UKANDA KU VA GALATIA

1 Ame ndupostolo Paulu ndu soneheli. Sia nõliwile lomunu, oco ndi linge upostolo, pole, te Yesu Kristu+ kumue la Suku Isietu,+ una wo pindula kuava va fa. 2 Ocili, ame ndi Paulu kumue la vamanji vosi va kasi lame, tu vu soneheli okuti, kakongelo a kasi voluvumba luo Galatia:

3 Ohenda ya piãla lombembua vi tunda ku Suku Isietu kuenda ku Ñala Yesu Kristu, vi kale lene. 4 Eye wa lieca omo liakandu etu+ oco a tu popele voluali lulo* lua vĩha+ ndeci ci likuata locipango ca Suku yetu Isia,+ 5 una okuti kokuaye ku kale ulamba otembo ka yi pui. Amene.

6 Nda komõha omo wa yapuisiwi lonjanga ku Una wo kovongi lohenda ya piãla ya Kristu oco vu tavi esapulo likuavo ndu okuti, lia kala olondaka viwa.+ 7 Ka kuli olondaka vikuavo viwa; pole, kuli vamue va kasi oku vu kokeli esakalalo+ kuenda va yongola oku pengisa olondaka viwa viatiamẽla ku Kristu. 8 Omo liaco, nda etu, ale ungelo umue o tunda kilu, wa vu kundili olondaka viwa vi patãla vina tuo longisi, omunu waco a siñaliwe. 9 Ndeci tua popia ale, haico mopia vali okuti: Wosi o vu kundili olondaka viwa vi patãla vina wa tavi, omunu waco a siñaliwe.

10 Ñasi hẽ oku sanda oku taviwa lomanu, ale la Suku? Ale ñasi oku seteka oku sanjuisa omanu? Nda handi nda kalele oku sanjuisa omanu, nda siupikako wa Kristu. 11 A vamanji, ndi yongola oco vu kũlĩhi okuti, olondaka viwa ñasi oku vu sapuili haviomunuko;+ 12 momo sia vi tambuile komunu ndaño oku vi ndi longisa, pole, via ndi situluiwa la Yesu Kristu.

13 Ene wa yevi ndomo nda tuwile eci nda tiamẽlele ketavo lia va Yudea+ okuti, ndamamako oku lambalala calua ekongelo lia Suku, loku seteka oku li nyõla;+ 14 kuenda ketavo lia va Yudea nda velelepo vakuotunga wange vofeka yange, momo nda kala ukuambili yalua koviholo via va isia yange.+ 15 Pole, eci Suku una wa ecelela okuti ndi citiwa kuenda wa ñovonga omo liohenda yaye+ ya piãla, a nõlapo 16 oku situlula Omõlaye pocakati cange oco ndi sapuile vakualofeka olondaka viwa viatiamẽla kokuaye,+ sia endele lonjanga oku vangula lomunu umue;* 17 sia lamanele ko Yerusalãi ku vana va kala tete ovapostolo osimbu ame handi sia kaile, pole, nda endele ko Arabia, noke nda tiukila ko Damasko.+

18 Noke yanyamo atatu, nda lamanela ko Yerusalãi+ oku ka nyula Kefa*+ kuenje nda kala laye ci soka 15 koloneke. 19 Pole, ovapostolo vakuavo sia va muile, te lika Tiago+ manji a Ñala. 20 Kaliye catiamẽla kovina ñasi oku vu soneheli, ndu sapuili kovaso a Suku okuti, si kasi oku kemba.

21 Noke nda enda kolofeka vio ko Suria kuenda vio ko Kilikiya.+ 22 Pole, sia kũlĩhĩwile lakongelo o ko Yudea ana a kala vomunga kumue la Kristu. 23 Ovo va yeva lika ku vakuavo okuti: “Ulume una wa enda oku tu lambalala,+ cilo o kasi oku sapula olondaka viwa viatiamẽla ketavo lina eye a setekele oku nyõla.”+ 24 Kuenje ovo va fetika oku eca ulamba ku Suku mekonda liange.

2 Kuenje eci pa pita 14 kanyamo, nda lamanela vali ko Yerusalãi kumue la Barnaba+ kuenda ndambatavo Tito.+ 2 Pole, nda lamanelako omo liesituluilo lia tunda kilu. Kuenje nda va sapuila olondaka viwa ñasi oku kunda pokati ka vakualofeka, vohongele yimue yitito ya lingiwa kovaso ya vana va songola ekongelo oco ndi kolele okuti, upange nda kala oku linga ale nda linga ale, ka u lingi wolivova. 3 Pole, Tito+ una wa kala lame, ka kisikiwile oku seviwa evamba+ ndaño eye u Helasi. 4 Pole, ocitangi caco ceya omo lia vamanji vamue vesanda va iñila vuyombeki+ oco va sange onjila yoku nyõla elianjo+ tu kuete vomunga kumue la Kristu Yesu okuti, va tu lingisa apika;+ 5 puãi ka tua tavele ndaño naito* kondaka yavo+ oco okuti, ocili colondaka viwa camamako lene.

6 Pole, ku vana va litendele okuti va velapo,+ ndomo va kala kokuange hacimueko, momo Suku ka vanji kemolẽho liomunu, alume vaco va kemãla ka va ndi sapuilile lacimue cokaliye. 7 Pole, eci va mola okuti nda kundikiwa olondaka viwa kuava ka va seviwile evamba,+ ndeci Petulu a linga la vana va seviwa evamba, 8 momo Suku una wa eca unene ku Petulu woku kala upostolo wa vana va seviwa evamba, wa nyĩhavo unene woku linga upange waco ku vakualofeka,+ 9 kuenje eci va limbuka ohenda ya piãla ya nyĩhiwa,+ Tiago+ la Kefa* kuenda Yoano okuti, ovo va molẽhele okuti va kala olongunji, va tu kuata peka liondio ame la Barnaba+ okuti, tu enda ku vakualofeka, pole, ovo va enda kuava va seviwa evamba. 10 Ovo va tu pinga lika oco tu amameko oku kapako olohukũi kuenje eci oco nda siata oku likolisilako oku linga.+

11 Kuenje eci Kefa*+ eya ko Antiokea,+ ndo vetela evelo* omo wa sesamẽlele oku pisiwa. 12 Momo osimbu alume vamue va tunda ku Tiago+ ka veyile, eye wa enda oku lia la vakualofeka;+ pole, eci alume vaco veya, wa liwekapo oku ci linga kuenda wa litepa lavo omo liusumba a kuatela vana vakuacisoko cava va seviwa evamba.+ 13 Va Yudea vakuavo va likongela kokuaye kombambe* yaco, ndaño Barnaba wa yapuisiwavo lombambe* yavo. 14 Eci nda limbuka okuti ka va kasi oku endela vocili colondaka viwa,+ nda sapuila Kefa* kovaso yavo siti: “Nda ove u Yudea o lingainga ndeci vakualofeka va linga kuenje ku lingi ndeci va Yudea, o kisika ndati vakualofeka oco va linge ovina va Yudea va lingainga?”+

15 Etu tu va Yudea koku citiwa okuti, hatuvakuakanduko vakualofeka, 16 tua limbuka okuti, omunu o tendiwa ndukuesunga hamekondako lioku kuama ocihandeleko, pole te lika pocakati cekolelo+ vu Yesu Kristu.+ Omo liaco, tua kolela Kristu Yesu okuti, tu tendiwa ndavakuesunga omo liekolelo tu kuetele Kristu, hamekondako lioku kuama ocihandeleko, momo lomue* o ka tendiwa ndukuesunga omo lioku kuama ocihandeleko.+ 17 Nda cilo tu vakuakandu osimbu tu sanda oku tendiwa ndavakuesunga pocakati ca Kristu, anga Kristu wa linga upika wekandu? Hacoko! 18 Nda ovina nda nyõla ndi vi tunga vali, ndi lekisa okuti ndukuesino. 19 Momo pocakati cocihandeleko nda fa+ kocihandeleko oco okuti, ndi muila omuenyo ku Suku. 20 Nda valeliwa kuti kumue la Kristu.+ Hameko vali ñasi lomuenyo,+ pole, Kristu o kasi lomuenyo eye o kasi vomunga kumue lame. Omo liaco, omuenyo ñasi lawo cilo vetimba, ndu u kuetele omo nda kolela Komõla a Suku,+ una wa ndi sola kuenje wa lieca olumue mekonda liange.+ 21 Omo liaco, si likali* ohenda ya piãla ya Suku,+ momo nda esunga liya pocakati cocihandeleko, Kristu wa fa ño elivova.+

3 Ene aveke, a va Galatia! Helie wo yapuisi?+ Momo ene wa tambuli elomboluilo lia suapo liatiamẽla kolofa via Yesu Kristu kuti.+ 2 Ocina cimue ndi yongola oku vu puli ceci:* Wa tambuli espiritu omo lioku kuama ocihandeleko, ale omo lioku kolela kueci wa yevi?+ 3 Anga hẽ wa piãli kuveke? Ene wa fetiki oku kolela kespiritu, kaliye vu sulila loku kolela kueci ci tunda komunu ka lipuile?+ 4 Wa tali ño ohali yalua elivova? Nda kolela okuti ka ca kaile elivova. 5 Anga hẽ una u wĩhi espiritu haeye o linga ovikomo+ pokati kene, o ci lingila omo lioku kuama ocihandeleko, ale omo liekolelo liene kueci wa yevi? 6 Ndeci ca pita la Avirahama okuti, “wa kolela Yehova* kuenje lonjila eyi Suku wo tenda ndomunu ukuesunga.”+

7 Ene wa kũlĩhi okuti, vana va kuete ekolelo ovo omãla va Avirahama.+ 8 Ocisonehua poku lekisa okuti, Suku wa laikele oku tenda omanu vakualofeka ndavakuesunga omo liekolelo, ca sapula olondaka viwa ku Avirahama okuti: “Olofeka viosi vi ka sumũlũhila vokuove.”+ 9 Pole, vana va kuete ekolelo, va sumũlũhila kumue la Avirahama, una wa kuata ekolelo.+

10 Vosi va kuama ocihandeleko va kasi vemẽhi liesiñalo, momo ca sonehiwa citi: “Omunu wosi ka lingi ovina via sonehiwa velivulu Liocihandeleko haeye ka vi pokola, wa siñaliwa.”+ 11 Ocili okuti, lomue o tendiwa la Suku ndukuesunga omo liocihandeleko,+ momo “ukuesunga o ka mola omuenyo omo liekolelo.”+ 12 Ocihandeleko ka ci tiamẽla kekolelo. Pole, “wosi o linga ovina evi, o ka muila omuenyo kokuavio.”+ 13 Kristu wa tu landa+ loku tu yovola+ kesiñalo Liocihandeleko poku kala esiñalo pomangu yetu, momo ca sonehiwa citi: “Omunu wosi wa valeliwa kuti, wa siñaliwa.”+ 14 Eci ca lingiwila oco esumũlũho lia Avirahama liyevo ku vakualofeka mekonda lia Kristu Yesu okuti,+ tu tambula espiritu+ sandu Suku a likuminya oku eca omo liekolelo lietu.

15 A vamanji, mopia ndomo omanu va popia popia okuti: Ndeci ocisila ca lingiwa ale, ndaño ca lingiwa lomunu, lomue o tẽla oku ci imũla ndaño oku ci vokiya. 16 Cilo olohuminyo, via lingiwa ku Avirahama kuenda kocitumbulukila* caye.+ Ocisonehua ka ca popele citi, “kuenda kovitumbulukila* viove,” ndu okuti vialua. Pole, ci popia citi, “kuenda kocitumbulukila* cove” okuti, umosi Kristu.+ 17 Handi vali, eci ñasi oku popia ceci okuti: Ocihandeleko cina ca eciwa 430 kanyamo konyima,+ ka ci nyõli ocisila ca lingiwa ale la Suku oco okuti, ci imũla ohuminyo. 18 Momo nda ocipiñalo catiamẽla kocihandeleko, oco ka ci tiamẽla vali kohuminyo; pole, Suku locisola wa ceca ku Avirahama omo liohuminyo.+

19 Ocihandeleko hẽ ceyilila nye? Ceyilila oku situlula ovina vĩvi omanu va lingaile,+ toke eci ocitumbulukila* ceya+ ku yuna ohuminyo ya lingiwile; kuenda Suku wa eca ocihandeleko kovangelo+ kuenje va ci sapula vonduko ya mitakati umue.+ 20 Cilo ka kuli mitakati nda mua kongela lika omunu umosi, pole, Suku umosi lika. 21 Oco hẽ, Ocihandeleko ci patãla olohuminyo via Suku? Hacoko! Nda okuti kua eciwile ocihandeleko ci muisa omuenyo, esunga nda lieya pocakati cocihandeleko. 22 Pole, Ocisonehua ca eca ovina viosi kupika wekandu oco okuti, ohuminyo yi tunda koku kolela Yesu Kristu, yeciwa ku vana va kuete ekolelo.

23 Osimbu ekolelo ka lieyile, tua kala vemẽhi liocihandeleko, tua teyuiwa laco loku lavoka ekolelo lia laikele oku situluiwa.+ 24 Ocihandeleko ca linga ondavululi* yetu poku tu songuila ku Kristu+ okuti, tu tendiwa ndavakuesunga omo liekolelo.+ 25 Cilo omo okuti ekolelo lieya,+ ka tu kasi vali vemẽhi liondavululi.*+

26 Vosi yene vumãla va Suku+ omo liekolelo liene vu Kristu Yesu.+ 27 Momo nda vosi yene wa papatisiwi vu Kristu, wa wali ovituwa via Kristu.+ 28 Ka pali oku litepa pokati ku Yudea lu Helasi,+ ale kupika lomunu wa yovoka,+ ulume ale ukãi;+ momo vosi yene vu kasi vomunga yimuamue kumue la Kristu Yesu.+ 29 Omo liaco, nda wa tiamẽli ku Kristu, vucitumbulukila* muẽle ca Avirahama+ kuenda vukapiñala+ ndomo ci likuata lohuminyo yimue.+

4 Cilo mopia okuti, osimbu kapiñala a kasi omõla, ka litepele lupika ndaño okuti ovina viosi viaye, 2 pole, eye o pokola kasongui kuenda ku va kalei toke otembo ya sokiyiwa tunde osimbu la isiaye. 3 Cimuamue haico letu okuti, eci tua kala omãla, tua kala vupika wovina viaño violuali.+ 4 Pole, eci otembo ya tukuiwa ya pitĩla, Suku wa tuma Omõlaye, una wa citiwa lukãi+ haeye wa kala vemẽhi liocihandeleko,+ 5 okuti o yovola vana va kasi vemẽhi liocihandeleko+ kuenje Suku o tu tambula ndomãla vaye.+

6 Omo okuti cilo vumãla, Suku wa tuma espiritu+ Liomõlaye vovitima vietu+ kuenda li kaluka liti: “Aba,* a Tate!”+ 7 Cilo ove kupikako vali, puãi wumõla; kuenda nda wumõla, Suku wa ku lingisavo kapiñala.+

8 Osimbu ka wa kũlĩhĩli Suku, wa kaili apika va vana okuti olosuku viesanda. 9 Pole, cilo omo wa kũlĩhi Suku, ale wa kũlĩhĩwi la Suku, momo lie vu tiukila vali kovina viaño+ violuali okuti, vĩvi haivio ka vi kuete esilivilo kuenda vu yongola oku kala vali apika viavio?+ 10 Ene vu kasi oku sambiliya oloneke, olosãi,+ lovovo kuenda anyamo. 11 Ñuete ohele lene okuti, alikolisilo ange kokuene a linga elivova.

12 A vamanji, ndu pingi siti, kali ndame, momo ame nda kalavo ndene.+ Ka wa ndingili lacimue cĩvi. 13 Pole, wa kũlĩhi okuti omo liuvei wo ketimba, nda kuata epuluvi lioku vu kundili olondaka viwa onjanja ya tete. 14 Ndaño uvei wange wo tatamisi, ene ka wa ndi tateli lesepu pamue oku ndi nyehũla;* pole, wa nambuli ndungelo wa Suku, ndeci Kristu Yesu. 15 Esanju wa kali lalio li kasi pi? Momo ndu wimbili uvangi wokuti, nda ca tavele, nda wa tofoli ovaso ene loku a nyĩha.+ 16 Oco hẽ nda linga unyãli wene omo ndo sapuili ocili? 17 Ovo vakuambili koku vu yuli, pole, halocimãhoko ciwa; ovo va yongola oku vu tepi kokuange okuti, vu kuata onjongole yoku va kuama. 18 Ciwa nda olonjanja viosi omunu umue o vu sandi lombili locimãho ciwa okuti, ka ci lingi lika eci ñasi lene, 19 atumãla tuange,+ ndu kueteli vali olongembia vioku cita toke eci ovituwa via Kristu vi kala vokuene. 20 Ame nda yonguile oku kala lene cilo kuenda oku vangula lonjila ya litepa, momo sia kũlĩhĩle eci ndi linga catiamẽla kokuene.

21 Ndi sapuiliko ene vu yongola oku kala vemẽhi Liocihandeleko: Ene ka vu yevi hẽ Ocihandeleko? 22 Ndeci, ca sonehiwa okuti, Avirahama wa kuatele omãla vavali valume, umue wupika, ukuavo wukãi+ una okuti hupikako,+ 23 omõla wupika wa citiwa ndomãla vosi,+ pole, omõla wukãi una okuti hupikako wa citiwa pocakati cohuminyo.+ 24 Ovina evi vi kuete elomboloko likuavo; momo akãi ava va lomboloka ovisila vivali, cimue ca lingiwila Komunda Sinai,+ una o cita omãla vupika okuti, Hagare. 25 Hagare o lomboloka Sinai,+ omunda yimue yi kasi ko Arabia kuenda eye o lomboloka o Yerusalãi yetaili, momo o kasi vupika lomãla vaye. 26 Pole, o Yerusalãi yo kilu hupikako kuenda eye ina yetu.

27 Momo ca sonehiwa citi: “Sanjuka ove ukãi osiũle una ka la cita; ove ukãi ku kuete olongembia vioku cita sanjuka; momo omãla vukãi wa siwa, valuapo vali okuti, va una o kuete ulume ci sule.”+ 28 Kaliye a vamanji, ene vumãla vohuminyo nda Isake.+ 29 Pole, ndeci omõla una wa citiwa ndomãla vosi a fetika oku lambalala una wa citiwa lespiritu,+ cimuamue haico etaili.+ 30 Oco puãi ocisonehua ci popia nye? “Tundisa upika lomõlaye, momo omõla wupika ka lingi kapiñala kumue lomõla wukãi okuti hupikako.”+ 31 Omo liaco, a vamanji etu hatumãlako vupika, puãi tumãla vukãi una okuti, hupikako.

5 Kristu wa tu yovola omo lielianjo liaco. Omo liaco, talami ngõ+ kuenda ene muẽle ko ka li kapi vali vokanga yupika.+

2 Ame ndi Paulu ndu sapuili okuti, nda wa seviwi evamba, eci Kristu a siata oku vu lingili ka cu kuatisi.+ 3 Njimba vali uvangi kulume wosi o seviwa evamba okuti, eye o sukila oku amamako oku pokola Kocihandeleko cosi.+ 4 Ene vu seteka oku tendiwa ndavakuesunga omo liocihandeleko,+ wa tepiwi ku Kristu; wa konyõhi kohenda yaye ya piãla. 5 Etu puãi omo liespiritu, tu talamẽla lesanju elavoka liesunga li tunda kekolelo. 6 Momo vu Kristu Yesu, ci kaile evamba ale uyamba, ka vi kuete esilivilo,+ te ekolelo li talavaya locisola.

7 Ene wa kaili oku enda ciwa vonjila yocili.*+ Helie wo tateki oku amamako oku pokola kocili? 8 Etateko liaco, ka lia tundile ku Una wo kovongi. 9 Etumbisa litito li tumbisa osema yosi ya tamiwa.+ 10 Nda kolela okuti, ene vu kasi vomunga kumue la Ñala,+ ka vu simi ovina via litepa; pole, una o vu sakalaisi+ nda helie, nda helie, o ka tambula esombiso a sesamẽla. 11 A vamanji, nda ame handi ndi kunda evamba, momo lie ndi lambalaliwila? Nda oco, ewe li koka ocilondokua liuti wekangiso*+ lia nyõliwa. 12 Ndi yongola okuti vana va seteka oku vu sakalaisi, va li vete ovo muẽle.*

13 Ene a vamanji wa kovongiwili elianjo; ko ka tendi elianjo liaco ndepuluvi lioku tẽlisa olonjongole vietimba,+ pole, li vumbi pokati locisola.+ 14 Momo Ocihandeleko cosi ci tẽlisiwa* omo liondaka yimosi yokuti: “Sola u o lisungue love ndeci o lisole ove muẽle.”+ 15 Nda pokati kene vu lihoyisa loku li undumũhila,+ lunguki sanga vu li nyõla pokati.+

16 Pole, ndu sapuili siti: Amamiko oku endaenda lespiritu+ kuenje ka vu ka tẽlisa onjongole layimue yetimba.+ 17 Etimba li yaka lespiritu omo liolonjongole vialio kuenda espiritu li yaka letimba; ovio vi li katukila pokati, oco ka vu ka lingi ovina viosi vu yongola oku linga.+ 18 Handi vali, nda ene vu kasi oku songuiwa lespiritu, ka vu kasi vemẽhi liocihandeleko.

19 Ovilinga vietimba vina vi molẽha vievi: evĩho liukahonga,*+ eliño, umbondo,*+ 20 efendelo lioviteka, umbanda,+ esuvu, ema, ocipululu, onyeño yalua, oku lihoya, olonepele, oku kuama alongiso omanu, 21 onya, uholua,+ ayele,* lovina via lisoka lavio.+ Ndi kasi oku vu lunguli kovina evi ndeci ndo lunguili ale okuti, vana va lingainga ovina viaco, ka va ka piñala Usoma wa Suku.+

22 Puãi epako liespiritu lieli: ocisola, esanju, ombembua, epandi, ohenda, uwa,+ ekolelo, 23 umbombe kuenda oku likandangiya.+ Ka kuli ocihandeleko ci patãla ovina evi. 24 Pole, vana va tiamẽla ku Kristu Yesu, va valela kuti etimba kumue lolonjongole kuenda oloñeyi vialio.+

25 Nda tu songuiwa lespiritu, tu endaendivo lespiritu.+ 26 Ka tu ka kali vakuakulipanda,+ ka tu ka vetiyi ocituwa coku li sokisa omunu lukuavo+ kuenda ka tu ka li kuateli onya omunu lukuavo.

6 A vamanji, nda umue wa linga ekandu limue okuti eye ka ci limbukile, ene Wakristão wa loñolohi* pengululi omunu waco lumbombe.+ Pole, amamiko oku lavulula sanga ene muẽle+ vu yonjiwavo.+ 2 Li ambatisiko ovilemo viene+ kuenje lonjila eyi vu tẽlisa ocihandeleko ca Kristu.+ 3 Momo nda umue o sima okuti wa velapo, osimbu ka velelepo,+ o likemba eye muẽle. 4 Pole, omunu lomunu a kũlĩhĩse ovilinga viaye muẽle+ kuenje o ka kuata esunga lioku sanjukila upange waye kuenda hamomoko lioku li sokisa lomunu ukuavo.+ 5 Momo omunu lomunu o kambata ocitele*+ caye muẽle.

6 Handi vali, wosi o longisiwa ondaka ya Suku, a litepele ovina viosi viwa la una u longisa.+

7 Ko ka kembiwi: Suku ka tombiwa. Momo eci omunu a kũla, haico a kongula;+ 8 momo una o kũla loku sokolola koloñeyi vietimba, o kongula enyõleho ketimba liaye, pole, una o kũla loku sokolola kovina viespiritu o kongula omuenyo ko pui u tunda kespiritu.+ 9 Pole, ka tu ka liwekipo oku linga eci ciwa, momo tu kongula votembo ya sokiyiwa nda ka tua konyõhele.*+ 10 Kuenje osimbu tu kuete epuluvi* tu lingi eci ciwa komanu vosi, ca piãla enene ku vamanjetu vekolelo.

11 Tali ololetala vinene ndo soneheli leka liange muẽle.

12 Vosi vana va yongola oku komõhisa vakuavo leposo lio ketimba,* ovo vana va seteka oku vu kisiki oku seviwa evamba kuenda va ci lingila lika oco va yuvule oku lambalaliwa omo liuti wekangiso* wa Kristu. 13 Momo ndaño vana va seviwa evamba, ka va pokola Kocihandeleko,+ pole, va yongola okuti ene vu seviwa evamba oco ovo va kuate esunga lioku lipandela etimba liene. 14 Pole, ame lalimue eteke si ka lipande, te lika oku lipandela uti wekangiso* wa Ñala yetu Yesu Kristu+ una okuti, pocakati caye kokuange oluali lua fa* kuenda ame koluali, nda fa. 15 Momo evamba kuenda uyamba+ ka vi kuete esilivilo, te lika ocina cokaliye Suku a lulika.+ 16 Vosi va kapako onumbi eyi komuenyo wavo, kokuavo ku kale ombembua kuenda ohenda, momo va panga onepa ku Isareli ya Suku.+

17 Oku upisa cilo, lomue ka ka ndi kokele ovitangi, momo olondimbukiso ñuete, vi lekisa okuti ndupika wa Yesu.+

18 A vamanji, ohenda ya piãla ya Ñala yetu Yesu Kristu, yi kale lespiritu vu lekisa. Amene.