YONA
1 Ondaka ya Yehova yeya ku Yona*+ omõla a Amitai, yiti: 2 “Votoka kuende volupale lunene luo Ninivei,+ ka sapule esombiso liayo momo, nda yeva evĩho liayo.”
3 Yona puãi wa limba vonjila oku loña ko Tarsisi oco a tile Yehova; wa lokila ko Yopa kuenje wa sanga onaviyu yenda ko Tarsisi. Wa feta opasasi, kuenje wa londa, yu wa enda la vakuanaviyu ko Tarsisi oco a tile Yehova.
4 Yehova wa tuma ofela yimue yonupi vokalunga kuenje vokalunga mueya ehunguhungu linene okuti, onaviyu ya puluka oku nyõleha. 5 Noke vakuanaviyu va kuata usumba walua kuenda omunu lomunu wa pinga ekuatiso ku suku yaye. Kuenje va imba vokalunga ovikuata via kala vonaviyu, oco va tepulule ocilemo cayo.+ Pole, Yona wa enda vokati konaviyu* kuenje wa pekela otulo tualua. 6 Usongui wonaviyu wa amela kokuaye loku u pula hati: “Momo lie wa pekelela? Votoka, likutilila ku suku yove! Pamue Suku yocili o tu kuatela ohenda kuenje ka tu nyõleha.”+
7 Kuenje ovo va livangula pokati vati: “Enjui, tu imbi ocela,+ oco tu kũlĩhe u o kasi oku tu kokela ohali yosi eyi.” Omo liaco, va imba ocela kuenda ca veta Yona.+ 8 Vo pula vati: “Tu sapuileko, helie o kasi oku tu kokela ohali yosi eyi? Upange wove we kuenda pi wa tunda? Kofeka yove pi kuenda wa tiamẽla kepata lipi?”
9 Eye wa tambulula hati: “Ndu Heveru, nda sumbila* Yehova, Suku yovailu, Una wa lulika okalunga longongo.”
10 Kuenje alume vaco va kuata vali usumba walua, yu vo pula vati: “Nye wa linga?” (Alume va limbuka okuti eye wa kala oku tila Yehova, momo wa va ci sapuila.) 11 Vo pula vali vati: “Nye tu linga love oco okalunga ka tulumũhe?” Momo ehunguhungu vokalunga lia kala oku amamako oku livokiya. 12 Eye hati: “Njeluli kuenda njimbi vokalunga, oco ka tulumũhe; momo nda kũlĩha okuti, ame ñuete eko omo liehunguhungu liaco.” 13 Omo liaco, alume va likolisilako oku tapula oco va tuale onaviyu kongongo, pole, ka va ci tẽlele omo ehunguhungu vokalunga lia kala oku livokiya calua konele yavo.
14 Noke va vilikiya Yehova vati: “A Yehova, ku ka ecelele okuti tu nyõleha omo liulume u-u! Ku ka tu kape ekandu mekonda liosonde yulume u-u okuti ka kuete eko, momo ove A Yehova, wa linga ndeci wa panga.” 15 Va yelula Yona vo wimba vokalunga; kuenje okalunga ka tulumũha. 16 Alume vaco va kuatela Yehova+ usumba walua kuenje va eca ocilumba ku Yehova loku linga olohuminyo.
17 Yehova wa tuma ombisi yimue yinene oco yine Yona kuenje eye wa kala vimo liombisi ovotanya atatu lovoteke atatu.+
2 Osimbu Yona a kala vimo liombisi, wa likutilila ku Yehova Suku yaye,+ 2 loku popia hati:
“Eci nda tala ohali nda vilikiya Yehova kuenje eye wa nambulula.+
Nda pinga ekuatiso valondo* Onjembo.*+
Ove wa yeva ondaka yange.
3 Ove wa njimba valondo okalunga,
Andunde ovava a ndina.+
Akimba anene a ndi koka.+
4 Kuenje nda popia hati ‘Nda tundisiwa kovaso ove!
Mbanja vali ndati onembele yove yi kola?’
5 Ovava a ndina kuenda omuenyo wange wa kala kohele;+
Nda ñualiwile lovava alua.
Ovikũla vio vokalunga via litanga tanga vutue wange.
6 Nda vomba toke kosi yolomunda.
Olombundi viongongo via kala oku ndi yikilako otembo ka yi pui.
A Yehova a Suku yange, wopa omuenyo wange veleva.+
7 Eci omuenyo wange wa kala oku sulila, Yehova Eye lika nda ivaluka.+
Ohutililo yange ya pitĩla kokuove, konembele yove yi kola.+
8 Vana va litumbika koku fendela oviteka ka vi kuete esilivilo, va siapo ono yavo yocisola ka ci pongoloka.
9 Ame puãi, ngeca ocilumba colopandu kokuove.
Ndi tẽlisa eci nda likuminya.+
Eyovo li tunda ku Yehova.”+
10 Yehova wa handeleka ombisi kuenje ya sanjela Yona kongongo.
3 Ondaka ya Yehova yeya ku Yona onjanja yavali yiti:+ 2 “Votoka kuende ko Ninivei+ olupale lunene, ka sandeke esapulo nda ku handeleka.”
3 Kuenje Yona wa votoka, yu wa enda ko Ninivei+ ndomo Yehova a popia.+ O Ninivei ya kala olupale* lumue lunene okuti, oku lu enda oloneke vitatu. 4 Noke Yona wa iñila volupale kuenje wa enda eci ci soka eteke, loku sapula hati: “Pa kamba lika oloneke 40 kuenje o Ninivei yi ka nyõliwa.”
5 Kuenje va Ninivei va tava ku Suku+ kuenda va li handeleka okuti lomue o lia, pole, vosi va wala ovikelẽyi oku upisa ku wa velapo toke ku o sule. 6 Eci esapulo liaco lia pitĩla ku soma yo Ninivei, eye wa votoka kocalo caye, wa lula uwalo waye wusoma kuenje wa wala ocikelẽyi loku tumãla vetiko. 7 Handi vali, soma wa eca esapulo vo Ninivei yosi liokuti,
“Ca handeleka soma kumue lolombuale viaye ceci: Ndaño omanu, ale ovinyama ndeci olongombe, pamue olomeme, ka va ka lie cimue. Ka citava oku lia, ndaño oku nyua ovava. 8 Omanu kumue lovinyama va wale ovikelẽyi; va vilikiye Suku lutima wosi kuenda omunu lomunu a tinduke kevĩho liaye lungangala waye. 9 Helie wa kũlĩha nda Suku yocili o litiukamo koku linga eci a yonguile kuenje o liwekapo oku lekisa onyeño yaye yalua oco tu puluke kenyõleho?”
10 Eci Suku yocili a limbuka okuti va pongoloka kuenda va tinduka kevĩho liavo,+ wa litiukamo oku va nenela eyambulo a sokiyile kuenje ka li nenele vali.+
4 Ondaka yaco ka ya sanjuisile Yona kuenje wa tema calua. 2 Eye wa likutilila ku Yehova hati: “A Yehova siti eli olio lia kala esakalalo liange osimbu nda kala kofeka yange? Eli olio esunga lieci nda yayuilako oku tilila ko Tarsisi;+ momo nda kũlĩha okuti, ove wu Suku yimue ukuacikembe haive ukuahenda, o livala konyeño kuenda ukuacisola calua haico ka ci pongoloka,+ haive ku sanjukila ohali. 3 Cilo, A Yehova, njupe omuenyo wange, momo ca mbelapo oku fa okuti, oku kala lomuenyo ci sule.”+
4 Yehova wo pula hati: “O kuete hẽ esunga lioku tema?”
5 Yona wa tunda volupale kuenje wa tumãla konele yutundilo wolupale. Eye wa tunga osinge kuenda wa tumãla pulembo waco loku lavulula eci ca laikele oku pita lolupale.+ 6 Kuenje Yehova Suku wa kulisa olungu* oco luece ulembo kutue wa Yona okuti, ohali yaye yi tepuluka. Yona wa sanjukila calua olungu.
7 Pole, eci kua ca komẽle, Suku yocili wa tuma epuka kuenje lia teta olungu luaco kuenda lua kukuta. 8 Eci utanya wa fetika oku tua, Suku wa tuma ofela lowuya walua kutundilo kuenje utanya wa tuila kutue wa Yona, yu wa puluka oku ambuka. Noke wa livela lutima waye oco a fe, loku popia hati, “Ca mbelapo oku fa okuti, oku kala lomuenyo ci sule.”+
9 Suku wa pula Yona hati: “O kuete hẽ esunga lioku tema calua omo liolungu?”+
Eye wa tambulula hati: “Ndi kuete esunga lioku tema, ndaño oku livela oku fa.” 10 Pole, Yehova wa popia hati: “Ove wa kuatela ohenda olungu kua kũlile, ndaño oku u kulisa; owo wa kula vuteke umosi kuenda wa kukuta vuteke umosi. 11 Oco hẽ, si kuatelavo ohenda olupale lunene luo Ninivei+ okuti, muli ci pitahãla 120.000 komanu haivo ka va tẽla oku tepisa pokati keci ciwa leci cĩvi,* oku kongelamo ovinyama viavo vialua?”+
Ci lomboloka “Opomba.”
Ale “ombaluku ya posuisiwa.”
Ale “oku fendela.”
Lit., “imo.”
Okuti, “Ocitumãlo mu kendiwa omanu va fa.”
Lit., “olupale lumue lunene ku Suku.”
Ale pamue, “uti wolomõlo.”
Ale “oku limbuka okuokuo kuavo kuondio lokuokuo kuavo kuepĩli.”