UKANDA WATETE KU VA KORINDO

1 Paulu una wa kovongiwa oku linga upostolo+ wa Kristu Yesu omo liocipango ca Suku kuenda Sositene manjetu, 2 ndi kasi oku vu soneheli ene vu kasi vekongelo lio ko Korindo,+ ene wa nõliwi la Suku vomunga kumue la Kristu Yesu,+ haene wa kovongiwi oku kala olosandu kumue la vosi va kasi kolonepa viosi va tukula onduko ya Ñala yetu Yesu Kristu,+ Ñala yavo haeye Ñala yetu:

3 Ohenda ya piãla lombembua vi tunda ku Suku Isietu kuenda ku Ñala Yesu Kristu, vi kale lene.

4 Olonjanja viosi ndu panduili ku Suku yange omo liohenda ya piãla ya Suku yina ya eciwa kokuene pocakati ca Kristu Yesu; 5 momo wa lingisui olohuasi vokuaye kovina viosi okuti, kuloño woku popia kuenda kukũlĩhĩso,+ 6 ndeci uvangi watiamẽla ku Kristu+ wa pamisiwa pokati kene, 7 okuti layimue ongavelo yo kambeli, osimbu vu lavoka esituluilo lia Ñala yetu Yesu Kristu.+ 8 Eye o vu pamisi toke kesulilo oco okuti, lomue o sanga esunga lioku vu pisi keteke lia Ñala yetu Yesu Kristu.+ 9 Suku una wo kovongeli oku kuata ukamba Lomõlaye Yesu Kristu Ñala yetu, ukuacili.+

10 A vamanji, ndu pingi vonduko ya Ñala yetu Yesu Kristu okuti, vu popia popia cimuamue kuenda pokati kene ka pa ka kale oku litepa,+ pole, likuati omunga lutima umuamue lovisimĩlo vimuamue.+ 11 A vamanji, vamue vakuanjo ya Koloe va ndi sapuila eci catiamẽla kokuene okuti, pokati kene pali oku liyenja. 12 Eci ñasi oku lombolola ceci okuti, pokati kene umue o popia hati: “Ame nda tiamẽla ku Paulu,” “Ame nda tiamẽla ku Apolosi,”+ “Ame nda tiamẽla ku Kefa,”* “Ame nda tiamẽla ku Kristu.” 13 Anga hẽ ekongelo lia Kristu lia li tepa tepa? Anga hẽ Paulu wa pondiwila kuti oco vu kuatisiwi? Ale ene wa papatisiwili vonduko ya Paulu? 14 Mandula Suku omo sia papatisile umue pokati kene, te lika Krispo+ la Gaio,+ 15 oco umue ka ka popie okuti, ene wa papatisiwi vonduko yange. 16 Ocili okuti, nda papatisavo vakuanjo ya Stefana.+ Pole, nda nda papatisa vali vakuavo, si ci ivaluka. 17 Momo Kristu ka numile oku papatisa, te oku kunda olondaka viwa,+ haluloñoko wolondaka,* sanga uti wekangiso* wa Kristu ka u kuata esilivilo.

18 Momo kuava va kasi oku nyõleha, ondaka yatiamẽla kuti wekangiso,* uveke,+ puãi kokuetu tu kasi oku popeliwa, ondaka yaco, unene wa Suku.+ 19 Momo ca sonehiwa citi: “Ndi ka lingisa okuti olondunge viomanu vakualondunge vi takata kuenda ndi ka imũla* oku loñoloha kuomanu va loñoloha.”+ 20 Ukualondunge o kasi pi? Ukuavisonehua* o kasi pi? Ukualonamãlala violuali lulo* o kasi pi? Suku ka tendele hẽ olondunge violuali lulo okuti uveke? 21 Ukũlĩhĩso wa Suku u lekisiwa ndoco: oluali mekonda liolondunge vialuo+ ka lua kũlĩhĩle Suku,+ pole, Suku wa mola uwa omo liuveke+ weci ci kundiwa, oco a popele vana va tava.

22 Momo va Yudea va pinga olondimbukiso+ kuenda va Helasi va sanda olondunge; 23 pole, etu tu kunda eci catiamẽla ku Kristu una wa pondiwila kuti okuti, ku va Yudea ci linga ocilondokua, pole, ku vakualofeka uveke.+ 24 Pole, ku vana va kovongiwa, ci kaile va Yudea kuenda va Helasi, Kristu eye unene wa Suku, haeye olondunge via Suku.+ 25 Momo ocina cimue ca Suku omanu va tenda okuti cuveke, oco ci kuete vali olondunge okuti, omanu va sule. Kuenje ocina cimue ca Suku omanu va tenda okuti ca hongua, oco ca pamapo vali okuti, omanu va sule.+

26 A vamanji, ene wa limbuki okuti eci wa kovongiwi la Suku, ka kua kaile valua vakualondunge ndomo ci likuata lovisimĩlo viomanu,+ ka kua kaile valua vakuonene, ka kua kaile olombuale* vialua,+ 27 pole, Suku wa nõla ovina viuveke violuali oco a kutise osõi omanu vakualondunge; kuenda Suku wa nõla ovina via hongua violuali oco a kutise osõi ovina via pama;+ 28 kuenje Suku wa nõla ovina ka vi kuete esilivilo violuali levi via tombiwa, lovina ka vi kasiko, oco a kutise osõi evi vi kasiko,+ 29 oco lomue ka ka lipandele kovaso a Suku. 30 Mekonda lia Suku, ene vu kasi vomunga kumue la Kristu Yesu, una wa linga kokuetu olondunge vi tunda ku Suku, lesunga,+ loku kola+ kuenda eyovo omo liocisembi,+ 31 oco ci kale ndomo ca sonehiwa citi: “Una o lipanda, a lipandele ku Yehova.”*+

2 Omo liaco, a vamanji, eci ndeya kokuene sieyile oku vu komõhisi lupopi+ ale lolondunge poku vu sapuili elumbu li kola+ lia Suku. 2 Momo eci nda kala lene nda sokiya okuti si sakalala lovina vikuavo, te lika la Yesu Kristu una wa pondiwila kuti.+ 3 Kuenje eci ndeya kokuene nda honguele kuenda nda kala lusumba loku luluma kualua; 4 kuenda upopi wange leci nda kunda, ka via kaile olondaka violondunge vioku vu tavisi, pole, te luvangi wespiritu kuenda wunene wa Suku,+ 5 oco okuti ekolelo liene ka li tiamisiwila kolondunge viomanu, te kunene wa Suku.

6 Cilo tu vangula olondunge pokati kava va loñoloha,+ pole, halolondungeko violuali lulo,* ndaño violombiali violuali lulo, vina vi laika oku imũha.+ 7 Pole, etu tu popia eci catiamẽla kolondunge via Suku via sitikiwa velumbu li kola.+ Suku wa sokiya oku ci linga osimbu oluali lulo ka lua lulikiwile, oco a tu muise ulamba. 8 Olombiali violuali lulo* ka via kũlĩhĩle olondunge viaco,+ momo nda via vi kũlĩhĩle, nda ka via pondele* Ñala Yesu. 9 Ndeci ca sonehiwa citi: “Iso ka lia muile kuenda etũi ka lia yevele, ndaño utima womunu ka wa kuatele elomboloko liovina Suku angiliyila vana vo sole.”+ 10 Momo ovina viaco, Suku wa tu vi situluila+ pocakati cespiritu liaye,+ momo espiritu li kũlĩhĩsa ovina viosi, ndaño muẽle ovina via longa via Suku.+

11 Omo liaco, helie o pondola oku kũlĩha ovisimĩlo viomunu ukuavo? Omunu eye lika wa kũlĩha eci ci kasi vovisimĩlo viaye. Cimuamue haico okuti, lomue weya oku kũlĩha eci ci kasi vovisimĩlo via Suku, te lika espiritu sandu lia Suku. 12 Etu puãi ka tua tambuile espiritu lioluali, te espiritu li tunda ku Suku+ oco tu kũlĩhe ovina Suku a tu ĩha ocali. 13 Ovina evi ka tu vi popi lolondaka via longisiwa lolondunge viomanu,+ te vina via longisiwa lespiritu,+ osimbu tu lombolola* ovina viatiamẽla ku Suku lolondaka viespiritu.

14 Omunu ukuetimba ka tava* kovina viespiritu lia Suku, momo ovio uveke kokuaye; kuenda ka vi kũlĩha, momo omunu o sukila oku kuata espiritu lia Suku oco a vi limbuke. 15 Omunu ukuespiritu o kũlĩhĩsa ovina viosi,+ pole, eye muẽle ka kũlĩhĩsiwa lomunu umue. 16 Momo “helie wa kũlĩha ovisimĩlo via Yehova* oco u longise?”+ Pole, etu tu kuete ovisimĩlo via Kristu.+

3 Omo liaco a vamanji, sia ponduile oku vangula lene ndomanu vakuespiritu,+ pole, nda vakuetimba okuti, ndotumãla+ vu Kristu. 2 Ndo tekoli lasenjele, halokuliako kua kõla omo okuti, handi ka wa pameli. Ndaño cilo, lopo ka wa pameli,+ 3 momo handi wakuetimba.+ Osimbu pokati kene pali ukuse lovama havukuetimbako hẽ+ kuenda ka wendaendi ndeci omanu va endaenda? 4 Momo eci umue a popia hati, “Ame nda tiamẽla ku Paulu,” ukuavo hati, “Nda tiamẽla ku Apolosi,”+ ka wa tuwili hẽ ndomanu vaño?

5 Apolosi hẽ eye helie? Paulu eye helie? Ovo olondingupange+ pocakati ca vana ene wa tavi ndeci Ñala a va kundika omunu lomunu. 6 Ame nda kũla,+ Apolosi wa tapela,+ pole, Suku wa kulisa, 7 ci kaile u wa kũla, ci kaile u wa tapela vosi yavo hacimueko, te Suku o kulisa.+ 8 Una o kũla la una o tapela va lisoka,* pole, omunu lomunu o ka tambula onima yaye ndeci ca sesamẽla upange waye.+ 9 Momo tulondingupange kumue la Suku. Ene wepia lia Suku, haene wunjo yi tungiwa la Suku.+

10 Omo nda kundikiwa ohenda ya piãla ya Suku, nda seveta ociseveto+ ndutungi* wa loñoloha, puãi umue wiñi o tungilako. Pole, omunu lomunu amameko oku lavulula ndomo a tungilapo. 11 Momo lomue o tẽla oku seveta ociseveto cikuavo, te lika cina ca sevetiwa ale okuti, Yesu Kristu.+ 12 Nda umue o tungila kociseveto ulu, opalata, ovawe a tĩla, pamue oviti, owangu, ale ovisiakiti, 13 upange womunu lomunu u limbukiwa,* momo eteke liaco liu limbukisa, omo u situluiwa pocakati condalu+ kuenje ondalu yi ka lekisa upange womunu lomunu ndeci a tunga. 14 Nda upange omunu umue a tungila kociseveto u tumãla, omunu waco o ka tambula onima; 15 nda upange womunu umue u pia, omunu waco o ka pesela, pole, o ka kala ndomunu wa puluka kondalu.

16 Ka wa kũlĩhĩli okuti ene muẽle vunembele ya Suku+ kuenda okuti espiritu lia Suku li kasi vokati kene?+ 17 Nda umue o nyõla onembele ya Suku, omunu waco o ka nyõliwavo la Suku; momo onembele ya Suku yi kola kuenje ene vunembele yaco.+

18 Lomue ka ka likembe eye muẽle: Nda umue pokati kene o sima okuti ukualondunge kovaso omanu voluali lulo,* a linge eveke, oco a linge ukualondunge. 19 Momo olondunge violuali lulo ku Suku uveke, omo ca sonehiwa citi: “Eye o kokela vakualondunge oku kupukila volonjanjo viavo muẽle.”+ 20 Kuenda vali hati: “Yehova* wa kũlĩha okuti ovisimĩlo via vakualondunge viesanda.”+ 21 Omo liaco, lomue ka ka lipandele omanu; momo ovina viosi via tiamẽla kokuene, 22 ci kaile Paulu, ci kaile Apolosi, ale Kefa,*+ pamue oluali lulo, ale omuenyo, loku fa, pamue ovina via cilo, levi vi laika oku iya, ovina viosi viene; 23 puãi ene wa tiamẽli ku Kristu;+ Kristu puãi wa tiamẽla ku Suku.

4 Ca sesamẽla okuti omanu va tu tenda ndoloñuatisi* via Kristu haetu tu va kalei kalumbu a kola a Suku.+ 2 Omo liaco, va kalei va sukila oku tẽlisa ciwa ovikele viavo. 3 Nda nda sombisiwa lene, ale lombonge,* ka ci kuete esilivilo lialua kokuange. Ndaño ame, si li sombisa ame muẽle. 4 Momo si ivaluka cimue cĩvi nda linga. Haimo lumue, eci ka ci lekisa okuti ame ndukuesunga; pole, Yehova* eye o ndi sombisa.+ 5 Ko ka sombisi+ ocina cimue osimbu otembo ya sokiyiwa ka yeyile, toke eci Ñala eya. Eye o ka nena kutanya ovina via wunda vowelema, haeye o ka situlula olonjongole viovutima kuenje omunu lomunu o ka tambula epandiyo li tunda ku Suku.+

6 A vamanji, nda tiamisila ovina evi kokuange kuenda ku Apolosi+ oco ci vu kuatisi okuti, vu lilongisila kongangu yetu onumbi eyi: “Kuami ovina via sonehiwa” oco ka vu ka kuati epela,+ sanga wameli ku umue loku pembula ukuavo. 7 Nye cu ku velisapo okuti ukuẽle o sule? Nye o kuete okuti kua ci tambuile?+ Nda wa ci tambula o lipandela nye ndu okuti kua ci tambuile?

8 Anga wekuti ale? Wa lingi ale olohuasi? Wa fetiki ale oku viala+ osimbu ka tu kasipo? Ndi livela nda wa fetikili ale oku viala ndolosoma okuti, letuvo tu viala kumue lene.+ 9 Momo ci kasi ndu okuti, etu tuvapostolo, Suku wa tu kapa kesulilo ndava va pisiwila oku fa,+ omo tua linga ndocitalukilo koluali,+ ci kaile kovangelo, ci kaile komanu. 10 Etu tuaveke+ omo lia Kristu, ene puãi vu kuete olondunge vu Kristu; etu tua hongua, pole, ene wa pami; ene wa sumbiwi, etu puãi tu sepuiwa. 11 Toke cilo tu kasi lonjala,+ lenyona,+ tu kasi epẽle,* tu tipuiwa+ kuenda ka tu kuete olonjo, 12 kuenda tu lingainga upange lovaka etu muẽle.+ Eci omanu va tu sepula, tu va sumũlũisa;+ eci tu lambalaliwa, tu pandikisa lepandi;+ 13 eci va tu lundila, tu tambulula lumbombe;*+ toke cilo tua linga ndeliño lioluali kuenda ndovinene viovina viosi.

14 Si kasi oku soneha ovina evi oco ndi vu kutisi osõi, pole, ndi ci lingila oku vu lunguli ndomãla vange va soliwa. 15 Ndaño vu kuete 10.000 kalongisi vu Kristu, haimo lumue ka vu kuete va isia valua; momo vu Kristu Yesu ame nda linga isiene omo liolondaka viwa.+ 16 Ndu pingi okuti, vu linga olosetukuli viange.+ 17 Eli olio esunga lieci ndu tumisili Timoteo, momo eye omõlange wa soliwa kuenda o kasi oku vumba Ñala lutima wosi. Eye o ka vu ivaluisi olonumbi* nda kuama kupange wa Kristu Yesu,+ ndeci ñasi oku longisa kovitumãlo viosi kuenda kakongelo osi.

18 Vamue va kasi oku lekisa epela loku sima okuti siya vali kokuene. 19 Pole, nda Yehova* wa panga, ndopo ndiya kokuene kuenda si ka kũlĩhĩsa olondaka viava va lekisa epela, te unene wavo. 20 Momo Usoma wa Suku ka u tiamisiwila kolondaka, te kunene. 21 Vu nõlapo nye? Ndiya kokuene lombueti+ ale locisola kuenda utima wonjuka?

5 Ocili, ca yevala okuti, pokati kene pali evĩho liukahonga,*+ pole, evĩho* liaco ka lia la sangiwa ndaño muẽle pokati ka vakualofeka okuti, ulume umue amamako oku lipekela lukãi wa isiaye.+ 2 Oco hẽ ene vu ci lipandela? Siti nda wa nyumãleli+ oco ulume wa linga ovina viaco a tundisiwe pokati kene?+ 3 Ndaño si kasiko letimba, haimo lovisimĩlo* oko ñasi kuenda ame nda sombisa ale ulume wa ci linga ndu okuti ñasi lene. 4 Eci vu liongololi pamosi vonduko ya Ñala yetu Yesu, loku kũlĩha okuti, ñasi lene vovisimĩlo* lunene wa Ñala yetu Yesu, 5 ulume waco vu sukila oku weca ku Satana+ okuti, etimba liaye li nyõleha, oco espiritu li popeliwe keteke lia Ñala.+

6 Oku lipanda kuene ka kuwako. Ka wa kũlĩhĩli okuti etumbisa litito li tumbisa osema yosi ya tamiwa?+ 7 Imũli etumbisa liosimbu, oco vu lingi osema ya tamiwa yokaliye okuti, ka yi kuete etumbisa, ndeci ene muẽle vu kasi ale. Ocili, Kristu kameme ketu ko Paskoa,+ wa lumbiwa ale.+ 8 Omo liaco, tu amamiko oku linga ocipito caco+ haletumbisako liosimbu, ndaño letumbisa lievĩho ale liekandu, pole, lombolo ka yi kuete etumbisa okuti yesunguluko kuenda yocili.

9 Vukanda wange, ndo soneheli oco vu liwekipo oku kuata ukamba* la vakuevĩho liukahonga,* 10 ka ci lomboloka okuti ukamba lomanu vosi vakuevĩho liukahonga* voluali lulo,+ ale vakuacipululu, olondiandia, pamue vakuakufendela oviteka. Momo nda oco, nda wa tundi voluali.+ 11 Pole, cilo ñasi oku vu soneheli oco vu liwekipo oku kuata ukamba*+ lomunu wosi o tukuiwa manji okuti, ukuevĩho liukahonga,* ukuacipululu,+ ukuakufendela oviteka, ukuakuimbula,* ale oholua,+ pamue ondiandia,+ ndaño oku lia lulume waco. 12 Momo ñueteko nye lesombiso lia vana ka va kasi vekongelo? Ene hẽ ka vu sombisa vana va kasi vekongelo, 13 osimbu Suku a sombisa vana ka va kasi vekongelo?+ “Tundisi omunu waco ondingaĩvi pokati kene.”+

6 Nda umue pokati kene o kuetele ondaka ukuavo,+ o lukuta hẽ oku tuala ondaka yaco kekanga kovaso yalume havakuesungako okuti, kovaso yolosandu hakoko? 2 Ale ka wa kũlĩhĩli okuti, olosandu vi ka sombisa oluali?+ Kuenje nda oluali lu ka sombisiwa lene, ka vu tẽla hẽ oku tetulula ovina vitito? 3 Ka wa kũlĩhĩli okuti tu ka sombisa ovangelo?+ Siti tu ka tẽlavo oku tetulula ovina viomuenyo ulo? 4 Nda ene vu kuete ovina viomuenyo ulo oco vi tetuluiwe,+ anga hẽ vu nõla ndolonganji alume vana ka va sumbiwile vekongelo? 5 Ndi ci popela oku vu kutisi osõi. Pokati kene ka pali hẽ umue ukualondunge okuti, o tẽla oku tetulula eci pokati kene pa kala ocitangi cimue? 6 Pole, manji ambata manji ukuavo kekanga, kovaso ya vana okuti havakuetavoko!

7 Eci vu li tuali kekanga omunu lukuavo, wa yuliwi ale. Momo lie ka vu ecelela okuti vu lingiwa lãvi?+ Momo lie ka vu ecelela okuti vu kembiwa? 8 Pole, ene vu linga lãvi vamanjene loku va kemba!

9 Ale ka wa kũlĩhĩli okuti, vana havakuesungako ka va ka piñala Usoma wa Suku?+ Ko ka kembiwi.* Vakuevĩho liukahonga,*+ la vakuakufendela oviteka,+ la vakahokolo,+ lalume va litumbika kovilinga vioku lipekela la vakuavimatamata vimuamue viuyali,+ lalume vakuakulipekela lalume,*+ 10 kuenda ovimunu, la vakuacipululu,+ loloholua,+ la vakuakuimbula* kuenda olondiandia, ka va ka piñala Usoma wa Suku.+ 11 Vamue pokati kene va kuatele ovituwa viaco. Pole, cilo wa sukuiwi;+ wa kolisiwi;+ kuenda wa tendiwi nda vakuesunga+ vonduko ya Ñala Yesu Kristu kuenda lespiritu lia Suku yetu.

12 Ocihandeleko ci ngecelela oku linga ovina viosi, pole, haviosiko vi kuatisa.+ Ocihandeleko ci ngecelela oku linga ovina viosi, pole, si ecelela okuti ndi yuliwa locina cimue. 13 Okulia kua sovuilua imo kuenda imo lia sovuilua okulia, pole, Suku o ka vi nyõla kavali kavio.+ Haimo lumue, etimba ka lia sovuiluilue evĩho liukahonga,* pole, lia sovuilua Ñala+ kuenda Ñala wa sovuilua etimba. 14 Pole, Suku wa pindula Ñala+ kuenje o ka tu pindulavo kolofa+ pocakati cunene waye.+

15 Ka wa kũlĩhĩli okuti atimba ene ovimatamata via Kristu?+ Anga ndupa ovimatamata via Kristu loku vi tokeka kocipuepue? Oco hacoko! 16 Ka wa kũlĩhĩli okuti wosi o tokekiwa kocipuepue o linga laye etimba limuamue? Momo “kavali kavo,” oco eye a popia, “va ka linga etimba limuamue.”+ 17 Pole, omunu una o tokekiwa vu Ñala, o kuete ovisimĩlo vimuamue ndevi viaye.*+ 18 Tili evĩho liukahonga!*+ Ekandu liosi likuavo omunu a linga ka li vĩhisa etimba liaye, pole, nda wa linga evĩho liukahonga o vĩhisa etimba liaye muẽle.+ 19 Ka wa kũlĩhĩli okuti etimba liene onembele+ yespiritu sandu vokati kene, yina wa tambuli ku Suku?+ Handi vali, ene ka wa tiamẽleli kokuene muẽle,+ 20 momo wa landiwi londando yimue.+ Omo liaco, sivayi Suku+ vatimba ene.+

7 Kaliye, catiamẽla kovina wa sonehi, ciwa nda ulume ka lambi* kukãi umue; 2 pole, omo lievĩho liukahonga* lia siata, ulume lulume a kuate ukãi waye muẽle+ kuenda ukãi lukãi a kuate ulume waye muẽle.+ 3 Ulume a ece kukãi waye eci co sesamẽla kuenda ukãi a lingevo cimuamue la veyaye.+ 4 Ukãi ka kuete unene ketimba liaye muẽle, te ulume waye; cimuamue haico, ulume ka kuete unene ketimba liaye muẽle, te ukãi waye. 5 Ko ka litateki omunu lukuavo, te nda wa litavi pokati vokatembo kamue oco vu kuati otembo yoku likutilila kuenda vu litokeka vali, oco Satana ka kamameko oku vu yonja omo liekambo liene lioku likandangiya. 6 Eci ndi ci popela oku vu kuatisi, pole, hacihandelekoko okuti te vu ci pokola. 7 Nda yonguile okuti omanu vosi va kala ndame. Pole, omunu lomunu o kuete ongavelo yaye+ ya tunda ku Suku, u lonjila eyi, ukuavo lonjila oyo.

8 Cilo, ndi sapuila vana ka va kuelele kuenda ovimbumba okuti, hĩse nda vamamako oku kala ndame.+ 9 Pole, nda ka va tẽla oku likandangiya, va kuele, momo hĩse oku kuela okuti, oku kala ño loloñeyi vialua hacoko.+

10 Komanu vana va kuele ndi va ĩha onumbi eyi, pole, hameko te Ñala okuti, ukãi ka ka litepe lulume waye.+ 11 Pole, nda wa litepa, ka ka kuele, ale hĩse a lisunguluise la veyaye; kuenda ulume ka ka siepo ukãi waye.+

12 Pole, ku vakuavo ame ndi popia, ocili, ame, Ñala hayeko+ okuti: Nda manji umue ulume o kuete ukãi okuti, hukuetavoko kuenje ukãi waco o tava oku kala laye, manji ka ka litepe laye; 13 kuenda nda manji umue ukãi o kuete veyaye okuti hukuetavoko kuenje veyaco o tava oku kala laye, manji ukãi ka ka litepe laye. 14 Momo ulume una okuti hukuetavoko, o tendiwa okuti o kola omo liukãi waye kuenda ukãi okuti hukuetavoko o tendiwa okuti o kola omo lia veyaye; nda hacoko omãla vene nda va vĩha, pole, cilo va kola. 15 Pole, una okuti hukuetavoko, nda wa nõlapo oku litepa,* a litepe; manji ulume ale ukãi ka kisikiwa oku kala laye, momo Suku wo wĩhi ombembua.+ 16 Ove ukãi, wa kũlĩha ndati nda o ka popela veyove?+ Ove ulume, wa kũlĩha ndati nda o ka popela ukãi wove?

17 Omo liaco, omunu lomunu a ende ndeci Yehova* o wĩha ongavelo kuenda ndeci Suku o kovonga.+ Kuenje eyi oyo onumbi ngeca kakongelo osi. 18 Anga hẽ kuli umue okuti, wa kovongiwa tupu wa seviwa ale evamba?+ Amameko levamba liaye. Anga hẽ kuli umue okuti wa kovongiwa tupu ka seviwile evamba? Nda kuli, ka ka li sevise.+ 19 Evamba hacimueko, uyamba hacimueko;+ ci kuete esilivilo oku pokola kolonumbi via Suku.+ 20 Omunu lomunu amameko lekalo a kovongiwa lalio.+ 21 Anga hẽ wa kovongiwa eci wa kala upika? Ka ci ka ku sakalaise;+ pole, nda citava oku yovoka, ci linga. 22 Momo wosi una wa kovongiwa vu Ñala eci a kala upika, o tambula elianjo kuenda o tiamẽla ku Ñala;+ cimuamue haico omunu una okuti wa yovoka eci a kovongiwa, o linga upika wa Kristu. 23 Ene wa landiwi londando yimue;+ liwekipo oku kala apika vomanu. 24 A vamanji, omunu lomunu amameko lekalo a kovongiwa lalio kovaso a Suku.

25 Catiamẽla kafeko lakuenje vosombo,* si kuete onumbi yi tunda ku Ñala, pole, ngeca ocisimĩlo cange+ ndomunu Ñala a lekisa ohenda oco a linge ukuekolelo. 26 Kuenje ndi sima okuti, hĩse nda ulume o kala ndeci a kasi cilo omo liovitangi vio koloneke vilo. 27 Anga hẽ ove o kuete ukãi? Ku ka sande oku litepa laye.+ Anga hẽ ku kuete ukãi? Liwekapo oku sandiliya ukãi. 28 Ndaño wa kuela, ku lingi ekandu. Nda omunu ka la kuela* kuenje o kuela, ka lingi ekandu. Vana va kuela va laika oku tala ohali ketimba liavo muẽle. Pole, ñasi oku vu yovoli kohali.

29 A vamanji ndu sapuili siti, otembo ya kambako yitito.+ Oku upisa cilo, vana va kuete akãi va kale ndava ka va kuete, 30 vana va lila va kale ndu ka va lili, vana va sanjuka va kale ndu ka va sanjukile, vana va landa va kale ndu ka va kuete, 31 kuenda vana va kuatisiwa loluali, va kale ndu okuti ka va kuatisiwa calua laluo; momo ekalo lioluali lulo li kasi oku pongoloka. 32 Ndi yongola okuti vu yuvula esakalalo. Ulume ka kuelele wa sakalala lovina via Ñala, ndomo a sanjuisa Ñala. 33 Pole, ulume wa kuela wa sakalala lovina violuali,+ ndomo a sanjuisa ukãi waye, 34 kuenda utima waye wa tepiwa. Ukãi ka kuelele kuenda ufeko wosombo, va sakalala lovina via Ñala,+ loku sokolola ndomo va tẽla oku kola ketimba lo kespiritu. Pole, ukãi wa kuela o sakalala lovina violuali, ndomo a sanjuisa ulume waye. 35 Puãi eci ndi ci popela oku vu kuatisi okuti, oku vu tateki* hacoko, te oku vu vetiyi oku linga eci ciwa loku vumba Ñala yetu olonjanja viosi lutima wosi okuti, ka ku kala etateko.

36 Pole, nda umue o sima okuti ka kasi oku tata ciwa ekalo liaye lioku amamako oku kala ndoto okuti ka kuela,* haeye wa pitahãla vumalẽhe, a kuele nda eci oco eye a yongola, eye ka lueya poku ci linga.+ 37 Puãi, nda umue wa sokiya vutima waye okuti, ka kuete onjongole yaco kuenje o tẽla oku likandangiya kuenda wa nõlapo vutima waye oku amamako ndoto okuti ka kuela,* o linga ciwa.+ 38 Kuenje wosi o kuela o linga ciwa, puãi, wosi ka kuela o linga eci ca velapo.+

39 Ukãi ohueli wa kutiwa kulume waye osimbu eye a kasi lomuenyo.+ Puãi nda ulume waye wa pekela kolofa, wa kutuluiwa oco a kuele vali, pole, te lika vu Ñala.+ 40 Vocisimĩlo cange, eye o sanjuka nda amamako oku kala ño ndoto; kuenda ndi sima okuti, ñuetevo espiritu lia Suku.

8 Kaliye catiamẽla kokulia kua lumbiwa koviteka:+ Vosi yetu tua kũlĩha okuti tu kuete ukũlĩhĩso.+ Ukũlĩhĩso u koka oku lipanda, pole, ocisola ci pamisa.+ 2 Nda umue o sima okuti wa kũlĩha cimue, eye handi ka ci kũlĩhĩle ndeci co sesamẽla oku ci kũlĩha. 3 Pole, nda umue o sole Suku, eye wa kũlĩhĩwa la Suku.

4 Catiamẽla koku lia okulia ku lumbiwa koviteka, tua kũlĩha okuti ociteka hacimueko+ kuenda kuli Suku umosi lika.+ 5 Ndaño kuli vana va tukuiwa okuti olosuku, ci kaile kilu, ci kaile posi,+ ndeci kuli “olosuku” vialua kuenda “oloñala” vialua, 6 kokuetu kuli Suku umosi lika,+ Isia+ una okuti, eye wa lulika ovina viosi kuenda wa tu lulika+ oco tu linge ocipango caye; kulivo Ñala umosi lika, Yesu Kristu okuti, kokuaye oko kueyilila ovina viosi+ kuenda etu tu kuetele omuenyo vokuaye.

7 Omo liaco, havosiko va kuete ukũlĩhĩso waco.+ Pole, vamue omo va enda oku fendela oviteka, va lia okulia ndocina cimue ca lumbiwa kociteka+ kuenje owanji wutima wavo wa hongua u vĩhisua.+ 8 Pole, okulia ka ku tu amisa ku Suku;+ ka tu pumbi cimue nda ka tu li kuenda nda tu lia ka tu kuata oluhimo laumue.+ 9 Pole, amamiko oku lavulula oco okuti, elianjo liene lioku nõla ka li kokela ocilondokua vana va hongua.+ 10 Momo nda umue wa ku mola ove wukuokũlĩhĩso o kasi oku lia vonembele va fendaila oviteka, nda eye wa hongua, owanji wutima waye ka u vetiyiwa hẽ oku lia evi via lumbiwa koviteka? 11 Puãi, omo liukũlĩhĩso wove omunu wa hongua o kasi oku nyõleha okuti, manjove una Kristu a fila.+ 12 Eci vu lueyela vamanjene loku va vetiya oku linga ovina okuti owanji wutima wavo wa hongua+ u va pisa, vu lueyela Kristu. 13 Eli olio esunga lieci okuti, nda okulia ku kokela ocilondokua manjange, lalimue eteke ndi lia vali ositu, oco si ka kokele ocilondokua manjange.+

9 Ame hẽ si kuete elianjo? Ame hẽ siupostoloko? Sia muile hẽ Yesu Ñala yetu?+ Heneko hẽ vunima yupange wange vu Ñala? 2 Ndaño okuti komanu vakuavo siupostoloko, kokuene ndupostolo! Momo ene muẽle wundimbukiso yeca uvangi yupange wange wupostolo vu Ñala.

3 Kuava va kasi oku ndi pisa etambululo liange lieli: 4 Anga hẽ ka tu kuete omoko yoku lia loku nyua? 5 Ka tu kuete hẽ omoko yoku kuamiwa lukãi* umue ukuetavo,+ ndeci ovapostolo vakuavo, la vamanji va Ñala+ kuenda Kefa?*+ 6 Ale anga hẽ ame lika la Barnaba+ okuti, ka tu kuete omoko yoku liwekapo oku linga upange woku sanda eteku? 7 Esualali lipi li li fetela ovina viaye muẽle? Helie o kũla ocumbo cayuva kuenje ka li epako liaco?+ Ungombo upi o lisa ocunda okuti ka nyui kasenjele ocunda caco?

8 Anga ñasi oku tukula ovina evi lovisimĩlo viomanu? Ale Ocihandeleko ka ci tukulavo ovina evi? 9 Momo Vocihandeleko ca Mose mua sonehiwa citi: “Ku ka munĩhe omẽla wongombe osimbu yi kasi oku sasa olomema.”+ Anga hẽ Suku wa eca ocihandeleko eci omo liolongombe? 10 Ale wa ci popela mekonda lietu? Ocili, eci ca sonehiwa mekonda lietu, momo omunu o lima lu o sasa, te va ci linga lelavoko lioku tambula onepa yimue.

11 Nda tua kũla vokuene ovina vi tunda ku Suku, ci linga hẽ cimue nda tu ungula vokuene ovina vietimba?+ 12 Nda omanu vakuavo va kuete omoko yaco vokuene, etu hẽ ka ca piãlele vali enene? Ka tua kuatele omoko yoku ci linga,+ pole, tu kasi oku pandikisa kovina viosi oco ka tu ka tateke olondaka viwa viatiamẽla ku Kristu.+ 13 Ka wa kũlĩhĩli okuti ava va linga ovopange a kola va lia ovina vionembele kuenda vana va vumba vumba kutala va tambula onepa yovina vi lumbiwila kutala?+ 14 Lonjila eyi, Ñala wa handeleka ku vana va kunda olondaka viwa okuti, va muila eteku kolondaka viwa.+

15 Ame puãi, sio pingili lacimue.+ Pole, sia sonehele ovina viaco oco ci lingiwe kokuange, momo kokuange hĩse oku fa okuti, umue oku njupa esunga lioku lipanda hacoko!+ 16 Cilo nda ñasi oku kunda olondaka viwa, si kuete esunga lioku lipanda laco, momo esukila liaco lia ñundikiwa. Pole, ngongo yange nda si kundi olondaka viwa!+ 17 Nda ndi ci linga lutima wosi, ndi sanga onima; pole, ndaño si ci lingi locipango cange haimo lumue, nda kundikiwa ocikele caco.+ 18 Oco puãi yipi onima yange? Yeyi yokuti, eci ndi kunda olondaka viwa, ngeca olondaka viwa ocali, si ci lingila omo lioku kuata omoko yolondaka viwa.

19 Momo ndaño nda yovoka komanu vosi, ame muẽle nda li lingisa upika womanu vosi okuti nganyala omanu valua. 20 Ku va Yudea nda linga lavo ndu Yudea okuti, nganyala va Yudea;+ ku vakuacihandeleko nda linga lavo ndukuacihandeleko okuti, nganyala vakuacihandeleko, ndaño ame siukuacihandelekoko.+ 21 Kuava ka va kuete ocihandeleko nda linga lavo ndu ka kuete ocihandeleko, momo ndi kuama ocihandeleko ca Suku kuenda ñasi vemẽhi liocihandeleko ca Kristu+ okuti, nganyala ava ka va kuete ocihandeleko. 22 Kuava va hongua nda linga lavo ndu nda hongua okuti, nganyala ava va hongua.+ Nda linga lomanu vosi ndukuavina viosi kuenda nda linga cosi citava oco okuti ndi popela vamue. 23 Ndi linga ovina viosi omo liolondaka viwa kuenda oku vi kundila ku vakuetu.+

24 Ka wa kũlĩhĩli okuti vana va yoloka, poku yoloka vosi yavo va yoloka, pole, umosi lika o tambula onima? Oco, yoloki okuti vu tambulavo onima.+ 25 Wosi iñila komapalo,* o likandangiya kovina viosi. Kuenje va ci lingila oco va tambule ekolowa li nyõleha,+ etu puãi lieli ka li nyõleha.+ 26 Omo liaco, ndi yoloka momo nda kũlĩha oku ngenda+ kuenda si yaki ndu okuti ñasi oku veta ofela; 27 pole, mbeta* etimba liange+ loku li pokuisa ndupika oco okuti, noke yoku kundila vakuetu, ame muẽle si pisiwa.*

10 A vamanji, njongola okuti vu kũlĩhi okuti, vakukululu yetu vosi va endela vemẽhi lielende+ kuenda va pita vokalunga,+ 2 kuenda vosi va papatisiwa osimbu va kuama Mose, leci va kala vemẽhi lielende loku pita vokalunga, 3 kuenda vosi va lia okulia kumuamue kuespiritu,+ 4 vosi va nyua ovava amuamue espiritu.+ Va enda oku nyua ovava a tunda kesenje espiritu lia va kuama okuti, esenje liaco li lomboloka* Kristu.+ 5 Suku ka sanjukilile valua pokati kavo, momo ovo va pondiwila vekalasoko.+

6 Ovina evi via tu lingila ndalungulo oco okuti, ka tu liveli ovina vĩvi ndeci ovo va vi livelele.+ 7 Ko ka lingi vakuakufendela oviteka ndeci vamue pokati kavo va linga; ndomo ca sonehiwa citi: “Omanu va tumãla oco va lie loku nyua. Noke va votoka oco va piluke lesanju.”+ 8 Ka tu ka lingi evĩho liukahonga* ndeci vamue pokati kavo va linga evĩho liukahonga* kuenje veteke limosi kua fa eci ci soka 23.000 komanu.+ 9 Ka tu ka seteki Yehova*+ ndeci vamue pokati kavo vo seteka okuti, va lumaniwa lolonyõha kuenje va fa.+ 10 Ka tu ka lisiõsiõli ndeci vamue pokati kavo va lisiõsiõla+ oco va kunduiwe lunyõli.+ 11 Ovina evi via kala ndelungulo kokuavo kuenje via sonehiwila oku tu longisa+ etu tu kasi kesulilo lioloneke vilo.*

12 Una o sima okuti wa kolapo, a lunguke sanga o kupuka.+ 13 Lalimue eyonjo lieya kokuene, te lina lia siata pokati komanu.+ Pole, Suku wa koleliwa kuenda ka ka ecelela okuti vu yonjiwa leci ka vu tẽla,+ puãi kumue leyonjo u muisivo evelo lioku puluka okuti, vu pandikisi lalio.+

14 Omo liaco, a vamanjange wa soliwi, tili efendelo lioviteka.+ 15 Ñasi oku popia la vakualondunge; ene muẽle sokololi eci nda popia. 16 Okopo yolopandu yina tua eca olopandu, ka ya tiamẽlele hẽ kosonde ya Kristu?+ Ombolo tua timbula, ka ya tiamẽlele hẽ ketimba lia Kristu?+ 17 Omo okuti kuli ombolo yimosi, etu ndaño tualua, tutimba limosi,+ momo vosi tu lia kombolo yimuamue.

18 Sokololi va Isareli. Omo lioku lia ocilumba calumbiwa kutala, eci ka ca kaile hẽ ndu okuti ovo va kala oku lia la Suku?+ 19 Nye ñasi oku popia? Anga eci ca lumbiwa kociteka oco cimue, ale ociteka caco oco cimue? 20 Sio; pole, mopia siti ovina vakualofeka va lumba, va vi lumba kolondele okuti ku Suku hakoko;+ kuenda si yongola okuti, vu likuata omunga lolondele.+ 21 Ko ka nyui kokopo ya Yehova* kuenda kokopo yolondele; ko ka li “komesa ya Yehova”*+ kuenda komesa yolondele. 22 Ale ‘tu kasi oku kokela Yehova* esepa’?+ Siti eye wa pama vali okuti, etu tu sule?

23 Ocihandeleko ci ngecelela oku linga ovina viosi, pole, haviosiko vi kuatisa. Ocihandeleko ci ngecelela oku linga ovina viosi, pole, haviosiko vi pamisa.+ 24 Omunu lomunu ka kamameko oku sanda olonjongole viaye muẽle, pole, te viomunu ukuavo.+

25 Li cosi ci landisiwa pocitanda cositu, ko ka lingi apulilo omo liowanji wutima wene, 26 momo “ongongo kuenda ovina viosi vi kasimo, via tiamẽla ku Yehova.”*+ 27 Nda umue okuti hukuetavoko wa ku laleki kuenje wa nõlipo oku enda, li cosi ca kapiwa kovaso yene, ko ka lingi apulilo omo liowanji wutima wene. 28 Pole, nda umue wa ku sapuili hoti, “Ositu eyi ya lumbiwa koviteka,” ko ka li omo lia una wa ku ci sapuili kuenda omo liowanji wutima.+ 29 Si ci popela omo liowanji wutima wene, te womunu ukuavo. Owanji wutima womunu ukuavo, u pisila nye elianjo liange?+ 30 Nda eci ndi lia ndi ci panduila, momo lie va ndi pisila omo lieci nda panduila?+

31 Omo liaco, nda vu lia, ale vu nyua, pamue vu linga ovina vikuavo, lingili ovina viosi ulamba wa Suku.+ 32 Amamiko oku yuvula oku kokela ocilondokua va Yudea, pamue va Helasi kuenda ekongelo lia Suku,+ 33 ndeci ame ñasi oku seteka oku sanjuisa omanu vosi kovina viosi, haloku sandako oku li sanjuisa ame muẽle,+ pole, te omanu valua oco va popeliwe.+

11 Lingi olosetukuli viange ndeci ame ndi setukuli ya Kristu.+

2 Ndi vu pandiyi omo vu njivaloka kovina viosi kuenda wa kakateli kolonumbi ndeci nda vi sapuila kokuene. 3 Pole, ndi yongola oco vu kũlĩhi okuti, utue wulume Kristu;+ kuenda utue wukãi ulume;+ kuenje utue wa Kristu Suku.+ 4 Ulume wosi o likutilila, ale imba owanji lutue wa futiwa, o sepuisa utue waye; 5 pole, ukãi wosi o likutilila, ale imba owanji+ lutue ka wa futiwile, o sepuisa utue waye, momo ci kasi ndukãi wa pemuiwa. 6 Momo, nda ukãi ka futi, o sukila oku pemũla esinga liaye; pole, nda ci kutisa osõi kukãi oku liteta esinga, ale esenya, eye o sukila oku futa.

7 Ulume ka ka fute kutue, momo eye esetahãlo lia Suku,+ haeye ulamba waye; pole, ukãi eye ulamba wulume. 8 Momo ulume kopiwile kukãi, pole, ukãi eye wopiwa kulume.+ 9 Handi vali, ulume ka lulikiwile mekonda liukãi, pole, ukãi eye wa lulikiwa mekonda liulume.+ 10 Eli olio esunga lieci ukãi a sukilila oku kuata ondimbukiso yepokolo kutue waye omo liovangelo.+

11 Haimo lumue, pokati kolondonge via Ñala, ukãi nda ka kaileko nda ka ca kaile ulume, ndaño ulume nda ka kaileko nda ka ca kaile ukãi. 12 Momo, ndeci ukãi wopiwa kulume,+ cimuamue haico, ulume weyilila omo liukãi; pole, ovina viosi via tunda ku Suku.+ 13 Ci sombisi ene muẽle: Ca sunguluka hẽ kukãi oku likutilila ku Suku okuti ka futile kutue? 14 Onjila ndomo omanu va lulikiwa ka yu ku longisi hẽ okuti, ulume oku kuata esinga lia lepa, cu sepuisa, 15 pole, nda ukãi o kuete esinga lia lepa ulamba kokuaye? Momo esinga liaco lio wĩhiwa oco li linge ndocifuto. 16 Omo liaco, nda umue o yongola oku tamalãla locituwa cimue cikuavo, etu ka tu kuete ocituwa cikuavo, ndaño akongelo a Suku ka a kuete.

17 Pole, osimbu ngeca olonumbi evi, siu pandiyi, momo oku liongolola kuene pamosi ku panga vali lavĩ okuti, oku panga ciwa hacoko. 18 Catete, njevite okuti eci ene vu liongolola vekongelo, pokati kene pali oku litepa; kuenje ame nda ci kolela. 19 Momo pokati kene pa ka kala oku litepa,+ oco omanu vana va taviwa la Suku va molẽhe pokati kene.

20 Eci vu liongoluila pamosi pocitumãlo cimue, ka vu ci lingila oco vu lie Ondalelo ya Ñala.+ 21 Momo eci vu lia ondalelo yaco, omunu lomunu o lia tete ondalelo yaye oco okuti, umue o kala onjala pole, ukuavo o kolua. 22 Anga hẽ ene ka vu kuete olonjo vioku lilamo kuenda oku nyuilamo? Ale wa tombi ekongelo lia Suku, loku kutisa osõi vana ka va kuete cimue? Nye ndi pondola oku popia kokuene? Ndi vu pandiyi hẽ? Kondaka eyi, si vu pandiyi.

23 Momo eci nda tambula ku Ñala oco nda ecavo kokuene okuti, Ñala Yesu kuteke+ a laikele oku pakuiwa, wa tikula ombolo, 24 noke yoku eca olopandu wa yi timbula, yu wa popia hati: “Eci ci lomboloka etimba liange,+ lina li eciwa oco li vu kuatisi. Ci lingaili onjivaluko yange.”+ 25 Cimuamue haico a linga lokopo,+ eci ovo va mala oku lia ondalelo wa popia hati: “Okopo eyi yi lomboloka ocisila cokaliye+ omo liosonde yange.+ Olonjanja viosi vu nyua okopo eyi, ci lingili onjivaluko yange.”+ 26 Momo olonjanja viosi vu lia ombolo eyi, loku nyua okopo eyi, vu amamako oku sapula oku fa kua Ñala, toke eci eya.

27 Kuenje wosi o lia ombolo, ale oku nyua okopo ya Ñala losiata, o ka kuata eko lietimba kuenda liosonde ya Ñala. 28 Tete omunu a kũlĩhĩse utima waye muẽle,+ oco a lia noke ombolo loku nyua kokopo. 29 Momo u o lia loku nyua nda ka limbuka etimba, o lia o nyua loku likokela eye muẽle esombiso. 30 Eli olio esunga lieci valua pokati kene va honguela kuenda va velela kuenje valua va kasi oku pekela kolofa.*+ 31 Puãi nda tua sokoluile kueci tua tuwa, nda tua yuvula oku sombisiwa. 32 Pole, eci tu sombisiwa, tu kasi oku pindisiwa la Yehova*+ oco okuti, ka tu pisiwila kumue loluali.+ 33 Omo liaco, a vamanjange eci vu liongolola oco vu lie ondalelo yaco, li talamẽli. 34 Nda umue o kuete onjala, a lie konjo yaye okuti, eci vu liongoluila pamosi ka vu sombisiwa.+ Pole, catiamẽla kovina vikuavo ndi ka vi sokiya eci ndiya.

12 Cilo a vamanji, catiamẽla kolongavelo via tunda ku Suku,+ si yongola okuti vu kala vonumbi. 2 Ene wa kũlĩhi okuti, eci wa kali vakualofeka,* wa yapuisiwi koku fendela oviteka ka vi popi,+ loku kuama kuosi viu songuili. 3 Kuenje ndi yongola oco vu kũlĩhi okuti, lomue poku vangula pocakati cespiritu lia Suku o popia hati: “Yesu wa siñaliwa!” kuenda lomue o popia hati: “Yesu eye Ñala!” te lika lespiritu sandu.+

4 Kuli olongavelo via litepa, pole, kuli espiritu limuamue;+ 5 kuenda kuli ovopange a litepa,+ pole, kuli Ñala umuamue; 6 kuli oku talavaya kuiñi kuiñi, pole, Suku una o talavayisa viosi vomanu vosi, umuamue.+ 7 Oku molẽhisua kuespiritu ku eciwa komunu lomunu locimãho coku kuatisa omanu vakuavo.+ 8 Umue ĩhiwa ongavelo yoku vangula* lolondunge omo liespiritu, ukuavo ongavelo yoku vangula lukũlĩhĩso lespiritu limuamue, 9 ukuavo ongavelo yekolelo+ lespiritu limuamue, handi ukuavo ongavelo yoku sakula+ lespiritu liaco limuamue, 10 handi ukuavo, oku linga ovilimbu,+ ukuavo oku imba owanji, ukuavo uloño woku limbuka nda ondaka yimue ya tunda ku Suku ale sio,+ ukuavo oku vangula alimi a litepa+ kuenda ukuavo oku pitiya kalimi aiñi aiñi.+ 11 Pole, olongavelo viosi evi, via eciwa lespiritu limuamue, via aviwila komunu lomunu ndeci olio lia panga.

12 Ndeci etimba limosi li kuete ovimatamata vialua kuenda ovimatamata viosi vietimba liaco ndaño vialua, pole, vi linga etimba limosi,+ haicovo Kristu. 13 Momo vosi yetu tua papatisiwa lespiritu limuamue oco tu kale vetimba limuamue, ci kaile va Yudea ale va Helasi, ci kaile apika ale vana va yovoka kuenda vosi tua tambula espiritu limuamue.

14 Omo etimba hacimatamatako cimosi, pole, vialua.+ 15 Nda omãhi ya popele yiti, “Omo okuti hameko eka, sia tiamẽlele ketimba,” eci ka ci kokisa okuti olio ka li tiamẽla ketimba. 16 Nda etũi lia popele liti, “Omo okuti hameko iso, sia tiamẽlele ketimba,” eci ka ci kokisa okuti olio ka li tiamẽla ketimba. 17 Nda etimba liosi lia kaile iso, oku yeva nda kua kala pi? Nda etimba liosi lia kaile oku yeva, oku lehũla nda kua kala pi? 18 Pole, Suku wa sokiya ocimatamata locimatamata cetimba ndomo eye a panga.

19 Nda viosi via kaile ocimatamata cimuamue, etimba nda lia kala pi? 20 Pole, ndaño okuti ovio ovimatamata vialua, lopo etimba limosi. 21 Ka citava iso oku popia leka hati, “Siu ku sukila,” ale utue ka citava oku popia lolomãhi hati, “Siu ku sukili.” 22 Pole, ndaño muẽle ovimatamata vietimba vina vi molẽha ndu okuti via hongua, vi sukiliwa, 23 kuenda olonepa vietimba vina tu sima okuti vi sule kesumbilo, ovio tu sumbila vali,+ levi ka via posokele, ovio vi sumbiwa calua, 24 osimbu okuti, ovimatamata via posoka, ka vi sukila esumbilo liaco. Puãi Suku wa sokiya etimba okuti, ocimatamata cina ka ca sumbiwile, ci sumbiwa vali enene, 25 oco okuti ketimba ka ku kala oku litepa, pole, ovimatamata viaco vi sukila oku likapako.+ 26 Nda ocimatamata cimosi ci tala ohali, ovimatamata viosi vikuavo vi talela ohali kumosi laco;+ ale nda ocimatamata cimue ci pandiyiwa, ovimatamata viosi vikuavo vi yolela kumosi laco.+

27 Ocili, ene wutimba lia Kristu+ kuenda omunu lomunu pokati kene ocimatamata cetimba liaco.+ 28 Suku wa nõla ovimatamata vialua vekongelo ndeci: tete, ovapostolo;+ vali, ovaprofeto;+ tatu, alongisi;+ noke ovilimbu;+ olongavelo vioku sakula;+ ovopange oku kuatisa; uloño woku songola;+ kuenda oku vangula alimi a litepa.+ 29 Anga hẽ vosi ovapostolo? Vosi ovaprofeto? Vosi alongisi? Vosi va linga ovilimbu? 30 Anga hẽ vosi va kuete ongavelo yoku sakula? Vosi va vangula alimi a litepa?+ Vosi vakuakupitiya* kalimi?+ 31 Pole, amamiko oku likolisilako* oku sanda olongavelo via velapo.+ Kuenje handi ndi ka vu lekisi onjila ya velapo vali.+

13 Nda ndi vangula alimi omanu la-a ovangelo pole, si kuete ocisola, nda linga ndocivela ci ñoña ale osimbalu yi yokoya. 2 Nda ndi kuete ongavelo yoku imba owanji kuenda ndi kuete elomboloko lialumbu osi a kola, lukũlĩhĩso wosi,+ pamue ñuete ekolelo liosi okuti, ndi sondolola olomunda, pole, si kuete ocisola, si cimueko.*+ 3 Nda ndi landisa ovina viange viosi ndi kuete oco ndi tekule olosuke+ kuenda nda ngeca etimba liange okuti, ndi lipanda, pole, si kuete ocisola,+ ka ci ñuatisa.

4 Ocisola+ ci pandikisa+ kuenda ci lingainga uwa.+ Ocisola ka ci kuete onya.+ Ka ci lipandiya kuenda ka ci litunula,+ 5 ka ci lingi akutisasõi,*+ ka ci sandi ovina vialio muẽle,+ ka ci temi lonjanga.+ Ka ci amamako oku patekela onyeño.+ 6 Ka ci yolela ekambo liesunga,+ pole, ci yolaila locili. 7 Cecaila ovina viosi,+ ci kolela ovina viosi,+ ci lavoka ovina viosi,+ ci pandakaisa kovina viosi.+

8 Ocisola lalimue eteke ci tokoka. Pole, nda kuli olongavelo vioku imba owanji, vi ka sulila; nda kuli alimi,* a ka imũha; nda kuli ukũlĩhĩso u ka sulila. 9 Momo ukũlĩhĩso tu kuete ka wa suilepo+ kuenda tu imba owanji ka wa suilepo, 10 pole, eci kuiya eci ca suapo, cina ka ca suilepo ci ka sulila. 11 Eci nda kala omõla, nda vangola ndomõla, nda simaile ndomõla, nda enda oku sokolola ndomõla; pole, cilo omo nda linga ukulu, nda siapo ovina vi lingiwa lomõla. 12 Momo cilo ka tu lete ciwa* ci kasi ndu okuti tu kasi oku vanja volumuĩlo wutale, pole, noke tu ka vanja ciwa. Cilo sia kũlĩhĩle ciwa, pole, noke ndi ka kũlĩha ciwa, ndeci Suku a ndi kũlĩha ciwa. 13 Pole, cilo ovina vitatu vi amamako vievi: ekolelo, elavoko, ocisola; puãi pokati kavio ocisola oco ca velapo.+

14 Amamiko oku lekisa ocisola kuenda likolisiliko* oku kuata olongavelo vi tunda ku Suku, ca piãla enene koku imba owanji.+ 2 Momo una o vangula alimi a litepa, ka popi lomanu, te la Suku, momo lomue u yeva,+ pole, eye o vangula elumbu li kola+ lekuatiso liespiritu lia Suku. 3 Pole, una imba owanji, o pamisa, o vetiya kuenda o lembeleka omanu lolondaka viaye. 4 Una o vangula alimi a litepa, o li pamisa eye muẽle, puãi una imba owanji, o pamisa ekongelo. 5 Nda yonguile okuti ene vosi vu vangula alimi a litepa,+ pole, kokuange hĩse nda wimbi owanji.+ Ocili, una imba owanji wa velapo okuti, una o vangula alimi a litepa ci sule, te nda eye o pitiya* oco ekongelo li pamisiwe. 6 Puãi cilo, a vamanji, nda ndiya kokuene loku vangula alimi a litepa, ndu ku kuatisi ndati nda siu wĩhi esituluilo,+ ale ukũlĩhĩso,+ ocitumasuku cimue, pamue elongiso limue?

7 Eci ci sokisiwa lovina ka vi kuete omuenyo pole, vi eca ocileñi ndeci, olombendo ale ohalupa. Nda ka vi sikiwa lonjila yi likuata, eci ci kasi oku sikiwa lolumbendo ale lohalupa ci limbukiwa ndati? 8 Momo nda olumbeta ka lu eci ocileñi ci limbukiwa, u o limalẽhela uyaki helie? 9 Cimuamue haico, nda ene ka vu vangula elimi li lomboloka lonjanga, omanu va ka kuata ndati elomboloko lieci ci kasi oku popiwa? Vu ka vanguila ño vofela. 10 Citava okuti voluali muli alimi alua a litepa, pole, ka mu kambi elimi limue okuti ka li lomboloka. 11 Momo nda elimi limue ka li ndomboloka, ndi kala ndocingendeleyi ku una o vangula elimi liaco kuenda una o vangula o ka linga ndocingendeleyi kokuange. 12 Cimuamue haico lene, omo okuti vu kasivo lombili yoku kuata olongavelo viespiritu, likolisiliko oku sanda olongavelo vialua vi ka pamisa ekongelo.+

13 Kuenje u o popia elimi limue liñi a likutilile okuti, o tẽla oku li pitiya.*+ 14 Momo nda ndi likutilila kelimi likuavo, ongavelo yespiritu nda tambula oyo yi kasi oku likutilila, pole, si kuata elomboloko vutima. 15 Oco hẽ, nye ci lingiwa? Ndi ka likutilila longavelo yespiritu, pole, ndi ka likutililavo lutima wange. Ndi ka imba ovisungo longavelo yespiritu, pole, ndi ka imbavo ovisungo lutima wange. 16 Handi vali, nda ove weca esivayo longavelo yespiritu, omunu waño o kasi pokati kene o popia ndati hati, “Amene” kolopandu viove, nda eye ka kũlĩhĩle eci o kasi oku popia? 17 Ocili, ove o kasi oku eca olopandu lonjila yiwa, pole, omunu ukuavo ka kasi oku pamisiwa. 18 Ndi pandula Suku omo mbangula alimi alua okuti, ene vosi vu sule. 19 Pole, vekongelo limue, kokuange ca velapo oku vangula olondaka vitãlo lutima wange* oco ndi longisevo vakuetu okuti, oku longisa lekũi liolohulukãi kolondaka kelimi limue ci sule.+

20 A vamanji, ko ka sokololi ndomãla,+ kevĩho lingi ndomãla;+ puãi koku sokolola lingi ndakulu.+ 21 Vocihandeleko mua sonehiwa okuti: “‘Ndi ka vetiya omanu va vangula alimi a litepa kuenda ovingendeleyi oco va vangule lomanu ava, pole, lopo ka va ka ndi yeva,’ oco Yehova* a popia.”+ 22 Puãi alimi halondimbukisoko kuava va tava, te kuava ka va tavele,+ osimbu okuti ocitumasuku hacavanako ka va tavele, pole, ca vana va tava. 23 Nda ekongelo liosi lia liongoluila pamosi kuenda vosi va vangula alimi a litepa kuenje mu iñila omanu vaño, ale vana ka va tavele, ka va ka popia hẽ okuti wa lingi ayui? 24 Pole, nda vosi yene vu kasi oku imba owanji kuenje mu iñila omunu waño, ale umue ka tavele, eye o ka lemẽliwa kuenda o konomuisiwa la vosi. 25 Alumbu utima waye a situluiwa oco eye a ka wile posi loku fendela Suku, poku popia hati: “Suku o kasi muẽle pokati kene.”+

26 A vamanji nye ci lingiwa? Eci vu liongoluili pamosi umue o tukula osamo, ukuavo o longisa, ukuavo o tukula esituluilo a mola, ukuavo o vangula elimi liofeka yikuavo kuenda ukuavo o pitiya eci ca popiwa.+ Ovina viosi vi lingiwile oku kolisa. 27 Nda umue o vangula elimi likuavo, a ci linge lika lomanu vavali ale vatatu kuenje omunu lomunu lonjanja yaye kuenda ku kale umue o pitiya.*+ 28 Nda ka pali umue o pitiya,* eye amameko okuti ka vangula vekongelo kuenje a vangule lika liaye kuenda la Suku. 29 Ovaprofeto vavali ale vatatu+ va vangule kuenje vakuavo va kũlĩhĩse elomboloko liaco. 30 Pole, nda umue wa tumãla pokati kavo wa tambula esituluilo limue, u wa kala oku vangula tete a liwekepo. 31 Momo vosi yene vu pondola oku imba owanji omunu lomunu lonjanja yaye okuti, vosi va lilongisa kuenda vosi va pamisiwa.+ 32 Ovaprofeto va sukila oku lava onjila ndomo va talavaya longavelo yespiritu. 33 Momo Suku hayeko Suku yombuanja, pole, yombembua.+

Ndeci ci kasi vakongelo osi olosandu, 34 akãi vamameko oku ũha vakongelo, ka citava okuti va vangula.+ Pole, va pokole+ ndeci ci popia Ocihandeleko. 35 Nda va yongola oku lilongisa cimue, va pule alume vavo konjo, momo ci lingisa osõi ukãi oku vangula vekongelo.

36 Anga hẽ ondaka ya Suku ya tunda kokuene? Ale, ya eciwa lika kokuene?

37 Nda umue o sima okuti uprofeto, ale wa tambula ongavelo yespiritu, a limbuke okuti ovina ñasi oku vu soneheli ocihandeleko ca Ñala. 38 Pole, nda umue ka kapeleko ocihandeleko eci, eye ka ka kapiwako.* 39 Omo liaco, a vamanjange, likolisiliko oku imba owanji+ kuenda ko ka tateki laumue oku vangula alimi a litepa.+ 40 Pole, ovina viosi vi sokiyiwe ciwa loku lingiwa lesumbilo.*+

15 A vamanji, cilo ndu wivaluisi olondaka viwa ndo sapuili+ haivio wa tavi vina okuti, vu kasivo oku amamako oku vi kuama. 2 Nda wamamiko oku kakatela kekolelo liene kolondaka viwa vina ndo sapuili, ene vu kasi oku popeliwa. Pole, nda hacoko oku tava kuene ka ku silivila.

3 Momo pokati kovina viatete ndo wĩhi okuti nda ci tambulavo, ceci okuti Kristu wa fila akandu etu ndomo ci likuata Lovisonehua;+ 4 okuti wa kendiwa,+ noke wa pinduiwa+ keteke liatatu+ ndomo ci likuata Lovisonehua;+ 5 kuenje wa molẽha ku Kefa*+ kuenda Kekũi la Vivali kovapostolo.+ 6 Noke vonjanja yimosi wa molẽha kueci ci pitahãla 500 ya vamanji+ okuti, valua pokati kavo handi va kasi letu, ndaño vamue va pekela ale kolofa. 7 Noke wa molẽha ku Tiago,+ noke kovapostolo vosi.+ 8 Pole, oku sulako, wa molẽhavo kokuange+ ndu okuti komõla wa citiwa osimbu otembo yaco ka ya pitĩlile.

9 Ame ndi sule koku velapo pokati kovapostolo kuenda si sesamẽla oku tukuiwa upostolo, momo nda lambalalele ekongelo lia Suku.+ 10 Pole, ñuete ocikele caco omo liohenda ya piãla ya Suku. Ohenda yaye ya piãla kokuange ka ya kaile yolivova, momo nda linga upange walua okuti, ovo ci sule; pole, hameko te ohenda ya piãla ya Suku yi kasi lame. 11 Omo liaco, ci kaile ame, ci kaile ovo, tua kunda lonjila eyi kuenda lonjila eyi ene wa tavi.

12 Nda ku kasi oku kundiwa okuti, Kristu wa pinduiwa kuava va fa,+ ndamupi vamue pokati kene va popia vati, ka kuli epinduko liava va fa? 13 Nda ocili okuti ka kuli epinduko liava va fa, oco puãi Kristu ka pinduiwile. 14 Nda Kristu ka pinduiwile, oku kunda kuetu kuolivova kuenda ekolelo liene laliovo liolivova. 15 Handi vali, nda oco, tua lingavo olombangi via Suku viuhembi,+ momo tu imbila Suku uvangi poku popia okuti eye wa pindula Kristu,+ una eye ka pinduile nda ocili muẽle okuti, ava va fa ka va ka pinduiwa. 16 Momo nda ava va fa ka va ka pinduiwa, ndaño Kristu ka pinduiwile. 17 Nda Kristu ka pinduiwile, ekolelo liene ka li kuete esilivilo; kuenje vu amamako vakandu ene.+ 18 Handi vali, vana va pekela kolofa vomunga kumue la Kristu va nyõleha.+ 19 Nda tu lavoka Kristu vomuenyo ulo lika, etu tu sesamẽla oku tu kuatela vali ohenda okuti, omunu ukuavo ci sule.

20 Pole, cilo Kristu wa pinduiwa kuava va fa, haeye epako liatete kuava va pekela kolofa.+ 21 Momo ndeci oku fa kueya omo liomunu umosi,+ epinduko liava va fa, lieyavo omo liomunu umosi.+ 22 Ndeci ku Adama vosi va fa,+ vosi va ka muilavo omuenyo vu Kristu.+ 23 Pole, omunu lomunu lepuluvi liaye: Kristu epako liatete,+ noke vana va tiamẽla ku Kristu vokuenda kuetukuluko liaye.+ 24 Noke esulilo, eci eye a eca Usoma ku Suku yaye haeye Isia pana okuti, wa kundula ovoviali osi kuenda vana va kuete unene.+ 25 Momo eye o sukila oku viala ndosoma toke eci Suku a kapa ovanyãli vosi vemẽhi liolomãhi viaye.+ 26 Kuenje unyãli o sulako oku kunduiwa, kufa.+ 27 Momo Suku wa “pokuisa ovina viosi vemẽhi liolomãhi viaye.”+ Pole, eci eye a popia okuti ‘ovina viosi via pokuisua,’+ ci lekisa okuti ka mua kongelele Una wa pokuisa ovina viosi vokuaye.+ 28 Pole, eci ovina viosi vi pokuisua kokuaye, Omõla layevo o ka pokola ku Una wo pokuisa ovina viosi+ oco okuti, Suku o kala utue wovina viosi komanu vosi.+

29 Nda vana va fa ka va ka pinduiwa, nye ci ka pita la vana va kasi oku papatisiwa locimãho coku fa?+ Momo lie va kasilili oku papatisiwa locimãho caco? 30 Momo lie tu kasilili kohele olowola viosi?*+ 31 Eteke leteke ndi liyaka loku fa. Eci ocili muẽle ndeci esanju ndu kueteli a vamanji vu Kristu Yesu Ñala yetu. 32 Ndaño ame nda yaka lovinyama via tema ko Efeso+ ndomanu vakuavo,* nda ca ñuatisa ndati? Nda ava va fa ka va ka pinduiwa, “tu li, tu nyui, momo hẽla tu fa.”+ 33 Ko ka kembiwi. Akamba vãvi va nyõla ovituwa viwa.+ 34 Kuati olondunge viesunga kuenda ko ka lingi ekandu, momo vamue ka va kuete ukũlĩhĩso wa Suku. Ndi ci popela oku vu kutisi osõi.

35 Umue puãi o pula hati: “Ava va fa va ka pinduiwa ndati? Ocili, etimba lipi va ka pinduiwa lalio?”+ 36 Ove wuveke! Eci o kũla tete ci fa, noke ci kula.* 37 Kuenje eci o kũla, hetimbako okuti li kula, pole, olumema luaño, ci kaile luotiliku ale luombuto yikuavo; 38 puãi Suku eca etimba ndeci a panga kuenda eca kombuto lombuto etimba liayo. 39 Olositu haviosiko via lisoka, pole kuli ositu yomanu, yikuavo ositu yolongombe, yikuavo yolonjila, yikuavo yolõsi. 40 Kuli atimba o kilu+ kuenda atimba o posi;+ pole, ulamba watimba o kilu a litepa kuenda ulamba watimba o posi a litepavo. 41 Ulamba wekumbi wiñi, ulamba wosãi wiñi+ kuenda ulamba wolombungululu wiñi; ocili okuti, olumbungululu lolumbungululu lua litepa kulamba.

42 Cimuamue haico ci ka pita la vana va pinduiwa. Etimba li fa, li futa, pole, etimba li pinduiwa, ka li futi.+ 43 Olio li kũliwa lesepu, pole li pinduiwa lulamba.+ Olio li kũliwa okuti lia hongua, pole li pinduiwa longusu.+ 44 Olio li kũliwa etimba liositu; pole li pinduiwa etimba liespiritu. Nda kuli etimba liositu, kulivo etimba liespiritu. 45 Kuenje ca sonehiwa citi: “Ulume watete Adama wa linga omunu ukuamuenyo.”+ Adama wa sulako wa linga espiritu li muisa omuenyo.+ 46 Pole, eci cespiritu hacoko ciya tete. Eci cetimba oco tete, noke kuiya eci cespiritu. 47 Omunu watete wa tunda posi kuenda wa pangiwa loneketela;+ omunu wavali wa tunda kilu.+ 48 Ndeci ca tuwa omunu wa pangiwa loneketela, haico ca tuwavo vana va pangiwa loneketela; kuenda ndeci ca tuwa ukuailu, haico ca tuwavo vakuailu.+ 49 Omo okuti tua setahãla omunu Suku a panga loneketela,+ cimuamue haico okuti tu ka kala ndomunu wa enda kilu.+

50 Pole, a vamanji, eci ndu sapuili ceci okuti, ositu losonde ka vi piñala Usoma wa Suku, ndaño ceci ci futa ka ci piñala eci ka ci futi. 51 Tali! ndu sapuili elumbu limue li kola: Havosiko tu ka pekela kolofa, puãi vosi tu ka pongoluiwa,+ 52 vocipikipiki, voku pakula* kuiso vokuenda kuoku sikiwa kuolumbeta lua sulako. Momo olumbeta lu ka sika+ kuenda ava va fa, va ka pinduiwa okuti ka va futi kuenje tu ka pongoluiwa. 53 Momo una o futa o pongoluiwa oco a kale una ka futi+ kuenda una o fa o pongoluiwa oco a kale una ka fi.+ 54 Pole, eci una o futa a pongoluiwa oco a kale una ka futi kuenda eci una o fa a pongoluiwa oco a kale una ka fi, ku ka tẽlisiwa eci ca sonehiwa citi: “Oku fa kua maliwako otembo ka yi pui.”+ 55 “A kufa, oku yula kuove ku kasi pi? A Kufa una o koka evalo lialua, unene wove u kasi pi?”+ 56 Unene u koka oku fa,+ ekandu kuenda Ocihandeleko ceca kekandu unene walio.+ 57 Pole, olopandu vi eciwe ku Suku, momo eye o tu ĩha eyulo pocakati ca Ñala yetu Yesu Kristu!+

58 Kuenje a vamanjange wa soliwi, kali vakuepandi,+ loku pama, olonjanja viosi lingi vakuambili+ kupange wa Ñala, loku kũlĩha okuti upange vu lingi vu Ñala, hawolivovako.+

16 Catiamẽla koku kongola olombongo vioku kuatisa olosandu,+ kuami olonumbi nda eca kakongelo o ko Galatia. 2 Osemana losemana keteke liatete, omunu lomunu pokati kene a seleke cimue ci lisoka lepondolo liaye oco okuti, eci njiya ka ku vetiyiwa vali oku kongola. 3 Pole, eci ndi pitĩla oko, ndi ka tuma alume wa nõli vovikanda viene,+ oco vambate ombanjaile yene yocisola ko Yerusalãi. 4 Handi vali, nda ca sunguluka kokuange oku endavo oko, ndi ka enda kumue lavo.

5 Pole, eci ndi tunda ko Makedonia ndi keya kokuene oku vu nyuli, momo ndi ka pita ko Makedonia;+ 6 pamue citava okuti, ndi kala ale ndi pita otembo yombambi lene oco okuti, vu ndi sindikila kungende wange. 7 Si yongola oku vu moli poku pita ño ombamba, momo ndi lavoka oku pita otembo yimue lene+ nda Yehova* wa panga. 8 Pole, ndi kala vo Efeso+ toke Kocipito co Pendekoste, 9 momo kua njulukila epuluvi linene* lioku linga upange walua,+ pole, kuli ovanyãli valua.

10 Nda Timoteo+ wa pitĩla, kũlĩhĩsi okuti eye ka kuatela cimue ohele osimbu a kasi pokati kene, momo o kasi oku linga upange wa Yehova*+ ndeci ame. 11 Omo liaco, lomue ka ko tombe. U sindikili vonjila yaye lombembua oco okuti, eye iya kokuange, momo ñasi oku u lavoka kumue la vamanji vakuavo.

12 Catiamẽla ku manjetu Apolosi,+ ndo livondela calua oco a vu nyũli kumue la vamanji vakuavo. Puãi ka ca kaile ocipango caye oku enda cilo, pole, eye o ka enda eci a kuata epuluvi.

13 Lavululi,+ pami vekolelo,+ kuati utõi+ kuenda talami ngõ.+ 14 Ovina viosi vu linga, vi lingi locisola.+

15 Cilo a vamanji, ndu handeleki: Wa kũlĩhi okuti vakuanjo ya Stefana ovo olondonge viatete* ko Akaya kuenda ovo va li eca olumue koku kuatisa olosandu. 16 Ene vu sukilavo oku amamako oku pokola komanu va soka ndava kuenda oku pokola ku vosi va kuatisa haivo va talavaya calua.+ 17 Pole, nda sanjukila oku iya kua Stefana,+ kua Fortunato kuenda Akaiko, momo ovo va ñuatisa calua osimbu ka wa kali kulo. 18 Momo ovo va kavuluisa utima* wange lowu wene. Omo liaco, sumbili alume va soka ndava.

19 Akongelo o ko Asia vo tumisi ovilamo. Akuila la Priska kumue lekongelo li liongoluila konjo yavo+ vo lamisipo locisola vu Ñala. 20 Vamanji vosi vo lamipo. Li lami pokati lesipulo li kola.

21 Ame ndi Paulu, ndi tuma ovilamo nda soneha leka liange muẽle.

22 Nda umue ka sole Ñala, a siñaliwe. A Ñala yetu, enju! 23 Ohenda ya piãla ya Ñala Yesu yi kale lene. 24 Ocisola cange ci kale lene vosi vu kasi vomunga kumue la Kristu Yesu.