UKANDA KU VA FILIPOI

1 Ame ndi Paulu la Timoteo, haetu tuapika va Kristu Yesu. Ndi sonehela olosandu viosi vi kasi vomunga kumue la Kristu Yesu kuenda olomitavaso, loloñuatisi viekongelo+ vi kasi ko Filipu:+

2 Ohenda ya piãla lombembua vi tunda ku Suku Isietu kuenda ku Ñala Yesu Kristu, vi kale lene.

3 Olonjanja viosi ngeca olopandu ku Suku yange eci ndu wivaluki, 4 vapingilo ange osi ndo lingiliko vosi yene. Apingilo aco osi ndi a linga lesanju,+ 5 mekonda liombanjaile wa eci* omo liolondaka viwa tunde keteke liatete toke cilo. 6 Momo nda kolela okuti, u wa fetika upange uwa pokati kene, o ka u malusula+ toke keteke lia Kristu Yesu.+ 7 Ca sunguluka kokuange oku vu sokololi ndoco vosi yene, momo vu kasi vutima wange, ene vu panga onepa kumue lame kohenda ya piãla ci kaile kalienge a ndi kuta+ ci kaile koku teyuila loku imbila uvangi olondaka viwa.+

8 Momo Suku ombangi yange ndomo ndu vu kueteli ongeva vosi yene locisola ndeci Kristu Yesu a kuete. 9 Eci oco ndamamako oku likutilila okuti, ocisola cene camamako oku livokiya+ kumue lukũlĩhĩso wa suapo+ lolondunge;+ 10 kuenje vu kũlĩha ovina via velapo vali+ okuti, vu pua etondelo kuenda ka vu kokela ocilondokua vakuene+ toke keteke lia Kristu; 11 kuenda okuti vu yuka epako liesunga, lina liyilila pocakati ca Yesu Kristu,+ loku muisa Suku ulamba lesivayo.

12 A vamanji, cilo ndi yongola oco vu kũlĩhi okuti, ovina via pita lame via siata oku kuatisa oku sandula olondaka viwa, 13 momo olondavululi via soma yo Roma kuenda omanu vosi vakuavo+ va yeva okuti ndumandekua+ omo lia Kristu. 14 Kuenje cilo vamanji valua vu Ñala va kolela omo lialienge a ndi kuta kuenda ovo va kasi oku lekisa vali utõi wosi woku vangula ondaka ya Suku okuti, ka va kuete usumba.

15 Ocili okuti, vamue va kasi oku kunda Kristu lonya kuenda lukuse, pole, vakuavo va ci linga lonjongole ya sunguluka. 16 Ava va sulako, va kasi oku kunda Kristu locisola, momo ovo va kũlĩha okuti nda nõliwila oku teyuila olondaka viwa;+ 17 pole, ava vatete va ci linga lukuse halonjongoleko ya sunguluka, momo va yongola oku ñokela ohali osimbu ndi kasi kalienge. 18 Locimãho cipi? Kolonepa viosi, ci kaile loku likembisa ale locili, Kristu o kasi oku kundiwa kuenda eci oco ndi sanjukila. Kuenje ndamamako oku ci sanjukila, 19 momo nda kũlĩha okuti eci oco ci ka ndi nenela eyovo omo liapingilo ene+ kuenda ekuatiso li tunda kespiritu lia Yesu Kristu.+ 20 Eci ci likuata lonjongole yange kuenda elavoko liokuti lacimue ndi kuatela osõi, pole, lelianjo liosi lioku vangula, cilo Kristu o ka kemainyiwa omo lietimba liange, ci kaile vomuenyo ci kaile voku fa,+ ndeci olonjanja vialua a kemainyiwa ale.

21 Momo nda ñasi lomuenyo, ñasi lawo omo lia Kristu+ kuenda nda ndi fa onganyu.+ 22 Pole nda ndi amamako komuenyo letimba eli, eci epako liupange wange; pole, eci nda nda nõlapo si ci lekisa handi. 23 Pokati kovina evi vivali eci ndi nõlapo si cĩ, momo, ñuete onjongole yoku yovuiwa kuenda oku kala la Kristu,+ okuti oco ca velapo.+ 24 Puãi ca velapo vali kokuange oku amamako oku kala vetimba mekonda liene. 25 Omo okuti oco nda kolela, nda kũlĩha okuti ndi kamamako oku kala lene vosi, omo lioku amako kuene kuenda esanju vu kuete omo liekolelo liene, 26 okuti, eci njiya vali kokuene, esanju liene li ka supoka vu Kristu Yesu mekonda liange.

27 Ndi yongola lika okuti ovituwa viene* vi kala ndomo ci litava lolondaka viwa viatiamẽla ku Kristu,+ ci kaile okuti njiya kuenda ndu vu moli, ci kaile okuti si kasiko, ndi yeva okuti wa pami, vu kuete ovisimĩlo vimuamue kuenda ndomunu umosi+ vu kasi oku talavayela kumosi oco vu kuati ekolelo kolondaka viwa, 28 okuti, ka vu ecelela oku yokokisiwa lovanyãli vene. Kokuavo owu uvangi wenyõleho,+ pole, kokuene eyovo;+ kuenje eci ci tunda ku Suku. 29 Momo ene wa tambuli esumũlũho omo lia Kristu, haloku kolelako lika kokuaye, pole, loku talisiwavo ohali mekonda liaye.+ 30 Momo vu kasi vuyaki umuamue wa muili kokuange,+ haiwo wa yevi cilo okuti, handi ñasi oku liyaka lawo.

2 Nda kuli evetiyo limue vu Kristu, pamue elembeleko liocisola, ale ukamba umue wumanji, ohenda yimue kuenda ocikembe, 2 suisipo esanju liange poku kala lutima umuamue, locisola cimuamue, loku kala vomunga kuenda oku kuata ovisimĩlo vimuamue.+ 3 Ko ka lingi cimue loku hoya+ pamue oku lipanda,+ pole, loku omboka* tendi vakuene okuti, va velapo ene vu sule,+ 4 ko ka sokololi lika ovina viene muẽle,+ pole, sokololivo ovina via vakuene.+

5 Amamiko oku kuata ocituwa ndeci Kristu Yesu a kuatelevo,+ 6 una okuti, ndaño wa kala nda Suku,+ lalimue eteke a simĩle oku li sokisa la Suku.+ 7 Pole, eye wa sia cosi a kuatele kuenda wa linga ndupika umue+ kuenje wa linga omunu.*+ 8 Handi vali, eci a molẽha ndomunu,* wa liketisa kuenje wa pokola toke koku fa+ ocili, oku fa kuti umue wekangiso.*+ 9 Omo liaco, Suku wo kemainyisa komangu yimue ya velapo+ kuenda wo wĩha onduko ya velapo olonduko viosi,+ 10 oco okuti, vonduko ya Yesu ku kekamẽla olongolo viosi, viava va kasi kilu, viava va kasi posi, levi viava va kasi vemẽhi liongongo,+ 11 kuenda alimi osi a limbuke okuti Yesu Kristu eye Ñala+ o muisa ulamba Suku Isia.

12 Omo liaco, a vamanji wa soliwi, ndeci wa siati ale oku pokola okuti ka vu ci lingi lika eci ñasi lene, pole, ca piãla vali enene cilo si kasiko, amamiko oku linga ovina vi nena epopelo liene lusumba loku luluma. 13 Momo Suku eye una okuti, omo lionjongole yaye yiwa o kasi oku talavaya vokuene kuenda u wĩhi onjongole longusu yoku linga ovina viosi eye a sole. 14 Amamiko oku linga ovina viosi okuti, halokulisiõsiõlako+ kuenda oku hoya,+ 15 oco okuti, ka vu pisiwa kuenda vu pua eko, ndomãla va Suku+ ka va kuete etondelo pokati kocitumbulukila ca tatama+ haico ca vĩha, pokati ka vana ene vu kasi oku tuila ndocinyi voluali,+ 16 omo liaco, amamiko oku kakatela kondaka yomuenyo.+ Kuenje ñuata esunga lioku sanjuka keteke lia Kristu, loku limbuka okuti, sia lupukile ño elivova, ale oku talavaya calua elivova. 17 Ndaño ame meselua ndocilumba coku nyua+ kuenda upange u kola* u tunda kekolelo liene, nda sanjuka kuenda ndi yolela kumue lene vosi. 18 Cimuamue haico, lenevo vu sukila oku sanjuka kuenda oku yolela kumue lame.

19 Ndi lavoka vu Ñala Yesu okuti, ndopo ndi tuma Timoteo+ kokuene oco ndi kolisiwe eci ndi yeva esapulo liatiamẽla kokuene. 20 Momo si kuete omunu ukuavo ndi tuma okuti, o kasi lonjongole ndeyi yaye yoku vu tati ciwa. 21 Momo vakuavo vosi va kasi oku sanda lika olonjongole viavo muẽle okuti, via Yesu Kristu havioko. 22 Pole, ene wa kũlĩhi uvangi wokuti, eye wa lieca eye muẽle ndomõla+ o kasi la isia. Eye wa talavaya lame koku kunda olondaka viwa. 23 Kuenje eye una ame ndi lavoka oku tuma eci ndi kũlĩhĩsa ovina vi ka pita lame. 24 Ocili, nda kolela Ñala okuti lamevo ndopo ndiya.+

25 Pole, cilo nda sima oku vu tumisi Epafrodito, manjange, ekamba liange kupange okuti, layevo esualali lia Kristu, haeye onumiwa yene kuenda o ñuatisa kueci ndi sukila,+ 26 momo eye o yongola calua oku vu moli vosi yene kuenda wa sumua, momo ene wa yevi okuti wa kala oku vela. 27 Ocili, eye wa vela calua okuti, wa puluka oku fa; pole, Suku wo kuatela ohenda, Suku ko kuatelele lika eye ohenda, puãi lamevo okuti, si tali ohali omo liesumuo lialua. 28 Omo liaco, ndu tuma lonjanga yalua oco okuti, eci vu u moli vu kuata vali esanju kuenje esakalalo liange li tepuluka. 29 Omo liaco, u tambuli ciwa ndeci ca siata pokati ka vana va vumba Ñala lesanju liosi kuenda amamiko oku sumbila alume va soka ndeye,+ 30 momo, omo liupange wa Kristu* eye wa puluka oku fa,* oco a nyĩhe ekuatiso lina ene ka wa ponduili oku nyĩha.+

3 Oku sulako a vamanji, amamiko oku sanjukila vu Ñala.+ Kokuange hacitangiko oku vu soneheli ovina vimuamue, momo ovina viaco viu teyuili.

2 Lunguki lomanu va vĩha;* la vana havakuaciliko; kuenda vana va yongola okuti ene vu seviwa evamba.+ 3 Momo etu, etu tu kuete evamba liocili+ okuti, tu linga upange u kola lespiritu lia Suku kuenda oku lipanda kuetu vu Kristu Yesu+ kuenje ka tu tiamisila ekolelo lietu ketimba, 4 ndaño okuti pokati ka vosi ame ndi kuete vali esunga lioku kolela ketimba.

Nda omunu ukuavo o sima okuti, o kuete esunga lioku kolela ketimba, ame nda velapo: 5 nda seviwa evamba eci nda tẽlisa oloneke ecelãla,+ ndukuafeka ya Isareli kocikoti ca Benjamini, ndu Heveru+ kuenda olonjali viange va Heveru; catiamẽla kocihandeleko, ndu Fariseo;+ 6 catiamẽla kombili, nda lambalala ekongelo;+ catiamẽla kesunga omo liocihandeleko nda litendele okuti, nda pua eko. 7 Ovina nda tendele ndonganyu, nda vi tenda ndepese* omo lia Kristu.+ 8 Handi vali, ndi tenda ovina viosi ndepese omo liesilivilo liukũlĩhĩso wa Kristu Yesu Ñala yange. Mekonda liaye nda siapo ovina viosi kuenda ndi vi tenda ndovipelekese* okuti, nganyala Kristu, 9 ndi kala vomunga kumue laye, hamomoko liesunga liange muẽle omo lioku kuama Ocihandeleko, te omo liesunga li tunda koku kolela+ Kristu+ okuti, esunga li tunda ku Suku hailio lia sevetiwa vekolelo.+ 10 Ocimãho cange oku kũlĩha eye kuenda unene wa una wo pindula,+ loku talisiwa ohali+ kumue laye kuenda oku tava oku fa ndeci eye a fa,+ 11 ndi likolisilako oku ci linga oco ndi kuate epuluvi lioku tambula epinduko liatete kuava va fa.+

12 Ka ci kasi ndu okuti, nda tambula ale onima, ale pamue nda lipua ale, pole, ndi likolisilako+ okuti, nda citava ndi tambula cina Kristu Yesu a ndi nõlela.*+ 13 A vamanji, si litendi ndu okuti ndi ci kuete ale; pole, cimue nda kolela ceci: Njivala ovina vio konyima+ kuenje njolokela ovina vio kovaso,+ 14 ndi kasi oku likolisilako calua oco ndi tẽlise ocimãho cange okuti, coku tambula onima+ ku Suku yekovongo lio kilu+ pocakati ca Kristu Yesu. 15 Omo liaco, vana pokati ketu okuti va pama ale vekolelo,+ va kuate ocituwa caco, pole, nda vonepa yikuavo vu kasi loku sokolola ovina viñi, Suku o ko situluili ocituwa caco. 16 Omo liaco, ndaño okuti wa kuli ale, amamiko oku ci linga lonjila ndeyi.

17 A vamanji, vomunga lingi olosetukuli viange+ kuenda lavululi vana va kasi oku endela vonjila yi likuata longangu tuo sili. 18 Momo kuli valua, ame nda enda oku tukula olonjanja vialua, pole, cilo ndi va tukula lasuẽlẽla vana okuti, va kasi oku enda ndovanyãli wuti wekangiso* wa Kristu. 19 Esulilo liavo enyõleho, suku yavo imo liavo kuenda ulamba wavo osõi yavo kuenje va tiamisila ovisimĩlo viavo kovina vio kilu lieve.+ 20 Pole, unungafeka wetu+ u kasi kovailu+ kuenda tu lavoka upopeli umue okuti, Ñala Yesu Kristu una o kasi kilu,+ 21 una okuti lunene waye o ka pongolola etimba+ lietu lia hongua oco li lisoke* letimba liaye liulamba kuenje o pokuisa ovina viosi kokuaye.+

4 Omo liaco, a vamanji vu soliwi lame, haene ndu kueteli ongeva, ene vusanju liange haene vu kolowa liange,+ talami ngõ+ vonjila eyi vu Ñala, a vakuacisola cange.

2 Ndi vetiya Euodia la Suntuke oco va kuate ovisimĩlo vimuamue vu Ñala.+ 3 Ndu ku pingavo ove wumanji o vumba kumue lame lutima wosi okuti, amamako oku kuatisa akãi ava va kasi oku likolisilako* kumue lame koku kunda olondaka viwa kumue la Klemente kuenda akamba vange vakuavo kupange okuti, olonduko viavo vi kasi velivulu liomuenyo.+

4 Sanjukili vu Ñala olonjanja viosi. Mopia vali siti, Sanjuki!+ 5 Esunguluko liene+ li kũlĩhĩwe lomanu vosi. Ñala o kasi ocipepi. 6 Ko ka sakalali locina cimue,+ pole, kovina viosi lolohutililo kuenda apingilo kumue loku eca olopandu, apingilo ene a kũlĩhĩwe la Suku;+ 7 kuenje ombembua+ ya Suku yina ya piãla olondunge viosi, yi ka lava ovitima viene+ kuenda ovisimĩlo viene pocakati ca Kristu Yesu.

8 Oku sulako a vamanji, ovina viosi okuti viocili, viosi via velapo, viosi via sunguluka, viosi via pua etondelo,* viosi vi sivayiwa, viosi vi popiwa ciwa, viosi viwa, viosi vi pandiyiwa, amamiko oku kapako* ovina viaco.+ 9 Ovina wa lilongisi, levi wa tavi kuenda ovina wa ndi muili oku linga, vi lingi;+ kuenje Suku yombembua o ka kala lene.

10 Nda sanjuka calua vu Ñala okuti, cilo wa fetiki vali oku ndi sokolola.+ Ndaño wa endi oku sakalala lame, ka wa kuateli epuluvi lioku ci lekisa. 11 Si kasi oku ci popela omo nda suka, momo kapuluvi osi nda lilongisa oku sanjukila eci ñuete.+ 12 Nda kũlĩha oku kuata citito,+ loku kuata calua. Kovina viosi kuenda kapuluvi osi nda lilongisa elumbu lioku kuta loku kala onjala, oku kuata calua loku suka. 13 Momo kovina viosi ñuete ongusu mekonda lia una o nyĩha unene.+

14 Wa lingi muẽle omo lioku ñuatisa kohali yange. 15 Ene a va Filipoi wa kũlĩhi okuti, noke yoku lilongisa olondaka viwa onjanja yatete, eci nda tunda ko Makedonia, lalimue ekongelo lia ñuatisa, ale oku tava ekuatiso liange, te lika ene;+ 16 momo osimbu nda kala ko Tesalonike, ene wa numisi olonjanja vivali ovina vimue vioku ñuatisa. 17 Ka ci lekisa okuti ñasi oku sanda ombanjaile yimue, puãi njongola epako li vokiya ukuasi* wene. 18 Pole, ñuete cosi ndi sukila okuti ci supoka. Sia kambelele lacimue, omo cilo nda tambula ku Epafrodito+ ovina wa numisi okuti, ocilumba ca sunguluka kuenda celemba liwa,+ haico ci sanjuisa Suku. 19 Suku yange una o kuete ulamba walua, o ko wĩhi cosi vu sukila+ pocakati ca Kristu Yesu. 20 Cilo, ku Suku yetu haeye Isia, ku kale ulamba otembo ka yi pui. Amene.

21 Eci ovilamo viange kolosandu viosi vi kasi vomunga kumue la Kristu Yesu. Vamanji va kasi lame vo tumisi ovilamo. 22 Olosandu viosi, ca piãla enene vana va kasi konjo ya Kaisare,+ vo tumisi ovilamo.

23 Ohenda ya piãla ya Ñala Yesu Kristu, yi kale lespiritu vu lekisa.