UKANDA KU VA EFESO

1 Ame ndi Paulu ndupostolo wa Kristu Yesu pocakati cocipango ca Suku, ndi sonehela olosandu vi kasi ko Efeso,+ haivio vakuekolelo vi kasi vomunga kumue la Kristu Yesu okuti:

2 Ohenda ya piãla lombembua vi tunda ku Suku Isietu kuenda ku Ñala Yesu Kristu, vi kale lene.

3 Suku Isia ya Ñala yetu Yesu Kristu a sivayiwe, momo kovitumãlo vio kilu eye wa siata oku eca kokuetu esumũlũho liosi li tunda kespiritu liaye ndolondonge via Kristu,+ 4 ndeci eye a tu nõla oco tu kale vomunga kumue laye* osimbu oluali ka lua sevetiwile okuti, tu lekisa ocisola kuenda tu kola loku pua etondelo+ kovaso aye. 5 Momo eye wa sokiya ale tunde osimbu okuti, o tu+ tambula ndomãla vaye+ pocakati ca Yesu Kristu, ndeci ci likuata lonjongole yaye kuenda locipango caye,+ 6 okuti, eye o sivayiwa omo liohenda yaye+ ya piãla, yina a tu ĩha locisola pocakati Comõlaye wa soliwa.+ 7 Vokuaye tu kuete eyovo omo liocisembi pocakati cosonde yaye+ kuenda ongecelo yakandu etu+ omo liohenda yaye ya piãla.

8 Ohenda yaco ya piãla eye wa ecelela okuti, yi tu supokaila lolondunge viosi kuenda elomboloko,* 9 poku tu situluila elumbu li kola+ liocipango caye. Elumbu liaco li kola, li likuata lonjongole yaye yina eye muẽle a tumbika ndocimãho caye, 10 okuti, oku sokiya ovina eci ku tẽlisiwa olotembo via tukuiwa, oco a kongele vali pamosi ovina viosi vu Kristu, ovina vio kovailu kuenda ovina vio posi.+ Ocili, vokuaye, 11 una tu kasi laye vomunga kuenda tua nõliwa oku linga vakapiñala,+ ndeci ca popiwa ale osimbu ndomo ci likuata locipango ca una o tẽlisa ovina viosi, eye o nõla eci ci likuata locipango caye. 12 Etu tete tua lavoka vu Kristu kuenda Suku wa ci popele ale osimbu oco tu wĩhe ulamba loku u sivaya. 13 Pole, ene wa lavokivo vokuaye noke yoku yeva ondaka yocili, olondaka viwa viatiamẽla keyovo liene. Noke yoku tava, wa tambulivo ondimbukiso+ mekonda liaye lespiritu sandu lio likuminyiwi, 14 okuti ohuminyo ya lingiwa osimbu* yi lekisa okuti, tu ka tambula ocipiñalo cimue,+ locimãho coku yovola+ omanu* va Suku locisembi,+ oco ulamba waye u sivayiwe.

15 Eli olio esunga lieci okuti, tunde eci nda yeva ekolelo vu kuete vu Ñala Yesu kuenda ocisola vu lekisa kolosandu viosi, 16 si liwekapo oku vu panduiliko. Kuenje ndamamako oku vu tukuli volohutililo viange, 17 okuti, Suku ya Ñala yetu Yesu Kristu, Isia yulamba, o wĩhi espiritu liolondunge kuenda liesituluilo vukũlĩhĩso wa suapo watiamẽla kokuaye.+ 18 Eye wa yikula ovisimĩlo viene* oco vu vanje okuti, vu kũlĩha elavoko eye a ku ĩhi kuenje vu kũlĩha asumũlũho a velapo ana eye a ka eca kolosandu ndonima,+ 19 kuenda ndomo unene waye wa piãla ka u sokisiwa kokuetu tua tava.+ Unene waco u molẽhela kongusu yaye ya pama 20 yina eye a lekisa eci a pindula Kristu kuava va fa, loku u tumãlisa kondio yaye+ kovitumãlo vio kilu, 21 kuenda wo kapa kilu liuviali wosi, lomoko yosi, lunene wosi, lusoma wosi, londuko yosi+ yi pondola oku eciwa, ci kaile voluali lulo,* ci kaile voluali lu laika oku iya. 22 Suku wa pokuisavo ovina viosi vemẽhi liolomãhi viaye+ kuenje wo lingisa utue wovina viosi viekongelo,+ 23 okuti, olio etimba liaye,+ hailio lieyuka ovituwa viaye kuenje o yukisa ovina viosi.

2 Handi vali, Suku wo muisi omuenyo ndaño ene wa fili kakulueya ene kuenda kakandu ene,+ 2 osimbu wa endaendi ndomo ci likuata loluali lulo+ kuenda ndomo ci likuata lombiali yespiritu+ lioluali li kasi ndofela+ okuti, cilo yi talavaya vomãla vesino. 3 Ocili, pokati kavo letuvo kosimbu tua kuamaile olonjongole vietimba lietu,+ loku tẽlisa ocipango cetimba kuenda ovisimĩlo vietu+ kuenje tua kala omanu va sesamẽla* onyeño+ ndeci vakuavo. 4 Pole, Suku ukuahenda ya piãla,+ omo liocisola caye calua cina a tu sola laco,+ 5 wa tu muisa omuenyo kumue la Kristu, ndaño ceci tua file kakulueya,+ pole, omo liohenda ya piãla, ene wa yovuiwi. 6 Kuenje eye wa tu pindula kumue la Kristu kuenda wa tu tumãlisa kovitumãlo vio kilu vomunga kumue la Kristu Yesu,+ 7 Suku wa ci lingila oco okuti, voluali lu laika oku iya,* eye o lekisa ohenda yaye yalua eci a tu lingila ovina viwa* etu tu kasi vomunga kumue la Kristu Yesu.

8 Omo liohenda eyi ya piãla, ene wa yovuiwi mekonda liekolelo,+ hamekondako liovilinga viene; te lesumũlũho lia Suku. 9 Hamekondako liovilinga+ oco okuti, lomue o kuata esunga lioku lipanda. 10 Etu tupange wovaka a Suku kuenda tua lulikiwa+ vomunga kumue la Kristu Yesu+ oco okuti, tu linga ovilinga viwa, vina Suku a tu sokiyila tunde osimbu oco tu endelemo.

11 Omo liaco, ivaluki okuti kosimbu wa kaili omanu vakualofeka tunde koku citiwa, haene wa endi oku tukuiwa okuti “oviyamba” la vana va tukuiwa okuti “vakuevamba” okuti, evamba liavo lia lingiwa lovaka omanu. 12 Kotembo yaco ka wa kaili la Kristu, wa kaili ocipãla lofeka ya Isareli, haene wa kali ovingendeleyi kovisila viohuminyo;+ ka wa kuateli elavoko kuenda ka wa kuateli Suku voluali.+ 13 Pole, cilo omo vu kasi vomunga kumue la Kristu Yesu, ene wa kaili ocipãla, kaliye weyi ocipepi mekonda liosonde ya Kristu. 14 Momo eye ombembua yetu,+ una wa lingisa okuti, eci ca kala ovimunga vivali+ ci linga cimosi kuenda wa teya ocimano ca kala pokati ketu.+ 15 Omo lioku fa* kuaye, wa imũla ukuse lovikundi Viocihandeleko via kala ndoviholo okuti, cina ca kala ovimunga vivali vi kasi vomunga kumue laye, ci linga omunu umosi wokaliye+ loku linga ombembua, 16 kuenda oku kuatisa ovimunga viaco vivali oku kala ndetimba limosi oco vi linalise la Suku omo liuti wekangiso,*+ momo eye wa imũla ukuse+ mekonda liaye muẽle. 17 Kuenje eye weya kuenda wa kunda olondaka viwa viombembua kokuene wa kali ocipãla kuenda ombembua ku vana va kala ocipepi, 18 momo pocakati caye, etu tuvimunga vivali, tu kuete evelo lioku amela ku Isia lespiritu limuamue.

19 Omo liaco, ene ka vu lingi vali akombe pamue ovingendeleyi,+ pole, wakuafeka yimuamue+ lolosandu kuenda wakuanjo ya Suku,+ 20 kuenje wa tungiwi kociseveto covapostolo lovaprofeto+ osimbu okuti, Kristu Yesu eye ewe lievindi liociseveto.+ 21 Vomunga kumue laye, olonepa viosi vionjo yaco, via tokekiwa ciwa+ kuenje yi kasi oku tungiwa oco yi linge onembele yi kola ya Yehova.*+ 22 Vomunga kumue laye, ene kumue la vakuavo vosi vu kasi oku tungiwa oco vu lingi ocitumãlo muna Suku a ka kalamo pocakati cespiritu liaye.+

3 Eli olio esunga lieci, ame ndi Paulu nda lingila omandekua+ ya Kristu Yesu mekonda liene vumanu vakualofeka, 2 nda ene wa yevi muẽle okuti nda nõliwa nda kalei+ kohenda ya piãla ya Suku, mekonda liene, 3 okuti, elumbu li kola lia situluiwa kokuange, ndeci ame ndo soneheleli ale. 4 Kuenje eci vu ci tanga, vu ka limbuka okuti ñuete ukũlĩhĩso welumbu li kola+ lia Kristu. 5 Kovitumbulukila vikuavo, elumbu eli ka lia situluiwile komãla vomanu, ndeci lia situluiwa cilo kovapostolo vaye va kola lo kovaprofeto pocakati cespiritu,+ 6 okuti, omanu vakualofeka vomunga kumue la Kristu Yesu kuenda pocakati colondaka viwa, va ponduile oku kala vakapiñala, haivo ovimatamata vietimba+ limuamue kuenje va kuatavo ohuminyo yimuamue ndeyi yetu. 7 Nda linga ondingupange yelumbu li kola ndomo ci likuata locali cohenda ya piãla ya Suku yina ya nyĩhiwa longusu yunene waye.+

8 Ndaño ame ndi sule pokati kolosandu viosi,+ ohenda eyi ya piãla ya nyĩhiwa+ oco okuti, ndi kundila vakualofeka olondaka viwa viatiamẽla kukuasi ka u tendiwa wa Kristu, 9 kuenda oku ecelela okuti vosi va limbuka ndomo elumbu li kola+ lia sokiyiwa, lina lia sitikiwile ku Suku tunde osimbu, una wa lulika ovina viosi. 10 Eci ca lingiwila oco okuti, pocakati cekongelo+ ku situluiwa kolombiali kuenda kovoviali vovitumãlo vio kilu olondunge via piãla via Suku+ volonepa viñi viñi. 11 Eci ci likuata locipango caye cina a yonguile oku tẽlisa tunde osimbu pocakati ca Kristu+ Yesu Ñala yetu, 12 una okuti, pocakati caye tu kuete elianjo lioku popia kuenda oku amela+ kokuaye pocakati cekolelo tu u kuetele. 13 Kuenje ndu pingi okuti ko ka liwekipo omo liohali ñasi oku tala mekonda liene, momo oyo yi lomboloka ulamba kokuene.+

14 Eli olio esunga lieci ndi kekamẽla Isia, 15 una apata osi o kilu la-a o posi a kasilili mekonda liaye.* 16 Ndi likutilila okuti eye pocakati culamba waye wa piãla, o vu kolisi+ vutima lunene wespiritu liaye, 17 kuenje ndi likutilila okuti Kristu kumue locisola, o kala vovitima viene,+ momo vu kuete ekolelo kokuaye. Talami ngõ+ loku pamisiwa vociseveto,+ 18 oco okuti, kumue lolosandu viosi vu tẽla oku kũlĩha ciwa upati, lusõvi loku lepa kuenda oku longa, 19 loku kũlĩha ocisola ca Kristu+ cina ca velapo ukũlĩhĩso oco okuti, vu yukisua lovituwa viwa vi tunda ku Suku.

20 Cilo, Suku una okuti unene waye u kasi oku talavaya vokuetu,+ haeye o pondola oku linga calua okuti, ovina viosi tu pinga ale tu sima vi sule,+ 21 kokuaye ku kale ulamba pocakati cekongelo kuenda pocakati ca Kristu Yesu kovitumbulukila viosi otembo ka yi pui. Amene.

4 Omo liaco, ame ndimandekua+ vu Ñala, ndu pingi oco wendaendi lesunguluko+ kekovongo wa kovongiwi lalio, 2 lumbombe* wosi,+ loku omboka, lepandi,+ loku pandikisa omunu lukuavo locisola,+ 3 loku kuata ombembua+ omunu lukuavo, loku likolisilako oku amamako lomunga yene, yina wa tambuli omo liespiritu sandu. 4 Kuli etimba limosi+ kuenda espiritu limosi,+ ndeci wa kovongiwi lelavoko limosi;+ 5 Kuli Ñala umosi,+ ekolelo limosi, epapatiso limosi; 6 Suku umosi haeye Isia ya vosi, una wa velapo vosi, pocakati ca vosi kuenda ku vosi.

7 Cilo, ohenda ya piãla ya eciwa komunu lomunu pokati ketu ndomo ci likuata lonjongo yombanjaile Kristu a eca ocali.+ 8 Oco ca popiwila citi: “Eci eye a londa kocitumãlo ca lepa, wambata olomandekua; kuenje eye wa eca alume ndolombanjaile.”+ 9 Nye ci lomboloka ondaka yokuti “eye wa londa”? Ci lomboloka okuti kosimbu eye wa lokile palo posi. 10 Una wa loka, eyevo una wa londa kilu+ liovailu osi+ oco eye a tẽlise ovina viosi.

11 Kuenje eye wa eca vamue ndovapostolo,+ vamue ndovaprofeto,+ vamue ndakundi,*+ vamue ndangombo kuenda alongisi,+ 12 wa ci lingila oku pengulula* olosandu kupange woku vumba vakuavo, loku tunga etimba lia Kristu,+ 13 kuenda ovo va ka ci linga toke eci vosi yetu tu kala vamuamue vekolelo kuenda oku kũlĩha ciwa Omõla a Suku. Kuenje tu kala akulu vendamba,*+ loku amela ku Kristu volonjila via litepa. 14 Omo liaco, ka tu ka lingi vali omãla, loku pungoka lakimba kuenda oku imbiwa oko loko lofela yosi yalongiso+ omo lioku lunguka kuomanu, latutu oku vangula ovisimĩlo viuhembi. 15 Pole, oku vangula muẽle ocili, locisola tu lingi akulu vendamba kovina viosi vu Kristu+ okuti, eye utue. 16 Vokuaye etimba liosi+ li litokeka pamosi kuenda li likuatisa pokati lasokoluilo osi okuti, lieca eci ci sukiliwa. Eci ocimatamata locimatamata ci talavaya ciwa, ci kuatisa etimba oku kula, osimbu olio li li pamisa locisola.+

17 Omo liaco, eci ndu sapuili, loku imba uvangi vu Ñala ceci okuti, ka vu ka endaendi vali ndeci vakualofeka va endaenda luveke*+ wovisimĩlo viavo.+ 18 Ovisimĩlo viavo vi kasi vowelema kuenda va litepa komuenyo u tunda ku Suku, momo ka va yongola oku kũlĩha Suku, omo ovitima viavo via siva.* 19 Ovo ka va kuete vali ovituwa viwa kuenje va lieca kumbondo*+ oco va linge ovina viosi vĩvi lalivelo.

20 Pole, ene ka wa lilongisili okuti Kristu oco a tuwa, 21 nda okuti, wo yevi kuenda wa longisiwi pocakati caye, ndeci ocili ci kasi vu Yesu. 22 Ene wa longisiwi oku lula omunu wosimbu, una wa tiamẽla kovituwa viene viosimbu+ okuti, o kasi oku yapuisiwa ndomo ci likuata loloñeyi viaye vĩvi.+ 23 Kuenda ene vu sukila oku amamako oku pongoloka oco vu kali vokaliye kovisimĩlo,*+ 24 kuenda wali omunu wokaliye+ una wa lulikiwa ndomo ci likuata locipango ca Suku, lesunga liocili kuenda oku kola.

25 Kaliye, omo okuti wa sipo uhembi, omunu lomunu pokati kene a vangule ocili lukuavo,+ momo tuvimatamata vietimba limuamue.+ 26 Temi, pole, ko ka lingi ekandu;+ kuenda ekumbi ka li ka iñile osimbu handi wa temi;+ 27 ko ka eci evelo* Keliapu.+ 28 U o nyana ka ka nyane vali; puãi a talavaye loku linga upange uwa lovaka aye muẽle+ okuti, o kuata cimue coku eca komunu wa suka.+ 29 Vomẽla wene ka mu ka tunde ondaka yĩvi,+ pole, vanguli lika eci ciwa oco okuti vana va yeva va pamisiwa laco.+ 30 Handi vali, ko ka sumuisi* espiritu sandu lia Suku,+ lina Suku o kapelui ondimbukiso+ toke keteke lieyovo omo liocisembi.+

31 Imbipo ocikumbiti cosi, onyeño,+ oku tema, onjuela, olondaka vioku pembula+ kuenda ovina viosi ka via sungulukile.+ 32 Pole, likuateli ocisola pokati, lingi vakuahenda,+ loku li ecela pokati ndeci Suku o wecelivo lutima wosi vu Kristu.+

5 Omo liaco, lingi olosetukuli via Suku+ ndomãla va soliwe, 2 kuenda endaili vocisola+ ndeci Kristu a tu* solavo+ kuenda wa eca omuenyo waye omo lietu* ndocilumba celemba liwa ku Suku.+

3 Evĩho liukahonga* lovina viosi via vĩha, ale ocipululu ka vi ka tukuiwe pokati kene,+ pole, lingi ndeci ca siata komanu va kola;+ 4 ndaño ovilinga vi kutisa osõi, ndaño olombangulo viuveke kuenda olomapalo vĩvi okuti, ovina ka via sungulukile,+ pole, te oku eca olopandu ku Suku.+ 5 Momo wa kũlĩhi okuti lomue ukuevĩho liukahonga,*+ ale omunu wa vĩha, pamue ukuacipululu,+ ci lomboloka ukuakufendela oviteka, o kuete ocipiñalo cimue Vusoma wa Kristu kuenda wa Suku.+

6 Lomue ka ko kembi lolondaka viesanda, momo omo liovina viaco, ku iya onyeño ya Suku komãla vesino. 7 Omo liaco, ko ka kuati ukamba lavo; 8 momo kosimbu ene wa kali ndowelema, pole, cilo vu kasi ndocinyi+ kumue la Ñala.+ Amamiko oku endaenda ndomãla vocinyi, 9 momo epako liocinyi li limbukiwila kuwa wosi, kesunga kuenda kocili.+ 10 Amamiko oku limbuka ovina vi sanjuisa+ Ñala; 11 kuenda liwekipo oku litumbika kovilinga ka vimi apako vina via tiama kowelema;+ pole, vi situluli ndomo ovio via tuwa. 12 Momo ovina va linga vuyombeki, vi kutisa osõi ndaño muẽle oku vi tukula. 13 Ovina viosi vi muiwa, vi situluiwa* locinyi, momo ovina viosi vi situluiwa, ovio ocinyi. 14 Omo liaco, ca popiwa citi: “Pasuka Okuakupekela, pinduka kuava va fa+ kuenje Kristu o ka ku ĩha ocinyi.”+

15 Lavululi oco ka vu ka endaendi ndava ka va kuete olondunge, puãi te ndomanu va kuete olondunge, 16 loku talavaya ciwa lotembo* yene,+ momo oloneke via vĩha. 17 Omo liaco, liwekipo oku kala aveke, pole, amamiko oku limbuka cipi ocipango ca Yehova.*+ 18 Handi vali, ko ka kolui lovinyu+ okuti, yi tuala koku ambata omuenyo ũvi,* pole, amamiko oku yukisiwa lespiritu. 19 Vanguli omunu lukuavo lolosamo, sivayi Suku kuenda imbi ovisungo viefendelo,+ imbili Yehova*+ ovisungo lovisikilo vovitima viene,+ 20 olonjanja viosi eci olopandu+ ku Suku yetu haeye Isia omo liovina viosi vonduko ya Ñala yetu Yesu Kristu.+

21 Li pokoli omunu lukuavo+ omo wa sumbili Kristu. 22 Akãi va pokole kalume vavo+ ndeci ku Ñala, 23 momo ulume eye utue wukãi waye+ ndeci Kristu okuti, eye utue wekongelo,+ haeye wa linga onjovoli yetimba eli. 24 Ndeci ekongelo li pokola ku Kristu, akãi va sukilavo oku pokola kalume vavo kovina viosi. 25 Ene alume, amamiko oku sola akãi vene+ ndeci Kristu a sola ekongelo kuenda wa ecela omuenyo waye ekongelo,+ 26 oco okuti, o li kolisa, o li yelisa loku li sukula lovava pocakati condaka,+ 27 oco a lekise kokuaye muẽle ekongelo vulamba walio okuti, ka li kuete etime, ale emome pamue cimue pokati kovina viaco,+ pole, li kola kuenda lia pua etondelo.+

28 Cimuamue haico okuti, alume va sukila oku sola akãi vavo ndeci va sole etimba liavo muẽle. Ulume o sole ukãi waye o li sole eye muẽle, 29 momo lomue omunu wa suvukile etimba* liaye muẽle, pole, o li tekula loku li tata ndeci Kristu a linga lekongelo, 30 omo tuvimatamata vietimba liaye.+ 31 “Eli olio esunga lieci ulume a ka silapo isiaye la inaye kuenda o ka likakatela* kukãi waye kuenje kavali kavo va ka linga etimba limuamue.”+ 32 Elumbu eli li kola,+ linene. Cilo ñasi oku vangula catiamẽla ku Kristu kuenda kekongelo.+ 33 Omo liaco, omunu lomunu pokati kene, a sole ukãi waye+ ndeci a li sole eye muẽle; handi vali, ukãi o sukila oku lekisa esumbilo liocili kulume waye.+

6 Ene amãla, pokoli kolonjali viene+ vomunga kumue la Ñala, momo eci ca sunguluka kovaso a Suku. 2 “Sumbila isiove la ina yove,”+ eci oco ocihandeleko catete ci kuete ohuminyo: 3 “Oco okuti, o kuata omuenyo uwa kuenda o kala otembo yalua kilu lieve.” 4 Ene a va isia, ko ka wenguli onyeño yomãla vene,+ pole, va tati poku va lungula loku va pindisa*+ ndomo ci likuata leci Yehova* a popia.+

5 Ene apika, pokoli ku vacime cene+ va palo posi lusumba kuenda lesumbilo liocili vovitima viene ndeci ku Kristu, 6 ko ka ci lingi lika eci vu letiwe oco vu sanjuisi omanu,*+ pole, ndapika va Kristu, lingi ocipango ca Suku lutima wosi.+ 7 Vumbi lutima wosi, ndu okuti vu vumba Yehova,*+ omanu havoko, 8 momo wa kũlĩhi okuti, cosi ciwa omunu a linga, o ka tambula onima yaco ku Yehova,*+ ci kaile upika, ci kaile omunu wa yovoka. 9 Lenevo a vacime, amamiko oku ivaluka ovina evi poku tata apika vene okuti, ka vu va saluisa, momo ene wa kũlĩhi okuti, Cime cavo haeye cime cene o kasi kovailu+ kuenda kokuaye ka kuli ocame.

10 Oku sulako, amamiko oku kuata ongusu+ yi tunda ku Ñala kuenda kunene wongusu yaye. 11 Wali ovimalẽho viosi+ via eciwa la Suku oco okuti, vu tẽla oku talama ngõ katutu Eliapu; 12 momo tu kuete uyaki+ umue okuti halomanuko,* te lovoviali, lovonene, lolombiali violuali lulo luowelema kuenda lolohoka viaspiritu ãvi.+ 13 Omo liaco, wali ovimalẽho viosi via eciwa la Suku+ oco okuti, vu tẽla oku tamalãla keteke lĩvi kuenda noke yoku tẽlisa ovina viosi, vu talama ngõ.

14 Talami ngõ, itiki ocili volombunda viene nduvia+ kuenda wali esunga okuti, ociteyuilo co vonete,+ 15 kuenda wali kolomãhi viene eliangiliyo lioku sapula olondaka viwa viombembua.+ 16 Handi vali, talavayi lociyepelo cinene cekolelo+ okuti, vu tẽla oku ima laco isongo* viosi viondalu viondingaĩvi.+ 17 Tambulivo ocikoko cepopelo+ kuenda osipata yespiritu okuti, ondaka ya Suku,+ 18 oco okuti lolohutililo+ via litepa kuenda apingilo, vu likutilila vapuluvi osi vespiritu.+ Omo liaco, lavululi, amamiko oku lingilako olosandu viosi apingilo. 19 Ndi likutililikovo oco olondaka vi eciwe kokuange eci ndi yulula omẽla wange okuti, ndi tẽla oku vangula lutõi poku sapula elumbu li kola liolondaka viwa,+ 20 vina okuti, ame ndi kasi ndonumiwa yaco+ kalienge kuenda oco ndi tẽle oku vangula catiamẽla kokuavio lutõi ndeci ndi sukila oku vangula.

21 Cilo, oco ene vu kũlĩhĩvo eci catiamẽla kokuange kuenda ndomo ñasi, Tukiko+ manji wa soliwa haeye ondingupange ya koleliwa vu Ñala, o ka vu lomboluili ovina viosi.+ 22 Ñasi oku u tuma kokuene locimãho cokuti, vu kũlĩha ndomo tu kasi kuenda oco eye a lembeleke ovitima viene.

23 Vamanji va kuate ombembua, locisola, lekolelo li tunda ku Suku Isia kuenda ku Ñala Yesu Kristu. 24 Ohenda ya piãla yi kale la vosi vana va kuetele Ñala yetu Yesu Kristu ocisola cocili.