ku Kristu.+ 12 Momo wa kendiwi laye pocakati cepapatiso ndeli liaye+ kuenda omo liukamba vu kuete laye wa pinduiwivo+ kumue laye pocakati cekolelo liene vunene wa Suku, una wo pindula kuava va fa.+

13 Handi vali, ndaño wa fili kakulueya ene kuenda kuyamba wene ketimba, Suku wo muisi omuenyo oco vu kali vomunga kumue la Kristu.+ Eye locisola wa ecela akulueya etu osi,+ 14 kuenda wa imũla* Ocihandeleko+ ca tu sonehelua+ cina ca tu tatekele.+ Suku wa imũla ocihandeleko caco pocakati colofa via Kristu kuti wekangiso.*+ 15 Eye wa imũla ovoviali kuenda ovonene kuenje wa va lekisa kowiñi ndava va yuliwa,+ loku va songuila ndolomandekua pocakati cuti wekangiso.*

16 Lomue ka ko pisi omo lieci vu lia leci vu nyua,+ ale ceci catiamẽla kocipito cimue pamue kosãi yokaliye,+ ale kesambata.+ 17 Ovina evi ulembo ño wovina vi laika oku iya,+ pole, ulembo waco Kristu.+ 18 Lomue ka ko pumbisi onima okuti,+ umue o sanjukila umbombe wesanda loku fendela ovangelo, poku “lipandela” ovina a siata oku mola.* Eye o kasi oku lipanda esanda poku sokolola ndomanu vakuakandu, 19 kuenda eye ka kakatelele kutue,+ ku una okuti etimba liosi li tokekisua pamosi lasokoluilo, lasipa kuenje li kula loku kula ku tunda ku Suku.+

20 Nda vu fa kumue la Kristu kovina viaño violuali,+ momo lie vu kasilili lomuenyo ndu okuti handi vu panga onepa koluali poku pokola kovihandeleko vialio viokuti:+ 21 “Ku ka kuate, ale oku mãha, ndaño oku lamba,” 22 ci tiamisiwila kovina viosi vi nyõleha poku talavaya lavio ndeci ci likuata lolonumbi kuenda lalongiso omanu?+ 23 Ndaño ovina viaco vi molẽha ndu okuti, violondunge koku kisika efendelo kuenda umbombe wesanda loku pokuisa etimba,+ pole, ovio ka vi kuete esilivilo kuyaki watiamẽla koloñeyi vietimba.

3 Nda ene wa pinduiwi kumue la Kristu,+ amamiko oku sandiliya ovina vio kilu, kuna Kristu a tumãla kondio ya Suku.+ 2 Amamiko oku tiamisila ovitima viene kovina vio kilu,+ kovina vio posi hakoko.+ 3 Momo ene wa fi kuenda omuenyo wene u kasi peka lia Kristu una o kasi vomunga kumue la Suku. 4 Eci Kristu una o nena omuenyo+ a situluiwa, lenevo vu ka situluiwa kumue laye vulamba.+

5 Omo liaco, ipayi ovimatamata vietimba liene+ okuti vio kilu lieve, ndeci evĩho liukahonga,* eliño, oloñeyi viukahonga,+ oloñeyi vĩvi kuenda ocipululu okuti, efendelo lioviteka. 6 Suku o ka kuatela onyeño omanu va linga ovina evi. 7 Kosimbu ene muẽle wa kuatelivo ovituwa viaco* komuenyo wene.*+ 8 Pole, cilo vu sukila oku vimbapo viosi ndeci: onyeño, oku tema, evĩho,+ olondaka vioku pembula+ kuenda vomẽla wene ka mu ka tunde ombangulo yi kutisa osõi.+ 9 Ko ka likembi omunu lukuavo.+ Luli omunu wosimbu+ lovilinga vialio, 10 kuenje wali omunu wokaliye okuti,+ omo liukũlĩhĩso wa suapo, omunu waco o kasi oku pongoluiwa lesetahãlo lia Una wo lulika,+ 11 ka kuli u Helasi ale u Yudea, u wa seviwa evamba lu ka seviwile evamba, ocingendeleyi, u Skutia,* upika, ale omunu wa yovoka; puãi Kristu eye ovina viosi kuenda o kasi ku vosi.+

12 Omo liaco, omo okuti wa nõliwi la Suku+ kuenje vu kola, haene wa soliwi, wali ohenda,+ ocikembe, umbombe,*+ oku kala ukuambembua+ kuenda epandi.+ 13 Amamiko oku likapako omunu lukuavo, oku liecela pokati lutima wosi,+ ndaño umue o kuete esunga lioku kuatela ondaka ukuavo.+ Ndeci Yehova* o weceli lutima wosi, cimuamue haico vu linga.+ 14 Pole, kovina evi viosi, ca velapo wali ocisola,+ momo ci tokeka omanu vomunga yimuamue.+

15 Handi vali, ombembua ya Kristu yi viale vovitima viene,*+ momo wa kovongiwili ombembua yaco vetimba limosi. Kuenje olonjanja viosi eci olopandu. 16 Ondaka ya Kristu yi kale vokuene lolondunge viosi. Amamiko oku lilongisa loku likolisa pokati* lolosamo,+ loku sivaya Suku, loku imba lolopandu ovisungo viefendelo, poku imbila Yehova* ovisungo vovitima viene.+ 17 Ovina viosi vu linga ci kaile kolondaka ale kovilinga, viosi vi lingili vonduko ya Ñala Yesu, loku pandula Suku Isia pocakati caye.+

18 Ene akãi, pokoli kalume vene,+ ndeci vu Ñala. 19 Ene alume, amamiko oku sola akãi vene,+ ko ka va kuateli onyeño.+ 20 Ene amãla, pokoli kolonjali viene kovina viosi,+ momo eci ci sanjuisa Ñala. 21 Ene a va isia, ko ka wenguli onyeño* yomãla vene,+ oco ka va ka sumue.* 22 Ene apika, pokoli ku vacime cene va palo posi kovina viosi,+ ko ka ci lingi lika eci vo lavululi ndu okuti vu sanjuisa omanu,* pole, ci lingi locili co vutima loku sumbila Yehova.* 23 Upange wosi vu linga, u lingi lutima wosi, ndu okuti vu u lingila Yehova,*+ omanu havoko, 24 momo wa kũlĩhi okuti vu ka tambula ocipiñalo ku Yehova* ndonima.+ Lingi apika va Cime okuti, Kristu. 25 Ocili, wosi o linga cĩvi, o ka yambuiwa omo lieci cĩvi a linga+ kuenda Suku ka kuete ocame.+

4 Ene a vacime, tati apika vene lesunga kuenda lesunguluko momo wa kũlĩhi okuti vu kuetevo Cime kilu.+

2 Pandikisi lolohutililo+ kuenda osimbu vu ci linga, amamiko oku lavulula loku eca olopandu.+ 3 Cimuamue haico, tu likutililikovo okuti,+ Suku o tu yuluila onjila oco tu kunde ondaka okuti, tu tẽla oku sapula elumbu li kola lia Kristu, lina nda kapiwila kalienge vokayike,+ 4 okuti, ndi ci lombolola ciwa ndomo ca ndi sesamẽla oku ci linga.

5 Endaendi ndava va kuete olondunge pokati ka vana ka va tiamẽlele kekongelo, loku talavaya ciwa lotembo.*+ 6 Olonjanja viosi olondaka viene vi kale viumbombe, loku singiwa lomongua oco okuti,+ vu kũlĩha ndomo vu tambulula omunu lomunu.+

7 Tukiko,+ manjange o soliwe, ondingupange ya koleliwa haeye upika ndame vu Ñala, o vu sapuili ovina viosi viatiamẽla kokuange. 8 Ñasi oku u tuma kokuene oco okuti, vu kũlĩha ndomo tu kasi kuenda eye oco eye a lembeleke ovitima viene. 9 Eye iya kumue la Onesimo+ manjange wa koleliwa haeye o soliwe, una wa tunda pokati kene; kuenje ovo va ko lomboluili ovina viosi vi kasi oku pita kulo.

10 Aristarko+ omandekua kumue lame wo tumisi ovilamo kuenda Marko+ epalume lia Barnaba (okuti, eye una ene wa tambuli onumbi yokuti, nda weya kokuene u yekisi,)+ 11 kumue la Yesu o tukuiwa Justo, una wa tiamẽla ku vana va seviwa evamba. Ava ovo lika olondingupange kumue lame omo Liusoma wa Suku kuenda ovo va ndi kolisa calua.* 12 Epafra+ upika wa Kristu Yesu, una wa tunda pokati kene, wo tumisi ovilamo. Eye olonjanja viosi o likolisila oku vu likutililiko okuti, vu talama ngõ kuenda ekolelo liene li pama poku linga ocipango cosi ca Suku. 13 Momo ndu wimbila uvangi wokuti, eye wa siata oku likolisilako calua oku vu kuatisi kuenda oku kuatisa vana va kasi ko Laodikea, lo ko Hierapoli.

14 Luka+ ndotolo o soliwe, wo tumisi ovilamo kumue la Dema.+ 15 Eci ovilamo viange ku vamanji vo ko Laodikea, ku Numfa kuenda kekongelo li liongoluila konjo yaye.+ 16 Eci vu tangi ukanda ulo pokati kene, lingi esokiyo liokuti, u tangiwavo+ kekongelo lia va Laodikea kuenje vu tangavo ukanda una nda tumile ko Laodikea. 17 Sapuilivo Arkipo hati:+ “Tiamisila utima kupange wa tava ku Ñala, oco o u tẽlise.”

18 Ame ndi Paulu, ndi tuma ovilamo nda soneha leka liange muẽle.+ Amamiko oku ivaluka alienge ange.+ Ohenda ya piãla yi kale lene.