ELIVULU LIAVALI LIOLOSOMA
1 Noke liolofa via Ahava, va Moavi+ va ñualelapo va Isareli.
2 Eci Ahasiya a kupukila vocitunu ca ñualiwile lavaya vohondo yosapalalo yonjo yaye ko Samaria, wa li lemẽha. Kuenje eye wa tuma olomunga loku vi sapuila hati: “Kuendi, ka pulisi Baale-Sevuvu, osuku yo ko Ekirone+ oco ndi kũlĩhe nda ndi kaya.”+ 3 Pole, ungelo wa Yehova wa sapuila Eliya*+ u Tisibi hati: “Votoka, kuende ka lisange lolomunga via soma yo ko Samaria kuenda vi sapuila hati: ‘Anga hẽ ka kuli Suku ko Isareli oco vu ka pulisi Baale-Sevuvu, osuku yo ko Ekirone?+ 4 Omo liaco, ca popia Yehova ceci hati: “Pula wa pekela, ku tundipo vali, momo o ka fa muẽle.”’” Kuenje Eliya wa enda.
5 Eci olomunga via tiukila ku Ahasiya, eye wa vi pula hati: “Momo lie wa tiukili?” 6 Ovio vio tambulula vati: “Kua kala ulume wa lisanga letu kuenda wa tu sapuila hati, ‘Kuendi, tiukili ku soma wa ku tumi, u sapuili hati, “Ca popia Yehova ceci hati: ‘Anga hẽ ka kuli Suku ko Isareli oco o tume oku pulisa Baale-Sevuvu, osuku yo ko Ekirone? Omo liaco, pula wa pekela, ku tundipo vali, momo o ka fa muẽle.’”’”+ 7 Eye wa vi pula hati: “Ulume waco wa lisanga lene loku vu sapuili olondaka evi, o kasi ndati?” 8 Ovio vio sapuila vati: “Ulume waco wa walele uwalo wovonya+ kuenda wa itika uvia wocipa vombunda yaye.”+ Vonjanja yaco wa popia hati: “Eliya u Tisibi.”
9 Soma wa tuma kokuaye usongui 50 kasualali kumue la 50 kalume. Eci usongui a enda oku ka lisanga laye wo sanga okuti, wa tumãla kilu liomunda. Usongui wo sapuila hati: “Ukuenje wa Suku yocili,+ soma wa popia hati, ‘Ndi yongola okuti wiya kokuange.’” 10 Pole, Eliya wa tambulula usongui 50 kasualali hati: “Ciwa, nda ame ndukuenje wa Suku, kovailu+ ku tunde ondalu oco yi ku lie kumue 50 kalume vove.” Kuenje kovailu kua tunda ondalu, yo lia kumue 50 kalume vaye.
11 Soma wa tuma vali kokuaye usongui ukuavo 50 kumue 50 kalume vaye. Eye wa enda wa sapuila Eliya hati: “Ukuenje wa Suku yocili, soma wa popia hati: ‘Ndi yongola okuti, wiya kokuange lonjanga.’” 12 Pole, Eliya wa va tambulula hati: “Nda ame ndukuenje wa Suku yocili, kovailu ku tunde ondalu oco yi ku lie kumue 50 kalume vove.” Kuenje kovailu kua tunda ondalu ya Suku, yo lia kumue 50 kalume vaye.
13 Soma wa tuma vali usongui watatu 50 kumue 50 kalume vaye. Pole, usongui watatu 50 wa lamana, wa kekama kolongolo kovaso a Eliya kuenda wa fetika oku pinga ocali loku u sapuila hati: “Okuenje wa Suku yocili, mange ohenda, omuenyo wange lomuenyo 50 wakuenje vove, u kuate esilivilo kovaso ove. 14 Ondalu ya tunda kovailu, ya lia asongui vavali vatete 50 kuenda ovimunga viavo 50 kalume, pole, omuenyo wange u kuate esilivilo kovaso ove.”
15 Ungelo wa Yehova wa sapuila Eliya hati: “Loka laye. Ku ko kuatele usumba.” Kuenje Eliya wa votoka kuenda wa loka laye ku soma. 16 Eliya wa sapuila soma hati: “Ca popia Yehova ceci hati: ‘Ove wa tuma olomunga oco vi ka pule Baale-Sevuvu, osuku yo ko Ekirone.+ Anga hẽ ko Isareli ka kuli Suku?+ Momo lie kua pingilile ekuatiso liaye? Omo liaco, pula wa pekela, ku tundipo vali, momo o ka fa muẽle.’” 17 Noke eye wa fa, ndeci ci likuata londaka ya Yehova yina Eliya a popele; omo okuti eye ka kuatele omõla, Yehorama*+ wa linga osoma pomangu yaye kunyamo wavali wuviali wa Yehorama,+ omõla a Yehosafata soma yo ko Yuda.
18 Catiamẽla konepa yikuavo yulandu womuenyo wa Ahasiya,+ lovina eye a linga, ka via sonehiwile hẽ velivulu liulandu wolotembo violosoma vio ko Isareli?
2 Eci Yehova a laikele oku ambata Eliya+ kovailu vehunguhungu liofela,+ Eliya la Elisia+ va kala oku tunda ko Giligali.+ 2 Eliya wa sapuila Elisia hati: “Mange ohenda, kala kulo, momo Yehova wa numa oku enda ko Betele.” Pole, Elisia wa popia hati: “Ndeci Yehova a kasi lomuenyo kuenda ndeci ove o kasi lomuenyo, si ku yanduluka.” Kuenje va lokila ko Betele.+ 3 Omãla vovaprofeto* vo ko Betele veya ku Elisia vo sapuila vati: “Ove hẽ wa kũlĩha okuti, etaili Yehova upa cime cove haeye utue wove?”+ Eye wa popia hati: “Nda ci kũlĩha. Ũhiko.”
4 Eliya wo sapuila hati: “A Elisia mange ohenda, kala kulo, momo Yehova wa numa oku enda ko Yeriko.”+ Pole, eye wa popia hati: “Ndeci Yehova a kasi lomuenyo kuenda ndeci ove o kasi lomuenyo, si ku yanduluka.” Kuenje va enda ko Yeriko. 5 Omãla vovaprofeto va kala ko Yeriko vamela ku Elisia kuenda vo sapuila vati: “Ove hẽ wa kũlĩha okuti etaili Yehova upa cime cove konele yove haeye usongui wove?” Eye wa popia hati: “Nda ci kũlĩha. Ũhiko.”
6 Eliya wo sapuila hati: “Mange ohenda, kala kulo, momo Yehova wa numa oku enda ko Yordão.” Pole, eye wa popia hati: “Ndeci Yehova a kasi lomuenyo kuenda ndeci ove o kasi lomuenyo, si ku yanduluka.” Kuenje kavali kavo va enda. 7 Omãla vovaprofeto va soka 50 va va kuama kuenda va talama loku vandekela ocipãla osimbu kavali kavo va talama kohulo yo Yordão. 8 Eliya wa tikula ocikutu* caye,+ wa ci muña, wa veta laco vovava kuenje ovava a litepa pokati, kondio lo kepĩli noke kavali kavo va yokila posi ya kukuta.+
9 Osimbu va kala oku yoka, Eliya wa sapuila Elisia hati: “Pinga eci o yongola okuti ndu ku ci lingila osimbu siopiwile kovaso ove.” Kuenje Elisia wa popia hati: “Mange ohenda, citava okuti ndi tambula olonepa vivali+ viespiritu liove?”+ 10 Eye wa tambulula hati: “O kasi oku pinga ocina cimue ca tĩla. Nda o mola eci njupiwa kokuove, eci wa pinga ci ka tẽlisiwa; pole, nda kua ndi muile, ka ci ka tẽlisiwa.”
11 Osimbu ovo va kala oku enda loku sapela, vocipikipiki ekãlu limue liondalu lolokavalu+ viondalu via va tepa pokati kuenda Eliya wa londa kovailu vehunguhungu liofela.+ 12 Eci Elisia a ci mola wa kaluka lolukandi hati: “A isiange, a isiange! Ekãlu lia Isareli kumue la vakuakuendela kolokavalu!”+ Eci ka kaile vali oku u mola, wa tikula ovowalo aye muẽle kuenda wa a tola volonepa vivali.+ 13 Noke wa tikula ocikutu*+ ca Eliya cina ca kupukile kokuaye kuenje wa tiukila konyima wa talama kohulo yo Yordão. 14 Wa tikula ocikutu* ca Eliya cina ca kupukila kokuaye, wa veta laco vovava loku popia hati: “Yehova Suku ya Eliya o kasi pi?” Eci eye a veta vovava, olui lua litepa pokati kondio lo kepĩli kuenje Elisia wa yoka.+
15 Eci omãla vovaprofeto vo ko Yeriko vo muila ocipãla, va popia vati: “Espiritu lia Eliya lia wila Elisia.”+ Kuenje va enda oku ka ñualẽhela laye, va petamisa ovipala viavo posi kovaso aye. 16 Ovo vo sapuila vati: “Kuli 50 kalume va loñoloha kumue lakuenje vavo. Ecelela okuti, ovo va enda oku ka sandiliya cime cove. Pamue espiritu* lia Yehova lio tikula loku wimba kolomunda, ale venyãla.”+ Pole, eye hati: “Ko ka va tumi.” 17 Ovo vo lipilikila toke co kuma kuenda wa popia hati: “Va tumi.” Ovo va tuma 50 kalume vo sandiliya vokuenda kuoloneke vitatu, pole, ka vo sangele. 18 Eci va tiukila ku Elisia, eye wa kala ko Yeriko.+ Kuenje wa va sapuila hati: “Siti nda ku sapuili oco ka vu ka endi?”
19 Noke alume vo volupale va sapuila Elisia vati: “A cime cange ndomo o ci lete olupale lua posoka;+ pole, ovava aco ka a kasi ciwa kuenda osi yaco ka yimi.”* 20 Eye wa popia hati: “Neneli etiyela limue liokaliye kuenda kapipo omongua.” Ovo vo li nenela. 21 Kuenje eye wa enda pono yovava kuenda wa imbapo omongua+ loku popia hati: “Ca popia Yehova ceci hati: ‘Ndi lingisa okuti, ovava aco a kala ciwa. Kuenje ka a ka koka vali oku fa ale oku kala osĩule.’”* 22 Kuenje ovava amamako oku kala ciwa ndeci ci likuata londaka ya popiwa la Elisia.
23 Eye wa tundako wa lamanela ko Betele. Osimbu a kala oku enda vonjila, amalẽhe vamue va tunda volupale va fetika oku u sepula+ loku u popia vati: “Lamana, okuetoto! Lamana, okuetoto!” 24 Noke eye wa ñualapo, wa vanja kokuavo loku va siñala vonduko ya Yehova. Kuenje vusenge mua tunda olo ursu vivali+ viomange kuenda via lia eci ci soka 42 kamalẽhe vaco.+ 25 Eye wa tundako wa enda Komunda+ Karimele kuenda oku tundako wa tiukila ko Samaria.
3 Yehorama+ omõla a Ahava wa linga osoma yo ko Isareli ko Samaria kunyamo 18 wuviali wa Yehosafata Soma yo ko Yuda kuenda wa viala 12 kanyamo. 2 Eye wa lingainga eci ka ca sungulukile kovaso a Yehova, pole, ka ci piãlisile ndeci ca lingile isiaye ale inaye haicoko, momo wa nyõla ongunji yi kola ya Baale yina isiaye a tungile.+ 3 Noke wamamako oku endela vakandu ana Yerevoama omõla a Nevata a kokisa va Isareli oku linga.+ Eye ka liwekelepo oku a linga.
4 Mesia soma yo ko Moavi wa kala ukuakufuka olomeme, wa enda oku feta ulambu ku soma yo ko Isareli vieci ci soka 100.000 viotulomeme kuenda 100.000 viovitupi violomeme lovonya avio. 5 Eci Ahava a fa,+ soma yo ko Moavi wa ñualelapo soma yo ko Isareli.+ 6 Keteke liaco, Soma Yehorama wa tunda ko Samaria kuenda wongolola va Isareli vosi. 7 Eye wa tumavo omunga yimue ku Soma Yehosafata wo ko Yuda loku popia hati: “Soma yo ko Moavi wa ndi ñualelapo. O yongola hẽ oku enda lame oku ka linga uyaki ko Moavi?” Eye wa tambulula hati: “Ove lame tuvamuamue.+ Omanu vange lomanu vove vamuamue. Olokavalu viange vimuamue lolokavalu viove.”+ 8 Yehosafata wa pula hati: “Tu enda lonjila yipi?” Yehorama wa tambulula hati: “Tu pita vonjila yekalasoko yo ko Edome.”
9 Kuenje Soma yo ko Isareli wa enda kumue la soma yo ko Yuda kuenda la soma yo ko Edome.+ Noke yoku linga ungende woloneke epanduvali, ka kua kaile vali ovava vocilombo ndaño oku nyuisa ovinyama viovimbo via kala oku va kuama. 10 Soma yo ko Isareli wa popia hati: “Ngongo yetu we! Yehova wa kovonga olosoma evi vitatu oco a vi ece peka lia va Moavi!” 11 Yehosafata wa pula hati: “Kulo ka kuli uprofeto laumue wa Yehova oco tu u pulise ocisimĩlo ca Yehova?”+ Umue pokati kakuenje va soma yo ko Isareli wa tambulula hati: “Kuli Elisia+ omõla a Siafata, una wa enda oku pesila ovava povaka a Eliya.”*+ 12 Yehosafata wa popia hati: “Ondaka ya Yehova yi kasi laye.” Kuenje soma yo ko Isareli la Yehosafata kuenda soma yo ko Edome va enda kokuaye.
13 Elisia wa sapuila soma yo ko Isareli hati: “Nye ndi kuete love?*+ Kuende kovaprofeto va isiove kuenda kovaprofeto va ina yove.”+ Pole, soma yo ko Isareli wo sapuila hati: “Sio, Yehova wa kovonga olosoma evi vitatu oco a vi ece peka lia va Moavi.” 14 Kuenje Elisia wa popia hati: “Ndeci Yehova ukualohoka a kasi lomuenyo una ndi vumba,* nda ame sia kapeleko Yehosafata+ Soma yo ko Yuda, nda sia ku tavele.+ 15 Cilo ndi neneli umue ukuakusika ohalupa.”*+ Eci ukuakusika ohalupa a fetika oku sika, eka lia Yehova lieya ku Elisia.+ 16 Eye wa popia hati: “Ca popia Yehova ceci hati: ‘Vocimbota* eci fẽlimo ololekua, 17 momo ca popia Yehova ceci hati: “Ene ka vu moli ofela kuenda ka vu moli ombela; pole, ocimbota* eci ci ka yuka lovava+ kuenda omo vu ka nyuila, ene, loviunda viene kuenda ovinyama vikuavo.”’ 18 Pole, ocina eci ca leluka kovaso a Yehova,+ momo eye o ka eca Moavi peka liene.+ 19 Vu sukila oku kundula alupale osi a pama+ kuenda alupale osi a velapo. Vu sukila oku teta oviti viosi viwa, loku sitika olono viosi viovava, loku nyõla lovawe ovapia osi awa ofeka.”+
20 Lomẽle kowola yoku eca ocilumba colomema,+ vocipikipiki ovava a kala oku tunda konele yo ko Edome kuenda ofeka yeyuka lovava.
21 Va Moavi vosi va yeva okuti, olosoma vieya oku liyaka lavo kuenje va kovonga alume vosi va ponduile oku yaka lovota* kuenda ovo va talama kongave. 22 Eci va pasuka omẽle, ekumbi lia kala oku ninila vovava kuenda ku va Moavi va kala konele yikuavo, ovava a molẽhele ndu okuti, a kusuka ndosonde. 23 Ovo vati: “Eci osonde! Olosoma via liponda ovio muẽle omunu lukuavo losipata. Kaliye, A Moavi, tu ende oco tu ka pundi!”+ 24 Eci ovo veya vocilombo ca Isareli, va Isareli va votoka va fetika oku lemẽha loku ponda va Moavi kuenje va tila kovaso avo.+ Va Isareli osimbu va iñila vo Moavi, va kala oku ponda va Moavi. 25 Ovo va kundula alupale kuenda ulume lulume wa imba ewe limue kongave, loku yi yukisa lovawe; ovo va sitika olono viosi viovava,+ loku teta oviti viosi viwa.+ Oku sulako ovimbaka viovawe vio ko Kiri-Hareseti+ ovio lika va supisapo kuenda vana va kala lepipili va liñuala loku li kundula.
26 Eci soma yo ko Moavi a limbuka okuti wa yuliwa kuyaki, wambata 700 kalume va limalẽha lolosipata oco va yuluile onjila yoku enda ku soma yo ko Edome;+ pole, ka va ci tẽlele. 27 Omo liaco, eye wa tikula omõlaye uveli una wa laikele oku viala pomangu yaye kuenda wo weca ndocilumba coku yoka+ ca lingiwa kilu liocimbaka. Omanu va kuatela onyeño Isareli kuenje va liwekapo oku liyaka la soma, yu va tiukila vofeka yavo.
4 Umue pokati kakãi vomãla vovaprofeto+ wa kalukila Elisia hati: “Ukuenje wove okuti, ulume wange, wa fa kuenda ove wa kũlĩha okuti, ukuenje wove olonjanja viosi wa sumbilile Yehova.+ Kaliye ulume umue tuo levalele weya oco ambate omãla vange vavali ha va lingi apika vaye.” 2 Elisia wa pula ukãi hati: “Nye ndi pondola oku ku lingila? Ndi sapuile, nye o kuete konjo?” Ukãi wa tambulula hati: “Upika wove ka kuete lacimue konjo, te lika esanga* limue li kuete ulela.”+ 3 Elisia hati: “Kuende, ka pinge asanga a kasi upolokoso komanu o lisungue lavo. Nena viosi o tẽla. 4 Noke iñila vonjo, yika epito konyima yove kuenda konyima yomãla vove. Yukisa asanga aco osi lulela kuenda ana eyuka a kapa ponele.” 5 Ukãi wa enda.
Eci eye a iñila vonjo lomãla vaye kuenda va yika epito, omãla vo pitisila asanga kuenda ukãi wa a yukisa lulela.+ 6 Eci asanga eyuka, ukãi wa sapuila umue pokati komãla vaye hati: “Ndi nenele ocikuata cikuavo.”+ Pole, omõla wo sapuila hati: “Ka pali vali asanga.” Kuenje ulela wa liwekapo oku pita.+ 7 Ukãi wa iñila, yu wa sapuilako ukuenje wa Suku yocili kuenje Elisia wa popia hati: “Kuende, ka landise ulela waco kuenda feta olofuka viove kuenje ove lomãla vove litekuli leci ci supapo.”
8 Eteke limue Elisia wa enda ko Sunami,+ vimbo liaco mua kala ukãi umue wa kemãlele kuenda ukãi waco wo lipilikila oco eye a lie pocitumãlo caco.+ Olonjanja viosi eci a enda oku pitako, eye wa endaile oku talama pocitumãlo caco oco a lie. 9 Ukãi wa sapuila ulume waye hati: “Nda kũlĩha okuti, ulume wa siata oku pita kulo olonjanja viosi, ukuenje o kola wa Suku. 10 Mange ohenda, tu tunge ohondo+ yimue yitito kolusoka, loku u kapelamo ohama yimue, omesa, omangu kuenda ociyekelo condiyelo. Kuenje olonjanja viosi eya kokuetu, o sikĩlamo.”+
11 Eteke limue, Elisia weya kuenda wa iñila vohondo yolusoka oco a pekeleko. 12 Eye wa sapuila Gehasi+ oñuatisi yaye hati: “Vilikiya ukãi u Sunami.”+ Eye wo vilikiya kuenda ukãi wa talama kovaso yaye. 13 Elisia wa sapuila Gehasi hati: “Mange ohenda u sapuila hati: ‘Ove wa tu lingila upange wosi owu.+ Nye tu pondola oku ku lingila?+ Citava okuti, ndi sapela la soma+ catiamẽla kokuove ale lusongui wolohoka?’” Pole, ukãi wa tambulula hati: “Ame nda tunga pokati komanu vange.” 14 Elisia wa popia hati: “Nye ci lingiwila kokuaye?” Gehasi wa popia hati: “Eye ka kuete omõla+ kuenda ulume waye wa kuka.” 15 Elisia wa popia hati: “U vilikiya.” Gehasi wa vilikiya ukãi kuenda ukãi wa talama puvelo. 16 Eye wa popia hati: “Kunyamo wiya votembo ndeyi, ove o ka kuata omõla.”+ Pole, ukãi hati: “Sio, a cime cange, okuenje wa Suku yocili! Ku ka kembe upika wove.”
17 Ukãi wemina kuenje wa cita omõla ulume votembo yimuamue yunyamo wa kuamamo, ndeci Elisia o sapuilile. 18 Omõla wa kula kuenda eteke limue wa endele ku isiaye una wa kala la vakuakungula. 19 Omõla wa sapuila isiaye hati: “Utue wange, Utue wange we!” Isiaye wa sapuila oñuatisi yaye hati: “Ko tuale ku ina yaye.” 20 Eye wambata omõla ku ina yaye kuenje ina yaco wa kapa omõla kolongolo viaye toke ekumbi pongunji noke omõla wa fa.+ 21 Ukãi wa lamana, wo kapa pula wukuenje wa Suku yocili+ kuenda wa yika epito konyima yaye kuenje wa enda. 22 Ukãi wa vilikiya ulume waye kuenje wa popia hati: “Mange ohenda numise umue pokati koloñuatisi viove kuenda cimue pokati kovimbulu viove, ecelela okuti ngenda lonjanga kukuenje wa Suku yocili kuenje ndi tiuka.” 23 Pole, ulume waye wa popia hati: “Momo lie o yonguila oku ko mola etaili? Ka kuli osãi yokaliye+ ale esambata.” Ukãi hati: “Ku ka sakalale, ovina viosi vi kasi ciwa.” 24 Ukãi wa pongiya ocimbulu kuenda wa sapuila oñuatisi yaye hati: “Kuende lonjanga. Ku ka tepulule ongendo mekonda liange te lika nda nda ku ci sapuila.”
25 Ukãi wa enda kukuenje wa Suku yocili Komunda Karimele. Eci ukuenje wa Suku yocili o muila ocipãla, wa sapuila Gehasi oñuatisi yaye hati: “Tala! Ukãi u Sunami o kasi oku iya. 26 Mange ohenda, lupuka ka ñualẽhele laye kuenda u pula ndoco: ‘O kasi ciwa? Ulume wove o kasi ciwa? Omõlove o kasi ciwa?’” Ukãi wa tambulula hati: “Cosi ci kasi ciwa.” 27 Eci ukãi a pitĩla kukuenje wa Suku yocili komunda, ukãi wo kuata kolomãhi.+ Noke Gehasi wamela kokuaye oco o upepo, pole, ukuenje wa Suku yocili wa popia hati: “A kale, momo eye wa sumua calua* kuenda Yehova wa ci ndimbika kuenda ka ndi sapuilile lacimue.” 28 Ukãi hati: “Anga hẽ nda pinga ku ñala yange oco a nyĩhe omõla? Siti nda popele hati: ‘Ku ka nyĩhe elavoko liuhembi’?”+
29 Elisia wa sapuila Gehasi lonjanga hati: “Itika uwalo wove vombunda+ kuenda tikula ombueti yange kuende. Nda wa sanga omunu umue, ku ko lame; kuenda nda omunu umue wa ku lama, ku ko tambulule. Kuende, kapa ombueti yange kocipala comõla.” 30 Noke ina yomõla wa popia hati: “Ndeci Yehova a kasi lomuenyo kuenda ndeci ove o kasi lomuenyo, ame si ku yanduluka.”+ Kuenje Elisia wa katuka kuenda wa enda lukãi. 31 Gehasi wa pita kovaso yavo kuenje wa kapa ombueti kocipala comõla, pole, ka kua yevalele ondaka ale ondimbukiso yimue.+ Eye wa tiuka wa ka lisangele la Elisia kuenje wo sapuila hati: “Omõla ka pasukile.”
32 Eci Elisia a iñila vonjo, omõla wa kala pula wa Elisia okuti, wa fa.+ 33 Elisia wa iñila kuenda wa yika epito liohondo, kavali kavo va kala vokati kuenje Elisia wa fetika oku likutilila ku Yehova.+ 34 Noke wa londa kula, wa liyala kilu liomõla kuenda wa kapa omẽla waye komẽla womõla, ovaso aye kovaso omõla, ovaka aye povaka omõla, wa liyala kilu liaye kuenje etimba liomõla lia fetika oku kuata owuya.+ 35 Eye wa ñuala vonjo oku enda konyima lo kovaso, wa londa kula kuenda wa liyala vali kilu liomõla. Omõla wa ta olohesi olonjanja epanduvali, noke wa yulula ovaso aye.+ 36 Elisia wa vilikiya Gehasi kuenda wa popia hati: “Vilikiya ukãi u Sunami.” Eye wa vilikiya ukãi kuenje ukãi weya kokuaye. Elisia wa popia hati: “Tikula omõlove.”+ 37 Ukãi wa iñila wa petama kolomãhi viaye kuenda wa kekamẽla posi kovaso a Elisia, noke ukãi wa tikula omõlaye kuenje wa tunda.
38 Eci Elisia a tiukila ko Giligali, vofeka mua kala onjala.+ Omãla vovaprofeto+ va tumãlele kovaso aye kuenda eye wa sapuila oñuatisi yaye hati:+ “Kapa ombia yinene piko, telekela akunde omãla vovaprofeto.” 39 Umue pokati kavo wa enda vusenge oku kopa olombi kuenje wa sanga olungu luovusenge kuenda wopako olonganja viatila wa vi yukisa vuwalo waye. Noke wa tiuka wa vi tetela vombia yakunde, pole, ka vi kũlĩhĩle. 40 Ovo va vi eca kalume oco va lie, pole, osimbu va kala oku lia akunde, va kaluka lolukandi vati: “Okuenje wa Suku yocili, vombia eyi muli oku fa.” Kuenje ka va lile. 41 Elisia wa popia hati: “Ndi neneli osema.” Noke yoku yi kapa vombia wa popia hati: “Vi eca komanu.” Vombia ka mua kaile vali eci ci linga lãvi.+
42 Ulume umue wa tunda ko Baale-Salisia,+ wa nenela ukuenje wa Suku yocili 20 kolombolo viosevata+ via pangiwa lapako atete onguiwa, lonjeke yolomema viokaliye.+ Elisia wa popia hati: “Vi eca komanu oco va lie.” 43 Noke oñuatisi yaye ya popia hati: “Ngeca ndati okulia oku kueci ci soka 100 kalume?”+ Elisia hati: “Vi eca komanu oco va lie, momo ca popia Yehova ceci hati: ‘Ovo va ka lia kuenda pa ka supa.’”+ 44 Eye wa vi kapa kovaso avo, ovo va lia kuenda pa supa+ ndeci ci likuata londaka ya Yehova.
5 Namana usongui wolohoka via soma yo ko Suria, wa kala ulume umue wa kemãlele haeye wa pandiyiwile la ñala yaye, momo pocakati caye, Yehova wa ecele eyulo* ku va Suria. Eye wa kala esualali limue lia pama, ndaño wa kuatele ovilundu.* 2 Vuyaki umue va Suria va lingile kofeka ya va Isareli, va kuata kafeko umue okuti weya oku kala upika wukãi wa Namana. 3 Ufeko wa sapuila cime caye cukãi hati: “Nda ñala yange wa endele oku ka nyula uprofeto+ ko Samaria, nda ciwa! Eye nda wa kayisa ovilundu viaye.”+ 4 Kuenje eye* wa enda ku cime caye, wo lomboluilako eci kafeko u Isareli o sapuila.
5 Soma yo ko Suria wa popia hati: “Kuende muẽle cilo! Ndi tuma ukanda ku soma yo ko Isareli.” Eye wa enda, wambata ekũi kolotalendo* viopalata, 6.000 kovinimbu viulu kuenda ekũi kovowalo oku lipongolola. 6 Eye wa nena ukanda ku soma yo ko Isareli, mua sonehiwa hati: “Kumue lukanda owu, ndi tuma ukuenje wange Namana oco u kayise kovilundu viaye.” 7 Soma yo ko Isareli noke yoku tanga ukanda waco, wa tola uwalo waye loku popia hati: “Anga hẽ ame Suku okuti, ndi ponda loku muisa vali omuenyo?+ Kaliye eye wa numisa ulume u, oco ndi kayise ovilundu viaye! Tali ño ndomo eye a kasi oku ndi sanumũla.”
8 Pole, eci Elisia ukuenje wa Suku yocili a yeva okuti soma yo ko Isareli wa tola uwalo waye, wa tuma oku pula soma hati: “Momo lie wa tolela uwalo wove? Mange ohenda, ulume waco eye kokuange oco a kũlĩhe okuti, ko Isareli kuli uprofeto umue.”+ 9 Kuenje Namana wa enda lolokavalu viaye, lakãlu aye wuyaki kuenje wa talama puvelo wonjo ya Elisia. 10 Noke Elisia wa tuma omunga oco o sapuile hati: “Kuende, ka yue olonjanja epanduvali+ vo Yordão+ kuenje ositu yetimba liove yi kala vali ciwa kuenda o ka yelisiwa.” 11 Eci ca temisa Namana kuenje wa tundako loku popia hati: “Nda popia lutima wange okuti: ‘Eye o keya kokuange, o ka talama kovaso yange loku vilikiya onduko ya Yehova Suku yaye, loku senga senga eka liaye konyima lo kovaso kilu liovilundu oco vi kaye.’ 12 Siti olui Avana lolui Faripari, ovio via velapo ko Damasko+ okuti, ovava osi o ko Isareli a sule? Ka citava hẽ okuti omo ndi yuila oco ndi yelisiwe?” Noke wa ñualapo wa enda loku fungula.
13 Akuenje vaye vamela kokuaye loku popia vati: “A ñala* yange, nda uprofeto wa ku tumile oku linga ocina cimue ci komõhisa, nda kua ci lingile? Siti ca leluka vali oku linga eci a ku sapuila okuti: ‘Yua oco o yele’?” 14 Noke wa enda kuenje wa yua vo Yordão olonjanja epanduvali, ndeci ci likuata londaka yukuenje wa Suku yocili.+ Kuenje ositu yetimba liaye, ya kala vali ciwa ndositu yetimba yomõla+ kuenda wa yelisiwa.+
15 Eye wa tiukila kukuenje wa Suku yocili+ kumue lasualali* vaye kuenda wa talama kovaso yuprofeto loku popia hati: “Cilo nda kũlĩha okuti, kilu lieve liosi ka kuli Suku, te lika ko Isareli.+ Kaliye mange ohenda, tava ombanjaile* yukuenje wove.” 16 Elisia wa popia hati: “La Yehova o kasi lomuenyo una ndi vumba,* si tambula ombanjaile eyi.”+ Namana wo lipilikila oco a tave, pole, Elisia ka tavele. 17 Namana wa popia hati: “Omo okuti ku tava, mange ohenda, ukuenje wove a tambule osi yofeka yilo okuti, olomula vivali vi tẽla oku viambata, momo ukuenje wove ka ka eca vali ocilumba coku pia elisi, ale oku lumbila kolosuku vikuavo, te lika ku Yehova. 18 Pole, Yehova a ecele upika waye omo okuti: Eci ñala yange a iñila vonjo* ya Rimone oco a kekamẽlemo, eye o kuata vokuokuo kuange kuenje ame ndi kekamẽla vonjo ya Rimone. Yehova a ecele upika waye eci ndi kekamẽla vonjo ya Rimone.” 19 Noke Elisia wo sapuila hati: “Kuende lombembua.” Eci Namana a tundako kuenda wa kala ale ocipãla, 20 Gehasi+ oñuatisi ya Elisia ukuenje wa Suku yocili+ wa sokolola vutima waye hati: ‘Cime cange wa ecelela okuti Namana u Suria enda+ kuenda ka tavele oku tambula kokuaye ovina a nena. Ndeci Yehova a kasi lomuenyo, ndu lupukila oco ndi tambule cimue pokati kovina a nena.’ 21 Gehasi wa lupukila ku Namana. Eci Namana a mola okuti umue o kasi oku lupukila konyima yaye, eye wa loka vekãlu liaye oco a ñualẽhele laye kuenda o pula hati: “Cosi ci kasi ciwa?” 22 Gehasi wa popia hati: “Cosi ci kasi ciwa. Cime cange wa numa hati: ‘Tala! Vepuluvi eli amalẽhe vavali veya kokuange, va tunda kovaimbo a kasi kolomunda vio Efarimi okuti, omãla vovaprofeto. Mange ohenda, va ĩha otalendo yimosi yopalata kuenda ovowalo avali oku li pongolola.’”+ 23 Namana wa popia hati: “Tikula olotalendo vivali.” Eye wo lipilikila+ kuenda wa kapa olotalendo vivali viopalata volonjeke vivali lovowalo avali oku li pongolola kuenje wa vi eca kakuenje vaye vavali oco va vi ambate oku pita lavio kovaso a Gehasi.
24 Eci Gehasi a pitĩla ko Ofele,* wa tambula olonjeke viaco peka liakuenje, yu wa va tuma oku enda. Eci akuenje va enda, 25 Gehasi wa iñila vonjo kuenda wa talama kovaso a cime caye. Elisia wo pula hati: “A Gehasi o tundilila pi?” Eye hati: “Upika wove ka endele lakumue.”+ 26 Elisia wo sapuila hati: “Utima wange ka wa kale hẽ love eci ulume a loka vekãlu liaye oco a ñualẽhele love? Anga hẽ yilo oyo otembo yoku tambula opalata, ovowalo, oviumbo violiveira, oviumbo viayuva, olomeme, olongombe ale apika vakãi pamue apika valume?+ 27 Kaliye ovilundu via Namana+ vi kakatela kokuove kumue lovitumbulukila viove otembo ka yi pui.” Kuenje Gehasi wa tunda kovaso a Elisia lovilundu vi yela ndocikokoto.+
6 Omãla vovaprofeto+ va sapuila Elisia vati: “Tala! Ocitumãlo tua tunga love ka tu suimo. 2 Mange ohenda, tu ecelele oco tu ende ko Yordão. Omunu lomunu pokati ketu o ka tikula ekoso limue oco tu tunge ocitumãlo tu kala.” Eye hati: “Kuendi.” 3 Umue pokati kakuenje wo pula hati: “Anga citava okuti wenda kumue lakuenje vove?” Eye hati: “Ngenda.” 4 Omo liaco, eye wa enda lavo kuenda eci va pitĩla ko Yordão, va fetika oku teta oviti. 5 Osimbu umue pokati kavo a kala oku teta uti, utue wondiaviti wa kupukila vovava kuenje eye wa kaluka lolukandi hati: “Avoyo we, a cime cange, oyo ya kala yoku undika!” 6 Ukuenje wa Suku yocili wa pula hati: “Ya kupukila pi?” Wo lekisa apa ya kupukila. Elisia wa teta ocinimbu cimue cevaya kuenda wa cimbapo kuenje utue wondiaviti weya kilu liovava. 7 Elisia hati: “Wupamo.” Ukuenje wolõla eka liaye kuenje wa upamo.
8 Soma yo ko Suria wa ka liyaka lo Isareli.+ Eye wa sapela lakuenje vaye loku popia hati: “Ndi kala lene vocitumãlo cimuamue.” 9 Noke ukuenje wa Suku yocili+ wa tuma oku sapuila soma yo ko Isareli hati: “Lunguka ku ka pite pocitumãlo eci, momo va Suria va kasi oku iyilila vonjila yaco.” 10 Kuenje soma yo ko Isareli wa tuma ondaka komanu vaye va kala pocitumãlo cina ukuenje wa Suku yocili o lunguile. Elisia wamamako oku u lungula kuenda soma olonjanja vialua* wa kala ocipãla locitumãlo cina vo sapuilile.+
11 Eci ca temisa soma* yo Suria, eye wa kovonga akuenje vaye kuenje wa va sapuila hati: “Ndi sapuili! Helie pokati ketu wa tiamẽla ku soma yo Isareli?” 12 Umue pokati kakuenje vaye wa popia hati: “Lomue pokati ketu a ñala yange a soma! Elisia uprofeto wo ko Isareli eye wa sapuila soma yo Isareli ovina ove wa vangula vohondo yove.”+ 13 Soma hati: “Kuendi, ka sandiliyi apa a kasi kuenje ndi tuma alume oco vo kuate.” Noke vo wĩha esapulo liokuti: “Eye o kasi ko Dotane.”+ 14 Soma wa tumisako lonjanga olokavalu, lakãlu wuyaki kuenda asualali valua; ovo veya luteke kuenda va ñuala ocingonja olupale.
15 Eci oñuatisi* yukuenje wa Suku yocili ya pasuka lomẽle kuenda wa tundila posamua, wa mola okuti asualali, lolokavalu kuenda akãlu wuyaki va ñuala ocingonja olupale. Oñuatisi yo sapuila yiti: “Avoyo we, a ñala yange! Nye tu linga?” 16 Pole, Elisia hati: “Ku ka kuate usumba!+ Momo ava va kasi letu valua okuti, ava va kasi lavo va sule.”+ 17 Elisia wa fetika oku likutilila hati: “A Yehova, mange ohenda, patulula ovaso aye oco a ci mole.”+ Vonjanja yaco Yehova wa patulula ovaso oñuatisi kuenda wa mola okuti, ovaimbo a kasi kolomunda eyukile lolokavalu, lakãlu wuyaki kuenda akãlu ondalu+ a ñuala Elisia.+
18 Eci va Suria veya va kala oku iya kokuaye, Elisia wa likutilila ku Yehova hati: “Mange ohenda, omanu ava va kuatiwe lupeke.”+ Eye wa va lingisa olomeke ndeci Elisia a pingile. 19 Elisia wa va sapuila hati: “Eyi hayoko onjila kuenda olu haluoko olupale. Ñuami kuenda eceleli okuti ndu songuili komunu vu kasi oku sanda.” Eye wa va songuila ko Samaria.+
20 Eci va pitĩla ko Samaria, Elisia wa popia hati: “A Yehova, patulula ovaso omanu ava oco ovo va vanje.” Kuenje Yehova wa patulula ovaso avo kuenda va limbuka okuti, va kala pokati ko Samaria. 21 Eci soma yo Isareli a va mola, wa pula Elisia hati: “Anga hẽ citava okuti ndi va ponda, citava okuti ndi va ponda a isiange?” 22 Pole, Elisia hati: “Ku ka va ponde. Ove hẽ wa siata oku ponda losipata yove kuenda ohonji yove olomandekua vina ove wambata? Eca kokuavo ombolo lovava oco va lie loku nyua+ kuenje va tiukile ku ñala yavo.” 23 Soma wa va lingilako ocipito cimue cinene, ovo va lia, va nyua noke wa va tuma oku tiukila ku ñala yavo. Kuenje ocimunga ca vakuakupunda vo ko Suria+ lalimue eteke ca tiukile vali vofeka yo Isareli.
24 Noke Bene-Hadada soma yo Suria wongolola asualali* vaye vosi kuenje va enda loku ñuala ocingonja o Samaria.+ 25 Omo liaco, kueya oku kala onjala yalua+ vo Samaria kuenda oyo ya ñualiwa ocingonja toke eci utue wocimbulu+ cimosi ca kuata ondando yolosiekele 80 viopalata kuenda toke eci onepa yakuãla yonjongo yokabu* yaniña olopomba ya kuatele ondando yolosiekele 5 viopalata. 26 Osimbu soma yo Isareli a kala oku endela kilu liocimbaka, ukãi umue wo kalukila hati: “Tu kuatise, A ñala yange a soma!” 27 Soma o pula hati: “Nda Yehova ka ku kuatisa, pi ndi sanga ekuatiso oco ndu ku ĩhe? Pocimbandi? Ale pocikoselo cayuva pamue pocikoselo culela?” 28 Soma wa pula ukãi hati: “Ocitangi cipi o kuete?” Ukãi wa tambulula hati: “Ukãi u wa ndi sapuila hati: ‘Eca omõlove oco tu u lie etaili kuenje hẽla tu lia omõlange.’+ 29 Omo liaco, tua teleka omõlange kuenda tuo lia.+ Keteke lia kuamamo ndo sapuila hati: ‘Eca omõlove oco tu u lie.’ Pole, eye wa seleka omõlaye.”
30 Soma noke yoku yevelela olondaka viukãi, wa tola uwalo waye.+ Eci soma a kala oku endela kilu liocimbaka, omanu va mola okuti, eye wa walele ocikelẽyi kosi yuwalo waye.* 31 Soma wa popia hati: “Suku a ndi kangise loku vokiyako nda Elisia omõla a Siafata o kala lutue waye etaili!”+
32 Elisia wa tumãlele vonjo yaye kuenda akulu va tumãlele kumue laye. Soma wa tuma ulume umue wa pita kovaso aye, pole, eci omunga ya pitĩla, Elisia wa sapuila akulu hati: “Wa moli ndomo omõla u womondi+ a tuma oku teta utue wange? Lavululi, eci omunga yi pitĩla, yiki epito kuenda kuatiko oco eye ka ka iñile. Ka vu kasi oku yeva ongendo ya ñala yaye o kasi oku iyilila konyima yaye?” 33 Osimbu handi a kala oku vangula lavo, omunga ya pitĩla kokuaye kuenda soma wa popia hati: “Ohali eyi yi tunda ku Yehova. Momo lie ndi sukilila oku kevelila vali ku Yehova?”
7 Elisia wa popia hati: “Yeveleli ondaka ya Yehova. Ca popia Yehova ceci hati: ‘Hẽla kowola ndeyi pombundi* yo Samaria, osea yimosi yosema ya fina yi ka kuata ondando yosiekele* yimosi kuenda olosea* vivali viosevata, vi ka kuata ondando yosiekele yimosi.’”+ 2 Kesongo una soma a kolelele wa sapuila ukuenje wa Suku yocili hati: “Ndaño muẽle Yehova wa yuluile apito kovailu, anga hẽ eci* nda ca tẽlisiwa?”+ Elisia hati: “Ove o ka ci mola lovaso ove muẽle,+ pole, ku ka liako.”+
3 Pombundi yolupale+ pa kala alume vakuãla va kuatele ovilundu kuenda va vangula omunu lukuavo hati: “Momo lie tu tumãlela palo toke eci tu fa? 4 Nda tua popia hati: ‘Tu iñili volupale,’ osimbu volupale muli onjala,+ tu ka fa. Nda tua tumãla palo, tu favo. Kaliye tu endi vocilombo ca va Suria. Nda ovo va popela omuenyo wetu, tu kala lomuenyo, pole, nda ka va ci lingile, tu fa.” 5 Ovo va tunda luteke kuenda va pitĩla ocipepi locilombo ca va Suria. Eci va iñila vocilombo ca va Suria ka mua kaile omunu laumue.
6 Yehova wa kokisa ocilombo ca va Suria oku yevelela onjuela yakãlu wuyaki, lolokavalu kuenda onjuela yasualali valua.+ Ovo va vangula omunu lukuavo vati: “Tala! Soma yo Isareli wa pañinya olosoma via va Hiti kuenda olosoma vio Kegito oco vi liyake letu!” 7 Ovo lonjanga yalua, va votoka kuenda va tila vokati kuteke, va siapo olombalaka viavo, olokavalu, ovimbulu, ocilombo ca siala ño ndoto kuenje va tila oco va popele omuenyo wavo.
8 Eci alume va kuatele ovilundu va pitĩla ocipepi locilombo, va iñila vombalaka yimue, va fetika oku lia loku nyua. Ovo vopamo opalata, ulu, lovowalo kuenje va enda va vi seleka. Noke va tiuka va iñila vombalaka yikuavo, vopamo ovina via kalamo kuenje va enda va vi seleka.
9 Noke va vangula omunu lukuavo vati: “Ovina tu kasi oku linga ka via sungulukile. Etaili eteke liasapulo awa! Nda ka tua popele lacimue toke eci ku ca, tu sesamẽla oku pondiwa. Tu endi, tu ka ci sapuili konjo ya soma.” 10 Ovo va enda, va vilikiya vakualombundi vo volupale loku va sapuila vati: “Tua iñila vocilombo ca va Suria, pole, ka mua kaile laumue, ka tua yevele ondaka layimue. Mua kala lika olokavalu, lovimbulu via kutiwa kuenda olombalaka via siala ño ndoto.” 11 Vakualombundi va kaluka kuenje va sapula ondaka yaco konjo ya soma.
12 Vuteke waco, soma wa votoka lonjanga kuenda wa sapuila akuenje vaye hati: “Mangi ohenda, ndu sapuili eci va Suria va tu linga. Ovo va kũlĩha okuti, tu kasi lonjala+ kuenje va tunda vocilombo, va tilila vusenge loku popia vati: ‘Ovo va ka tunda volupale, noke tu va kuata lomuenyo kuenje tu iñila volupale.’”+ 13 Umue pokati kakuenje vaye wa popia hati: “Mange ohenda, ecelela okuti, alume vamue va tikula olokavalu vitãlo via supapo volupale. Tala! Esulilo liavo li kala ndowiñi wosi wa va Isareli va supile kulo. Tala! Esulilo liavo li kala ndowiñi wosi wa va Isareli vana va pondiwa. Tu va eceleli oku enda oco tu mole eci ci ka pitako.” 14 Kuenje ovo va tikula akãlu avali lolokavalu kuenda soma wa va tuma vocilombo ca va Suria loku popia hati: “Kuendi ka ci kũlĩhĩsi.” 15 Ovo va va kuama konyima yavo toke ko Yordão kuenda vonjila mua kala uwalo walua lovikuata vina va Suria va inasile osimbu va kala oku tila omo liocinjoko. Olomunga via tiuka kuenda via ci sapuila soma.
16 Noke omanu va enda va ka pundile ocilombo ca va Suria kuenje osea yimosi yosema ya fina, ya kuata ondando yosiekele yimosi kuenda olosea vivali viosevata, via kuata ondando yosiekele yimosi, ndeci ci likuata londaka ya Yehova.+ 17 Soma wa kundikile kesongo ocikele combundi una eye a kolelele, pole, omanu vo liataila toke eci a fila pombundi, ndeci ukuenje wa Suku yocili a ci popele ku soma eci eye a endele kokuaye. 18 Ca lingiwa ndeci ukuenje wa Suku yocili a popele ku soma hati: “Hẽla kowola ndeyi pombundi yo Samaria, osea yimosi yosema ya fina yi ka kuata ondando yosiekele yimosi kuenda olosea vivali viosevata vi ka kuata ondando yosiekele yimosi.”+ 19 Pole, kesongo wa sapuilile ukuenje wa Suku yocili hati: “Ndaño muẽle Yehova wa yuluile apito kovailu, anga hẽ eci* nda ca tẽlisiwa?” Noke Elisia wa popia hati: “Ove o ka ci mola lovaso ove muẽle, pole, ku ka liako.” 20 Eci oco ca pita muẽle laye, momo omanu vo liataila toke eci a fila pombundi.
8 Elisia wa sapuila ukãi una eye a pinduilile* omõlaye hati:+ “Votoka kuende, ove kumue la vakuonjo yove kuenda o kala ndocingendeleyi kuosi o yongola, momo Yehova wa popia okuti, vofeka mu ka kala onjala+ anyamo epanduvali.” 2 Ukãi wa votoka kuenda wa linga eci ukuenje wa Suku yocili o sapuila. Eye wa enda la vakuanjo yaye, va tunga vofeka ya va Filisiti+ anyamo epanduvali.
3 Noke lianyamo epanduvali, ukãi wa tunda vofeka ya va Filisiti, wa enda ku soma oku ka pinga onjo yaye lepia liaye. 4 Soma wa kala oku vangula la Gehasi oñuatisi yukuenje wa Suku yocili, hati: “Mange ohenda, ndi sapuile ovina viosi vi komõhisa Elisia a siata oku linga.”+ 5 Osimbu a kala oku lomboluila soma ndomo Elisia a pindula ocivimbi cimue,+ ukãi una Elisia a pinduile omõlaye weya ku soma, wa pinga onjo yaye kuenda epia liaye.+ Noke Gehasi wa popia hati: “A ñala yange a soma, u eye ukãi waco lomõlaye una Elisia a pinduile.” 6 Soma wa pula ukãi kuenda ukãi wo lomboluilako ulandu waco. Noke soma wo nõlela kesongo umue wo kelombe loku u sapuila hati: “Tiuwiya ovina viosi viukãi u kuenda ovikũla viosi vio kepia liaye tunde keteke eye a tunda vofeka toke etaili.”
7 Elisia weya ko Damasko+ eci Benehadada+ soma yo Suria a kala oku vela. Kuenje va sapuila soma hati: “Ukuenje wa Suku yocili+ weya kulo.” 8 Soma wa sapuila Hasahele+ hati: “Tikula olombanjaile vimue kuende ka ñualẽhele lukuenje wa Suku yocili.+ Pulisa Yehova pocakati caye okuti: ‘Anga hẽ ndi kaya kuvei owu?’” 9 Hasahele wa ka ñualẽhela laye kuenda wambata olombanjaile viovina viosi viwa vio ko Damasko, ovina viaco viambatiwa lolongamelo 40. Eye weya, yu wa talama kovaso a Elisia loku popia hati: “Omõlove Benehadada soma yo Suria wa numa kokuove loku pula hati: ‘Anga hẽ ndi kaya kuvei owu?’” 10 Elisia wo tambulula hati: “Kuende ko sapuile hati: ‘Ocili okuti ove o kaya muẽle,’ pole, Yehova wa ndi lekisa okuti, eye ocili okuti o ka fa muẽle.”+ 11 Kuenje Elisia wo vanja suĩ, toke eci Hasahele a kutisiwa osõi. Ukuenje wa Suku yocili wa fetika oku lila. 12 Hasahele wa pula hati: “Momo lie ñala yange a lilila?” Eye wa tambulula hati: “Momo nda kũlĩha ohali o laika oku nenela omanu va Isareli.+ Ovitumãlo viavo via pama o ka vimba vondalu, o ka ponda losipata alume vavo va loñoloha, omãla vavo o ka va sõsõla kuenda akãi vavo vemina o ka va tola ovaimo.”+ 13 Hasahele wa pula hati: “Ukuenje wove okuti, ombua yaño o linga ndati ovina evi?” Pole, Elisia hati: “Yehova wa ndi lekisa okuti, ove o ka kala soma yo Suria.”+
14 Noke Hasahele wa siapo Elisia, yu wa tiukila ku ñala yaye una wo pulisa hati: “Nye Elisia a ku sapuila?” Eye wa tambulula hati: “Eye wa ndi sapuila okuti, ove o kaya muẽle.”+ 15 Pole, keteke lia kuamamo, Hasahele wa tikula ombilikiti, wa yi yava vovava kuenje wa yi sikĩlĩla* kocipala ca soma toke eci a fa.+ Noke Hasahele wa linga osoma pomangu yaye.+
16 Kunyamo watãlo wuviali wa Yehorama+ omõla a Ahava soma yo Isareli, osimbu Yehosafata a kala soma yo Yuda, Yehorama+ omõla a Yehosafata Soma yo Yuda wa linga osoma. 17 Yehorama wa kuatele 32 kanyamo eci a linga osoma kuenda wa viala anyamo ecelãla vo Yerusalãi. 18 Eye wa endaila vonjila yolosoma vio Isareli+ ndeci vakuanjo ya Ahava va lingaile,+ momo eye wa kuelele omõla ukãi wa Ahava;+ kuenda eye wamamako oku linga eci cĩvi kovaso a Yehova.+ 19 Pole, Yehova ka yonguile oku nena enyõleho ko Yuda, omo liukuenje waye Daviti,+ momo wa likuminyile oku eca ondiyelo yimue kokuaye+ kuenda komãla vaye otembo yosi.
20 Koloneke viaye, o Edome ya ñualelapo o Yuda+ kuenje ya tumbika osoma yalio muẽle.+ 21 Omo liaco, Yehorama wa enda ko Sairi kumue lakãlu aye osi kuenje eye wa katuka luteke kuenda wa yula va Edome vana vo ñualele ocingonja, eye kumue lasongui vakãlu; kuenda asualali va tilila volombalaka viavo. 22 Pole, o Edome yamamako oku ñualelapo o Yuda toke koloneke vilo. Kotembo yaco, o Livina+ ya ñualelapovo o Yuda.
23 Catiamẽla konepa yikuavo yulandu womuenyo wa Yehorama, lovina viosi eye a linga, ka via sonehiwile hẽ velivulu liulandu wolotembo violosoma vio ko Yuda? 24 Noke Yehorama wa ka puyuka la vakukululu yaye kuenda vo kenda kumue la vakukululu yaye Volupale lua Daviti.+ Kuenje omõlaye Ahasiya+ wa linga osoma pomangu yaye.
25 Kunyamo 12 wuviali wa Yehorama omõla a Ahava soma yo Isareli, Ahasiya omõla a Yehorama Soma yo Yuda, wa linga osoma.+ 26 Ahasiya wa kuatele 22 kanyamo eci a linga osoma kuenda wa viala unyamo umosi vo Yerusalãi. Onduko ya inaye ya kala Ataliya,+ onekulu* ya Omiri+ Soma yo Isareli. 27 Ahasiya wa endela vonjila yonjo ya Ahava+ kuenda wamamako oku linga eci cĩvi kovaso a Yehova, ndeci onjo ya Ahava ya linga, momo isiaye wa kuelele ukãi umue ukuepata lia Ahava.+ 28 Eye wa enda la Yehorama omõla a Ahava, oco va ka liyake la Soma Hasahele wo ko Suria ko Ramote-Gileada,+ pole, va Suria va lemẽha Yehorama.+ 29 Kuenje Soma Yehorama wa tiukila ko Yesirele+ oco a kayise apute ana va Suria vo lemẽha ko Rama eci a liyaka la Soma Hasahele wo ko Suria.+ Ahasiya omõla a Yehorama soma yo Yuda, wa lokila ko Yesirele oco a ka nyule Yehorama omõla a Ahava, momo wa lemẽhiwile.*
9 Noke uprofeto Elisia wa vilikiya umue pokati komãla vovaprofeto kuenda wo sapuila hati: “Itika uwalo wove vombunda, tikula lonjanga ociwala culela, kuende ko Ramote-Gileada.+ 2 Eci o pitĩlako, sandiliya Yehu+ omõla a Yehosafata omõla a Nimisi; iñila u katula pokati ka vahuvaye kuenda u wambata vohondo yo vokati. 3 Noke tikula ociwala culela, pesela ulela waco kutue waye kuenda popia hati: ‘Ca popia Yehova ceci hati: “Ndi ku waveka oco o linge osoma yo Isareli.’”+ Kuenje yulula epito kuenda tila lonjanga.”
4 Oñuatisi yuprofeto ya enda lonjila yaye ko Ramote-Gileada. 5 Eci a pitĩlako, wa sanga okuti, vakesongo kolohoka okuti, va tumãla. Eye hati: “A kesongo, nda ku nenela esapulo limue.” Yehu wo pulisa hati: “Helie pokati ketu?” Eye hati: “A kesongo, ove muẽle.” 6 Yehu wa votoka, wa iñila vonjo; oñuatisi ya pesila ulela kutue waye kuenda wo sapuila hati: ‘Ca popia Yehova Suku ya Isareli ceci hati: ‘Ndi ku waveka oco o linge osoma yomanu va Yehova ko Isareli.+ 7 Ove o sukila oku kundula onjo ya ñala yove Ahava, oco ndi fetuluinye osonde yakuenje vange ovaprofeto kuenda yakuenje vosi vakuavo va Yehova vana va fila peka lia Isevele.+ 8 Kuenje onjo yosi ya Ahava yi ka nyõleha; ndi ka kundula alume* vosi va Ahava, oku kongelamo vana va sumua la vana va hongua ko Isareli.+ 9 Ndi linga lonjo ya Ahava ndeci nda linga lonjo ya Yerevoama+ omõla a Nevata kuenda ndeci nda linga lonjo ya Baasia+ omõla a Ahiya. 10 Catiamẽla ku Isevele, o ka liwa lolombua vepia lio ko Yesirele+ kuenda lomue o ko kenda.’” Eye wa yulula epito kuenje wa tila.+
11 Eci Yehu a tiukila kakuenje va ñala yaye, ovo vo pula vati: “Cosi ci kasi ciwa? Momo lie eyui eli lieyilile kokuove?” Eye wa va tambulula hati: “Ene wa kũlĩhi alume vaco kuenda olondaka viavo.” 12 Ovo vati: “Eci haciliko! Linga ohenda, tu sapuile.” Eye hati: “Eci oco eye a ndi sapuila kuenda wa vokiyako hati: ‘Ca popia Yehova ceci hati: “Ndi ku waveka oco o linge osoma yo Isareli.”’”+ 13 Kuenje omunu lomunu wopa uwalo waye lonjanga, wa u nyalẽha kovilamanelo+ kuenda va sika ombinga loku popia vati: “Yehu wa linga osoma!”+ 14 Yehu+ omõla a Yehosafata, omõla a Nimisi wa lingila usuanji Yehorama.
Yehorama wa kala oku lavulula ko Ramote-Gileada+ kumue lo Isareli yosi, omo lia Hasahele Soma+ yo Suria. 15 Noke soma Yehorama wa tiukila ko Yesirele+ oco a sakuiwe kapute vo lemẽhele ku va Suria eci a liyaka la Hasahele Soma yo Suria.+
Yehu wa popia hati: “Nda ene vu tavi,* ko ka eceleli okuti, umue o tunda volupale oco a ka sapule ondaka eyi ko Yesirele.” 16 Yehu wa pongiya ekãlu liaye wa enda ko Yesirele, momo Yehorama oko a kala loku vela kuenda Ahasiya Soma yo Yuda wa endeleko oku ka nyula Yehorama. 17 Osimbu ondavululi ya kala kosapalalo ko Yesirele, wa mola Yehu lakuenje vaye va kala oku iya. Vepuluvi liaco eye wa popia hati: “Ndi lete alume valua.” Yehorama hati: “Vilikiya ukuakuendela kokavalu, u tuma oco a ka ñualẽhele lavo kuenda a pule hati: ‘Weyi lombembua?’” 18 Ukuakuendela kokavalu wa ka ñualẽhela laye, wa popia hati: “Ca popia soma ceci hati, ‘Weyi lombembua?’” Pole, Yehu hati: “Nye o linga ‘lombembua’? Kala konyima yange!”
Ondavululi ya popia yiti: “Omunga ya pitĩla kokuavo, pole, ka ya tiukile.” 19 Eye wa tuma ulume ukuavo ukuakuendela kokavalu una okuti, eci a pitĩla kokuavo wa popia hati: “Ca popia soma ceci hati: ‘Weyi lombembua?’” Pole, Yehu hati: “Nye ove o linga ‘lombembua’? Kala konyima yange!”
20 Ondavululi ya popia yiti: “Eye wa va sanga, pole, ka tiukile kuenda oku endisa kuaco oku endisa kua Yehu onekulu* ya Nimisi, momo eye endisa ndeyui.” 21 Yehorama hati: “Pongiyi ekãlu liange!” Kuenje va pongiya ekãlu liaye liuyaki kuenda Yehorama Soma yo Isareli la Ahasiya Soma+ yo Yuda, va tunda omunu lomunu vekãlu liaye liuyaki, oku ka ñualẽhela la Yehu. Vo sanga vepia lia Navote+ u Yesirele.
22 Eci Yehorama a mola Yehu wa pula hati: “A Yehu weya lombembua?” Pole, eye hati: “Ombembua yi kala ndati kulo osimbu kuli upuepue walua lumbanda+ wa ina yove Isevele?”+ 23 Yehorama wa ñualisa ekãlu liaye oco a tile kuenda wa sapuila Ahasiya hati: “A Ahasiya, tua kembiwa!” 24 Yehu wa tikula ohonji yaye, wa imba usongo vonyima ya Yehorama kuenda usongo wa tundila vutima kuenje eye wa kupukila vekãlu liaye liuyaki. 25 Yehu wa sapuila Bidikare oñuatisi yaye hati: “U tikula, u wimba vepia lia Navote u Yesirele.+ Ivaluka okuti, ove lame tua kala vocimunga cimuamue coku endisa akãlu lolokavalu oku kuama konyima ya isiaye Ahava, eci Yehova a popele ocitumasuku cokuti:+ 26 ‘“Hẽla lia pita, ndeci nda mola osonde ya Navote+ kuenda osonde yomãla vaye,” oco Yehova a popia, “Ndu ku fetuluinyila+ vepia eli,” oco Yehova a popia.’ Kaliye u tikula, u wimba vepia ndeci ci likuata londaka ya Yehova.”+
27 Eci Ahasiya Soma+ yo Yuda a mola eci ca kala oku pita, wa tilila vonjila yonjo yocumbo. (Noke Yehu wo landula loku popia hati: “U pondivo!” Kuenje vo lemẽhela vekãlu eci a kala oku lamanela ko Guru ocipepi lo Yivileama.+ Pole, eye wamamako oku tila toke ko Megido, oko a fila. 28 Akuenje vaye vo wambata vekãlu limue toke ko Yerusalãi kuenda vo kenda veyambo liaye kumue la vakukululu yaye Volupale lua Daviti.+ 29 Kunyamo 11 wuviali wa Yehorama, omõla a Ahava haico Ahasiya+ a linga osoma ko Yuda.)
30 Eci Yehu eya ko Yesirele,+ Isevele+ wa ci yeva. Kuenje wa li pindala otinda yi tekãva vovaso* kuenda wa liposuisa kutue loku vanja ponjanela. 31 Eci Yehu a pitĩla pombundi, Isevele hati: “Simiri una wa ponda ñala yaye o kasi ciwa?”+ 32 Yehu poku vandekela ponjanela wa popia hati: “Helie o kasi konele yange? Helie?”+ Vepuluvi liaco, va kesongo vavali ale vatatu vo kelombe vo muila ponjanela. 33 Yehu hati: “Imbi posi ukãi u!” Ovo vo wimba posi kuenda onepa yimue yosonde yaye ya lisanduila vocimano kuenda kolokavalu kuenje eye wo liata lekãlu liaye. 34 Noke Yehu wa iñila, wa lia wa nyua. Eye wa popia hati: “Mangi ohenda, kuendi ka kendi ukãi u ndeti wa siñaliwa. Momo eye omõla wosoma.”+ 35 Pole, eci va enda oku kopa ocivimbi caco oco va ci kende, ka va sangelepo lacimue, va sanga lika ekõlõkõlo liaye, olomãhi kuenda ovaka aye.+ 36 Eci va tiuka kuenje vo sapuilako, eye hati: “Eci ci tẽlisa ondaka ya Yehova+ yina a popele pocakati cukuenje waye Eliya u Tisibi hati: ‘Olombua vi ka lia etimba lia Isevele vepia lio ko Yesirele.+ 37 Ocivimbi ca Isevele ci ka kala ndotulumu vovapia o ko Yesirele, oco ka va ka popie vati: “U Isevele.”’”
10 Ahava+ wa kuatele 70 komãla ko Samaria. Noke Yehu wa soneha ovikanda loku vi tuma ko Samaria, kolombuale vio ko Yesirele, kakulu+ kuenda ku vakuakulava omãla va Ahava,* hati: 2 “Eci vu tambula ukanda owu, omãla va ñala yene va ka kala lene, lakãlu wuyaki, lolokavalu, lolupale lua pama kuenda ovimalẽho viuyaki. 3 Pokati komãla va ñala yene, nõlipo umue wa velapo haeye wa loñoloha* u tumbiki kocalo ca isiaye. Kuenje yakeli onjo ya ñala yene.”
4 Pole, ovo va kala lusumba kuenje va popia vati: “Tala! Nda olosoma vivali ka via tẽlele oku talama kovaso aye,+ etu tu ka talama ndati?” 5 Usongui wo kelombe,* la nguluvulu wolupale, lakulu kuenda olondavululi va tuma esapulo ku Yehu vati: “Etu tuakuenje vove kuenda tu linga ovina viosi o tu tuma. Ka tu nõla osoma layimue. Linga ño eci ca sunguluka kovaso ove.”
6 Kuenje eye wa va sonehela ukanda wavali wa popia hati: “Nda vu kasi konele yange kuenda vu yongola oku ndi pokola, ndi neneli ovitue viomãla va ñala yene kuenda hẽla enjui kokuange kowola ndeyi ko Yesirele.”
Ci soka 70 komãla va soma, va kala lalume va kemãlele vo volupale okuti, ovo va kala oku va tekula. 7 Eci va tambula ukanda, va kuata omãla va soma kuenda va va ponda okuti, va soka 70 komanu,+ va kapa ovitue viavo vakualu kuenje va vi tumisa kokuaye ko Yesirele. 8 Omunga yeya yo sapuila hati: “Ovo va nena ovitue viomãla va soma.” Eye hati: “Vi longeki volondunda vivali pombundi yolupale toke komẽle.” 9 Eci eye a tunda lomẽle, wa talama kovaso yomanu vosi kuenda wa popia hati: “Ene ka vu kuete eko.* Ame nda lingila usuanji ñala yange kuenda ndo ponda,+ pole, helie wa ponda omanu vosi ava? 10 Pole, kũlĩhĩ okuti ondaka yosi ya Yehova yina Yehova a popele onjo ya Ahava, yi ka tẽlisiwa*+ kuenda Yehova wa tẽlisa eci eye a popele pocakati cukuenje waye Eliya.”+ 11 Kuenje Yehu wa pondavo omanu vosi va supilepo konjo ya Ahava ko Yesirele, lalume vaye vosi va kemãlele, lakamba vaye kuenda ovitunda viaye,+ ka sile omunu laumue lomuenyo.+
12 Noke eye wa votoka wa enda lonjila yaye ko Samaria. Onjo* angombo va endaile oku kutila olomeme, ya kala vonjila. 13 Yehu wa sangako vamanji va Ahasiya Soma+ yo Yuda kuenda wa va pula hati: “Ene velie?” Ovo vati: “Etu tuamanji va Ahasiya kuenje tu kasi oku enda oku ka kũlĩhĩsa nda omãla va soma lomãla va nasoma* va kasi ciwa.” 14 Eye wa popia lonjanga hati: “Va kuati lomuenyo!” Va va kuata lomuenyo kuenda va va pondela pocisimo conjo angombo va endaile oku kutila olomeme, ci soka 42 komanu. Eye ka ecelele okuti umue o puluka.+
15 Noke lioku tundako, wa sanga Yehonadava+ omõla a Rekava+ una wa kala oku iya oku ñualẽhela laye. Eci Yehu o lama* wo pula hati: “Utima wove wa ndi sungulukila hẽ ndeci utima wange wa ku sungulukila?”
Yonadava wa tambulula hati: “Oco muẽle.”
“Nda oco, nyĩhe eka liove.”
Kuenje Yonadava wa eca eka liaye kokuaye kuenda Yehu wo londisa vekãlu liaye. 16 Kuenje Yehu wa popia hati: “Enju lame, oco o mole ombili ñuetele Yehova.”+ Noke Yehu wo ambata vekãlu liaye liuyaki. 17 Noke Yehu wa pitĩla ko Samaria kuenda wa ponda vosi va supilepo konjo ya Ahava ko Samaria, toke eci a va kundula+ ndeci ci likuata londaka Yehova a popele ku Eliya.+
18 Yehu wongoluila omanu vosi pamosi kuenda wa va sapuila hati: “Ahava wa fendela Baale citito,+ pole, Yehu o ko fendela vali calua. 19 Omo liaco, ñovongeli ovaprofeto vosi va Baale,+ lafendeli vaye vosi kuenda ovitunda viaye+ viosi. Lomue ka ka kambelepo, momo ndi lumbila Baale ocilumba cimue cinene. Omunu wosi wa kambelapo, ka kala lomuenyo.” Pole, Yehu wa kala oku kemba, oco a kundule afendeli va Baale.
20 Yehu wamisako hati: “Tukuli ohongele yimue yilikasi yi lingiwila Baale.” Noke va tukula. 21 Kuenje Yehu wa tuma ondaka ko Isareli yosi kuenda afendeli vosi va Baale veya. Lomue wa kambelapo. Ovo va iñila vonjo* ya Baale+ kuenje onjo ya Baale yeyukile calua. 22 Yehu wa sapuila usongui wociseleko covowalo hati: “Afendeli vosi va Baale va nenelako ovowalo.” Kuenje wa va nenelako ovowalo. 23 Yehu la Yehonadava+ omõla a Rekava va iñila vonjo ya Baale. Yehu wa sapuila afendeli va Baale hati: “Sandiliyi lutate oco ka mu ka kaile afendeli va Yehova, mu kaile lika afendeli va Baale.” 24 Noke va iñila oco va ece olombanjaile kuenda ovilumba vioku pia elisi. Yehu wa sile eci ci soka 80 kakuenje vaye posamua, loku va sapuila hati: “Nda umue pokati komanu ñasi oku sia peka liene wa tila, vu feti omuenyo waye lomuenyo wene.”
25 Eci a mala oku eca ocilumba coku pia elisi, Yehu wa sapuila olondavululi* loloñuatisi hati: “Iñili kuenda va pondi! Lomue ka ka tunde!”+ Kuenje olondavululi loloñuatisi va va ponda losipata kuenda va imba atimba avo posamua noke va enda toke kocitumãlo ci kola* vokati konjo ya Baale. 26 Noke va tundisa olongunji vi kola+ vionjo ya Baale kuenda va vi timĩha.+ 27 Va nyõla olongunji vi kola+ via Baale, va nyõlavo onjo ya Baale+ kuenda va yi lingisa olokalete okuti, oko vi kasi toke etaili.
28 Kuenje Yehu wa kundula efendelo lia Baale ko Isareli. 29 Pole, Yehu ka liwekelepo oku endela vakandu Yerevoama omõla a Nevata a kokisa va Isareli oku linga ndeci oku fendela olongombe viulu via kala ko Betele kuenda ko Dani.+ 30 Yehova wa sapuila Yehu hati: “Omo okuti wa talavaya ciwa kuenda wa linga eci ca sunguluka kovaso ange, poku tẽlisa cosi utima wange wa yonguile lonjo ya Ahava,+ ovitumbulukila vikuãla viomãla vove, vi ka tumãla kocalo co Isareli.”+ 31 Pole, Yehu ka endelele Vocihandeleko ca Yehova Suku ya Isareli lutima waye wosi.+ Eye ka liwekelepo oku endela vakandu Yerevoama a kokisa va Isareli oku linga.+
32 Koloneke viaco, Yehova wa fetika oku tepulula ocikanjo co Isareli. Hasahele wamamako oku linga uyaki locikanjo co Isareli,+ 33 tunde kutundilo wo Yordão, toke kofeka yosi yo Gileada okuti, va Gadi, va Ruvene kuenda va Manase,+ tunde ko Aroere yi kasi ocipepi Locimbota* co Arinone toke ko Gileada kuenda ko Basiane.+
34 Catiamẽla konepa yikuavo yulandu womuenyo wa Yehu, lovina viosi a linga lunene waye wosi, ka via sonehiwile hẽ velivulu liulandu wolotembo violosoma vio ko Isareli? 35 Noke Yehu wa ka puyuka la vakukululu yaye kuenda vo kenda vo Samaria; kuenje omõlaye Yehoahasi+ wa linga osoma pomangu yaye. 36 Otembo* Yehu a viala o Isareli ya tẽla 28 kanyamo vo Samaria.
11 Eci Ataliya+ ina ya Ahasiya a mola okuti omõlaye wa fa,+ wa votoka kuenda wa kundula ocikoti cosi cusoma.*+ 2 Pole, Yehoseva omõla ukãi wa Soma Yehorama, mukãi wa Ahasiya, wa tikula Yoasi+ omõla a Ahasiya kuenda wo upa pokati komãla va soma va laikele oku pondiwa kuenda wo seleka vohondo yimue yo vokati kumue lukãi ukuakutata omõla. Ovo va linga cosi citava oco vo vundise kovaso a Ataliya kuenje ka vo pondele. 3 Eye wa kala lukãi waco anyamo epandu okuti, vo salamisa vonjo ya Yehova osimbu Ataliya a kala oku viala vofeka.
4 Kunyamo wepanduvali, Yehoyada wa kovongela konjo ya Yehova asongui vocita, lolondavululi vio ko Kari kuenda olondavululi vio kelombe.*+ Eye wa linga lavo ocisila cimue kuenda wa va tuma oku lisila vonjo ya Yehova, noke wa va lekisa omõla a soma.+ 5 Eye wa va sapuila hati: “Eci vu linga ceci: Onepa yene yimue yatatu yi ka kala kupange Kesambata loku lavulula onjo* ya soma,+ 6 onepa yikuavo yatatu yi ka kala Pombundi Yociseveto kuenda onepa yikuavo yatatu yi ka kala pombundi konyima yolondavululi vo kelombe. Ene vu ka li tambulamo oku lava onjo. 7 Ovimunga viene vivali okuti, ka vi lingi upange Kesambata, vi sukila oku lava onjo ya Yehova oco vi teyuile soma. 8 Ene vu sukila oku ñuala soma kolonele viosi, omunu lomunu lovimalẽho viaye viuyaki peka. Omunu wosi iñila vokati kovolala, o ka pondiwa. Kali kumue la soma kuosi eye a enda.”*
9 Asongui vocita+ va linga cosi ndeci Yehoyada ocitunda a handelekele. Omo liaco, omunu lomunu wambata alume vaye vana va kala kupange Kesambata kumue la vana ka va kaile kupange Kesambata kuenje va enda ku Yehoyada ocitunda.+ 10 Noke ocitunda ca eca kasongui vocita olonjelia loviyepelo vinene vina via tiamẽlele ku Soma Daviti okuti, via kala vonjo ya Yehova. 11 Olondavululi vio kelombe+ via talama kovitumãlo viavo omunu lomunu lovimalẽho viaye viuyaki peka, oku upisa konele yondio yonjo toke konele yepĩli yonjo okuti, va kala ocipepi lutala+ kuenda ocipepi lonjo kuenje vosi va ñuala soma. 12 Noke Yehoyada wa nena omõla a soma+ posamua vo kapa ekolowa kuenda Uvangi*+ kuenje vo lingisa osoma loku u waveka. Ovo va fetika oku pandula peka vati: “Soma a kale hũ lomuenyo!”+
13 Eci Ataliya a yeva onjuela yomanu va kala oku lupuka, vepuluvi liaco, eye weya komanu va kala vonjo ya Yehova.+ 14 Noke eye wa mola okuti, soma o tãi ocipepi longunji ndocituwa caye.+ Asongui la vakuakusika alumbeta+ va kala la soma kuenda omanu vosi vo vofeka va kuata esanju loku sika alumbeta. Omo liaco, Ataliya wa tola uwalo waye kuenje wa kaluka lolukandi hati: “Eci usuanji! Eci usuanji!” 15 Pole, Yehoyada ocitunda wa handeleka asongui vocita,+ vana va nõliwila oku songuila olohoka kuenje wa va sapuila hati: “Upi ukãi u pokati kovilala kuenda nda umue wo kuama, pondi omunu waco losipata!” Momo ocitunda ca popele citi: “Ko ka pondeli ukãi waco vonjo ya Yehova.” 16 Omo liaco, va kuata ukãi waco kuenje eci a neniwa pocitumãlo cina olokavalu via siata oku iñilila vonjo* ya soma,+ opo a pondiwila.
17 Noke Yehoyada wa lisila eye muẽle ocisila cimue pokati ka Yehova la soma kuenda lomanu cokuti,+ va kamamako oku kala omanu va Yehova, eye wa lingavo ocisila cimue pokati ka soma lomanu.+ 18 Noke omanu vosi vo vofeka va enda konjo* ya Baale va nyõla ovotala aye+ kuenda va nyanyõla pe oviñumañuma viaye+ kuenje va pondela Matana ocitunda ca Baale+ kovaso yovotala.
Noke ocitunda ca nõla asongui vonjo ya Yehova.+ 19 Handi vali, congolola asongui vocita,+ olondavululi vio Kari, olondavululi vio kelombe+ kuenda omanu vosi vo vofeka oco va kuame soma oku tunda vonjo ya Yehova kuenje va enda konjo* ya soma poku pita vonjila yombundi yondavululi yelombe. Noke eye wa tumãla kocalo colosoma.+ 20 Omo liaco, omanu vosi vofeka va sanjukile kuenda olupale lua kuata ombembua, momo ovo va ponda Ataliya losipata vonjo ya soma.
21 Yoasi+ wa kuata anyamo epanduvali eci a linga osoma.+
12 Kunyamo wepanduvali wuviali wa Yehu,+ Yoasi+ wa linga osoma kuenda wa viala 40 kanyamo vo Yerusalãi. Onduko ya inaye ya kala Siviya wo ko Beresieva.+ 2 Yoasi wamamako oku linga eci ca sunguluka kovaso a Yehova vokuenda kuoloneke viosi Yehoyada ocitunda a kala oku u pindisa. 3 Pole, ovitumãlo via lepa+ ka via nyõliwile, omanu vamamako oku eca ovilumba kuenda oku tuimisila owisi wovilumba viaco kovitumãlo via lepa.
4 Yoasi wa sapuila ovitunda hati: “Tikuli olombongo viosi vi neniwa vonjo ya Yehova ndovilumba vi kola,+ lolombongo vina omunu lomunu a sukila oku eca,+ lolombongo via kisikiwile ndondando yomunu lomunu kuenda olombongo viosi omunu lomunu a vetiyiwa lutima waye oku vi nena konjo ya Yehova.+ 5 Ovitunda vi ka vi tambula omunu lomunu ku vana va vi eca* kuenda vi ka semũlũla lavio onjo kolonele viosi via nyõleha.”*+
6 Kunyamo 23 wuviali wa Soma Yoasi, ovitunda handi ka via semũlũile onjo.+ 7 Soma Yoasi wa kovonga Yehoyada+ ocitunda kuenda ovitunda vikuavo wa vi sapuila hati: “Momo lie ka wa semũlũili onjo? Kaliye ko ka tambuli vali olombongo ku vana va ku ĩhi, te lika nda wa semũlũli lavio onjo.”+ 8 Kuenje ovitunda via tava okuti, ka vi tambula vali olombongo komanu kuenda havioko vali vi ka semũlũla onjo.
9 Yehoyada ocitunda wa tikula ocikasia coku seleka olombongo,+ wa linga epangu limue konuviko kuenda wa ci kapa ocipepi lutala konele yondio yoku iñilila vonjo ya Yehova. Ovitunda vina via talavayele ndavakuambundi, omo vi kapa olombongo viosi via enda oku neniwa vonjo ya Yehova.+ 10 Olonjanja viosi eci ovio vi mola okuti, vocikasia coku seleka olombongo mua kala olombongo vialua, usonehi wa soma locitunda cinene va enda oku iya oku ongolola* loku tenda olombongo via neniwa konjo ya Yehova.+ 11 Ovo va enda oku eca olombongo via tendiwa ku vana va nõliwile oku linga upange vonjo ya Yehova. Olonalavayi viaco via enda oku feta lavio olokalupindelu kuenda vakuakutunga okuti, ovo va enda oku linga upange konjo ya Yehova,+ 12 la vakuakutunga lovawe kuenda vakuakuteta ovawe. Ovo va endavo oku landa avaya lovawe a fẽliwa oco va semũlũle onjo ya Yehova kuenda va endavo oku talavaya lolombongo viaco poku feta lavio ovina vikuavo vioku semũlũla onjo.
13 Pole, olombongo vina via enda oku neniwa konjo ya Yehova, ka via pangiwile lavio olombasiya viopalata, ovikuata vioku teta omutusila, atiyela, alumbeta,+ pamue ocikuata cikuavo culu ale copalata oco vi kapiwe vonjo ya Yehova.+ 14 Ovo va enda oku eca lika olombongo ku vana va linga upange kuenje ovo va semũlũla lavio onjo ya Yehova. 15 Ovo ka va endaile oku pulisa ondando komanu vana va endaile oku eca olombongo oco va ece kolonalavayi, momo va kala omanu va koleliwa.+ 16 Omo liaco, olombongo viovilumba vieko,+ lolombongo viovilumba viekandu, ka va endaile oku vi nena konjo ya Yehova; ovio via tiamẽlele kovitunda.+
17 Kotembo yaco, Hasahele+ soma yo Suria wa enda oku ka liyaka lo Gati+ kuenda wa yi tambula, noke wa ñualẽlapo* o Yerusalãi.+ 18 Noke Yoasi Soma yo Yuda wa tikula ovilumba viosi vi kola vina vakukululu yaye Yehosafata, Yehorama kuenda Ahasiya olosoma vio ko Yuda via kolisile, wopavo ovilumba viaye muẽle vi kola lulu wosi wa sangiwile vohondo yoku seleka ovokuasi vionjo ya Yehova kuenda vionjo* ya soma, yu wa vi tuma ku Hasahele soma yo Suria.+ Kuenje wa liwekapo oku katukila o Yerusalãi.
19 Catiamẽla konepa yikuavo yulandu womuenyo wa Yoasi, lovina viosi eye a linga, ka via sonehiwile hẽ velivulu liulandu wolotembo violosoma vio ko Yuda? 20 Akuenje vaye va liongolola oco vo lingile usuanji+ kuenje Yoasi vo pondela ocipepi lonjo yo Kondunda yeve,*+ konjila yendela ko Sila. 21 Akuenje vaye okuti, Yoasakare omõla a Simeata kuenda Yehosavada omõla a Siomere, ovo vo lemẽha loku u ponda.+ Ovo vo kenda la vakukululu yaye Volupale lua Daviti kuenje omõlaye Amasiya wa linga osoma pomangu yaye.+
13 Kunyamo 23 wuviali wa Yoasi+ omõla a Ahasiya+ soma yo Yuda, Yehoahasi omõla a Yehu+ wa linga osoma yo Isareli vo Samaria kuenda wa viala 17 kanyamo. 2 Eye wamamako oku linga ovina ka via sungulukile kovaso a Yehova loku kuama vekandu Yerevoama omõla a Nevata a kokela va Isareli oku linga.+ Eye ka liwekelepo oku ci linga. 3 Kuenje onyeño ya Yehova+ ya wengukila o Isareli,+ noke vokuenda kuoloneke viavo viosi, wa va eca peka lia Hasahele Soma+ yo Suria kuenda peka lia Benehadada+ omõla a Hasaele.
4 Noke liotembo yimue, Yehoahasi wa pinga ocali* ca Yehova kuenje Yehova wa tambulula epingilo liaye, momo wa mola ndomo soma yo Suria a kala oku kangisa va Isareli.+ 5 Yehova wa sokiya onjovoli yimue+ oco a va popele peka lia va Suria kuenje va Isareli va ponduile oku kala kolonjo viavo ndeci ca kala kosimbu.* 6 (Pole, ovo ka va liwekelepo oku endela vekandu lia vakuanjo ya Yerevoama, lina eye a kokela va Isareli oku linga.+ Ovo vamamako vekandu liaco* kuenda ombueti yi kola*+ yamamako oku kala ko Samaria.) 7 Yehoahasi wa siala lika leci ci soka 50 kalume vakuakuendela kolokavalu, 10 kakãlu kuenda 10.000 kasualali va endela posi, momo soma yo Suria wa va nyõla+ loku va liataila ndoneketela yo pocimbandi.+
8 Catiamẽla konepa yikuavo yulandu womuenyo wa Yehoahasi, lovina viosi eye a linga, lunene waye, ka via sonehiwile hẽ velivulu liulandu wolotembo violosoma vio ko Isareli? 9 Yehoahasi wa ka puyuka la vakukululu yaye kuenda vo kenda vo Samaria;+ kuenje omõlaye Yoasi wa linga osoma pomangu yaye.
10 Kunyamo 37 wuviali wa Yoasi Soma yo Yuda, Yoasi+ omõla a Yehoahasi wa linga osoma yo Isareli vo Samaria kuenda wa viala 16 kanyamo. 11 Eye wamamako oku linga eci ka ca sungulukile kovaso a Yehova kuenda ka liwekelepo oku linga akandu osi Yerevoama omõla a Nevata a kokela va Isareli oku linga.+ Eye wamamako* oku linga akandu aco.
12 Catiamẽla konepa yikuavo yulandu womuenyo wa Yoasi, lovina viosi eye a linga, lunene waye kuenda ndomo a liyaka la Amasiya soma yo Yuda,+ ka via sonehiwile hẽ velivulu liulandu wolotembo violosoma vio ko Isareli? 13 Noke Yoasi wa ka puyuka la vakukululu yaye kuenda Yerevoama*+ wa tumãla kocalo caye. Kuenje Yoasi wa kendiwa vo Samaria kumue lolosoma vio ko Isareli.+
14 Eci Elisia+ a kuatiwile luvei umue wa laikele oku u ponda, Yoasi soma yo Isareli wa enda kokuaye kuenda wa lilila kovaso aye loku popia hati: “A isiange, a isiange! Ekãlu lio Isareli la vakuakuendela kolokavalu viaye!”+ 15 Elisia wo sapuila hati: “Tikula ohonji kuenda ovisongo.” Eye wa tikula ohonji lovisongo. 16 Elisia wa sapuila soma yo Isareli hati: “Lipongiya oco wimbe usongo.” Eye wa lipongiya, noke Elisia wa kapa ovaka aye kilu liovaka a soma. 17 Elisia wamisako hati: “Yikula onjanela yi kasi konele yo kutundilo.” Eye wa yikula. Elisia hati: “Imba usongo!” Eye wa imba. Elisia wa popia hati: “Usongo weyulo* lia Yehova, usongo weyulo ku* va Suria! Ove o ka yula va Suria ko Afeke+ toke eci va puapo.”
18 Elisia wamisako hati: “Tikula ovisongo,” eye wa vi tikula. Noke wa sapuila soma yo Isareli hati: “Vi veta posi.” Kuenje wa veta posi olonjanja vitatu, noke wa liwekapo. 19 Ukuenje wa Suku yocili wa tema laye kuenda wa popia hati: “Ove wa sukilile oku veta posi olonjanja vitãlo ale epandu! Va Suria nda wa va yula toke eci va puapo, kaliye o yula lika o Suria olonjanja vitatu.”+
20 Noke Elisia wa fa kuenda wa kendiwa. Kua kala ovimunga viovingumba via va Moavi+ via enda oku iya vofeka kefetikilo liunyamo.* 21 Omanu vamue va kala oku kenda ulume umue kuenje va mola ocimunga covingumba, yu va imba lonjanga ocivimbi caco vocitumãlo va kenda Elisia kuenje va tila. Ocivimbi caco ca lamba kakepa a Elisia noke ca pinduka+ kuenda ca talama.
22 Hasahele Soma+ yo Suria wa kangisa va Isareli+ oloneke viosi via Yehoahasi. 23 Noke Yehova wa lekisa ocali kuenda ohenda kokuavo,+ wa sakalalele lavo omo liocisila a lingile la Avirahama,+ la Isake+ kuenda Yakoba.+ Eye ka yonguile oku va kundula kuenda ka va tundisile kovaso aye toke etaili. 24 Eci Hasahele soma yo Suria a fa, omõlaye Benehadada wa linga osoma pomangu yaye. 25 Yoasi omõla a Yehoahasi wa tambula ku Benehadada omõla a Hasahele alupale eye a tambuile kuyaki a lingile la isiaye Yehoahasi. Yoasi wo yula olonjanja vitatu+ kuenda wa tambula alupale a Isareli.
14 Kunyamo wavali wuviali wa Yoasi+ omõla a Yehoahasi soma yo Isareli, Amasiya omõla a Yoasi Soma yo Yuda wa linga osoma. 2 Eye wa kuata 25 kanyamo eci a linga osoma kuenda wa viala 29 kanyamo vo Yerusalãi. Onduko ya inaye ya kala Yehoadina wo ko Yerusalãi.+ 3 Eye wamamako oku linga eci ca sunguluka kovaso a Yehova, pole, ka lingile ndeci Daviti+ kukululu yaye. Eye wa linga ovina viosi ndeci isiaye Yoasi a lingile.+ 4 Pole, ovitumãlo via lepa ka via nyõliwile,+ omanu vamamako oku eca ovilumba kuenda oku tuimisila owisi wovilumba viaco kovitumãlo via lepa.+ 5 Eci usoma wa pama vemẽhi liuviali waye, eye wa ponda akuenje vaye vana va pondele isiaye, soma.+ 6 Pole, eye ka pondele omãla volomondi viaco ndeci ci likuata locihandeleko ca Yehova ca sonehiwa velivulu Liovihandeleko lia Mose lia popia hati: “Olonjali ka vi ka pondiwe omo liomãla vavo kuenda omãla ka va ka pondiwe omo liolonjali viavo; omunu lomunu a pondiwe omo liekandu liaye muẽle.”+ 7 Eye wa ponda va Edome+ Vocimbota Comongua+ kuenje kua fa 10.000 komanu kuenda kuyaki waco wa tambula o Sela+ kuenje onduko yalio ya pongoluiwa okuti, Yoketele toke etaili.
8 Amasiya wa tuma olomunga ku Yoasi omõla a Yehoahasi, omõla a Yehu soma yo Isareli loku popia hati: “Enju, tu liyake pokati.”*+ 9 Soma Yoasi wo ko Isareli wa tuma esapulo eli ku soma Amasiya wo ko Yuda liokuti: “Ocikũla colosongo ko Levanone ca tuma esapulo limue kuti wosedru wo Levanone liokuti: ‘Eca omõlove ukãi oco a linge ukãi womõlange.’ Pole, ocinyama cimue co vusenge wo Levanone, ca pita ocipepi laco kuenje ca kosa ocikũla colosongo. 10 Ocili, ove wa kundula o Edome+ kuenje utima wove wa lekisa epela. Sanjukila ulamba wove, pole, kala konjo* yove. Momo lie o li kokelela efengi loku kupuka poku nenela enyõleho o Yuda kumue love?” 11 Pole, Amasiya ka yevelele.+
Omo liaco, Soma Yoasi wo ko Isareli wa enda kuenje eye kumue la Soma Amasiya wo ko Yuda va liyaka pokati ko Bete-Siemese+ yina yi tiamẽla ko Yuda.+ 12 Yuda wa yuliwa lo Isareli kuenje omunu lomunu wa tilila konjo* yaye. 13 Soma Yoasi wo ko Isareli wa kuata Soma Amasiya wo ko Yuda, omõla a Yoasi omõla a Ahasiya ko Bete-Siemese. Noke veya ko Yerusalãi kuenje wa linga epangu limue lia kuatele 400 kovikeya* vocimbaka co Yerusalãi oku upisa Pombundi yo Efarimi+ toke Pombundi Lievindi.+ 14 Eye wopa ulu wosi lopalata kuenda ovikuata viosi via sangiwa vonjo ya Yehova kuenda vohondo yoku seleka ovokuasi vionjo* ya soma, oku kongelamo olomandekua. Noke eye wa tiukila ko Samaria.
15 Catiamẽla konepa yikuavo yulandu womuenyo wa Yoasi, lovina viosi eye a linga, lunene waye kuenda ndomo a liyaka la Amasiya soma yo Yuda, ka via sonehiwile hẽ velivulu liulandu wolotembo violosoma vio ko Isareli? 16 Noke Yoasi wa ka puyuka la vakukululu yaye kuenda wa kendiwa vo Samaria+ kumue lolosoma vio ko Isareli; kuenje omõlaye Yerevoama*+ wa linga osoma pomangu yaye.
17 Amasiya+ omõla a Yoasi soma yo Yuda wa kala vali komuenyo 15 kanyamo noke liolofa via Yoasi+ omõla a Yehoahasi soma yo Isareli.+ 18 Catiamẽla konepa yikuavo yulandu womuenyo wa Amasiya, ka wa sonehiwile hẽ velivulu liulandu wolotembo violosoma vio ko Yuda? 19 Noke vo lingila usuanji+ ko Yerusalãi kuenda wa tilila ko Lakisi, pole, va tuma alume oku u landula toke ko Lakisi kuenje oko vo pondela. 20 Omo liaco, ovo vo wambatela kolokavalu poku u nena kuenje eye wa kendiwa kumue la vakukululu yaye ko Yerusalãi Volupale lua Daviti.+ 21 Omanu vosi vo ko Yuda va tikula Asariya*+ una wa kuatele 16 kanyamo+ kuenje vo lingisa osoma pomangu ya isiaye Amasiya.+ 22 Eye wa tumbulula o Elati+ kuenda wa yi tiula ko Yuda. Kotembo yaco, soma* wa kala ale oku puyuka la vakukululu yaye.+
23 Kunyamo 15 wuviali wa Amasiya omõla a Yoasi soma yo Yuda, Yerevoama+ omõla a Yoasi Soma yo Isareli wa linga osoma vo Samaria kuenda wa viala 41 kanyamo. 24 Eye wamamako oku linga eci ka ca sungulukile kovaso a Yehova. Ka liwekelepo oku linga akandu osi Yerevoama omõla a Nevata a kokela va Isareli oku linga.+ 25 Eye wa tumbulula olongave vio ko Isareli oku upisa ko Lebo-Hamati*+ toke Kokalunga ko Araba,*+ ndeci ci likuata londaka Yehova Suku ya Isareli a popele pocakati cukuenje waye Yona,+ omõla a Amitai uprofeto wo ko Gati-Hefere.+ 26 Yehova wa mola okuti ohali ya va Isareli ya luile.+ Ka kua siale laumue oco a kuatise Isareli ndaño vana va sumua ale vana va hongua. 27 Pole, Yehova wa likuminyile okuti, ka ka imũla onduko ya Isareli vemẽhi liovailu.+ Omo liaco, eye wa va popela leka lia Yerevoama omõla a Yoasi.+
28 Catiamẽla konepa yikuavo yulandu womuenyo wa Yerevoama, lovina viosi a linga, lunene waye kuenda ndomo a yaka loku tumbulula o Damasko,+ lo Hamati+ ko Yuda loku vi eca vali ko Isareli, ka via sonehiwile hẽ velivulu liulandu wolotembo violosoma vio ko Isareli? 29 Noke Yerevoama wa ka puyuka la vakukululu yaye kumue lolosoma vio ko Isareli; kuenje omõlaye Sakariya+ wa linga osoma pomangu yaye.
15 Kunyamo 27 wuviali wa Yerevoama* soma yo Isareli, Asariya*+ omõla a Amasiya+ soma yo Yuda wa linga osoma.+ 2 Eye wa kuata 16 kanyamo eci a linga osoma kuenda wa viala 52 kanyamo vo Yerusalãi. Onduko ya inaye ya kala Yekoliya wo ko Yerusalãi. 3 Eye wamamako oku linga eci ca sunguluka kovaso a Yehova ndeci isiaye Amasiya a lingile.+ 4 Pole, ovitumãlo via lepa ka via nyõliwile,+ omanu vamamako oku eca ovilumba kuenda oku tuimisila owisi wovilumba viaco kovitumãlo via lepa.+ 5 Yehova wa veta soma lovilundu kuenda eye wamamako oku kala lovilundu+ toke keteke liolofa viaye; eye wa kala vonjo yimue yi likasilili+ osimbu Yotama omõla a soma+ a kala oku songuila onjo,* oku sombisa omanu vofeka.+ 6 Catiamẽla konepa yikuavo yulandu womuenyo wa Asariya,+ lovina viosi a linga, ka via sonehiwile hẽ velivulu liulandu wolotembo violosoma vio ko Yuda? 7 Noke Asariya wa ka puyuka la vakukululu yaye+ kuenda vo kenda kumue la vakukululu yaye Volupale lua Daviti; kuenje omõlaye Yotama wa linga osoma pomangu yaye.
8 Kunyamo 38 wuviali wa Asariya Soma+ yo Yuda, Sakariya+ omõla a Yerevoama wa linga osoma yo Isareli vo Samaria kuenda wa viala olosãi epandu. 9 Eye wa linga eci ka ca sungulukile kovaso a Yehova, ndeci vakukululu yaye va linga. Eye ka liwekelepo oku linga akandu Yerevoama omõla a Nevata a kokisa va Isareli oku linga.+ 10 Sialume omõla a Yavesi wo lingila usuanji kuenda wo pondela+ ko Yivileama.+ Noke yoku u ponda, Sialume wa linga osoma pomangu yaye. 11 Catiamẽla konepa yikuavo yulandu womuenyo wa Sakariya, wa sonehiwa velivulu liulandu wolotembo violosoma vio ko Isareli. 12 Eci ca tẽlisa ondaka Yehova a sapuilile Yehu yokuti: “Ovitumbulukila vikuãla viomãla vove,+ vi ka tumãla kocalo co Isareli.”+ Kuenje ca lingiwa.
13 Sialume omõla a Yavesi wa linga osoma kunyamo 39 wuviali wa Usiya soma+ yo Yuda kuenda wa viala osãi yimosi vo Samaria. 14 Menahema omõla a Gadi, wa tunda ko Tirisa+ toke ko Samaria kuenje wa ponda Sialume+ omõla a Yavesi ko Samaria. Noke lioku u ponda, wa linga osoma pomangu yaye. 15 Catiamẽla konepa yikuavo yulandu womuenyo wa Sialume lusuanji a linga, via sonehiwa velivulu liulandu wolotembo violosoma vio ko Isareli. 16 Menahema noke lioku tunda ko Tirisa, wa kundula o Tifisa lomanu vosi va kalamo kuenda ocikanjo caco, omo okuti, ka vo yuluileko olombundi. Eye wa li kundula kuenda akãi vemina wa va tola ovaimo.
17 Kunyamo 39 wuviali wa Asariya Soma yo Yuda, Menahema omõla a Gadi, wa linga osoma yo Isareli kuenda wa viala anyamo ekũi vo Samaria. 18 Eye wamamako oku linga eci ka ca sungulukile kovaso a Yehova. Eye ka liwekelepo oku linga akandu osi Yerevoama omõla a Nevata a kokisa va Isareli oku linga+ oloneke viaye viosi. 19 Pulu soma+ yo Asuria weya vofeka kuenda Menahema wa eca ku Pulu 1.000 kolotalendo* viopalata, oco eye o kuatise oku pamisa usoma waye.+ 20 Menahema wongolola opalata yo vo Isareli poku yi tambula kalume olohuasi lava va kemãla.+ Eye wa eca ku soma yo Asuria 50 kolosiekele* viopalata viomunu lomunu. Kuenje soma yo Asuria wa tiukila kuenda ka kalele vofeka. 21 Catiamẽla konepa yikuavo yulandu womuenyo wa Menahema,+ lovina viosi a linga, ka via sonehiwile hẽ velivulu liulandu wolotembo violosoma vio ko Isareli? 22 Menahema wa ka puyuka la vakukululu yaye; kuenje omõlaye Pekahiya wa linga osoma pomangu yaye.
23 Kunyamo 50 wuviali wa Asariya Soma yo Yuda, Pekahiya omõla a Menahema wa linga osoma yo Isareli vo Samaria kuenda wa viala anyamo avali. 24 Eye wamamako oku linga eci ka ca sungulukile kovaso a Yehova. Eye ka liwekelepo oku linga akandu Yerevoama omõla a Nevata a kokisa va Isareli oku linga.+ 25 Oñuatisi yaye Peka+ omõla a Remaliya, wa lingila usuanji Pekahiya kuenda wo pondela vo Samaria kosapalalo yi kuete oviteyuilo yonjo* ya soma kumue la Aregove kuenda Ariye. Eye wa kala lalume va soka 50 vo ko Gileada; noke yoku u ponda eye wa linga osoma pomangu yaye. 26 Catiamẽla konepa yikuavo yulandu womuenyo wa Pekahiya, lovina viosi a linga, via sonehiwa velivulu liulandu wolotembo violosoma vio ko Isareli.
27 Kunyamo 52 wuviali wa Asariya Soma yo Yuda, Peka+ omõla a Remaliya wa linga osoma yo Isareli ko Samaria kuenda wa viala 20 kanyamo. 28 Eye wamamako oku linga eci ka ca sungulukile kovaso a Yehova kuenda ka liwekelepo oku linga akandu Yerevoama omõla a Nevata a kokisa va Isareli oku linga.+ 29 Koloneke via Peka Soma yo Isareli, Tigilati-Pilesere Soma+ yo Asuria wa katukila kuenda wa tambula o Iyoni, o Abelebetimaka,+ o Yanoha, o Kedesi,+ o Hasore, o Gileada+ kuenda o Galilea okuti, ofeka yosi yo Nafitali+ kuenje wambata omanu vosi kumandekua ko Asuria.+ 30 Kuenje Hosea+ omõla a Ela wa lingila usuanji Peka omõla a Remaliya kuenje wo lemẽha loku u ponda; noke wa linga osoma pomangu yaye kunyamo 20 wuviali wa Yotama+ omõla a Usiya. 31 Catiamẽla konepa yikuavo yulandu womuenyo wa Peka, lovina viosi a linga, via sonehiwa velivulu liulandu wolotembo violosoma vio ko Isareli.
32 Kunyamo wavali wuviali wa Peka omõla a Remaliya soma yo Isareli, Yotama+ omõla a Usiya Soma+ yo Yuda wa linga osoma. 33 Eye wa kuata 25 kanyamo eci a linga osoma kuenda wa viala 16 kanyamo vo Yerusalãi. Onduko ya inaye ya kala Yerusia omõla ukãi wa Sadoke.+ 34 Eye wamamako oku linga eci ca sunguluka kovaso a Yehova, ndeci isiaye Usiya a lingile.+ 35 Pole, ovitumãlo via lepa ka via nyõliwile, omanu vamamako oku eca ovilumba kuenda oku tuimisila owisi wovilumba viaco kovitumãlo via lepa.+ Eye wa tunga ombundi yo konano yonjo ya Yehova.+ 36 Catiamẽla konepa yikuavo yulandu womuenyo wa Yotama, lovina eye a linga, ka via sonehiwile hẽ velivulu liulandu wolotembo violosoma vio Yuda? 37 Koloneke viaco, Yehova wa tuma Recini soma yo Suria kuenda Peka+ omõla a Remaliya oco va ka liyake lo Yuda.+ 38 Noke Yotama wa ka puyuka la vakukululu yaye kuenda wa kendiwa kumue la vakukululu yaye Volupale lua Daviti kukululu yaye. Kuenje omõlaye Ahasi wa linga osoma pomangu yaye.
16 Kunyamo 17 wuviali wa Peka omõla a Remaliya, Ahasi+ omõla a Yotama Soma yo Yuda wa linga osoma. 2 Ahasi wa kuata 20 kanyamo eci a linga osoma kuenda wa viala 16 kanyamo vo Yerusalãi. Eye ka lingile eci ca sunguluka kovaso a Yehova Suku yaye ndeci Daviti kukululu yaye a lingile.+ 3 Eye wa endaila vonjila yolosoma vio Isareli+ kuenda wa yoka omõlaye vondalu*+ ndocilumba poku kuama ovilinga viumbondo violofeka+ vina Yehova a tundisile kovaso ya va Isareli. 4 Handi vali, wamamako oku eca ovilumba loku tuimisila owisi wovilumba kovitumãlo via lepa,+ koviwulu kuenda vemẽhi lioviti viosi via pulika.+
5 Noke Soma Recini wo ko Suria kuenda Peka omõla a Remaliya soma yo Isareli, veya oco va linge uyaki lo Yerusalãi.+ Ovo va ñuala ocingonja Ahasi, pole, ka va tẽlele oku tambula olupale. 6 Kotembo yaco, Recini Soma yo Suria wa tiuwiya o Elati+ ku Edome noke yoku tundisa va Yudea* ko Elati. Kuenje va Edome va iñila vo Elati kuenda va tungamo toke koloneke vilo. 7 Noke Ahasi wa tuma olomunga ku Tigilati-Pilesere+ Soma yo Asuria hati: “Ame ndukuenje wove kuenda ndimõlove. Enju, ndi yovole peka lia soma yo Suria kuenda peka lia soma yo Isareli vina vi kasi oku ñatukila.” 8 Ahasi wopa opalata, lulu via kala vonjo ya Yehova kuenda evi via kala vohondo yoku seleka ovokuasi vionjo* ya soma kuenje wa vi tuma ndovitukiko ku soma yo Asuria.+ 9 Soma yo Asuria wa tava kepingilo liaye kuenje wa enda ko Damasko kuenda wa yi tambula loku ambata omanu vaco kumandekua ko Kiri,+ yu wa ponda Recini.+
10 Noke Soma Ahasi wa enda ko Damasko, oku ka lisanga la Tigilati-Pilesere Soma yo Asuria. Eci a mola utala wa kala ko Damasko, Soma Ahasi wa tumisa oseteko yutala kocitunda Uriya, yi lekisa ndomo utala waco wa pangiwa.+ 11 Ocitunda Uriya+ ca tunga utala umue+ loku kuama olonumbi viosi Soma Ahasi wa kala ko Damasko o tumisa. Ocitunda Uriya ca malusula oku tunga utala osimbu Soma Ahasi ka tiukile ko Damasko. 12 Eci soma a tiuka ko Damasko kuenje wa mola utala, wamela kutala waco kuenda wa lumbilako ovilumba.+ 13 Kuenje wamamako oku lumba ocilumba caye coku pia elisi loku tuimisa owisi wovilumba violomema; eye wa pesila kutala ovilumba viaye vioku nyua kuenda wa nyĩlako osonde yovilumba viaye viombembua. 14 Noke utala wosipi+ una wa kala kovaso a Yehova okuti, kovaso yonjo, pokati kutala waye muẽle lonjo ya Yehova, wa u sondolola loku u kapa konele yo konano yutala waye muẽle. 15 Soma Ahasi wa handeleka ocitunda Uriya+ hati: “Tuimisa owisi wocilumba coku pia elisi ceciwa komẽle kutala unene,+ koñolosi lumbilako ocilumba colomema,+ ocilumba coku pia elisi ca soma, locilumba caye colomema, lovilumba vioku pia elisi, lovilumba violomema kuenda ovilumba vioku nyua viomanu vosi. O sukilavo oku nyĩla kutala osonde yosi yovilumba vioku pia elisi losonde yosi yovilumba vikuavo. Catiamẽla kutala wosipi, noke ndi sokiya eci ndi linga lawo.” 16 Ocitunda Uriya ca linga cosi Soma Ahasi o handelekele.+
17 Soma Ahasi wa teta vovinimbu alukuki o kolonele viotuakãlu+ kuenda wopako olombasiya via kalamo,+ wopavo Okalunga ka kala kilu liolongombe viosipi+ kuenje wa vi kapa posi ya kanduiwa lovawe.+ 18 Eye wopa konjo ya Yehova ocitumãlo ca sitikiwa haico ca tungiwila konjo, ca sokiyiwila eteke Liesambata, eye wopavo ombundi ya Soma; wa ci lingila omo lia soma yo Asuria.
19 Catiamẽla konepa yikuavo yulandu womuenyo wa Ahasi lovina eye a linga, ka via sonehiwile hẽ velivulu liulandu wolotembo violosoma vio Yuda?+ 20 Noke Ahasi wa ka puyuka la vakukululu yaye kuenda wa kendiwa kumue la vakukululu yaye Volupale lua Daviti; kuenje omõlaye Hesekiya*+ wa linga osoma pomangu yaye.
17 Kunyamo 12 wuviali wa Ahasi soma yo Yuda, Hosea+ omõla a Ela wa linga osoma yo Isareli vo Samaria; eye wa viala anyamo ecea. 2 Eye wamamako oku linga eci ka ca sungulukile kovaso a Yehova, pole, ka lingile calua ndolosoma via vialele tete ko Isareli. 3 Sialimanesere Soma yo Asuria wo katukila+ kuenje Hosea wa linga ukuenje waye kuenda wa fetika oku u feta ulambu.+ 4 Noke soma yo Asuria wa yeva okuti Hosea wa kongeliwile kusuanji umue, momo wa tumile olomunga ku So, Soma yo Kegito+ kuenda ka nenele ulambu ku soma yo Asuria ndeci a lingaile kanyamo a pita. Omo liaco, soma yo Asuria wo kuta loku u kapa vokayike.
5 Soma yo Asuria wa katukila ofeka yosi, wa pitĩla vo Samaria kuenda wa yi ñuala ocingonja anyamo atatu. 6 Kunyamo wecea wuviali wa Hosea, soma yo Asuria wa tambula o Samaria.+ Noke wambata va Isareli kumandekua+ ko Asuria kuenda wa ecelela okuti, va kala ko Hala lo ko Havore ocipepi lolui Gosane+ kuenda valupale va va Media.+
7 Eci ca lingiwa omo okuti, omanu va Isareli va lingila ekandu Yehova Suku yavo, una wa vopa kofeka Yegito kuviali wa Fareo soma Yegito.+ Ovo va fendaila* olosuku vikuavo,+ 8 va kuama oviholo violofeka vina Yehova a tundisile kovaso ya va Isareli kuenda va kuamavo oviholo vina olosoma vio ko Isareli via tumbikile.
9 Va Isareli va kala oku sanda ovina ka via sungulukile kovaso a Yehova Suku yavo. Ovo vamamako oku tunga ovitumãlo via lepa kalupale avo osi+ tunde kutala wondavululi toke kolupale lua pama.* 10 Ovo va litungila olongunji vi kola kuenda olombueti vi kola*+ koviwulu viosi via lepa kuenda vemẽhi lioviti viosi via pulika;+ 11 kovitumãlo viosi via lepa, oko va enda oku tuimisila owisi wovilumba ndeci ca lingaile olofeka vina Yehova a tundisa kovaso avo.+ Ovo va enda oku linga eci ka ca sungulukile oco va wengule onyeño ya Yehova.
12 Ovo vamamako oku vumba oviteka via vĩha*+ vina Yehova a va sapuilile hati: “Ko ka ci lingi!”+ 13 Yehova wamamako oku lungula va Isareli kuenda va Yudea lekuatiso liovaprofeto vaye vosi kuenda vakuakusapula ovinjonde+ hati: “Liwekipo oku endela volonjila viene vĩvi!+ Kakateli kovihandeleko viange kuenda koviholo viange ndomo ci likuata lovihandeleko viosi nda ecele ku vakukululu yene la vina nda tuma kokuene pocakati cakuenje vange ovaprofeto.” 14 Pole, ovo ka va pokuile kuenda vamamako oku kala ovimbinde* ndeci vakukululu yavo okuti, ka va lekisile ekolelo ku Yehova Suku yavo.+ 15 Ovo vamamako oku nyehũla oviholo viaye kuenda ocisila eye+ a lingile la vakukululu yavo kuenda olonumbi a ecele kokuavo ndelungulo+ kuenje vamamako oku kuama oviteka ka vi kuete esilivilo+ okuti, ovo muẽle ka va kuata esilivilo,+ va setukula olofeka via kala ocipepi lavo, vina Yehova a handelekele okuti, ka citava oku vi setukula.+
16 Ovo va siapo ovihandeleko viosi via Yehova Suku yavo kuenda va tunga oviñumañuma vivali viongombe viutale,+ lombueti yi kola*+ kuenda va kekamẽla olohoka viosi vio kovailu+ loku vumba Baale.+ 17 Ovo va yoka vondalu omãla vavo valume lomãla vavo vakãi ndocilumba,+ va tãha tãha,+ loku sanda vakuombanda kuenda vamamako oku li eca* koku linga eci ka ca sungulukile kovaso a Yehova oco va wengule onyeño yaye.
18 Kuenje Yehova wa kuatela onyeño yalua va Isareli, yu wa va tundisa kovaso aye.+ Eye ka silepo laumue te lika ocikoti ca Yuda.
19 Ndaño muẽle va Yudea ka va lavele ovihandeleko via Yehova Suku yavo;+ ovo va kuamavo oviholo via va Isareli.+ 20 Yehova wa nyehũla ovitumbulukila viosi via va Isareli kuenda wa vi kutisa osõi loku vi eca peka lia vakuakupunda, toke eci a vi tundisa kovaso aye. 21 Eye wa tundisa Isareli konjo ya Daviti kuenda ovo va nõla Yerevoama omõla a Nevata oco a linge osoma.+ Pole, Yerevoama wa kokela Isareli oku liwekapo oku kuama Yehova kuenda wa va kokela oku linga ekandu linene. 22 Kuenje omanu vo ko Isareli vamamako oku endela vakandu osi Yerevoama a linga.+ Ovo ka va liwekelepo oku a linga, 23 toke eci Yehova a tundisa va Isareli kovaso aye, ndomo a ci popele pocakati cakuenje vaye ovaprofeto.+ Kuenje va Isareli vopiwa vofeka yavo, vambatiwa kumandekua ko Asuria+ kuna va kasi toke etaili.
24 Soma yo Asuria wa nena omanu vo ko Bavulono, vo ko Kuta, vo ko Awa, vo ko Hamati kuenda vo ko Sefariwayi+ kuenje wa va tungisa valupale o Samaria kocitumãlo ca va Isareli; ovo va tambula o Samaria kuenda va kala valupale aco. 25 Eci va fetika oku tungamo, ka va sumbilile* Yehova. Omo liaco, Yehova wa tuma olohosi+ kuenje via ponda vamue pokati kavo. 26 Soma yo Asuria vo sapuila hati: “Omanu vana wa tuala kumandekua loku va kapa valupale o Samaria, ka va kũlĩhĩle ndomo va fendela Suku yofeka yaco. Omo liaco, eye o kasi oku amamako oku tuma olohosi pokati kavo kuenje vi kasi oku va ponda, momo lomue wa kũlĩha ndomo va fendela Suku yofeka yaco.”
27 Omo liaco, soma yo Asuria wa handeleka hati: “Umue pokati kovitunda vina viambatiwa kumandekua a tiukile, oco a kalemo loku va longisa ndomo va fendela Suku yofeka yaco.” 28 Kuenje umue pokati kovitunda wambatiwile kumandekua okuti, wopiwa vo Samaria, wa tiuka oco a kale vo Betele+ kuenda eye wa fetika oku va longisa ndomo va sumbila* Yehova.+
29 Pole, ofeka lofeka ya tunga osuku* yavo, osuku yaco va yi kapa volonjo viefendelo kovitumãlo via lepa vina va Samaria va tungile; ofeka lofeka ya ci linga valupale avo muna va kala. 30 Alume vo ko Bavulono va tungile Sukote-Benote, alume vo ko Kuta va tungile Nerigali, alume vo ko Hamati+ va tungile Asima, 31 va Awa va tungile Nivihasi kuenda Taritaka. Va Sefariwayi va yoka omãla vavo vondalu kefendelo lia Adirameleke la Anameleke olosuku vio ko Sefariwayi.+ 32 Ndaño va sumbilile Yehova, ovo va nõlele pokati komanu ovitunda oco vi vumbe kovitumãlo via lepa kuenda va enda oku va talavayelako kolonjo viefendelo kovitumãlo via lepa.+ 33 Ndaño va sumbilile Yehova, pole, va vumbailevo olosuku viavo ndomo ci likuata latavo* olofeka kuna va tundile.+
34 Toke etaili, ovo va kuãi etavo* liavo liosimbu. Lomue pokati kavo o fendela* Yehova kuenda lomue o kuãi oviholo viaye, olonumbi viaye, ocihandeleko kuenda ovisila Yehova a ecele komãla va Yakoba, una eye a pongoluile onduko yaye hati, Isareli.+ 35 Eci Yehova a linga ocisila cimue lavo,+ wa va handeleka hati: “Ko ka sumbili olosuku viñi kuenda ko ka vi kekamẽli ale oku vi vumba, pamue oku vi lumbila ovilumba.+ 36 Pole, Yehova una wa kupi vofeka Yegito lunene walua kuenda lokuokuo kuolõha,+ eye Una vu sesamẽla oku sumbila+ haeye vu sesamẽla oku kekamẽla loku eca ovilumba kokuaye. 37 Oviholo, lolonumbi, lovihandeleko kuenda ovisila eye a vu soneheli,+ vu sukila oku vi kuama lutate kuenda yuvuli oku sumbila olosuku vikuavo. 38 Ko ka ivaliko ocisila nda linga lene+ kuenda yuvuli oku sumbila olosuku vikuavo. 39 Pole, Yehova Suku yene eye vu sesamẽla oku sumbila, momo eye o ka vu popeli peka liovanyãli vene vosi.”
40 Ovo ka va pokuile kuenda va kuama etavo* liavo liosimbu.+ 41 Omanu vaco va sumbilile Yehova,+ pole, va endavo oku vumba oviñumañuma viavo via songiwa. Ci kaile omãla vavo kuenda olonekulu viavo, va linga ndeci vakukululu yavo va lingaile toke koloneke vilo.
18 Kunyamo watatu wuviali wa Hosea+ omõla a Ela soma yo Isareli, Hesekiya+ omõla a Ahasi Soma+ yo Yuda wa linga osoma. 2 Eye wa kuata 25 kanyamo eci a linga osoma kuenda wa viala 29 kanyamo vo Yerusalãi. Onduko ya inaye ya kala Avi* omõla ukãi wa Sakariya.+ 3 Eye wamamako oku linga eci ca sunguluka kovaso a Yehova+ ndeci kukululu yaye Daviti a lingile.+ 4 Eye wa kundula ovitumãlo via lepa,+ wa nyõla olongunji vi kola kuenda wa tetola ombueti yi kola.*+ Eye wa nyõlavo onyõha yosipi yina Mose a tungile;+ momo toke kotembo yaco, omanu vo ko Isareli va enda oku tuimisilako owisi wovilumba loku yi tukula hati, ociñumañuma conyõha yosipi.* 5 Eye wa kolelele Yehova+ Suku ya Isareli; pokati kolosoma viosi via vialele tete ko Yuda levi via vialele noke, ka kua kaile layimue ya lisoka laye. 6 Eye wa kakatelele ku Yehova.+ Ka liwekelepo oku u kuama; wamamako oku pokola kovihandeleko vina Yehova a ecele ku Mose. 7 Yehova wa kala laye. Kovina viosi eye a lingaile, wa lekisa olondunge. Eye wa sinila soma yo Asuria kuenda wa likala oku u vumba.+ 8 Eye wa yulavo va Filisiti+ toke ko Gasa lovaimbo aco, tunde kutala wondavululi toke volupale lua pama.*
9 Kunyamo wakuãla wuviali wa Soma Hesekiya okuti, kunyamo wepanduvali wuviali wa Hosea+ omõla a Ela soma yo Isareli, Sialimanesere Soma yo Asuria wa katukila o Samaria kuenda wa fetika oku yi ñuala ocingonja.+ 10 Ovo va yi tambula+ kesulilo lianyamo atatu; kunyamo wepandu wuviali wa Hesekiya okuti, kunyamo wecea wuviali wa Hosea Soma yo Isareli, o Samaria ya tambuiwa. 11 Noke soma yo Asuria wambata va Isareli kumandekua+ ko Asuria kuenda wa va tungisa vo Hala lo vo Havore ocipepi lolui Gosane kuenda valupale a va Media.+ 12 Kua pita ovina viaco, omo okuti, ka va yevelele kondaka ya Yehova Suku yavo, vamamako oku lueya ocisila caye, lovina viosi Mose ukuenje wa Yehova a va handelekele.+ Ovo ka va yevelele ndaño oku pokola.
13 Kunyamo 14 wa Soma Hesekiya, Senakeriva soma yo Asuria+ weya oku katukila alupale osi a kuete oviteyuilo o Yuda kuenje wa a tambula.+ 14 Kuenje Hesekiya Soma yo Yuda wa tuma ondaka ku soma yo Asuria ko Lakisi hati: “Nda lueya. Tunda vofeka yange kuenda ndu ku ĩha cosi o minga.” Soma yo Asuria wa pinga ku Hesekiya Soma yo Yuda 300 kolotalendo* viopalata kuenda 30 kolotalendo viulu. 15 Hesekiya wa eca opalata yosi ya kala vonjo ya Yehova levi via kala vohondo yoku seleka ovokuasi vionjo* ya soma.+ 16 Kotembo yaco, Hesekiya wopa* apito o vonembele+ ya Yehova kuenda ovikuli viaco vina Hesekiya Soma yo Yuda a lañele*+ kuenje wa vi eca ku soma yo Asuria.
17 Noke soma yo Asuria wa tuma Taritane,* la Ravisarisi,* la Ravesiake* kuenda olohoka vialua via tunda ko Lakisi+ oku enda ku Soma Hesekiya ko Yerusalãi.+ Ovo va lamanela ko Yerusalãi kuenda va talama ocipepi lolekua yociva co konano, ya kala vonjila yi loña kepia liulume ukuakusukula.+ 18 Eci va vilikiya soma oco a ende kokuavo, Eliakimi+ omõla a Hilikiya una wa kala kalei konjo,* la Sievena+ usonehi kuenda Yowa omõla a Asafe ulombololi veya kokuavo.
19 Omo liaco, Ravesiake wa va sapuila hati: “Mangi ohenda, sapuili Hesekiya okuti: ‘Ca popia soma yinene okuti, soma yo Asuria ceci hati: “Pi kua kunamẽla ekolelo liove?+ 20 Ove o popia hati: ‘Ñuete esokiyo limue kuenda unene woku linga uyaki,’ pole, olondaka evi viaño. Kulie wa kolela okuti, o kuata osiata yoku ndi sinĩla?+ 21 Tala! Ove wa kolela kekuatiso luolundeya lua sãsõha okuti, o Egito+ luna okuti, nda omunu wa liyekako lu toma kuenda lu tombola eka liaye. Fareo soma yo Egito oco a kasi ku vosi va kolela kokuaye. 22 Nda wa ndi sapuili okuti, ‘Tua kolela Yehova Suku yetu,’+ siti Hesekiya wa nyõla ovitumãlo via lepa lovotala,+ eci a popele ku Yuda la Yerusalãi hati: ‘Vu sukila hẽ oku kekamẽla kutala owu ko Yerusalãi’?”’+ 23 Kaliye linga ohenda, lisila la ñala yange soma yo ko Asuria okuti: ndu ku ĩha 2.000 kolokavalu nda ove o tẽla oku sanda alume vakuakuendela kolokavalu viaco.+ 24 Ove o pondola ndati oku tundisa onguluvulu yimue yi sule pokati kakuenje va ñala yange, nda wa kolela kakãlu o Kegito la vakuakuendela kolokavalu? 25 Siti Yehova eye wa nyĩha omoko yoku iya kocitumãlo cilo loku ci kundula? Yehova wa ndi sapuila hati: ‘Kuende vofeka eyi kuenje yi kundula.’”
26 Noke Eliakimi omõla a Hilikiya, la Sievena+ kuenda Yowa va sapuila Ravesiake hati:+ “Linga ohenda, vangula lakuenje vove kelimi lio Aramaiku,*+ momo elimi liaco li tu lomboloka; ku ka vangule letu kelimi lia va Yudea, momo omanu va kasi kocimbaka va ci yevite.”+ 27 Pole, Ravesiake wa va sapuila hati: “Anga hẽ ñala yange wa numa lika oku sapuila olondaka evi ku ñala yene kuenda kokuene? Siti wa numavo kalume va tumãla kocimbaka, vana okuti va ka lia aniña avo muẽle loku nyua ovasũ avo kumue lene?”
28 Kuenje Ravesiake wa talama loku kaluka lolukandi kelimi lia va Yudea hati: “Yeveleli ondaka ya soma yinene okuti, soma yo ko Asuria.+ 29 Ca popia soma ceci hati: ‘Ko ka eceleli okuti vu kembiwa la Hesekiya, momo eye ka tẽla oku vu popeli peka liange.+ 30 Ko ka ecelelivo okuti Hesekiya o vu vetiyi oku kolela Yehova poku popia hati: “Yehova o ka tu popela muẽle kuenda olupale olu ka lu ka eciwa peka lia soma yo Asuria.”+ 31 Ko ka yeveleli Hesekiya, momo ca popia soma yo Asuria ceci hati: “Lingi ombembua lame kuenda lieci* kuenje omunu lomunu pokati kene o ka lia kuti waye muẽle wuyuva, kuti waye muẽle wukuyu kuenda o ka nyua ovava o vocisimo caye muẽle, 32 toke eci ndiya kuenda ndu wambati kofeka yimue ndeyi yene+ okuti, ofeka yi kuete olomema, ovinyu yokaliye, ofeka yi kuete ombolo loviumbo viayuva, ofeka yi kuete oviti violiveira kuenda owiki. Vu kala lomuenyo kuenje ka vu fi. Ko ka yeveleli Hesekiya, momo eye o kasi oku vu kemba loku popia hati: ‘Yehova o ka tu yovola.’ 33 Anga hẽ kuli osuku yimue pokati kolosuku violofeka okuti, ya yovola ofeka yavo peka lia soma yo Asuria? 34 Olosuku vio ko Hamati+ levi vio ko Aripade vi kasi pi? Olosuku vio ko Sefariwayi+ levi vio ko Hena kuenda vio ko Iwa vi kasi pi? Anga hẽ ovio via yovola o Samaria peka liange?+ 35 Pokati kolosuku viosi violofeka evi, osuku yipi ya tẽla oku yovola ofeka yavo peka liange okuti, Yehova o yovola o Yerusalãi peka liange?”’”+
36 Pole, omanu ka va popele lacimue kuenda ka vo tambuluile, momo soma wa handelekele hati: “Ku ko tambululi.”+ 37 Pole, Eliakimi omõla a Hilikiya una wa kala kalei konjo,* la Sievena usonehi kuenda Yowa omõla a Asafe ulombololi, veya ku Hesekiya lovowalo avo a toka toka kuenda vo sapuila olondaka via Ravesiake.
19 Eci Soma Hesekiya a ci yeva, wa tola uwalo waye kuenda wa wala ocikelẽyi kuenje wa iñila vonjo ya Yehova.+ 2 Noke eye wa tuma Eliakimi una wa kala kalei konjo,* la Sievena usonehi kuenda akulu vovitunda vana va wala ovikelẽyi oco va ende kuprofeto Isaya+ omõla a Amose. 3 Ovo vo sapuila vati: “Ca popia Hesekiya ceci hati: ‘Etaili eteke liohali, lioku pisa* kuenda lioku kutisua osõi; ndeci omõla o laika oku citiwa,* pole, ina yaco ka kuete ongusu yoku cita.+ 4 Pamue Yehova Suku yove o ka yevelela olondaka viosi via Ravesiake, una wa tumiwa la ñala yaye soma yo Asuria oco a sanumũle Suku o kasi lomuenyo+ kuenda eye o ko fetuluinya omo liolondaka Yehova Suku yove a yeva. Omo liaco, likutililako+ vana va supapo okuti, va puluka.’”
5 Noke akuenje va Soma Hesekiya va enda ku Isaya,+ 6 kuenje Isaya wa va sapuila hati: “Eci vu ka sapuila ñala yene ceci hati: ‘Ca popia Yehova ceci hati: “Ku ka kuate usumba+ omo liolondaka wa yeva, vina oloñuatisi via soma yo Asuria via nondaila lavio.+ 7 Ndi kapa vutima waye ocisimĩlo cimue kuenda eye o ka yeva ulandu umue kuenje o ka tiukila vofeka yaye; ndi lingisa okuti, eye o ka pondiwa losipata vofeka yaye muẽle.”’”+
8 Eci Ravesiake a yeva okuti, soma yo Asuria wa tunda ko Lakisi,+ eye wa tiukila kokuaye kuenje wo sanga okuti, o kasi oku linga uyaki vimbo lio Livina.+ 9 Soma wa yeva eci ca popiwa catiamẽla ku Tirihaka Soma yo Etiopia hati: “Eye weya oku liyaka love.” Omo liaco, eye wa tuma vali olomunga+ ku Hesekiya hati: 10 “Eci oco vu sukila oku sapuila Hesekiya Soma yo Yuda hati: ‘Ku ka ecelele okuti, Suku yove una wa kolela o ku kemba lolondaka viokuti: “O Yerusalãi ka yi ka eciwa peka lia soma yo Asuria.”+ 11 Tala! Ove wa yeva eci olosoma vio ko Asuria via linga lolofeka viosi poku vi kundula.+ Anga hẽ ove lika o ka popeliwa? 12 Anga hẽ olosuku violofeka via kunduiwa la vakukululu yange via va popela? O Gosane, lo Harane,+ lo Recefe kuenda omanu vo ko Edene vana va kala ko Telasare pi va kasi? 13 Soma yo Hamati, la soma yo Aripade kuenda soma yalupale o Sefariwayi, la soma yo Hena kuenda yo Iwa pi vi kasi?’”+
14 Hesekiya wa tambula ovikanda peka liolomunga kuenda wa vi tanga. Noke Hesekiya wa lamanela konjo ya Yehova kuenda wa vi nyanyumuĩla kovaso a Yehova.+ 15 Hesekiya wa fetika oku likutilila+ kovaso a Yehova loku popia hati: “A Yehova Suku ya Isareli, wa tumãla kocalo cove kilu* lia va keruvi,+ ove lika Suku yocili pokati kolosoma viosi vio kilu lieve.+ Ove wa lulika ovailu longongo. 16 A Yehova mange ohenda, yevelela lutate!+ Petula ovaso ove,+ A Yehova kuenda tala! Yevelela olondaka Senakeriva a tuma oco a sanumũle Suku o kasi lomuenyo. 17 A Yehova ocili okuti, olosoma vio Asuria via kundula olofeka kuenda ovaimbo avo.+ 18 Ovio via imba olosuku viavo vondalu, momo ka via kaile olosuku viocili,+ via kala upange wovaka omanu+ okuti, avaya kuenda ovawe. Eli olio esunga lieci ovio via tẽlela oku vi nyõla. 19 Pole cilo, A Yehova Suku yetu, linga ohenda tu popele peka liaye, oco olosoma viosi vio kilu lieve vi limbuke okuti, ove lika Suku, A Yehova.”+
20 Isaya omõla a Amose wa tuma esapulo ku Hesekiya liokuti: “Ca popia Yehova Suku ya Isareli ceci hati: ‘Nda yeva ohutililo yove+ yatiamẽla ku Senakeriva Soma yo Asuria.+ 21 Eyi oyo ondaka Yehova a popia yatiamẽla kokuaye yokuti:
“Ufeko wosombo okuti, omõla a Siono o ku pembula, loku ku yola epembe.
Omõla ufeko a Yerusalãi o puka puka kutue kovaso ove.
22 Helie ove wa sanumũla loku popia atonãi?+
Helie wa katukila ondaka yove,+
Loku piekulũila ovaso ove?
Ove wa ci linga ku Una o Kola wa Isareli!+
23 Pocakati colomunga viove+ wa sanumũla Yehova+ poku popia hati:
‘Lakãlu ange osi wuyaki
Ndi ka lamanela kilu liolomunda,
Kolonepa vio kupãla vio Levanone.
Ndi ka teta oviti vialio visõvi viosedru, loviti vialio viongaye.
Ndi ka iñila vovitililo vialio vi kasi ocipãla kuenda vovisenge vialio.
24 Ndi ka fẽla ovisimo kuenda ndi ka nyua ovava o kolofeka vikuavo;
Lolomãhi viange ndi ka kukutisa olondui* viosi viovava vio Kegito.
25 Ove kua ci yevele? Eci ca sokiyiwa* ale osimbu.+
Ame nda ci pongiya* ale tunde koloneke via pita.+
Kaliye ndi ci tẽlisa.+
Alupale a kuete oviteyuilo, ove o ka a pongolola alunda ovingululu.+
26 Olonungi viaco, vi ka yandulukiwa;
Vi ka sakalala kuenda vi ka kutisiwa osõi.
Vi ka kala ndovikũla viovapia kuenda ndowangu u talala,+
Ndowangu u kulila kolusoka kuenje u kukuta lofela yo kutundilo.
27 Pole, nda kũlĩha ciwa eci o tumãla, leci o tunda kuenda eci iñila,+
Nda kũlĩhavo eci o ñuetele onyeño,+
28 Momo onyeño o ñuetele+ kuenda esakalalo liove lia pitĩla vovatũi ange.+
Omo liaco, ndi ka kapa onjolo yange venyũlu liove kuenda olelia yange+ ndi yi kapa vomẽla wove,
Kuenda ame ndi ka ku tiuwiya vonjila yimuamue weya layo.”+
29 “‘Ondimbukiso yove* yeyi: Unyamo ulo vu ka lia evi vi litundila;* kuenda kunyamo wavali vu ka lia olomema vina via tundilamo;+ pole, kunyamo watatu vu ka kũla ombuto loku ungula kuenda vu ka kũla oviti viayuva loku lia apako aco.+ 30 Vana va puluka konjo ya Yuda okuti, vana va supapo+ va ka kuata olombombo posi loku ima apako kovianja. 31 Momo vo Yerusalãi mu ka tunda ava va supapo kuenda Komunda Siono ku ka tunda ava va puluka. Ombili ya Yehova ukualohoka yi ka ci linga.+
32 “‘Omo liaco, ca popia Yehova catiamẽla ku soma yo Asuria ceci hati:+
“Eye ka ka iñila volupale lulo,+
Ale oku asamo usongo,
Pamue oku yakelamo lociyepelo,
Ale oku kapamo ocilamanelo cimue cuyaki.+
33 Eye o ka tiukila vonjila eya layo;
Eye ka ka iñila volupale lulo,” oco Yehova a popia.
34 “Ame ndi ka teyuila loku popela olupale lulo+ mekonda liange muẽle+
Kuenda mekonda liukuenje wange Daviti.”’”+
35 Vuteke waco, ungelo wa Yehova wa katuka kuenda wa ponda 185.000 kalume vocilombo ca va Asuria.+ Eci omanu va pasuka selo komẽle, va mola ovivimbi viosi.+ 36 Kuenje Senakeriva Soma yo Asuria wa tundapo loku tiukila ko Ninivei+ kuenda oko a kala.+ 37 Osimbu a kala oku kekama vonjo* yosuku yaye Nisirote, omãla vaye Adirameleke la Siarecere vo ponda losipata+ kuenda va tilila kofeka yo Ararate.+ Kuenje omõlaye Esarihadono+ wa linga osoma pomangu yaye.
20 Koloneke viaco, Hesekiya wa kala oku vela kuenda wa pandele koku fa.+ Uprofeto Isaya omõla a Amose weya, yu wo sapuila hati: “Ca popia Yehova ceci hati: ‘Eca olonumbi ku vakuanjo yove, momo ove o ka fa; ku kayi.’”+ 2 Kuenje eye wa pongolokela vocimano kuenda wa fetika oku likutilila ku Yehova hati: 3 “Hu livondela a Yehova, mange ohenda, ivaluka okuti nda siata oku endela kovaso ove lekolelo, lutima wosi kuenda nda siata oku linga eci ca sunguluka kovaso ove.”+ Kuenje Hesekiya wa fetika oku lila calua.
4 Osimbu Isaya ka tundile handi kocitali co vokati, ondaka ya Yehova yeya kokuaye yiti:+ 5 “Tiukila kuenda sapuila Hesekiya usongui womanu vange hati: ‘Ca popia Yehova Suku ya Daviti kukululu yove ceci hati: “Nda yeva ohutililo yove. Nda mola asuẽlẽla ove.+ Omo liaco, ndu ku kayisa.+ Keteke liatatu o ka lamanela konjo ya Yehova.+ 6 Komuenyo* wove, ndi vokiyako 15 kanyamo kuenda ndi ka ku yovola ove lolupale lulo peka lia soma yo Asuria+ kuenda ndi ka popela olupale lulo mekonda liange kuenda lia Daviti ukuenje wange.”’”+
7 Kuenje Isaya wa popia hati: “Neni ekende lia pangiwa lakuyu a kukuta.” Ovo va li nena kuenda va li kapa kombumbu noke eye wa fetika oku kaya kamue kamue.+
8 Hesekiya wa pula Isaya hati: “Ondimbukiso yipi+ yi ka lekisa okuti, Yehova o ka ndi kayisa kuenda keteke liatatu ndi ka lamanela konjo ya Yehova?” 9 Isaya wa kumbulula hati: “Ondimbukiso ya tunda ku Yehova oco yu ku lekise okuti, Yehova o ka tẽlisa ondaka a popia yeyi: Ove hẽ o yongola okuti ulembo u kasi vocilondelo* wenda kovaso ananga ekũi ale u tiuka konyima ananga ekũi?”+ 10 Hesekiya wa popia hati: “Ca leluka ulembo u kasi vocilamanelo oku amela kovaso ananga ekũi, pole, ka u tiuka konyima ananga ekũi.” 11 Kuenje uprofeto Isaya wa likutilila ku Yehova kuenda Eye wa lingisa okuti, ulembo wa lokele ale vocilondelo ca Ahasi, u tiukila konyima ananga ekũi.+
12 Kotembo yaco, soma yo Bavulono okuti, Berodake-Valadana omõla a Valadani, wa tuma ku Hesekiya ovikanda lombanjaile omo a yeva okuti, Hesekiya wa kala oku vela.+ 13 Hesekiya wa va yolela* loku va lekisa ovina viaye viosi via kala vonjo yovokuasi+ okuti, opalata, ulu, olosimbolua viulela, lolosimbolua vikuavo viulela wa tĩla, onjo yaye yovota kuenda ovina viosi via kala vohondo yoku seleka ovokuasi aye. Ka kua kaile lacimue Hesekiya ka lekisile vonjo* yaye kuenda kuviali waye wosi.
14 Noke uprofeto Isaya weya ku Soma Hesekiya kuenda wo pula hati: “Alume ava va popia nye kuenda va tunda pi?” Hesekiya hati: “Ovo va tunda kofeka yimue yocipãla okuti, ko Bavulono.”+ 15 Kuenje Isaya wo pula hati: “Nye ovo va mola vonjo* yove?” Hesekiya wa tambulula hati: “Ovo va mola cosi ci kasi vonjo* yange. Ka kuli lacimue sia va lekisile vohondo yoku seleka ovokuasi ange.”
16 Isaya wa sapuila Hesekiya hati: “Yevelela ondaka ya Yehova yokuti,+ 17 ‘Tala! Kuiya eteke okuti, ovina viosi vi kasi vonjo* yove lovina viosi vakukululu yove va seleka toke etaili, vi ka ambatiwa ko Bavulono.+ Lacimue ci ka supapo,’ oco Yehova a popia. 18 ‘Vamue pokati komãla ove o ka cita, va kambatiwa+ kuenda va ka linga vakesongo kelombe lia soma yo Bavulono.’”+
19 Kuenje Hesekiya wa sapuila Isaya hati: “Ondaka ya Yehova yina ove wa ndi sapuila, yiwa.”+ Kuenje wamisako hati: “Ciwa nda ku ka kala ombembua loku kolapo* vokuenda kuomuenyo* wange.”+
20 Catiamẽla konepa yikuavo yulandu womuenyo wa Hesekiya, lunene waye wosi, ndomo a tunga ociva covava+ lolekua, loku nena ovava volupale,+ ka via sonehiwile hẽ velivulu liulandu wolotembo violosoma vio ko Yuda? 21 Noke Hesekiya wa ka puyuka la vakukululu yaye;+ kuenje omõlaye Manase+ wa linga osoma pomangu yaye.+
21 Manase+ wa kuata 12 kanyamo eci a linga osoma kuenda wa viala 55 kanyamo vo Yerusalãi.+ Onduko ya inaye Hefisiba. 2 Eye wa linga eci cĩvi kovaso a Yehova, poku kuama ovilinga viumbondo violofeka+ vina Yehova a tundisile kovaso yomanu va Isareli.+ 3 Eye wa tumbulula ovitumãlo via lepa vina isiaye Hesekiya a lunduile+ kuenda wa tungila Baale ovotala loku panga ombueti* yi kola,+ ndeci Ahava soma yo Isareli a lingile.+ Kuenje eye wa kekamẽla olohoka viosi vio kovailu kuenda wa vi vumba.+ 4 Eye wa tungavo ovotala vonjo ya Yehova+ yina Yehova a popele hati: “Ndi ka kapa onduko yange vo Yerusalãi.”+ 5 Handi vali, eye wa tungila olohoka viosi vio kovailu+ ovotala vovitali vivali vionjo ya Yehova.+ 6 Eye wa yoka omõlaye vondalu* ndocilumba; wa kala ukuombanda, wa sanda vakuombanda,+ la vakuakuvangula lolondele kuenda vakuakutãha.+ Eye wa linga ovina vialua vĩvi kovaso a Yehova oco a wengule onyeño yaye.
7 Ociñumañuma ca songiwa combueti* yi kola+ cina eye a pangele, wa ci kapa vonjo yina Yehova a sapuilile Daviti kuenda omõlaye Salomone hati: “Vonjo yilo lo vo Yerusalãi okuti, ocitumãlo cina nda nõla pokati kovikoti viosi via Isareli, yi ka tukuiwa londuko yange otembo ka yi pui.+ 8 Ame lalimue eteke ndi ka lingisa vali okuti omãla va Isareli va tundisiwa vofeka yina nda eca ku vakukululu yavo+ nda ovo va kapako lutate ovina viosi nda va handeleka,+ Ocihandeleko cosi ukuenje wange Mose a va tuma oku kuama.” 9 Pole, ovo ka va pokuile kuenda Manase wamamako oku va yapuisa poku va vetiya oku linga ovina vialua vĩvi okuti, evi via lingiwa lolofeka vina Yehova a kunduila kovaso ya va Isareli, vi sule.+
10 Yehova wamamako oku vangula pocakati covaprofeto vaye+ hati: 11 “Manase soma yo Yuda wa linga ovina viosi evi viumbondo; eye wa linga ovina vialua vĩvi okuti, vina via lingiwa la va Amori+ vana vo livangela+ vi sule kuenda eye wa kokela va Yuda oku linga ekandu loviteka viaye via vĩha*. 12 Ca popia Yehova Suku ya Isareli ceci hati: ‘Ndi nena eyambulo vo Yerusalãi+ kuenda vo Yuda okuti, wosi o ci yeva, cu lingisa ocinyuañi vatũi aye.+ 13 Ndi ka nãla vo Yerusalãi ukolo woku seteka+ o Samaria+ kuenda opulumu yoku seteka onjo ya Ahava+ kuenda ndi ka puenya o Yerusalãi ndeci omunu umue a puenya etiyela okuti, o lipuenya noke o lituvika posi.+ 14 Ndi ka yanduluka ava va supa kocipiñalo cange+ loku va eca peka liovanyãli vavo kuenda ovo va ka pundiwa kuenje ovina viavo vi ka nyaniwa lovanyãli vavo vosi,+ 15 momo va linga eci cĩvi kovaso ange kuenda vamamako oku wengula onyeño yange tunde keteke vakukululu yavo va tunda Kegito toke etaili.’”+
16 Manase wa pesela osonde yomanu valua ka va kuete eko toke eci a yukisa o Yerusalãi tunde konele yimue toke konele yikuavo,+ loku kokisa va Yuda oku lueya poku linga eci ka ca sungulukile kovaso a Yehova. 17 Catiamẽla konepa yikuavo yulandu womuenyo wa Manase lovina viosi a linga, lakandu osi a linga, ka via sonehiwile hẽ velivulu liulandu wolotembo violosoma vio ko Yuda? 18 Noke Manase wa ka puyuka la vakukululu yaye kuenda wa kendiwa vocumbo conjo yaye okuti, vocumbo ca Usa;+ kuenje omõlaye Amoni wa linga osoma pomangu yaye.
19 Amoni+ wa kuata 22 kanyamo eci a linga osoma kuenda wa viala anyamo avali vo Yerusalãi.+ Onduko ya inaye Mesiulemeta omõla ufeko wa Harusi wo ko Yotiva. 20 Eye wamamako oku linga eci cĩvi kovaso a Yehova, ndeci isiaye Manase a lingaile.+ 21 Wa endela volonjila viosi isiaye a endela kuenda wamamako oku vumba loku kekamẽla oviteka via vĩha, vina isiaye a vumbailevo.+ 22 Eye wa yanduluka Yehova Suku ya vakukululu yaye kuenda ka endelele vonjila ya Yehova.+ 23 Omo liaco, akuenje va Amoni vo lingila usuanji kuenje va pondela soma vonjo yaye muẽle. 24 Pole, omanu vo vofeka va ponda vosi vana va lingila usuanji Soma Amoni kuenje omõlaye Yosiya vo lingisa osoma pomangu yaye.+ 25 Catiamẽla konepa yikuavo yulandu womuenyo wa Amoni lovina a linga, ka via sonehiwile hẽ velivulu liulandu wolotembo violosoma vio ko Yuda? 26 Kuenje vo kenda veyambo liaye vocumbo ca Usa+ kuenda omõlaye Yosiya,+ wa linga osoma pomangu yaye.
22 Yosiya+ wa kuatele anyamo ecelãla eci a linga osoma kuenda wa viala 31 kanyamo vo Yerusalãi.+ Onduko ya inaye Yedida omõla ufeko wa Adaya wo ko Bosekata.+ 2 Eye wa linga eci ca sunguluka kovaso a Yehova kuenda wa endela volonjila via kukululu yaye+ Daviti kuenje ka pambukile ndaño kondio ale kepĩli.
3 Kunyamo 18 wuviali wa Soma Yosiya, soma wa tuma Siafane usonehi, omõla a Asaliya omõla a Mesiulama, oco a ende konjo ya Yehova+ hati: 4 “Kuende ku Hilikiya+ ocitunda cinene kuenda a kongole olombongo viosi vina via neniwa vonjo ya Yehova+ vina vakualombundi va konguile komanu.+ 5 Olombongo viaco, vi eciwe ku vana va nõliwila oku songuila upange wo vonjo ya Yehova kuenje ovo va vi ece kolonalavayi vionjo ya Yehova vina vi ka semũlũla* onjo,+ 6 okuti kolomesele, ku vakuakutunga kuenda ku vakuakutunga lovawe; ovo va ka lande avaya lolombongo viaco, lovawe a songiwa oco va semũlũle onjo.+ 7 Pole, ka citava oku pulisa ondando komanu vana va tambula olombongo viaco, momo va kala omanu va koleliwa.”+
8 Noke Hilikiya ocitunda cinene wa sapuila Siafane usonehi hati:+ “Nda sanga elivulu Liocihandeleko+ vonjo ya Yehova.” Kuenje Hilikiya wa eca elivulu liaco ku Siafane, yu wa fetika oku li tanga.+ 9 Noke Siafane usonehi wa enda ku soma kuenda wo sapuila hati: “Akuenje vove vongolola* olombongo via sangiwa vonjo kuenda va vi eca ku vana va songola upange vonjo ya Yehova.”+ 10 Siafane usonehi wa sapuilavo soma hati: “Kuli elivulu limue+ Hilikiya ocitunda a nyĩha.” Kuenje Siafane wa fetika oku li tangela kovaso ya soma.
11 Eci soma a yeva olondaka vielivulu Liovihandeleko, wa tola uwalo waye.+ 12 Noke Soma wa eca ocihandeleko eci ku Hilikiya ocitunda, ku Ahikama+ omõla a Siafane, ku Akibore omõla a Mikaya, ku Siafane usonehi kuenda ku Asaya ukuenje wa soma cokuti: 13 “Kuendi, ka ndi kũlĩhĩsiliko ku Yehova ame kumue lomanu kuenda o Yuda yosi catiamẽla kolondaka vielivulu eli lia sangiwa; momo onyeño ya Yehova yina ya tu wengukila yalua enene,+ omo vakukululu yetu ka va pokuile kolondaka vielivulu eli loku kapako ovina viosi via sonehiwa viatiamẽla kokuetu.”
14 Kuenje Hilikiya ocitunda, la Ahikama, la Akibore, la Siafane kuenda Asaya, va enda ku Hulida uprofeto wukãi.+ Eye wa kala ukãi wa Sialume omõla a Tikiva, omõla a Harihasa usongui wociseleko covowalo kuenda ukãi waco wa tungile Volupale Luokaliye luo Yerusalãi; kuenje oko va sapela lukãi waco.+ 15 Ukãi waco wa va sapuila hati: “Ca popia Yehova Suku ya Isareli ceci hati: ‘Sapuili ulume wa ku tumi kokuange hoti: 16 “Ca popia Yehova ceci hati: ‘Ndi nenela ohali ocitumãlo cilo kumue lolonungi vialio okuti, olondaka viosi vielivulu lina soma yo Yuda a tanga.+ 17 Omo okuti, ovo va njanduluka kuenda va tuimisila owisi wovilumba kolosuku vikuavo,+ oco va wengule onyeño yange lovopange osi wovaka avo,+ onyeño yange yi ka wengukila ocitumãlo cilo kuenda oyo ka yi ka imũha.’”+ 18 Pole, ku soma yo Yuda una wa ku tumi oku kũlĩhĩsa Yehova, eci oco vu sukila oku u sapuila hati: “Ca popia Yehova Suku ya Isareli ceci hati: ‘Catiamẽla kolondaka wa yeva, 19 omo okuti utima wove wa tava* kuenda wa liketisa+ kovaso a Yehova poku yeva eci nda popia catiamẽla kocitumãlo cilo kuenda kolonungi vialio okuti, ovo va ka kala ocikuata celaviso lesiñalo kuenje ove wa tola uwalo wove+ kuenda wa lilila kovaso ange, lamevo nda ku yeva, eci oco Yehova a popia. 20 Eli olio esunga lieci ndi ka ku kongelela ku vakukululu yove kuenda o ka puyuka veyambo liove lombembua kuenje ovaso ove ka a ka mola ohali yosi ndi ka nenela ocitumãlo cilo.’”’” Noke ovo va nena etambululo ku soma.
23 Omo liaco, soma wa tuma esapulo limue kuenda ovo vongolola akulu vosi vo vo Yuda kuenda vo ko Yerusalãi.+ 2 Noke soma wa lamanela konjo ya Yehova kumue lalume vosi vo vo Yuda, olonungi viosi vio ko Yerusalãi, ovitunda kuenda ovaprofeto okuti, omanu vosi oku upisa kutito toke kunene. Eye wa va tangela olondaka viosi vielivulu+ liocisila,+ lina lia sangiwa vonjo ya Yehova.+ 3 Soma wa talama ocipepi longunji kuenda wa linga ocisila* cimue kovaso a Yehova+ cokuti, eye o ka kuama Yehova loku kapako ovihandeleko viaye, lolonumbi viaye kuenda oviholo viaye lutima waye wosi, lomuenyo waye wosi poku tẽlisa olondaka viocisila vina via sonehiwa velivulu eli. Kuenje omanu vosi va tava kocisila caco.+
4 Noke soma wa tuma ocitunda cinene Hilikiya,+ lovitunda vikuavo kuenda vakualombundi, oco vope vonembele ya Yehova ovikuata viosi via pangiwila Baale, levi via pangiwila ombueti yi kola,*+ levi via pangiwila olohoka viosi vio kovailu. Kuenje eye wa vi timĩhila kosamua yo Yerusalãi kovapia o Kedrone kuenda wambata atiko aco ko Betele.+ 5 Kuenje wa tundisa ovitunda violosuku ovingendeleyi, vina olosoma vio ko Yuda via nõla oco vi tuimisile owisi wovilumba kovitumãlo via lepa valupale o vo Yuda kuenda valupale a lisunguile lo Yerusalãi, wa tundisavo vana va tuimisile owisi wocilumba ku Baale, kekumbi, kosãi, koviengele violombungululu kuenda kolohoka viosi vio kovailu.+ 6 Eye wopa ombueti yi kola*+ vonjo ya Yehova, wa yambata kosamua yo Yerusalãi, Vocimbota co Kedrone kuenda eye wa yi timĩha+ Vocimbota co Kedrone kuenje ya linga oneketela, wa sanduila oneketela yaco kayambo omanu vaño.+ 7 Eye wa kundulavo olonjo viovipuepue vialume+ vio vonembele vina via kala vonjo ya Yehova, muna akãi va enda oku tutila olonanga viombalaka ya kala yocitumãlo combueti yi kola.*
8 Noke eye wopa ovitunda viosi valupale o Yuda kuenda ovitumãlo via lepa ka via taviwile vali kefendelo, momo oko ovitunda via enda oku tuimisila owisi wovilumba tunde ko Geva+ toke ko Beresieva.+ Eye wa nyõlavo ovitumãlo via lepa via kala poku iñilila kuombundi ya Yehosua usongui wolupale, vina via kala kepĩli eci omunu a iñila pombundi yolupale. 9 Ovitunda viovitumãlo via lepa ka via endaile oku vumbila kutala wa Yehova ko Yerusalãi,+ pole, via enda oku lia olombolo ka vi kuete etumbisa kumue la vamanjavo. 10 Eye wa lingisavo okuti efendelo lia Tofete+ ka li taviwa vali, lina lia kala Vocimbota Comãla va Hinome*+ oco okuti, lomue o yoka omõlaye ufeko ale omõlaye ulume vondalu* ndocilumba ku Moleke.+ 11 Olokavalu vina olosoma vio ko Yuda via tumbikilile* ekumbi, eye ka vi ecelele okuti vi iñila vali vonjo ya Yehova poku pita vohondo* ya Natane-Meleke kesongo yelombe, yina ya kala pocindumba; kuenda wa timĩha akãlu a tumbikiwile ekumbi.+ 12 Soma wa nyõlavo ovotala olosoma vio ko Yuda via pangiwile kolusoka wohondo yosapalalo+ ya Ahasi kuenda ovotala Manase a pangele kovitali vivali vionjo ya Yehova.+ Eye wa vi kundula kuenda oneketela yaco wa yi sanduila Vocimbota co Kedrone. 13 Soma wa lingisa okuti ovitumãlo via lepa vina via kala kovaso yo Yerusalãi kombuelo* Yomunda Yevĩho,* ka vi taviwa vali kefendelo, ovitumãlo viaco Salomone soma yo Isareli wa vi tungilile Asitorete osuku ya vĩha yukãi ya va Sidono; ku Kemosi osuku ya vĩha yo Moavi; kuenda ku Milikome+ osuku ya vĩha ya va Amoni.+ 14 Eye wa nyõla olongunji vi kola kuenda wa kundula olombueti vi kola*+ kuenje povitumãlo viaco, wa yukisapo lakepa omanu. 15 Eye wa nyõlavo utala wa kala ko Betele, locitumãlo ca lepa ca pangiwa la Yerevoama omõla a Nevata, cina ca kokela Isareli oku linga ekandu.+ Noke lioku kundula utala waco locitumãlo ca lepa, eye wa timĩha ocitumãlo caco ca lepa kuenje ca linga oneketela kuenda wa timĩhavo ombueti yi kola.*+
16 Eci Yosiya a ñualapo, wa mola ayambo a kala komunda kuenje eye wa tuma oku upa akepa a kala vayambo aco kuenda wa a timĩhila kutala okuti, ka a taviwile vali kefendelo, ndeci ondaka ya Yehova ya popiwa lukuenje wa Suku yocili una wa popia okuti, ovina viaco vi ka tẽlisiwa.+ 17 Noke eye wa pula hati: “Eyambo ndi lete ndoto lielie?” Alume vo volupale vo tambulula vati: “Eli eyambo liukuenje wa Suku yocili wo ko Yuda,+ una wa popele ovina evi ove wa linga lutala wo ko Betele.” 18 Kuenje eye wa popia hati: “A puyukepo. Lomue ka ka senge akepa aye.” Ovo ka va sengele kakepa aye, ndaño kakepa wuprofeto una wa tundile ko Samaria.+
19 Yosiya wa kundulavo olonjo viosi viefendelo viovitumãlo via lepa via kala valupale o Samaria,+ vina olosoma vio ko Isareli via tungile oco va wengule onyeño ya Suku kuenda eye wa linga ovina vimuamue ndevi a lingile ko Betele.+ 20 Eye wa lumba ovitunda viosi kovotala viovitumãlo via lepa via kalako kuenda wa timĩhilako akepa omanu.+ Noke wa tiukila ko Yerusalãi.
21 Soma wa handeleka omanu vosi hati: “Lingili Yehova Suku yene o Paskoa+ ndomo ca sonehiwa velivulu eli liocisila.”+ 22 Ka kua la kaila o Paskoa yimue ndeyi tunde koloneke violonganji via sombisa o Isareli, ale koloneke viosi violosoma vio ko Isareli kuenda olosoma vio ko Yuda.+ 23 Pole, kunyamo 18 wuviali wa Soma Yosiya, o Paskoa yaco ya lingiwila Yehova vo Yerusalãi.
24 Yosiya wa kundulavo vakuakuvangula lolondele la vakuakutãha,+ oviteka vio vonjo,*+ oviteka via vĩha* lovina viosi via vĩha okuti, via molẽhele vofeka yo Yuda kuenda ko Yerusalãi, oco ku tẽlisiwe olondaka Viocihandeleko+ ca sonehiwa velivulu Hilikiya ocitunda a sanga vonjo ya Yehova.+ 25 Ka kua kaile osoma ya lisoka laye kolosoma vio livangele okuti, ya tiuka ku Yehova lutima waye wosi, lomuenyo waye wosi+ kuenda longusu yaye yosi poku pokola Kovihandeleko viosi via Mose; noke liaye, ka kua kaile osoma ya lisoka laye.
26 Kuenje Yehova ka silepo onyeño yaye yalua ya wengukila Yuda omo liovina viosi vĩvi Manase a lingile oco a wengule onyeño Yaye.+ 27 Yehova hati: “Ndi kundulavo Yuda kovaso ange+ ndeci nda kundula Isareli;+ ndi likala olupale olu nda nõla okuti, o Yerusalãi kuenda ndi likalavo onjo nda popele hati: ‘Omo onduko yange yi kamamako oku kala.’”+
28 Catiamẽla konepa yikuavo yulandu womuenyo wa Yosiya, lovina viosi a linga, ka via sonehiwile hẽ velivulu liulandu wolotembo violosoma vio ko Yuda? 29 Koloneke viaco, Fareo Neko soma Yegito, wa enda oku ka lisanga la soma yo Asuria Kolui Ferati kuenje Soma Yosiya wa enda oku ka liyaka laye; pole, eci Neko o mola, wo pondela ko Megido.+ 30 Akuenje vaye vambata ocivimbi caye vekãlu oku tunda ko Megido, yu vo tuala ko Yerusalãi kuenda vo kenda veyambo liaye. Noke omanu vo vofeka va kuata Yehoahasi omõla a Yosiya kuenje vo waveka loku u lingisa osoma pomangu ya isiaye.+
31 Yehoahasi+ wa kuata 23 kanyamo eci a linga osoma kuenda wa viala olosãi vitatu vo Yerusalãi. Onduko ya inaye ya kala Hamutala+ omõla ufeko wa Yeremiya wo ko Livina. 32 Eye wa fetika oku linga eci ka ca sungulukile kovaso a Yehova, ndeci ca lingile vakukululu yaye vosi.+ 33 Fareo Neko+ wo kapa vokayike ko Rivila+ kofeka yo Hamati, oco ka ka viale vo Yerusalãi kuenda wa kisika ofeka oku feta 100 kolotalendo* viopalata kuenda otalendo yimosi yulu.+ 34 Handi vali, Fareo Neko wa vialeka Eliakimi omõla a Yosiya pomangu ya Yosiya isiaye kuenda wa pongolola onduko yaye okuti, Yehoyakimi; pole, wa kuata Yehoahasi kuenje wo tuala Kegito,+ kuna a fila.+ 35 Yehoyakimi wa eca ku Fareo opalata lulu, pole, oco a ece opalata yina Fareo a kisika, wa sukilile oku pinga komanu elisimu. Eye wa pinga komunu lomunu oku eca opalata lulu, oco a vi ece ku Fareo Neko.
36 Yehoyakimi+ wa kuata 25 kanyamo eci a linga osoma kuenda wa viala 11 kanyamo vo Yerusalãi.+ Onduko ya inaye Sevida omõla ukãi wa Pedaya wo ko Ruma. 37 Eye wamamako oku linga eci cĩvi kovaso a Yehova,+ ndeci vakukululu yaye va enda oku linga.+
24 Koloneke via Yehoyakimi, Nevukandesa+ Soma yo Bavulono wo ñualelapo kuenda Yehoyakimi wa linga ukuenje waye anyamo atatu. Pole, eye wo ñualelapo kuenda wo lingila usuanji. 2 Yehova wa fetika oku tuma kokuaye ovimunga via vakuakupunda via va Kaldea,+ via va Suria, via va Moavi kuenda via va Amoni. Eye wamamako oku va tuma oco va nyõle o Yuda, ndeci ci likuata londaka Yehova+ a popele pocakati cakuenje vaye ovaprofeto. 3 Eci ca lingiwa vo Yuda omo liocihandeleko ca Yehova oco a va tundise kovaso aye,+ omo liakandu osi Manase a lingile,+ 4 loku pesela osonde yomanu valua va puile eko+ kuenda wa yukisa o Yerusalãi losonde yomanu ka va kuatele eko kuenje Yehova ka yonguile oku wecela.+
5 Catiamẽla konepa yikuavo yulandu womuenyo wa Yehoyakimi, lovina viosi a linga, ka via sonehiwile hẽ velivulu liulandu wolotembo violosoma vio ko Yuda?+ 6 Noke Yehoyakimi wa ka puyuka la vakukululu yaye kuenda wa kendiwa kumue la vakukululu yaye;+ kuenje omõlaye Yehoyakini wa linga osoma pomangu yaye.
7 Soma yo Kegito lalimue eteke a setekele oku tunda vofeka yaye, momo soma yo Bavulono wa tambula ovina viosi via tiamẽlele ku soma yo Kegito+ tunde Kekango* Liegito+ toke Kolui Ferati.+
8 Yehoyakini+ wa kuata 18 kanyamo eci a linga osoma kuenda wa viala olosãi vitatu vo Yerusalãi.+ Onduko ya inaye Nehusita omõla ufeko wa Elinatana wo ko Yerusalãi. 9 Eye wamamako oku linga eci cĩvi kovaso a Yehova, ndeci ci likuata lovina viosi isiaye a lingile. 10 Vokuenda kuotembo yaco, akuenje va Nevukandesa Soma yo Bavulono va katukila o Yerusalãi kuenda va ñuala ocingonja olupale.+ 11 Nevukandesa Soma yo Bavulono weya volupale osimbu akuenje vaye va lu ñuala ocingonja.
12 Yehoyakini Soma yo Yuda wa enda ku soma yo Bavulono+ kumue la inaye, lakuenje vaye, lolombuale viaye kuenda va kesongo kelombe liaye+ kuenje soma yo ko Bavulono wo wambata kumandekua kunyamo wecelãla wuviali wa soma yo Bavulono.+ 13 Noke wambata ovokuasi osi a kala vonjo ya Yehova lovokuasi o vonjo* ya soma.+ Eye wa nyõla ovikuata viosi viulu vina Salomone soma yo Isareli a pangelele onembele ya Yehova.+ Eci ca pita ndeci Yehova a ci popele. 14 Eye wambata kumandekua omanu vosi vo vo Yerusalãi, lolombuale viosi,+ lasualali vosi va pama kuenda olomesele viosi, la vakuakutela utale*+ okuti, va soka 10.000 komanu vambatiwa kumandekua. Lomue wa siala, te lika olohukũi viofeka.+ 15 Kuenje wambata Yehoyakini+ kumandekua ko Bavulono;+ wambatavo ina ya soma, lakãi va soma, la vakesongo vo kelombe liaye kuenda alume va kemãla vo vofeka, wa vopa ko Yerusalãi, wa vambata kumandekua ko Bavulono. 16 Soma yo ko Bavulono wambatavo kumandekua ko Bavulono asualali vosi va soka 7.000 kumue leci ci soka 1.000 kolomesele kuenda vakuakutela utale,* vosi yavo va kala alume va pama haivo va tẽlele oku yaka. 17 Soma yo Bavulono wa vialeka Mataniya inanu ya Yehoyakini,+ oco a linge osoma pomangu yaye kuenda wa pongolola onduko yaye okuti, Sedekiya.+
18 Sedekiya wa kuata 21 kanyamo eci a linga osoma kuenda wa viala vo Yerusalãi 11 kanyamo. Onduko ya inaye ya kala Hamutala+ omõla ufeko wa Yeremiya wo ko Livina. 19 Eye wamamako oku linga eci cĩvi kovaso a Yehova, ndeci ci likuata lovina viosi Yehoyakimi a lingile.+ 20 Ovina evi via pita vo Yerusalãi kuenda vo Yuda omo lionyeño ya Yehova toke eci eye a va tundisa kovaso aye.+ Kuenje Sedekiya wa sinĩla soma yo Bavulono.+
25 Kunyamo wecea wuviali wa Sedekiya, kosãi yekũi, keteke liekũi liosãi, Soma Nevukandesa+ wo ko Bavulono weya lolohoka viaye viosi oco a katukile o Yerusalãi.+ Eye wa tunga ocilombo oco a yi katukile kuenda wa tunga ocimbaka cimue kolonele vialio viosi,+ 2 kuenje olupale lua ñualiwa ocingonja toke kunyamo 11 wa Soma Sedekiya. 3 Keteke liecea liosãi yakuãla, onjala ya luile calua+ volupale kuenje omanu vo vofeka ka va kuatele okulia.+ 4 Va tuiya epangu limue vocimbaka+ kuenje asualali vosi va tila luteke poku pita pombundi yi kasi pokati kovimbaka vivali, ocipepi locumbo ca soma, osimbu va Kaldea va ñualele olupale; kuenje soma wa enda lonjila yo Araba.+ 5 Pole, olohoka via va Kaldea via landula soma kuenje vio kuatela vanyãla o vekalasoko lio Yeriko kuenda asualali vaye vosi va tunda konele yaye kuenje va sanduiwa. 6 Noke ovo va kuata soma+ kuenda vo nena ku soma yo Bavulono ko Rivila kuenje ovo vo sombisa. 7 Ovo va pondela omãla va Sedekiya kovaso aye; noke Nevukandesa wa tofola ovaso a Sedekiya, wo kuta lalienge osipi kuenje wo tuala ko Bavulono.+
8 Kosãi yatãlo, keteke liepanduvali liosãi okuti, kunyamo 19 wa Soma Nevukandesa soma yo Bavulono, Nevusaradana+ usongui wolondavululi haeye ukuenje wa soma yo Bavulono, weya vo Yerusalãi.+ 9 Eye wa timĩha onjo ya Yehova,+ lonjo* ya soma+ kuenda olonjo viosi vio Yerusalãi;+ eye wa timĩhavo olonjo viomanu vosi va kemãla.+ 10 Ovimbaka vina via ñualele o Yerusalãi, via kupuiwa lolohoka viosi via va Kaldea vina via kala lusongui wolondavululi.+ 11 Nevusaradana usongui wolondavululi, wambata kumandekua omanu va supilemo vana va siwa volupale, va tiamẽlele konele ya soma yo Bavulono kuenda omanu vakuavo va supilepo.+ 12 Pole, usongui wolondavululi wa sia vamue pokati komanu olohukũipo vali vo vofeka oco va talavaye vocumbo cayuva loku linga upange wa tĩla.+ 13 Kuenje va Kaldea va nyanyõla olongunji viosipi+ vionjo ya Yehova kuenda otuakãlu+ lombasia yinene yovava yosipi yi tukuiwa hati, Okalunga,+ vina via kala vonjo ya Yehova kuenje vambata osipi ko Bavulono.+ 14 Ovo vambatavo ovikuata viatiko, olopa, ovikuata vioku teta omutusila, olokopo kuenda ovikuata viosi viosipi va enda oku talavaya lavio kupange wonembele. 15 Usongui wolondavululi wambata oviyukilo viondalu, latiyela ana a kala wulu wa fina+ kuenda opalata.+ 16 Catiamẽla kolongunji vivali, Okalunga kuenda kotuakãlu tuna Salomone a pangela onjo ya Yehova, osipi yovikuata viaco viosi, ka ca tavele oku yi pesalisa.+ 17 Ongunji longunji voku lepa ya kuata 18 kovikeya*+ kuenda utue wongunji wa kala wosipi; kuenje oku lepa kutue wongunji kua kala kuovikeya vitatu; owanda kuenda olo romã viosi vina via ñuala kutue, viosi via pangiwile losipi.+ Ongunji yavali kumue lowanda wayo via lisokele.
18 Usongui wolondavululi wambatavo Seraya+ ocitunda ca velapo, Sofoniya+ ocitunda cavali kuenda vakualombundi va soka vatatu.+ 19 Kuenje eye wopa volupale kesongo umue welombe wa kala usongui wasualali, olondunguli vitãlo via soma vina via sangiwa volupale, oku kongelamo usonehi wusongui wolohoka, una wa enda oku konga omanu vo vofeka kovita kuenda 60 kalume vomanu vaño vo vofeka vana okuti, handi va sangiwile volupale. 20 Nevusaradana+ usongui wolondavululi, wa vambata kuenje wa va tuala ku soma yo Bavulono ko Rivila.+ 21 Soma yo Bavulono wa va lemẽha kuenje wa va pondela vo Rivila vofeka yo Hamati.+ Pole, Yuda wambatiwa kumandekua oku tunda vofeka yaye.+
22 Nevukandesa soma yo ko Bavulono wa nõla Gedaliya+ omõla a Ahikama,+ omõla a Siafane+ oco a songuile omanu vana eye a sile vofeka yo Yuda.+ 23 Eci asongui vosi vasualali kumue lalume vaye va yeva okuti soma yo Bavulono wa nõla Gedaliya, ovo lonjanga yalua veya ku Gedaliya vo Misipa. Ovo va kala, Isameli omõla a Netaniya, Yohanana omõla a Karea, Seraya omõla a Tanihumete u Netofa kuenda Yasaniya omõla a Maakatita kumue lalume vavo.+ 24 Gedaliya wa linga ocisila cimue lavo kumue lalume vavo cokuti: “Ko ka kuati usumba woku kala akuenje va va Kaldea. Kali vofeka kuenda talavayeli soma yo Bavulono kuenje ovina viosi vi ka enda ciwa lene.”+
25 Kosãi yepanduvali, Isameli+ omõla a Netaniya omõla a Elisiama ukuacikoti colosoma,* weya lalume ekũi, va lemẽha Gedaliya kuenje wa fa, va pondavo va Yudea kuenda va Kaldea vana va kala laye ko Misipa.+ 26 Noke omanu vosi vatito lava vanene, oku kongelamo asongui volohoka, va katuka kuenda va enda Kegito,+ momo va kala lusumba wa va Kaldea.+
27 Kunyamo 37 wumandekua wa Yehoyakini+ Soma yo Yuda, kosãi 12 keteke 27 yosãi, Soma Evile-Merodake wo ko Bavulono kunyamo a linga osoma, wa yovola* Yehoyakini Soma yo Yuda vokayike.+ 28 Eye wa vangula laye lohenda kuenda wo kapa kocalo ca velapo okuti, ovialo violosoma vikuavo vina via kala laye ko Bavulono, vi sule. 29 Omo liaco, Yehoyakini wa lula uwalo waye wo vokayike kuenje olonjanja viosi wa lia lia komesa ya soma oloneke viosi viomuenyo waye. 30 Eye wa enda oku tambula olonjanja viosi okulia kua enda oku tunda ku soma, eteke leteke, oloneke viosi viomuenyo waye.
Ci Lomboloka “Yehova Eye Suku Yange.”
Okuti, manji a Ahasiya.
“Omãla vovaprofeto” citava okuti, ci tiamisiwila kosikola yoku pindisa ovaprofeto, ale ocimunga covaprofeto.
Ale “uwalo wovaprofeto.”
Ale “uwalo wovaprofeto.”
Ale “uwalo wovaprofeto.”
Ale “ofela.”
Ale pamue, “osi yi kokela akãi oku pulumũla.”
Ale pamue, “oku pulumũla.”
Ale “una wa kala oñuatisi ya Eliya.”
Lit., “Nye ci kasi pokati kange love?”
Lit., “una ndi talama kovaso aye.”
Ale “onjimbi.”
Ale “ekango.”
Ale “ekango.”
Ale “vosi va itikile uvia.”
Ale “esanga liomẽla wa songoloka.”
Ale “momo utima waye wa lula vokati kaye.”
Ale “epopelo.”
Ale “wa kuatiwa luveyi wekova.”
Pamue ci tiamisiwila ku Namana.
Otalendo yimosi yi soka 34.2 kolokilu. Tala Alombo. B14.
Lit., “Isiange.”
Lit., “ocilombo.”
Lit., “esumũlũho.”
Lit., “una ndi talama kovaso aye.”
Ale “vonembele.”
Ocitumãlo cimue ko Samaria, pamue omunda yimue ale ocimbaka.
Ale “ca pitahãla onjanja yimosi ale vivali.”
Lit., “utima wa soma.”
Ale “ukuakuvumba.”
Lit., “ocilombo.”
Okabu yimosi yi soka 1.22 kalitulu. Tala Alombo. B14.
Ale “kocikalo, ocipepi letimba liaye.”
Ale “povitanda.”
Osiekele yimosi yi kuete ocilemo ci soka 11.4 kolograma. Tala Alombo. B14.
Osea yimosi yi soka 7.33 kalitulu. Tala Alombo. B14.
Lit., “ondaka eyi.”
Lit., “ondaka yimue ndeyi.”
Ale “wa kuata vali omuenyo.”
Ale “oku kapa.”
Ale “omõla ukãi.”
Ale “eye wa velele.”
Lit., “omunu wosi o sũsĩla vocimano.” Ondaka eyi kelimi lio Heveru yi lomboloka esepu kuenda yi tiamisiwila kalume.
Ale “nda utima wene u tava.”
Lit., “omõla.”
Ale “wa pitisa otinda kisokopia.”
Lit., “vakuakulava Ahava.”
Ale “wa sunguluka.”
Lit., “onjo.”
Ale “vu kuete esunga.”
Lit., “yi kupukila posi.”
Citava okuti, ocitumãlo va enda oku kutila olomeme oco vi pemuiwe.
Ale “ñala yukãi.”
Ale “oku sumũlũisa.”
Ale “vonembele.”
Lit., “vakuakulupuka.”
Lit., “olupale,” citava okuti, ocitumãlo cimue ca koka.
Ale “Ekango lio Arinone.”
Lit., “Oloneke.”
Lit., “ombuto yosi yusoma.”
Lit., “vakuakulupuka.”
Ale “elombe.”
Lit., “eci eye a tunda kuenda eci eye a iñila.”
Citava okuti, ociña cimue mua kala Ocihandeleko ca Suku.
Ale “kelombe.”
Ale “onembele.”
Ale “kelombe.”
Ale “komanu va kũlĩhĩle.”
Ale “kuosi kua teka.”
Ale “va vi kapa volonjeke.” Lit., “oku vi kuta.”
Lit., “Hasahele wa imba ovaso oco a lamanele oku katukila.”
Ale “kelombe.”
Ale “ko Bete-Milo.”
Ale “wa likutilila ku.”
Okuti, oku kala lombembua loku kolapo.
Lit., “vekandu eye a endela.”
Tala Elomboluilo.
Lit., “oku endela.”
Okuti, Yerevoama II.
Ale “epopelo.”
Ale “oku popeliwa ku.”
Lit., “voku iñila kunyamo,” ale kotembo yonjovo.
Ale “oku lisanga polo la polo.”
Ale “kelombe.”
Lit., “ombalaka.”
Ci soka 178 kolometulu. Tala Alombo. B14.
Ale “kelombe.”
Okuti, Yerevoama II.
Ci lomboloka “Yehova o Kuatisa.” Eye o tukuiwavo Usiya kelivulu 2Ol 15:13; 2As 26:1-23; Isa 6:1 kuenda Sak 14:5.
Okuti, isiaye Amasiya.
Ale “poku iñilila ko Hamati.”
Okuti, Okalunga Komongua, ale Okalunga ka ka Kuete Akimba.
Okuti, Yerevoama II.
Ci lomboloka “Yehova o Kuatisa.” Eye o tukuiwavo Usiya kelivulu 2Ol 15:13; 2As 26:1-23; Isa 6:1 kuenda Sak 14:5.
Ale “elombe.”
Otalendo yimosi yi soka 34.2 kolokilu. Tala Alombo. B14.
Osiekele yimosi yi soka 11.4 kolograma. Tala Alombo. B14.
Ale “elombe.”
Lit., “oku pitisa vondalu.”
Ale “omanu vo ko Yuda.”
Ale “kelombe.”
Ci lomboloka “Yehova o Pamisa.”
Lit., “oku sumbila.”
Okuti, kovitumãlo viosi ci kaile oku kuli omanu vatito ale koku kuli omanu valua.
Tala Elomboluilo.
Ondaka yaco kelimi lio Heveru citava okuti, yi tiamisiwila kondaka “aniña” kuenda ya enda oku tukuiwavo ndondaka yoku nyehũla.
Lit., “va tĩlisa ovitima viavo ndevi via.”
Tala Elomboluilo.
Lit., “oku li landisa.”
Ale “oku fendela.”
Ale “oku fendela.”
Ale “olosuku.”
Ale “oviholo viatavo.”
Ale “oviholo viatavo.”
Lit., “oku sumbila.”
Ale “oviholo viatavo.”
Ya tepuluiwa konduko Aviya.
Tala Elomboluilo.
Ale “va enda oku yi tukula hati, Nehusitana.”
Okuti, kovitumãlo viosi ci kaile oku kuli omanu vatito ale koku kuli omanu valua.
Otalendo yimosi yi soka 34.2 kolokilu. Tala Alombo. B14.
Ale “kelombe.”
Lit., “oku teta.”
Okuti, wa vi laña lulu.
Ale “usongui.”
Ale “usongui wa kesongo kelombe.”
Ale “usongui wa vakuakueca okopo.”
Ale “kelombe.”
Ale “lio ko Suria.”
Lit., “Lingi esumũlũho limue lame kuenda tundili kokuange.”
Ale “kelombe.”
Ale “kelombe.”
Ale “oku sanumũla.”
Lit., “o pitĩla toke vocilangalo.”
Ale pamue, “pokati.”
Ale “olono viovava vio Nilu.”
Lit., “ca lingiwa.”
Ale “oku sokiya.”
Okuti, Hesekiya.
Ale “oku kula kuolomema via kupukila posi.”
Ale “vonembele.”
Lit., “oloneke.”
Citava okuti, ocilondelo caco ca enda oku kuatisa oku tenda otembo ndeci ololosio yekumbi.
Ale “wa yevelela.”
Ale “kelombe.”
Ale “kelombe.”
Ale “kelombe.”
Ale “kelombe.”
Ale “ocili.”
Lit., “oloneke.”
Tala Elomboluilo.
Lit., “oku pitisa vondalu.”
Tala Elomboluilo.
Ondaka yaco kelimi lio Heveru citava okuti, yi tiamisiwila kondaka “aniña” kuenda ya enda oku tukuiwavo ndondaka yoku nyehũla.
Ale “kuosi kua toka.”
Lit., “va pesela.”
Lit., “wa leñela.”
Ale “wa tumbulula ocisila.”
Tala Elomboluilo.
Tala Elomboluilo.
Tala Elomboluilo.
Tala Elomboluilo, “Ongehena.”
Lit., “oku pitisa vondalu.”
Lit., “oku eca.”
Ale “vohondo yoku lila.”
Lit., “kondio.” Okuti kombuelo, nda omunu wa vandekela kutundilo.
Okuti, Omunda Yoliveira, citava okuti, ya kala konele yombuelo, ya kũlĩhĩwavo okuti, Omunda Yetuka.
Tala Elomboluilo.
Tala Elomboluilo.
Ale “olosuku vio vonjo; va terafi.”
Ondaka yaco kelimi lio Heveru citava okuti, yi tiamisiwila kondaka “aniña” kuenda ya enda oku tukuiwavo ndondaka yoku nyehũla.
Otalendo yimosi yi soka 34.2 kolokilu. Tala Alombo. B14.
Tala Elomboluilo.
Ale “kelombe.”
Ale pamue, “vakuakutunga ovimbaka.”
Ale pamue, “vakuakutunga ovimbaka.”
Ale “elombe.”
Ukeya umosi u soka 44.5 kolosentimetulu. Tala Alombo. B14.
Lit., “ukuambuto yusoma.”
Lit., “wa votola utue wa.”