ELIVULU LIAVALI LIA SAMUELE

1 Noke liolofa via Saulu, eci Daviti a tiuka koku yula* va Amaleke, Daviti wa kala ko Cikilage+ oloneke vivali. 2 Keteke liatatu, kueya ulume umue wa tunda kocilombo ca Saulu luwalo waye wa toka toka kuenda kutue waye kua kala oneketela. Eci a pitĩla ku Daviti, wa petamisa ocipala caye posi loku u kekamẽla.

3 Daviti wo pula hati: “Pi wa tunda?” Eye wa tambulula hati: “Ame nda puluka kocilombo co Isareli.” 4 Daviti wo pula hati: “Nye ca pitako? Mange ohenda, sapuileko.” Ulume waco hati: “Omanu va tila kuyaki kuenda valua va lemẽhiwa kuenje va fa. Saulu lomõlaye Yonatão lavovo va fa.”+ 5 Noke Daviti wa pulisa ulume waco wo nenela esapulo hati: “Wa kũlĩha ndati okuti Saulu lomõlaye Yonatão va fa?” 6 Ulume wa tambulula hati: “Ame nda kala Komunda Giliboa+ kuenda nda mola okuti Saulu wa liyeka kunga waye kuenje akãlu uyaki la vakuakuendela kolokavalu va kala oku amela kokuaye.+ 7 Eci eye a vanja konyima kuenje wa ndi mola, wa mbilikiya kuenda nda tambulula hati: ‘Ame ulo!’ 8 Eye wa mula hati: ‘Ove elie?’ Ndo tambulula siti: ‘Ame ndu Amaleke.’+ 9 Noke eye wa popia hati: ‘Amela kokuange oco o ndi ponde, ñasi oku tala ohali yalua, pole, handi ñasi lomuenyo.’ 10 Ndeya ocipepi laye kuenje ndo ponda,+ momo nda limbuka okuti eye ka puluka, omo wa lemẽhiwa calua. Noke ndopa ekolowa kutue waye locinunga ca kala kokuokuo kuaye kuenje nda vi nena kulo ku cime cange.”

11 Omo liaco, Daviti wa tola tola uwalo waye kuenje alume vosi va kala laye haico va linga. 12 Ovo va litetela, va lila, va likandangiya oku lia+ toke koñolosi omo lia Saulu, lomõlaye Yonatão, lomanu va Yehova kuenda onjo yosi ya Isareli,+ momo va pondiwa losipata.

13 Daviti wa pula ulume waco wo nenela esapulo hati: “Pi wa tunda?” Eye wa tambulula hati: “Ndimõla ocingendeleyi cimue okuti u Amaleke.” 14 Daviti wo pula hati: “Momo lie kua kuatelele usumba woku õluila eka liove oco o ponde ombuavekua ya Yehova?”+ 15 Noke Daviti wa vilikiya umue pokati kakuenje vaye loku popia hati: “Enju kulo, ponda ulume u.” Kuenje wo lemẽha, yu wa fa.+ 16 Daviti wo sapuila hati: “Osonde yove yi wile kutue wove muẽle, momo omẽla wove muẽle wa ku pisa eci wa popia hati: ‘Nda ponda ombuavekua ya Yehova.’”+

17 Noke Daviti wa imbila Saulu lomõlaye Yonatão ocisungo celisiõsuĩlo,*+ 18 loku handeleka okuti, omanu vo ko Yuda va sukila oku lilongisa ocisungo caco ca tukuiwa okuti, “Ohonji,” haico ca sonehiwa velivulu lia Yasara hati:+

19 “A Isareli omanu vove va pondiwa kovitumãlo viove via lepa.+

Alume va pama va kupuka!

25 Vana va pama va kupuka kuyaki!

Yonatão wa fila kovitumãlo viove via lepa!+

Ocisola cove kokuange ca velelepo okuti ocisola cakãi ci sule.+

2 Noke Daviti wa pula Yehova+ hati: “Citava okuti ngenda kolupale lumue pokati kalupale o Yuda?” Yehova wo sapuila hati: “Kuende.” Daviti wa pula hati: “Pi ngenda?” Eye wa tambulula hati: “Ko Hevirone.”+ 2 Daviti wa endako kumue lakãi vaye vavali okuti, Ahinoame+ u Yesirele kuenda Avigaile+ ocimbumba ca Nabala u Karimele. 3 Daviti wambatavo alume va kala laye+ okuti, omunu lomunu la vakuanjo yaye kuenda va tungila valupale a kala ocipepi lo Hevirone. 4 Kuenje alume vo ko Yuda veya kuenda oko va wavekela Daviti oco a linge osoma yonjo ya Yuda.+

Ovo va sapuila Daviti vati: “Alume vo ko Yavesi-Gileada ovo va kenda Saulu.” 5 Daviti wa tuma olomunga kalume vo ko Yavesi-Gileada loku va sapuila hati: “Yehova a vu sumũlũisi, momo wa lekisi ocisola ka ci pongoloka ku ñala yene Saulu poku u kenda.+ 6 Yehova a lekise ocisola ka ci pongoloka kokuene kuenda ohenda ka yi pui. Ame ndi lekisavo ohenda kokuene omo lieci wa lingi.+ 7 Ene alume, kolisi ovaka ene loku kuata utõi, momo ñala yene Saulu wa fa kuenda onjo ya Yuda ya ndi waveka oco ndi linge osoma yavo.”

8 Pole, Avinere+ omõla a Nere okuti, usongui wolohoka via Saulu, wa kuata Isivosiete+ omõla a Saulu wo wambata ko Mahanayimi,+ 9 kuenje wo lingisa osoma yo ko Gileada,+ ya va Asiuri, ya va Yesirele,+ ya va Efarimi,+ ya va Benjamini kuenda yo Isareli yosi. 10 Isivosiete omõla a Saulu wa kuata 40 kanyamo eci a linga osoma yo Isareli kuenda wa viala anyamo avali. Onjo ya Yuda ya nõla Daviti oco a linge osoma yavo.+ 11 Otembo* Daviti a kala osoma ko Hevirone konjo ya Yuda ya tẽla anyamo epanduvali lolosãi epandu.+

12 Noke Avinere omõla a Nere kuenda akuenje va Isivosiete omõla a Saulu, va tunda ko Mahanayimi+ va enda ko Giveone.+ 13 Yoava+ omõla a Seruya+ lakuenje va Daviti va endavo kuenda va lisanga lavo vociva covava co ko Giveone; ocimunga cimue ca kala konele yimue yociva, ocimunga cikuavo ca kala konele yikuavo yociva. 14 Noke Avinere wa sapuila Yoava hati: “Alume va limalẽhe oco va liyakele kovaso etu.” Yoava wa popia hati: “Ovo va limalẽhe.” 15 Ovo va limalẽha kuenda va yoka oco va liyake, kua nõliwa 12 ku va Benjamini okuti va tiamẽlele kocimunga ca Isivosiete omõla a Saulu kuenda 12 kakuenje va Daviti. 16 Ovo va likuata vutue kuenje omunu lomunu wa toma osipata yaye kunyãli waye kuenda vosi yavo va fa. Kuenje ocitumãlo caco okuti ko Giveone, ca tukuiwa hati, Helikati-Hazurimi.

17 Keteke liaco, kuyaki kua fa omanu valua kuenje Avinere lalume vo ko Isareli va yuliwa lakuenje va Daviti. 18 Omãla vatatu va Seruya+ okuti, Yoava,+ Avisiai+ la Asahele+ oko va kala; kuenda Asahele wa tẽlele oku lupuka ndombambi yi kasi vusenge. 19 Asahele wa landula Avinere kuenda ka ñualele kondio ndaño kepĩli poku landula Avinere. 20 Eci Avinere a vanja konyima wa pula hati: “Anga ove Asahele?” eye wa tambulula hati: “Ame muẽle.” 21 Noke Avinere wo sapuila hati: “Ñualela kondio ale kepĩli kuenda kuata umue pokati kalume kuenje u tambula ovina viaye oco vi kale viove.” Pole, Asahele ka yonguile oku liwekapo oku u landula. 22 Kuenje Avinere wa sapuila vali Asahele hati: “Liwekapo oku ndi landula. Momo lie ndu ku pondela? Ndi vanja ndati kocipala ca manjove Yoava?” 23 Pole, eye ka tavele oku liwekapo kuenje Avinere wo toma vimo lunga waye+ kuenda unga wa tundila vonyima yaye; kuenje wa kupukila posi, yu wa fila pocitumãlo caco. Omanu eci va pita pocitumãlo Asahele a kupukila kuenje haipo a fila, va enda oku talama.

24 Kuenje Yoava la Avisiai va landula Avinere. Eci ekumbi lia iñila, veya kowulu wo ko Ama wa imba ovaso ko Gia vonjila yenda vekalasoko lio ko Giveone. 25 Va Benjamini oko va liongoluila konyima ya Avinere kuenda va sokiya ocimunga cimosi casualali okuti, ca talama kilu liowulu. 26 Avinere wa vilikiya Yoava lolukandi hati: “Anga hẽ osipata yamamako oku ponda okuti ka yi liwekapo? Kua kũlĩhĩle okuti, esulilo liaco li ka nena ovitangi vialua? Otembo yipi o ka tuma akuenje vove oco va liwekepo oku landula vamanjavo?” 27 Yoava wa popia hati: “Ndeci Suku yocili a kasi lomuenyo, nda kua vanguile, alume nda va liwekapo lika oku landula vamanjavo lomẽle.” 28 Kuenje Yoava wa sika ombinga kuenda alume vaye va liwekapo oku landula va Isareli kuenje uyaki wa pua.

29 Vuteke waco wosi, Avinere lalume vaye va linga ungende ko Araba+ kuenda va yoka o Yordão, noke va pita kocimbota,* oku sulako veya ko Mahanayimi.+ 30 Eci Yoava a tiuka koku landula Avinere, wongolola omanu vosi. Kakuenje va Daviti kua kambele 19 komanu okuti, Asahele ka tendiwile. 31 Akuenje va Daviti va yulile va Benjamini kuenda alume va Avinere kuenje ci soka 360 kalume va fa. 32 Ovo va tikula Asahele+ kuenje vo kenda veyambo lia isiaye li kasi ko Beteleme.+ Noke Yoava lalume vaye va linga ungende uteke wosi kuenda eci kua ca va pitĩla ko Hevirone.+

3 Uyaki wa kala pokati konjo ya Saulu lonjo ya Daviti, wamamako otembo yalua; kuenda Daviti wamamako oku pama,+ osimbu okuti onjo ya Saulu ya kala oku hongua.+

2 Noke Daviti weya oku cita omãla ko Hevirone.+ Uveli waye wa kala Aminone+ okuti inaye Ahinoame+ u Yesirele. 3 Wavali Cileba okuti, inaye Avigaile+ ocimbumba ca Nabala u Karimele; kuenda watatu Avisalome+ okuti, inaye Mahaka omõla ufeko wa Talimai+ soma yo Gesiuri. 4 Wakuãla Adoniya+ okuti, inaye Hagiti kuenda watãlo Sefatiya okuti, inaye Avitala. 5 Wepandu Itirema okuti, inaye Egila ukãi wa Daviti. Ava ovo omãla va Daviti va citiwila ko Hevirone.

6 Osimbu uyaki wonjo ya Saulu lonjo ya Daviti wa kala oku amamako, Avinere+ wamamako oku kuata unene walua vonjo ya Saulu. 7 Saulu wa kuatele ukama umue okuti onduko yaye Risipa,+ omõla ukãi wa Aya. Isivosiete+ wa pula Avinere hati: “Momo lie wa lipekelela lukama wa isiange?”+ 8 Avinere wa temẽle calua lolondaka via Isivosiete kuenje wa popia hati: “Anga hẽ ndutue wombua yimue yo Yuda? Toke etaili ñasi oku lekisa ocisola ka ci pongoloka konjo ya isiove Saulu, ku vamanjaye, lakamba vaye kuenda sia ku pakuile poku ku eca peka lia Daviti; etaili o nyĩha elungulo omo nda lueya lukãi umue. 9 Suku a kangise Avinere loku vokiyako, nda si lingila Daviti ndeci Yehova a lisilile laye okuti:+ 10 oku sondolola usoma konjo ya Saulu loku kolisa ocalo ca Daviti ko Isareli lo ko Yuda, oku upisa ko Dani toke ko Beresieva.”+ 11 Isivosiete ka vanguile vali ondaka layimue yoku tambulula Avinere, momo wo kuatela usumba.+

12 Avinere lonjanga yalua wa tuma olomunga ku Daviti, poku popia hati: “Ofeka ya tiamẽla kulie?” Eye wamisako hati: “Linga ocisila lame kuenje ndi linga cosi citava* oco o Isareli yosi yi kale konele yove.”+ 13 Daviti wo kumbulula hati: “Ciwa! Ndi ka linga ocisila cimue love. Pole, cimosi lika ndu ku pinga ceci okuti, ku moli ocipala cange, te lika nda wa ndi nenela Mikale+ omõla ukãi wa Saulu.” 14 Noke Daviti wa tuma olomunga ku Isivosiete+ omõla a Saulu hati: “Nyĩhe ukãi wange Mikale, una nda ecele 100 koviyuvuluila via va Filisiti+ oco ndu lombe.” 15 Kuenje Isivosiete wa tuma oku tambula ukãi kulume waye Palitiyele+ omõla a Laisi. 16 Pole, ulume waye wa kala oku enda laye loku lila osimbu a kala oku u kuama konyima toke ko Baharumi.+ Noke Avinere wo sapuila hati: “Kuende, tiukila!” Kuenje eye wa tiukila.

17 Noke Avinere wa tuma esapulo kakulu vo ko Isareli, poku popia hati: “Tunde osimbu vu yongola okuti Daviti eye o linga osoma yene. 18 Kaliye ci lingi muẽle, momo Yehova wa sapuila Daviti hati: ‘Vonduko yupika wange Daviti,+ ndi ka popela omanu vange va Isareli peka lia va Filisiti kuenda peka liovanyãli vavo vosi.’” 19 Avinere wa vangula lomanu vo ko Benjamini.+ Avinere wa endavo ko Hevirone oco a ka sapele la Daviti pokolika loku u lomboluila eci Isareli lonjo yosi ya Benjamini va nõlapo.

20 Eci Avinere eya ku Daviti ko Hevirone lalume va soka 20, Daviti wa lingila Avinere lalume va kala laye ocipito cimue cinene. 21 Noke Avinere wa sapuila Daviti hati: “Ecelela okuti ngenda, ndi ongolola o Isareli yosi oco yiye ku ñala yange soma kuenje va linga ocisila love kuenda ove o viala cosi ci yongola utima wove.” Omo liaco, Daviti wa tuma Avinere oku enda kuenje eye wa enda lonjila yaye lombembua.

22 Vepuluvi liaco, akuenje va Daviti kumue la Yoava va tiuka koku punda ovina vialua loku nena ovina viaco va punda. Avinere ka kalele vali la Daviti ko Hevirone, momo eye wo tuma oku enda lombembua. 23 Eci Yoava+ lasualali vosi va kala laye va pitĩla, Yoava vo sapuila hati: “Avinere+ omõla a Nere+ weyile ku soma kuenda soma wo tuma oku enda kuenje eye wa enda lonjila yaye lombembua.” 24 Yoava wa enda ku soma kuenda wa pula hati: “Nye wa linga? Avinere weyile kokuove. Momo lie wo tumĩla oku enda oco a puluke? 25 Ove wa kũlĩha Avinere omõla a Nere! Eye weyile oco a ku kembe loku kũlĩha onjila yosi o kuama lovina viosi o linga.”

26 Kuenje Yoava wa tunda kovaso a Daviti kuenda wa tuma olomunga ku Avinere, ovo vo upa pocisimo co ko Sira; pole, Daviti ka ci kũlĩhĩle. 27 Eci Avinere a tiukila ko Hevirone,+ Yoava wo wambata ocipepi lombundi oco a sapele laye pokolika. Noke wo toma losipata vimo yu wa fa;+ wa ci lingila omo okuti wa ponda* manjaye Asahele.+ 28 Eci Daviti a yeva eci ca pita, eye wa popia hati: “Ame kuenda usoma wange lalimue eteke tu kuata eko kovaso a Yehova omo liosonde+ ya Avinere omõla a Nere. 29 Eko liosonde li wile kutue wa Yoava+ kuenda onjo yosi ya isiaye. Vonjo ya Yoava ka mu ka kambele omunu o kuete uvei wocikata,+ ale ukuavilundu,+ pamue omunu ukuakupota,* ale omunu o pondiwa losipata, pamue omunu o sukila okulia!”+ 30 Yoava la manjaye Avisiai+ va ponda Avinere,+ momo eye wa pondelevo manjavo Asahele kuyaki+ wo ko Giveone.

31 Kuenje Daviti wa sapuila Yoava kuenda omanu vosi va kala laye hati: “Toli uwalo wene kuenda wali ovikelẽyi, loku lila Avinere.” Soma Daviti wa kalavo oku kuama kocikalavekua caco. 32 Ovo va kenda Avinere ko Hevirone; kuenje soma wa lila lolukandi peyambo lia Avinere kuenda omanu vosi va lilavo. 33 Soma wa imbila Avinere ocisungo cimue conambi hati:

“Momo lie Avinere a fila ndomunu wa kamba olondunge?

Ove wa kupuka ño ndomunu o kupuka kovaso yolondingaĩvi.”*+

Noke omanu vosi vo lila vali.

35 Kuenje omanu va nena ombolo oco va lembeleke Daviti osimbu handi ca kala utanya, pole, Daviti wa lisinga hati: “Suku a ndi kangise loku vokiyako nda ndi lia ombolo ale ocina cikuavo osimbu ekumbi ka lia iñilile!”+ 36 Omanu vosi va ci mola kuenda va ci sanjukila. Ndeci ovina viosi soma a linga, eci ca sanjuisavo omanu. 37 Keteke liaco, omanu vosi kuenda va Isareli vosi va limbuka okuti soma haeyeko o kuete eko liolofa via Avinere omõla a Nere.+ 38 Noke soma wa sapuila akuenje vaye hati: “Ka wa kũlĩhĩli okuti etaili kua fa ombuale yimue, haeye wa kala omunu umue wa velapo vo Isareli?+ 39 Etaili nda hongua ndaño nda wavekiwa ndosoma,+ alume ava okuti omãla va Seruya,+ kokuange ovo olongangala calua.+ Yehova a tiuwiye ondingaĩvi ndomo ci likuata lũvi waye.”+

4 Isivosiete omõla a Saulu+ eci a yeva okuti Avinere wa fila ko Hevirone,+ eye ka kuatele vali utõi* kuenda va Isareli va kala lusumba. 2 Omõla a Saulu wa kuatele alume vavali okuti asongui vovimunga via vakuakupunda: umue onduko yaye Baana ukuavo Rekava. Ovo va kala omãla va Rimone u Berote, ukuacikoti ca Benjamini. (Momo imbo lio Berote+ lia tiamẽlelevo ko Benjamini. 3 Va Berote va tilila ko Gitami+ kuenje oko va kasi ndovingendeleyi toke etaili.)

4 Yonatão+ omõla a Saulu wa kuatele omõla umue ulume okuti ocilema.*+ Eci ko Yesirele+ kua tunda esapulo liolofa via Saulu la Yonatão, omõlaco wa kuata anyamo atãlo kuenda ukãi ukuakutata wo wambata kuenje wa tila laye, pole, osimbu ukãi a kala oku tila omo liusumba, omõla wa kupuka kuenje wa linga ocilema. Onduko yomõlaco Mefivosiete.+

5 Omãla va Rimone u Berote okuti, Rekava la Baana va enda konjo ya Isivosiete eci utanya wa tua osimbu eye a kala oku puyuka eci ekumbi lia kala pongunji. 6 Ovo va iñila vonjo ndu okuti va kopa otiliku kuenje vo toma losipata vimo; noke Rekava la manjaye Baana+ va tila. 7 Eci ovo va iñila vonjo, Isivosiete wa kala pula vohondo yaye kuenje ovo vo lemẽha kuenda vo ponda, noke vo teta utue. Ovo vambata utue waye kuenda va linga ungende uteke wosi vonjila yoku enda ko Araba. 8 Kuenje va nena utue wa Isivosiete+ ku Daviti ko Hevirone loku popia vati: “Owu utue wa Isivosiete omõla a Saulu unyãli wove+ una wa sandiliya omuenyo wove.+ Etaili Yehova wa fetuluinya eci Saulu locitumbulukila caye va lingila ñala yange soma.”

9 Daviti wa tambulula Rekava la manjaye Baana omãla va Rimone u Berote hati: “Ndeci Yehova a kasi lomuenyo, una wa ndi yovola kohali yosi,+ 10 eci umue a ndi nenela esapulo liokuti: ‘Saulu wa fa’+ kuenje wa sima okuti wa ndi nenela esapulo liwa, ndo kuata kuenda ndo pondela+ ko Cikilage. Eyi oyo onima omunu waco a tambula kokuange! 11 Ca piãla enene eci ondingaĩvi yimue yi ponda omunu umue wa sunguluka vonjo yaye muẽle pula! Anga hẽ si kuete esunga lioku vu pingi osonde yaye+ loku vu kunduli kilu lieve?” 12 Daviti wa handeleka alume vaye oco va va ponde.+ Ovo va va teta ovoko, lovolu loku pateka ovivimbi+ ocipepi lociva covava co ko Hevirone. Pole, va tikula utue wa Isivosiete, va u kenda veyambo lia Avinere ko Hevirone.

5 Vokuenda kuotembo, ovikoti viosi via Isareli vieya ku Daviti ko Hevirone+ loku popia viti: “Tala! Etu tukepa kuenda tusitu yove.+ 2 Kosimbu eci Saulu a kala soma yetu, ove wa enda oku songuila o Isareli kovoyaki avo.*+ Kuenje Yehova wa ku sapuila hati: ‘Ove o ka linga ungombo womanu vange va Isareli kuenda o ka linga usongui ko Isareli.’”+ 3 Omo liaco, akulu vosi vo ko Isareli veya ku soma ko Hevirone kuenda Soma Daviti wa linga lavo ocisila cimue+ ko Hevirone kovaso a Yehova. Noke ovo va waveka Daviti oco a linge osoma yo Isareli.+

4 Daviti wa kuata 30 kanyamo eci a linga osoma kuenda wa viala 40 kanyamo.+ 5 Wa viala o Yuda ko Hevirone ci soka 7 kanyamo lolosãi 6 kuenda ko Yerusalãi+ wa viala o Isareli yosi kuenda o Yuda ci soka 33 kanyamo. 6 Noke Soma lalume vaye va enda ko Yerusalãi oco va liyake la va Yevusi+ olonungi via tungile vofeka yaco. Ovio via pembula Daviti viti: “Ove lalimue eteke o ka iñila mulo! Ndaño muẽle olomeke ale ovilema va ka ku lupuisa.” Ovo va sima ndoco: ‘Daviti lalimue eteke a ka iñila mulo.’+ 7 Noke Daviti wa tambula ocitumãlo ceteyuilo co ko Siono okuti, kaliye Olupale lua Daviti.+ 8 Keteke liaco, Daviti wa popia hati: “Vana va ka liyaka la va Yevusi, va sukila oku pita vondamba oco va kundule ‘ovilema lolomeke’ vana Daviti a suvuka!” Eli olio esunga lieci ca popiwa hati: “Olomeke lovilema lalimue eteke va ka iñila vonjo.” 9 Noke Daviti wa tungila kocitumãlo ceteyuilo kuenje ceya oku tukuiwa* okuti, Olupale lua Daviti; kuenje Daviti wa fetika oku tunga kolonele viosi violupale okuti, Kondunda.*+ 10 Omo liaco, Daviti wamamako oku pama calua+ kuenda Yehova Suku ukualohoka wa kala laye.+

11 Soma Hirama+ wo ko Turo wa tuma olomunga ku Daviti kumue lavaya osedru,+ olokalupindelu la vakuakutunga kuenje ovo va fetika oku tunga onjo* ya Daviti.+ 12 Kuenje Daviti wa kũlĩhĩle okuti Yehova wo tumbika ndosoma ko Isareli+ kuenda wa kemãlisa usoma waye+ omo liomanu Vaye va Isareli.+

13 Daviti wa kuata vali akama valua+ kuenda akãi vo Yerusalãi noke yoku tunda ko Hevirone kuenda Daviti vo citila vali omãla valume lomãla vakãi.+ 14 Olonduko viomãla vaye vo citilua ko Yerusalãi vievi: Siamuwa, Siovava, Natana,+ Salomone,+ 15 Yivihare, Elisua, Nefege, Yafiya, 16 Elisiama, Eliada kuenda Elifelete.

17 Eci va Filisiti va yeva okuti Daviti wa wavekiwa ndosoma ko Isareli,+ va Filisiti vosi va tunda oku ka sandiliya Daviti.+ Eci Daviti a ci yeva, wa enda kocitumãlo ceteyuilo.+ 18 Kuenje va Filisiti veya kuenda va lisanduila Vocimbota* co Refayimi.+ 19 Daviti wa kũlĩhĩsa Yehova+ poku popia hati: “Citava hẽ okuti, ngenda oku ka liyaka la va Filisiti? Anga hẽ o ka va eca peka liange?” Kuenje Yehova wa sapuila Daviti hati: “Kuende, momo ngeca va Filisiti peka liove.”+ 20 Omo liaco, Daviti weya ko Baale-Perasimi kuenje oko Daviti a va kunduila. Noke wa popia hati: “Yehova wa kunduila ovanyãli vange+ kovaso ange ndepangu limue lia pangiwa lovava.” Eli olio esunga lieci ocitumãlo caco ca tukuiwila okuti, Baale-Perasimi.*+ 21 Va Filisiti va siako oviteka viavo kuenda Daviti lalume vaye va vi ambata.

22 Noke va Filisiti veyile vali kuenda va lisanduila Vocimbota* co Refayimi.+ 23 Daviti wa kũlĩhĩsa vali Yehova, pole, Eye wo sapuila hati: “Ku ka ende kovaso yavo. Pole, ñuala konyima yavo kuenda va katukila kovaso yoviti vio amoreira. 24 Kuenje eci o yeva ocileñi ci yevala ndocileñi comanu va endela kilu lioviti vio amoreira, yaka lavo lutõi, momo Yehova o ka ku pitila kovaso oco o kundule olohoka via va Filisiti.” 25 Omo liaco, Daviti wa linga ndeci Yehova o handelekele kuenda wa kundula va Filisiti+ oku upisa ko Geva+ toke ko Gesere.+

6 Daviti wongolola vali asualali va velapo vo ko Isareli okuti, 30.000 kalume. 2 Daviti kuenda alume va kala laye va enda ko Baale-Yuda oco va kope Ocikasia ca Suku yocili,+ momo oko omanu va enda oku vilikiyila onduko ya Yehova ukualohoka,+ una wa tumãla kocalo kilu* lia va keruvi.+ 3 Pole, ovo va kapa Ocikasia ca Suku yocili kokalosa kokaliye+ oco va cambate poku tunda konjo ya Avinadave+ yina ya kala kowulu; kuenje Usa la Ahiyo omãla va Avinadave ovo va kala oku songuila okalosa kaco kokaliye.

4 Ovo vopa Ocikasia ca Suku yocili konjo ya Avinadave yina ya kala kowulu kuenda Ahiyo eye wa pita kovaso Yocikasia. 5 Daviti lonjo yosi ya Isareli va kala oku linga ocipito kovaso a Yehova lovikuata viosi viovisikilo via pangiwa lavaya, lolohalupa, lovikuata vikuavo viovisikilo via pangiwa lovikolo,+ lolopandelu,+ osakaya kuenda olosimbalu.+ 6 Pole, eci ovo va pitĩla pocimbandi ca Nakonu, Usa wolõla okuokuo kuaye wa kuata Kocikasia ca Suku yocili leka liaye,+ momo olongombe nda via ci kupula. 7 Omo liaco, onyeño ya Yehova ya wengukila Usa kuenda Suku yocili oko o pondela+ omo liekambo liaye liesumbilo+ kuenje wa fila konele Yocikasia ca Suku yocili. 8 Pole, Daviti wa tema* momo onyeño ya Yehova ya wengukila Usa; kuenje ocitumãlo caco ceya oku tukuiwa okuti, Perece-Usa* toke etaili. 9 Omo liaco, Daviti wa kuatela usumba Yehova+ keteke liaco kuenje wa popia hati: “Ocikasia ca Yehova ciya ndati kokuange?”+ 10 Daviti ka yonguile oku nena Ocikasia ca Yehova kuna eye a kala okuti, Volupale lua Daviti.+ Noke Daviti wa handeleka oco cambatiwe konjo ya Ovede-Edome+ u Giti.

11 Ocikasia ca Yehova camamako oku kala konjo ya Ovede-Edome u Giti vokuenda kuolosãi vitatu kuenje Yehova wamamako oku sumũlũisa Ovede-Edome la vakuanjo yaye vosi.+ 12 Va sapuila Soma Daviti vati: “Yehova o kasi oku sumũlũisa onjo ya Ovede-Edome lovina viosi a kuete, omo Liocikasia ca Suku yocili.” Kuenje Daviti wa enda oco a kope Ocikasia ca Suku yocili konjo ya Ovede-Edome loku ci tuala lonjolela Volupale lua Daviti.+ 13 Eci vana va kala oku ambata+ Ocikasia ca Yehova va eca ananga epandu, Daviti wa lumba ongombe yimue kuenda onãle ya neta!

14 Daviti wa piluka lutima wosi kovaso a Yehova; kuenda otembo yosi Daviti wa walele* evendalia liovalatanya.+ 15 Daviti kuenda onjo yosi ya Isareli va kala oku nena Ocikasia+ ca Yehova loku kaluka lesanju+ kumue locileñi combinga.+ 16 Pole, eci Ocikasia ca Yehova ca pitĩla Volupale lua Daviti, Mikale+ omõla ukãi wa Saulu wa vanjela ponjanela kuenje wa mola okuti, Soma Daviti wa kala oku tẽha tẽha loku piluka kovaso a Yehova; noke eye wa fetika oku u pembula vutima waye.+ 17 Omo liaco, ovo va nena Ocikasia ca Yehova kuenda va ci kapa pocitumãlo caco vokati kombalaka Daviti a ci tungila.+ Noke Daviti wa lumbila Yehova+ ovilumba vioku pia elisi+ lovilumba viombembua.+ 18 Eci Daviti a mala oku eca ovilumba vioku pia elisi lovilumba viombembua, eye wa sumũlũisa omanu vonduko ya Yehova ukualohoka. 19 Handi vali, eye wa eca komanu vosi, kowiñi wosi wa Isareli okuti, kulume lulume kuenda kukãi lukãi ombolo yimue yi kuete epangu, ekende limue liepako lieva kuenda ekende limue liayuva, noke omanu va enda omunu lomunu konjo yaye.

20 Eci Daviti a tiuka oco a sumũlũise vakuanjo yaye, Mikale+ omõla ukãi a Saulu wa tunda oco a lisange laye. Mikale wa popia hati: “Etaili soma ya va Isareli wa lekisa ulamba waye eci a lulila kovaso yafeko vakuenje vaye!”+ 21 Daviti wa sapuila Mikale hati: “Nda linga ocipito cange kovaso a Yehova una wa ndi nõla okuti, isiove la vakuanjo yaye yosi havoko, eye wa ndi nõla oco ndi linge usongui womanu va Yehova okuti, va Isareli.+ Ndi linga ocipito kovaso a Yehova, 22 ndi liketisa vali calua okuti eci ci sule kuenda ndi linga ovina vialua vi lekisa okuti sia velelepo. Pole, ndi kemãlisiwa lafeko vana ove wa tukula.” 23 Omo liaco, Mikale+ omõla ukãi wa Saulu ka kuatele omõla toke keteke a fa.

7 Eci soma a kala vonjo* yaye muẽle+ kuenje Yehova wo wĩhile epuyuko kovanyãli vaye vosi vo ñuala, 2 soma wa sapuila Natana+ uprofeto hati: “Ame ñasi vonjo yimue yolosedru,+ osimbu okuti Ocikasia ca Suku yocili ci kasi pokati kombalaka.”+ 3 Natana wa tambulula soma hati: “Kuende, linga cosi ci kasi vutima wove, momo Yehova o kasi love.”+

4 Vuteke waco, ondaka ya Yehova yeya ku Natana yiti: 5 “Kuende, sapuila ukuenje wange Daviti okuti: ‘Ca popia Yehova ceci hati: “Anga hẽ o nungila onjo yimue oco ndi kalemo?+ 6 Momo lalimue eteke nda kalele vonjo yimue, tunde keteke ndopa omanu va Isareli Kegito toke etaili,+ pole, nda tungayala* vombalaka kuenda votavernakulu.+ 7 Vokuenda kuotembo yosi, eci nda endaenda kumue la va Isareli vosi,* anga hẽ eteke limue nda popele ondaka yimue ku umue pokati kasongui vovikoti via Isareli vina ame nda nõla oco va linge angombo vomanu vange va Isareli loku popia hati: ‘Momo lie ka wa nungilili onjo yimue yolosedru?’”’ 8 Kaliye sapuila ukuenje wange Daviti okuti: ‘Ca popia Yehova ukualohoka ceci hati: “Ame nda ku upa vovisenge vioku lisila oviunda, konyima yoviunda,+ oco o linge usongui womanu vange va Isareli.+ 9 Ndi ka kala love kuosi wenda+ kuenda ndi ka imũla* ovanyãli vove vosi kovaso ove;+ kuenje ndi ka lingisa onduko yimue yinene kokuove+ ndonduko yalume va kemãla vo kilu lieve. 10 Ndi ka nõlela omanu vange va Isareli ocitumãlo cimue loku va kapamo. Ovo omo va ka kala kuenda lomue o ka va sakalaisa vali; kuenje olondingaĩvi ka vi ka va talisa vali ohali ndeci via linga kosimbu,+ 11 tunde keteke nda nõlela omanu vange va Isareli olonganji.+ Kuenje ndi ka ku ĩhavo epuyuko kovanyãli vove vosi.+

“‘“Yehova wa ku sapuilavo okuti, Yehova o ka ku tungila onjo* yimue.+ 12 Eci oloneke viove vi pitĩla kesulilo+ okuti o ka puyuka la vakukululu yove, ndi katula ocitumbulukila* cove ci kuamamo okuti, omõlove muẽle* kuenda ndi ka kolisa usoma waye.+ 13 Eye o ka tungila onduko yange onjo yimue+ kuenda ndi ka kolisa ocalo cusoma waye otembo ka yi pui.+ 14 Ame ndi ka linga isiaye kuenda eye o ka linga omõlange.+ Eci a lueya, ndi ko lemẽla lombueti yalume kuenda olombueti viomãla vomanu.*+ 15 Ocisola cange ka ci pongoloka ka cupiwa kokuaye ndeci nda cupa ku Saulu,+ una ndopa kovaso ove. 16 Onjo yove lusoma wove, vi ka kolapo otembo ka yi pui kovaso ove; ocalo cove ci ka kolapovo otembo ka yi pui.”’”+

17 Natana wa sapuila Daviti olondaka evi viosi locinjonde eci cosi.+

18 Omo liaco, Soma Daviti wa iñila kuenda wa tumãla kovaso a Yehova loku popia hati: “Ame helie, A Ñala Tõlo, a Yehova? Kuenda onjo yange hẽ nye oco o ndi nene toke palo?+ 19 Handi vali hacoko lika, A Ñala Tõlo Yehova, ove o popiavo catiamẽla konjo yukuenje wove toke otembo yalua kovaso yoloneke; kuenda eci ci linga onumbi* komanu vosi, A Ñala Tõlo, a Yehova. 20 Nye vali ukuenje wove Daviti a pondola oku ku sapuila osimbu okuti ove wa ñulĩha ciwa,+ A Ñala Tõlo Yehova? 21 Omo liondaka yove kuenda ndomo ci likuata lutima wove,* wa linga ovina evi viosi vinene kuenda wa vi situluila kukuenje wove.+ 22 A Ñala Tõlo Yehova eli olio esunga lieci okuti ove wunene.+ Ka kuli laumue wa lisoka love+ kuenda ka kuli Suku te lika ove;+ ovina viosi tua yeva lovatũi etu vi cimbila uvangi. 23 Ofeka yipi yikuavo kilu lieve ya lisoka lomanu vove va Isareli?+ Suku wa va yovola ndomanu vaye,+ loku li lingila eye muẽle onduko yimue+ poku va lingilako ovina vinene haivio vi komõhisa.+ Ove wa tundisa olofeka kuenda olosuku vialio oco o kuatise omanu vove vana wa yovola Kegito. 24 Wa tumbika omanu vove va Isareli ndomanu vove muẽle otembo yosi;+ kuenje ove A Yehova, wa linga Suku yavo.+

25 “Kaliye A Yehova Suku, tẽlisa ohuminyo wa lingile yatiamẽla kukuenje wove kuenda konjo yaye otembo yosi kuenje linga ndeci wa likuminya.+ 26 Onduko yove yi kemãlisue otembo ka yi pui+ oco omanu va popie vati: ‘Yehova ukualohoka eye Suku ko Isareli’ kuenda onjo yukuenje wove Daviti yi kolisiwe kovaso ove.+ 27 Momo ove a Yehova ukualohoka, Suku ya Isareli, ove wa eca kukuenje wove esituluilo limue poku popia hati: ‘Ndu ku tungilako onjo* yimue.’+ Eli olio esunga lieci ukuenje wove a kuatela utõi* woku linga ohutililo eyi kokuove. 28 Kaliye A Ñala Tõlo Yehova, ove wu Suku yocili, olondaka viove viocili+ kuenda wa likuminya ovina evi viwa kukuenje wove. 29 Omo liaco, sanjukila oku sumũlũisa onjo yukuenje wove kuenda oyo yamameko otembo ka yi pui kovaso ove;+ momo ove A Ñala Tõlo Yehova, wa likuminya kuenda lesumũlũho liove, onjo yukuenje wove yi sumũlũisiwe otembo ka yi pui.”+

8 Noke yotembo yimue, Daviti wa kundula va Filisiti+ kuenje wa va yula,+ Daviti wa tambula o Meteke-Hama povaka a va Filisiti.

2 Eye wa yula va Moavi+ kuenda wa va tuma oku pekela posi, wa va kapa ovilala. Ovilala vivali viava va pondiwa, ulala umosi wava va kala lomuenyo.+ Kuenje va Moavi va linga akuenje va Daviti kuenda va enda oku feta ulambu.+

3 Daviti wa yula Hadadesere omõla a Rehove soma yo Sova,+ osimbu eye a kala oku enda oku ka tumbulula omoko yaye yoku viala Kolui Ferati.+ 4 Daviti wa tambula 1.700 kalume vakuakuendela kolokavalu kuenda 20.000 kasualali vakuakuendela posi. Noke Daviti wa teta asipa akonjo olokavalu viosi viakãlu uyaki, pole, wa supisapo 100.+

5 Eci va Suria vo ko Damasko+ veya oco va kuatise Soma Hadadesere wo ko Sova, Daviti wa ponda 22.000 ya va Suria.+ 6 Noke Daviti wa tumbika asualali ko Suria yo Damasko kuenje va Suria va linga akuenje va Daviti kuenda va enda oku feta ulambu. Yehova wa eca ku Daviti eyulo* kuosi eye a enda.+ 7 Handi vali, Daviti wa tambula oviyepelo viulu kakuenje va Hadadesere kuenje wa vi nena ko Yerusalãi.+ 8 Oku upisa ko Beta kuenda ko Berotiai okuti, alupale a Hadadesere, Soma Daviti wa tambula etendelo limue linene liosipi.

9 Soma Toi wo ko Hamati+ wa yeva okuti Daviti wa yula olohoka viosi via Hadadesere.+ 10 Omo liaco, Toi wa tuma omõlaye Yorame ku Soma Daviti oco o lame kuenda oku u pandiya omo a liyaka la Hadadesere loku u yula (momo Hadadesere olonjanja vialua wa liyaka la Toi) kuenje eye wa nena ovikuata viopalata, viulu kuenda viosipi. 11 Soma Daviti wa kolisa ovina viaco ku Yehova kumue lopalata kuenda ulu eye a kolisile okuti, via tundile kolofeka viosi eye a yula:+ 12 okuti ko Suria, ko Moavi,+ ku va Amoni, ku va Filisiti,+ ku va Amaleke+ kuenda ovina via pundiwa ku Hadadesere+ omõla a Rehove soma yo ko Sova. 13 Handi vali, oluhimo lua Daviti lua kemãlisa onduko yaye eci a tiuka koku kundula 18.000 ya va Edome Vocimbota Comongua.+ 14 Eye wa kapa asualali ko Edome. Noke ko Edome yosi wa kapako asualali kuenje va Edome vosi va linga akuenje va Daviti.+ Yehova wa eca ku Daviti eyulo* kuosi eye a enda.+

15 Daviti wamamako oku viala o Isareli+ yosi kuenje Daviti wa tumbika esunga+ kuenda esunguluko komanu vaye vosi.+ 16 Yoava+ omõla a Seruya wa kala usongui wolohoka kuenda Yehosafata+ omõla a Ahilude wa kala ulomboluili. 17 Sadoke+ omõla a Ahituva la Ahimeleke omõla a Aviyatare va kala ovitunda kuenda Seraya wa kala usonehi. 18 Benaya+ omõla a Yehoyada wa kala usongui wa va Kereti la va Peleti.+ Kuenje omãla va Daviti va kala asongui vakuakuvumba.*

9 Daviti wa pula hati: “Anga hẽ konjo ya Saulu kua supa omunu umue oco ndi lekise kokuaye ocisola ka ci pongoloka omo lia Yonatão?”+ 2 Kua kala ukuenje umue konjo ya Saulu o tukuiwa hati, Siva.+ Vo vilikiyila kovaso a Daviti kuenje soma wo pula hati: “Ove Siva?” Eye wa tambulula hati: “Ame ndukuenje wove.” 3 Soma wamisako hati: “Anga hẽ konjo ya Saulu kua supa omunu umue oco ndi lekise kokuaye ocisola ka ci pongoloka ca Suku?” Siva wa tambulula soma hati: “Kua supa omõla a Yonatão; eye ocilema* covolu avali.”+ 4 Soma wo pula hati: “Pi eye a kasi?” Siva wa tambulula soma hati: “Eye o kasi ko Lodevare konjo ya Makiri,+ omõla a Amiyele.”

5 Vepuluvi liaco, soma Daviti wa tuma oku ko upa ko Lodevare konjo ya Makiri, omõla a Amiyele. 6 Eci Mefivosiete omõla a Yonatão, omõla a Saulu eya ku Daviti, wa petamisa ocipala caye posi loku kekama. Noke Daviti wa popia hati: “A Mefivosiete!” eye wa tambulula hati: “Ukuenje wove hayulo.” 7 Daviti wo sapuila hati: “Ku ka kuate usumba, ndi lekisa ocisola ka ci pongoloka+ kokuove omo lia isiove Yonatão kuenda ndi ku tiuwiya ovapia osi a sekulu yove Saulu kuenje ove o ka lia lia* komesa yange olonjanja viosi.”+

8 Kuenje Mefivosiete wa kekama loku popia hati: “Helie ukuenje wove oco ove o kapeko* ombua yimue ya fa+ ndame?” 9 Soma wa kovonga Siva oñuatisi ya Saulu loku u sapuila hati: “Ovina viosi via tiamẽlele ku Saulu lonjo yaye yosi, ñasi oku vi eca konekulu ya cime cove.+ 10 Ove u ko limilako epia kumue lomãla vove, lakuenje vove kuenda o kongula ovaima aco loku eca okulia ku vana va tiamẽla konekulu ya cime cove oco va lie. Pole, Mefivosiete onekulu ya cime cove o ka lia lia komesa yange olonjanja viosi.”+

Siva wa kuata 15 komãla kuenda 20 kakuenje.+ 11 Noke Siva wa sapuila soma hati: “Ukuenje wove o ka linga cosi ñala yange soma a handeleka ukuenje waye oku linga.” Kuenje Mefivosiete wa lia lia komesa* ya Daviti nda umue pokati komãla va soma. 12 Mefivosiete wa kuatelevo omõla umue ulume okuti, onduko yaye Mika;+ kuenje vosi va kala konjo ya Siva va linga akuenje va Mefivosiete. 13 Noke Mefivosiete wa tunga ko Yerusalãi, momo olonjanja viosi wa enda oku lia komesa ya soma;+ kuenda eye wa kala ocilema covolu avali.+

10 Noke liovina viaco, soma ya va Amoni+ wa fa kuenje omõlaye Hanuni wa linga osoma pomangu yaye.+ 2 Noke Daviti wa popia hati: “Ndi ka lekisa ocisola ka ci pongoloka ku Hanuni omõla a Nahase ndeci isiaye a lekisa ocisola ka ci pongoloka kokuange.” Omo liaco, Daviti wa tuma akuenje vaye oco vo lembeleke omo liolofa via isiaye. Pole, eci akuenje va Daviti va pitĩla vofeka ya va Amoni, 3 olombuale via va Amoni via sapuila ñala yavo Hanuni viti: “Ove o sima hẽ okuti, Daviti o kasi oku lekisa esumbilo ku isiove poku ku tumisa vakuakulembeleka? Daviti ka tumĩle hẽ akuenje vaye kokuove oco va konomuise lutate olupale loku lu kũlĩhĩsa kuenda oku lu kundula?” 4 Omo liaco, Hanuni wa kuata akuenje va Daviti kuenda wa va teta olonjele konele yimosi,+ wa tetavo ovowalo avo pokati toke vatako avo kuenje wa va tuma oku enda. 5 Eci va ci sapuila ku Daviti, vepuluvi liaco, wa tuma alume oku ka liñualẽhela lavo, momo alume vaco va kutisiwa osõi yalua; kuenje soma wa va sapuila hati: “Kali vo Yeriko+ toke eci olonjele viene vi kula vali, noke tiuki.”

6 Vokuenda kuotembo, va Amoni va limbuka okuti va suvukiwa la Daviti, omo liaco, va Amoni va tuma olomunga oco va pañinye 20.000 kasualali va endela posi okuti, va Suria vo ko Bete-Rehove+ kuenda va Suria vo ko Sova;+ kuenje va pañinyavo soma yo ko Mahaka+ leci ci soka 1.000 kalume; kuenda 12.000 kalume vo ko Tovi.+ 7 Eci Daviti a yeva ovina viaco, wa tuma Yoava kuenda olohoka viosi oku kongelamo asualali vaye va pamapo vali.+ 8 Va Amoni va tunda kuenda va lipongiya ndovimunga viasualali puvelo wombundi yolupale osimbu va Suria vo ko Sova lava vo ko Rehove kumue lalume vo ko Tovi kuenda vo ko Mahaka va kala vusenge.

9 Eci Yoava a limbuka okuti asualali va kala oku iya kokuaye kovaso lo konyima, eye wa nõla vamue pokati kasualali va velapo vo ko Isareli kuenda wa va pongiya ndovimunga viasualali oco va liyake la va Suria.+ 10 Eye wa kapa alume vakuavo oco va songuiwe* la manjaye Avisiai+ okuti, o va pongiya ndovimunga viasualali oco va liyake la va Amoni.+ 11 Noke eye wa popia hati: “Nda va Suria va pamapo vali calua okuti ame ci sule, enju oco o ndi kuatise; pole, nda va Amoni va pamapo vali calua okuti ove ci sule, ndiya oku ku kuatisa. 12 Tu sukila oku pama loku kuata utõi+ oco tu kuatise omanu vetu, lalupale a Suku yetu kuenda Yehova o ka linga eci ciwa kovaso aye.”+

13 Noke Yoava kumue lalume vaye vamako oco va liyake la va Suria kuenje va Suria va tila kovaso aye.+ 14 Eci va Amoni va limbuka okuti va Suria va tila, ovo va tilavo Avisiai kuenje va iñila volupale. Noke liovina viaco, Yoava wa tiuka koku liyaka la va Amoni kuenje weya ko Yerusalãi.

15 Eci va Suria va limbuka okuti, va yuliwa la Isareli, va liongolola.+ 16 Noke Hadadesere+ wa kovonga va Suria va kala vimbo Liolui*+ kuenje veya ko Helama okuti, va kala oku songuiwa la Siovaka usongui wolohoka via Hadadesere.

17 Eci va ci sapuila ku Daviti vepuluvi liaco, wongolola o Isareli yosi kuenda wa yoka o Yordão kuenje weya ko Helama. Va Suria va lipongiya ndovimunga viasualali oco va lisange la Daviti kuenje va liyaka laye.+ 18 Pole, va Suria va tila Isareli; kuenda Daviti wa ponda 700 kalume vakuakuendisa akãlu kuenda 40.000 ya va Suria vakuakuendela kolokavalu kuenda wa lemẽhavo Siovaka kesongo kolohoka okuti, oko a fila.+ 19 Eci olosoma viosi lakuenje va Hadadesere va limbuka okuti va yuliwa lo Isareli, haico va linga ombembua lo Isareli kuenje va linga apika vavo;+ noke va Suria va kala lusumba woku kuatisa vali va Amoni.

11 Kefetikilo liunyamo* okuti, oyo otembo olosoma via siata oku enda kuyaki, Daviti wa tuma Yoava kuenda akuenje vaye, lasualali vosi vo ko Isareli oco va kundule va Amoni loku ñuala ocingonja o Raba,+ osimbu Daviti a siala vo Yerusalãi.+

2 Koñolosi* Daviti wa votoka pula waye kuenje wa kala oku ñuala ñuala kilu lionjo* ya soma. Osimbu a kala kilu wa mola ukãi umue wa kala oku yua kuenda ukãi waco wa posekele calua. 3 Daviti wa tuma umue oku kũlĩhĩsa nda ukãi waco helie kuenje omunu waco wo sapuila hati: “U siti Batisieva+ omõla ufeko wa Eliama+ haeye ukãi wa Uriya+ u Hiti?”+ 4 Noke Daviti wa tuma olomunga oco vi kope ukãi waco.+ Kuenje ukãi weya, yu Daviti wa lipekela laye.+ (Eci ca pita kepuluvi ukãi a kala oku liyelisa kevĩho liaye.*)+ Noke ukãi wa tiukila konjo yaye.

5 Ukãi wemina kuenje wa tuma esapulo ku Daviti hati: “Nda mina.” 6 Noke Daviti wa tuma esapulo limue ku Yoava hati: “Numise Uriya u Hiti.” Kuenje Yoava wa tuma Uriya ku Daviti. 7 Eci Uriya a pitĩla, Daviti wo pulisa ndomo Yoava a kasi, ndomo asualali va kasi kuenda ndomo uyaki wa kala oku enda. 8 Noke Daviti wa sapuila Uriya hati: “Kuende konjo yove, puyukapo kamue.”* Eci Uriya a tunda konjo ya soma, olombanjaile* via soma vio kuama konyima. 9 Pole, Uriya wa pekela puvelo wonjo ya soma lakuenje vosi va ñala yaye kuenda ka endele konjo yaye muẽle. 10 Daviti vo sapuila hati: “Uriya ka endele konjo yaye muẽle.” Kuenje Daviti wa pula Uriya hati: “Siti ndopo wa tiuka kungende? Momo lie kua endelele konjo yove?” 11 Uriya wa tambulula Daviti hati: “Ocikasia+ kuenda o Isareli kumue lo Yuda va kasi vovilombo oloneke vimue kuenje ñala yange Yoava lakuenje va ñala yange va tunga ovilombo vusenge. Ame hẽ ngenda konjo yange oku lia loku nyua loku pekela lukãi wange?+ Ndeci ove o kasi lomuenyo, ame si lingi ocina caco!”

12 Daviti wa sapuila Uriya hati: “Eteke lietaili kala vali kulo, hẽla ndu ku tuma oku enda.” Kuenje keteke liaco, Uriya wa kala ko Yerusalãi toke keteke likuavo. 13 Daviti wo laleka oco a lie loku nyua laye kuenda wo koluisa. Pole, koñolosi wa ka pekelele pula waye lakuenje va ñala yaye kuenje ka endele konjo yaye muẽle. 14 Komẽle Daviti wa sonehela ukanda Yoava kuenda wa tuma Uriya oku u ambata. 15 Vukanda waco wa sonehamo hati: “Kapi Uriya kulala wo kovaso kuna okuti uyaki wa piãlapo vali. Noke u sipo likawaye oco a lemẽhiwe kuenje o fa.”+

16 Yoava wa kala ale oku lavulula olupale kuenda wa kapa Uriya kuna eye a kũlĩhĩle okuti, kua kala asualali va pamẽle calua. 17 Eci alume vo volupale va tunda oku ka liyaka la Yoava vamue pokati kakuenje va Daviti va fa kuenda Uriya u Hiti wa favo.+ 18 Yoava wa sapuila Daviti ovina viosi via kala oku pita kuyaki. 19 Eye wa handeleka omunga hati: “Eci o mala oku vangula la soma ovina viosi vi kasi oku pita kuyaki, 20 citava okuti soma o tema kuenje o popia hati: ‘Momo lie wa ka lingili uyaki ocipepi lolupale? Ka wa kũlĩhĩli okuti ovo va ponduile oku asa ovisongo oku upisa kilu liocimbaka? 21 Helie wa ponda Avimeleke+ omõla a Yeruvesiete?+ Siti ukãi umue eye wo wimba ewe liombambo oku upisa kilu liocimbaka kuenje eye wa fa ko Tevese? Momo lie wa kaleli ocipepi locimbaka?’ Ove popia hati: ‘Ukuenje wove Uriya u Hiti wa favo.’”

22 Kuenje omunga ya enda, yu ya sapuila Daviti ovina viosi Yoava o tuma oku sapula. 23 Omunga ya sapuila Daviti hati: “Alume vavo va tu yula kuenda va liyaka letu vusenge; pole, tua va lupuisa toke pombundi yolupale. 24 Noke vakualohonji va fetika oku asa ovisongo kakuenje vove oku upisa kilu liocimbaka kuenda vamue pokati kakuenje va soma va fa; ukuenje wove Uriya u Hiti wa favo.”+ 25 Daviti wa sapuila omunga hati: “Sapuila Yoava okuti: ‘Ku ka sakalale locitangi eci, momo osipata yi ponda omanu vosi. Kolisako oku yakela olupale loku u tambula.’+ Noke u kolisa muẽle.”

26 Eci ukãi wa Uriya a yeva okuti ulume waye Uriya wa fa, wa lila calua ulume waye. 27 Eci oloneke vioku lila via pita, Daviti wa tuma oku nena ukãi waco konjo yaye kuenje wa linga ukãi waye+ kuenda wo citila omõla umue ulume. Pole, eci Daviti a linga ca sumuisa calua* Yehova.+

12 Yehova wa tuma Natana+ ku Daviti. Natana wa pitĩla kokuaye+ loku popia hati: “Vimbo limue mua kala alume vavali, umue ohuasi, ukuavo osuke. 2 Ulume ohuasi wa kuatele olomeme vialua kuenda olongombe;+ 3 Pole, ulume osuke wa kuatele lika okameme kamosi komange a landele.+ Eye wa enda oku ka tata ciwa kuenda ka kula laye kumosi lomãla vaye. Ndaño okuti okulia kuaye kua kala kutito, pole, okameme kaco ka lialiakovo kuenda ka nyua nyua kokopo yaye loku pekela ponete yaye. Kokuaye ka kala ndomõlaye ufeko. 4 Eteke limue ulume ohuasi wa tambula ukombe, pole, ka yonguile oku upa omeme yimue yaye ale ongombe oco a telekele ukombe waye. Eye wa tikula okameme kulume osuke, wa ka telekela ukombe waye.”+

5 Daviti wa kuatela onyeño yalua ulume waco kuenda wa sapuila Natana hati: “Ndeci Yehova a kasi lomuenyo,+ ulume waco wa ci linga o sesamẽla oku fa! 6 Handi vali, eye o sukila oku feta ondando yolomeme vikuãla,+ momo ka lekisile ohenda.”

7 Kuenje Natana wa sapuila Daviti hati: “Ulume waco ove muẽle! Ca popia Yehova Suku ya va Isareli ceci hati: ‘Ame nda ku waveka ndosoma ya va Isareli+ kuenda nda ku popela peka lia Saulu.+ 8 Nda yonguile oku ku ĩha onjo ya ñala yove+ loku ecavo akãi va ñala yove+ peka liove kuenda nda eca kokuove onjo ya Isareli kuenda ya Yuda.+ Ndaño lovina viosi evi, nda yonguile oku ku lingilako vali ovina vikuavo.+ 9 Momo lie wa pembuila ondaka ya Yehova poku linga eci cĩvi kovaso aye? Wa ponda Uriya u Hiti losipata!+ Wa tambula ukãi waye oco a linge ukãi wove,+ noke yoku u ponda losipata ya va Amoni.+ 10 Cilo, osipata lalimue eteke yi ka tunda vonjo yove,+ momo wa ndi pembula poku tambula ukãi wa Uriya u Hiti oco a linge ukãi wove.’ 11 Ca popia Yehova ceci hati: ‘Ndi ka ku nenela ohali yi tundilila vonjo yove muẽle;+ kuenda akãi vove ndi vopa kovaso yove muẽle loku va eca kulume* ukuavo+ kuenje eye o ka lipekela lavo vokuenda kutanya.*+ 12 Ove wa ci lingila vuyombeki,+ Ame ndi ci lingila kovaso yo Isareli yosi vokuenda kutanya.’”*

13 Daviti wa sapuila Natana hati: “Nda lingila Yehova ekandu.”+ Natana wa tambulula Daviti hati: “Yehova wa ecela ekandu liove.+ Ove ku fi.+ 14 Omo okuti wa tomba Yehova kovina evi, omõla va ku citila o ka fa muẽle.”

15 Natana wa enda konjo yaye.

Yehova wa koka okuti omõla una ukãi wa Uriya a citila Daviti o vela calua. 16 Daviti wa lipilikila ku Suku yocili vonduko yomõlaco. Daviti wa likandangiya calua oku lia kuenda wa enda oku iñila vohondo yaye loku pekela posi uteke wosi.+ 17 Akulu vo vonjo yaye va enda oku seteka oku u yelula posi, pole, eye ka endaile oku tava kuenda ka yonguile oku lia lavo. 18 Keteke liepanduvali omõla wa fa, pole, akuenje va Daviti va kala lusumba woku u sapuila okuti omõla wa fa. Ovo vati: “Osimbu omõla a kala lomuenyo tua sapela laye, pole, eye ka tu yevele. Kaliye tu u sapuila ndati okuti, omõla wa fa? Pamue o ka linga cimue cĩvi.”

19 Eci Daviti a mola okuti akuenje vaye va kala oku ñuñuna omunu lukuavo, eye wa limbuka okuti omõla wa fa. Daviti wa pula akuenje vaye hati: “Omõla wa fa?” Ovo vati: “Wa fa.” 20 Daviti wa katuka posi. Wa yua, wa lisieketa ulela ketimba,+ wa pongolola uwalo kuenda wa iñila vonjo+ ya Yehova, yu wa kekama. Noke wa enda konjo* yaye kuenda wa pinga oco vo nenele okulia kuenje wa lia. 21 Akuenje vaye vo pulisa vati: “Momo lie wa ci lingila? Osimbu omõla a kala lomuenyo wa likandangiya oku lia kuenda wa enda oku lila; pole, eci omõla a fa wa votoka kuenda wa lia.” 22 Eye wa tambulula hati: “Osimbu omõla a kala lomuenyo nda likandangiya oku lia+ kuenda nda enda oku lila, momo nda sima lutima wange siti: ‘Helie wa kũlĩha nda Yehova o ñuatela ohenda loku ecelela okuti omõla o kala lomuenyo?’+ 23 Omo okuti cilo wa fa, momo lie ndi likandangiyila oku lia? Ndi tẽla hẽ oku u pindula vali?+ Ndi ka likongela laye veyambo,+ pole, eye ka tiuka vali kokuange.”+

24 Kuenje Daviti wa lembeleka ukãi waye Batisieva.+ Daviti wa lipekela vali laye. Noke ukãi wo citila omõla umue kuenje vo luka hati, Salomone.*+ Yehova wo solele,+ 25 eye wa tuma uprofeto Natana+ oco omõla a tukuiwe hati, Yedediya,* omo lia Yehova.

26 Yoava wamamako oku yaka lo Raba+ ya va Amoni+ kuenda wa tambula olupale luosoma.+ 27 Noke Yoava wa tuma olomunga ku Daviti loku popia hati: “Nda yaka lo Raba+ kuenda nda tambula olupale luovava.* 28 Cilo ongolola asualali vakuavo, ñuali ocingonja olupale kuenda lu tambuli. Oco ame si ka lu tambule okuti, ndi tambula oluhimo luaco.”*

29 Kuenje Daviti wongolola asualali vosi, va enda oku ka liyaka lo Raba loku yi tambula. 30 Noke eye wopa ekolowa kutue wa Malikama.* Ekolowa liaco, lia kuatele ocilemo cotalendo* yimosi yulu lovawe a tĩla kuenje lia kapiwa kutue wa Daviti. Eye wa tikulavo ovina vialua via pundiwa+ volupale.+ 31 Kuenje eye wopa omanu va kalamo, wa va kapa koku linga upange woku songa ovawe, oku talavaya lovimalẽho viutale via tua, lolondiaviti viutale kuenda oku panga atisolo. Eci oco eye a linga lalupale osi a va Amoni. Noke Daviti lasualali vaye vosi va tiukila ko Yerusalãi.

13 Avisalome omõla a Daviti wa kuatele manjaye ukãi okuti, wa posokele calua, onduko yaye Tamare+ kuenda Aminone+ omõla a Daviti wo solele. 2 Aminone wa sumuile calua okuti co kokela uvei omo lia Tamare manjaye ukãi, momo eye wa kala ufeko wosombo kuenda ca kala ndu okuti Aminone ka ponduile oku u linga cimue. 3 Aminone wa kuatele ekamba limue li tukuiwa hati, Yehonadava+ omõla a Simeya+ manji a Daviti; kuenda Yehonadava wa lungukile calua. 4 Kuenje Yonadava wo pulisa hati: “Momo lie wa sumuila otembo yosi amõla a soma? Momo lie ku ndi sapuililako?” Aminone wo tambulula hati: “Ndi sole Tamare, manji+ a manjange Avisalome.” 5 Yehonadava wo kumbulula hati: “Pekela pula kuenda likembisa oku vela. Eci isiove eya oku ku nyula, u sapuila hati: ‘Mange ohenda, manjange Tamare eye oco a ndi neneleko okulia. Nda eye wa pongiya okulia kuomunu o vela* kovaso ange, ame ndi lia eci ci tunda peka liaye.’”

6 Kuenje Aminone wa pekela pula kuenda wa likembisa oku vela, noke soma weya oku u nyula. Aminone wa sapuila soma hati: “Mange ohenda, manjange Tamare eye oco a lingile kovaso ange olombolo vivali via setahãla utima kuenje ndi lia eci ci tunda peka liaye.” 7 Noke Daviti wa tuma omunga konjo ku Tamare loku popia hati: “Mange ohenda, kuende konjo ya manjove Aminone kuenda u pongiyilako okulia.”* 8 Tamare wa enda konjo ya manjaye Aminone, kuna eye a pekelele. Eye wa tikula osema wa yi tamẽla kovaso aye kuenda wa yoka olombolo. 9 Kuenje wa tikula ombia loku u sevelako. Pole, Aminone ka tavele oku lia kuenda wa popia hati: “Vosi va tunde kovaso ange!” Kuenje vosi va tunda kovaso aye.

10 Aminone wa sapuila Tamare hati: “Nena okulia* vohondo yange, oco ndi lie eci ci tunda peka liove.” Kuenje Tamare wa tikula olombolo via setahãla utima, vina eye a yokele kuenda wa vi nena vohondo ya manjaye Aminone. 11 Eci Tamare a vi nena kokuaye oco a lie, eye wo kuata loku u sapuila hati: “Enju, lipekela lame, a manjange.” 12 Pole, Tamare wo sapuila hati: “Sio a manjange! Ku ka ñutise osõi, eci ka ci lingaiwa ko Isareli.+ Ku ka linge evĩho eli.+ 13 Ndi yuvula ndati osõi yange? Ove o ka tendiwa ndulume umue wa vĩha ko Isareli. Mange ohenda, vangula la soma, momo eye ka ka likala oku ngeca kokuove.” 14 Pole, eye ka yonguile oku yevelela Tamare kuenje Aminone wo kuata kongusu, wo kutisa osõi poku u putula. 15 Noke Aminone wa fetika oku u suvuka calua kuenje esuvu liaco lia livokiya calua okuti ocisola o kuatelele ci sule. Aminone wo sapuila hati: “Katuka, kuende!” 16 Tamare wo sapuila hati: “Sio, a manjange, oku numa oku enda cilo, ca kãla okuti eci wa ndinga ci sule!” Pole, Aminone ka tavele oku u yevelela.

17 Noke Aminone wa vilikiya oñuatisi yaye hati: “Upa omunu u kovaso ange kuenda yikila epito konyima yaye.” 18 (Tamare wa walele ocikutu cimue cilikasi,* cina omãla va soma okuti, afeko vosombo va enda oku wala.) Kuenje oñuatisi yaye ya tundisa ufeko posamua kuenda ya yika epito konyima yaye. 19 Noke Tamare wa lisieketa etiko kutue,+ wa tola onepa yimue yocikutu a walele; kuenda wa kapa ovaka aye kutue osimbu a kala oku enda loku lila calua.

20 Manjaye Avisalome+ wo pulisa hati: “Manjove Aminone eye wa ku ci linga? A manjange ku ka sapuileko laumue. Eye manjove.+ Ku ka kape ocitangi eci kutima.” Kuenje Tamare wa kala likawaye konjo ya manjaye Avisalome. 21 Eci soma Daviti a yeva ovina viosi evi wa tema calua.+ Pole, ka yonguile oku sumuisa omõlaye Aminone, momo wo solele calua omo okuti, omõlaye uveli. 22 Avisalome ka popele lacimue ku Aminone ci kaile cĩvi ale ciwa;+ momo Avisalome wa suvukile Aminone omo a kutisa osõi manjaye Tamare.+

23 Noke lianyamo avali vakuakupemũla olomeme via Avisalome, va kala ko Baalehasore ocipepi lo Efarimi+ kuenje Avisalome wa laleka omãla vosi va soma okuti alume.+ 24 Avisalome wa molẽha ku soma kuenda wa popia hati: “Ukuenje wove o kasi oku pemũla olomeme viaye. Mange ohenda, soma lakuenje vaye va ende lame.” 25 Pole, soma wa sapuila Avisalome hati: “Sio, amõlange. Nda vosi yetu tua enda, tu kala ndocilemo kokuove.” Ndaño Avisalome wa lipilikile, soma ka tavele oku enda, pole, wo sumũlũisa. 26 Avisalome wa popia hati: “Nda ove ku endi, mange ohenda ecelela okuti, manjange Aminone enda letu.”+ Soma wo tambulula hati: “Momo lie eye a endela love?” 27 Pole, Avisalome wo lipilikila kuenje soma wa tuma Aminone lomãla vosi va soma oku enda laye.

28 Noke Avisalome wa handeleka oloñuatisi viaye hati: “Lavululi, eci utima wa Aminone u sanjuka omo liovinyu ndu sapuili siti: ‘Pondi Aminone!’ Kuenje vu sukila oku u ponda. Ko ka kuati usumba. Siti ame ñasi oku vu handeleki? Pami kuenda kuati utõi.” 29 Oloñuatisi via Avisalome via linga ku Aminone ndeci Avisalome a va handelekele; kuenje omãla vosi vakuavo va soma va votoka kuenda omunu lomunu wa londa komula yaye yu va tila. 30 Osimbu va kala vonjila, esapulo lia pitĩla ku Daviti liokuti: “Avisalome wa ponda omãla vosi va soma kuenda lomue wa puluka.” 31 Omo liovina evi, soma wa votoka kuenda wa tola uwalo waye loku limba posi kuenje akuenje vaye vosi va talama loku tolavo uwalo wavo.

32 Yehonadava+ omõla a Simeya+ manji a Daviti, wa popia hati: “A ñala yange ku ka sime okuti ovo va ponda omãla vosi va soma, momo Aminone eye lika wa fa.+ Avisalome eye wa tuma oku linga ovina viosi evi, eye wa yonguile oku ci linga+ tunde keteke Aminone a kutisa osõi manjaye+ Tamare.+ 33 Kaliye a ñala yange a soma ku ka sokolole* kondaka va ku sapuila yokuti: ‘Omãla vosi va soma va fa’; momo kua fa lika Aminone.”

34 Vokuenda kuotembo yaco, Avisalome wa tila.+ Noke ondavululi yimue yolupale ya limbuka okuti omanu valua va kala oku iyilila vonjila konyima yaye ocipepi lomunda. 35 Yehonadava+ wa sapuila soma hati: “Tala! Omãla va soma va tiuka. Ca pita muẽle ndeci ukuenje wove a popia.” 36 Eci a mala oku vangula, omãla va soma va iñila loku lila lolukandi; soma kumue lakuenje vaye vosi va lilavo calua. 37 Pole, Avisalome wa tila yu wa enda ku Talimai+ omõla a Amihudu soma yo Gesiuri. Daviti wa lila omõlaye oloneke vialua. 38 Noke Avisalome wa tila, wa enda ko Gesiuri+ wa kalako anyamo atatu.

39 Kuenje soma Daviti wa yonguile oku ka pasuisa Avisalome, momo eye ka sumuile* vali omo liolofa via Aminone.

14 Yoava omõla a Seruya+ wa limbuka okuti soma wa kuatelele ongeva Avisalome.+ 2 Kuenje Yoava wa tuma oku vilikiya ukãi umue wa lunguka calua ko Tekoa+ loku u sapuila hati: “Likembisa ndomunu umue o kasi koloneke vioku lila, wala uwalo woku lila kuenda ku ka lisiekete ulela.+ Kala ndukãi umue okuti o kasi oku lila otembo yalua omunu umue wa fa. 3 Noke kuende ku soma kuenda popia eci nda ku sapuila.” Kuenje Yoava wa kapa olondaka vomẽla waye.*

4 Ukãi wo ko Tekoa wa enda ku soma kuenda wa petamisa ocipala caye posi loku kekama kuenje wa popia hati: “A soma, ñuatise!” 5 Soma wo pula hati: “Ocitangi cipi o kuete?” Ukãi wa tambulula hati: “Ndicimbumba; ulume wange wa fa. 6 Upika wove ukãi o kuete omãla vavali valume kuenda ovo va liyakela vepia. Ka kua kaile laumue o va lemẽla, umue pokati kavo wa lemẽha ukuavo kuenje wa fa. 7 Kaliye ame ndupika wove ukãi, epata liosi lia ndi ñualelapo kuenje va popia vati: ‘Tu ĩhe una wa lemẽha manjaye oco tu u ponde omo liomuenyo wa manjaye una eye a ponda+ ndaño ci lomboloka oku ponda kapiñala kaco!’ Ovo va yongola oku ponda omõla umosi nda siala* laye ndeci omunu umue a ima ekala liondalu kuenda kulume wange ka ku siala onduko layimue pamue umue o puluka* kilu lieve.”

8 Soma wa sapuila ukãi hati: “Kuende konjo yove kuenda ndi handeleka oku tetulula ocitangi cove.” 9 Ukãi wo ko Tekoa wa sapuila soma hati: “A ñala yange a soma, ekandu li ndi wile kumue lonjo ya isiange, momo soma localo caye ka va kuete eko.” 10 Soma wo tambulula hati: “Nda umue wa vangula vali love, u nena kokuange kuenje eye lalimue eteke a ka ku sakalaisa vali.” 11 Pole, ukãi wa popia hati: “Mange ohenda a soma, ivaluka Yehova Suku yove, oco ukuakufetuluinya osonde+ ka ka nene eyambulo komõlange.” Soma wa popia hati: “Ndeci Yehova a kasi lomuenyo,+ ndaño esinga limosi liutue womõlove ka li lokila posi.” 12 Ukãi wa popia hati: “Ecelela okuti upika wove o vangula ondaka yimue ku ñala yange soma.” Omo liaco, soma wa popia hati: “Vangula!”

13 Ukãi wa popia hati: “Momo lie wa simĩla oku linga ovina evi komanu va Suku?+ Soma poku vangula ndoco, o kasi oku likapa eko eye muẽle, momo soma wa tundisa omõlaye muẽle kuenda ka ecelela okuti eye o tiuka vali.+ 14 Vosi yetu tu fa kuenda tu kala ndovava a pesiwila posi okuti, ka citava oku ongolola vali ovava aco. Pole, Suku kopi omuenyo womunu umue kuenda eye o sokiya cimue coku tiula omunu wa tundisiwa oco ka ka kaile ocipãla laye. 15 Ndeya oco ndi vangule olondaka evi ku ñala yange soma, momo nda kuatela usumba omanu. Omo liaco, upika wove wa sima hati: ‘Ndi vangula la soma. Pamue soma o ka tava kepingilo liupika waye. 16 Soma pamue o ka yeva loku popela upika waye peka lialume va sandiliya oku nepa kumue lomõlange kocipiñalo Suku a tu ĩha.’+ 17 Upika wove wa sokololavo ndoco: ‘Ondaka ya ñala yange soma yi ndi kavuluise,’ momo ñala yange soma o kasi ndungelo umue wa Suku yocili una o tẽla oku tepisa eci ciwa leci cĩvi. Yehova Suku yove a kale love.”

18 Soma wa sapuila ukãi hati: “Ku ka limbike lacimue kovina viosi ndu ku pula.” Ukãi wa popia hati: “A ñala yange a soma linga ohenda, citava oku pula.” 19 Soma wo pula hati: “Anga hẽ Yoava eye wa ku tuma oku vangula ovina viosi evi?”+ Ukãi wo tambulula hati: “Ndeci ove o kasi lomuenyo A ñala yange a soma, ndeci* soma a popia, ukuenje wove Yoava eye muẽle wa ndi tuma haeye wa kapa olondaka viosi evi vomẽla wupika wove. 20 Ukuenje wove Yoava wa ci lingila oco a pongolole ovina ndomo via kala, pole, ñala yange o kuete olondunge ndevi viungelo wa Suku yocili kuenda wa kũlĩha ovina viosi vi kasi oku pita vofeka.”

21 Soma wa sapuila Yoava hati: “Ciwa, ndi ci linga.+ Kuende, kope Avisalome enju laye.”+ 22 Kuenje Yoava wa petamisa ocipala caye posi loku kekama kuenje wa sivaya soma. Yoava hati: “Etaili ukuenje wove wa limbuka okuti wa sanga ohenda kovaso yove, A ñala yange a soma, momo soma wa tambulula epingilo liukuenje wove.” 23 Yoava wa votoka, wa enda ko Gesiuri+ kuenda wa nena Avisalome ko Yerusalãi. 24 Soma wa popia hati: “A tiuke konjo yaye muẽle, pole, eye ka ka mole ocipala cange.” Kuenje Avisalome wa tiukila konjo yaye kuenda ka muile ocipala ca soma.

25 Ko Isareli yosi ka kua kale omunu wa pandiyiwile calua omo lieposo liaye ndeci Avisalome. Oku upisa kolomãhi viaye toke kutue ka kuatele etondelo. 26 Eye wa enda oku teta esinga liutue waye okuti o liteta kesulilo lianyamo osi, momo lia lemẽle kokuaye, esinga liutue waye lia lemẽle 200 kolosiekele* ndomo ci likuata locilemo covawe usoma.* 27 Ku Avisalome kua citiwa omãla vatatu valume+ kuenda omõla umosi wufeko okuti onduko yaye Tamare. Eye wa kala ufeko umue wa posokele calua.

28 Avisalome wamamako oku kala vo Yerusalãi anyamo avali, pole, ka muile ocipala ca soma.+ 29 Avisalome wa vilikiya Yoava oco o tume ku soma, pole, Yoava keyile kokuaye. Eye wa tuma oku u vilikiya onjanja yavali kuenda ka tavele oku iya. 30 Noke Avisalome wa sapuila akuenje vaye hati: “Epia lia Yoava li kasi ocipepi lepia liange kuenda eye o kuete osevata vepia. Kuendi ka imbi ondalu vepia liaco.” Omo liaco, akuenje va Avisalome va imba ondalu vepia. 31 Noke Yoava wa votoka wa enda konjo ya Avisalome kuenda wo pula hati: “Momo lie akuenje vove va kapela ondalu vepia liange?” 32 Avisalome wa tambulula Yoava hati: “Tala! Nda tuma esapulo kokuove liokuti: ‘Enju, oco ndu ku tume ku soma oku pula hati: “Momo lie nda tundilila ko Gesiuri?+ Kokuange ca velapo nda sieyile kulo. Kaliye ecelela okuti ndi mola ocipala ca soma, nda ndi kuete eko, eye a ndi ponde.”’”

33 Omo liaco, Yoava wa enda toke ku soma kuenda wo lomboluilako. Kuenje soma wa kovonga Avisalome, eye weya ku soma wo kekamẽla loku petamisa ocipala caye posi kovaso a soma. Kuenje soma wa sipula Avisalome.+

15 Noke liovina viaco, Avisalome wa liangiliyila ekãlu lolokavalu kuenda 50 kalume oco vo pitile kovaso.+ 2 Avisalome wa enda oku pasuka selo loku talama konele yonjila pombundi yolupale.+ Eci omunu umue eya locitangi cimue coku tetulula kuenje enda ku soma oco a ci sombise,+ Avisalome wa enda oku u vilikiya loku popia hati: “Kolupale luove pi?” eye o popia hati: “Ukuenje wove wa tunda kocikoti cimue pokati kovikoti via Isareli.” 3 Avisalome wa enda oku u sapuila hati: “Tala, ondaka yove ya sunguluka haiyo yocili, pole, soma ka tumĩle laumue oco a yevelele ocitangi cove.” 4 Avisalome wa enda oku popia hati: “Hĩse nda nda nõliwile ndonganji yofeka! Kuenje wosi o kuete ocitangi cimue coku tetulula, ale coku sombisiwa, o pondola oku iya kokuange kuenje ame ndi ci kũlĩhĩsa oco a sange esunga.”

5 Eci omunu umue eya oku u kekamẽla, Avisalome olõla okuokuo kuaye, o kuata omunu waco kuenje u sipula.+ 6 Avisalome wa enda oku linga ovina viaco ku va Isareli vosi va enda oku iya ku soma oku sombisiwa; Avisalome wa enda oku tamba* ovitima via va Isareli.+

7 Kesulilo lianyamo akuãla,* Avisalome wa sapuila soma hati: “Mange ohenda, ecelela okuti ngeda ko Hevirone+ oku ka tẽlisa ohuminyo nda lingila Yehova. 8 Momo eci ukuenje wove a kala ko Gesiuri+ ko Suria, wa lingile ohuminyo+ yimue yokuti: ‘Nda Yehova wa ecelela okuti ndi tiukila ko Yerusalãi, ngeca ocilumba cimue ku* Yehova.’” 9 Soma wo sapuila hati: “Kuende lombembua.” Eye wa votoka wa enda ko Hevirone.

10 Avisalome wa tuma olondavululi kovikoti viosi via Isareli loku popia hati: “Eci vu yeva ocileñi combinga, popi hoti: ‘Avisalome wa linga osoma ko Hevirone!’”+ 11 Ci soka 200 kalume vo ko Yerusalãi va enda kumue la Avisalome; ovo va lalekiwa kuenda va kala vonumbi okuti, ka va kũlĩhĩle eci ca kala oku pita. 12 Avisalome noke yoku eca ovilumba, wa tuma oku upa Ahitofele+ u Gilo volupale luaye luo Gilo+ haeye ondunguli ya Daviti.+ Usuanji waco wa kala oku amamako kuenda etendelo liomanu va kala oku tiamẽla ku Avisalome lia kala oku livokiya.+

13 Noke va sapuila Daviti okuti: “Kaliye omanu vo ko Isareli va kasi konele ya Avisalome.” 14 Daviti wa sapuila akuenje vaye vosi va kala laye ko Yerusalãi hati: “Votoki, tu endi,+ momo lomue pokati ketu o ka puluka peka lia Avisalome! Lupuki, sanga eye o tu sanga lonjanga kuenda o tu linga cĩvi loku kundula olupale losipata!”+ 15 Akuenje va soma va kumbulula soma vati: “Cosi ñala yetu a nõlapo oku linga, akuenje vove va ka ci linga.”+ 16 Kuenje soma wa enda la vakuanjo yaye vosi, pole, soma wa sia akama ekũi+ oco va tate onjo.* 17 Soma wa linga ungende lomanu vosi va kala oku u kuama kuenda va talama ko Bete-Merake.

18 Akuenje vosi va enda laye* kumue la va Kereti, va Peleti+ kuenda va Giti+ okuti, va soka 600 komanu vana va tunda ko Gati+ haivo va pita kovaso ya soma osimbu soma a kala oku va kũlĩhĩsa.* 19 Kuenje soma wa sapuila Itai+ u Giti hati: “Momo lie endelavo letu? Tiukila, kala la soma yokaliye, momo ove wucingendeleyi haeve wumandekua ya tunda kofeka yikuavo. 20 Weyile hẽla, anga hẽ etaili ndu ku ecelela oku tungayala letu osimbu sia kũlĩhĩle oku ngenda? Tiukila, ambata vamanjove kuenda Yehova a ku lekise ocisola ka ci pongoloka kuenda ohenda ka yi pui!”+ 21 Itai wa tambulula soma hati: “Ndeci Yehova a kasi lomuenyo kuenda ndeci ñala yange soma a kasi lomuenyo, kuosi ñala yange soma a endela, ci kaile koku fa ale komuenyo, ukuenje wove o ka kalakovo!”+ 22 Daviti wa sapuila Itai+ hati: “Kuende, citava oku yoka.” Kuenje Itai u Giti wa yoka kumue lalume vosi va kala laye kuenda omãla.

23 Omanu vosi vofeka va kala oku lila lolukandi osimbu omanu vaco va kala oku yoka kuenda soma wa talama Kocimbota co Kedrone;+ omanu vosi va kala oku yoka oco va loñe vonjila yenda vekalasoko. 24 Sadoke+ opo a kalavo kumue la va Lewi vosi+ vambatele ocikasia+ covisila via Suku yocili;+ ovo va kapa posi Ocikasia ca Suku yocili; kuenda Aviyatare+ wa lamana osimbu omanu vosi va tunda volupale loku yoka ocimbota. 25 Soma wa sapuila Sadoke hati: “Ambata Ocikasia ca Suku yocili, ci tiuwiya volupale.+ Nda nda sanga ohenda kovaso a Yehova eye o ka ndi tiulavo kuenda o ka ecelela okuti ndi mola ocikasia locitumãlo caco.+ 26 Pole, nda eye o popia hati: ‘Sia ku sanjukilile,’ eye a linge lame eci ca sunguluka kovaso aye.” 27 Soma wa sapuila Sadoke ocitunda hati: “Ove siti ukuavinjonde?+ Tiukila volupale lombembua kuenda ambati omãla vene okuti, Ahimasi omõlove muẽle, la Yonatão+ omõla a Aviyatare. 28 Ndi talamẽla ponepa yoku yoka ekalasoko toke eci vu tuma ondaka yoku njimba onumbi.”+ 29 Kuenje Sadoke la Aviyatare vambata Ocikasia ca Suku yocili ko Yerusalãi kuenda oko va kala.

30 Osimbu Daviti a kala oku lamanela Komunda* yo Oliveira,+ eye wa kala oku lila osimbu a lamana; wa lisikĩlĩla kutue kuenda wa lula olohaku. Omanu vosi va kala laye va lisikĩlĩlavo kovitue kuenda va kala oku lila osimbu va lamanela komunda. 31 Noke Daviti vo sapuila hati: “Ahitofele o kasi pokati ka vana va linga usuanji+ la Avisalome.”+ Daviti wa popia hati: “A Yehova,+ mange ohenda, pongolola elungulo lia Ahitofele okuti li linga liuveke!”+

32 Eci Daviti a pitĩla kilu liomunda kuna omanu va enda oku kekamẽla Suku, Husiai+ u Ariki+ oko a kala oco a liñualẽhele laye locikutu caye ca toka kuenda kutue waye kua kala oneketela. 33 Daviti wo sapuila hati: “Nda wa enda lame, o kala ocilemo kokuange. 34 Pole, nda ove wa tiukila volupale loku sapuila Avisalome hati: ‘A Soma ndukuenje wove. Nda kala ukuenje wa isiove kosimbu, pole, cilo ndi linga ukuenje wove,’+ nda oco wa linga, o ñuatisa oku nyõla elungulo Ahitofele a sokiya oku linga.+ 35 Sadoke la Aviyatare okuti ovitunda siti va ka kala oko love? Sapuilako Sadoke la Aviyatare ovitunda ovina viosi o yeva konjo ya soma.+ 36 Tala! Ovo va kasi oko lomãla vavo vavali okuti, Ahimasi+ omõla a Sadoke kuenda Yonatão+ omõla a Aviyatare, ovina viosi o yeva vi sapuila kokuavo oco ndi vi kũlĩhe.” 37 Kuenje Husiai ekamba* lia Daviti,+ wa iñila volupale osimbu Avisalome a kala oku iñila vo Yerusalãi.

16 Eci Daviti a pitahãla naito omunda,+ Siva+ oñuatisi ya Mefivosiete+ oko a kala oco a lisange laye, wambata ovimbulu vivali viambatele 200 kolombolo, 100 kakende a pangiwa layuva, 100 kakende a pangiwa lapako akuavo* kuenda esanga linene liovinyu.+ 2 Soma wa pula Siva hati: “Momo lie wa nenela ovina evi?” Siva wa tambulula hati: “Ovimbulu vi linga via vakuanjo ya soma oco va linge lavio ungende, olombolo lapako vi eciwa kalume oco va lie kuenda ovinyu yeciwa ku vana va kava vekalasoko oco va nyue.”+ 3 Soma hati: “Omõla* wa cime cove o kasi pi?”+ Siva wa sapuila soma hati: “Eye wa siala ko Yerusalãi, momo wa popia hati: ‘Etaili onjo ya Isareli yi tiuwiya usoma wa isiange kokuange.’”+ 4 Soma wa sapuila Siva hati: “Tala! Ovina viosi via Mefivosiete cilo vi linga viove.”+ Siva wa popia hati: “Ndu ku kekamẽla. Pamue ndi sanga ohenda kovaso ove, a ñala yange a soma.”+

5 Eci Soma Daviti a pitĩla ko Baharumi, ulume umue ukuepata lionjo ya Saulu o tukuiwa hati, Simei+ omõla a Gera wa kala oku iya loku kaluka poku u siñala.+ 6 Eye wa kala oku imba ovawe ku Daviti, kakuenje vosi va Soma Daviti, lo komanu vosi kuenda kalume vosi va pamẽle va kala kondio yaye kuenda kepĩli liaye. 7 Simei osimbu a kala oku u siñala wa popia hati: “Tunda kulo, tunda kulo, ove o kuete eko liosonde! Wuveke! 8 Yehova o kasi oku ku nenela eko liosi liosonde yonjo ya Saulu pomangu yina ove wa viala ndosoma, pole, Yehova o kasi oku eca uviali peka liomõlove Avisalome. Kaliye ovitangi via ku wila, momo ove o kuete eko liosonde!”+

9 Avisiai omõla a Seruya+ wa sapuila soma hati: “Momo lie ombua ya fa+ ndeti yi siñalela ñala yange soma?+ Mange ohenda, ecelela okuti ngenda oco ndi tete utue waye.”+ 10 Pole, soma wa popia hati: “Nye ndi kuete lene, amãla va Seruya?+ Eceleli okuti eye o ndi siñala,+ momo Yehova wo sapuila hati:+ ‘Siñala Daviti!’ Helie o pondola oku u pula hati: ‘Momo lie eye a kasilili oku linga eci?’” 11 Daviti wa sapuila Avisiai lakuenje vaye vosi hati: “Nda omõlange una wa tunda vetimba liange muẽle o kasi oku sanda omuenyo wange,+ ca piãla enene u Benjamini!+ Eye a ndi siñale ño, momo Yehova eye wo ci tuma! 12 Pamue Yehova o mola ohali yange+ kuenda Yehova o lekisa ohenda kokuange okuti asiñalo a kasi oku imbiwa kokuange etaili haoko.”+ 13 Omo liaco, Daviti lalume vaye vamamako vonjila osimbu Simei a kala oku u kuama konele yomunda poku u siñala+ loku imba imba ovawe kuenda oneketela.

14 Noke soma lomanu vosi va kala laye va pitĩla pocitumãlo va kala oku enda, pole, va kavele calua kuenje va puyukapo.

15 Avisalome lalume vosi vo ko Isareli va pitĩla vo Yerusalãi kuenda Ahitofele+ wa kala laye. 16 Husiai+ u Ariki+ okuti ekamba* lia Daviti, eci a pitĩla ku Avisalome, Husiai wa sapuila Avisalome hati: “Soma a kale hũ lomuenyo!+ Soma a kale hũ lomuenyo!” 17 Avisalome wa pula Husiai hati: “Eci oco ocisola ka ci pongoloka o kuetele ekamba liove? Momo lie kua endelele lekamba liove?” 18 Husiai wa sapuila Avisalome hati: “Sio, si endi laye, momo ndi vumba una wa nõliwa la Yehova, lomanu ava kuenda lalume vosi vo ko Isareli. Ame ndi kala laye. 19 Ndi popia vali siti, helie ndi sesamẽla oku vumba? Siti ndi vumba omõlaye? Ndeci nda vumba isiove, haico ndi ku vumba.”+

20 Avisalome wa sapuila Ahitofele hati: “Nyĩhe elungulo liove.+ Nye tu linga?” 21 Ahitofele wa sapuila Avisalome hati: “Lipekela lakama va isiove+ vana eye a sia oco va tate onjo.*+ Kuenje eci va Isareli vosi va ka yeva eci wa linga loku sepula isiove, vana va tiamẽla kokuove va ka pamisiwa.” 22 Ovo va tungila Avisalome ombalaka yimue kolusoka+ luonjo kuenda Avisalome wa lipekela lakama va isiaye+ kovaso a va Isareli vosi.+

23 Koloneke viaco, elungulo Ahitofele+ a enda oku eca, lia tendiwile* ndondaka ya tunda ku Suku yocili. Daviti la Avisalome va sumbilile alungulo osi a Ahitofele.

17 Ahitofele wa sapuila Avisalome hati: “Mange ohenda ecelela okuti, ndi nõla 12.000 kalume oco tu landule Daviti vuteke wetaili. 2 Eci a kava okuti ka kuata vali ongusu*+ ndi liyaka laye, ndu lulumisa; kuenda omanu vosi va kasi laye va ka tila kuenje ndi ka ponda lika soma.+ 3 Noke ndi nena omanu vosi kokuove. Oco omanu vosi va tiuke, ca tamba lika kueci ci ka pita lomunu ove o kasi oku sanda. Kuenje omanu vosi va ka kala lombembua.” 4 Ondaka yaco ya sungulukile kovaso a Avisalome kuenda kakulu vosi vo ko Isareli.

5 Kuenje Avisalome wa popia hati: “Mangi ohenda, vilikiyi Husiai+ u Ariki kuenda tu yeveleli ocisimĩlo caye.” 6 Husiai weya ku Avisalome. Avisalome wo sapuila hati: “Eli olio elungulo Ahitofele a eca. Anga hẽ tu kuama elungulo liaye? Nda haicoko tu sapuileko.” 7 Noke Husiai wa sapuila Avisalome hati: “Onjanja eyi elungulo Ahitofele a eca ka lia sungulukile!”+

8 Husiai wamisako hati: “Ove wa kũlĩha ciwa okuti, isiove kuenda alume vaye va pama,+ haivo va tema* ndongue ya nyelisa omãla vaye vusenge.+ Handi vali, isiove ukuavita+ kuenda ka kala lomanu uteke wosi. 9 Eye cilo wa salama vocilala* cimue ale vocitumãlo cikuavo;+ kuenje nda eye wa va katukila tete, vana va ka ci yeva va ka popia vati: ‘Omanu va kala oku kuama Avisalome va yuliwa!’ 10 Ndaño ulume una o kuete utima ndohosi+ o ka kuata usumba, momo va Isareli vosi va kũlĩha okuti isiove ulume umue wa pama+ kuenda alume va kasi laye vakuotõi. 11 Elungulo liange lieli: Ongoluila kokuove va Isareli vosi oku upisa ko Dani toke ko Beresieva,+ ongolola valua ndeseke li kasi kohulo yokalunga+ kuenje va tuma kuyaki. 12 Etu tu ko katukila kuosi eye a sangiwa kuenda tu ka enda kokuaye ndowume u kupukila posi; okuti lomue o ka puluka, ci kaile alume vaye kuenda eye muẽle. 13 Nda eye o salama volupale lumue, va Isareli vosi va kambata ovikolo toke volupale luaco kuenje etu tu u kokela toke vocimbota okuti, ka ku supi ewe lalimue.”

14 Noke Avisalome kuenda alume vosi vo ko Isareli va popia vati: “Elungulo lia Husiai u Ariki lia velapo+ okuti, elungulo lia Ahitofele li sule!” Yehova wa sokiya* oku nyõla elungulo lia Ahitofele,+ Yehova wa ci lingila oco a nene eyambulo ku Avisalome.+

15 Husiai wa sapuila Sadoke la Aviyatare+ ovitunda hati: “Eli olio elungulo Ahitofele a eca ku Avisalome, lakulu vo Isareli kuenda eci oco ame nda popia. 16 Kaliye tumi lonjanga esapulo eli ku Daviti liokuti: ‘Ku ka pite uteke vekalasoko, yoka olui, sanga soma lomanu vosi va kasi laye va ka kunduiwa.’”*+

17 Yonatão+ la Ahimasi+ va kala oku kevelela ko Enrogeli;+ kuenje upika umue ukãi weya oku va nenela esapulo kuenda ovo va enda oku ka sapuilako Soma Daviti, momo ovo ka va yonguile okuti va muiwa oku iñila volupale. 18 Pole, ukuenje umue wa va mola kuenje wa ci sapuila Avisalome. Noke Yonatão la Ahimasi va tunda lonjanga kuenda va enda konjo yulume umue u Baharumi+ wa kuatele ocisimo cimue kocitali caye. Kuenje ovo va iñila vocisimo caco, 19 ukãi wulume waco wa kapa onuviko yimue kilu liocisimo caco kuenda wa nyãlehako olomema via sasiwa; kuenje lomue wa ci limbuka. 20 Akuenje va Avisalome va enda konjo yukãi kuenda vo pula vati: “Ahimasi la Yonatão va kasi pi?” Ukãi wa tambulula hati: “Ovo va endela konele yolui.”+ Alume va va sandiliya, pole, ka va va sangele kuenje va tiukila ko Yerusalãi.

21 Eci alume va enda, ovo va tunda vocisimo kuenda va enda oku ka sapuilako Soma Daviti. Vo sapuila vati: “Votoki lonjanga, yoki olui, momo eli olio elungulo Ahitofele a eca lioku vu katukili.”+ 22 Lonjanga yalua Daviti lomanu vosi va kala laye va votoka, yu va yoka o Yordão. Komẽle ka kua sialele omunu ka yokele o Yordão.

23 Eci Ahitofele a limbuka okuti elungulo liaye ka lia kapiwileko, wa pongiya ocimbulu, wa enda konjo yaye volupale luaye.+ Noke lioku eca olonumbi ku vakuanjo yaye+ wa li leka ekõle.*+ Eye wa fa kuenda wa kendiwa kocitumãlo kua kendiwa vakukululu yaye.

24 Noke Daviti wa enda ko Mahanayimi+ kuenje Avisalome wa yoka o Yordão lalume vosi vo Isareli. 25 Avisalome wa tuma Amasa+ oco a kale usongui wasualali pomangu ya Yoava;+ Amasa wa kala omõla wulume umue u Isareli o tukuiwa hati, Itira una wa lipekelele la Avigaile+ omõla ukãi wa Nahase mukãi wa Seruya okuti ina ya Yoava. 26 Avisalome lalume vo Isareli va tunga ocilombo kofeka yo Gileada.+

27 Eci Daviti a pitĩla ko Mahanayimi, Siovi omõla a Nahase wo ko Raba+ ya va Amoni, la Makiri+ omõla a Amiyele wo ko Lodevare kuenda Barisilai+ u Gileada wo ko Rogelimi, 28 va nena olohama, olombasiya, olombia viotuma, otiliku, osevata, osema, olomema via kangiwa, ocipoke, akunde kuenda olombuto via kangiwa, 29 owiki, ongundi, olomeme kuenda oheyo yasenjele olongombe. Ovo va nena ovina viosi evi ku Daviti kuenda komanu va kala laye oco va lie,+ momo ovo vati: “Omanu va kasi lonjala, va kava kuenda va kasi lenyona vekalasoko.”+

18 Noke Daviti wa tenda alume va kala laye kuenda wa va nõlelako asongui vohulukãi, lasongui vocita.+ 2 Daviti wa tuma alume va kala laye vovimunga vitatu, ocimunga catete ca songuiwa* la Yoava,+ ocimunga cavali ca songuiwa la Avisiai+ manji a Yoava omõla a Seruya+ kuenda ocimunga catatu ca songuiwa la Itai+ u Giti. Soma wa sapuila alume vaco hati: “Lamevo ngenda lene.” 3 Pole, ovo vati: “Ka citava okuti ove wenda letu,+ momo nda tua tila, ovo ka va ka sakalala* letu; kuenda nda vamue pokati ketu va fa, ovo ka va ka sakalalavo letu, momo ove wa lisoka 10.000 komanu vetu.+ Omo liaco, ca sunguluka nda ove o kala mulo volupale loku tu tumisa ño ekuatiso.” 4 Soma wa va sapuila hati: “Ndi linga eci co sungulukili.” Kuenje soma wa talama ocipepi lombundi yolupale kuenda alume vosi va enda vovimunga viocita lovimunga viohulukãi. 5 Soma wa handeleka Yoava la Avisiai kuenda Itai hati: “Ko ka pondi Avisalome, momo omõlange wa soliwa.”+ Alume vosi va yeva eci soma a eca ocihandeleko caco kasongui vosi catiamẽla ku Avisalome.

6 Alume va tunda, va enda vusenge oku ka liyaka la Isareli kuenda uyaki waco wa lingiwa vusenge wo ko Efarimi.+ 7 Omanu va Isareli+ oko va yuliwila lakuenje va Daviti+ kuenda keteke liaco kua fa 20.000 kalume. 8 Uyaki wa lisanduila kovaimbo osi. Kuenje keteke liaco, usenge wa ponda omanu valua okuti, ava va pondiwa losipata ci sule.

9 Eci Avisalome a kala oku endela komula, wa liñualẽhela lakuenje va Daviti. Osimbu Avisalome a kala oku endela komula, omula ya pita vemẽhi liovianja viuti umue unene kuenje utue wa Avisalome wa saka vovianja viuti waco unene, noke opo a saka* osimbu omula ya enda likaliayo. 10 Noke ulume umue wa ci mola kuenje wa sapuila Yoava+ hati: “Tala! Nda mola Avisalome okuti wa sakela vuti umue unene.” 11 Yoava wa tambulula ulume waco hati: “Nda ove wo mola, momo lie kuo pondelele vocitumãlo caco? Nda wa ci lingile, nda nda ku ĩha ekũi kolopalata kuenda uvia umue.” 12 Ulume wa sapuila Yoava hati: “Ndaño va nyĩhile* 1.000 kolopalata nda sia katuile eka liange oco ndi ponde omõla a soma, momo tua yeva eci soma a vu handeleki kumue la Avisiai kuenda Itai hati: ‘Lomue ka ka ponde Avisalome.’+ 13 Nda sia pokuile kuenda nda ndo pondele, eci nda ca yeviwa ku soma kuenje ove nda kua ndi teyuilile.” 14 Yoava wa popia hati: “Si pesela vali otembo love!” Kuenje wa tikula olonjelia* vitatu kuenda wa vi asa kutima wa Avisalome osimbu handi a kala lomuenyo pokati kuti unene. 15 Noke alume ekũi vakuakuambata ovimalẽho viuyaki via Yoava veya, yu va veta Avisalome toke eci a fa.+ 16 Yoava wa sika ombinga kuenda alume va tiuka koku landula va Isareli; momo Yoava wa va tuma oku liwekapo. 17 Ovo va tikula Avisalome, vo wimba vocitunu cimue cinene vusenge kuenda kilu liaco va kapako ovawe anene.+ Kuenje va Isareli vosi va tilila kolonjo viavo.

18 Avisalome osimbu a kala lomuenyo wa litungila ongunji yimue Kocimbota* ca Soma,+ momo wa popele hati: “Si kuete omõla ulume oco onduko yange yamameko oku ivalukiwa.”+ Omo liaco, eye wa tukula ongunji yaco londuko yaye kuenje yi tukuiwa okuti, Ongunji ya Avisalome toke etaili.

19 Ahimasi+ omõla a Sadoke wa popia hati: “Mange ohenda, linga ndi lupuke oco ngambate esapulo ku soma, momo Yehova wo popela povaka ovanyãli vaye.”+ 20 Pole, Yoava wo sapuila hati: “Etaili ku ambata esapulo lalimue. O ka ambata esapulo keteke likuavo, pole, etaili ku ambata esapulo lalimue, momo omõla a soma wa fa.”+ 21 Noke Yoava wa sapuila ulume umue u Kusi+ hati: “Kuende, sapuilako soma eci wa mola.” Ulume u Kusi wa petamẽla Yoava kuenje wa enda lolupesi. 22 Ahimasi omõla a Sadoke wa sapuila vali Yoava hati: “Ndaño ku iya cimue, mange ohenda ecelela okuti ndi lupukila konyima yulume u Kusi.” Pole, Yoava wa popia hati: “Amõlange, momo lie o lupukila nda ka kuli esapulo lalimue o ka eca?” 23 Ahimasi wa lipilika hati: “Ndaño ku iya cimue, ecelela okuti ngenda.” Kuenje Yoava wo sapuila hati: “Lupuka!” Ahimasi wa lupukila vonjila yenda kocivanja co Yordão kuenda wa pitahãla ulume u Kusi.

24 Daviti wa tumãlele pokati kolombundi vivali violupale+ kuenda ondavululi+ ya londa kolusoka luombundi ocipepi locimbaka. Eci ya petula ovaso, ya mola ulume umue wa kala oku lupuka lika waye. 25 Ondavululi ya kaluka lolukandi, loku sapuilako soma. Soma wa popia hati: “Nda eye o kasi lika waye oco o kuete esapulo limue.” Osimbu ulume a kala oku amela ocipepi, 26 ondavululi ya mola ulume ukuavo wa kala oku lupuka. Kuenje ondavululi ya kalukila ukuambundi hati: “Tala! Ulume ukuavo o kasi oku lupuka lika waye!” Soma hati: “Ukuavo o kasi oku nenavo esapulo limue.” 27 Ondavululi yiti: “Ndi lete okuti ulume watete o kasi oku lupuka nda Ahimasi+ omõla a Sadoke,” soma wa popia hati: “Eye ulume umue uwa kuenda o kasi oku nena esapulo liwa.” 28 Ahimasi wa sapuila soma lolukandi hati: “Ñuete esapulo liwa!” Kuenje wa petamisa ocipala caye posi loku kekamẽla soma. Noke eye wa popia hati: “Yehova Suku yove a sivayiwe, una wa eca peka liove alume va katukila* ñala yange soma!”+

29 Soma wa pula hati: “Omõlange Avisalome o kasi ciwa?” Ahimasi wa tambulula hati: “Nda mola ema linene eci Yoava a tuma ukuenje wa soma kuenda ukuenje waye, pole, sia kũlĩhĩle eci ca kala oku pita.”+ 30 Soma hati: “Kala ponele, talamẽla.” Eye wa kala ponele oku talamẽla.

31 Ulume u Kusi wa pitĩla+ kuenda wa popia hati: “Nda nena esapulo eli ku ñala yange soma liokuti: Etaili, Yehova wa ku popela povaka omanu vosi va ku katukila.”+ 32 Pole, soma wa pula ulume u Kusi hati: “Omõlange Avisalome o kasi ciwa?” Ulume u Kusi hati: “Ovanyãli vosi va ñala yange soma kuenda vosi va ku katukila oco va ku lemẽhe, va kale ndeci umalẽhe a kasi cilo!”+

33 Eci ca sumuisa soma kuenda eye wa londa vohondo yo kilu ya kala kilu liombundi kuenje wa kala oku lila osimbu a kala oku enda loku popia hati: “Amõlange Avisalome, amõlange, amõlange Avisalome! Nda nda file ño ame okuti, ove haveko, Avisalome amõlange, amõlange!”+

19 Yoava vo sapuila hati: “Soma o kasi oku lila loku lisiõsiõla omo lia Avisalome.”+ 2 Keteke liaco, eyulo* lia pongoloka esumuo komanu vosi, momo va yeva okuti soma wa kala oku lila calua omõlaye. 3 Omanu keteke liaco, va iñila volupale+ loku likupaka ndomanu va tila kuyaki losõi. 4 Soma wa sikĩlĩla ocipala caye kuenda wamamako oku lila lolukandi hati: “Amõlange Avisalome! Avisalome amõlange, amõlange!”+

5 Kuenje Yoava wa iñila vonjo ya soma loku popia hati: “Etaili wa kutisa osõi akuenje vove vosi vana va popela omuenyo wove, omuenyo womãla vove valume,+ womãla vove vakãi,+ wakãi vove kuenda wakama vove.+ 6 Ove o sole vana va ku suvuka kuenda wa suvuka vana va ku sole, etaili wa lekisa okuti asongui lakuenje vove ka va kuete esilivilo kovaso ove, momo nda limbuka okuti, nda Avisalome wa kalele lomuenyo etaili kuenda etu nda tua file, ovina viosi nda via kala ciwa kokuove. 7 Kaliye votoka, kuende ka kolise* akuenje vove, momo ndi lisila vonduko ya Yehova okuti nda kua ci lingile, vuteke ulo lomue o kala love. Ũvi waco kokuove u ka piãla vali enene okuti, ũvi wosi wa kala lawo tunde vutila wove toke cilo u sule.” 8 Kuenje soma wa votoka wa tumãla pombundi yolupale kuenda va sapuila omanu vosi hati: “Soma o kasi pombundi.” Omanu vosi va molẽha ku soma.

Pole, va Isareli va tilile ale omunu lomunu konjo yaye.+ 9 Omanu vosi vovikoti viosi via va Isareli va kala oku lihoya poku popia vati: “Soma wa tu popela peka liovanyãli vetu+ kuenda wa tu yovola peka lia va Filisiti; pole, wa siapo ofeka omo lia Avisalome.+ 10 Avisalome una tua wavekele+ oco a linge soma yetu wa fila kuyaki.+ Kaliye momo lie ka vu lingili cimue oco soma a tiuke?”

11 Soma Daviti wa tuma esapulo ku Sadoke+ kuenda ku Aviyatare+ ovitunda liokuti: “Sapuili akulu vo ko Yuda+ okuti, ‘Momo lie wa ciluili oku kuatisa soma oco a tiuke konjo yaye nda ondaka yo Isareli yosi ya pitĩla ale ku soma konjo yaye? 12 Ene vu vamanjange; tusonde yimuamue.* Momo lie ene wa ciluili oku kuatisa soma oco a tiuke?’ 13 Sapuili Amasa+ okuti: ‘Ove hẽ kukepa liangeko kuenda kusitu yangeko? Suku a ndi kangise loku vokiyako nda ove oku upisa cilo ku lingi usongui wolohoka viange pomangu ya Yoava.’”+

14 Kuenje soma Daviti wa yula* ovitima vialume vosi vo ko Yuda kuenda ovo va tuma esapulo ku soma liokuti: “Tiuka ove kumue lakuenje vove vosi.”

15 Soma wa tiuka kuenje wa pitĩla ko Yordão kuenda alume vo ko Yuda veya ko Giligali+ oco va lisange la soma loku u yokisa o Yordão. 16 Simei+ omõla a Gera u Benjamini wo ko Baharumi, wa enda lonjanga lalume vo ko Yuda oco va ka lisange la Soma Daviti, 17 wa kala leci ci soka 1.000 kalume vo ko Benjamini. Siva+ oñuatisi yonjo ya Saulu, lomãla vaye va soka 15 kuenda 20 kakuenje, va endavo lonjanga ko Yordão osimbu soma ka pitĩlileko. 18 Eye* wa yoka olui oco a nene vakuanjo ya soma kuenda oku linga ovina viosi soma a yongola. Pole, Simei omõla a Gera wa kekamẽla kovaso a soma osimbu soma a panda oku yoka o Yordão. 19 Eye wa sapuila soma hati: “Ñala yange ka ka ndi tende ndu okuti ñuete ekandu kuenda ku ka kapeko ovina vĩvi ukuenje wove a ku lingila+ keteke ñala yange soma a tunda ko Yerusalãi. Soma ka ka kape ovina viaco vutima, 20 momo upika wove wa limbuka okuti wa lueya; konjo yosi ya Yosefe etaili ame tete nda tunda oku ka lisanga la ñala yange soma.”

21 Kuenje Avisiai+ omõla a Seruya+ wa popia hati: “Siti Simei o sesamẽla oku fa, omo a siñalele ombuavekua ya Yehova?”+ 22 Pole, Daviti wa pula hati: “Ndo lingi nye, ene amãla va Seruya+ oco vu ndi katukili etaili? Anga etaili kuli umue o sesamẽla oku pondiwa ko Isareli? Siti nda kũlĩha okuti etaili nda linga vali soma yo Isareli?” 23 Soma wa sapuila Simei hati: “Ku fi.” Kuenje soma wa lisila laye.+

24 Mefivosiete+ onekulu ya Saulu, weyavo oco a lisange la soma. Tunde keteke soma a enda toke keteke soma a tiuka lombembua, eye ka sukuile olomãhi viaye, ndaño oku pemũla olonjele pamue oku sukula uwalo waye. 25 Eci Mefivosiete a pitĩla ko* Yerusalãi oco a lisange la soma, soma wo pula hati: “A Mefivosiete momo lie kua endelele lame?” 26 Eye wa tambulula hati: “A ñala yange a soma, ukuenje wange+ wa ñembele. Nda sapuila ukuenje wange siti: ‘Pongiya ocimbulu cange oco ndi londeko ngende la soma,’ momo upika wove ocilema.+ 27 Pole, eye wa kemba ukuenje wove kovaso a ñala yange soma.+ Kuenje ñala yange soma, o kasi ndungelo umue wa Suku yocili, omo liaco linga eci ca ku sungulukila. 28 Vosi vakuanjo ya isiange va sesamẽlele oku pondiwa la ñala yange soma, pole, ove wa nõla ukuenje wove oco a kale pokati ka vana va lia komesa yove.+ Omoko yipi ñuete oco ndi pinge vali cimue ku soma?”

29 Soma wo sapuila hati: “Momo lie o vanguila vali ovina evi? Nda nõlapo okuti ove la Siva vu litepela epia limuamue.”+ 30 Mefivosiete wa sapuila soma hati: “Eye a kale ño lovina viosi, momo ñala yange soma wa tiuka konjo lombembua.”

31 Barisilai+ u Gileada wa tunda ko Rogelimi wa enda ko Yordão oco a sindikile soma ko Yordão. 32 Barisilai wa kukile calua, wa kuata 80 kanyamo kuenda eye wa enda oku eca okulia ku soma osimbu eye a kala ko Mahanayimi,+ momo eye wa kala ulume umue ohuasi. 33 Kuenje soma wa sapuila Barisilai hati: “Tuende lame kuenda ndi ka ku ĩha okulia ko Yerusalãi.”+ 34 Pole, Barisilai wa sapuila soma hati: “Komuenyo wange kua ñambela oloneke* viñami oco ngende la soma ko Yerusalãi? 35 Etaili ñuete ale 80 kanyamo.+ Anga hẽ ndi tẽla oku tepisa pokati keci ciwa leci cĩvi? Ukenje wove o tẽla hẽ oku limbuka oku pepa kueci a lia leci a nyua? Ndi tẽla hẽ oku yevelela ondaka yonjimbi yukãi lonjimbi yulume?+ Momo lie ukuenje wove a kalela ocilemo cikuavo ku ñala yange soma? 36 Kokuange esumũlũho linene oku sindikila soma ko Yordão. Momo lie soma a yonguila oku niuwila lonima eyi? 37 Mange ohenda, ecelela okuti ukuenje wove o tiukila oco a file volupale luaye muẽle ocipepi leyambo lia isiange la ina yange.+ Pole, ukuenje wove Kimihama yu.+ Eye a ende la ñala yange soma kuenda linga laye eci ca ku sungulukila.”

38 Soma wa popia hati: “Kimihama enda lame kuenda ndi linga laye eci ca ndi sungulukila; cosi ove o ndi pinga ame ndi ku ci lingila.” 39 Omanu vosi va fetika oku yoka o Yordão kuenda eci soma a yoka, soma wa sipula Barisilai+ loku u sumũlũisa; kuenje Barisilai wa tiukila konjo. 40 Eci soma a yoka wa enda ko Giligali,+ Kimihama wa yoka laye. Omanu vosi vo ko Yuda lonepa yomanu vo ko Isareli va sindikila soma oku yoka.+

41 Alume vosi vo Isareli vamela ku soma loku u pula vati: “Momo lie vamanjetu alume vo ko Yuda va ka ku pilile vuyombeki loku nena soma la vakuanjo yaye oku pita ko Yordão lalume vosi va Daviti?”+ 42 Alume vosi vo ko Yuda va tambulula alume vo Isareli vati: “Tua ci lingila omo soma ukuepata lietu.+ Momo lie wa temẽli? Anga hẽ tua lia cimue kukuasi wa soma, ale eye wa tu ĩha ombanjaile yimue?”

43 Alume vo ko Isareli va tambulula alume vo ko Yuda vati: “Ku soma tu kueteko olonepa ekũi, omo liaco, tu kuete onepa yalua ku Daviti okuti ene ci sule. Momo lie wa tu sepuili? Siti nda etu tua nena tete soma yetu?” Pole, ondaka yalume vo ko Yuda oyo ya taviwa* okuti yalume vo Isareli hayoko.

20 Kua kala ulume umue ukuambuanja okuti, onduko yaye Sieva+ omõla a Bikiri haeye u Benjamini. Eye wa sika ombinga+ loku popia hati: “Ka tu kuete onepa layimue ku Daviti ndaño ocipiñalo komõla a Jese.+ A Isareli, omunu lomunu a tiukile kolosuku* viaye!”+ 2 Noke alume vosi vo ko Isareli va liwekapo oku kuama Daviti, va fetika oku kuama Sieva omõla a Bikiri;+ pole, alume vosi vo ko Yuda vamamako oku kala la soma yavo tunde ko Yordão toke ko Yerusalãi.+

3 Eci Daviti a pitĩla konjo* yaye ko Yerusalãi,+ soma wa tikula akama vaye ekũi vana eye a sile oco va tate onjo+ kuenda wa va kapa konjo yimue lolondavululi. Eye wa va angiliyilako okulia, pole, ka lipekelele lavo.+ Ovo vamamako oku kala konjo yaco loku lavuluiwa toke keteke liolofa viavo kuenda va kala ndakãi ovimbumba ndaño ulume wavo wa kala lomuenyo.

4 Soma wa sapuila Amasa+ hati: “Kovonga alume vo ko Yuda oco veye kokuange, ci linga voloneke vitatu kuenda ove o sukila oku kalapovo.” 5 Amasa wa enda oku ka kovonga va Yuda, pole, ka tiukile votembo vo handelekele. 6 Daviti wa sapuila Avisiai+ hati: “Sieva+ omõla a Bikiri o ka tu nenela ovitangi vialua okuti Avisalome ci sule.+ Tikula akuenje va ñala yove, u landuli oco ka ka sange alupale a pama kuenje o tu tila.” 7 Alume va Yoava,+ va Kereti, va Peleti+ kuenda alume vosi va pama va enda koku u landula; ovo va tunda ko Yerusalãi oco va landule Sieva omõla a Bikiri. 8 Eci ovo va kala ocipepi lewe linene lio ko Giveone,+ Amasa+ weya oco a lisange lavo. Yoava wa walele uwalo waye wusualali kuenda wa kuatele osipata vocilalo cayo. Eci eye amela ku Amasa, eye wa ecelela okuti osipata yaye yi kupukila posi.

9 Yoava wa sapuila Amasa hati: “Amanjange o kasi ciwa?” Yoava wa kuata kolonjele via Amasa leka liaye liondio ndu okuti, o kasi loku u sipula. 10 Amasa ka lavuluile osipata ya kala peka lia Yoava kuenje Yoava wo toma layo vimo+ kuenda ovãla a lokila posi. Eye ka sukilile oku u toma onjanja yikuavo; wa ci linga lika onjanja yimosi oco o ponde. Noke Yoava la manjaye Avisiai va landula Sieva omõla a Bikiri.

11 Umue pokati kakuenje va Yoava wa talama ocipepi locivimbi caco loku popia hati: “Wosi o kasi konele ya Yoava loku kuatisa Daviti, a kuame Yoava!” 12 Amasa wa kupukila vosonde yaye muẽle vokati konjila. Eci ulume waco a limbuka okuti omanu vosi va kala oku talama, eye wa tikula etimba lia Amasa vonjila, wa li ambata kepia. Noke wo sikĩlĩla luwalo umue, momo eye wa mola okuti omanu vosi va kala oku talama eci va amela kokuaye. 13 Noke yoku upa etimba vonjila, alume vosi va kuama Yoava koku landula Sieva+ omõla a Bikiri.

14 Sieva wa pita kovikoti viosi via Isareli toke ko Abele yo ko Betemaka.+ Va Bikiri va liongoluila pamosi kuenda vo kuama eci a iñila volupale.

15 Yoava lalume* vaye veya kuenda vo ñuala ocingonja ko Abele yo Betemaka kuenda va lundikila imbo elundu, oku lepa kualio kua lisoka locimbaka cavali ca ñuala imbo. Kuenje alume vosi va kala la Yoava va fẽla vemẽhi liocimbaka oco ci nyõliwe. 16 Ukãi umue ukualondunge wa kalukila volupale hati: “Ene alume yeveleli, yeveleli! Mangi ohenda, sapuili Yoava oco eye kulo, njongola oku sapela laye.” 17 Eye wa enda konele yukãi kuenda ukãi wo pula hati: “Anga hẽ ove Yoava?” Eye wa kumbulula hati: “Ame.” Ukãi wo sapuila hati: “Yevelela kolondaka viupika wove.” Eye hati: “Ñasi oku yevelela.” 18 Ukãi wamisako hati: “Kosimbu va enda oku popia hati: ‘Pingi alungulo ko Abele kuenje ocitangi ci potoluiwa.’ 19 Ame ndi numiwa ya vakuambembua la vakuekolelo vo Isareli. Ove o yongola oku nyõla olupale lua velapo luo Isareli. Momo lie o yonguila oku nyõla* ocipiñalo ca Yehova?”+ 20 Yoava wa tambulula hati: “Lalimue eteke ndi ka lu nyõla loku lu kundula. 21 Eci haciliko. Ulume umue o tukuiwa hati, Sieva+ omõla a Bikiri kovaimbo a kasi kolomunda via Efarimi+ wa katukila* Soma Daviti. Nda wa nyĩhi ulume u, ndi tunda volupale.” Ukãi wa sapuila Yoava hati: “Tala! Utue waye wimbiwa kokuove kilu liocimbaka!”

22 Vepuluvi liaco, ukãi ukualondunge wa enda kuenda wa ka sapela lomanu vosi kuenda ovo va teta utue wa Sieva omõla a Bikiri kuenje va wimba ku Yoava. Eye wa sika ombinga kuenda ovo va tunda volupale omunu lomunu wa enda konjo yaye;+ kuenda Yoava wa tiukila ko Yerusalãi ku soma.

23 Yoava wa kala kesongo kovita viosi vio Isareli;+ Benaya+ omõla a Yehoyada+ wa kala usongui wa va Kereti, la va Peleti.+ 24 Adorama+ wa kala oku songuila vana va kisikiwile oku talavayela soma; Yehosafata+ omõla a Ahilude wa kala ulomboluili. 25 Sieve wa kala usonehi; Sadoke+ la Aviyatare+ va kala ovitunda. 26 Ira u Yairi wa lingavo usongui umue ukuakuvumba* wa Daviti.

21 Koloneke via Daviti kua kala onjala+ vokuenda kuanyamo atatu kuenje Daviti wa likutilila ku Yehova noke Yehova wa popia hati: “Saulu kuenda onjo yaye va kuete eko liosonde, momo eye wa ponda va Giveone.”+ 2 Soma wa kovonga va Giveone+ kuenda wa sapela lavo. (Va Giveone ka va kaile va Isareli, pole, va kala ocisupe cimue ca va Amori+ kuenda va Isareli va lisilile oku va supisapo,+ pole, Saulu wa yonguile oku va ponda omo liombili a kuatela omanu vaye va Isareli kuenda va Yuda.) 3 Daviti wa pula va Giveone hati: “Ovina vipi ndu ku lingili loku tuvika akandu ene oco vu sumũlũisi ocipiñalo ca Yehova?” 4 Va Giveone vo tambulula vati: “Ocitangi tu kuete la Saulu kuenda vakuanjo yaye ka ca tiamẽlele kolopalata, pamue kulu;+ kuenda ka tu pondi laumue ko Isareli.” Eye wa popia hati: “Ndi linga cosi wa popi.” 5 Ovo va sapuila soma vati: “Ulume una wa seteka oku tu ponda haeye wa yonguile oku tu kundula kocikanjo cosi co Isareli,+ 6 omãla vaye epanduvali va eciwe kokuetu. Tu pateka ovivimbi viavo*+ kovaso a Yehova ko Givea+ olupale lua Saulu una wa nõliwile la Yehova.”+ Soma wa popia hati: “Ndi va eca kokuene.”

7 Soma wa lekisa ohenda ku Mefivosiete+ omõla a Yonatão omõla a Saulu, omo liohuminyo Daviti la Yonatão+ omõla a Saulu va lingile kovaso a Yehova. 8 Kuenje soma wongolola Amoni la Mefivosiete omãla vavali va Risipa,+ omõla ukãi wa Aya, vana a cita la Saulu, kumue lomãla vatãlo va Mikale*+ omõla ukãi wa Saulu, vana a cita la Adriyele+ omõla ulume wa Barisilai u Maholati. 9 Wa va eca peka lia va Giveone kuenda ovo va pateka ovivimbi viavo komunda kovaso a Yehova.+ Vosi yavo epanduvali va fila kumuamue; ovo va pondiwa koloneke viatete vioku ungula kefetikilo lioku ungula osevata. 10 Noke Risipa+ omõla ukãi wa Aya, wa tikula ocikelẽyi, wa ci yalela kilu liewe tunde kefetikilo lioku ungula toke eci ombela yeya ya lokila kovivimbi viaco; eye ka ecelele okuti olonjila vio kovailu vi vatako vokuenda kutanya, pamue ovinyama viovusenge vi amelako luteke.

11 Va sapuilako Daviti eci Risipa ukama wa Saulu omõla ukãi wa Aya a linga. 12 Noke Daviti wa tambula akepa a Saulu lakepa omõlaye Yonatão peka liasongui* a va Yavesi-Gileada,+ vana va nyanele ovivimbi viaco vokololo yo ko Betesani kuna va Filisiti va va patekele keteke va Filisiti va ponda Saulu ko Giliboa.+ 13 Eye wa nena akepa a Saulu lakepa omõlaye Yonatão kuenda vongololavo akepa valume vana va pondiwile.*+ 14 Ovo va kenda akepa a Saulu lakepa omõlaye Yonatão vepia lia Benjamini ko Siela+ veyambo lia isiaye Kisi.+ Noke yoku linga ovina viosi soma a va handelekele, Suku wa yevelela apingilo avo atiamẽla kofeka.+

15 Pokati ka va Filisiti lo Isareli pa kala vali uyaki.+ Kuenje Daviti lakuenje vaye, va lokilako kuenda va liyaka la va Filisiti, pole, Daviti wa kavele calua. 16 Ulume umue okuti, ukuacitumbulukila ca va Refayimi+ o tukuiwa hati, Isivivenove okuti, unga waye wa lemẽle 300 kolosiekele viopalata,*+ wa limalẽhele losipata yokaliye kuenda wa yonguile oku ponda Daviti. 17 Pole, Avisiai+ omõla a Seruya weya oku u kuatisa+ kuenda wa veta u Filisiti kuenje wo ponda. Vepuluvi liaco, alume va Daviti va lisila laye vati: “Lalimue eteke o ka tunda vali letu oku enda kuyaki!+ Oco ku ka ime ondiyelo yo Isareli!”+

18 Noke liovina viaco, uyaki wa fetika vali pokati ka va Isareli la va Filisiti+ ko Govi. Vokuenda kuotembo yaco, Sibekai+ u Husiati wa ponda Safi, una wa kala ocitumbulukila ca Refayimi.+

19 Kueya vali uyaki la va Filisiti+ ko Govi kuenda Elihanana omõla a Yare-Oregimi u Beteleme wa ponda Goliata u Giti una okuti, unga waye wa kuatele ocikundo cimue ca kala ndomakina ya vakuakupota.+

20 Kueya vali uyaki ko Gati kuna kua kala ulume umue unene calua okuti eka leka lia kuatele ovimuine 6 kuenda omãhi lomãhi ya kuatelevo ovimuine 6 okuti vo cosi wa kuatele 24 kovimuine; eye wa kalavo ocitumbulukila ca Refayimi.+ 21 Eye wa enda oku sepula Isareli.+ Kuenje Yonatão omõla a Simei+ okuti, manji a Daviti wa ponda ulume waco.

22 Alume ava vakuãla va kala ovitumbulukila via Refayimi ko Gati kuenje Daviti kumue lakuenje vaye va va ponda.+

22 Daviti wa sapuila Yehova olondaka viocisungo+ eci keteke Yehova o yovola peka liovanyãli vaye vosi+ kuenda peka lia Saulu.+ 2 Eye wa popia hati:

“Yehova eye esenje liange kuenda ociteyuilo cange+ haeye Una o ndi yovola.+

11 Eye wa endela ku keruvi umue+ kuenda weya loku palãla.

Wa muiwa vavava ungelo umue.*+

13 Vocinyi ca kala kovaso aye mua molẽha akala ondalu.

Eye ociyepelo ku vosi vana va sanda ocitililo kokuaye.+

32 Momo helie Suku nda ha Yehova ko?+

Kuenda helie handa nda ha Suku yetuko?+

44 Ove o ka ndi yovola kolondaka vĩvi viomanu vange.+

47 Yehova o kasi lomuenyo! Handa yange a sivayiwe!+

Suku yohanda yepopelo liange a kemãlisue.+

23 Olondaka via sulako Daviti a popia vievi:+

 5 Siti onjo yange oco yi kasilili kovaso a Suku?

8 Olonduko viasualali va pama va Daviti vievi:+ Yoseve-basievete u Takimoni eye usongui walume vatatu.+ Vonjanja yimosi, eye wa ponda eci ci soka 800 komanu lunga waye. 9 Noke wa kuamamo Eleasara+ omõla a Dodo+ omõla a Ahiho, eye wa kalavo la Daviti pokati kasualali vatatu va pama eci va sepula va Filisiti. Ovo va liongoluile oku liyaka kuenda eci alume vo ko Isareli va tila, 10 eye wamamako oku yaka la va Filisiti toke eci okuokuo kuaye kua kavele kuenda eka liaye ka lia ecele osipata.+ Kuenje keteke liaco, Yehova wa nena eyulo linene;*+ kuenda asualali va tiuka konyima yaye oco vope ovivimbi.

11 Noke wa kuamamo Siama omõla a Age u Harari. Va Filisiti va liongoluila pamosi ko Lehi kuna kua kala epia limue lieyukile akunde; kuenje omanu va tila omo lia va Filisiti. 12 Pole, eye wa talama pokati kepia kuenda wa li teyuila kuenje wamamako oku kundula va Filisiti, noke Yehova wa eca eyulo limue linene.*+

13 Pokati keci ci soka 30 kasongui, pa tunda vatatu va loka oku ka lisanga la Daviti veleva lio Adulama,+ kotembo yoku ungula kuenda ocimunga* ca va Filisiti ca kala oku tunga ocilombo Vocimbota* co Refayimi.+ 14 Daviti wa kala vocitumãlo ceteyuilo+ kuenda ocilombo ca va Filisiti ca kala ko Beteleme. 15 Noke Daviti wa situlula onjongole yaye poku popia hati: “Nda nda nyuile ño ovava a tunda vocisimo ci kasi ocipepi lombundi yo Beteleme, nda nda sanjuka!” 16 Omo liaco, asualali vaco vatatu va pama va iñila vocilombo ca va Filisiti kuenda vopa ovava vocisimo ca kala ocipepi lombundi yo Beteleme kuenje va a nena ku Daviti; pole, eye wa likala oku a nyua kuenda wa a pesila kovaso a Yehova.+ 17 Eye wa popia hati: “A Yehova ka ca sungulukile kokuange oku ci linga! Ndi sukila hẽ oku nyua osonde+ yalume va kapa omuenyo wavo kohele?” Omo liaco, eye wa likala oku a nyua. Evi ovio ovina asualali vaye vatatu va pama va linga.

18 Avisiai+ manji a Yoava, omõla a Seruya+ wa kala usongui wocimunga cikuavo calume vatatu; eye wa ponda eci ci soka 300 komanu lunga waye kuenda eye wa kemãlele ndalume vaco vatatu.+ 19 Ndaño okuti, eye wa kemãlelepo vali calua pokati kalume vakuavo vatatu haeye wa kala usongui wavo, pole, ka kemãlele ndalume vatatu vatete.

20 Benaya+ omõla a Yehoyada, wa kala ulume umue ukuotõi* una wa linga ovina vialua vi komõhisa ko Kavasele.+ Eye wa ponda omãla vavali va Ariyele wo ko Moavi kuenda eye wa lokila vocisimo cimue keteke limue kua kala ocikokoto kuenje wa ponda ohosi yimue.+ 21 Eye wa pondavo ulume umue unene calua u Egito. Ndaño okuti, u Egito wa kuatele unga umue peka liaye, eye wa liyaka laye lombueti yimue kuenda wa tambula unga peka liu Egito kuenje wo ponda lunga waco. 22 Evi ovio ovina Benaya omõla a Yehoyada a linga kuenda eye wa kuatele ekemãlo ndeli liasualali vatatu va pama. 23 Ndaño okuti, eye wa kemãlelepo vali calua okuti alume akũi atatu ci sule, ekemãlo liaye ka lia velelepo lialume vatatu. Pole, Daviti wo nõla oco a linge ondavululi yaye.

24 Asahele+ manji a Yoava, wa kala pokati kalume akũi atatu ndeci: Elihanana omõla a Dodo wo ko Beteleme,+ 25 Siama u Haroda, Elika u Haroda, 26 Helesi+ u Palititi,+ Ira omõla a Ikesi u Tekoa, 27 Aviyesere+ u Anatote,+ Mevunai u Husiati, 28 Salimone u Ahiho, Maharai+ u Netofa, 29 Heleve omõla a Baana u Netofa, Itai omõla a Rivai wo ko Givea ya va Benjamini, 30 Benaya+ u Piratoni, Hidai wo kakango* o ko Gasi,+ 31 Avilavoni u Aravati, Asimawete u Baharumi, 32 Eliava u Sialavoni, omãla va Yasiene, Yonatão, 33 Siama u Harari, Ahima omõla a Siarara u Harari, 34 Elifelete omõla a Ahasavi omõla u Maakati, Eliama omõla a Ahitofele+ u Gilo, 35 Hesero u Karimele, Parari u Arabia, 36 Yigala omõla a Natana wo ko Sova, Bani u Gadi, 37 Seleki u Amoni, Naharai u Berote okuti, ukuavimalẽho viuyaki via Yoava omõla a Seruya, 38 Ira u Itiri, Gareve u Itiri,+ 39 kuenda Uriya+ u Hiti, vocosi ca tẽla 37 komanu.

24 Onyeño ya Yehova ya wengukila vali va Isareli+ eci Daviti a vetiyiwa oku va katukila lolondaka viokuti: “Kuende, ka sonehise+ va Isareli la va Yuda.”+ 2 Omo liaco, soma wa sapuila Yoava+ usongui wolohoka una wa kala laye hati: “Mange ohenda, kuende kovikoti viosi via Isareli oku upisa ko Dani toke ko Beresieva+ kuenda sonehisi omanu oco ndi kũlĩhe etendelo liavo.” 3 Pole, Yoava wa sapuila soma hati: “Yehova Suku yove a vokiye omanu ci soka 100 kolonjanja kuenda ovaso a ñala yange soma a ci mole, pole, momo lie ñala yange soma a yonguila oku ci linga?”

4 Pole, ondaka ya soma ya yula ondaka ya Yoava londaka yasongui volohoka. Kuenje Yoava lasongui volohoka va tunda kovaso a soma, yu va enda oku ka sonehisa omanu vo ko Isareli.+ 5 Ovo va yoka o Yordão, va tunga ocilombo ko Aroere+ konele yondio* yolupale vokati kocimbota* kuenje va enda konele ya va Gadi kuenda ko Yasere.+ 6 Noke va enda ko Gileada+ vofeka ya va Tatimi-Hodisi kuenda vamako toke ko Dani-Yaana kuenje va pitĩla ko Sidono.+ 7 Ovo va enda kombonge yo Turo+ kuenda kalupale osi a va Hivi,+ a va Kanana oku sulako va enda ko Negeve+ yo Yuda kuenje va pitĩla ko Beresieva.+ 8 Va ñuala ofeka yosi kuenda veya ko Yerusalãi noke liolosãi ecea loloneke 20. 9 Yoava wa eca ku soma etendelo liomanu vana va sonehiwa. O Isareli ya tẽla 800.000 kasualali va limalẽha lolosipata kuenda o Yuda ya tẽla 500.000 kalume.+

10 Pole, utima* wa Daviti wa kala oku u vetela evelo+ noke yoku tenda omanu. Noke Daviti wa sapuila Yehova hati: “Nda linga ekandu+ linene omo lieci nda linga. Kaliye a Yehova, linga ohenda ecela oku lueya kukuenje wove,+ momo eci nda linga uveke.”+ 11 Eci Daviti a pasuka omẽle, Yehova wa sapuila uprofeto Gadi+ una wa enda oku sapuila Daviti ovinjonde via tunda ku Suku hati: 12 “Kuende, sapuila Daviti hoti: ‘Ca popia Yehova ceci hati: “Ndi laika oku eca kokuove ayambulo atatu. Nõla eli ndi laika oku nena kokuove.”’”+ 13 Omo liaco, Gadi weya ku Daviti kuenda wo pula hati: “Anga hẽ vofeka yove mu kala onjala anyamo epanduvali?+ Anga hẽ o tila ovanyãli vove vokuenda kuolosãi vitatu osimbu ovo va ku landula?+ Anga hẽ vofeka yove mu kala efengi oloneke vitatu?+ Kaliye sokolola lutate ketambululo ndi ka eca ku Una wa numa.” 14 Omo liaco, Daviti wa sapuila Gadi hati: “Eci ca tĩla calua kokuange. Mange ohenda, hĩse tu kupukile peka lia Yehova,+ momo ohenda yaye yalua;+ pole, ku ka ecelele okuti ndi kupukila peka liomunu.”+

15 Noke Yehova wa tuma efengi limue+ ko Isareli tunde komẽle toke kotembo ya sokiyiwa kuenje kua fa+ 70.000 komanu tunde ko Dani toke ko Beresieva.+ 16 Eci ungelo oluĩla eka liaye ko Yerusalãi oco a yi kundule, Yehova wa livela* omo liefengi liaco+ kuenje wa sapuila ungelo wa kala oku nena enyõleho liaco komanu hati: “Ci tẽla! Eka liove li liwekepo.” Ungelo wa Yehova wa kala ocipepi locimbandi ca Arawuna+ u Yevusi.+

17 Eci Daviti a mola ungelo wa kala oku ponda omanu, eye wa sapuila Yehova hati: “Ame, ame nda linga ekandu kuenda ame nda lueya; pole, olomeme evi+ nye via linga? Mange ohenda, eka liove li mbuile ame kuenda vakuanjo ya isiange.”+

18 Keteke liaco, Gadi weya ku Daviti kuenda wo sapuila hati: “Lamana, tungila Yehova utala umue pocimbandi ca Arawuna u Yevusi.”+ 19 Omo liaco, Daviti wa lamana ndondaka ya Gadi, ndeci Yehova a handelekele. 20 Eci Arawuna a vanja kombuelo kuenje wa mõla soma lakuenje vaye va kala oku iya kokuaye, vepuluvi liaco, Arawuna wa tunda, wa kekamẽla soma locipala caye posi. 21 Arawuna wa pula hati: “Momo lie ñala yange soma eyilila kupika waye?” Daviti wa tambulula hati: “Ndeya oku landa kokuove ocimbandi oco ndi tungile Yehova utala, oco efengi li kasi pokati komanu limũhe.”+ 22 Pole, Arawuna wa sapuila Daviti hati: “Ñala yange soma a kale laco kuenda a ece eci co sungulukila.* Olongombe vioku eca ndocilumba coku pia elisi vievi kumue lomakina yoku sasa kuenda okanga yolongombe oco vi linge olohũi. 23 A soma, ovina viosi evi Arawuna wa vi eca ku soma.” Kuenje Arawuna wa sapuila soma hati: “Yehova Suku yove a ku lekise ohenda.”

24 Pole, Soma wa sapuila Arawuna hati: “Sio, ndi sukila oku ci landa londando yimue. Si eci ku Yehova Suku yange ocilumba coku pia elisi okuti si feti cimue.” Omo liaco, Daviti wa landa ocimbandi kuenda olongombe leci ci soka 50 kolosiekele viopalata.*+ 25 Kuenje Daviti wa tungila Yehova utala+ pocitumãlo caco kuenda wa eca ovilumba vioku pia elisi lovilumba viombembua. Noke Yehova wa yevelela apingilo ofeka+ kuenje efengi lia kala ko Isareli lia pita.