ELIVULU LIATETE LIOLOSOMA

1 Soma Daviti wa kukile calua+ kuenje ndaño vo sikĩlĩlile lolonanga ka yevele owuya. 2 Akuenje vaye vo sapuila vati: “Ku sandiliyiwe ufeko umue wosombo oco a kale la ñala yange soma kuenda eye o ka vumba soma loku u tata. Ufeko waco o ka pekela vonete yaye oco ñala yange soma a yeve owuya.” 3 Ovo va sandiliya ufeko umue wa fina kocikanjo cosi co Isareli kuenda va sanga Avisiage+ u Sunami+ kuenje vo nena ku soma. 4 Ufeko waco wa finile calua kuenda wa tata soma loku u vumba, pole, soma ka lipekelele laye.

5 Votembo yaco, Adoniya+ omõla a Hagiti wa enda oku lipanda loku popia hati: “Ame ndi linga osoma!” Wa lipangelako ekãlu limue kuenda wa kuata alume vakuakuendela kolokavalu kuenda 50 kalume oco vo pitile kovaso loku lupuka.+ 6 Pole, isiaye lalimue eteke o lunguile* lolondaka viokuti: “Momo lie o ci lingila?” Eye wa finilevo calua kuenda inaye wo cita noke lia Avisalome. 7 Eye wa sapela la Yoava omõla a Seruya kuenda ocitunda Aviyatare,+ kuenje ovo va eca ekuatiso ku Adoniya.+ 8 Pole, ocitunda Sadoke,+ la Benaya+ omõla a Yehoyada, luprofeto Natana,+ la Simei,+ la Reyi kuenda asualali va pama va Daviti+ ka va kuatisile Adoniya.

9 Noke Adoniya wa eca ovilumba+ violomeme, violongombe kuenda viovinyama via neta ocipepi lewe lio ko Soheleti lia kala ocipepi lo Enrogeli kuenda wa laleka vamanjaye vosi okuti, omãla va soma, lalume vosi vo ko Yuda okuti akuenje va soma. 10 Pole, eye ka lalekele uprofeto Natana, la Benaya ndaño asualali va pama, ale manjaye Salomone. 11 Natana+ wa sapuila Batisieva+ ina ya Salomone+ hati: “Ove hẽ kua yevele okuti Adoniya+ omõla a Hagiti wa linga osoma kuenda ñala yetu Daviti ka ci kũlĩhĩle? 12 Mange ohenda, enju oco ndu ku ĩhe elungulo limue kuenje o ka popela omuenyo wove lowu womõlove Salomone.+ 13 Kuende ku Soma Daviti, u sapuila okuti: ‘A ñala yange a soma, haveko hẽ wa lisilile kupika wove hati: “Omõlove Salomone o ka linga osoma noke liame kuenda eye o ka tumãla kocalo cange”?+ Momo lie Adoniya a lingila osoma?’ 14 Osimbu ove o kasi oku vangula la soma, ame ndi iñila kuenda ndi sapuila soma okuti ove o kasi oku vangula ocili.”

15 Kuenje Batisieva wa enda ku soma vohondo yaye. Soma wa kukile calua kuenda Avisiage+ u Sunami wa kala oku vumba soma. 16 Noke Batisieva wa petama loku kekamẽla soma kuenda soma wo pula hati: “Nye o yongola oku pinga?” 17 Ukãi wa tambulula hati: “A ñala yange ove wa lisilile kupika wove kovaso a Yehova Suku yove hati: ‘Omõlove Salomone o ka linga osoma noke liame kuenda eye o ka tumãla kocalo cange.’+ 18 Pole, tala! Adoniya wa linga osoma kuenda ñala yange soma ka ci kũlĩhĩle.+ 19 Eye wa eca ovilumba violongombe, lovinyama via neta kuenda olomeme vialua kuenje wa laleka omãla vosi va soma, locitunda Aviyatare, la Yoava usongui wolohoka;+ pole, ka lalekele ukuenje wove Salomone.+ 20 Kaliye a ñala yange a soma, va Isareli vosi va kasi oku lavoka oco o va sapuile omunu o ka tumãla kocalo ca ñala yange soma noke liaye. 21 Nda hacoko, eci ñala yange soma a ka puyuka la vakukululu yaye, ame lomõlange Salomone tu ka tendiwa ndovanyãli.”

22 Osimbu ukãi a kala oku sapela la soma, uprofeto Natana wa iñila.+ 23 Vepuluvi liaco, va sapuila soma hati: “Uprofeto Natana weya!” Eye wa iñila toke ku soma kuenje wa kekama loku petamisa ocipala caye posi. 24 Natana wa pula hati: “A ñala yange a soma, anga hẽ wa popele hati: ‘Adoniya o ka linga osoma noke liame kuenda eye o ka tumãla kocalo cange’?+ 25 Momo etaili eye wa ka eca ovilumba+ violongombe, lovinyama via neta, lolomeme vialua kuenje wa laleka omãla vosi va soma, lasongui volohoka kuenda ocitunda Aviyatare.+ Vosi yavo oko va kasi oku lia loku nyua laye kuenda vamamako oku popia vati: ‘Soma Adoniya a kale hũ lomuenyo!’ 26 Pole, eye ka ndi lalekele ame ndukuenje wove, ale ocitunda Sadoke, pamue Benaya+ omõla a Yehoyada, ale ukuenje wove Salomone. 27 Anga hẽ ñala yange soma wa eca omoko yaco okuti kua sapuilileko ukuenje wove una o sesamẽla oku tumãla kocalo ca ñala yange soma noke liaye?”

28 Omo liaco, soma Daviti wa tambulula hati: “Vilikiyi Batisieva.” Kuenje Batisieva wa iñila kuenda wa talama kovaso a soma. 29 Soma wa lisila hati: “Ndeci Yehova a kasi lomuenyo, una wa ndi yovola kohali yange yosi,+ 30 ndeci nda lisila love kovaso a Yehova Suku ya Isareli poku popia hati: ‘Omõlove Salomone o ka linga osoma noke liame kuenda eye o ka tumãla kocalo cange oku ndi piñala!’ eci oco ndi linga etaili.” 31 Kuenje Batisieva wa petamisa ocipala caye posi loku kekamẽla soma kuenda wa popia hati: “Ñala yange Soma Daviti a kale lomuenyo otembo ka yi pui!”

32 Vepuluvi liaco, Soma Daviti wa vangula hati: “Vilikiyi ocitunda Sadoke, luprofeto Natana kuenda Benaya+ omõla a Yehoyada.”+ Ovo veya kovaso a soma. 33 Soma wa va sapuila hati: “Ambati akuenje va ñala yene kuenda omõlange Salomone a londe komula yange muẽle+ noke u sindikili ko Gihone.+ 34 Ocitunda Sadoke kuenda uprofeto Natana va ko waveka+ ndosoma yo Isareli; noke siki ombinga loku popia hati: ‘Soma Salomone a kale hũ lomuenyo!’+ 35 Noke u kuami, eye o ka iñila loku tumãla kocalo cange; kuenda eye o ka linga osoma pomangu yange kuenje ndi ko wĩha ocikele cusongui ko Isareli lo ko Yuda.” 36 Noke Benaya omõla a Yehoyada wa sapuila soma hati: “Amene! Yehova Suku ya ñala yange soma a ci linge lonjila eyi. 37 Ndeci Yehova a kala la ñala yange soma, a kalevo la Salomone,+ Eye a velisepo ocalo caye okuti, ocalo ca ñala yange Soma Daviti ci sule.”+

38 Ocitunda Sadoke, luprofeto Natana, la Benaya+ omõla a Yehoyada, la va Kereti kuenda va Peleti+ va endako, va kuatisa Salomone oku londa komula ya Soma Daviti+ kuenje vo tuala ko Gihone.+ 39 Ocitunda Sadoke ca tikula ombinga yulela+ vombalaka,+ wa waveka Salomone+ kuenda va fetika oku sika ombinga kuenje omanu vosi va fetika oku kaluka vati: “Soma Salomone a kale hũ lomuenyo!” 40 Noke omanu vosi vo kuama, yu va enda loku sika alumbendo lesanju lialua kuenje osi ya luluma lonjuela yavo.+

41 Adoniya lomanu vosi va lalekiwa laye, va ci yeva eci va mala oku lia.+ Eci Yoava a yeva ocileñi combinga wa pula hati: “Momo lie volupale mu yevalela onjuela yalua?” 42 Osimbu a kala oku vangula, Yonatão+ omõla wocitunda Aviyatare weya. Kuenje Adoniya wa popia hati: “Enju, momo ove wumunu umue uwa,* pamue wa nena esapulo liwa.” 43 Pole, Yonatão wa tambulula Adoniya hati: “Sio! Ñala yetu Soma Daviti wa lingisa Salomone osoma. 44 Soma wa tuma ocitunda Sadoke, luprofeto Natana, la Benaya omõla a Yehoyada, la va Kereti kuenda va Peleti, ovo vo kuatisa oku londa komula ya soma.+ 45 Kuenje ocitunda Sadoke luprofeto Natana vo waveka ndosoma ko Gihone. Noke va tundako lesanju kuenda volupale mua yuva. Eyi oyo onjuela wa yevi. 46 Handi vali, Salomone eye wa tumãla kocalo cusoma. 47 Ocina cikuavo ceci okuti, akuenje va soma veyavo oku panduila ñala yetu Soma Daviti loku popia vati: ‘Suku yove a kemãlise onduko ya Salomone okuti, onduko yove yi sule kuenda Eye a velisepo ocalo caye okuti, ocalo cove ci sule!’ Kuenje soma wa kekamẽla Suku pula. 48 Soma wa popiavo hati: ‘Yehova Suku yo Isareli a sivayiwe una okuti, etaili wa eca omunu umue oco a tumãle kocalo cange kuenda wa ecelela okuti, ndi ci mola!’”

49 Vosi vana va lalekiwa la Adoniya va kala lusumba kuenda omunu lomunu wa katuka, yu wa enda lonjila yaye. 50 Adoniya wa kalavo lusumba omo lia Salomone kuenje wa votoka, yu wa enda wa ka kuata kolombinga viutala.+ 51 Va sapuila Salomone vati: “Adoniya o kasi lusumba wa Soma Salomone; kuenda wa kuata kolombinga viutala loku popia hati: ‘Soma Salomone tete a lisile lame okuti ka pondi ukuenje waye losipata.’” 52 Salomone wa popia hati: “Nda eye wa lekisa ovituwa viwa, lalimue esinga liutue waye li kupukila posi; pole, nda kua sangiwa eci cĩvi kokuaye,+ o ka pondiwa.” 53 Kuenje Soma Salomone wa tuma oku u lokisa kutala. Eye noke wa iñila kuenda wa kekamẽla Soma Salomone kuenje Salomone wo sapuila hati: “Kuende konjo yove.”

2 Eci otembo yolofa via Daviti ya kala ocipepi, eye wa eca olonumbi evi komõlaye Salomone viokuti: 2 “Ndopo ndi fa.* Omo liaco, kuata ongusu+ kuenda utõi.+ 3 Tẽlisa ocikele o kuete ku Yehova Suku yove poku endela volonjila viaye, loku kapako oviholo viaye, ovihandeleko viaye, asombiso aye kuenda olonumbi viaye ndomo via sonehiwa Vovihandeleko via Mose;+ kuenje o ka kuata onima yiwa* kovina viosi o ka linga kuenda kuosi enda. 4 Yehova o ka tẽlisa ohuminyo a lingile yatiamẽla kokuange yokuti: ‘Nda omãla vove va kapako olonjila viavo poku endela lekolelo kovaso ange lutima wavo wosi kuenda longusu yavo yosi,+ otembo yosi ku ka kala ulume umue ukuacikoti cove* o ka tumãla kocalo ca Isareli.’+

5 “Ove wa kũlĩhavo eci Yoava omõla a Seruya a linga kokuange, eci eye a linga kasongui vavali volohoka vo ko Isareli okuti, Avinere+ omõla a Nere kuenda Amasa+ omõla a Yetere. Eye wa va ponda loku pesela osonde+ yuyaki votembo yombembua kuenda wa kapa osonde yuyaki kuvia wa kala vombunda yaye lo kolohaku via kala kolomãhi viaye. 6 Linga ovina lolondunge kuenda ku ka ecelele okuti owele waye wu lokila lombembua Vonjembo.*+

7 “Pole, lekisa ocisola ka ci pongoloka komãla va Barisilai+ u Gileada kuenda ovo va kale pokati ka vana va lia komesa yove, momo ovo va ñuatisa+ eci nda tila huvove Avisalome.+

8 “O kasivo la Simei omõla a Gera u Benjamini wo ko Baharumi. Eye wa ndi siñalele lasiñalo ãvi+ keteke nda endele ko Mahanayimi;+ pole, eci eye a li ñualẽhela lame ko Yordão, nda lisinga vonduko ya Yehova okuti: ‘Si ku pondi.’+ 9 Kaliye ku ko tende ndomunu ka kuete eko,+ momo ove wulume umue ukualondunge kuenda wa kũlĩha eci o sukila oku linga laye; ecelela okuti owele waye u lokila Vonjembo* losonde.”+

10 Noke Daviti wa ka puyuka la vakukululu yaye kuenda wa kendiwa Volupale lua Daviti.+ 11 Otembo* Daviti a viala ko Isareli ya soka 40 kanyamo. Ko Hevirone+ eye wa vialako 7 kanyamo kuenda ko Yerusalãi wa vialako 33 kanyamo.+

12 Salomone wa tumãla kocalo ca isiaye Daviti kuenje vokuenda kuotembo, uviali waye wa pama.+

13 Noke liotembo yimue, Adoniya omõla a Hagiti weya ku Batisieva ina ya Salomone. Batisieva wo pula hati: “Weya lombembua?” Eye wa tambulula hati: “Ndeya lombembua.” 14 Eye hati: “Ñuete cimue njongola oku ku sapuila.” Batisieva hati: “Vangula.” 15 Eye wamisako hati: “Ove wa kũlĩha ciwa okuti uviali wa sesamẽlele oku kala lame kuenda o Isareli yosi ya lavokaile* okuti, ame ndi linga osoma;+ pole, nda pumba uviali kuenje wa eciwa ku manjange, momo Yehova eye wo wĩha uviali.+ 16 Pole, njongola oku ku pinga cimue. Ku ka ndi likale.” Batisieva wo sapuila hati: “Pinga.” 17 Eye wa popia hati: “Mange ohenda, pinga ku soma Salomone eye ka ka ku likala, oco a nyĩhe Avisiage+ u Sunami okuti, o linga ukãi wange.” 18 Batisieva wa popia hati: “Ciwa! Ndi sapela la soma catiamẽla kokuove.”

19 Batisieva wa enda ku soma Salomone oco a sapele laye catiamẽla ku Adoniya. Vepuluvi liaco, soma wa katuka oco a ñualehele laye kuenda wa kekamẽla Batisieva. Noke wa tumãla kocalo caye kuenda wa tuma oku kapa ocalo cikuavo ca ina ya soma, oco eye a tumãle kondio ya soma. 20 Batisieva wa popia hati: “Njongola oku ku pinga cimue citito. Ku ka ndi likale.” Kuenje soma wo sapuila hati: “Citava oku pinga a ina yange; momo si ku likali.” 21 Batisieva hati: “Eca Avisiage u Sunami ku manjove Adoniya oco a linge ukãi waye.” 22 Soma Salomone wa tambulula inaye hati: “Momo lie o pingila Avisiage u Sunami oco a kale la Adoniya? Citava okuti o pingavo uviali oco u kale laye,+ momo eye huvange+ kuenda ocitunda Aviyatare la Yoava+ omõla a Seruya va kasi oku u kuatisa.”+

23 Kuenje soma Salomone wa lisila vonduko ya Yehova hati: “Suku a ndi kangise loku vokiyako nda Adoniya ka feti lomuenyo waye omo liepingilo eye a linga. 24 Kaliye, ndeci Yehova a kasi lomuenyo una wa likuminya oku pamisa uviali wange+ kuenda wa numãlisa kocalo ca isiange Daviti haeye wa ndi tungilako onjo,*+ etaili Adoniya o pondiwa.”+ 25 Soma Salomone vepuluvi liaco, wa tuma Benaya+ omõla a Yehoyada kuenje wa enda wa lemẽha* Adoniya, yu wa fa.

26 Soma wa sapuila ocitunda Aviyatare,+ hati: “Kuende kovapia ove ko Anatote!+ Ove o sesamẽla oku fa, pole, etaili si ku pondi, momo wambatele Ocikasia ca Ñala Tõlo Yehova kovaso a isiange Daviti+ kuenda wa talavo ohali kumue la isiange.”+ 27 Salomone wa tundisa Aviyatare okuti, ka vumbi vali Yehova ndocitunda oco ku tẽlisiwe ondaka Yehova a popele lonjo ya Eli+ ko Silo.+

28 Omo Yoava wa kuatisile Adoniya,+ pole, ka kuatisile Avisalome,+ eci a yeva esapulo liaco, Yoava wa tilila vombalaka ya Yehova+ kuenda wa kuata kolombinga viutala. 29 Soma Salomone vo sapuila vati: “Yoava wa tilila vombalaka ya Yehova kuenda o kasi konele yutala.” Kuenje Salomone wa tuma Benaya omõla a Yehoyada loku popia hati: “Kuende, ko ponde!” 30 Benaya wa enda vombalaka ya Yehova loku u sapuila hati: “Ca popia soma ceci hati: ‘Tundako!’” Yoava hati: “Sio! Ndi fila kulo.” Kuenje Benaya wa tiuka wa sapuila soma hati: “Eci oco Yoava a popia kuenda eci oco eye a ndi tambulula.” 31 Soma wo sapuila hati: “Linga ndomo eye a ku sapuila; u ponda noke u kenda loku upa kokuange kuenda konjo ya isiange osonde Yoava a pesela ocali.+ 32 Yehova o ka lingisa okuti, osonde eye a pesela yi wila kutue waye, momo osimbu isiange Daviti ka ci kũlĩhĩle eye wa veta loku ponda losipata alume vavali va sungulukile haivo vawa okuti, eye ci sule: Avinere+ omõla a Nere usongui wolohoka vio Isareli+ kuenda Amasa+ omõla a Yetere usongui wolohoka vio Yuda.+ 33 Osonde yavo yi wila kutue wa Yoava kuenda kutue wocitumbulukila* caye otembo ka yi pui;+ pole, ku Daviti, locitumbulukila* caye, lonjo yaye, localo caye ku kale ombembua yi tunda ku Yehova otembo ka yi pui.” 34 Benaya omõla a Yehoyada wa lamana, yu wa lemẽha loku ponda Yoava kuenje wa kendiwa konjo yaye muẽle vekalasoko. 35 Noke soma wa nõla Benaya+ omõla a Yehoyada oco a linge usongui wolohoka pomangu yaye kuenda soma wa nõla ocitunda Sadoke+ oco ci piñanye pomangu ya Aviyatare.

36 Soma wa kovonga Simei+ loku u sapuila hati: “Litungila onjo yimue ko Yerusalãi kuenda omo o kala; ku ka tundemo oco ende kocitumãlo cikuavo. 37 Eteke o tunda loku yoka Ocimbota co Kedrone,+ kũlĩha okuti, o fa muẽle. Osonde yove yi ka wila kutue wove muẽle.” 38 Simei wa tambulula soma hati: “Eci wa popia ca sunguluka. Ukuenje wove o ka linga ndomo ñala yange soma a ci popia.” Kuenje Simei wa kala ko Yerusalãi oloneke vialua.

39 Noke lianyamo atatu, apika vavali va Simei va tilila ku Akisi+ omõla a Mahaka soma yo Gati. Eci va sapuila Simei hati: “Tala! Apika vove va kasi ko Gati,” 40 Simei wa londa lonjanga kocimbulu caye, wa enda ku Akisi ko Gati oku kopa apika vaye. Eci Simei a tiuka ko Gati lapika vaye, 41 va sapuila Salomone hati: “Simei wa tundile vo Yerusalãi wa endele ko Gati kuenda wa tiuka.” 42 Kuenje soma wa vilikiya Simei kuenda wo sapuila hati: “Siti nda lisila love vonduko ya Yehova loku ku lungula hati: ‘Eteke o tunda kulo loku enda kocitumãlo cikuavo, kũlĩha okuti o fa’? Siti wa ndi tambulula hati: ‘Eci wa popia ca sunguluka; ndi ci kapako’?+ 43 Momo lie kua pokuilile kohuminyo wa lingile kovaso a Yehova loku kapako ocihandeleko nda ku ĩha?” 44 Soma wa sapuila Simei hati: “Vutima wove wa kũlĩha ciwa ovina viosi vĩvi wa lingila isiange Daviti,+ kaliye Yehova o ka tiula ovina viaco vĩvi kutue wove.+ 45 Pole, Soma Salomone o ka sumũlũisiwa+ kuenda ocalo ca Daviti ci pamisua kovaso a Yehova otembo ka yi pui.” 46 Kuenje soma wa handeleka Benaya omõla a Yehoyada oku u lemẽha, yu wa fa.+

Usoma wa pamisiwa peka lia Salomone.+

3 Salomone wa linga ohuminyo yolohuela la Fareo soma Yegito. Eye wa kuela lomõla ufeko wa Fareo+ kuenda wo wambata Kolupale lua Daviti+ toke eci a malusula oku tunga onjo yaye muẽle,+ lonjo ya Yehova+ kuenda ocimbaka ca ñuala o Yerusalãi.+ 2 Pole, omanu vamamako oku eca ovilumba kovitumãlo via lepa,+ momo toke kotembo yaco ka kua tungiwile handi onjo yeca esivayo konduko ya Yehova.+ 3 Salomone wamamako oku sola Yehova poku endela voviholo via isiaye Daviti, pole, wa enda oku eca ovilumba loku tuimisa owisi wovilumba viaco kovitumãlo via lepa.+

4 Soma wa enda ko Giveone oco a ka ece ovilumba, momo oko kua kala ocitumãlo ca velapo* ca lepa.+ Salomone wa eca 1.000 kovilumba vioku pia elisi kutala waco.+ 5 Yehova wa molẽha ku Salomone luteke vonjoi ko Giveone kuenje wo sapuila hati: “Pinga eci o yongola kuenje ame ndu ku cĩha.”+ 6 Kuenje Salomone wa tambulula hati: “Ove wa lekisa ocisola ca piãla haico ka ci pongoloka ku isiange ukuenje wove Daviti osimbu eye a endaila kovaso ove locili, lesunga kuenda esunguluko lio vutima. Ove wamamako oku lekisa ocisola ca piãla haico ka ci pongoloka kokuaye toke etaili poku u wĩha omõla umue o tumãla kocalo caye.+ 7 A Yehova Suku yange, wa lingisa ukuenje wove osoma pomangu ya isiange Daviti, ndaño okuti ndumalẽhe* haime si kuete uloño.*+ 8 Ukuenje wove o kasi pokati komanu vove vana wa nõla+ haivo omanu valua okuti, ka citava oku va tenda. 9 Eca kukuenje wove utima wepokolo oco a tẽle oku tetulula omanu vove,+ loku tepisa pokati keci ciwa leci cĩvi,+ momo helie o tẽla oku sombisa omanu vove ava haivo valua?”*

10 Yehova wa sanjuka omo Salomone a pinga ovina evi.+ 11 Suku wo sapuila hati: “Omo okuti wa pinga ovina evi kuenda kua pingile oco o kale komuenyo otembo yalua,* ale ukuasi, pamue oku fa kuovanyãli vove, pole, wa pinga olondunge vioku nõla onjila* yiwa poku tetulula ovitangi,+ 12 ndu ku ĩha eci wa pinga.+ Ndu ku ĩha utima wolondunge haiwo wa loñoloha,+ ndeci ka kua la kala omunu wa lisoka love, ka ku ka kalavo omunu wa lisoka love.+ 13 Pole, ndu ku ĩhavo ovina kua pingile+ ci kaile ovokuasi, lulamba+ oco okuti ka ku kala osoma yikuavo ya lisoka love vokuenda kuomuenyo wove.*+ 14 Nda wa endela volonjila viange poku kapako oviholo viange lovihandeleko viange ndeci isiove Daviti a endela,+ ndu ku ĩhavo omuenyo otembo yalua.”*+

15 Eci Salomone a pasuka wa limbuka okuti, ca kala onjoi. Noke wa enda ko Yerusalãi wa talama kovaso yocikasia covisila via Yehova kuenda wa eca ovilumba vioku pia elisi lovilumba viombembua+ kuenje wa lingila akuenje vaye vosi ocipito.

16 Kotembo yaco, akãi vavali ovipuepue veya ku soma kuenda va talama kovaso yaye. 17 Umue pokati kakãi wa popia hati: “Mange ohenda a ñala yange, ame lukãi u, tua tunga vonjo yimuamue kuenda ame nda cita omõla osimbu eye a kala vonjo. 18 Noke lioku pita oloneke vitatu tunde eci nda cita, ukãi u wa citavo. Tua kala pamosi kavali ketu; konjo ka kua kaile vali laumue. 19 Vokuenda kuteke omõla wukãi u, wa fa, momo wo lundika. 20 Eye wa pasuka vokati kuteke, wa tikula omõlange wa kala ponele yange osimbu upika wove a kala oku pekela kuenda wo kapa vokuokuo kuaye* kuenje wa kapa omõlaye wa fa vokuokuo kuange. 21 Eci nda pasuka omẽle oco ndi nyamise omõlange, nda limbuka okuti, wa fa. Ndo konomuisa ciwa lomẽle kuenda nda limbuka okuti, hamõlangeko una nda cita.” 22 Pole, ukãi ukuavo wa popia hati: “Sio, omõlange yu o kasi lomuenyo kuenda omõlove yu wa fa!” Ukãi watete wa popia hati: “Sio, omõlove yu wa fa kuenda omõlange yu o kasi lomuenyo.” Oco va kala oku lihoya kovaso a soma.

23 Noke soma wa popia okuti: “Umue o popia hati: ‘Omõlange yu o kasi lomuenyo kuenda omõlove yu wa fa!’ kuenda ukuavo o popia hati: ‘Sio, omõlove yu wa fa kuenda omõlange yu o kasi lomuenyo!’” 24 Noke soma wa popia hati: “Neneli osipata yimue.” Kuenje va nena osipata ku soma. 25 Soma wa popia hati: “Omõla o kasi lomuenyo u teti volonepa vivali, eci onepa yimue kukãi umue kuenda onepa yikuavo yeci kukãi ukuavo.” 26 Ukãi okuti omõlaye yu o kasi lomuenyo omo liohenda a kuatela omõlaye, wa lipilika ku soma. Ukãi hati: “Mange ohenda a ñala yange! Eca kokuaye omõla o kasi lomuenyo! Ku ko ponde!” Pole, ukãi ukuavo wa popia hati: “Omõla ka ka linge ndaño wange ndaño wove! Teti omõla volonepa vivali!” 27 Soma wa tambulula hati: “Omõla o kasi lomuenyo u weci kukãi watete! Ku ko pondi, momo u eye muẽle inaye.”

28 Omanu vosi ko Isareli va yeva ndomo soma a tetulula ocitangi caco kuenda va komõhela* soma,+ momo va limbuka okuti olondunge via Suku via kala laye oco a linge esunga.+

4 Soma Salomone wa vialele o Isareli yosi.+ 2 Olombuale viaye vievi: Asariya omõla a Sadoke+ wa kala ocitunda; 3 Elihorefi la Ahiya omãla va Sisiya va kala asonehi;+ Yehosafata+ omõla a Ahilude wa kala ulombololi; 4 Benaya+ omõla a Yehoyada wa kala usongui wolohoka; Sadoke la Aviyatare+ va kala ovitunda; 5 Asariya omõla a Natana+ wa kala usongui wa va kalei; Savudi omõla a Natana wa kala ocitunda haeye ekamba lia soma;+ 6 Ahisiare wa kala usongui wo vonjo; kuenda Adonirama+ omõla a Aavida wa kala usongui wa vana va kovongiwa oku linga upange va kisikiwile.+

7 Salomone wa kuata 12 va kalei ko Isareli yosi okuti, ovo va enda oku eca okulia ku soma kuenda ku vakuanjo yaye. Omunu lomunu wa kuatele ocikele coku eca okulia vokuenda kuosãi yimosi vunyamo.+ 8 Va kalei vaco vava: Omõla a Huru kovaimbo a kasi kolomunda via Efarimi; 9 omõla a Dekere wa kala usongui ko Makasi, ko Sialabime,+ ko Bete-Siemese kuenda ko Elone Bete-Hanane; 10 omõla a Hesede ko Aruboti (eye wa enda oku songuila o Sokoha kuenda ofeka yosi yo Hefere); 11 omõla a Avinadave o kasi kolomunda vio ko Dori (Tafata omõla ufeko wa Salomone wa linga ukãi waye); 12 Bahana omõla a Ahilude wo ko Taanake, wa kala usongui ko Megido,+ lo Bete-Siane yosi,+ yi lisungue lo Saretana kombuelo yo ko Yesirele tunde ko Bete-Siane toke ko Abele-Maholati kuenda toke kimbo lio Yokimeama;+ 13 omõla a Gevere ko Ramote-Gileada+ (eye wa enda oku songuila ovaimbo ovilombo via Yairi+ omõla a Manase ana a kala ko Gileada;+ eye wa songuilavo imbo lio ko Aregove+ lia kala ko Basiane okuti:+ 60 kalupale anene a kuete ovimbaka lovikundiko viosipi); 14 Ahinadava omõla a Ido wa kala usongui ko Mahanayimi;+ 15 Ahimasi wa kala ko Nafitali (eye wa kuela omõla ukuavo wa Salomone okuti Basemate); 16 Bahana omõla a Husiai wa kala usongui ko Asiyere lo ko Bealoti; 17 Yehosafata omõla a Paruha wa kala usongui ko Isakare; 18 Simei+ omõla a Ela wa kala usongui ko Benjamini;+ 19 Gevere omõla a Uri wa kala usongui kofeka yo Gileada+ okuti, ofeka ya Sihoni+ soma ya va Amori kuenda ya Oge+ soma yo ko Basiane. Vofeka mua kalavo kalei umue wa songuila va kalei vaco vosi.

20 Va Yuda la va Isareli va luile calua ndeseke li kasi kohulo yokalunga;+ ovo va enda oku lia loku nyua kuenda oku sanjuka.+

21 Salomone wa vialele ovosoma osi oku upisa Kolui*+ toke kofeka ya va Filisiti kuenda toke kongave Yegito. Omanu volofeka viaco va enda oku feta elisimu kuenda va vumba Salomone oloneke viosi viomuenyo waye.+

22 Okulia kua Salomone veteke, kua kala 30 kolonjongo viokoru* viosema ya fina kuenda 60 kolonjongo viokoru viosema yaño, 23 olongombe 10 via neta, 20 kolongombe via tekuiwa langombo, 100 kolomeme, olohõha, olombambi, olosonge kuenda olonjila via neta. 24 Momo eye wa kala usongui konele yimue Yolui*+ oku upisa ko Tifisa toke ko Gasa,+ oku kongelamo olosoma viosi via kala konele yaco Yolui; eye wa kuatele ombembua kovaimbo osi o ñualele.+ 25 Ko Yuda lo ko Isareli omanu vosi va kolelepo, omunu lomunu vemẽhi liuti waye wuyuva kuenda vemẽhi liuti waye wukuyu tunde ko Dani toke ko Beresieva, oloneke viosi via Salomone.

26 Salomone wa kuata 4.000* kovimanga violokavalu viakãlu aye kuenda 12.000 kolokavalu.*+

27 Va kalei vaco, va enda oku eca okulia ku Soma Salomone kuenda komanu vosi va enda oku lia komesa ya Soma Salomone. Omunu lomunu wa kuatele ocikele coku eca okulia vokuenda kuosãi loku kũlĩhĩsa okuti ka mu kambela lacimue.+ 28 Ovo va enda oku ambatavo osevata kuenda owangu wa kukuta woku eca kolokavalu kuosi ovo va endaile, oku kongelamo olokavalu vi nala akãlu, okavalu lokavalu lonjongo yalio.

29 Suku wa eca ku Salomone olondunge kuenda uloño woku kuata elomboloko vonjongo yalua kuenda utima woku kuata elomboloko ndeseke li kasi kohulo yokalunga.+ 30 Salomone wa kuatele olondunge vialua okuti, olondunge viomanu vosi vo Kutundilo kuenda olondunge viosi vio Egito ci sule.+ 31 Eye wa kuatele olondunge vialua okuti omunu ukuavo ci sule, olondunge via Etani+ u Seraye, la Hemani,+ la Kalikole,+ la Dara okuti omãla va Mahola, vi sule; ekemãlo liaye lia lisanduila kolofeka viosi vio ñuala.+ 32 Eye wa soneha* 3.000 kalusapo+ kuenda 1.005 kovisungo.+ 33 Eye wa enda oku popia eci catiamẽla koviti oku upisa koviti viosedru vio ko Levanone toke ko hisopu+ okuti yi kulila vocimano; wa enda oku popiavo eci catiamẽla kovinyama,+ kolonjila,*+ kovinyama vi likoka posi*+ kuenda kolõsi. 34 Omanu vo kolofeka viosi va enda oku iya oku yevelela olondunge via Salomone, oku kongelamo olosoma viosi vio kilu lieve vina via yevele eci catiamẽla kolondunge viaye.+

5 Eci Hirama soma yo ko Turo+ a yeva okuti Salomone wa wavekiwa ndosoma pomangu ya isiaye, eye wa tuma akuenje vaye ku Salomone, momo Hirama wa kala ekamba lia Daviti.*+ 2 Noke Salomone wa tuma ondaka ku Hirama yokuti:+ 3 “Ove wa kũlĩha okuti Daviti isiange, ka ponduile oku tunga onjo yeca esivayo konduko ya Yehova Suku yaye, omo liovoyaki a lingiwa kokuaye kolonepa viosi toke eci Yehova a kapa ovanyãli vaye vemẽhi liolomãhi viaye.+ 4 Pole, cilo Yehova Suku yange wa nyĩha epuyuko kolonepa viosi.+ Lomue o ñatukila kuenda lacimue cĩvi ci pita lame.+ 5 Omo liaco, nda sokiya oku tunga onjo yimue yeca esivayo konduko ya Yehova Suku yange, ndomo Yehova a likuminyile ku Daviti isiange hati: ‘Omõlove ulume, una ndi ka tumãlisa kocalo pomangu yove, eye o ka tunga onjo yeca esivayo konduko yange.’+ 6 Cilo, handeleka omanu vove oco va netele oviti viosedru ko Levanone.+ Akuenje vange va ka talavayela kumosi lakuenje vove kuenje ndi feta akuenje vove ondando o pinga, momo ove wa kũlĩha okuti, ka tu tẽla oku teta oviti nda va Sidono.”+

7 Eci Hirama a yeva olondaka via Salomone, wa kuata esanju lialua loku popia hati: “Yehova etaili a sivayiwe momo wa eca ku Daviti omõla umue ukualondunge oco a viale omanu vosi* ava!”+ 8 Kuenje Hirama wa tuma ku Salomone ondaka yokuti: “Nda yeva esapulo wa numisa. Ndi linga ovina viosi o yongola poku linga esokiyo lioku teta avaya osedru kuenda avaya ongaye.+ 9 Akuenje vange va kambata avaya aco kombuelo yo Levanone toke kokalunga kuenje ame ndi a kutila pamosi loku a telelisa vokalunga toke kocitumãlo kuna o ndi yilikila. Oko ndi ka a kutuluila kuenje ove ambata avaya aco. Noke o numisa okulia ndi pinga oco ngece ku vakuanjo yange.”+

10 Noke Hirama wa eca avaya osi osedru kuenda avaya ongaye ana Salomone a yonguile. 11 Salomone wa eca ku Hirama 20.000 kolonjongo viokoru* viotiliku oco vi linge okulia kua vakuanjo yaye kuenda 20 kolonjongo viokoru viulela uwa woliveira. Evi ovio ovina Salomone a enda oku eca ku Hirama unyamo lunyamo.+ 12 Yehova wa eca olondunge ku Salomone ndeci Eye o likuminyile.+ Kuenje pokati ka Hirama la Salomone pa kala ombembua kuenda kavali kavo va linga ohuminyo* yimue.

13 Soma Salomone wa kovonga alume vosi vo ko Isareli oco va linge upange wa kisikiwa; kua kovongiwa 30.000 kalume.+ 14 Eye wa enda oku va tuma ko Levanone vovimunga vi soka 10.000 vosãi losãi. Ovo va enda oku kala osãi yimosi ko Levanone kuenda olosãi vivali kolonjo viavo; kuenje Adonirama+ eye wa kala usongui wa vana va kovongiwa oco va linge upange wa kisikiwa. 15 Salomone wa kuata eci ci soka 70.000 kolonalavayi* kuenda 80.000 via vakuakuteta ovawe+ kolomunda,+ 16 Salomone wa kuatavo 3.300 va kalei okuti,+ va enda oku songuila olonalavayi. 17 Ovo va fẽla ovawe anene ao a tĩla+ ndomo ca handelekiwa la soma oco va tunge lao ociseveto+ conjo.+ 18 Noke olonalavayi via Salomone lolonalavayi via Hirama, la va Gevale,+ via enda oku teta ovawe loku pongiya avaya kuenda ovawe oku tunga onjo.

6 Kunyamo 480 noke lia va Isareli* oku tunda kofeka Yegito,+ kunyamo wakuãla wuviali wa Salomone ko Isareli kosãi ya Sivi*+ (okuti kosãi yavali) eye wa fetika oku tunga onjo ya Yehova.*+ 2 Onjo soma Salomone a tungila Yehova, ya kuata 60 kovikeya* kusõvi, vupati ya kuata 20 kovikeya kuenda koku lepa ya kuata 30 kovikeya.+ 3 Ocindumba+ co kovaso yonembele* ca kuatele 20 kovikeya kusõvi,* ndomo ci likuata lupati wonjo.* Ocindumba caco ca kuatele ekũi kovikeya oku upisa kovaso yonjo.

4 Eye wa panga olonjanela lapito a likupika*+ vionjo yaco. 5 Handi vali, kocimano conjo, wa tungihinyako osapalalo yimue; oyo ya ñualele ovimano vionjo, okuti vionembele,* levi viohondo yo vokati+ kuenda wa tungavo olohondo vikuavo kolonele viosi vionjo.+ 6 Onepa yi sulemo yolohondo vio konele, vupati ya kuata ovikeya vitãlo, ohondo yo vokati vupati ya kuata ovikeya epandu kuenda ohondo yo kilu vupati ya kuata ovikeya epanduvali, eye wa sia apangu* vovimano viosi vionjo oco okuti, lacimue ci tiama vovimano vionjo.+

7 Onjo ya tungiwa lovawe a songiwa okuti, a pongiyiwile+ ale kuenje ka kua yevalele onjuela yovimalẽho viutale ndeci, omatelo ale ondiaviti osimbu ya kala oku tungiwa. 8 Uvelo woku iñila volohondo vio kolonele yonepa yi sulemo, wa kala konele yombuelo* yonjo+ kuenda mua kala osikata yi kasi ndehotio oco ku londiwe konepa yo vokati kuenda poku tunda konepa yo vokati ku londiwa konepa yo kilu. 9 Eye wamamako oku tunga onjo loku yi malusula+ kuenda wa yambela onjo lolohangalo viosedru lulala wavaya osedru.+ 10 Volonele viosi vionjo+ wa tungihinyako olohondo okuti, ohondo lohondo, ya kuata ovikeya vitãlo koku lepa kuenda via tokekiwile konjo lavaya osedru.

11 Vokuenda kuotembo yaco, ondaka ya Yehova yeya ku Salomone yiti: 12 “Catiamẽla konjo eyi o kasi oku tunga, nda wa endela voviholo viange, loku pokola kolonumbi viange lovihandeleko viange viosi loku vi kapako,+ ndi ka tẽlisavo kokuove ohuminyo nda linga ku isiove Daviti,+ 13 kuenje ndi kala pokati ka va Isareli+ kuenda lalimue eteke ndi ka yanduluka omanu vange va Isareli.”+

14 Salomone wamamako oku tunga onjo oco a yi malusule. 15 Ovimano vionjo wa vi sitika* lavaya osedru. Vovimano vio vokati eye wa sitikamovo lavaya oku upisa posi yonjo toke kolohangalo vio kilu lionjo kuenje posi yonjo wa kapapo avaya ongaye.+ 16 Eye wa tunga osilo yimue ya kuatele 20 kovikeya konepa yo konyima yonjo lavaya osedru, oku upisa posi toke kohangalo kuenje vokati kayo* wa tungamo ohondo yo vokati okuti, ohondo+ yi Kola koku Kola.+ 17 Onembele*+ okuti onepa yonjo ya kala kovaso yaco, ya kuata 40 kovikeya. 18 Vavaya osedru a kala vokati konjo mua kuatele oviluvialuvia violombenje viatila,+ lolonelẽho via telẽha.+ Viosi via kala viosedru; ovawe ka a molẽhele.

19 Kuenje eye wa pongiya ohondo yo vokati+ konjo oco a kapemo ocikasia covisila via Yehova.+ 20 Ohondo yo vokati ya kuata 20 kovikeya voku lepa, 20 kovikeya vupati, 20 kovikeya vusõvi;+ kuenje wa yi laña lulu wa fina; kuenda wa panga utala+ lavaya osedru. 21 Salomone wa laña vokati konjo ulu wa fina+ kuenda wa kapa alienge ulu kovaso yohondo yo vokati+ yina ya lañiwa lulu. 22 Onjo yosi wa yi laña lulu toke eci onjo ya malusuiwa; utala+ wa kala ocipepi lohondo yo vokati, wa u lañavo lulu.

23 Vohondo yo vokati wa tungilamo va keruvi vavali+ va pangiwa lavaya opinyu, u keruvi lu keruvi wa kuata ekũi kovikeya koku lepa.+ 24 Evava limosi liu keruvi lia kuatele ovikeya vitãlo kuenda evava likuavo lia kuatelevo ovikeya vitãlo. Kua kala ekũi kovikeya oku upisa kosungu yevava limue toke kosungu yevava likuavo. 25 Avava u keruvi wavali a kuatelevo ekũi kovikeya. Va keruvi vaco vavali va lisokele vupati kuenda vunene. 26 U keruvi umue wa kuatele ekũi kovikeya vusõvi kuenda u keruvi ukuavo wa kuatele utunga umuamue. 27 Kuenje wa kapa va keruvi+ vaco vohondo* yo vokati. Avava a va keruvi a nyanyumuha okuti, evava liu keruvi umue lia lambele vocimano cimue kuenda evava liu keruvi ukuavo lia lambele vocimano cikuavo kuenje avava avo a liñualẽhela vokati konjo kuenje avava a enda oku li lamba. 28 Va keruvi wa va lañavo lulu.

29 Vovimano viosi vionjo ci kale vokati ale kosamua, eye wa luvikiyamo oviluvialuvia via va keruvi,+ vioviti weva+ kuenda violonelẽho via telẽha.+ 30 Eye wa laña lulu onjo yosi ci kaile vokati ale kosamua yohondo yaco. 31 Puvelo woku iñila vohondo yo vokati, eye wa pangelapo apito avaya opinyu, olongunji vio volonele kuenda ovikuli via kala ndonepa yatãlo.* 32 Apito aco avali a pangiwile lavaya opinyu kuenda eye wa luvikiyamo oviluvialuvia via va keruvi, oviti vieva, olonelẽho via telẽha kuenda wa vi laña lulu wa fina; kuenje wa sitika va keruvi loviti vieva, lulu wa fuliwa lomatelo. 33 Puvelo woku iñila vonembele,* wa u panga lovikuli viavaya opinyu lonjila yimuamue, ya tiamẽlele konepa yakuãla.* 34 Eye wa panga apito avali avaya ongaye. Epito limue lia kuatele olonepa vivali okuti, vi tava oku vi ketika kuenda epito likuavo lia kuatelevo olonepa vivali okuti, vi tava oku vi ketika.+ 35 Wa luvikiyamo oviluvialuvia via va keruvi, oviti vieva, olonelẽho via telẽha kuenda oviluvialuvia viaco wa vi laña lulu.

36 Eye wa tunga ocimbaka cocitali+ co vokati lovilala vitatu viovawe a songiwa kuenda ulala umosi wavaya osedru.+

37 Kunyamo 4, kosãi ya Sivi,* kua lingiwa ociseveto conjo ya Yehova;+ 38 kuenda kunyamo 11, kosãi ya Buli* (okuti kosãi ecelãla), onjo yosi ya malusuiwa lovina viosi ndomo via sokiyiwile.+ Kuenje eye wa yi tunga vokuenda kuanyamo epanduvali.

7 Salomone wa tunga onjo* yaye+ vokuenda kuanyamo 13 loku yi malusula.+

2 Kuenje eye wa tunga Onjo Yusenge wo Levanone,+ vusõvi wayo ya kuata 100 kovikeya,* vupati ya kuata 50 kovikeya, voku lepa ya kuata 30 kovikeya okuti, ya kala kilu liovilala vikuãla violongunji viosedru; kuenje kilu liovilala violongunji kua kala olohangalo viosedru.+ 3 Onepa yinene ya yambeliwile lavaya osedru, kilu liolohangalo vina via kala kovilala violongunji; kua kala 45 kuenda 15 kulala, lulala. 4 Kua kala ovilala vitatu violonjanela via kuata ovivindo kuenda onjanela lonjanela, ya suñamele konjanela yikuavo voloseteko vitatu. 5 Apito osi kuenda ovikuli via kuata olonele via lisoka ndeci, onepa yo kovaso yolonjanela, vina via li suñamele voloseteko vitatu.

6 Eye wa tunga Onjango* Yolongunji okuti vusõvi ya kuata 50 kovikeya, vupati ya kuata 30 kovikeya kuenje kovaso yaco kua tungiwile ocindumba cikuavo colongunji kuenda oco ca yambeliwile.

7 Eye wa tungavo Onjango* Yocalo+ muna eye a enda oku sombisila okuti, Onjango Yekanga+ kuenda wa yi kapa avaya osedru oku upisa posi toke kolohangalo.

8 Onjo* eye a laikele oku kala okuti, konele yikuavo yocitali,+ ya kala ocinãla Lonjango* kuenda ya tungiwa lonjila yimuamue. Eye wa tungilavo omõla ukãi wa Fareo una Salomone a kuelele, onjo yimue ya lisetahãla Lonjango yaco.+

9 Ovina viosi via tungiwa oku upisa koviseveto toke kilu liovimano, onepa yo posamua toke kocitali cinene, via tungiwile lovawe a tĩla,+ ana a songiwa ndomo ci likuata loloseteko kuenda a selaliwa loloselalo ci kaile kosamua lo vokati.+ 10 Ociseveto ca tungiwa lovawe a tĩla okuti, anene calua; kuenda ovawe amue a kuatele ekũi kovikeya, akuavo ecelãla kovikeya. 11 Kuenje kilu liovawe aco, kua kala ovawe a tĩla a songiwa loseteko yimuamue kuenda avaya osedru. 12 Kolonele viocitali cinene kua kala ocimbaka ca kuata ovilala vitatu viovawe a songiwa, lulala umosi wavaya osedru wa lisetahãla lowu wocimbaka cocitali co vokati+ konjo ya Yehova kuenda cocindumba conjo.+

13 Soma Salomone wa tuma oku kopa Hirama+ ko Turo. 14 Eye wa kala omõla wocimbumba cimue cepata lia Nafitali kuenda isiaye wa kala onalavayi yosipi ko Turo;+ Hirama wa loñolohele calua, wa kuatele ukũlĩhĩso+ koku linga ovopange osi losipi.* Kuenje weya ku Soma Salomone, wa linga ovopange aye osi.

15 Kuenje wa tunga olongunji vivali viosipi;+ ongunji longunji voku lepa, ya kuata 18 kovikeya kuenda kua sukilile ukolo umue woseteko u kuete 12 kovikeya oco u ñuale kongunji longunji.*+ 16 Wa tungavo ovitue vivali violongunji, oco vi kapiwe kilu liolongunji. Utue umue voku lepa wa kuata ovikeya vitãlo, ukuavo voku lepa wa kuatavo ovikeya vitãlo. 17 Ovitue vivali via kala kilu liongunji longunji via kuata owanda lalienge a tokekisiwa;+ kutue umosi epanduvali, kutue ukuavo epanduvali. 18 Eye wa tunga ovilala vivali violo romã via ñuala kowanda lowanda oco vi sitike ovitue via kala kilu liolongunji; eye wa linga ovina vimuamue kovitue vivali. 19 Ovitue via kala kosungu yolongunji viocindumba, via kala ndolonelẽho okuti, koku lepa via kuatele ovikeya vikuãla. 20 Ovitue via kala kolongunji vivali okuti, kilu lionepa yaco kuna kua ñualiwa lawanda; kuenda kua kala olo romã 200, via kapiwa kovilala via ñuala kutue lutue.+

21 Eye wa tumbika olongunji viocindumba conembele.*+ Wa tumbika ongunji yo konele yondio* wa yi luka okuti, Yakini,* noke wa tumbika ongunji yo kepĩli* wa yi luka okuti, Boasi.*+ 22 Osungu yolongunji, ya kala ndonelẽho. Kuenje upange wolongunji wa malusuiwa.

23 Noke wa panga ombasia yinene yovava yutale wa yenguluiwa yi tukuiwa hati, Okalunga.*+ Okalunga kaco ka ñualelepo ndolumbala okuti, ka kuatele 10 kovikeya oku upisa konele yimue yomẽla toke konele yikuavo kuenda koku lepa ka kuatele ovikeya 5, kua sukilile ukolo umue woseteko okuti, vusõvi wa kuatele 30 kovikeya oco u ñuale kokuayo.*+ 24 Vombuelo yongenge kolonele viosi, kua posuisiwa+ loviluvialuvia violombenje viatila via kuata ekũi kovikeya okuti, via ñuala Kokalunga kosi, lovilala vivali violombenje via yenguluiwa kocikuata cimosi kumue Lokalunga. 25 Okalunga kaco ka kala kilu liolongombe 12,+ olongombe 3 via imba ovaso konano, 3 via imba ovaso kutakelo, 3 via imba ovaso kombuelo kuenda 3 via imba ovaso kutundilo; kuenje Okalunga ka kala kilu liolongombe viaco kuenda olombunda vialio viosi via kala vokati Kokalunga. 26 Oko ka lisokele lupati weka;* kuenda ongenge yaco ya pangiwa ndongenge yokopo yimue, ndonelẽho ya telẽha. Oko ka ponduile oku sua 2.000 kolombatu.*

27 Eye wa panga akũi kotuakãlu*+ tuosipi. Okakãlu lokakãlu vupati ka kuatele ovikeya vikuãla, voku lepa ovikeya vikuãla kuenda vusõvi ovikeya vitatu. 28 Kuenje otuakãlu tua pangiwa ndoco: Tua kuata alukuki kolonele kuenda alukuki aco a kala pokati kovikuli. 29 Kalukuki a somehiwile kovikuli kua luvikiyiwile olohosi,+ olongombe, va keruvi+ kuenda oviluvialuvia vimuamue haivio via luvikiyiwile kovikuli. Kilu kuenda vombuelo yolohosi lolongombe, kua kala oviluvialuvia via kala ndakolowa. 30 Okakãlu lokakãlu ka kuatele alola akuãla osipi kuenda olowesu viosipi via kapiwa kotungunji tukuãla, ndociyakelo. Vemẽhi liombasiya mua kala oviyakelo okuti, volonele viaco mua kuata oviluvialuvia viovilame via yenguluiwa. 31 Omẽla wombasiya yaco wa kala vokati kekolowa kuenda wa kuata ukeya umosi koku lepa; omẽla wokakãlu wa kala ndolumbala kuenje kumue loviyakelo ca linga ocikuata cimuamue ci kuete ukeya umosi lomeyu koku lepa kuenda komẽla wokakãlu kua sonehiwile oviluvialuvia. Alukuki aco ana a kala kolonele, a kuata avindi akuãla a lisoka okuti, ka a kale ndolumbala. 32 Alola akuãla a kala vemẽhi yalukuki a kala kolonele viotuakãlu, oviyakelo vialola via kunamẽlele kokakãlu kuenda elola lelola, koku lepa lia kuatele ukeya umosi lomeyu. 33 Alola aco a kala ndalola ekãlu liuyaki. Oviyakelo viaco, awesu, olonjante, oloraio, lolokubu cosi ca kala cutale wa yenguluiwa. 34 Pavindi akuãla yokakãlu lokakãlu, pa kala oviyakelo vikuãla; oviyakelo viaco via pangiwile ndocikuata cimuamue* cokakãlu. 35 Kilu liokakãlu kua kala onepa yimue ya kala ndolumbala okuti, koku lepa ya kuata omeyu yukeya kuenje kilu liaco liokakãlu, ovivindo kuenda alukuki via kala kolonele viaco via pangiwile ndocikuata cimuamue* cokakãlu. 36 Kilu liovivindo viaco kuenda kalukuki a kasi kolonele viaco, eye wa luvikiyamo va keruvi, olohosi kuenda oviti vieva, kuosi kua kala ocitumãlo loku ñualisako akolowa.+ 37 Eyi oyo onjila a kuama poku panga otuakãlu ekũi;+ tuosi tua pangiwa lonjila yimuamue, loseteko yimuamue+ kuenda utunga umuamue.

38 Eye wa panga olombasiya ekũi viosipi;+ ombasiya lombasiya yambata 40 kolombatu. Ombasiya lombasiya ya kuatele ovikeya vikuãla.* Kokakãlu lokakãlu ci soka ekũi, kua kala ombasiya yimosi. 39 Konele yondio yonjo wa kapako otuakãlu tutãlo, konele yepĩli yonjo wa kapakovo otuakãlu tutãlo kuenda wa kapa okalunga konele yondio yonjo okuti, pokati kombuelo lutundilo.+

40 Hirama+ wa pangavo olombasiya, olopa+ kuenda atiyela.+

Kuenje Hirama wa malusula upange wosi a lingila soma Salomone vonjo ya Yehova:+ 41 olongunji vivali+ kuenda ovitue vi kasi ndetiyela okuti via kala kilu liolongunji vivali; awanda avali+ oco a sikĩlĩle kovitue vivali via kala ndetiyela okuti, via kala kilu liolongunji; 42 ci soka 400 kolo romã+ vioku kapa kawanda avali, ovilala vivali violo romã vioku kapa kowanda lowanda, oco vi sikĩlĩle kovitue vivali vi kasi ndetiyela okuti via kala kolongunji vivali; 43 otuakãlu ekũi+ kuenda olombasiya ekũi+ votuakãlu; 44 Okalunga+ kuenda 12 kolongombe via kala vemẽhi liokalunga; 45 kuenda ovikuata viatiko, olopa, atiyela lovikuata viosi vina Hirama a pangela Soma Salomone oco vi kale vonjo ya Yehova okuti wa vi panga losipi ya finisiwa. 46 Soma wa vi yengulula ndotuma vocivanja co Yordão pokati ko Sukote lo Saretana.

47 Salomone ka kapele ovikuata kombalansa momo etendelo liavio lia luile calua. Ocilemo cosipi ka ca tendiwile.+ 48 Salomone wa panga ovikuata viosi vionjo ya Yehova ndeci: utala+ wulu; omesa yulu+ oco ku kapiwe olombolo via taliwa; 49 oviyekelo violondiyelo+ viulu wa fina, kondio kua kala vitãlo, kepĩli kua kala vitãlo, kovaso yohondo yo vokati; kuenda olonelẽho,+ olondiyelo, lovikuata viulu vioku ima ondalu;*+ 50 olombasiya, ovikuata vioku teta omutusila,+ atiyela, olokopo,+ oviyukilo viondalu,+ viulu wa fina; olondevaliso viapito yohondo yo vokati+ okuti, Ohondo yi Kola Koku Kola kuenda viapito onjo yonembele+ viulu.

51 Kuenje Soma Salomone wa malusula upange wosi a sukilile oku lingila onjo ya Yehova. Noke Salomone wa nena vokati ovina isiaye Daviti a kolisile+ kuenje eye wa kapa opalata, ulu kuenda ovikuata vohondo yoku seleka ovokuasi vionjo ya Yehova.+

8 Kotembo yaco, Salomone wongolola+ akulu vo ko Isareli, asongui vosi ovikoti kuenda asongui volonjo via va isia vo ko Isareli.+ Ovo veya ku Soma Salomone ko Yerusalãi oco vambate ocikasia covisila via Yehova oku tunda Kolupale lua Daviti+ okuti, o Siono.+ 2 Alume vosi vo ko Isareli va liongoluila kovaso a soma Salomone kocipito* kosãi ya Etanimi* okuti, osãi yepanduvali.+ 3 Omo liaco, akulu vosi vo ko Isareli veya kuenje ovitunda via yelula Ocikasia.+ 4 Ovo va nena konano Ocikasia ca Yehova, lombalaka yohongele+ kuenda ovikuata viosi vi kola via kala vombalaka. Ovitunda la va Lewi va vi nena konano. 5 Soma Salomone kumue lohongele yosi yo Isareli vana va kovongiwile oco va liongolole laye, va kala kovaso Yocikasia. Omo liaco, kua lumbiwa+ olomeme vialua lolongombe okuti, oku vi tenda ka via tẽliwile.

6 Noke ovitunda via nena ocikasia covisila via Yehova pocitumãlo calio,+ vokati kohondo yovokati konjo okuti, Ohondo yi Kola koku Kola kuenje va ci kapa vemẽhi liavava a va keruvi.+

7 Omo liaco, avava a va keruvi a nyanyumuĩwile kocitumãlo Cocikasia kuenje va keruvi va sikĩlĩla Ocikasia kumue lolombueti viaco.+ 8 Olombueti+ via kala visõvi calua okuti, ca tavele oku mola olosungu viaco oku upisa Kohondo yi Kola kovaso yohondo yo vokati, pole, ka ca tavele oku vi muila oku upisa kosamua. Kuenje ovio, omo vi kasi toke etaili. 9 Vocikasia ka mua kale cimue, te lika avaya avali ovawe+ ana Mose a kapelemo+ ko Horeve eci Yehova a linga ocisila cimue+ lomanu va Isareli osimbu ovo va kala oku tunda kofeka Yegito.+

10 Eci ovitunda via tunda vocitumãlo ci kola, elende+ lia yukisa onjo ya Yehova.+ 11 Ovitunda ka via tẽlele oku kalamo loku vumba omo lielende, momo ulamba wa Yehova wa yukisa onjo ya Yehova.+ 12 Salomone wa popia hati: “Yehova wa popia okuti, wa laikele oku kala valende a tekãva.+ 13 Nda sumũlũisiwa calua poku ku tungila onjo yimue ya posoka okuti, ocitumãlo cimue coku kala oco o kalemo otembo ka yi pui.”+

14 Noke soma wa ñualapo kuenje wa fetika oku sumũlũisa ekongelo liosi lio Isareli osimbu ekongelo liosi lio Isareli lia talama.+ 15 Eye wa popia hati: “Yehova Suku ya Isareli a sivayiwe, una okuti lomẽla waye wa likuminya ku isiange Daviti kuenda leka liaye wa ci tẽlisa poku popia hati: 16 ‘Tunde keteke ndopa omanu vange va Isareli Kegito, sia nõlele olupale laumue pokati kovikoti viosi via Isareli oco omunu umue a tungilemo onjo yimue okuti, onduko yange yamamako oku kalamo,+ pole, nda nõla Daviti oco a viale omanu vange va Isareli.’ 17 Kuenje onjongole yo vutima ya isiange Daviti, ya kala yoku tunga onjo yimue yeca esivayo konduko ya Yehova, Suku ya Isareli.+ 18 Pole, Yehova wa sapuila isiange Daviti hati: ‘Onjongole yo vutima wove ya kala yoku tunga onjo yimue yeca esivayo konduko yange kuenda wa linga ciwa omo lioku lekisa onjongole yaco vutima wove. 19 Pole, ove ku ka tunga onjo, omõlove una o ka ku citiwila* eye o ka tunga onjo yeca esivayo konduko yange.’+ 20 Yehova wa tẽlisa ohuminyo a lingile, momo ame nda piñala isiange Daviti kuenda nda tumãla kocalo ca Isareli, ndomo Yehova a likuminyile. Nda tungavo onjo yimue yeca esivayo konduko ya Yehova, Suku ya Isareli.+ 21 Nda sokiyamo ocitumãlo cimue Cocikasia muna mu sangiwa ocisila+ cina Yehova a lingile la vakukululu yetu eci a vopa vofeka Yegito.”

22 Noke Salomone wa talama kovaso yutala wa Yehova kovaso yekongelo liosi lia Isareli kuenje woluĩla ovaka aye kovailu,+ 23 kuenda wa popia hati: “A Yehova Suku ya Isareli, ka kuli Suku wa lisoka love+ kovailu ale kilu lieve una o kapako ocisila kuenda o lekisa ocisola ka ci pongoloka+ kakuenje vove vana va kasi oku endela kovaso ove lutima wavo wosi.+ 24 Ove wa tẽlisa ohuminyo wa linga ku isiange Daviti ukuenje wove. Wa linga ohuminyo lomẽla wove muẽle kuenda keteke lietaili ove wa yi tẽlisa leka liove muẽle.+ 25 Cilo, a Yehova Suku ya va Isareli, tẽlisa ohuminyo wa linga kupika wove Daviti isiange, eci wa popia hati: ‘Otembo yosi ku ka kala ulume umue ukuacikoti cove kovaso ange oco a tumãle kocalo ca Isareli, nda omãla vove va kapako olonjila viavo poku endela kovaso ange ndeci ove wa endela kovaso ange.’+ 26 Kaliye mange ohenda, A Suku ya Isareli, ohuminyo yina wa linga ku isiange Daviti ukuenje wove yi tẽlisiwe.

27 “Pole, anga hẽ Suku o ka tunga muẽle kilu lieve?+ Tala! Ovailu, ocili, ilu liovailu ku suimo;+ capiãla enene onjo eyi nda tunga!+ 28 Kaliye yevelela ohutililo yukuenje wove lepingilo liaye liohenda, A Yehova Suku yange kuenda yevelela koku litetela kuoku pinga ekuatiso kuenda kohutililo ukuenje wove a kasi oku linga etaili kovaso ove. 29 Ovaso ove a lavulule onjo yilo uteke lutanya, ocitumãlo cina wa popia hati: ‘Onduko yange omo yi kala’+ kuenda yevelela ohutililo yina ukuenje wove a linga poku imba ovaso kocitumãlo cilo.+ 30 Yevelela epingilo liohenda liukuenje wove, lepingilo liomanu vove va Isareli lina ovo va likutilila loku imba ovaso kocitumãlo cilo kuenda yevelela oku upisa kocitumãlo cove o kasi, kovailu;+ ocili, yevelela kuenda ecela.+

31 “Nda omunu umue o lingila ekandu ukuavo kuenje o kisikiwa oku lisinga* okuti, cu kisika oku tẽlisa eci a lisinga* kuenje osimbu a kasi vemẽhi liocisila* caco, iya kovaso yutala wove vonjo yilo,+ 32 yevelela oku upisa kovailu kuenda linga loku sombisa akuenje vove poku tukula ondingaĩvi okuti, eye o kuete eko* kuenda eko liovilinga viaye, viu wile kutue waye muẽle kuenda tukula ukuesunga okuti, wa pua eko* poku u sumũlũisa ndeci ci likuata lesunga liaye.+

33 “Nda omanu vove va Isareli va yuliwa lunyãli umue, omo lioku amamako oku ku lingila ekandu+ kuenje ovo va tiuka kokuove kuenda va sivaya onduko yove+ loku likutilila kuenje va pinga ohenda kokuove vonjo yilo,+ 34 yevelela oku upisa kovailu kuenda ecela ekandu liomanu vove va Isareli kuenje va nena vali vofeka yina wa eca ku vakukululu yavo.+

35 “Eci ovailu a yika kuenda ka ku loki ombela+ omo ovo vamamako oku ku lingila ekandu+ kuenje ovo va likutilila loku imba ovaso kocitumãlo cilo kuenda va sivaya onduko yove loku tinduka kekandu liavo omo ove wa va kapa kutito,*+ 36 yevelela oku upisa kovailu kuenda ecela ekandu liakuenje vove, liomanu vove va Isareli, momo ove o ka va pindisila+ vonjila yiwa yina ovo va sesamẽla oku endela; kuenje nena ombela vofeka yove+ yina wa eca komanu vove ndocipiñalo.

37 “Nda kuiya onjala vofeka+ ale efengi limue, ofela ya tokota, ombutukuma,+ alende olohuma ale olohuma* vikuavo vi nyõla; ale nda unyãli wavo o va ñuala ocingonja valupale amue o vofeka* ale nda kuiya afengi añi añi ale ovovei,+ 38 nda omunu umue ale omanu vove vosi va Isareli va linga ohutililo ale epingilo limue liohenda,+ nda lie nda lie (momo, omunu lomunu wa kũlĩha efengi liutima waye muẽle)+ eci ovo va tulika ovaka avo konjo yilo, 39 yevelela oku upisa kovailu, kocitumãlo cove o kasi+ kuenda ecela+ loku va kuatisa; kuenje sumũlũisa omunu lomunu ndeci ci likuata lolonjila viaye viosi+ momo wa kũlĩha utima waye (ove lika wa kũlĩha ovitima viomanu vosi),+ 40 oco va ku sumbile oloneke viosi ovo va kala vofeka yina wa eca ku vakukululu yetu.

41 “Handi vali, catiamẽla kocingendeleyi ka ci pangi onepa komanu vove va Isareli okuti, ca tunda kofeka yimue ocipãla omo lionduko yove,*+ 42 (momo ovo va ka yeva eci catiamẽla konduko yove yinene+ kuenda eka liove lia pama lokuokuo kuove kuolõha) kuenje eye iya loku likutilila loku imba ovaso konjo yilo, 43 yevelelavo oku upisa kovailu, ocitumãlo o kasi+ kuenda linga cosi ocingendeleyi ci pinga kokuove oco omanu vosi vo kilu lieve va kũlĩhe onduko yove, loku ku sumbila+ ndeci omanu vove va Isareli va siata oku ci linga kuenda oco va kũlĩhe okuti onduko yove ya siata oku tukuiwa vonjo yilo nda tunga.

44 “Nda omanu vove va enda oku ka liyaka lunyãli wavo vonjila ove wa va tuma+ kuenje ovo va likutilila+ ku Yehova ocipepi lolupale ove wa nõla+ kuenda loku imba ovaso konjo yina ame nda tunga yeca esivayo konduko yove,+ 45 yevelela oku upisa kovailu ohutililo yavo kuenda epingilo liavo liohenda kuenje va tetuluila.

46 “Nda ovo va ku lingila ekandu (momo ka kuli omunu okuti ka lingi ekandu)+ kuenje o va kuatela onyeño loku va eca kunyãli umue o vambata kumandekua kofeka yunyãli, nda ocipãla nda ocipepi;+ 47 kuenje ovo va limbuka elinga liavo vofeka yina vambatiwa kumandekua+ kuenda va tiuka kokuove+ loku ku pinga ohenda vofeka yina va linga olomandekua,+ poku popia vati: ‘Tua linga ekandu kuenda tua linga eci cĩvi; tua linga eci ca vĩha,’+ 48 kuenje ovo va tiuka kokuove lutima wavo wosi,+ lomuenyo wavo wosi vofeka yovanyãli vavo vana va vambata kumandekua kuenje ovo va likutilila kokuove loku imba ovaso kofeka yavo yina wa eca ku vakukululu yavo kuenda olupale luna ove wa nõla lonjo yina ame nda tunga yeca esivayo konduko yove,+ 49 yevelela oku upisa kovailu ocitumãlo cove o kasi,+ ohutililo yavo kuenda epingilo liavo liohenda kuenje va tetuluila 50 loku ecela omanu vove vana va ku lingila ekandu, ecela akandu osi ovo va ku lueyela. O ka linga okuti, ovanyãli vavo va va tata lohenda kuenda ocisola+ 51 (momo, omanu vove kuenda ocipiñalo cove+ wopa Kegito+ vokati kofolono yoku yenguluila utale).+ 52 Ovaso ove a vanje kepingilo liohenda liukuenje wove+ kuenda kepingilo liohenda liomanu vove va Isareli poku va yevelela olonjanja viosi eci va ku vilikiya.*+ 53 Momo wa va tepa ndocipiñalo cove pokati komanu vosi vo kilu lieve,+ ndomo wa ci popia pocakati ca Mose upika wove eci wopa vakukululu yetu Kegito, A Ñala Tõlo Yehova.”

54 Noke eci Salomone a mala oku linga ohutililo lepingilo liohenda ku Yehova, eye wa votoka kovaso yutala wa Yehova, kuna eye a kekamẽlele kolongolo lovaka a nyanyumuĩwa kovailu.+ 55 kuenje wa talama kuenda wa sumũlũisa ekongelo liosi lio Isareli londaka yolukandi hati: 56 “Yehova a sivayiwe una wa eca komanu vaye va Isareli ocitumãlo cimue cepuyuko ndeci a likuminya.+ Pokati kolohuminyo viosi viwa a linga pocakati ca Mose upika waye, layimue ondaka ya kambapo.+ 57 Yehova Suku yetu, a kale letu ndeci a kala la vakukululu yetu.+ Eye ka ka tu yanduluke kuenda ka ka tu siepo.+ 58 Eye a ecelele okuti ovitima vietu vi tiuka kokuaye,+ oco tu endele volonjila viaye viosi loku pokola kovihandeleko viaye, koviholo viaye kuenda kovisila viaye, vina eye a handelekele vakukululu yetu oku vi pokola. 59 Olondaka evi viohenda nda pinga ku Yehova, vi kale ocipepi la Yehova Suku yetu utanya luteke, oco a linge esunga kukuenje waye kuenda komanu vaye va Isareli ndomo ci sukiliwa eteke leteke, 60 oco omanu vosi vo kilu lieve va kũlĩhe okuti, Yehova eye Suku yocili.+ Ka kuli ukuavo!+ 61 Omo liaco, utima wene u lekise+ oku kala la* Yehova Suku yetu poku endela voviholo viaye kuenda oku kapako ovihandeleko viaye ndeci vu kasi oku linga etaili.”

62 Kuenje soma lo Isareli yosi va eca ocilumba cinene kovaso a Yehova.+ 63 Salomone wa eca ovilumba viombembua+ ku Yehova: Eye wa eca 22.000 kolongombe kuenda 120.000 kolomeme. Omo liaco, soma lo Isareli yosi va tumbika onjo ya Yehova.+ 64 Keteke liaco, soma wa kolisa onepa yo vokati kocitali yina ya kala kovaso yonjo ya Yehova, momo opo a sukilile oku ecela ovilumba vioku pia elisi, ovilumba violomema kuenda ulela wovilumba viombembua, momo utala wosipi+ wa kala kovaso a Yehova, wa kala utito calua okuti ka kua suile ovilumba vioku pia elisi, ovilumba violomema kuenda ulela+ wovilumba viombembua. 65 Kotembo yaco, Salomone wa linga ocipito+ kumosi lo Isareli yosi okuti, ekongelo limue linene, lia tunda tunde ko Lebo-hamati* toke Kekango* lio Kegito,+ kovaso a Yehova Suku yetu, vokuenda kuoloneke 7 kuenda oloneke vikuavo 7 okuti, vocosi ca tẽla 14 koloneke. 66 Veteke* lia kuamamo, eye wa ecelela okuti omanu va enda kuenda ovo va sumũlũisa soma kuenje ovo va enda kolonjo viavo lesanju, lutima weyuka onjolela omo liohenda yalua+ Yehova a lekisa ku Daviti ukuenje waye kuenda komanu vaye va Isareli.

9 Eci Salomone a malusula oku tunga onjo ya Yehova lonjo* ya soma+ kuenda ovina viosi Salomone a yonguile oku linga,+ 2 Yehova wa molẽha ku Salomone onjanja yavali ndeci a molẽhele kokuaye ko Giveone.+ 3 Yehova wo sapuila hati: “Nda yeva ohutililo yove kuenda epingilo liohenda wa linga kokuange. Nda kolisa onjo yilo wa tunga loku kapamo onduko yange otembo ka yi pui+ kuenda ovaso ange lutima wange vi ka kalamo otembo yosi.+ 4 Nda ove wa endela volonjila viange ndeci isiove Daviti a enda,+ poku ndi vumba lutima wosi,+ lesunga,+ poku linga ovina viosi nda ku handeleka+ kuenje o pokola koviholo viange lasombiso ange,+ 5 ame ndi ka tumbika ocalo cusoma wove vo Isareli otembo ka yi pui, ndeci nda likuminya ku isiove Daviti poku popia hati: ‘Otembo yosi ku ka kala ulume umue ukuacikoti cove o tumãla kocalo ca Isareli.’+ 6 Pole, ove lomãla vove nda wa liwekipo oku ndi kuama loku siapo oku pokola kovihandeleko viange kuenda koviholo viange vina nda tumbika kovaso ene kuenje ene wendi loku vumba olosuku vikuavo loku vi kekamẽla,+ 7 ame ndi ka kundula Isareli vofeka yina nda eca kokuavo+ kuenda ovaso ange a ka kala ocipãla lonjo nda kolisa okuti, yambata onduko yange+ kuenje o Isareli yi ka linga ocina cimue ci sepuiwa* haico ci pembuiwa pokati komanu vosi.+ 8 Kuenje onjo eyi yi ka linga ondunda yovingululu.+ Omunu wosi o pitako o yi vanja loku komõha kuenda o ka sika ovilua loku pula hati: ‘Momo lie Yehova a lingila ovina evi lofeka eyi kuenda lonjo eyi?’+ 9 Noke va ka tambulula vati: ‘Momo va yanduluka Yehova Suku yavo una wopa vakukululu yavo vofeka Yegito kuenje va kakatela kolosuku vikuavo loku vi kekamẽla kuenda va vi vumba. Eli olio esunga lieci Yehova a va nenela ohali yosi eyi.’”+

10 Kesulilo 20 kanyamo, otembo Salomone a tunga olonjo vivali okuti, onjo ya Yehova, lonjo* ya soma,+ 11 Hirama+ soma yo Turo wa ecele ku Soma Salomone avaya osedru kuenda ongaye, lulu wosi a yonguile+ kuenje Salomone wa eca ku Hirama 20 kalupale vofeka yo Galilea. 12 Kuenje Hirama wa tunda ko Turo oco a ka mole alupale Salomone a ecele kokuaye, pole, ka a sanjukilile.* 13 Eye hati: “Alupale api wa nyĩha ndeti, a manjange?” Alupale aco eya oku tukuiwa okuti, Ofeka yo Kavulu* toke etaili. 14 Hirama wa tuma ku soma ci soka 120 kolotalendo* viulu.+

15 Owu, owo ulandu wa vana Soma Salomone a tuma oku linga upange wa tĩla+ woku tunga onjo ya Yehova,+ lonjo* yaye muẽle kuenda Ondunda yeve,*+ ocimbaka co Yerusalãi, o Hasore,+ o Megido+ kuenda o Gesere.+ 16 (Fareo soma yo Kegito wa katukila imbo lio Gesere kuenda wa timĩha imbo liaco londalu, wa pondavo va Kanana+ vana va kala volupale luaco. Noke wa eca imbo liaco ndombanjaile yoku liusika* komõlaye ukãi+ okuti ukãi wa Salomone.) 17 Salomone wa tunga* o Gesere, lo Bete-Horone yo Kombuelo,+ 18 o Baalata,+ o Tamare vekalasoko vokati kofeka, 19 lalupale osi olosila via Salomone, alupale akãlu, lalupale+ a vakuakuendela kolokavalu, lovina viosi Salomone a yonguile oku tunga vo Yerusalãi, ko Levanone kuenda kofeka yosi yuviali waye. 20 Catiamẽla komanu vosi vana va supilepo ku va Amori, ku va Hiti, ku va Perisi, ku va Hivi kuenda ku va Yevusi okuti,+ vana ka va tiamẽlele komanu vo ko Isareli,+ 21 okuti ovitumbulukila viavo vina via supilepo vofeka haivio va Isareli ka va tẽlele oku vi kundula, va kovongiwa la Salomone oco vo lingile upange wa tĩla ndapika toke etaili.+ 22 Pole, Salomone ka lingisile laumue pokati ka va Isareli upika,+ momo ovo va kala asualali vaye, akuenje vaye, olombuale viaye, oloñuatisi viaye, lasongui a vana vakuakuendisa akãlu aye kuenda vakuakuendela kolokavalu. 23 Kua kala 550 kasongui va kalei vana va songuila upange wa Salomone okuti, vakuakusonguila omanu va kala oku linga upange.+

24 Pole, omõla ukãi wa Fareo+ wa tunda Volupale lua Daviti,+ wa enda konjo yaye yina Salomone o tungila; noke wa tunga Ondunda yeve.*+

25 Olonjanja vitatu vunyamo+ Salomone wa enda oku eca ovilumba vioku yoka kuenda ovilumba viombembua kutala a tungilile Yehova,+ loku tuimisila owisi wovilumba kutala wa kala kovaso a Yehova kuenje wa malusula onjo.+

26 Soma Salomone wa tungavo olonaviyu vialua ko Eciongevere+ vi kasi ocipepi lo Eloti, kohulo Yokalunga Kakusuka vofeka yo Edome.+ 27 Hirama wa tuma akuenje vaye muẽle lolonaviyu viaco okuti,+ alume vakuoloño wokalunga oco va talavaye kumosi lakuenje va Salomone. 28 Ovo va enda ko Ofiri+ kuenda vopako 420 kolotalendo viulu kuenje va viambata ku Soma Salomone.

10 Nasoma yo Sieva wa yeva ulandu watiamẽla koluhimo lua Salomone omo lionduko ya Yehova+ kuenje eye weya oco o seteke lapulilo a tatama.*+ 2 Nasoma wa pitĩla ko Yerusalãi lomanu valua va kemãla*+ kumue lolongamelo viambata ulela wonguendu,+ lulu walua kuenda ovawe a tĩla. Eye wa enda toke ku Salomone kuenje wo sapuila ovina viosi via kala vutima waye. 3 Salomone wa tambulula apulilo aye osi. Ka kua kaile lacimue okuti ca tatamẽle calua* ku soma oco o ci lomboluile.

4 Eci nasoma yo Sieva a mola olondunge viosi via Salomone,+ onjo yina a tunga,+ 5 okulia kuomesa yaye,+ oku tumãla kuakuenje vaye, upange wa vakuakuseva omesa luwalo wavo, vakuakueca okopo yaye kuenda ovilumba viaye vioku pia elisi vina a enda oku lumba otembo yosi vonjo ya Yehova, nasoma ka kuatele vali eci a vangula.* 6 Omo liaco, eye wa sapuila soma hati: “Ulandu nda yeva vofeka yange muẽle watiamẽla kovina wa linga* kuenda kolondunge viove, wa kala wocili. 7 Pole, sia kolelele kovolandu aco toke eci ndeya loku ci mola lovaso ange muẽle. Kuenje tala! Ndaño onepa yimue ka ya sapuiwile kokuange. Ove wa velapo calua kolondunge kuenda kukuasi okuti, ovina omanu va popia viatiamẽla kokuove vi sule. 8 Omanu vove va sumũlũha kuenda va sumũlũhavo akuenje vove vana va kasi kovaso yove otembo yosi oku yevelela olondunge viove!+ 9 Yehova Suku yove a sivayiwe,+ una wa ku sanjukila poku ku kapa kocalo ca Isareli. Omo liocisola ka ci pui Yehova a kuetele va Isareli, eye wa ku nõla oco o linge osoma okuti, o viala lesunga kuenda esunguluko.”

10 Noke nasoma wa eca ku soma 120 kolotalendo* viulu, lulela walua wonguendu+ kuenda ovawe a tĩla.+ Lalimue eteke kua neniwile vali ulela walua wonguendu ndowu nasoma yo Sieva a eca ku Soma Salomone.

11 Olonaviyu vialua via Hirama vina via nena ulu wo ko Ofiri,+ via nenavo avaya alua alimugi o ko Ofiri+ kuenda ovawe a tĩla.+ 12 Soma wa panga lavaya alimugi olongunji vionjo ya Yehova levi vionjo* ya soma kuenda olohalupa lovikuata viovisikilo via pangiwa lovikolo oco vi eciwe kolonjimbi.+ Lalimue eteke kua neniwile ale oku mola vali avaya alimugi nda-a toke etaili.

13 Soma Salomone wa ecavo ku nasoma yo Sieva ovina viosi nasoma a yonguile levi a pinga, lovina eye o wĩha omo liohenda* yaye. Noke nasoma wa enda kuenje wa tiukila kofeka yaye muẽle kumue lakuenje vaye.+

14 Ocilemo culu cina Salomone a enda oku tambula unyamo lunyamo ca tẽlele 666 kolotalendo viulu,+ 15 oku upamo evi via enda oku tunda ku vakualomĩlu, konganyu ya vakuakulandisa, lo kolosoma viosi vio ko Arabia kuenda kolonguluvulu viofeka.

16 Soma Salomone wa panga 200 koviyepelo vinene viulu ulikasi+ (ociyepelo lociyepelo ca kuatele 600 kolosiekele* viulu)+ 17 kuenda 300 koviyepelo vitito* viulu ulikasi (ociyepelo lociyepelo citito ca kuatele olomina* vitatu viulu). Kuenje soma wa vi kapa Vonjo Yusenge wo Levanone.+

18 Soma wa pangavo ocalo cimue cinene combinga yonjamba+ kuenda wa ci laña lulu wa fina.+ 19 Kua kala eci ci soka epandu kovilamanelo toke kocalo kuenda kilu va sitikako, kua kala oviyekelo viovoko kolonele vivali viocalo kuenje oviñumañuma vivali viohosi+ via talama konẽle yoviyekelo viaco. 20 Kua kala 12 koviñumañuma violohosi via talama kovilamanelo epandu okuti, konele lonele yovilamanelo epandu kua kala ociñumañuma cohosi. Ka kua la kala usoma ukuavo wa lingile ocina cimue ndeci.

21 Olokopo viosi vioku nyuila via Soma Salomone via kala viulu kuenda ovikuata viosi Vionjo Yusenge wo Levanone+ via kala viulu wa fina. Ka kua kaile lacimue ca pangiwa losipi, momo osipi ka ya kuatele esilivilo koloneke via Salomone.+ 22 Soma wa kuatele olonaviyu vialua vokalunga ko Tarsisi,+ ovio via endaile kumosi lolonaviyu via Hirama. Onjanja yimosi vanyamo atatu, olonaviyu vio ko Tarsisi via enda oku nena ulu, opalata, ombinga yonjamba,+ olosima kuenda olonjila violo-pavão.*

23 Soma Salomone wa velelepo olosoma viosi vikuavo vio kilu lieve kovokuasi+ kuenda kolondunge.+ 24 Kuenje omanu vo kilu lieve liosi, va yonguile oku li sanga* la Salomone oco va yevelele olondunge viaye vina Suku a kapele vutima waye.+ 25 Omunu lomunu wa enda oku nena ombanjaile yimue okuti, ovikuata viosipi, ovikuata viulu, ovowalo, ovimalẽho viuyaki, ulela wonguendu, olokavalu lolomula kuenje vamamako oku ci linga unyamo lunyamo.

26 Salomone wamamako oku ongolola akãlu kuenda olokavalu;* eye wa kuatele 1.400 kakãlu kuenda 12.000 kolokavalu*+ kuenje wamamako oku vi kapa valupale akãlu ocipepi la soma ko Yerusalãi.+

27 Soma wa luisa opalata ko Yerusalãi okuti, ya luile calua ndovawe kuenda avaya osedru a luile calua ndoviti viakuyu vio ko Sefela.+

28 Olokavalu via Salomone via enda oku tunda Kegito kuenda ocimunga ca vakualomĩlu via soma ca enda oku landa ocunda colokavalu* vondando yimosi.+ 29 Ekãlu lekãlu lia tunda Kegito, lia kuatele ondando yi soka 600 kolopalata kuenda okavalu kamosi ka kuatele ondando yi soka 150 kolopalata; ovo va enda oku vi landisa kolosoma viosi via va Hiti+ kuenda kolosoma vio ko Suria.

11 Pole, Soma Salomone wa solele akãi valua ovingendeleyi+ ndaño wa kuatele ale omõla ukãi wa Fareo:+ akãi va Moavi,+ va Amoni,+ va Edome, va Sidono+ kuenda va Hiti.+ 2 Ovo va tundile kolofeka vina Yehova a sapuilile va Isareli hati: “Ko ka iñili pokati kavo* kuenda ovo ka va ka iñile pokati kene, momo va ka yapuisa ovitima viene oco vu kuami olosuku viavo.”+ Pole, Salomone wa kuatele ukamba lavo kuenda wa va solele calua. 3 Eye wa kuatele 700 kakãi va kala omãla volosoma kuenda 300 kakama kuenje akãi vaye va yapuisa utima waye kamue kamue.* 4 Eci Salomone a kuka+ akãi vaye va yapuisa utima waye oco a kuame olosuku vikuavo+ kuenda utima waye ka wa sungulukilile* Yehova Suku yaye ndeci utima wa isiaye Daviti. 5 Salomone wa fendela Asitorete+ osuku yukãi ya va Sidono kuenda Milikome+ osuku ya vĩha ya va Amoni. 6 Salomone wa linga eci cĩvi kovaso a Yehova kuenda ka fendelele Yehova lutima waye wosi ndeci isiaye Daviti a linga.+

7 Noke Salomone wa tungila Kemosi osuku ya vĩha yo ko Moavi ocitumãlo cimue ca lepa+ komunda yi kasi kovaso yo Yerusalãi kuenda wa tungilakovo Moleke+ osuku ya vĩha ya va Amoni.+ 8 Eci oco eye a lingila akãi vaye vosi ovingendeleyi vana va enda oku tuimisa owisi wocilumba loku eca ovilumba kolosuku viavo.

9 Yehova wa kuatela onyeño yalua Salomone, momo utima waye wa yanduluka Yehova Suku ya Isareli,+ una wa molẽhele kokuaye olonjanja vivali,+ 10 kuenda wo lunguile kovina evi okuti, o sukila oku yuvula oku kuama olosuku vikuavo.+ Pole, eye ka pokuile kueci Yehova o handelekele. 11 Yehova wa sapuila Salomone hati: “Omo okuti wa linga ovina evi kuenda kua pokuile kocisila cange loviholo nda ku handelekele, ocili okuti ndupa usoma kokuove, ndu weca ku umue pokati kakuenje vove.+ 12 Pole, omo lia isiove Daviti, si ci lingi osimbu o kasi lomuenyo. Ndupa usoma peka liomõlove,+ 13 si upi kokuaye usoma wosi.+ Ngeca komõlove ocikoti cimue+ omo liukuenje wange Daviti kuenda omo lio Yerusalãi yina nda nõla.”+

14 Yehova wa katuila Salomone unyãli umue okuti,+ Hadade u Edome wa tunda kepata lia soma yo ko Edome.+ 15 Eci Daviti a yula va Edome,+ Yoava kesongo kolohoka wa enda oku ka kenda ovivimbi viaco kuenda wa seteka oku ponda alume vosi vo ko Edome. 16 (Momo Yoava la va Isareli vosi oko va kala olosãi epandu, toke eci eye a ponda* alume vosi vo ko Edome.) 17 Pole, Hadade wa tila lapika vamue va isiaye va kala va Edome kuenda va enda Kegito; kotembo yaco, handi Hadade wa kala umalẽhe. 18 Ovo va tunda ko Midiane va enda ko Parane. Vambata alume oku tunda ko Parane,+ va enda Kegito ku Fareo soma Yegito una, wo wĩha onjo, lokulia kuenda ovapia. 19 Hadade wa sanga ohenda yalua kovaso a Fareo, eli olio esunga lieci o kuelisila la manji yukãi waye nasoma* Tahipenese. 20 Manji a Tahipenese wa citila Hadade omõla ulume okuti, Genuvati kuenda Tahipenese wo wambata* konjo ya Fareo kuenje Genuvati wamamako oku kala konjo ya Fareo pokati komãla va Fareo.

21 Hadade osimbu a kala Kegito, wa yeva okuti Daviti wa ka puyuka la vakukululu yaye+ kuenda Yoava usongui wolohoka wa fa.+ Kuenje Hadade wa sapuila Fareo hati: “Ecelela okuti ngenda kofeka yange.” 22 Pole, Fareo wo pulisa hati: “Nye ca ku kambela kulo okuti, o yongola oku enda kofeka yove?” Eye wa kumbulula hati: “Lacimue, pole, mange ohenda ecelela okuti ngenda.”

23 Suku wa katuila Salomone unyãli ukuavo okuti,+ Resono omõla a Eliada una wa tilile ñala yaye Hadadesere+ soma yo Sova. 24 Eye wongolola alume kuenda wa linga usongui wocimunga covingumba eci Daviti a va yula.*+ Kuenje ovo va enda ko Damasko+ kuenda oko va kala, yu va fetika oku viala ko Damasko. 25 Eye wa linga unyãli wa Isareli oloneke viosi via Salomone, loku vokiyako ovitangi via kokiwile la Hadade kuenda eye wa suvuka Isareli osimbu a vialele ko Suria.

26 Kua kala Yerevoama+ omõla a Nevata u Efarimi wo ko Cereda haeye ukuenje wa Salomone,+ onduko ya inaye Seruwa okuti, ocimbumba. Eye wa fetikavo oku sinĩla* soma.+ 27 Eye wa sinĩla soma omo okuti: Salomone wa tunga Ondunda yeve*+ kuenda wa semũlũla ocimbaka Colupale lua Daviti isiaye.+ 28 Yerevoama wa kala ulume umue wa pama. Eci Salomone a limbuka okuti ukuenje waco onalavayi yiwa, wo lingisa usongui+ wupange wosi wekisika wo vonjo ya Yosefe. 29 Vokuenda kuotembo yaco, Yerevoama wa tunda ko Yerusalãi, uprofeto Ahiya+ u Silo wo sanga vonjila. Ahiya wa walele uwalo umue wokaliye kuenda kavali kavo va kala vusenge. 30 Ahiya wa lula uwalo wokaliye eye a walele, wa u tola volonepa 12. 31 Noke wa sapuila Yerevoama hati:

“Tikula olonepa ekũi, momo ca popia Yehova Suku yo ko Isareli ceci hati: ‘Ndupa usoma peka lia Salomone kuenda ndu ku ĩha ovikoti ekũi.+ 32 Pole, eye o ka siala locikoti cimosi,+ omo liukuenje wange Daviti+ kuenda omo lio Yerusalãi olupale nda nõla pokati kovikoti viosi vio Isareli.+ 33 Ndi ci linga, momo ovo va njanduluka+ kuenda va kekamẽla Asitorete osuku yukãi ya va Sidono, la Kemosi osuku yo ko Moavi, la Milikome osuku ya va Amoni kuenda va liwekapo oku endela volonjila viange, oku linga eci ca sunguluka kovaso ange, loku pokola koviholo viange, lolonumbi viange ndeci Daviti isia ya Salomone a lingile. 34 Pole, si ko upa usoma wosi peka liaye, ngecelela okuti eye o kamamako oku kala usongui wa vosi oloneke viosi viomuenyo waye, omo lia Daviti ukuenje wange una nda nõla,+ momo eye wa pokola kovihandeleko viange kuenda koviholo viange. 35 Pole, ndi ko upa uviali peka liomõlaye, ndu weca kokuove okuti, ovikoti ekũi.+ 36 Komõlaye ndi ko wĩha ocikoti cimosi oco ukuenje wange Daviti a kuate ondiyelo yimue ko Yerusalãi+ olonjanja viosi okuti, olupale nda nõla ndocitumãlo ndi kapa onduko yange. 37 Ndu ku nõla kuenda o ka viala omanu vosi o yongola,* o linga osoma yo ko Isareli. 38 Nda o pokola kovina viosi nda ku handeleka, loku endela volonjila viange, loku linga eci ca sunguluka kovaso ange poku pokola koviholo viange, lovihandeleko viange ndeci ukuenje wange Daviti a linga,+ ndi kalavo love. Ndi ka ku tungilako onjo yimue yi kala otembo ka yi pui, ndeci nda tungilile Daviti+ onjo yimue kuenda ndu ku ĩha Isareli. 39 Ndi ka sepula ocitumbulukila ca Daviti omo liovina evi,+ pole, si ci lingi otembo yosi.’”+

40 Omo liaco, Salomone wa seteka oku ponda Yerevoama, pole, Yerevoama wa tilila Kegito ku Sisiake+ soma Yegito+ kuenda wa kala Kegito toke eci Salomone a fa.

41 Catiamẽla konepa yikuavo yulandu womuenyo wa Salomone, lovina viosi eye a linga, lolondunge viaye, ka via sonehiwile hẽ velivulu liulandu wa Salomone?+ 42 Otembo* Salomone a viala ko Yerusalãi okuti o Isareli yosi, ya tẽla 40 kanyamo. 43 Noke Salomone wa ka puyuka la vakukululu yaye kuenda wa kendiwa Volupale lua Daviti isiaye; kuenje omõlaye Rehovama+ wa linga osoma pomangu yaye.

12 Rehovama wa enda ko Sekeme, momo o Isareli yosi ya endele ko Sekeme+ oco vo lingise osoma.+ 2 Eci Yerevoama omõla a Nevata a ci yeva (eye handi wa kala Kegito, momo eye wa tilile soma Salomone kuenda wa tungile Kegito),+ 3 ovo va tuma oku u vilikiya. Noke Yerevoama kuenda owiñi wosi wa va Isareli veya ku Rehovama kuenje vo sapuila vati: 4 “Isiove wa tĩlisa okanga yetu.+ Pole, nda ove o leluisa upange wa tĩla una isiove a tu ĩhile, loku leluisa okanga ya lema,* eye a tu kapela, etu tu ka ku vumba.”

5 Kuenje eye wa va sapuila hati: “Kuendi, kali oloneke vitatu; noke tiuki kokuange.” Omo liaco, omanu va enda.+ 6 Soma Rehovama wa sapela lalume va kuka* vana va vumbile isiaye Salomone osimbu eye a kala komuenyo, loku pula hati: “Elungulo lipi vu nyĩha oco ndi tambulule omanu ava?” 7 Ovo vo kumbulula vati: “Etaili nda wa linga upika womanu ava kuenda o tava kepingilo liavo, loku va ĩha etambululo lia suapo, ovo otembo yosi va ka kala akuenje vove.”

8 Omo liaco, eye wa likala elungulo lina alume va kuka* va eca kokuaye kuenje wa kũlĩhĩsa amalẽhe vana va kulila kumosi laye haivo va kala oloñuatisi viaye.+ 9 Eye wa va pula hati: “Elungulo lipi vu nyĩha oco tu tambulule omanu ava va kasi oku ndi sapuila vati: ‘Leluisa okanga ya tĩla isiove a kapa kokuetu’?” 10 Amalẽhe vana va kulila kumosi laye vo sapuila vati: “Eci oco o sapuila komanu ava va ku sapuila okuti: ‘Isiove wa tĩlisa okanga yetu, pole, ove o sukila oku tu yi leluisila’; o sukila oku va sapuila hati: ‘Omuine wange utito, u ka kala vali unene okuti, ombunda ya isiange yi sule. 11 Isiange wo kapeli okanga yimue ya lema, pole, ame ndi vokiyako kokanga yene. Isiange wa vu kangisi losikote, pole, ame ndu vu kangisi losikote yi kuete olosongo.’”

12 Yerevoama lomanu vosi veya ku Rehovama keteke liatatu, ndeci soma a popele hati: “Tiuki kokuange keteke liatatu.”+ 13 Pole, soma wa tambulula omanu lukãlu, wa likala elungulo vo wĩhile kalume va kuka.* 14 Eye wa popia lavo ndomo ci likuata lelungulo liamalẽhe hati: “Isiange wa ku kapeli okanga yimue ya lema, pole, ame ndi vokiyako kokanga yene. Isiange wa ku kangisi losikote, pole, ame ndi vu kangisi losikote yi kuete olosongo.” 15 Omo liaco, soma ka yevele omanu, momo ovina via kala oku pita, via tunda ku Yehova+ oco ku tẽlisiwe ondaka Yehova a popele pocakati ca Ahiya+ u Silo kuenda ku Yerevoama omõla a Nevata.

16 Eci va Isareli vosi va mola okuti soma ka tavele oku va yevelela, omanu va tambulula soma vati: “Onepa yipi tu kuete ku Daviti? Ka tu kuete ocipiñalo komõla a Jese. Eceleli okuti omunu lomunu o vumba olosuku viaye muẽle, A Isareli! Kaliye tata onjo yove muẽle a Daviti!” Kuenje va Isareli va tiukila kolonjo viavo.*+ 17 Pole, Rehovama wamamako oku viala va Isareli vana va tungile kalupale o Yuda.+

18 Kuenje Soma Rehovama wa tuma Adorama+ una wa kuatele ocikele coku songuila vana va kovongiwile oco va linge upange wa tĩla, pole, o Isareli yosi yo sosõla lovawe toke eci a fa. Soma Rehovama wa londa vekãlu liaye oco a tilile ko Yerusalãi.+ 19 Kuenje va Isareli va kasi oku amamako oku ñualelapo+ onjo ya Daviti toke etaili.

20 Eci va Isareli vosi va yeva okuti Yerevoama wa tiuka, vo kovonga kohongele kuenda vo lingisa osoma yo Isareli yosi.+ Ka kua kaile omunu wa kuama onjo ya Daviti, te lika ocikoti ca Yuda.+

21 Eci Rehovama a pitĩla ko Yerusalãi vepuluvi liaco, wongolola onjo yosi ya Yuda, ocikoti ca Benjamini, va soka 180.000 kasualali va pindisiwa* oco va liyake lonjo ya Isareli okuti, va tiuwiya uviali ku Rehovama omõla a Salomone.+ 22 Noke Suku yocili wa sapuila uprofeto waye Semaya+ ukuenje wa Suku yocili hati: 23 “Sapuila Rehovama omõla a Salomone soma yo Yuda, lonjo yosi ya Yuda, ya Benjamini kuenda omanu vosi hati: 24 ‘Ca popia Yehova ceci hati: “Ko ka lamani oku katukila vamanjene va Isareli. Omunu lomunu pokati kene a tiukile konjo yaye, momo ovina evi ame nda vi koka.”’”+ Omo liaco, va pokola kondaka ya Yehova kuenje va tiukila kolonjo viavo ndomo Yehova a va sapuilile.

25 Yerevoama wa tunga* o Sekeme+ kovaimbo a kasi kolomunda via Efarimi kuenda oko a kala. Oku tundako eye wa enda kuenje wa tunga* o Penuele.+ 26 Yerevoama wa sima vutima waye hati: “Kaliye usoma va ka u tiuwiya konjo ya Daviti.+ 27 Nda omanu ava vamamako oku lamanela oku ka eca ovilumba konjo ya Yehova ko Yerusalãi,+ ovitima viomanu vi ka tiukilavo ku ñala yavo Soma Rehovama wo ko Yuda. Ovo va ka ndi ponda kuenda va ka tiukila ku Soma Rehovama wo ko Yuda.” 28 Noke lialungulo, soma wa tunga olonãle vivali viulu+ kuenda wa sapuila omanu hati: “Ka ca lelukile kokuene oku lamanela ko Yerusalãi. A Isareli, eyi oyo o Suku yove, yina ya ku upa kofeka Yegito.”+ 29 Wa kapa yimue ko Betele,+ yikuavo wa yi kapa ko Dani.+ 30 Eci ca va kokela oku linga ekandu+ kuenda omanu va endaenda ko Dani oku ka fendela onãle ya kalako.

31 Eye wa tunga olonjo viefendelo kovitumãlo via lepa kuenda wa nõla ovitunda pokati komanu vana okuti, ka va kaile va Lewi.+ 32 Yerevoama wa tumbikavo ocipito cimue kosãi yecelãla, keteke 15 liosãi, ndocipito ca enda oku lingiwa ko Yuda.+ Kutala a tunga ko Betele,+ wa enda oku ecelako ovilumba kolonãle eye a tungile kuenda ko Betele wa nõlako ovitunda oco vi kale kovitumãlo via lepa eye a tungile. 33 Kosãi yecelãla, keteke 15 liosãi, eye wa fetika oku eca ovilumba kutala a tungile ko Betele, osãi eye muẽle a nõlele; kuenje wa tumbikila omanu va Isareli ocipito cimue kuenda wa londa kutala oco a ece ovilumba loku tuimisa owisi wovilumba viaco.

13 Ukuenje umue wa Suku+ wa tunda ko Yuda, weya ko Betele ndeci Yehova o handelekele kuenda wa sanga Yerevoama o tãi ocipepi lutala+ oco a tuimise owisi wocilumba. 2 Eye wa kalukila utala ndeci Yehova o handelekele, wa popia hati: “Utala, utala! Ca popia Yehova ceci hati: ‘Tala! Konjo ya Daviti ku ka citiwa omõla umue o ka tukuiwa hati, Yosiya!+ Kokuove eye o ka lumbilako ovitunda viocitumãlo ca lepa, vana va tuimisa owisi wocilumba kuenda o ka timĩha akepa omanu kokuove.’”+ 3 Keteke liaco, eye wa eca ondimbukiso* yimue poku popia hati: “Ondimbukiso* Yehova a tukula yeyi yokuti: Tala! Utala u ka toka kuenda etiko* li kasiko li ka peseka.”

4 Eci soma a yeva ondaka ukuenje wa Suku yocili a kalukila catiamẽla kutala ko Betele, Yerevoama woluĩla eka liaye kutala loku popia hati: “U kuati!”+ Vepuluvi liaco, eka liaco eye oluĩle kukuenje waco lia kukuta* kuenda ka tẽlele oku li ketika vali.+ 5 Noke utala wa toka pokati kuenda etiko lia kala kutala lia peseka ndomo ci likuata londimbukiso* ya eciwa lukuenje wa Suku ndeci Yehova a handelekele.

6 Soma wa sapuila ukuenje wa Suku yocili hati: “Mange ohenda, pinga ocali ca Yehova Suku yove kuenda ndi likutilileko oco okuokuo kuange ku kaye.”+ Ukuenje wa Suku yocili wa pinga ocali* ca Yehova kuenda okuokuo kua soma kua kaya ndomo kua kala tete. 7 Soma wa sapuila ukuenje wa Suku yocili hati: “Enju konjo yange oco o lie kuenda ndu ku ĩha ombanjaile yimue.” 8 Pole, ukuenje wa Suku yocili wa sapuila soma hati: “Ndaño wa nyĩha onepa yimue yonjo yove, siendi love kuenda si li ombolo loku nyua ovava vocitumãlo cilo. 9 Momo Yehova wa ndi handeleka hati: ‘Ku ka lie ombolo, ndaño oku nyua ovava, pamue oku tiuka lonjila weya layo.’” 10 Kuenje wa enda lonjila yikuavo kuenda ka tiukile vali vonjila eye a pita poku iya ko Betele.

11 Ko Betele kua kala uprofeto umue wa kuka, omãla vaye veya vonjo, vo sapuila ovina viosi ukuenje wa Suku yocili a linga keteke liaco ko Betele kuenda olondaka eye a sapuila soma. Noke yoku lomboluila ovina viaco ku isiavo, 12 isiavo wa va pula hati: “Eye wa enda lonjila yipi?” Omãla vaye vo lekisa onjila ukuenje wa Suku yocili a pita una wa tunda ko Yuda. 13 Eye wa sapuila omãla vaye hati: “Ndi pongiyili ocimbulu.” Ovo vo pongiyila ocimbulu kuenje wa londako.

14 Eye wa kuama ukuenje wa Suku yocili kuenje wo sanga okuti, wa tumãla vemẽhi liuti umue unene. Noke wo pula hati: “Anga hẽ ove ukuenje wa Suku yocili una wa tunda ko Yuda?”+ Eye wa tambulula hati: “Ame.” 15 Eye wa sapuila ukuenje hati: “Tuende konjo yange oco o lie ombolo.” 16 Pole, ukuenje wa tambulula hati: “Ka citava okuti ndi tiukila love, ale oku tava elaleko liove, ndaño oku lia ombolo loku nyua ovava love vocitumãlo cilo. 17 Momo Yehova wa ndi handeleka hati: ‘Oko ku ka lieko ombolo, ale oku nyua ovava. Ku ka tiuke lonjila wenda layo.’” 18 Eye wa sapuila ukuenje hati: “Lamevo nduprofeto ndeci ove kuenda ungelo umue wa ndi sapuila olondaka via Yehova viokuti: ‘Eye a tiuke love konjo yove oco a lie ombolo loku nyua ovava.’” (Eye wo kemba.) 19 Omo liaco, eye wa tiuka lukuenje oco a lie ombolo loku nyua ovava konjo yaye.

20 Osimbu va tumãlele komesa, ondaka ya Yehova yeya kuprofeto una wo tiuwile, 21 kuenje wa kaluka lolukandi kukuenje wa Suku yocili una wa tunda ko Yuda hati: “Ca popia Yehova ceci hati: ‘Omo okuti wa sinĩla ondaka ya Yehova kuenda kua pokuile kocihandeleko Yehova Suku yove a ku ĩha, 22 pole, wa tiuka oco o lie ombolo loku nyua ovava kocitumãlo va ku sapuila hati: “Ku ka lieko ombolo ale oku nyua ovava,” ocivimbi cove ka ci ka iñila veyambo lia vakukululu yove.’”+

23 Eci ukuenje wa Suku yocili a mala oku lia ombolo loku nyua, uprofeto wa kuka wa pongiyilako ocimbulu uprofeto una eye a lingisa oku tiuka. 24 Noke ukuenje wa enda lonjila yaye, pole, ohosi yimue yamela kokuaye vonjila kuenje yo ponda.+ Ocivimbi caye ca imbiwa vonjila kuenda ocimbulu ca talama ponele yayo; ohosi ya talamavo ponele yocivimbi caco. 25 Eci alume vamue va kala oku pita, va mola ocivimbi ca imbiwa vonjila kuenda ohosi ya talamavo ponele yocivimbi caco. Ovo va iñila volupale muna mua tungile uprofeto wa kuka kuenda va ci lombolola.

26 Eci uprofeto wo tiulile vonjila a ci yeva, wa popia lonjanga hati: “U ukuenje wa Suku yocili una wa sinĩla ondaka ya Yehova;+ kuenje Yehova wo weca kohosi oco yu lemẽhe loku u ponda ndeci ci likuata londaka Yehova o sapuilile.”+ 27 Eye wa sapuila omãla vaye hati: “Ndi pongiyili ocimbulu.” Kuenje va pongiya. 28 Eye wa enda kuenje wa sanga ocivimbi ca imbiwa vonjila kuenda ocimbulu lohosi via talama ponele yaco. Ohosi ka ya lile ocivimbi, ndaño oku lemẽha ocimbulu. 29 Uprofeto wa yelula ocivimbi cukuenje wa Suku yocili, wa ci kapa kocimbulu kuenda wa ci nena vali volupale luaye muẽle oco vo lile, loku u kenda. 30 Eye wa kenda ocivimbi caco veyambo liaye muẽle kuenda vo lila loku popia vati: “A manjange, ka ciwako!” 31 Noke yoku u kenda, wa sapuila omãla vaye hati: “Eci ndi fa, ndi kendi veyambo mua kendiwa ukuenje wa Suku yocili. Kapi akepa ange ponele yakepa aye.+ 32 Ovina viosi Yehova o handeleka oku kalukila catiamẽla kutala wo Betele lolonjo viosi viefendelo vi kasi kovitumãlo via lepa+ valupale o ko Samaria, vi ka tẽlisiwa.”+

33 Ndaño lovina evi via pitako, Yerevoama ka liwekelepo konjila yaye yĩvi, pole, wamamako oku nõla ovitunda pokati komanu oco vi kale kovitumãlo via lepa.+ Eye wa enda oku nõla omanu vosi eye a yongola oco va linge ovitunda,* loku popia hati: “Eye a linge umue pokati kovitunda viovitumãlo via lepa.”+ 34 Ekandu eli vakuanjo ya Yerevoama va linga,+ lia va kokela oku nyõliwa loku kunduiwa kilu lieve.+

14 Kotembo yaco, Aviya omõla a Yerevoama wa kala oku vela. 2 Noke Yerevoama wa sapuila ukãi waye hati: “Mange ohenda votoka, liviaviaya ciwa oco ka va ka limbuke okuti wukãi wa Yerevoama, kuende ko Silo. Tala! Ahiya uprofeto oko a kasi. Eye wa ndi sapuilile oco ndi linge osoma yomanu ava.+ 3 Ambata olombolo ekũi, lakende kuenda ociwala cowiki, kuende kokuaye. Eye o ka ku sapuila eci ci ka pita lomõla.”

4 Ukãi wa Yerevoama wa linga eci eye o sapuila. Ukãi wa votoka, wa enda ko Silo+ kuenje wa pitĩla konjo ya Ahiya. Ovaso a Ahiya ka a kaile vali oku leta kuenda a vuvalele omo lioku kuka.

5 Pole, Yehova wa sapuilile Ahiya hati: “Ukãi wa Yerevoama o kasi oku iya kokuove oco a ku pulise eci catiamẽla komõlaye, momo eye o kasi oku vela. Ndu ku sapuila eci u lomboluila.* Eci eye a pitĩla, o ka liviaviaya.”

6 Eci Ahiya a yeva oku enda kuolomãhi viaye okuti, wa kala oku amela pombundi, wa popia hati: “Ukãi wa Yerevoama iñila. Momo lie wa liviaviayela? Va ndi tuma oku ku ĩha esapulo limue lĩvi. 7 Kuende, sapuila Yerevoama okuti: ‘Ca popia Yehova Suku ya Isareli ceci hati: “Nda ku nõla pokati komanu vange oco o linge usongui womanu vange va Isareli.+ 8 Ndopa usoma konjo ya Daviti kuenda nda weca kokuove.+ Pole, ove ku kasi ndukuenje wange Daviti una wa pokola kovihandeleko viange haeye wa ndi kuama lutima waye wosi, poku linga lika eci ca sunguluka kovaso ange.+ 9 Pole, ove wa piãlapo vali okuti, vosi vana va viala tete ci sule, wa litungila osuku yikuavo kuenda oviñumañuma viutale oco o wengule onyeño yange+ kuenje wa njimba onyima.+ 10 Omo liaco, ndi nena ohali konjo ya Yerevoama kuenda ndi kundula* alume* vosi va Yerevoama, oku kongelamo vana va sumua la vana va hongua ko Isareli kuenda ndi yelisa onjo ya Yerevoama,+ ndeci umue a puenya eniña toke eci ka pa supi vali cimue! 11 Vana va tiamẽla ku Yerevoama okuti va fila volupale, va ka liwa lolombua kuenda vana va fila kovapia, va ka liwa lolonjila vio kovailu, momo Yehova eye wa ci popia.’”

12 “Kaliye votoka; kuende konjo yove. Eci o kapa omãhi yove volupale, omõla o ka fa. 13 O Isareli yosi yu ko lila, loku u kenda, momo eye lika vepata lia Yerevoama o ka kendiwa veyambo, momo eye lika konjo ya Yerevoama okuti, Yehova Suku ya Isareli wa sanga eci ciwa kokuaye. 14 Yehova o ka li katuila osoma yimue ko Isareli yina yi ka kundula* onjo ya Yerevoama+ oku upisa keteke liaco, ocili ndaño muẽle cilo. 15 Yehova o ka kundula o Isareli ndolundeya lu vomba vovava, o ka kundula o Isareli vofeka eyi yiwa yina eye a eca ku vakukululu yavo+ kuenda o ka va sanduila kupãla Lolui,*+ momo va panga olombueti viavo vi kola*+ loku wengula onyeño ya Yehova. 16 Eye o ka yanduluka va Isareli omo liakandu Yerevoama a linga kuenda wa kokela va Isareli oku linga ekandu.”+

17 Noke ukãi wa Yerevoama wa votoka, wa enda lonjila yaye kuenda weya ko Tirisa. Eci eye a pitĩla volukuki luonjo, omõla wa fa. 18 Kuenje vo kenda kuenda va Isareli vosi vo lila, ndeci ci likuata londaka Yehova a popia pocakati cukuenje waye Ahiya uprofeto.

19 Onepa yikuavo yulandu womuenyo wa Yerevoama, ndomo eye a yula uyaki+ kuenda ndomo a viala, via sonehiwa velivulu liulandu wolotembo violosoma vio ko Isareli. 20 Otembo* Yerevoama a viala ya tẽla 22 kanyamo, noke eye wa ka puyuka la vakukululu yaye;+ kuenda omõlaye Nadava wa linga osoma pomangu yaye.+

21 Votembo yaco, Rehovama omõla a Salomone wa linga osoma ko Yuda. Rehovama wa kuata 41 kanyamo eci a linga osoma kuenda wa viala 17 kanyamo vo Yerusalãi okuti, olupale luna Yehova a nõlele+ pokati kovikoti viosi vio Isareli ndocitumãlo a kapa onduko yaye.+ Onduko ya ina ya Rehovama ya kala Nahama u Amoni.+ 22 Yuda wa enda oku linga eci cĩvi kovaso a Yehova+ kuenda vo sanumũla vali calua lakandu va linga okuti, ana vakukululu yavo va linga ci sule.+ 23 Ovo muẽle va litungila ovitumãlo via lepa, olongunji vi kola, olombueti vi kola*+ koviwulu viosi via lepa+ kuenda vemẽhi lioviti viosi via pulika.+ 24 Vofeka mua kalavo ovipuepue vialume vio vonembele.+ Ovo va enda oku linga ovina viosi viumbondo vio kolofeka vina Yehova a tundisile kovaso a va Isareli.

25 Kunyamo watãlo wuviali wa Soma Rehovama, Soma Sisiake+ wo Kegito wa katukila o Yerusalãi.+ 26 Eye wopa ovokuasi o vonjo ya Yehova kuenda ovokuasi o vonjo* ya soma.+ Eye wopa ovina viosi, oku kongelamo oviyepelo viulu vina Salomone a pangele.+ 27 Omo liaco, Soma Rehovama wa panga oviyepelo viosipi oco a vi piñainye apa pa tunda vikuavo kuenda wa vi kundika kasongui volondavululi* vina via kala oku lava ombundi yonjo ya soma. 28 Olonjanja viosi eci soma eya konjo ya Yehova, olondavululi via enda oku ambata oviyepelo viaco, noke va enda oku vi tiuwiya vohondo yolondavululi.

29 Onepa yikuavo yulandu womuenyo wa Rehovama lovina viosi a linga, ka via sonehiwile hẽ velivulu liulandu wolotembo violosoma vio ko Yuda?+ 30 Pokati ka Rehovama la Yerevoama pa kala uyaki olonjanja vialua.+ 31 Kuenje Rehovama wa ka puyuka la vakukululu yaye kuenda wa kendiwa la vakukululu yaye Volupale lua Daviti.+ Onduko ya inaye Nahama u Amoni.+ Omõlaye Aviyama*+ wa linga osoma pomangu yaye.

15 Kunyamo 18 wa Soma Yerevoama+ omõla a Nevata, Aviyama wa linga osoma ko Yuda.+ 2 Eye wa viala ko Yerusalãi anyamo atatu. Onduko ya inaye ya kala Mahaka+ onekulu yukãi ya Avisialome. 3 Eye wa lingavo akandu isiaye a lingile kuenda utima waye ka wa sungulukile* kovaso a Yehova Suku yaye ndeci utima wa kukululu yaye Daviti. 4 Pole, omo lia Daviti,+ Yehova Suku yaye wo wĩha ondiyelo yimue ko Yerusalãi+ poku katula omõlaye nda kapiñala kaye kuenda wa ecelela okuti, o Yerusalãi yamamako. 5 Daviti wa linga ovina via sunguluka kovaso a Yehova kuenda vokuenda kuomuenyo waye wosi, ka yapukile kovina viosi Eye o handelekele, te lika kocitangi ca Uriya u Hiti.+ 6 Pokati ka Rehovama la Yerevoama, pa kala uyaki oloneke viosi viomuenyo wa Rehovama.+

7 Catiamẽla konepa yikuavo yulandu womuenyo wa Aviyama, lovina viosi a linga, ka via sonehiwile hẽ velivulu liulandu wolotembo violosoma vio ko Yuda?+ Pokati ka Aviyama la Yerevoama, pa kalavo uyaki.+ 8 Noke Aviyama wa ka puyuka la vakukululu yaye kuenda vo kenda Volupale lua Daviti; kuenje omõlaye Asa+ wa linga osoma pomangu yaye.+

9 Kunyamo 20 wuviali wa Soma Yerevoama ko Isareli, Asa wa fetika oku viala ko Yuda. 10 Eye wa viala o Yerusalãi 41 kanyamo. Onduko ya nyokulu yaye ya kala Mahaka+ onekulu yukãi ya Avisialome. 11 Asa wa linga eci ca sunguluka kovaso a Yehova,+ ndeci Daviti kukululu yaye. 12 Eye wa tundisa vofeka ovipuepue vialume vio vonembele+ kuenda wopa oviteka viosi via vĩha,* vina via pangiwile la vakukululu yaye.+ 13 Eye wa tundisavo nyokulu yaye Mahaka+ komangu yunasoma,* momo nasoma yaco wa pangele ociteka cimue ca vĩha coku fendela ombueti yi kola.* Asa wa nyõla ociteka ca vĩha+ ca Mahaka kuenda wa ci timĩhila Vocimbota co Kedrone.+ 14 Pole, ovitumãlo via lepa ka via nyõliwile.+ Omo liaco, utima wa Asa wa sungulukile* kovaso a Yehova vokuenda kuomuenyo waye wosi.* 15 Kuenje eye wa nena vonjo ya Yehova, ovina viosi eye kumue la isiaye va kolisile okuti, opalata, ulu kuenda ovikuata viñi viñi.+

16 Pokati ka Asa la Baasia+ Soma yo Isareli, pa kala uyaki olonjanja vialua. 17 Soma Baasia wo ko Isareli weya oku katukila o Yuda kuenje wa fetika oku tunga* o Rama+ oco lomue ka ka tunde ale oku iñila vocikanjo ca Asa Soma yo Yuda.+ 18 Noke Asa wa tikula opalata yosi, lulu wa supilepo vohondo yoku seleka ovokuasi vionjo ya Yehova levi viohondo yoku seleka ovokuasi vionjo* ya soma, wa vi eca kakuenje vaye. Noke soma Asa wa va tuma ku Benehadada omõla a Tavirimone, omõla a Hesione soma yo Suria+ una wa tungile ko Damasku poku popia hati: 19 “Pokati kange love kuenda pokati ka isiange la isiove pali ocisila cimue. Ñasi oku ku tumisa ombanjaile yimue yopalata lulu. Enju kuenda nyõla ocisila cove la Soma Baasia wo ko Isareli oco eye a nunde.” 20 Benehadada wa yevelela Soma Asa kuenda wa tuma asongui volohoka viaye oco va katukile alupale o Isareli kuenje ovo va kundula o Iyoni,+ o Dani,+ o Abelebetimaka, o Kinerote yosi kuenda ofeka yosi ya Nafitali. 21 Eci Baasia a ci yeva, vepuluvi liaco wa liwekapo oku tunga* o Rama kuenje wamamako oku kala ko Tirisa.+ 22 Noke Soma Asa wa kovonga o Yuda yosi okuti lomue wa supapo kuenda ovo vambata ovawe lavaya o ko Rama, vina Baasia a kala oku tunga lavio kuenje Soma Asa wa tunga* lavio o Geva+ ko Benjamini kuenda o Misipa.+

23 Catiamẽla konepa yosi yikuavo yulandu womuenyo wa Asa, lunene waye wosi, lovina viosi eye a linga kuenda alupale a tunga,* ka via sonehiwile hẽ velivulu liulandu wolotembo violosoma vio ko Yuda? Pole, eci eye a kuka wa kuata uvei umue kolomãhi.+ 24 Noke Asa wa ka puyuka la vakukululu yaye kuenda wa kendiwa kumue lavo Volupale lua Daviti kukululu yaye; kuenje omõlaye Yehosafata+ wa linga osoma pomangu yaye.

25 Nadava+ omõla a Yerevoama wa linga osoma yo Isareli kunyamo wavali wuviali wa Soma Asa wo ko Yuda kuenda wa viala ko Isareli anyamo avali. 26 Eye wamamako oku linga eci ka ca sungulukile kovaso a Yehova, loku endela vonjila ya isiaye+ kuenda vekandu eye a kokisa va Isareli oku linga.+ 27 Baasia omõla a Ahiya wo konjo ya Isakare, wa lingila usuanji Nadava kuenda Baasia wo ponda ko Gibetoni,+ ya tiamẽlele ku va Filisiti, osimbu Nadava lo Isareli yosi va ñualele ocingonja o Gibetoni. 28 Baasia wo ponda kunyamo watatu wuviali wa Asa Soma yo Yuda kuenda wa linga osoma pomangu yaye. 29 Eci a linga osoma, wa ponda vakuanjo yosi ya Yerevoama. Ka ecelele okuti umue wa tiamẽla ku Yerevoama o puluka; eye wa va kundula ndeci ci likuata londaka Yehova a popele pocakati cukuenje waye Ahiya u Silo.+ 30 Eci ca lingiwa omo liakandu Yerevoama a lingile, loku kokela va Isareli oku linga ekandu, momo eye wa wenguile calua onyeño ya Yehova Suku ya va Isareli. 31 Catiamẽla konepa yikuavo yulandu womuenyo wa Nadava, lovina viosi eye a linga, ka via sonehiwile hẽ velivulu liulandu wolotembo violosoma vio ko Isareli? 32 Pokati ka Asa la Baasia Soma yo Isareli, pa kala uyaki olonjanja vialua.+

33 Kunyamo watatu wuviali wa Asa Soma yo Yuda, Baasia omõla a Ahiya wa linga osoma ko Tirisa ko Isareli yosi kuenda wa viala 24 kanyamo.+ 34 Pole, wamamako oku linga eci ka ca sungulukile kovaso a Yehova,+ loku endela vonjila ya Yerevoama kuenda vekandu eye a kokisa va Isareli oku linga.+

16 Yehu+ omõla a Hanani+ wa tambula ondaka ya Yehova yoku yambula Baasia yiti: 2 “Nda ku katula voneketela kuenje nda ku lingisa usongui womanu vange va Isareli,+ pole, ove wamamako oku endela vonjila ya Yerevoama, loku kokela omanu vange va Isareli oku linga ekandu oco va wengule onyeño yange lakandu avo.+ 3 Omo liaco, ndi kundula Baasia lonjo yaye kuenda ndi lingisa onjo yaye ndeci nda linga lonjo ya Yerevoama+ omõla a Nevata. 4 Vana va tiamẽla ku Baasia okuti va fila volupale, va ka liwa lolombua; kuenda vana va tiamẽla kokuaye okuti, va fila kovapia, va ka liwa lolonjila vio kovailu.”

5 Catiamẽla konepa yikuavo yulandu womuenyo wa Baasia, lovina a linga, lunene waye, ka via sonehiwile hẽ velivulu liulandu wolotembo violosoma vio ko Isareli? 6 Noke Baasia wa ka puyuka la vakukululu yaye kuenda wa kendiwa ko Tirisa;+ kuenje omõlaye Ela wa linga osoma pomangu yaye. 7 Handi vali, pocakati cuprofeto Yehu omõla a Hanani, Yehova wa sapula esombiso liaye liatiamẽla ku Baasia, lonjo yaye, omo liovina viosi vĩvi eye a linga kovaso a Yehova, poku wengula onyeño yaye lovilinga viaye ndeci onjo ya Yerevoama ya linga kuendavo omo Baasia o* ponda.+

8 Kunyamo 26 wuviali wa Asa Soma yo Yuda, Ela omõla a Baasia wa linga osoma ya va Isareli ko Tirisa kuenda wa viala anyamo avali. 9 Ukuenje waye Simiri okuti, usongui wonepa yimue yakãlu aye wuyaki, wa lingila usuanji soma, osimbu eye a kala ko Tirisa oku likoluisa konjo ya Arisa una wa kala kalei konjo yo ko Tirisa. 10 Simiri wa iñila, wo lemẽha+ kuenda wo ponda kunyamo 27 wuviali wa Asa Soma yo Yuda kuenje wa linga osoma pomangu yaye. 11 Eci eye a linga osoma loku tumãla kocalo caye, wa ponda vakuanjo yosi ya Baasia. Eye ka sile ulume laumue,* ci kaile vakuepata* liaye, ale akamba vaye. 12 Simiri wa kundula onjo yosi ya Baasia, ndeci ci likuata londaka Yehova a popele pocakati ca Yehu uprofeto yoku yambula Baasia.+ 13 Eci ca lingiwa omo liakandu osi Baasia lomõlaye Ela va lingile kuenda akandu ovo va kokela va Isareli oku linga, poku wengula onyeño ya Yehova Suku ya va Isareli loviteka viavo ka vi silivila.+ 14 Catiamẽla konepa yikuavo yulandu womuenyo wa Ela, lovina viosi eye a linga, ka via sonehiwile hẽ velivulu liulandu wolotembo violosoma vio ko Isareli?

15 Kunyamo 27 wuviali wa Asa Soma yo Yuda, Simiri wa linga osoma oloneke epanduvali ko Tirisa osimbu asualali va tungile ovilombo oco va katukile o Gibetoni,+ yina ya tiamẽlele ku va Filisiti. 16 Asualali va kala kovilombo va yeva okuti: “Simiri wa lingila usuanji soma kuenda wo ponda.” Kuenje keteke liaco vocilombo, va Isareli vosi va lingisa Omiri+ usongui wolohoka kuenda osoma yo Isareli. 17 Omiri la va Isareli vosi va kala laye, va tunda ko Gibetoni va ñuala ocingonja o Tirisa. 18 Eci Simiri a mola okuti olupale lua tambuiwa, eye wa iñila vosapalalo ya pama yonjo* ya soma kuenda wa kapa ondalu vonjo yaco kuenje wa fila vondalu yaco.+ 19 Eci ca lingiwa omo liakandu aye poku linga eci ka ca sungulukile kovaso a Yehova, loku endela vonjila ya Yerevoama kuenda omo liekandu eye a kokisa va Isareli oku linga.+ 20 Catiamẽla konepa yikuavo yulandu womuenyo wa Simiri, lusuanji waye, ka via sonehiwile hẽ velivulu liulandu wolotembo violosoma vio ko Isareli?

21 Noke omanu vo ko Isareli va tepiwa volonepa vivali. Onepa yimue yomanu ya kuama Tivini omõla a Ginati, locisimĩlo coku u lingisa osoma kuenda onepa yikuavo ya kuama Omiri. 22 Pole, omanu vana va kuama Omiri, va yula omanu vana va kala oku kuama Tivini omõla a Ginati. Kuenje Tivini wa fa kuenda Omiri wa linga osoma.

23 Kunyamo 31 wuviali wa Asa Soma yo Yuda, Omiri wa linga osoma yo Isareli kuenda wa viala 12 kanyamo. Ko Tirisa wa vialako anyamo epandu. 24 Eye wa landa ku Siamere omunda yo ko Samaria lolotalendo* vivali viopalata kuenje wa tunga olupale lumue komunda. Eye wa tukula olupale luaco a tunga hati, o Samaria*+ omo lia Siamere muẽle yaco* yomunda. 25 Omiri wamamako oku linga eci ka ca sungulukile kovaso a Yehova kuenda wa linga ovina vialua vĩvi okuti, vosi vana va vialele tete, va sule.+ 26 Eye wa endela vonjila yosi ya Yerevoama omõla a Nevata kuenda vekandu eye a kokisa va Isareli oku linga, poku wengula onyeño ya Yehova Suku ya va Isareli loviteka viavo via vĩha.+ 27 Catiamẽla konepa yikuavo yulandu womuenyo wa Omiri, lovina viosi eye a linga kuenda unene waye, ka via sonehiwile hẽ velivulu liulandu wolotembo violosoma vio ko Isareli? 28 Noke Omiri wa ka puyuka la vakukululu yaye kuenda wa kendiwa ko Samaria; kuenje omõlaye Ahava+ wa linga osoma pomangu yaye.

29 Ahava omõla a Omiri wa linga osoma ko Isareli kunyamo 38 wuviali wa Asa Soma yo Yuda kuenda Ahava omõla a Omiri wa viala va Isareli ko Samaria+ 22 kanyamo. 30 Ahava omõla a Omiri wa linga ovina vialua vĩvi kovaso a Yehova okuti vosi vana va vialele tete, ci sule.+ 31 Eye wa linga akandu amuamue nda-a Yerevoama+ omõla a Nevata a linga kuenda eye wa kuelavo la Isevele+ omõla ufeko wa Etibaale soma ya va Sidono+ kuenda wa fetika oku vumba Baale+ loku u kekamẽla. 32 Eye wa tungila Baale utala umue konjo* ya Baale+ yina eye a tungile ko Samaria. 33 Ahava wa pangavo ombueti yi kola.*+ Ahava wa linga ovina vialua via wengula onyeño ya Yehova Suku ya va Isareli okuti, olosoma viosi via vialele tete ko Isareli, ci sule.

34 Koloneke viaye, Hiyele u Betele wa tumbulula o Yeriko. Eye wa tunga ociseveto caco poku feta omuenyo wa Avirama onuñulu yaye kuenda poku kapa apito aco, wa feta omuenyo wa Seguvi omõlaye umalẽhe, ndeci ci likuata londaka Yehova a popele pocakati ca Yehosua omõla a Nune.+

17 Eliya*+ u Tisibi, onungi yo ko Gileada+ wa sapuila Ahava hati: “La Yehova o kasi lomuenyo Suku ya Isareli una ndi vumba,* vokuenda kuanyamo alo ka ku kala owume ndaño ombela, te lika londaka yange!”+

2 Ondaka ya Yehova yeya kokuaye yiti: 3 “Tunda pocitumãlo cilo kuende kutundilo kuenda salama Vocimbota co Keriti* cina ci kasi kutundilo wo Yordão. 4 Ove o ka nyua nyua ovava o vokalui kuenda ndi tuma ovikuamanga oco vi ku ĩhe okulia.”+ 5 Eye lonjanga yalua wa enda kuenda wa linga ndomo ci likuata londaka ya Yehova; kuenje wa enda, wa kala Vocimbota co Keriti* kutundilo wo Yordão. 6 Lomẽle ovikuamanga via enda oku u nenela ombolo lositu, koñolosi ombolo lositu kuenje wa nyua nyua ovava o vokalui.+ 7 Pole, noke lioloneke vimue, okalui ka takata,+ momo vofeka ka mua lokaile ombela.

8 Ondaka ya Yehova yeya kokuaye yiti: 9 “Votoka, kuende ko Sarepata, vimbo lio Sidono kuenda oko o kala. Tala! Ndi handeleka ocimbumba cimue vocitumãlo caco oco ci ku ĩhe okulia.”+ 10 Eye wa votoka wa enda ko Sarepata. Eci a pitĩla pombundi yolupale, wa sanga ocimbumba cimue ca kala oku ongolola olohũi. Eye wa vilikiya ocimbumba caco kuenda wo sapuila hati: “Mange ohenda, nenele okopo yimue lotuvava oco ndi nyue.”+ 11 Osimbu ocimbumba ca kala oku enda oku ka yupa, Eliya wo vilikiya loku u sapuila hati: “Mange ohenda, ndi neneleko ombolo yimue.” 12 Ocimbumba ca popia citi: “La Yehova Suku yove o kasi lomuenyo si kuete ombolo, ndi kuete lika epupu limue liosema vesanga limue linene kuenda ulela vesanga limue litito.+ Cilo ñasi oku ongolola olohũi kuenda ngenda konjo, ha linga cimue oco ndi lie lomõlange. Noke yoku lia, tu fa.”

13 Eliya wo sapuila hati: “Ku ka kuate usumba. Kuende konjo kuenda linga eci wa popia. Pole, tete ndi lingileko ombolo yi kasi ndombunge lovina o kuete kuenje yi nena kokuange. Noke citava oku linga eci o lia lomõlove. 14 Momo ca popia Yehova Suku ya Isareli ceci hati: ‘Vesanga linene liosema ka mu pui kuenda vesanga litito liulela ka mu puivo, toke keteke Yehova a ka lokisa ombela kilu lieve.’”+ 15 Ocimbumba ca enda, ca linga ndeci Eliya o sapuilile kuenje ocimbumba luprofeto kuenda omõlaye, va lia vokuenda kuoloneke vialua.+ 16 Vesanga linene liosema, ka mua puile kuenda vesanga litito liulela, ka mua puile ndeci ci likuata londaka Yehova a popele pocakati ca Eliya.

17 Noke liovina evi omõla wocimbumba wa fetika oku vela kuenda uvei waye wa livokiya calua okuti, omõla wa fa.*+ 18 Ocimbumba ca sapuila Eliya citi: “Nye o yongola lame,* Ove ukuenje wa Suku yocili? Weya oco o ndi ivaluise eko liange loku ponda omõlange?”+ 19 Pole, eye wo sapuila hati: “Nyĩhe omõlove.” Kuenje Eliya wo tambula peka liocimbumba kuenda wo wambata vohondo yo kilu muna eye a kala kuenje wo kapa kohama yaye.+ 20 Eye wa likutilila ku Yehova hati: “A Yehova a Suku yange,+ anga hẽ o kasivo oku nena ohali kocimbumba cina ca ndi yekisa poku ponda omõlaye?” 21 Eliya wa liyala kilu liomõla olonjanja vitatu kuenda wa likutilila ku Yehova hati: “A Yehova a Suku yange, mange ohenda, omõla a kale vali lomuenyo.” 22 Yehova wa tava kepingilo lia Eliya+ kuenda omõla wa pinduiwa.*+ 23 Eliya wa tikula omõla, wa loka laye oku upisa kohondo yokilu, wo wambata vonjo kuenje wo weca ku inaye; kuenda Eliya wa popia hati: “Tala omõlove o kasi vali lomuenyo.”+ 24 Ocimbumba ca sapuila Eliya citi: “Kaliye nda limbuka okuti, ove wukuenje muẽle wa Suku+ kuenda ondaka ya Yehova vomẽla wove, yocili.”

18 Noke liotembo yimue kunyamo watatu,+ ondaka ya Yehova yeya ku Eliya yiti: “Kuende, ka li lekise ku Ahava kuenda ndi lokisa ombela kilu lieve.”+ 2 Kuenje Eliya wa enda oco a li lekise ku Ahava, osimbu ko Samaria kua kala onjala yalua.+

3 Vokuenda kuotembo yaco, Ahava wa vilikiya Ovadiya kalei konjo yaye. (Ovadiya wa sumbilile calua Yehova, 4 kuenje eci Isevele+ a kala oku ponda* ovaprofeto va Yehova, Ovadiya wambata 100 kovaprofeto, loku va soleka veleva okuti, vocimunga locimunga mua kala 50 komanu kuenda eye wa va tekula lombolo lovava.) 5 Ahava wa sapuila Ovadiya hati: “Ñuala ofeka kolono viosi viovava kuenda kovimbota* viosi. Citava okuti tu sanga owangu oco olokavalu vietu lolomula vietu vi kale lomuenyo kuenje lacimue ocinyama cetu ci fa.” 6 Noke va litepela ofeka va kala oku enda. Ahava wa enda lonjila yimue kuenda Ovadiya wa enda lonjila yikuavo.

7 Osimbu Ovadiya a kala oku enda lonjila yaye, Eliya weya oku lisanga laye. Ovadiya wo limbuka lonjanga kuenda wa petamẽla posi loku u pula hati: “Ove ñala yange Eliya?”+ 8 Eliya wo tambulula hati: “Ame. Kuende, ka sapuile ñala yove hati: ‘Eliya o kasi kulo.’” 9 Pole, eye wa popia hati: “Ekandu lipi nda linga okuti, eca ukuenje wove ku Ahava oco eye a ndi ponde? 10 La Yehova Suku yove o kasi lomuenyo, ñala yange soma wa tuma oku ku sandiliya kolofeka viosi ale kovosoma osi. Noke eci ovo va popia vati: ‘Eye ka kasi kulo,’ soma wa enda oku kisika uviali ale ofeka yaco oco va lisinge okuti ka va ku sangele.+ 11 Kaliye ove o popia hati, ‘Kuende, ka sapuile ñala yove okuti: “Eliya o kasi kulo.”’ 12 Eci ndi tunda pokati kove espiritu lia Yehova li ku ambata+ kocitumãlo cimue sia kũlĩhĩle, noke, eci ndi sapuilako Ahava kuenje ka ku sangi, eye o ka ndi ponda muẽle. Ocili, ukuenje wove wa sumbila Yehova tunde vutila waye. 13 Eci Isevele a kala oku ponda ovaprofeto va Yehova, ka va sapuilileko hẽ ñala yange ndomo nda salamisa veleva 100 kovaprofeto va Yehova okuti, vocimunga locimunga mua kala 50, yu nda va tekula lombolo kuenda ovava?+ 14 Kaliye o popia hati: ‘Kuende, ka sapuile ñala yove okuti: “Eliya o kasi kulo.”’ Eye o ka ndi ponda muẽle.” 15 Eliya wa popia hati: “La Yehova ukualohoka una ndi vumba,* etaili ndi li lekisa ku Ahava.”

16 Ovadiya wa enda, wa ka lisangele la Ahava kuenda wo sapuilako kuenje Ahava wa enda oku ka lisanga la Eliya.

17 Eci Ahava a mola Eliya, wo pula hati: “Anga hẽ, ove una o kasi oku nena esakalalo* lialua ko Isareli?”

18 Eye wa tambulula hati: “Hameko nda nena esakalalo lialua ko Isareli, pole, ove o kuete eko kumue lonjo ya isiove poku siapo ovihandeleko via Yehova loku kuama va Baale.+ 19 Kaliye kovonga va Isareli vosi oco veye kokuange Komunda Karimele+ lovaprofeto va Baale va soka 450, lovaprofeto vombueti yi kola*+ va soka 400 ya vana va lia lia komesa ya Isevele.” 20 Ahava wa tuma ondaka pokati komanu vosi vo ko Isareli kuenda wongoluila pamosi ovaprofeto Komunda Karimele.

21 Eliya wamela komanu vosi loku popia hati: “Toke otembo yipi vu tatayala pokati kolonjila vivali?+ Nda Yehova eye Suku yocili u kuami;+ nda Baale u kuami!” Pole, omanu ka va popele ondaka layimue oco vo tambulule. 22 Kuenje Eliya wa sapuila omanu hati: “Ame lika nda supapo pokati kovaprofeto va Yehova+ osimbu okuti, ovaprofeto va Baale va soka 450 kalume. 23 Ovo va tu nenele olonãle vivali kuenda va nõlepo onãle yimue, loku yi teta vovinimbu kuenda va yi kape kolohũi, pole, ka va ka kapeko ondalu. Ame ndi pongiya onãle yikuavo kuenda ndi yi kapa kolohũi, pole, si kapiko ondalu. 24 Ene vu vilikiya vonduko ya suku yene,+ ame ndi vilikiya vonduko ya Yehova. Osuku yi tambulula londalu yi ka lekisa okuti, Osuku yocili.”+ Kuenje omanu vosi va tambulula vati: “Eci wa popia ciwa.”

25 Noke Eliya wa sapuila ovaprofeto va Baale hati: “Nõli onãle yimue kuenda yi pongiyi, momo ene vu kuete omanu valua. Kuenje vilikiyi vonduko ya suku yene, pole, ko ka kapiko ondalu.” 26 Ovo va tikula onãle va tambula, va yi pongiya kuenda va vilikiya vonduko ya Baale tunde komẽle toke kekumbi loku popia hati: “A Baale, tu tambulule!” Pole, ka kua yevalele ondaka layimue ndaño omunu o va tambulula.+ Ovo va kala oku tehã tehã osimbu va piluka loku ñuala ñuala utala va tungile. 27 Ekumbi pongunji, Eliya wa fetika oku va sepula loku popia hati: “Kaluki lolukandi! Eye osuku yimue!+ Pamue eye o kasi oku sokolola, ale wa enda oku ka lipopela.* Ale pamue wa pekela kuenda o sukila umue oco o pasule!” 28 Ovo va vilikiya lolukandi, va litãla tãla lolomoko, lovonga ndeci ci likuata loviholo viavo toke eci va papuka osonde. 29 Ekumbi lia iñila kuenda ovo vamamako oku kaluka* toke kowola yoku eca ocilumba colomema, pole, ka kua yevalele ondaka layimue ndaño omunu o va tambulula; lomue wa kala oku va yevelela.+

30 Noke Eliya wa sapuila omanu vosi hati: “Ameli kokuange.” Kuenje omanu vosi vamela kokuaye. Eye wa tumbulula utala wa Yehova una omanu va nyõlele.+ 31 Eliya wa tikula 12 kovawe ndomo ci likuata letendelo liovikoti viomãla va Yakoba una okuti, kokuaye kueyile ondaka ya Yehova yokuti: “Onduko yove yi kala Isareli.”+ 32 Eye wa tunga utala+ lovawe aco vonduko ya Yehova. Noke wa linga olekua yimue yinene ya ñuala utala okuti, ya tavele oku kũlamo olosea* vivali viombuto. 33 Noke eye wa sokiya ciwa olohũi, wa teta onãle vovinimbu kuenda wa yi kapa kolohũi.+ Wa popia hati: “Yukisi asanga akuãla ovava, a pesili kocilumba coku pia elisi kuenda kolohũi.” 34 Eye wa popia hati: “Ci pitululi.” Ovo va ci pitulula. Eye wa popia vali hati: “Ci pitululi onjanja yatatu.” Ovo va ci pitulula onjanja yatatu. 35 Ovava a ñuala utala wosi kuenda wa yukisavo olekua lovava.

36 Koñolosi kowola yoku eca ocilumba colomema,+ Eliya uprofeto wamela kovaso loku popia hati: “A Yehova Suku ya Avirahama,+ ya Isake+ kuenda ya Isareli, etaili omanu va limbuke okuti, ove Suku ko Isareli kuenda ame ndukuenje wove kuenje ndi linga ovina viosi evi vonduko yove.+ 37 A Yehova nambulule! Nambulule oco omanu ava va limbuke okuti, Yehova eye Suku yocili kuenda ove o kasi oku kokela okuti, ovitima viavo vi tiuka kokuove.”+

38 Noke ondalu ya tunda ku Yehova oku upisa kilu, ya lia ocilumba coku pia elisi,+ olohũi, ovawe, loneketela kuenda ya kukutisa ovava a kala volekua.+ 39 Eci omanu vosi va ci mola, va petamẽla posi lonjanga loku popia vati: “Yehova eye Suku yocili! Yehova eye Suku yocili!” 40 Eliya wa va sapuila hati: “Kuati ovaprofeto va Baale! Lomue pokati kavo ka ka puluke!” Ovo va va kuata kuenje Eliya wa vambata kolui* Kisone+ kuenda oko a va pondela.+

41 Eliya wa sapuila Ahava hati: “Kuende, ka lie loku nyua, momo ku yevala ale onjuela yombela yalua.”+ 42 Ahava wa enda oku ka lia loku nyua, osimbu Eliya a lamanela kilu lio Karimele kuenda wa kekamẽla posi kuenje ocipala caye ca kala pokati kolongolo viaye.+ 43 Eye wa sapuila oñuatisi yaye hati: “Mange ohenda, lamana kuenda vanja konele yokalunga.” Kuenje eye wa lamana, wa vanja loku popia hati: “Ka kuli lacimue.” Eliya wo sapuila olonjanja epanduvali hati: “Tiukilako.” 44 Vonjanja yepanduvali oñuatisi yaye ya popia yiti: “Tala! Kuli elende limue litito li tunda kokalunga lia soka leka liomunu.” Eliya wa popia hati: “Kuende, ka sapuile Ahava okuti: ‘Pongiya ekãlu liove liuyaki! Loka oco ombela ka yi ka ku tateke!’” 45 Vokatembo kaco, kilu kueya alende a tekãva, kua kala ofela yalua kuenda ombela ya loka calua;+ Ahava wa enda ko Yesirele lekãlu liaye liuyaki.+ 46 Pole, eka lia Yehova lia wila ku Eliya kuenje Eliya wa itika* uwalo waye vombunda kuenda wa lupukila kovaso a Ahava toke ko Yesirele.

19 Ahava+ wa sapuila Isevele+ ovina viosi Eliya a linga kuenda ndomo a ponda ovaprofeto vosi losipata.+ 2 Omo liaco, Isevele wa tuma omunga ku Eliya loku popia hati: “Olosuku vi ndi kangise loku vokiyako nda hẽla kowola ndeyi si lingi love ndeci wa linga lavo!” 3 Eci ca kokela usumba Eliya kuenje wa votoka yu wa tila oco a popele omuenyo waye.+ Eye wa pitĩla ko Beresieva+ yo ko Yuda+ kuenda oko a sia oñuatisi yaye. 4 Wa linga ungende weteke limosi vekalasoko yu wa pitĩla kuenda wa tumãla vemẽhi liuti wocinendele kuenje wa pinga oco a fe. Eye wa popia hati: “Ci tẽla yapa! Kaliye, A Yehova upa omuenyo wange,+ momo sia velelepo vakukululu yange.”

5 Noke wa pekela vemẽhi liuti wocinendele. Pole, vocipikipiki ungelo umue wo lamba+ loku u sapuila hati: “Pasuka, lia.”+ 6 Eci a vanja, wa mola okuti konele yutue waye kua kala ombolo yi kasi ndombunje kilu liovawe a tokota lesanga limue liovava. Eye wa lia, wa nyua kuenda wa pekela vali. 7 Noke ungelo wa Yehova weya onjanja yavali, wo lamba loku popia hati: “Pasuka, lia momo o linga ungende walua.” 8 Kuenje wa pasuka, wa lia, wa nyua kuenda wa kuata vali ongusu omo liokulia kuaco kuenje wa linga ungende ci soka 40 kovotanya kuenda 40 kovoteke toke eci a pitĩla ko Horeve okuti, omunda ya Suku yocili.+

9 Eci a pitĩla wa iñila veleva limue,+ omo a pita uteke wosi; kuenje tala! Ondaka ya Yehova yeya kokuaye yo sapuila yiti: “A Eliya, nye o kasi oku linga kulo?” 10 Eye hati: “Ñuete ombili yalua ku Yehova Suku ukualohoka;+ momo omanu vo ko Isareli va yanduluka ocisila cove,+ va nyõla ovotala ove loku ponda ovaprofeto vove losipata+ kuenda ame lika nda supapo. Kaliye va sanda oku njupa omuenyo wange.”+ 11 Pole, Eye wa popia hati: “Tunda, talama komunda kovaso a Yehova.” Kuenje tala! Yehova wa kala oku pita+ kuenda kueya ofela yonupi haiyo ya kala oku nyõla olomunda kuenje ya nyanyõwaila ovawe kovaso a Yehova,+ pole, Yehova ka kaile vofela. Noke liofela kueya ocilemawe,+ pole, Yehova ka kaile vocilemawe. 12 Noke liocilemawe, kueya ondalu,+ pole, Yehova ka kaile vondalu. Noke liondalu, kua yevala ondaka yimue yetulumũho, yoku loñola.+ 13 Eci Eliya a yeva ondaka yaco, wa li sikĩlĩla kocipala luwalo waye+ kuenje wa tunda kuenda wa talama puvelo weleva. Noke ondaka yimue yo pula hati: “A Eliya nye o kasi oku linga kulo?” 14 Eliya wa popia hati: “Ñuete ombili yalua ku Yehova Suku ukualohoka; momo omanu vo ko Isareli va yanduluka ocisila cove,+ va nyõla ovotala ove loku ponda ovaprofeto vove losipata kuenda ame lika nda supapo. Kaliye va sanda oku njupa omuenyo wange.”+

15 Yehova wo sapuila hati: “Tiukila, kuende vekalasoko lio Damasko. Eci ove o pitĩla, waveka Hasahele+ oco a linge osoma yo Suria. 16 Wavekavo Yehu+ onekulu ya Nimisi oco a linge osoma yo Isareli, la Elisia* omõla a Siafata wo ko Abele-Maholati u wavekavo oco a linge uprofeto pomangu yove.+ 17 Omunu wosi o puluka kosipata ya Hasahele,+ o ka pondiwa la Yehu;+ kuenda omunu wosi o puluka kosipata ya Yehu, o ka pondiwa la Elisia.+ 18 Handi, ñuete 7.000 komanu vo Isareli,+ vosi yavo ka va kekamẽlele Baale+ kolongolo kuenda ka vo sipuile lovimẽla viavo.”+

19 Kuenje Eliya wa tundako kuenda wa sanga Elisia omõla a Siafata osimbu eye a kala oku senda osi lolongombe 24 via pita kovaso yaye okuti, eye wa kala la vivali via tẽlisa 24 kolongombe. Eliya wa enda ku Elisia kuenda wo wimba uwalo+ waye. 20 Eye wa sia olongombe kuenda wa lupukila Eliya loku popia hati: “Mange ohenda, ecelela okuti ndi sipula isiange la ina yange. Noke ndu ku kuama.” Eliya wo tambulula hati: “Kuende, tiukila, momo lie ndu ku tatekela?” 21 Kuenje Elisia wa tiukila, wa kuata olongombe vivali, wa vi eca ndovilumba kuenda wa tikula avaya okanga, wa teleke la-o ositu yolongombe kuenda wa yeca komanu kuenje va lia. Noke wa votoka wa kuama Eliya kuenda wa fetika oku u vumba.+

20 Bene-Hadada+ Soma yo Suria+ wongolola asualali vaye vosi oku kongelamo 32 kolosoma vikuavo lolokavalu viavo kuenda akãlu avo; eye wa lamana yu wa ñuala ocingonja+ o Samaria+ loku lingako uyaki. 2 Noke wa tuma olomunga volupale ku Ahava+ Soma yo Isareli kuenda wo sapuila hati: “Ca popia Bene-Hadada ceci hati: 3 ‘Opalata yove lulu wove, vi linga viange oku kongelamo ovina via velapo viakãi vove kuenda viomãla vove.’” 4 Kuenje soma yo Isareli wa tambulula hati: “A ñala yange a soma, ondaka yove yi tẽlisiwe, ame ndi linga wove lovina viosi ñuete.”+

5 Noke olomunga via tiuka loku popia vati: “Bene-Hadada wa popia hati: ‘Nda tuma esapulo kokuove liokuti: “Nyĩhe opalata yove lulu wove kuenda akãi vove lomãla vove.” 6 Pole, hẽla kelivala ndeli, ndi tuma akuenje vange kokuove, ovo va ka kũlĩhĩsa lutate onjo yove lolonjo viakuenje vove kuenda va ka tikula ovina viove viosi via velapo loku vi ambata.’”

7 Noke soma yo Isareli wa kovonga akulu vosi vofeka loku popia hati: “Mangi ohenda, kũlĩhĩsi kuenda tali ndomo ulume u-u a yongola oku tu nenela ohali, momo wa ndi kisika oku eca kokuaye akãi vange lomãla vange lopalata yange kuenda ulu wange kuenje sio likalele.” 8 Akulu vosi lomanu vosi vo sapuila vati: “Ku ka pokole kuenda ku ka tave.” 9 Eye wa sapuila olomunga via Bene-Hadada hati: “Sapuili ñala yange soma okuti: ‘Ovina viosi a pinga tete ndi vi eca, pole, eci si ci lingi.’” Kuenje olomunga via enda, via sapuilako Bene-Hadada olondaka viaco.

10 Bene-Hadada wa tuma esapulo eli kokuaye hati: “Olosuku vi ndi kangise loku vokiyako nda oneketela yi supa ko Samaria yi tẽla oco ku eciwe epupu limue komunu lomunu o kasi oku ñuama!” 11 Soma yo Isareli wa tambulula hati: “U sapuili okuti: ‘Omunu wa wala ovimalẽho viuyaki, ka ka lipande ndu okuti wa vi liupa ale.’”+ 12 Eci Bene-Hadada a yeva etambululo liaco, osimbu eye kumue lolosoma va kala oku nyua volombalaka* viavo, eye wa sapuila akuenje vaye hati: “Lipongiyili uyaki!” Kuenje ovo va lipongiya oku katukila olupale.

13 Uprofeto umue wamela ku Ahava+ Soma yo Isareli loku popia hati: “Ca popia Yehova ceci hati: ‘O lete owiñi wosi owu? Etaili ndu weca peka liove kuenje o ka limbuka okuti ame ndi Yehova.’”+ 14 Ahava wa pula hati: “Pocakati celie?” eye hati: “Ca popia Yehova ceci hati: ‘Pocakati cakuenje volombuale valuvumba.’”* Ahava wa pula hati: “Helie o ka fetika luyaki?” eye hati: “Ove!”

15 Ahava wa tenda akuenje volombuale valuvumba va tẽla 232 komanu; noke wa tenda alume va Isareli va tẽla 7.000 komanu. 16 Kekumbi pongunji ovo va enda osimbu Bene-Hadada a kala oku likoluisa volombalaka* kumue lolosoma 32 vina via kala oku u kuatisa. 17 Eci akuenje volombuale valuvumba va tunda tete, vepuluvi liaco, Bene-Hadada wa tuma olomunga. Ovo vo sapuila vati: “Ko Samaria kua tunda alume.” 18 Eye wa popia hati: “Nda ovo veyilila ombembua, enjui lavo lomuenyo; ale nda veyilila oku yaka enjui lavo muẽle lomuenyo.” 19 Pole, eci va tunda volupale okuti akuenje volombuale valuvumba kuenda asualali va kala oku va kuama, 20 omunu lolomunu wa ponda unyãli waye. Kuenje va Suria va tila+ kuenda va Isareli va va kuama, pole, Bene-Hadada soma yo Suria wa tila lokavalu la vamue vakuakuendela kolokavalu. 21 Soma yo Isareli wa enda, wa kundula olokavalu kuenda akãlu wuyaki kuenje wa yula* va Suria.

22 Noke uprofeto+ wamela ku soma yo Isareli loku popia hati: “Kuende, pamisa asualali vove kuenda kũlĩhĩsa ovina o linga,+ momo kefetikilo liunyamo wiya,* soma yo Suria o ka liyaka love.”+

23 Akuenje va soma yo Suria vo sapuila vati: “Suku yavo o Suku yolomunda. Eli olio esunga lieci va tu velelapo kongusu. Pole, nda tua yaka lavo venyãla, tu va velapo kongusu. 24 Lingavo ndoco: Upa olosoma viosi+ pomangu yavo kuenda va piñainya lolonguluvulu. 25 Noke ongolola etendelo liasualali va lisoka lasualali wa pesela, ci kaile olokavalu ci kaile akãlu. Tu ka liyaka lavo venyãla kuenje tu va velapo kongusu.” Eye wa yeva elungulo liavo kuenda wa ci linga.

26 Kefetikilo liunyamo,* Bene-Hadada wongolola va Suria kuenda wa enda ko Afeke+ oco a ka liyake la va Isareli. 27 Omanu vo ko Isareli va liongololavo kuenje va tambula okulia, noke va enda oku ka lisanga lavo. Eci omanu vo ko Isareli va tunga ovilombo kovaso avo, va kala ndotuviunda tuvali tuolohombo osimbu okuti, va Suria veyukile vofeka.+ 28 Ukuenje wa Suku yocili wamela kusoma yo Isareli loku popia hati: “Ca popia Yehova ceci hati: ‘Omo okuti va Suria va popele vati: “Yehova o Suku yimue yolomunda, Hasukuko yanyãla,” Owiñi wosi owu ndu weca peka liove+ kuenda vu kũlĩha muẽle okuti, ame ndi Yehova.’”+

29 Ovo vamamako oku kala vovilombo viavo via limba ovaso vokuenda kuoloneke epanduvali kuenje keteke liepanduvali, uyaki wa fetika. Veteke limosi omanu vo ko Isareli va ponda eci ci soka 100.000 kasualali vo ko Suria va endela posi. 30 Omanu va supapo va tilila ko Afeke+ volupale. Pole, ocimbaka ca kupukila kueci ci soka 27.000 komanu va supilepo. Bene-Hadada wa tililavo volupale kuenda wa salama vohondo yonjo yimue ya kala volupale.

31 Akuenje vaye vo sapuila vati: “Tala, tua yeva okuti olosoma vionjo ya Isareli, olosoma vimue vakuahenda.* Mange ohenda, tu wali ovikelẽyi volombunda vietu loku ñualisa ovikolo kovitue vietu kuenje tu enda ku soma yo Isareli. Pamue eye o ka popela omuenyo wove.”+ 32 Ovo va wala ovikelẽyi volombunda viavo loku ñualisa ovikolo kovitue viavo kuenje va enda ku soma yo Isareli loku popia vati: “Ukuenje wove Bene-Hadada wa popia hati: ‘Mange ohenda, ecelela okuti ñala lomuenyo.’” Eye wa tambulula hati: “Eye handi o kasi lomuenyo? Eye manjange.” 33 Ovo va ci tenda ndondimbukiso yimue yiwa kuenda va kapako lonjanga eci eye a popia kuenje va popia vati: “Bene-Hadada manjove.” Eye wa popia hati: “Kuendi, ko upi.” Kuenje Bene-Hadada wa li lekisa ku soma kuenda Ahava wo kuata loku u kuatisa oku londa vekãlu.

34 Bene-Hadada wo sapuila hati: “Alupale isiange a tambula ku isiove ndi a tiuwiya kuenda ove o kapa ovitanda* ko Damasko ndeci isiange a lingile ko Samaria.”

Ahava wa tambulula hati: “Locisila eci, ndu ku ecelela oku enda.”

Kuenje Bene-Hadada wa linga ocisila laye kuenda eye wo wecelela oku enda.

35 Londaka ya Yehova, umue pokati komãla vovaprofeto*+ wa sapuila ekamba liaye hati: “Mange ohenda, ndi lemẽhe.” Pole, ulume wa likala oku u lemẽha. 36 Omo liaco, omõla wuprofeto wa sapuila ekamba liaye hati: “Omo okuti ove kua yevelele kondaka ya Yehova, eci o tunda palo ohosi yimue yi ka ku ponda.”* Eci eye a enda, ohosi yo sanga kuenje yo ponda.

37 Eye wa sanga ulume ukuavo kuenje wa popia hati: “Mange ohenda, ndi lemẽhe.” Kuenje ulume wo lemẽha.

38 Noke uprofeto wa enda kuenje wa kevelela soma vonjila, eye wa liviaviaya poku sitika ovaso lolonanga. 39 Eci soma a kala oku pita, eye wa kalukila soma lolukandi hati: “Ukuenje wove wa kala kuyaki eci ulume umue a nena omandekua yimue kuenje wa ndi sapuila hati: ‘Lava ulume u. Nda eye wa tila, o feta omuenyo waye lomuenyo wove,+ ale o ka feta otalendo* yimosi yopalata.’ 40 Osimbu ukuenje wove a kala oku linga ovina vikuavo, vocipikipiki ulume waco wa tila.” Soma yo Isareli wo sapuila hati: “Eli olio esombiso liove; ove muẽle wa li nõla.” 41 Lonjanga yalua wopa olonanga via kala vovaso aye kuenda soma yo Isareli wa limbuka okuti, eye wa kala umue pokati kovaprofeto.+ 42 Eye wa sapuila soma hati: “Ca popia Yehova ceci hati: ‘Omo okuti ulume nda popia okuti o pondiwa ove wa ecelela okuti o tila peka liove,+ omuenyo waye o u feta lomuenyo wove+ kuenda omanu vaye o va feta lomanu vove.’”+ 43 Noke soma yo Isareli wa enda konjo yaye ko Samaria+ loku tema kuenda esumuo.

21 Noke liovina evi, kueya ocitangi cimue catiamẽla kocumbo cayuva ca Navote u Yesirele; ocumbo caco ca kala ko Yesirele,+ ocipepi lelombe lia Ahava soma yo Samaria. 2 Ahava wa sapuila Navote hati: “Nyĩhe ocumbo cove cayuva oco ndi kũlemo, momo ci kasi ocipepi lonjo yange. Noke ndu ku ĩha ocumbo cikuavo cayuva ci piñainyiwapo. Ale nda o yongola, ndu ku ĩha olombongo vi tẽla ondando yaco.” 3 Pole, Navote wa sapuila Ahava hati: “Ka ca sungulukile kovaso a Yehova okuti, ndu ku ĩha ocipiñalo ca vakukululu yange.”+ 4 Noke Ahava wa iñila vonjo yaye loku tema kuenda esumuo, omo lietambululo Navote u Yesirele a eca kokuaye eci o sapuila hati: “Siu ku ĩha ocipiñalo ca vakukululu yange.” Eye wa pekela pula waye kuenje wa vandekela kumue kuiñi kuenda ka tavele oku lia.

5 Ukãi waye Isevele+ weya kokuaye kuenda wo pula hati: “Momo lie utima wove wa sumuĩla okuti, ku tava oku lia?” 6 Eye wa tambulula ukãi waye hati: “Momo nda sapuila Navote u Yesirele hati: ‘Ndi landise ocumbo cove cayuva. Ale nda o yongola, ndu ku ĩha ocumbo cikuavo cayuva ci piñainyiwapo.’ Pole, eye wa popia hati: ‘Siu ku ĩha ocumbo cange cayuva.’” 7 Ukãi waye Isevele wo sapuila hati: “Siti ove soma yo Isareli? Votoka, lia cimue kuenda utima wove u sanjuke. Ndu ku ĩha ocumbo cayuva ca Navote u Yesirele.”+ 8 Kuenje Isevele wa soneha ovikanda vonduko ya Ahava kuenda wa vi yika londimbukiso+ ya Ahava loku vi tuma kakulu,+ lolombuale vina via tungile volupale lua Navote. 9 Isevele wa soneha ndoco vovikanda viaco: “Tukuli eteke lioku likandangiya oku lia kuenda Navote a tumãle kovaso omanu vosi. 10 Kovaso aye ku tumãle alume vavali ka va silivila kuenda vo lundile+ poku popia vati: ‘Ove wa siñala Suku kuenda soma!’+ Noke u tundisili posamua loku u sosõla lovawe toke eci a fa.”+

11 Noke alume vo volupale lua Navote, lakulu kuenda olombuale vina via tungile volupale luaco, va linga ndomo ca sonehiwile vovikanda Isevele a tuma kokuavo. 12 Ovo va tukula eteke lioku likandangiya okulia kuenda va tumãlisa Navote kovaso omanu vosi. 13 Alume vavali ka va silivila veya, va tumãla kovaso a Navote kuenje va fetika oku u lundila kovaso omanu poku popia vati: “Navote wa siñala Suku kuenda soma!”+ Noke ovo vo tundisa posamua yolupale, vo sosõla lovawe toke eci a fa.+ 14 Ovo va tuma oku sapuila Isevele okuti: “Navote wa sosũiwa lovawe toke eci a fa.”+

15 Eci Isevele a yeva okuti Navote wa sosũiwa lovawe toke eci a fa, wa sapuila Ahava hati: “Votoka, ka tambule ocumbo cayuva ca Navote u Yesirele,+ cina eye ka yonguile oku ku landisa, momo Navote ka kasi vali lomuenyo. Eye wa fa.” 16 Eci Ahava a yeva okuti Navote wa fa, Ahava wa votoka, wa lokila vocumbo cayuva ca Navote u Yesirele oco a ci tambule.

17 Kuenje ondaka ya Yehova yeya ku Eliya+ u Tisibi yiti: 18 “Votoka, kuende ka lisange la Ahava soma yo Isareli, una wa tunga ko Samaria.+ Eye o kasi vocumbo cayuva ca Navote, eye wa lokilako oco a ci tambule. 19 U sapuila okuti: ‘Ca popia Yehova ceci hati: “Siti wa ponda ulume umue+ kuenda o yongolavo oku tambula epia liaye?’”*+ U sapuila okuti: ‘Ca popia Yehova ceci hati: “Pocitumãlo olombua via lesela osonde ya Navote, haipo olombua vi ka lesela osonde yove muẽle.”’”+

20 Ahava wa sapuila Eliya hati: “Wa ndi sanga, Onyãli wange!”+ Eliya wo tambulula hati: “Nda ku sanga. ‘Momo wa nõlapo* oku linga eci ka ca sungulukile kovaso a Yehova,+ 21 ndi nena ohali kokuove kuenda ndu ku kundula kumue lalume*+ vosi va Ahava, oku kongelamo vana va sumua la vana va hongua ko Isareli.+ 22 Ndi linga lonjo yove ndeci nda linga lonjo ya Yerevoama+ omõla a Nevata kuenda ndonjo ya Baasia+ omõla a Ahiya, momo ove wa wengula onyeño yange kuenda wa kokela va Isareli oku linga ekandu.’ 23 Catiamẽla ku Isevele, Yehova wa popia hati: ‘Olombua vi ka lia Isevele vusenge wo Yesirele.+ 24 Vana va tiamẽla ku Ahava okuti va fila volupale, va ka liwa lolombua kuenda vana va fila kovapia, va ka liwa lolonjila vio kovailu.+ 25 Ocili, ka kua la kaila omunu wa lisoka la Ahava+ okuti, wa nõlelepo* oku linga eci ka ca sungulukile kovaso a Yehova, haeye wa vetiyiwa lukãi waye Isevele.+ 26 Eye wa linga ovina vialua vĩvi poku kuama oviteka viosi via vĩha* ndeci va Amori va lingile, vana Yehova a tundisile kovaso a va Isareli.’”+

27 Eci Ahava a yeva olondaka evi, wa tola uwalo waye, wa wala ocikelẽyi ketimba liaye; kuenje wa likandangiya oku lia, wamamako oku pekela vocikelẽyi kuenda wa endaenda lesumuo. 28 Ondaka ya Yehova yeya ku Eliya u Tisibi yiti: 29 “Wa mola ndomo Ahava a liketisa mekonda liange?+ Omo okuti eye wa liketisa kovaso ange, si ka nena ohali osimbu a kasi lomuenyo. Ndi ka nena ohali konjo yaye koloneke viomõlaye.”+

22 Vokuenda kuanyamo atatu, ka kua kaile uyaki pokati ko Suria lo Isareli. 2 Kunyamo watatu, Yehosafata+ Soma yo Yuda wa enda ku soma yo Isareli.+ 3 Noke soma yo Isareli wa sapuila akuenje vaye hati: “Ene hẽ wa kũlĩhi okuti, o Ramote-Gileada+ ya tiamẽla kokuetu? Lopo tu kasi oku susõha oku yi tambula vali ku soma yo Suria.” 4 Eye wa pula Yehosafata hati: “O yongola hẽ oku enda lame oku ka linga uyaki ko Ramote-Gileada?” Yehosafata wa tambulula soma yo Isareli hati: “Ove lame tuamuamue. Omanu vange lomanu vove vamuamue. Olokavalu viange vimuamue lolokavalu viove.”+

5 Pole, Yehosafata wa sapuila soma yo Isareli hati: “Linga ohenda, tete kũlĩhĩsa+ ondaka ya Yehova.”+ 6 Omo liaco, Soma yo Isareli wongoluila pamosi ovaprofeto va soka 400 kalume kuenda wa va pula hati: “Ndi sukila hẽ oku enda oku ka liyaka lo Ramote-Gileada ale sio?” Ovo va tambulula vati: “Kuende kuenje Yehova o ka yeca peka lia soma.”

7 Noke Yehosafata wa pula hati: “Anga hẽ kulo ka kuli uprofeto umue wa Yehova? Tu kũlĩhĩsivo Suku pocakati caye.”+ 8 Kuenje soma yo Isareli wa sapuila Yehosafata hati: “Handi kuli vali ulume umue okuti tu pondola oku kũlĩhĩsa Yehova pocakati caye;+ pole, ame ndu nyãle,+ momo eye lalimue eteke a imbile owanji wovina viwa viatiamẽla kokuange, te lika ovina vĩvi.+ Ulume waco Mikaya omõla a Imila.” Pole, Yehosafata wa popia hati: “Ka citava okuti soma o vangula ocina cimue ndeci.”

9 Omo liaco, soma yo Isareli wa vilikiya kesongo umue ukuelombe kuenda wa popia hati: “Nena lonjanga Mikaya omõla a Imila.”+ 10 Noke soma yo Isareli la Yehosafata soma yo Yuda va kala oku tumãla omunu lomunu kocalo caye kuenda va wala uwalo wusoma, pocimbandi puvelo wombundi yo Samaria kuenda ovaprofeto vosi va kala oku imba owanji kovaso avo.+ 11 Noke Sedekiya omõla a Kenaana, wa li pangela olombinga viutale kuenje wa popia hati: “Ca popia Yehova ceci hati: ‘Lolombinga evi, ove o ka kundula* va Suria toke eci o va malapo.’” 12 Ovaprofeto vosi vakuavo, va kala oku imba owanji lonjila yimuamue vati: “Lamanela ko Ramote-Gileada kuenje o ka kuata onima yiwa; Yehova o ka yeca peka lia soma.”

13 Omo liaco, omunga yina ya endele oku ka vilikiya Mikaya ya popia laye yiti: “Tala! Olondaka viovaprofeto vimuamue haivio viwa ku soma. Linga ohenda, ondaka yove yi kale ndolondaka viavo kuenda popia eci ciwa.”+ 14 Pole, Mikaya wa popia hati: “Ndeci Yehova a kasi lomuenyo, cosi Yehova a ndi sapuila, oco ndi ka popia.” 15 Noke eye weya ku soma kuenje soma wo pula hati: “A Mikaya, tu sukila hẽ oku enda oku ka liyaka lo Ramote-Gileada ale sio?” Vonjanja yaco eye wa tambulula hati: “Lamana kuenda o ka kuata onima yiwa; Yehova o ka yeca peka lia soma.” 16 Kuenje soma wo sapuila hati: “Olonjanja viñami ndi sukila oku ku kapa vemẽhi liocisila oco ku ka ndi sapuile lacimue, pole, te lika ocili vonduko ya Yehova?” 17 Eye hati: “Ndi lete va Isareli vosi okuti, va lisanduila kolomunda+ ndolomeme ka vi kuete ungombo. Yehova wa popia hati: ‘Ava ka va kuete cime. Omunu lomunu a tiukile konjo yaye lombembua.’”

18 Noke soma yo Isareli wa sapuila Yehosafata hati: “Sia ku ci sapuilile hẽ okuti, ‘Eye ka ka imba owanji wovina viwa viatiamẽla kokuange, te lika vĩvi’?”+

19 Kuenje Mikaya wa popia hati: “Omo liaco, yevelela ondaka ya Yehova: Ame nda mola Yehova wa tumãla kocalo caye+ kuenda olohoka viosi viovailu via talama ocipepi laye, kondio yaye lo kepĩli liaye.+ 20 Noke Yehova wa popia hati: ‘Helie o ka kembisamo Ahava oco eye a lamane loku ka fila ko Ramote-Gileada?’ Kuenje umue wa kala oku popia ocina cimue, osimbu ukuavo a popiavo ocina cikuavo. 21 Noke espiritu limue*+ lieya kuenje lia talama kovaso a Yehova kuenda lia popia liti: ‘Ame ndu ko kembisamo.’ Yehova wo pula hati: ‘O ka ci linga ndati?’ 22 Eye wa tambulula hati: ‘Ngenda kuenda ndi kala espiritu limue liuhembi vomẽla wovaprofeto vaye vosi.’+ Omo liaco, eye wa popia hati: ‘Ove u ko kembisamo, handi vali, o ka kuata onima yiwa. Kuende, ci linga.’ 23 Kaliye Yehova wa kapa espiritu limue liuhembi vomẽla wovaprofeto vove vosi ava,+ pole, Yehova wa ku tukuila eci cĩvi.”+

24 Sedekiya omõla a Kenaana wamela ku Mikaya kuenda wo veta ocikusi cimue ketama kuenje wa popia hati: “Lonjila yipi espiritu lia Yehova lia mita oco li vangule love?”+ 25 Mikaya wa tambulula hati: “Tala! O ka ci mola keteke o ka iñila vohondo yo vokati oco o salame.” 26 Noke soma yo Isareli wa popia hati: “Ambata Mikaya kuenda u weca ku Amoni usongui wolupale kuenda ku Yoasi omõla a soma. 27 Va sapuila hati: ‘Ca popia soma ceci hati: “Kapi ulume u vokayike+ kuenda u tekuli lonepa yitito yombolo kuenda ovava toke eci ndi tiuka lombembua.”’” 28 Pole, Mikaya wa popia hati: “Nda ove wa tiuka lombembua Yehova ka popele lame.”+ Kuenje wamisako hati: “Ci patekeli amanu vosi.”

29 Omo liaco, soma yo Isareli la Yehosafata soma yo Yuda va lamanela ko Ramote-Gileada.+ 30 Soma yo Isareli wa sapuila Yehosafata hati: “Ndi likembisa kuenda ndi iñila vuyaki, pole, ove o sukila oku wala uwalo wove wusoma.” Omo liaco, soma yo Isareli wa likembisa+ kuenda wa iñila vuyaki. 31 Soma yo Suria wa handelekele asongui vakãlu aye wuyaki va soka 32 kalume hati:+ “Ko ka liyaki lomunu laumue ci kaile utito ale unene, te lika la soma yo Isareli.” 32 Eci asongui vakãlu wuyaki va mola Yehosafata, va livangula pokati vati: “U eye muẽle soma yo Isareli.” Omo liaco, va ñualapo oco va liyake laye; kuenje Yehosafata wa fetika oku kaluka oku pinga ekuatiso. 33 Eci asongui vakãlu wuyaki va limbuka okuti eye ka kaile soma yo Isareli, vepuluvi liaco, va liwekapo oku u kuama.

34 Pole, ulume umue wa imba usongo lohonji yaye vonumbi* kuenda wa toma soma yo Isareli pokati ketokekelo liocikutu caye covivela. Omo liaco, soma wa sapuila ukuakuendisa ekãlu liaye liuyaki hati: “Ñualapo, njupe kuyaki,* momo nda lemẽhiwa calua.”+ 35 Uyaki wamamako vokuenda kueteke liaco liosi kuenda soma vo talamisa vekãlu liaye loku vandekela va Suria. Osonde ya tunda pepute liaye, ya lisanduila vokati kekãlu liaye liuyaki kuenje wa fa koñolosi.+ 36 Eci ekumbi lia kala oku iñila, kua kala ondaka yimue ya kalukila vocilombo hati: “Omunu lomunu a ende volupale luaye! Omunu lomunu a ende kofeka yaye!”+ 37 Kuenje soma wa fa kuenda wambatiwa ko Samaria; ovo va kenda soma ko Samaria. 38 Eci va sukula ekãlu liuyaki, ocipepi lociva co ko Samaria, olombua via lesa osonde yaye kuenda opo ovipuepue via yuila,* ndeci ci likuata londaka Yehova a popele.+

39 Catiamẽla konepa yikuavo yulandu womuenyo wa Ahava, ovina viosi a linga, onjo* a tunga lolombinga violonjamba,+ lalupale osi a tunga, ka via sonehiwile hẽ velivulu liulandu wolotembo violosoma vio ko Isareli? 40 Ahava wa ka puyuka la vakukululu yaye;+ kuenda omõlaye Ahasiya+ wa linga osoma pomangu yaye.

41 Yehosafata+ omõla a Asa wa linga osoma yo Yuda kunyamo wakuãla wuviali wa Ahava Soma yo Isareli. 42 Yehosafata wa kuata 35 kanyamo eci a linga osoma kuenda wa viala 25 kanyamo ko Yerusalãi. Onduko ya inaye ya kala Asuva, omõla ukãi wa Silihi. 43 Eye wamamako oku endela volonjila via isiaye Asa.+ Eye ka pambukile vonjila yaco kuenda wa linga ovina viosi via sunguluka kovaso a Yehova.+ Pole, ovitumãlo via lepa ka via nyõliwile, omanu vamamako oku eca ovilumba kuenda oku tuimisila owisi wovilumba viaco kovitumãlo via lepa.+ 44 Yehosafata wamamako oku kuata ukamba uwa la soma yo Isareli.+ 45 Catiamẽla konepa yikuavo yulandu womuenyo wa Yehosafata, oluhimo luaye kuenda ndomo a yula ovoyaki, ka via sonehiwile hẽ velivulu liulandu wolotembo violosoma vio Yuda? 46 Eye wa kundulavo vofeka ovipuepue vialume vio vonembele+ vina via supilepo koloneke via isiaye Asa.+

47 Kotembo yaco, ko Edome ka kua kaile osoma layimue;+ kalei umue eye wa kala ndosoma.+

48 Yehosafata wa tungavo olonaviyu* vio ko Tarsisi oco vi ende ko Ofiri oku kopa ulu,+ pole, olonaviyu viaco ka via endele, momo via nyõlehele ko Eciongevere.+ 49 Noke Ahasiya omõla a Ahava wa sapuila Yehosafata hati: “Akuenje vange va ende lakuenje vove volonaviyu,” pole, Yehosafata ka tavele.

50 Noke Yehosafata wa ka puyuka la vakukululu yaye+ kuenda wa kendiwa kumue la vakukululu yaye Volupale lua Daviti kukululu yaye; kuenje omõlaye Yehorama+ wa linga osoma pomangu yaye.

51 Ahasiya+ omõla a Ahava wa linga osoma yo Isareli ko Samaria kunyamo 17 wuviali wa Yehosafata Soma yo Yuda kuenda wa viala o Isareli anyamo avali. 52 Eye wamamako oku linga eci ka ca sungulukile kovaso a Yehova, loku endela volonjila via isiaye,+ via ina yaye+ kuenda volonjila via Yerevoama omõla a Nevata, una wa kokela va Isareli oku linga ekandu.+ 53 Eye wamamako oku vumba Baale+ loku u kekamẽla kuenda wa wengula onyeño ya Yehova Suku ya Isareli+ ndeci isiaye a lingile.