UKANDA WAVALI KU VA KORINDO

1 Ame Paulu upostolo wa Kristu Yesu, pocakati cocipango ca Suku kuenda Timoteo+ manjetu, ñasi oku sonehela ukanda owu ekongelo lia Suku li kasi ko Korindo oku kongelamo olosandu viosi vi kasi ko Akaya yosi okuti:+

2 Ohenda ya piãla lombembua vi tunda ku Suku Isietu kuenda ku Ñala Yesu Kristu, vi kale lene.

3 Suku a sivayiwe haeye Isia ya Ñala yetu Yesu Kristu,+ Isia yohenda+ kuenda Suku yelembeleko liosi,+ 4 una o tu lembeleka* kohali* yetu yosi+ okuti, tu tẽla oku lembeleka vakuetu+ kohali* yosi lelembeleko tu tambula ku Suku.+ 5 Momo ndeci ohali tu tala omo lia Kristu yalua,+ elembeleko tu tambula pocakati ca Kristu lialuavo. 6 Cilo nda tu tala ohali,* tu yi talela oco okuti vu lembelekiwa kuenda vu popeliwa; nda tu kasi oku lembelekiwa, elembeleko liaco li tiamẽla kokuene okuti, vu kuatisiwa oku pandikisa kohali yimuamue yina etu tua talavo. 7 Elavoko tu vu kueteli lia kolapo, omo tua kũlĩha okuti, ndeci vu kasivo oku tala ohali ndetu, haico vu ka lembelekiwila kumue letu.+

8 A vamanji, ka tu yongola okuti vu kala vonumbi yohali tua tala osimbu tua kala voluvumba luo Asia.+ Tua tala ohali yalua okuti, ka tua tẽlele oku yula longusu yetu muẽle kuenje tua kala lohele yalua ndaño muẽle lovimuenyo vietu.+ 9 Ocili, tua simĩle okuti tu fa. Pole, ocitangi caco ca tu longisa okuti ka tu likolela etu muẽle, puãi tu kolela Suku+ una o pindula vana va fa. 10 Eye wa tu yovola kohele yalua yolofa kuenda o ka tu yovola vali kuenje elavoko lietu li kasi kokuaye okuti, eye o kamamako oku tu yovola.+ 11 Ene vu pondolavo oku tu kuatisa lolohutililo viene+ oco valua va ece olopandu mekonda lietu pocakati cohenda tua tambula omo liatambululo olohutililo viomanu valua.*+

12 Momo tu kuete esunga lioku lipanda okuti, voluali ca piãla enene pokati kene tua lekisa okuti tua lipua loku sunguluka ku tunda ku Suku okuti, halolondungeko violuali lulo,+ te lohenda ya piãla ya Suku. Owanji wutima wetu u tu imbilavo uvangi. 13 Momo lacimue tu kasi loku vu soneheli, te eci vu pondola oku tanga* loku kuata elomboloko kuenda ndi lavoka okuti, vu amamako oku kuata elomboloko lia suapo liovina viaco,* 14 ndeci ene wa kuativo elomboloko okuti, ene vu tẽla oku lipanda mekonda lietu, letuvo tu ka lipanda mekonda liene keteke lia Ñala yetu Yesu.

15 Omo liaco, lekolelo eli, nda yonguile oku iya tete kokuene oco okuti, ene vu kuata esunga liavali lioku sanjuka;* 16 momo nda yonguile oku vu nyuli poku enda ko Makedonia kuenda eci nunda ko Makedonia ndi tiuka vali kokuene oco vu ndi sindikili naito eci ngenda ko Yudea.+ 17 Eci nda kuata ocisimĩlo caco, nda ci tenda hẽ leselula? Ale nda sokiya oku tẽlisa olonjongole vietimba, oco ndi popie siti “Oco, oco,” noke “Hacoko, hacoko”? 18 Pole, Suku wa kolelua kuenje ondaka tuo sapuili ka ya lingile okuti “oco” pole, noke “hacoko.” 19 Momo Omõla a Suku, Yesu Kristu, una ame la Siluano kuenda Timoteo+ tua kunda pokati kene, haeyeko “oco” kefetikilo kuenda noke “hacoko,” pole, olonjanja viosi eye “oco.” 20 Momo olohuminyo via Suku ndaño vialua, vi linga “oco” vokuaye.+ Omo liaco, pocakati caye tu popiavo “Amene” ku Suku+ kuenje eci ci muisa ulamba kokuaye pocakati cetu. 21 Pole, Suku eye wa tu ĩha ohuminyo kumue lene yokuti, tu tiamẽla ku Kristu, haeye wa tu waveka.+ 22 Eye wa tu kapavo ondimbukiso yaye+ kuenda wa kapa espiritu+ vovitima vietu nduvangi weci ci laika oku iya.*

23 Cilo Suku ombangi yange okuti, sia endele handi ko Korindo oco ndi yuvule oku vu kokeli esumuo lialua. 24 Ka ci lomboloka okuti, tu vacime cekolelo liene,+ puãi tu talavayela kumue lene oco vu kuati esanju, momo ene vu tãi omo liekolelo liene.

2 Omo liaco, nda sokiya vutima wange okuti, siya vali kokuene oku vu sumuisi. 2 Momo nda ndo sumuisi, helie vali o ndi sanjuisa nda hayunako nda sumuisa? 3 Kuenje nda soneha eci nda linga oco okuti, eci njiya si sumuisiwa mekonda liene, momo nda kolela okuti eci ci ndi sanjuisa, ci vu sanjuisivo vosi yene. 4 Ndo soneheli lohali yalua, levalo vutima kuenda lasuẽlẽla alua, sia ci lingilile oku vu sumuisi,+ pole, nda ci lingila oco vu limbuki ocisola calua ndu vu kueteli.

5 Nda umue wa koka esumuo,+ ka sumuisile lika ame, pole, vosi yene, puãi si yongola oku vangula calua catiamẽla kondaka eyi. 6 Epindiso eli lia eciwa lomanu valua, li tẽla komunu waco; 7 pole, cilo, te wo weceli locisola loku u lembeleka,+ oco eye ka ka yuliwe lesumuo lialua.+ 8 Kuenje ndu pingi okuti, vu kuatisa omunu waco oku limbuka ocisola ene vu u kueteli.+ 9 Eli olio esunga lieci ndo sonehelivo: oco ndi limbuke nda ene vu lekisa epokolo liene kovina viosi. 10 Nda ene vu ecela omunu umue omo liocina cimue, lamevo ndu wecela. Pole, eci nda ecela (nda nda ecela ocina cimue) nda cecela oku vu kuatisi kovaso a Kristu, 11 oco okuti ka tu yuliwa* la Satana,+ momo ka tu kasi vonumbi yatutu* aye.+

12 Eci nda pitĩla ko Torasi+ oku kunda olondaka viwa viatiamẽla ku Kristu kuenda kua njulukila epuluvi kupange wa Ñala, 13 sia yevele ekavuluko, momo sia sangele manjange Tito.+ Kuenje nda liusika lavo, noke nda enda ko Makedonia.+

14 Pole, tu eca olopandu ku Suku una o tu songuila ndasualali va yula va kasi oku tiuka kuyaki kumue la Kristu kuenda pocakati cetu o sanduila* elemba liwa liukũlĩhĩso waye kolonepa viosi! 15 Ku Suku, etu tulemba liwa osimbu tu sapula ovina viatiamẽla ku Kristu pokati ka vana va kasi oku popeliwa kuenda kuava va kasi oku nyõleha; 16 kuava va kasi oku nyõleha, elemba lioku fa li tuala koku fa,+ kuava va kasi oku popeliwa elemba liomuenyo li tuala komuenyo. Helie wa loñoloha kovina viaco? 17 Etu tua loñoloha, momo ka tulondandisiko* viondaka ya Suku+ ndeci omanu valua va linga, pole, tu popia ocili cosi ndolonumiwa via Suku, ocili, kovaso a Suku kumue la Kristu.

3 Anga hẽ tu sukila vali oku li situlula nda etu velie? Anga hẽ tu sukila oku eca kokuene ovikanda viuvangi ndeci vamue va lingainga? Ale ene vu sukila oku eca kokuetu ovikanda viaco? 2 Ene vuvikanda vietu+ viuvangi via sonehiwa vovitima vietu, haivio via kũlĩhĩwa kuenda vi tangiwa lomanu vosi. 3 Momo wa lekisi okuti, ene vukanda wa tunda ku Kristu wa sonehiwa letu tulondingupange okuti,+ ka wa sonehiwile lotinda, pole, lespiritu lia Suku o kasi lomuenyo kuenda ka wa sonehiwile vavaya ovawe,+ puãi vavaya ositu okuti, vovitima.+

4 Etu tu kuete ekolelo liaco ku Suku pocakati ca Kristu. 5 Ka ci lomboloka okuti, tua loñoloha mekonda lietu muẽle oco tu sime okuti ovina viosi vi tunda kokuetu, pole, oku loñoloha kuetu ku tunda ku Suku,+ 6 una wa tu ĩha uloño woku kala olondingupange viocisila cokaliye okuti,+ ka ca lingiwile locihandeleko,+ pole, lespiritu; momo ocihandeleko ci pisila omunu koku fa,+ pole, espiritu li eca omuenyo komunu.+

7 Nda Ocihandeleko cina ci koka oku fa haico ca sonehiwa vovawe+ ceya lulamba waco wokuti, omãla va Isareli ka va ponduile oku vanja kocipala ca Mose omo liulamba wocipala caye okuti,+ ulamba una wa laikele oku imũha, 8 momo lie upange wespiritu+ ka u kuetele ulamba wa piãla?+ 9 Momo nda Ocihandeleko cina ci pisila omanu koku fa+ ci kuete ulamba,+ upange u tuala kesunga u kuete vali ulamba wa piãla!+ 10 Omo liaco, ndaño ceci ca kala lulamba kosimbu ka ci kuete vali ulamba, momo kuli ulamba ukuavo wa piãla.+ 11 Momo nda eci ca laikele oku imũha ceya lulamba,+ eci ci tumãla ci piãla vali enene kulamba!+

12 Omo okuti tu kuete elavoko liaco,+ tu kasi oku talavaya lelianjo lialua lioku vangula, 13 kuenda ka tu lingi eci Mose a linga poku sitika ocipala caye loveu yimue+ oco omãla va Isareli ka va ka mole esulilo lieci ca laikele oku imũha. 14 Pole, ovitima viavo via tĩlisua.+ Momo toke etaili lilo eci ku tangiwa ocisila cosimbu, oveu yimuamue yamamako okuti, ka yupiwako+ momo oyo yupiwako lika pocakati ca Kristu.+ 15 Toke etaili eci ku tangiwa alivulu a Mose,+ oveu yimue yi sitika ovitima viavo.+ 16 Pole, nda omunu umue o kuama onjila ya Yehova,* oveu yupiwako.+ 17 Yehova* Espiritu+ kuenda apa pali espiritu lia Yehova* pali elianjo.+ 18 Vosi yetu, osimbu ka tu kuete oveu kovipala vietu tu molẽhisa ndolumuĩlo ulamba wa Yehova*, tu pongoluiwa vesetahãlo limuamue oku upisa kulamba umue toke kulamba ukuavo, ndeci Yehova* a linga una okuti, Espiritu.*+

4 Omo okuti tu kuete upange owu omo liohenda ya lekisiwa kokuetu, ka tu liwekapo. 2 Pole, tu likala ovina vi kutisa osõi vi lingiwa vuyombeki kuenda ka tu endela vatutu ãvi, ndaño oku pengisa ondaka ya Suku;+ puãi poku situlula ocili, tua linga vakuangangu yiwa kowanji wosi wutima womanu kovaso a Suku.+ 3 Nda olondaka viwa tu kasi oku kunda via sitikiwa loveu, via sitikiwila vana va kasi oku nyõleha, 4 vana okuti, osuku yoluali lulo*+ ya tekãvisa ovisimĩlo via vana ka va tavele+ oco ocinyi culamba wolondaka viwa viatiamẽla ku Kristu haeye esetahãlo lia Suku+ ka ci ka va tuile.+ 5 Momo ka tu kasi oku kunda catiamẽla kokuetu muẽle, pole, tu kasi oku kunda catiamẽla ku Yesu Kristu nda Ñala, leci catiamẽla kokuetu ndapika vene omo lia Yesu. 6 Momo Suku eye wa popia hati: “Ocinyi ci tuile vowelema”+ kuenda Suku wa siata oku tuisa ocinyi caye vovitima vietu okuti,+ ocinyi ceca ukũlĩhĩso u komõhisa wa Suku, pocakati cocipala ca Kristu.

7 Tu kuete ukuasi owu+ volombia viotuma* oco okuti,+ unene wa piãla u tunda ku Suku, kokuetu hakoko.+ 8 Tua ñualiwa lovitangi viñi viñi kolonele viosi, pole, ka tua sipatiwile okuti ka tu lisengi; tu sakalaisua, pole, ka tu tokoka;*+ 9 tu lambalaliwa, pole, ka tu yandulukiwa;+ tu kupuiwa posi, pole, ka tu nyõliwa.+ 10 Kuosi tu enda, tu kala kohele yoku fa ndeci ca pita la Yesu+ oco okuti, omuenyo wa Yesu u situluiwavo vatimba etu. 11 Momo etu tu kasi lomuenyo, olonjanja viosi tu kasi kohele yoku fa+ omo lia Yesu oco okuti, omuenyo wa Yesu u situluiwavo vatimba etu. 12 Kuenje oku fa ku kasi oku talavaya vokuetu, pole, omuenyo vokuene.

13 Omo okuti tu kuete ekolelo limuamue ndeli lia sonehiwa liti: “Nda kolela, omo liaco, nda popia”;+ etu tua kolelavo, omo liaco, tua popia, 14 momo tua kũlĩha okuti, Una wa pindula Yesu o ka tu pinduilavo kumuamue la Yesu, loku tu nena kovaso yaye kumue lene.+ 15 Ovina viosi evi vio lingiwili ene oco okuti, ohenda ya piãla yamamako oku livokiya calua, momo valua va kasi oku eca olopandu kulamba wa Suku.+

16 Omo liaco, ka tu liwekapo, pole, ndaño etimba lietu li kasi oku nyõleha, haimo lumue utima wetu u kasi oku tumbuluiwa eteke leteke. 17 Momo ndaño ohali* tu kasi oku tala yotembo yimue yitito kuenda ka ya tĩlile, ohali yaco yi tu kokela oku tambula ulamba wa piãla calua* haiwo wotembo ka yi pui;+ 18 osimbu tu amamako oku luluvalela okuti hakovinako vi muiwa, pole, kovina ka vi muiwa.+ Momo ovina vi muiwa ka vi kala otembo yosi, pole, ovina ka vi muiwa vi kala otembo ka yi pui.

5 Momo tua kũlĩha okuti onjo yetu kilu lieve okuti, ombalaka yilo yi laika oku nyõliwa*+ kuenje Suku o ka eca kokuetu onjo yimue yi ka kala otembo ka yi pui kovailu yina okuti, ka ya pangiwile lovaka.+ 2 Momo vonjo* yilo tu leña leña, lonjongole yalua yoku tambula onjo yi tunda* kilu* okuti yi ka tu sikĩlĩla nduwalo,+ 3 oco okuti eci yi tu sikĩlĩla nduwalo, ka tu sangiwa epõlõla. 4 Kuenje etu tu kasi vombalaka yilo, tu leña leña omo tua lemẽlelua, momo ka tu yongola oku lula ombalaka yaco nduwalo, pole, tu yongola oku tambula onjo kilu okuti,+ omuenyo u piñainya eci ci fa.+ 5 Momo Suku eye wa tu pongiyila omuenyo waco,+ una wa tu ĩha espiritu sandu. Poku ci linga wa likuminya oku tu ĩha asumũlũho a laikele oku iya.*+

6 Omo liaco, otembo yosi tueyuka lutõi kuenda tua kũlĩha okuti, osimbu tu kuete onjo yetu vetimba, tu kasi ocipãla la Ñala,+ 7 momo tu kasi oku endela vekolelo, haloku luluvalako kovina vi letiwe. 8 Pole, etu tueyuka lutõi kuenda tu yongola oku kala ocipãla letimba okuti, tu tungila onjo yetu kumue la Ñala.+ 9 Omo liaco, ci kaile okuti tu tungila onjo kumue laye, ale tu kala ocipãla laye, tu amamiko oku likolisilako oco tu taviwe laye. 10 Momo vosi tu laika oku molẽha* kovaso yomangu yekanga ya Kristu oco okuti, omunu lomunu o tambula onima ndomo ci likuata lovilinga viaye osimbu a kala vetimba, ci kaile eci ciwa, ale ceci cĩvi.+

11 Omo liaco, omo okuti tua kũlĩha oku sumbila Ñala, tu amamako oku vetiya omanu oku tava, pole, etu tua kũlĩhĩwa ciwa* la Suku. Puãi ndi lavokavo okuti, tu kũlĩhĩwa ciwa* lowanji wutima wene. 12 Ka tu kasi oku lipandela vali kokuene, pole, tu kasi oku eca kokuene evetiyo lioku lipanda mekonda lietu oco okuti, vu tẽla oku tambulula vana va lipandela eci ci molẽha lovaso,+ pole, ka va lipandela eci ci kasi vutima. 13 Momo nda tua linga ayui,+ tua ci lingila Suku; nda tua linga vakualondunge, tu ci lingila ene. 14 Momo ocisola ca Kristu ci tu vetiya, omo eci oco tua sima okuti, omunu umosi o fila omanu vosi,+ momo vosi va file ale. 15 Kuenje eye wa fila vosi oco okuti, vana va kasi lomuenyo ka va li sanjuisa ovo muẽle,+ te oku sanjuisa una wa va fila kuenje wa pinduiwa.

16 Omo liaco, oku upisa cilo, ka tu tendi omunu ndomo ci likuata leci tu lete.+ Ndaño okuti vamue pokati ketu kosimbu tua tendele Kristu ndomo ci likuata leci tua mola, cilo ka tu tẽla vali oku ci linga.+ 17 Kuenje nda umue o kasi vomunga kumue la Kristu, eye ociluvo cokaliye;+ ovina viosimbu via pita; tali! ovina viokaliye via lulikiwa. 18 Pole, ovina viosi vi tunda ku Suku, una wa linalisa letu pocakati ca Kristu+ kuenda wa tu ĩha upange woku linalisa,+ 19 ci lomboloka okuti, Suku pocakati ca Kristu wa inalisa oluali kokuaye muẽle,+ pole, ka kapeleko akulueya avo+ kuenje eye wa tu kundika esapulo lioku linalisa.+

20 Omo liaco, tulomunga via Suku+ via piñainya Kristu,+ ndu okuti Suku wa linga epingilo limue pocakati cetu. Omo okuti tua piñainya Kristu, tu pinga tuti: “Linalisi la Suku.” 21 Omunu una okuti ka kũlĩhĩle ekandu,+ Suku wo lingisa ekandu* mekonda lietu oco okuti, pocakati caye tu linga vakuesunga kovaso a Suku.+

6 Ndolondingupange kumosi la Suku,+ tu vu lunguli okuti, ko ka tavi ohenda ya piãla ya Suku elivova.+ 2 Momo eye wa popia hati: “Kotembo yimue ya sunguluka nda ku yeva kuenda keteke liepopelo, nda ku kuatisa.”+ Tali! Yilo oyo otembo ya sunguluka. Tali! Lilo olio eteke lieyovo.

3 Ka tu lingi cimue ci koka ocilondokua, sanga upange wetu u sepuiwa;+ 4 pole, kovina viosi tu limbila etu muẽle uvangi wokuti tulondingupange via Suku,+ omo lioku pandikisa calua, kohali, kotembo yesukila, kovitangi,+ 5 koku tipuiwa, volokayike,+ konjuela, kupange walua, loku pumba otulo kovoteke, kotembo yonjala;+ 6 koku pua etondelo, kukũlĩhĩso, koku pandikisa,+ kohenda,+ kespiritu sandu, kocisola okuti hacombambeko,+ 7 koku vangula ocili, kunene wa Suku;+ pocakati covimalẽho viesunga+ peka liondio* kuenda liepĩli,* 8 pocakati coku kemanyiwa kuenda koku lavisiwa, pocakati culandu ũvi kuenda ulandu uwa. Etu ndaño tu tendiwa ndolohembi, haimo lumue tuakuacili, 9 ndava ka va kũlĩhĩwile, haimo lumue tua kũlĩhĩwa, ndava va fa,* haimo lumue tu kasi lomuenyo,+ ndava va kangisiwa,* haimo lumue ka tu pondiwa,+ 10 ndava va sumua, pole, olonjanja viosi tua sanjuka, ndolohukũi, pole, tua kuatisa valua oku linga olohuasi, ndava ka va kuete cimue, haimo tu kuete ovina viosi.+

11 Tua yulula omẽla* wetu oco tu vangule lene a va Korindo kuenda tua yikula apito ovitima vietu. 12 Etu ka tu kasi oku likala* ocisola cetu kokuene,+ pole, ene vu kasi oku likala ocisola cene kokuetu. 13 Omo liaco, poku tambulula ndi vangula lene ndomãla vange okuti, sanjavalisi apito ovitima viene.*+

14 Ko ka likutili kokanga* ka ya lisokele lava ka va tavele.+ Esunga li kuete ukamba we leci hacesungako?*+ Ale, ocinyi ci kuete ukamba we lowelema?+ 15 Kristu o pondola oku kuata ndati ukamba la Beliale?*+ Ale, nye una wa tava* a kuete okuti o litepela la una ka tavele?+ 16 Ocisila cipi onembele ya Suku yi kuete loviteka?+ Momo etu tunembele ya Suku o kasi lomuenyo;+ ndeci Suku a popia hati: “Ndi ka tunga pokati kavo+ loku endaila pokati kavo kuenda ndi ka linga Suku yavo kuenje ovo va ka linga omanu vange.”+ 17 “‘Omo liaco, tundi pokati kavo, litepi lavo,’ oco Yehova* a popia ‘kuenda liwekipo oku lamba kocina ca vĩha’”;+ “‘kuenje ndi ko tambuli.’”+ 18 “‘Ndinga isiene+ kuenje vu ka linga omãla vange valume, lomãla vange vakãi,’+ oco Yehova* a popia Ukuonene Wosi.”

7 A vamanji wa soliwi, omo tu kuete olohuminyo evi,+ tu liyelisi kevĩho liosi lio ketimba kuenda vutima* oco okuti,+ tu kola vali enene koku sumbila Suku.

2 Tu yikuili ovitima viene.+ Ka tua lingile umue cĩvi, ka tua lemẽhele laumue, ka tua pundile laumue.+ 3 Si ci popela oku vu pisi. Momo nda popele ale okuti, ene vu kasi vovitima vietu kuenje tu fila kumosi kuenda tu kala kumosi komuenyo. 4 Ñuete elianjo lialua lioku vangula lene. Ndi lipanda calua mekonda liene. Nda lembelekiwa calua; kohali yetu yosi, esanju liange li supoka calua.+

5 Eci tua pitĩla ko Makedonia,+ atimba* etu ka a tẽlele oku puyuka, pole, tuamamako oku talisiwa ohali kolonepa viosi, kosamua kua kala uyaki, vokati ohele. 6 Pole, Suku una o lembeleka vana va sumua,+ wa tu lembeleka loku iya kua Tito; 7 halokuiya kuayeko lika, pole, lelembeleko eye a tambulavo mekonda liene, osimbu eye a tu lomboluila ndomo ene vu ñueteli ongeva, loku sumua kuene kuenda ndomo wa sakalali* lame; kuenje esanju liange lia livokiya calua.

8 Momo ndaño ndo sumuisi lukanda wange,+ haimo lumue si liveli. Ndaño okuti, tete nda ci livela (poku limbuka okuti ukanda waco wo sumuisi, ndaño vokatembo kamue), 9 cilo nda sanjuka, hamomoko wa sumuisiwi, pole, momo esumuo liene lio tuali koku likekembela. Momo esumuo liaco li sanjuisa Suku oco okuti, ka vu talisiwa ohali mekonda lietu. 10 Momo esumuo lina li sanjuisa Suku li tuala koku likekembela kuna ku tuala koku popeliwa okuti, ka ku koki oku livela;+ pole, esumuo lioluali li tuala koku fa. 11 Limbuki onima ya tunda kesumuo liene ndomo ci li kuata locipango ca Suku okuti: Ene wa liyelisi, wa suvuki eci cĩvi, wa sumbili Suku, wa kuati onjongle yalua yoku likekembela, wa lekisi ombili, wa pengululi eci cĩvi ca lingiwa.+ Kovina viosi wa li lekisi okuti, wa yeli.* 12 Ndaño ndo soneheli, sia ci lingilile omo liomunu wa linga cĩvi,+ ale pamue omunu wa lingiwa cĩvi, pole, nda ci lingila oco ombili vu tu kueteli yi limbukiwe pokati kene kovaso a Suku. 13 Eli olio esunga lieci tua lembelekiwila.

Pole, oku vokiya kelembeleko lietu, tua yolela calua omo liesanju lia Tito, momo vosi yene wa kavuluisi utima* waye. 14 Momo nda ndi lipandela kokuaye omo liene, sia kutisiwile osõi; pole, ndeci ovina viosi tuo sapuili viocili, oku lipandela kuetu ku Tito lakuovo kuocili. 15 Handi vali, ocisola a ku kueteli, ci livokiya osimbu eye ivaluka epokolo liene vosi,+ ndomo wo tambuli lusumba kuenda loku luluma. 16 Nda sanjuka omo okuti, kovina viosi ndi pondola oku kolela* kokuene.

8 A vamanji, cilo tu yongola okuti vu kũlĩhi eci catiamẽla kohenda ya piãla ya Suku ya eciwa kakongelo o ko Makedonia.+ 2 Ovo va tala ohali vemẽhi lioseteko yinene. Ndaño luhukũi wavo walua, ovo va vetiyiwa lesanju lialua kuenda va lekisa okuti, va kala olohuasi omo liohenda yavo yalua. 3 Momo ovo va eca cosi ca kala vepondolo liavo,+ va eca vali enene okuti, ca pitahãla epondolo liavo. Ame ndi ci imbila uvangi,+ 4 va tu li pilikila calua oco va kuatevo esumũlũho lioku eca olombanjaile kuenda oku kuata onepa kupange woku kuatisa olosandu.+ 5 Kuenje eci va linga ka tua ci lavokaile, pole, ovo tete va lieca olumue ku Ñala kuenda kokuetu omo liocipango ca Suku. 6 Kuenje eci ca tu ecelela oku vetiya Tito+ oco a malusule oku tambula olombanjaile viene viohenda, momo eye wa kalavo umue wa fetikile upange waco pokati kene. 7 Omo liaco, ndeci vu supoka kovina viosi okuti, kekolelo, kondaka, kukũlĩhĩso, kombili yosi kuenda kocisola tu vu kueteli, cimuamue haico, supokivo koku eca olombanjaile evi viocisola.+

8 Si kasi oku ci popia ndonumbi kokuene, pole, ndi ci popela oco vu kũlĩhi ombili ya vakuene kuenda oku seteka ocisola cene cocili. 9 Momo ene wa kũlĩhi ohenda ya piãla ya Ñala yetu Yesu Kristu okuti, ndaño eye wa kala ohuasi wa linga ohukũi mekonda liene+ oco vu lingi olohuasi ndaño vulohukũi.

10 Kondaka eyi ngeca ocisimĩlo cange:+ Oco coku vu kuatisi momo kunyamo wa pita ka wa fetikili lika oku kongola, pole, wa lekisivo onjongole yoku ci linga. 11 Cilo, tẽlisivo eci wa fetiki oku linga okuti, onjongole yene yoku ci linga yi tẽlisiwa ndomo ci likuata lovina vu kuete. 12 Ombanjaile yeciwa lutima yi taviwa la Suku, momo Suku o lavoka okuti, omunu eca eci a pondola,+ haceciko ka pondola. 13 Momo si yongola okuti ku vakuene ci leluka, pole, kokuene ci tĩla; 14 pole, pocakati coku piñainya, kovisupe vu kuete cilo vu kuatisa vana va kuete esukila oco okuti, kovisupe viavo vo kuatisivo kekambo liene, lonjila eyi ku kala oku piñainya. 15 Ndeci ca sonehiwa citi: “Omunu wongolola calua, ka kuatele eci ca supa kuenda omunu wongolola citito ka kuatele eci co kambela.”+

16 Cilo tu eca olopandu ku Suku, omo a kapa vutima wa Tito+ esakalalo limuamue tu vu kueteli, 17 momo eye wa tava kevetiyo a tambula, pole, lombili yaye yalua, wa lieca olumue oku iya kokuene. 18 Pole, tu kasi oku u tuma kumue la manji umue okuti, oluhimo luaye lu kasi oku lisanduila kakongelo osi omo lioku kunda kuaye olondaka viwa. 19 Hacoko lika, pole, eye wa nõliwavo lakongelo oco a ende kumue letu kovongende loku eca ombanjaile eyi yoku muisa ulamba Ñala kuenda oku lekisa onjongole yetu yoku kuatisa. 20 Tu kasi oku yuvula okuti umue o tu pisa omo liombanjaile ya tu kundikiwa oco tu ece kolosandu.+ 21 Momo tu ‘kasi oku tata ovina viosi okuti halelimbiko, pole, ka tu ci lingi lika kovaso a Yehova,* tu ci lingilavo kovaso yomanu.’+

22 Handi vali, tu kasi oku tuma kumue lavo manjetu una tua seteka kuenda tua limbuka okuti ukuambili kovina vialua, pole, cilo ombili yaye ya livokiya omo a vu koleli calua. 23 Nda vu yongola oku kũlĩha cimue catiamẽla ku Tito, eye ekamba liange kupange kuenda ndeci ame, eye o talavayela oku vu kuatisi; ale nda vu kuete apulilo atiamẽla ku vamanjetu, ovo ovapostolo vakongelo haivo ulamba wa Kristu. 24 Kuenje lekisi uvangi wocisola cene kokuavo+ kuenda lekisi kakongelo esunga lieci tuo lipandeleli.

9 Catiamẽla kupange u kola wolosandu,+ ka ci sukila okuti ame ndi vu soneheli, 2 momo nda kũlĩha ombili yene yina ndi lipandela ku va Makedonia okuti, cilo va Akaya va lipongiya ale ci soka unyamo kuenda ombili yene ya vetiya valua pokati kavo. 3 Pole, ñasi oku tuma vamanji oco okuti, oku lipanda kuetu catiamẽla kokuene ka ku lingi kuesanda, puãi ndi lavoka okuti vu lipongiya muẽle ndeci ndo sapuilili ale. 4 Kuenje nda va Makedonia va endele lame kuenda vo sangi okuti ka wa lipongiyili, ci kaile ene kuenda etu tu kutisiwa osõi, omo liekolelo tu vu kueteli. 5 Omo liaco, nda sima okuti, ca sukilile oku vetiya vamanji oco veye selo kokuene kuenda oku pongiya selo ombanjaile yene wa likuminyi oco okuti, yi pongiyiwa selo ndombanjaile yohenda kuenda ndocina cimue ka ci kisikiwa.

6 Wosi o waya ombuto yitito ungulavo citito, pole, wosi o waya ombuto yalua, ungulavo calua.+ 7 Omunu lomunu a linge ndeci a sokiya vutima waye, halocikukũiko pamue oku kisikiwa,+ momo Suku o sole omunu eca lesanju.+

8 Handi vali, Suku o pondola oku wĩhi ohenda yaye yosi ya piãla oco okuti, olonjanja viosi vu kuata cosi vu tẽli kuenda vu kuata cosi ci sukiliwa kupange wosi uwa.+ 9 (Ndeci ca sonehiwa citi: “Eye avela locali; eye eca eca kolohukũi. Esunga liaye li amamako otembo ka yi pui.”+ 10 Cilo Una eca ombuto komunu o kũla kuenda ombolo yoku lia, o ko wĩhivo ombuto yalua yoku kũla kuenje o ka luisa oku ungula kuesunga liene.) 11 Suku o vu sumũlũisi calua oco okuti, vu ecavo calua kuenda omanu va ka eca olopandu ku Suku omo liombanjaile yene tu ka eca ku vakuene; 12 momo upange vu linga, ka u ka kuatisa lika kasukila olosandu,+ pole, omo liupange waco omanu valua va ka eca olopandu vialua ku Suku. 13 Omo liuvangi weciwa lupange waco, ovo va sivaya Suku omo liepokolo liene kolondaka viwa viatiamẽla ku Kristu, osimbu vu kasi oku vi sapula kowiñi kuenje omo wa lekisi ohenda poku eca ombanjaile yene kokuavo kuenda ku vosi.+ 14 Kuenje loku vu likutililiko, ovo vo kuateli ocisola omo liohenda ya piãla Suku a lekisa kokuene.

15 Olopandu vi eciwe ku Suku omo liombanjaile yaye ya piãla.

10 Cilo, ame ndi Paulu ndu pingi lumbombe kuenda lohenda ya Kristu,+ ame una nda tendiwa lene okuti nda liketisa kovaso yene,+ ndaño ceci si kasipo ñuete utõi lene.+ 2 Ndi lavoka okuti eci ndi pitĩla, vana va sima okuti tu enda ndomo ci likuata letimba va pongoloka oco okuti, si va lemẽla lukãlu. 3 Momo ndaño tu enda ndomo ci likuata letimba, pole, ka tu yaki ndeci tua tuwa ketimba. 4 Momo ovimalẽho viuyaki wetu havietimbako,+ pole, ovio vi kuete unene wa Suku+ woku nyõla ovina via pama ndombonge. 5 Tu kasi oku nyõla ovisimĩlo lovina viosi vĩvi vi tamalãla lukũlĩhĩso wa Suku+ kuenda tu kasi oku pongolola ovisimĩlo* viosi oco vi pokole Kristu; 6 kuenje tua lipongiya oku kangisa omunu wosi o lekisa esino,+ osimbu epokolo liene muẽle li suapo.

7 Ene vu tenda ovina ndomo vi molẽha lovaso. Nda umue wa li kolela eye muẽle okuti wa tiamẽla ku Kristu, a sokolole vali ondaka eyi yokuti: Ndeci eye a tiamẽla ku Kristu, haicovo etu. 8 Momo ndaño okuti, ndi lipanda naito omo liomoko Ñala a tu ĩha yoku vu pamisi, pole, hayoku vu nyõliko,+ si kutisiwa osõi. 9 Momo si yongola oku molẽha ndu okuti ñasi oku vu yokokisi lovikanda viange. 10 Momo ovo va popia vati: “Ovikanda viaye vi kuete unene haivio vi vetiya, pole, oku u mola ketimba, wa hongua kuenda olondaka viaye ka vi kuete esilivilo.” 11 Omunu waco a limbuke okuti, ovina tu popia* vovikanda vietu eci ka tu kasipo, haivio tu linga* eci tu kalapo.+ 12 Ka tu lukuta oku li setahãisa, ale oku li sokisa lomanu vamue va lipandiya ovo muẽle.+ Pole, eci ovo muẽle va li seteka lovo muẽle kuenda ovo muẽle va li sokisa lovo muẽle, va lekisa okuti ka va kuete elomboloko.+

13 Kuenje etu ka tu ka lipanda catiamẽla kupange ka tua lingile, pole, tu ka lipandela lika eci catiamẽla kocikele tua tambula ku Suku* kuenda vovina viaco ene wa kongeliwimovo.+ 14 Ka tua lingile cimue okuti Suku ka tu tumile oku ci linga eci tueya kokuene, pole, etu tua sapula tete kokuene olondaka viwa viatiamẽla ku Kristu.+ 15 Sio, etu ka tu kasi oku lipandela kosamua yolongave vietu via tu ilikiwila okuti, oku lipanda lovopange omunu ukuavo, puãi tu lavoka okuti osimbu ekolelo liene li kasi oku amamako oku livokiya, eci tua linga ci livokiya vokati kocikanjo cetu. Kuenje upange wetu u livokiya vali calua, 16 oco okuti, tu kunda olondaka viwa kolofeka vi kasi ocipãla lene kuenje ka tu lipandela ocikanjo comunu ukuavo muna ovina viosi via lingiwa ale. 17 “Pole, una o lipanda, a lipandele ku Yehova.”*+ 18 Momo una o limbila uvangi eye muẽle ka taviwa,+ te una Yehova* a imbila uvangi.+

11 Ndi yongola okuti, vu pandikisa lame ndaño ndi molẽha ndomunu umue eveke. Ocili, ene vu kasi oku pandikisa lame! 2 Ame ñuete esepa lene, esepa ndeli lia Suku,* momo ndo likuminyi oku weci kolohuela kulume umosi, ndufeko wosombo* eciwa ku Kristu.+ 3 Pole, ñuete ohele yokuti, ndeci onyõha ya yonja Eva latutu ayo,+ ovitima viene vi yapuisiwa kesunguluko kuenda koku liyelisa vu sukila oku lekisa kovaso a Kristu.+ 4 Momo nda kuiya umue o kunda Yesu umue wiñi okuti, una tua kunda haeyeko, ale vu tambula espiritu likuavo okuti, lina wa tambuli halioko, pamue olondaka viwa viñi okuti, vina wa tavi havioko, ene vu tava+ kueci eye a popia. 5 Ame ndi sima okuti ka kuli lacimue ceca uvangi wokuti ame ndi sule kovapostolo vene va kemãla.+ 6 Ndaño sia loñolohele koku vangula,+ pole, kukũlĩhĩso nda loñoloha; momo tua ci lekisa kokuene kolonepa viosi kuenda kovina viosi.

7 Anga nda linga ekandu poku liketisa okuti, ene vu kemalisua omo ndo kundili lesanju olondaka viwa via Suku ocali?+ 8 Kakongelo akuavo nda punda* poku tava oku tambula ekuatiso lio ketimba oco ndu vu kuatisi.+ 9 Ocili, eci nda kala lene kuenje nda sukile, sia lingile ocilemo komunu umue, momo vamanji va tunda ko Makedonia va ñuatisa calua kueci nda sukilile.+ Ocili, volonjila via litepa nda kuata utate oco si ka kale ocilemo cimue kokuene kuenje ndamamako oku ci linga.+ 10 Ndi vangula ocili ndeci Kristu nda a linga kuenje oku lipanda oku, ka ku ka liwekapo+ vovaimbo o Akaya. 11 Momo lie nda siatela oku ci lingila? Anga hẽ momo si vu soli? Suku wa kũlĩha okuti ndi vu soli.

12 Pole, ndamamako leci ñasi oku linga+ oco okuti, vana va yongola uvangi u lekisa okuti ovo va lisoka letu kuenda va lipandela ovina va linga, ka va kuata esunga lalimue. 13 Momo omanu vaco ovapostolo vesanda, olonalavayi vakuelimbi, va li luvikiya ovo muẽle ndovapostolo va Kristu.+ 14 Kuenje ka ci komõhisa, momo Satana o li luvikiya eye muẽle ndungelo wocinyi.+ 15 Ka ci komõhisa nda oloñuatisi viaye vi li luvikiyavo ndoloñuatisi viesunga. Pole, esulilo liavo li ka kala ndomo ci likuata lovilinga viavo.+

16 Mopia vali siti: Lomue ka ka sime okuti ndiveke. Pole, ndaño oco vu sima, nambuli ño ndeveke okuti, lamevo ndi lipanda naito. 17 Eci mopia cilo ceci, hapoku kuamako ongangu ya Ñala, pole ndi popia ndeveke loku kolela koku lipanda kuange. 18 Omo okuti omanu valua va lipandela ovina vietimba, lamevo ndi lipanda. 19 Omo okuti ene “wakualondunge,” vu sanjukila oku pandikisa laveke. 20 Omo liaco, ene vu pandikisa lava vo lingisi apika, lava va nyõla ovikuata viene, lava va punda ovina vu kuete, lava va likemainya kovaso ene kuenda la vana vo veti kocipala.

21 Tu kuete osõi yoku ci popia, momo ci ka molẽha okuti tua hongua enene.

Pole, nda vakuavo va kuete utõi, mopia ndeveke, lamevo ñuete utõi. 22 Ovo hẽ va Heveru? Lamevo ndu Heveru. Ovo hẽ va Isareli? Lamevo.+ Ovo hẽ ocitumbulukila* ca Avirahama? Lamevo.+ 23 Ovo hẽ olondingupange via Kristu? Mopia ndeyui, ame nda velapo vali: Nda talavaya vali calua,+ nda kapiwa vokayike olonjanja vialua,+ koku tipuiwa ka ci tendiwa kuenda olonjanja vialua nda puluka kolofa.+ 24 Olonjanja vitãlo nda tipuiwa la va Yudea+ 39 kolosikote, 25 olonjanja vitatu nda tipuiwa lolombueti,+ onjanja yimosi nda sosũiwa lovawe,+ olonjanja vitatu nda kala vonaviyu ya vomba,+ nda pita uteke umosi lutanya pokati kokalunga; 26 kovongende alua, nda kala kohele volondui, kohele yovingumba, kohele lomanu vange,+ kohele la vakualofeka,+ kohele volupale,+ kohele vekalasoko, kohele vokalunga kuenda kohele pokati ka vamanji vesanda, 27 nda talavaya calua lekavo, olonjanja vialua kovoteke sia pekalaile,+ nda kala lonjala, lenyona,+ olonjanja vialua lekambo liokulia,+ lombambi kuenda lekambo liuwalo.*

28 Hakovina eviko lika, pole, nda sakalalavo eteke leteke* omo liakongelo osi.+ 29 Helie wa hongua okuti, ame sia honguele? Helie o li londoka okuti, ame si ci temẽla?

30 Nda ndi sukila oku lipanda, ndi lipandela ovina vi situlula oku hongua kuange. 31 Suku Isia ya Ñala Yesu, Una o sesamẽla oku sivayiwa otembo ka yi pui, wa kũlĩha okuti si kasi oku kemba. 32 Ko Damasko, nguluvulu una o kasi vemẽhi lia Soma Aretasi, wa kapa olondavululi volupale lua va Damasko oco va ñuate, 33 pole, nda lowisiwa lekualu* ponjanela vocimbaka colupale+ kuenje nda puluka povaka aye.

12 Ndi sukila oku lipanda. Ocili, eci ka ci kuatisa. Pole, ka ci kuete cimue, kaliye, ndi ka lombolola eci catiamẽla kovinjonde+ kuenda kasapulo a tunda ku Ñala.+ 2 Nda kũlĩha ulume umue wa kala vomunga kumue la Kristu okuti, tunde eci ambatiwa kilu liatatu, pa pita ale 14 kanyamo nda letimba nda haletimbako si cĩ, Suku eye wa ci kũlĩha. 3 Ocili, nda kũlĩha ulume waco, nda letimba nda haletimbako si cĩ; Suku eye wa ci kũlĩha, 4 wambatiwa kocumbo celau kuenda eye wa yeva olondaka ka vi popaiwa haivio ka vi eceliwa komunu oku vi popia. 5 Ndi ka lipandela ulume waco, pole, ame muẽle si lipandi, te oku lipandela oku hongua kuange. 6 Momo ndaño nda yonguile oku lipanda, nda sia lingile eveke, momo nda nda popia ocili. Pole, ndi yuvula oku ci linga, sanga umue o kolela vali kokuange okuti eci eye a muila kokuange, ale ceci a njevela ci sule, 7 omo liasituluilo a komõhisa ndi tambola.

Oco si ka li kemainye calua, kua nyĩhiwa osongo ketimba+ okuti, ungelo umue wa Satana, oco amameko oku mbeta olukusi* okuti, si li kemainya calua. 8 Kuenje nda livondela ku Ñala olonjanja vitatu okuti, osongo yaco ketimba yi nunda. 9 Puãi eye wa ndi sapuila hati: “Ohenda yange ya piãla yi tẽla kokuove, momo unene wange u kasi oku suisuapo kokuove voku hongua.”+ Kuenje ndi sanjukila calua oku lipandela oku hongua kuange okuti, unene wa Kristu wamamako oku kala lame ndombalaka. 10 Omo liaco, nda sanjukila oku hongua, oku sepuiwa, usuke, oku lambalaliwa kuenda ovitangi omo lia Kristu. Momo eci ndi hongua, oco ñuata vali ongusu.+

11 Nda linga eveke. Wa ndi kisiki oku linga eveke, momo ka wa tukuili ovina viwa nda linga. Momo sia li lekisile okuti ndi sule kovapostolo vene va kemãla, ndaño si silivila kovaso ene.+ 12 Ocili okuti, nda lekisa kokuene olondimbukiso viupange wange wupostolo lepandi lialua,+ poku linga ovikomo, ovilimbu kuenda ovina vi komõhisa.+ 13 Kuli lika esunga limosi lieci ene wa lingili ndava va sule pokati kakongelo akuavo, esunga liaco lieli okuti ame muẽle sia lingile ocilemo kokuene.+ Ngeceli lohenda okulueya oku.

14 Tali! Yilo oyo onjanja yatatu njiya kokuene kuenje siu lingili ocilemo. Momo si kasi oku sanda ovipako viene,+ puãi ndu sandi ene; momo ka ku lavokaiwa okuti omãla+ va selekela ukuasi olonjali viavo, pole, olonjali ovio vi selekela omãla vavo. 15 Momo ame ndi ka sanjukila oku pesela ovina viosi ndi kuete omo liene kuendavo omuenyo wange.+ Nda ame ndu soli calua, ame muẽle hẽ ndi soliwa citito? 16 Pole, ndaño oco, sia kaile ocilemo kokuene.+ Haimo lumue ene wa popi hati, nda kala “ukuelimbi” kuenda ndo kuati “latutu.” 17 Anga ndo pundi cimue pokati kava nda tumile kokuene? 18 Nda tuma Tito kumue la manji umue. Anga hẽ Tito wo pundi cimue?+ Ka tua endaile hẽ lovisimĩlo vimuamue? Ovituwa vietu hẽ havimuamueko?

19 Ene hẽ wa simi otembo yosi okuti, tu kasi oku liteyuila kovaso yene? Etu tuloñame via Kristu kuenda tu kasi oku vangula ocili kovaso a Suku. Pole, a vamanji wa soliwi, cosi tu linga, tu ci lingila oku vu kolisi. 20 Momo ñasi lohele yokuti, eci njiya pamue siu sangi ndeci ndi yongola kuenda ame si kala ndeci ene vu yongola, pole, ñuetevo ohele yoku sanga ovama, esepa, onyeño yalua, oku lihoya, alundi, olombonde,* oku lekisa epela kuenda ombuanja. 21 Pamue eci njiya vali, Suku yange o ndi kutisa osõi kovaso ene kuenje ndi lilila valua va linga ekandu okuti, ka va likekembelele keliño liavo, kevĩho liukahonga* kuenda kumbondo* va lingainga.

13 Yilo oyo onjanja yatatu ndi kasi oku iya kokuene. “Luvangi* wolombangi vivali ale vitatu, ocitangi cosi ci sukila oku tetuluiwa.”+ 2 Ndaño si kasipo cilo, ci kasi ndu okuti haipo ndi kasi onjanja yavali kuenje ngeca elungulo liange ku vana va lingile ekandu osimbu kuenda ku vosi vakuavo okuti, nda ndeya vali lomue o ka puluka kepindiso, 3 momo vu kasi oku sandiliya ondimbukiso yokuti Kristu una okuti ka honguele lene, pole, wa pama pokati kene, o kasi oku vanguila pocakati cange. 4 Momo eye wa pondiwila kuti omo liehonguo, pole, o kasi lomuenyo omo liunene wa Suku.+ Letuvo tua hongua ndeci eye a honguelevo kosimbu, puãi tu ka kala lomuenyo ndeci eye a kasi lomuenyo+ omo liunene wa Suku u kasi pokati kene.+

5 Amamiko oku li seteka nda vu kasi vekolelo; amamiko oku seteka eci ene muẽle wa tuwi.+ Ale ka wa limbukili okuti, Yesu Kristu o kasi vomunga kumue lene? Te lika nda ka wa taviwili la Suku. 6 Ocili, ndi lavoka okuti ene vu ka limbuka okuti tua taviwa la Suku.

7 Cilo tu likutilila ku Suku oco ka vu ka lingi lacimue cĩvi, ka tu ci lingila oco vakuetu va limbuke okuti tua taviwa, pole, tu yongola okuti ene vu linga eci ciwa ndaño ka tu taviwa la vakuetu. 8 Momo ka tu lingi lacimue ci patãla ocili, te oku yakela ocili. 9 Olonjanja viosi tu sanjuka eci ene vu pami, ndaño okuti olonjanja vimue tua hongua. Eci oco tu likutilila okuti, vu penguluiwa kovisimĩlo viene. 10 Eli olio esunga lieci ndo soneheleli ovina evi osimbu si kasipo okuti, eci ñalapo si vangula lukãlu omo liomoko Ñala a nyĩha+ yoku pamisa okuti, hayoku nyõlako.

11 Oku sulako a vamanji, amamiko lesanju, loku penguluiwa kovisimĩlo viene, oku lembelekiwa,+ oku sima cimuamue,+ loku kala lombembua;+ kuenje Suku yocisola kuenda yombembua+ o ka kala lene. 12 Li lami pokati lesipulo li kola. 13 Olosandu viosi vio tumisi ovilamo.

14 Ohenda ya piãla ya Ñala Yesu Kristu locisola ca Suku kuenda espiritu sandu lina lia siata oku vu kuatisi vekongelo, li kale lene vosi.