ELIVULU LIATETE LIA SAMUELE

1 Kua kala ulume umue ko Ramar-Sofi*+ kovaimbo a kasi kolomunda vio Efarimi+ okuti, onduko yaye Elikana,+ haeye omõla a Yerohama, omõla a Elihu, omõla a Tohu, omõla a Sufe, haeye u Efarimi. 2 Eye wa kuatele akãi vavali; umue onduko yaye Hana, ukuavo Penina. Penina wa kuatele omãla, pole, Hana ka kuatele omãla. 3 Ulume waco, wa enda oku tunda volupale luaye unyamo lunyamo oku ka fendela* loku ka eca ocilumba ku Yehova ukualohoka ko Silo.+ Omãla vavali va Eli okuti, Hafeni la Finehase+ oko va kala oku vumba ndovitunda via Yehova.+

4 Eteke limue eci Elikana a kala oku eca ocilumba, wa eca olonepa vimue kukãi waye Penina kuenda komãla vaye vosi valume lomãla vaye vakãi,+ 5 pole, ku Hana wa eca onepa yimue yilikasi, momo Hana eye wa kala ukãi eye a solele calua; pole, Yehova ko wĩhile omãla.* 6 Pole, sepakãi yaye wa enda oku u sanumũla calua oco a sumue omo okuti, Yehova ko wĩhile omãla. 7 Eci oco Penina a enda oku linga unyamo lunyamo; olonjanja viosi eci Hana a enda konjo ya Yehova,+ sepakãi yaye wa enda oku u sanumũla calua oco eye a lile kuenda ka tavaile oku lia. 8 Pole, ulume waye Elikana wa pulisa Hana hati: “A Hana, momo lie o lilila kuenda momo lie ku tavela oku lia, momo lie wa sumuila?* Ame hẽ sia velelepo kokuove okuti, omãla ekũi va sule?”

9 Noke Hana wa votoka eci va mala oku lia loku nyua ko Silo. Vepuluvi liaco, ocitunda Eli ca tumãlele pomangu ya kala ocipepi lepito lionembele*+ ya Yehova. 10 Hana wa sumuile calua kuenda wa fetika oku likutilila ku Yehova+ loku lila calua. 11 Kuenje eye wa linga ohuminyo yokuti: “A Yehova ukualohoka, nda wa mola ohali yupika wove kuenda o njivaluka okuti, ku ivalako upika wove loku eca kupika wove omõla umue ulume,+ ame ndi ko weca ku Yehova oloneke viosi viomuenyo waye kuenda layimue omoko yi ka pita vutue waye.”+

12 Osimbu a kala oku likutilila ku Yehova vokuenda kuotembo yalua, Eli wa kala oku luluvalela komẽla waye. 13 Hana wa kala oku likutilila vutima waye, omẽla waye owo lika wa kala oku lisenga senga, pole, ondaka yaye ka ya kaile oku yeviwa. Kuenje Eli wa sima okuti, eye wa koluele. 14 Eli wo sapuila hati: “Toke eteke lipi wamamako luholua? Liwekapo oku nyua ovinyu.” 15 Hana wa kumbulula hati: “Sio, a ñala yange! Ndukãi umue wa sumua calua;* sia nyuile ovinyu ale ocina cikuavo ci koluisa, pole, ñasi oku situluila utima wange ku Yehova.+ 16 Ku ka sime okuti upika wove, ukãi umue ka silivila, momo ñasi oku likutilila toke cilo omo nda sumua calua kuenda nda sakalala.” 17 Noke Eli wa tambulula hati: “Kuende lombembua kuenda Suku ya va Isareli a ku ĩhe eci wo pinga.”+ 18 Ukãi wa popia hati: “Upika wove a sange ohenda kovaso ove.” Kuenje ukãi wa enda lonjila yaye, wa lia kuenda ocipala caye ka ca nyumãlele vali.

19 Epata lia pasuka selo komẽle kuenda va kekamẽla kovaso a Yehova, noke va tiukila konjo yavo ko Rama.+ Elikana wa litokeka lukãi waye Hana kuenje Yehova wo wivaluka.+ 20 Vokuenda kunyamo* Hana wemina kuenda wa cita omõla umue ulume, yu wo luka+ Samuele,* momo eye wa popia hati: “Ndo pinga ku Yehova.”

21 Votembo ya sokiyiwa, Elikana wa enda la vakuanjo yaye vosi oku ka lumba ocilumba ceciwa unyamo lunyamo ku Yehova+ kuenda oku eca ocilumba cohuminyo. 22 Pole, Hana ka endele,+ wa sapuila ulume waye hati: “Eci omõla a sumũha ndu u tuala; noke eye o ka molẽhela kovaso a Yehova kuenda oko a ka kala otembo yosi.”+ 23 Ulume waye Elikana wo sapuila hati: “Linga eci o sima okuti, ciwa.* Siala konjo toke eci u sumũla. Yehova a tẽlise eci wa popia.” Kuenje ukãi wa siala konjo kuenda wa nyamisa omõla toke eci o sumũla.

24 Eci a sumũla omõla, wo ambata ko Silo kumue longombe yi kuete anyamo atatu, lo efa* yimosi yosema, lesanga linene liovinyu+ kuenje wa pitĩla konjo ya Yehova ko Silo+ kumue lomõla. 25 Noke, va ponda ongombe kuenda va nena omõla ku Eli. 26 Ukãi wa popia hati: “Ngecele a ñala yange! Nda lisinga kokuove okuti ame ndukãi una wa kala love pocitumãlo eci oku likutilila ku Yehova.+ 27 Nda likutilila omo liomõla kuenda Yehova wa nyĩha eci ndo pingile.+ 28 Kaliye ndu weca ku Yehova. Eye o ka tiamẽla ku Yehova oloneke viosi viomuenyo waye.”

Kuenje eye* oko a kekamẽla ku Yehova.

2 Hana wa likutilila hati:

“Utima wange u sanjukila Yehova.+

Ombinga* yange ku Yehova yi pama.

11 Kuenje Elikana wa enda konjo yaye ko Rama, pole, ukuenje wa linga ukuakuvumba Yehova+ loku songuiwa la Eli ocitunda.

12 Omãla va Eli va kala olondingaĩvi;+ ovo ka va sumbilile Yehova. 13 Eci oco ovo va enda oku linga lolonepa ovitunda va sesamẽlele oku tambula komanu:+ Eci omunu umue a lumba ocilumba caye, oñuatisi yocitunda yiya longalufu yovayo atatu peka osimbu ositu yi telekiwa, 14 kuenda o yi kapa volombia. Cosi ci kuatiwa longalufu, ocitunda ci ci tambula oco ci linge caye. Eci oco va enda oku linga la va Isareli vosi va endaile ko Silo. 15 Osimbu ulume una eca eca ocilumba ka tuimisile ulela,+ oñuatisi yimue yocitunda yiya kokuaye loku u sapuila hati: “Eca ositu, oco ocitunda ci yi yoke. Oco, ka citava oku tambula kokuove ositu ya telekiwa, te lika ositu yowisu.” 16 Eci ulume o sapuila hati: “Ovo tete va tuimise ulela,+ noke upa cosi o yongola,” eye o popia hati: “Sio, te wa yeca cilo muẽle; sanga ndi yi tambula longusu!” 17 Ekandu lioloñuatisi viaco, lia linga linene kovaso a Yehova,+ momo omanu ka va sumbilile ocilumba ca Yehova.

18 Osimbu Samuele a kala oku vumba+ Yehova, wa enda oku wala* evendalia liovalatanya+ ndaño okuti handi wa kala omõla. 19 Inaye wa enda oku u tongelako esanya ka li kuete ovoko kuenda wa enda oku u nenela esanya liaco unyamo lunyamo eci a enda lulume waye oku ka lumba ocilumba cunyamo lunyamo.+ 20 Eli wa sumũlũisa Elikana lukãi waye, loku popia hati: “Yehova a ku ĩhe omõla pocakati cukãi u, oco a piñale pomangu yomõla wa eci ku Yehova.”+ Kuenje ovo va tiukila konjo. 21 Yehova wa ivaluka Hana loku ecelela okuti eye o mina;+ kuenje eye wa cita vali omãla vatatu valume kuenda vavali vakãi. Umalẽhe Samuele wamamako oku kula osimbu a vumba Yehova.*+

22 Eli wa kukile calua, pole, wa yeva ovina viosi omãla vaye va kala oku linga+ vo Isareli kuenda ndomo va kala oku lipekela lakãi va vumbaile puvelo wombalaka yohongele.+ 23 Eye wa va sapuila hati: “Momo lie vu kasilili oku amamako oku linga ovina evi? Ovina ñasi oku yeva komanu viatiamẽla kokuene, via vĩha. 24 Liwekipo amãla vange, momo ovina nda yeva pokati komanu va Yehova, ka via sungulukile. 25 Nda omunu umue o lingila ekandu omunu ukuavo, umue citava okuti u likutililako ku Yehova;* pole, nda omunu umue o lingila ekandu Yehova,+ elie u likutililako?” Pole, ovo ka va yevele kondaka ya isiavo, momo Yehova wa nõlelepo oku va kundula.+ 26 Umalẽhe Samuele wamamako oku kula loku pandiyiwa ci kaile la Yehova, ale lomanu.+

27 Uprofeto umue wa Suku weya ku Eli kuenda wo sapuila hati: “Ca popia Yehova ceci hati: ‘Anga hẽ sia lisituluile konjo ya isiove osimbu wa kaili Kegito ndupika konjo ya Fareo?+ 28 Eye wa nõliwa pokati kovikoti viosi via Isareli+ oco a vumbe ndocitunda cange loku londa kutala wange+ oku eca ovilumba, linsensu,* loku wala evendalia kovaso ange; kuenje konjo ya vakukululu yove nda eca ovilumba viosi viondalu via lingiwa la va Isareli.*+ 29 Momo lie ka wa taveleli* ocilumba cange lombanjaile yange, vina nda handelekele oku vi lumba kocitumãlo cange nda tunga?+ Momo lie o kasilili oku amamako oku sumbila vali omãla vove okuti ame ci sule, poku lẽla lolonepa via velapo viocilumba cange cosi cina omanu va Isareli va eca?+

30 “‘Eli olio esunga lieci okuti, ondaka ya Yehova Suku ya va Isareli yiti: “Onjo yove lonjo ya vakukululu yove, nda yamamako oku endela kovaso yange.”+ Pole, cilo Yehova wa popia hati: “Eci lalimue eteke ci ka lingiwa vali, momo vana va ndi kemãlisa ndi ka va kemãlisavo,+ pole, vana va ndi pembula va ka pembuiwavo.” 31 Tala! Ku iya oloneke okuti, ndi ka malako ongusu* yove yosi leyi yo vonjo ya isiove kuenje lomue vonjo yove o ka pitĩla koku kuka.+ 32 Pokati kovina viosi viwa vi lingiwila o Isareli,+ o ka mola unyãli umue pocitumãlo nda tungila kuenda vonjo yove, lalimue eteke mu ka kala vali omunu wa kuka. 33 Ocitumbulukila cove okuti, sia ci tepele kupange wutala wange ci ka ku kokela oku kala omeke loku ku nenela ohali, pole, valua konjo yove va ka pondiwa losipata.+ 34 Kuenje eci ci ka pita lomãla vove Hafeni la Finehase, ci ka kala ondimbukiso kokuove okuti: Kavali kavo va ka pondiwa veteke limuamue.+ 35 Noke ndi ka votola ocitunda cimue ca koleliwa.+ Oco, ci ka linga eci utima wange u yongola;* kuenda ndi ka ci tungila onjo yimue yi kala otembo ka yi pui kuenje ci ka endela kovaso yombuavekua yange oloneke viosi. 36 Wosi o siala vonjo yove, iya kuenda o ka kekamẽla ocitunda caco, oco a fetiwe olombongo loku tambula ombolo kuenje o popia hati: “Mange ohenda, nyĩhe ocikele cutunda oco ndi lie onepa yimue yombolo.”’”+

3 Umalẽhe Samuele wa enda oku vumba+ Yehova loku songuiwa la Eli, pole, koloneke viaco ondaka ya Yehova ka ya siatele oku yeviwa; kuenda kotembo yaco, ovinjonde+ ka via siatele ño enene.

2 Eteke limue, Eli wa kala oku pekela vohondo yaye kuenda ovaso aye a vuvalele; kuenje ka tẽlele vali oku vanja ciwa.+ 3 Ondiyelo ya Suku+ handi ka ya imile kuenda Samuele wa kala oku pekela vonembele*+ ya Yehova, muna mua kala Ocikasia ca Suku. 4 Yehova wa vilikiya Samuele. Eye wa tambulula hati: “Ame ulo.” 5 Eye wa lupukila ku Eli loku popia hati: “Ame ulo, omo wa mbilikiya.” Pole, eye wa popia hati: “Sia ku vilikiyile. Ka pekele vali.” Eye wa enda, yu wa pekela. 6 Yehova wo vilikiya vali hati: “A Samuele!” Samuele wa votoka, wa enda toke ku Eli loku popia hati: “Ame ulo, omo wa mbilikiya.” Pole, eye wa popia hati: “Sia ku vilikiyile amõlange. Ka pekele vali.” 7 (Samuele ka kũlĩhĩle handi Yehova kuenda ondaka ya Yehova ka ya situluiwile handi kokuaye.)+ 8 Kuenje Yehova wa vilikiya vali onjanja yatatu hati: “A Samuele!” Eye wa votoka, wa enda ku Eli loku popia hati: “Ame ulo, omo wa mbilikiya.”

Eli wa limbuka okuti, Yehova eye wa kala oku vilikiya umalẽhe. 9 Eli wa sapuila Samuele hati: “Kuende, ka pekele kuenda nda eye wa ku vilikiya vali, popia hati: ‘Vangula a Yehova, ukuenje wove o ku yevite.’” Kuenje Samuele wa enda, yu wa ka pekela pocitumãlo caye.

10 Yehova weya, yu wa talama kuenje wa vilikiya vali ndeci a linga olonjanja vikuavo hati: “A Samuele, a Samuele!” Samuele wa tambulula hati: “Popia, momo ukuenje wove o ku yevite.” 11 Yehova wa sapuila Samuele hati: “Tala! Ndi linga ocina cimue ko Isareli okuti, wosi o ci yeva cu lingisa ocinyuañi vatũi aye.+ 12 Keteke liaco, ndi ka nenela onjo ya Eli ovitangi viosi nda popele oku upisa kefetikilo toke kesulilo.+ 13 U sapuila okuti, ndi nena esombiso ka li pui konjo yaye omo liekandu eye a kũlĩha,+ momo omãla vaye va kasi oku siñala Suku,+ pole, eye ka va lemẽlele.+ 14 Eli olio esunga lieci nda lisila okuti akandu onjo ya Eli, lalimue eteke a ka imũha lovilumba ale lolombanjaile.”+

15 Samuele wa pekela toke lomẽle; noke wa yulula apito onjo ya Yehova. Samuele wa kala lusumba woku sapuila Eli ocinjonde. 16 Pole, Eli wa vilikiya Samuele hati: “A Samuele, amõlange!” Eye wa tambulula hati: “Ame ulo.” 17 Eye wa pula hati: “Esapulo lipi eye a ku sapuila? Mange ohenda, ku ka li ndimbike. Suku a ku nenele eyambulo loku yolako vali nda wa ndi limbika ondaka yimue pokati kovina viosi eye a ku sapuila.” 18 Kuenje Samuele wo sapuila ovina viosi kuenda ko limbikile ondaka layimue. Eli wa popia hati: “Eci ca tunda ku Yehova. Eye a linge eci ca sunguluka kovaso aye.”

19 Samuele wamamako oku kula kuenda Yehova wa kala laye+ kuenje ka ecelele okuti, yimue pokati kolondaka viaye ka yi tẽlisiwa.* 20 Va Isareli vosi oku upisa ko Dani toke ko Beresieva va limbuka okuti, Samuele wa nõliwa nduprofeto wa Yehova. 21 Kuenje Yehova wamamako oku molẽhela ko Silo, momo Yehova wa lisitulula ku Samuele ko Silo londaka ya Yehova.+

4 Ondaka ya Samuele ya lisanduila ko Isareli yosi.

Va Isareli va endele oku ka lisanga la va Filisiti kuyaki; ovo va tungila ovilombo konele yo Evenese kuenda va Filisiti va tungila ovilombo ko Afeke. 2 Va Filisiti va limalẽha oco va ka liyake la va Isareli, pole, uyaki ka wa endele ciwa kuenda va Isareli va yuliwa la va Filisiti, ovo va ponda 4.000 kalume kuyaki. 3 Eci asualali va tiukila kocilombo, akulu va va Isareli va popia vati: “Momo lie Yehova a ecelela okuti, etaili tu yuliwa* la va Filisiti?+ Tu endi, tu kopi ocikasia covisila via Yehova ko Silo,+ oco ci kale letu kuenje ci tu popela peka liovanyãli vetu.” 4 Omo liaco, omanu va tuma alume ko Silo oku kopa ocikasia covisila via Yehova ukualohoka, una wa tumãla kilu* lia va keruvi.+ Omãla vavali va Eli okuti, Hafeni la Finehase,+ va kuamavo kocikasia covisila via Suku yocili.

5 Eci ocikasia covisila via Yehova ceya vocilombo, va Isareli vosi va fetika oku kaluka kuenje osi ya luluma. 6 Eci va Filisiti va yeva oku kaluka kuaco, va popia vati: “Momo lie vocilombo ca va Heveru mu kasilili onjuela yalua?” Noke va yeva okuti, Ocikasia ca Yehova ceya vocilombo. 7 Va Filisiti va kala lusumba kuenje va popia vati: “Suku weya vocilombo!”+ Va popiavo vati: “Ngongo yetu, momo ka tua la pita locina cimue ndeci! 8 Ngongo yetu! Helie o ka tu popela peka lia Suku u o komõhisa? Suku u, eye wa veta va Egito lafengi aiñi aiñi vekalasoko.+ 9 Ene a va Filisiti kuati utõi, yaki ndalume, oco ka vu ka lingi apika va va Heveru ndeci ovo va kala apika vene.+ Yaki ndalume!” 10 Va Filisiti va yaka kuenda va yula va Isareli+ kuenje omunu lomunu wa tilila vombalaka yaye. Kua fa omanu valua; kasualali va va Isareli kua fa 30.000 komanu. 11 Kuenje Ocikasia ca Suku ca tambuiwa kuenda Hafeni la Finehase omãla vavali va Eli, va fa.+

12 Ulume umue u Benjamini wa tila kuyaki kuenda wa pitĩla ko Silo keteke liaco okuti, uwalo waye wa toka toka kuenda kutue waye kua kala oneketela.+ 13 Eci ulume waco a pitĩla, Eli wa tumãlele komangu ya kala konele yetapalo oku lavulula, momo utima waye wa kala oku luluma omo Liocikasia ca Suku yocili.+ Ulume waco eci a iñila volupale loku eca esapulo, owiñi wosi wa fetika oku lila. 14 Eci Eli a yeva oku lila kuaco, wa pula hati: “Oku lila okuo kue?” Kuenje ulume wa lupuka oco a ece esapulo ku Eli. 15 (Kotembo yaco, Eli wa kuata 98 kanyamo kuenda ovaso aye a vuvalele; kuenje ka tẽlele oku vanja.)+ 16 Omo liaco, ulume wa sapuila Eli hati: “Ame nda tunda kuyaki! Etaili nda tila kuyaki.” Eye wo pula hati: “Nye ca pita, amõlange?” 17 Ulume wa nena esapulo wa popia hati: “Va Isareli va tila va Filisiti kuenda omanu valua va yuliwa;+ omãla vove vavali okuti, Hafeni la Finehase va fa+ kuenje Ocikasia ca Suku yocili ca tambuiwa.”+

18 Vepuluvi eye a tukula Ocikasia ca Suku yocili, Eli wa kupuka ocinyimame komangu yaye ya kala konele yombundi kuenda osingo yaye ya teka kuenje wa fa, momo wa kukile kuenda etimba liaye lia lemele. Eye wa sombisa va Isareli vokuenda 40 kanyamo. 19 Ukãi womõlaye ulume okuti ukãi wa Finehase, wa kala omisi kuenda wa pandele koku cita. Eci ukãi a yeva okuti Ocikasia ca Suku yocili ca tambuiwa kuenda ndatembo yaye wa fa kumue lulume waye, wa petamako kuenda vocipikipiki wa kuata olongembia kuenje wa cita. 20 Osimbu a kala oku panda ko ku fa, akãi va kala laye va popia vati: “Ku ka kuate usumba, momo wa cita omõla ulume.” Ukãi ka tambuluile kuenda ka kapeleko ondaka yaco. 21 Pole, ukãi waco wa luka omõlaye hati, Ikabode*+ loku popia hati: “Ulamba wa va Isareli wa va tunda,”+ wa ci popela omo okuti, Ocikasia ca Suku yocili ca tambuiwa kuenda omo lieci ca pita la ndatembo yaye kuenda ulume waye.+ 22 Ukãi wa popia hati: “Ulamba ku va Isareli wa tunda, momo Ocikasia ca Suku yocili ca tambuiwa.”+

5 Eci va Filisiti va tambula Ocikasia+ ca Suku yocili, va cupa ko Evenese va ci tuala ko Asidode. 2 Va Filisiti va tikula Ocikasia ca Suku yocili kuenda va ci tuala vonjo* ya Dagoni loku ci tumbika ponele ya Dagoni.+ 3 Eci va Asidode va pasuka omẽle ociteketeke, va sanga okuti, Dagoni wa kupuka, ocipala caye ca tuvikiwa posi kovaso Yocikasia ca Yehova.+ Noke ovo va tikula Dagoni vo tiuwiya komangu yaye.+ 4 Keteke lia kuamamo eci va pasuka omẽle ociteketeke, va sanga okuti Dagoni wa kupuka, ocipala caye ca tuvikiwa posi kovaso Yocikasia ca Yehova. Utue wa Dagoni lovaka aye via soyoka kuenda via kala posi pocikuli cepito. Onepa yi kasi ndombisi* oyo lika ya supapo. 5 Eli olio esunga lieci okuti, toke koloneke vilo, ovitunda via Dagoni kuenda vosi va iñila vonjo ya Dagoni ko Asidode, ka va liataila pocikuli cepito lia Dagoni.

6 Kuenje Yehova wa yambula va Asidode kuenda wa va kundula poku kokela uvei wolongandu kolonungi vio ko Asidode kumue lovikanjo viavo.+ 7 Eci omanu vo ko Asidode va mola eci ca kala oku pita, va popia vati: “Ocikasia ca Suku ya va Isareli ka ci ka kaile letu, momo eye wa tu kangisa kumue la suku yetu Dagoni.” 8 Ovo va tuma oku ongolola olombiali viosi via va Filisiti loku vi pula vati: “Nye tu linga Locikasia ca Suku ya va Isareli?” Ovo va tambulula vati: “Ocikasia ca Suku ya va Isareli va ka ci tuale ko Gati.”+ Kuenje oko vambata Ocikasia ca Suku ya va Isareli.

9 Noke yoku ci tualako, Yehova wa kangisa omanu vosi vo volupale luaco okuti, akulu lomãla kuenje vosi va kuatiwa luvei wolongandu.+ 10 Ovo va tuma Ocikasia ca Suku yocili ko Ekirone,+ pole, eci Ocikasia ca Suku yocili ca pitĩla vo Ekirone, va Ekirone va fetika oku kaluka lolukandi vati: “Ovo va tu nenela Ocikasia ca Suku ya va Isareli oco etu kumue lomanu vetu tu pondiwe!”+ 11 Ovo va tuma olomunga kuenda vongolola olombiali viosi via va Filisiti, loku popia vati: “Upi kulo Ocikasia ca Suku ya va Isareli; ci tiukile komangu yaco oco okuti, etu kumue lomanu vetu ka tu pondiwa.” Usumba woku fa wa lisanduila volupale luosi; momo Suku yocili wa va kangisa calua,+ 12 kuenje omunu wosi okuti ka file, wa kuatiwa luvei wolongandu. Oku lila kuoku pinga ekuatiso kuomanu vaco volupale kua pitĩla toke kovailu.

6 Ocikasia+ ca Yehova ca kala vofeka ya va Filisiti olosãi epanduvali. 2 Va filisiti va kovonga ovitunda la vakuakutãha+ loku va pula vati: “Nye tu linga Locikasia ca Yehova? Tu sapuili ndomo tu ci tiuwiya pomangu yaco.” 3 Ovo va kumbulula vati: “Eci vu tiuwiya ocikasia covisila via Yehova Suku ya va Isareli, ko ka ci tiuwiyi ño ndoto okuti, ka vu eci ocilumba lacimue. Vu sukila oku ci tiuwiya locilumba ceko.+ Oco lika vu sakuiwa kuenda vu ka kũlĩha esunga lieci eye a kasi oku vu kangisili.” 4 Va Filisiti va pula vati: “Ocilumba cipi ceko tu sukila oku tuma kokuaye?” Ovo vati: “Ndomo ci likuata letendelo liolombiali vio ko Filisiti,+ tumisi oviñumañuma vitãlo viulu viuvei wolongandu kuenda olomuku vitãlo viulu, momo efengi liaco lio veti vosi yene kumue lolombiali viene. 5 Vu sukila oku tunga oviñumañuma viuvei wene wolongandu, loviñumañuma violomuku+ vi kasi oku nyõla ofeka kuenda sivayi Suku ya va Isareli. Pamue eye o tepulula ocilemo covaka aye ci kasi kokuene kuenda kolosuku viene lo kofeka yene.+ 6 Momo lie vu tĩlisila ovitima viene ndeci va Egito kuenda Fareo va tĩlisa ovitima viavo?+ Eci Suku a va kangisa,+ ovo va ecelela okuti, va Isareli va enda kuenje va tunda.+ 7 Cilo, pongiyi okalosa kokaliye kuenda olongombe vivali violomange vi kuete olonãle okuti, lalimue eteke via kapiwile kokanga. Olongombe viaco vi pandekiwe kokalosa, pole, olonãle viaco vi tiukile kocunda okuti, vi kala ocipãla lavio. 8 Tikuli Ocikasia ca Yehova, ci kapi kokalosa kuenje ovikuata viulu vina vu tuma kokuaye ndovilumba vieko, vi kapiwe vokasia yimue konele yaco.+ Noke ci tumi, 9 kuenje lavululi: Nda Ocikasia ca lamanẽla konjila yi loña ko Bete-Siemese kocikanjo calio,+ ci lekisa okuti, Suku ya Isareli eye wa tu kokela ovitangi evi viosi. Pole, nda hakoko cenda, tu ka limbuka okuti eka liaye halioko lia tu kangisa; cosi ca pita letu, ceya ño.”

10 Omanu oco va linga. Va tikula olongombe vivali violomange vi kuete olonãle, va vi pandeka kokalosa kuenda va kutila olonãle vocunda. 11 Noke va kapa Ocikasia ca Yehova vokalosa, lokasia yolomuku viulu kuenda oviñumañuma viuvei wavo wolongandu. 12 Kuenje olongombe via kuama onjila yenda ko Bete-Siemese.+ Ovio viamamako oku pita vonjila yaco, loku koma; ka via yapukile kondio ndaño kepĩli. Osimbu via kala oku enda, olombiali via va Filisiti via kuama olongombe viaco toke eci via pitĩla kongave ocikanjo co Bete-Siemese. 13 Omanu vo ko Bete-Siemese, va kala oku ungula otiliku vocimbota co vetapi.* Eci va petula ovaso avo loku mola Ocikasia, va kuata esanju lialua. 14 Okalosa ka iñila vepia lia Yehosua u Bete-Siemese kuenda omo ka talama ocipepi lewe limue linene. Kuenje va teta avaya okalosa kuenda va lumba olongombe viaco violomange+ ndocilumba coku pia elisi ku Yehova.

15 Va Lewi+ vopa Ocikasia ca Yehova kuenda okasia ya kala konele yaco, muna mua kala ovikuata viulu kuenje va vi kapa kilu liewe linene. Keteke liaco, omanu vo ko Bete-Siemese+ va eca ovilumba vioku pia elisi ku Yehova.

16 Eci olombiali vitãlo via va Filisiti via ci mola, via tiukila ko Ekirone keteke liaco. 17 Oviñumañuma viulu viuvei wolongandu vina va Filisiti va tuma ku Yehova ndocilumba ceko vievi:+ cimue ca Asidode,+ cimue ca Gasa, cimue ca Asikelone, cimue ca Gati+ kuenda cimue ca Ekirone.+ 18 Kuenje etendelo liolomuku viulu, lia likuata letendelo lialupale a va Filisiti ana a tiamẽlele kolombiali vitãlo, ci kaile alupale a pama ale ovaimbo a kasi vusenge.

Noke ewe linene kuna va tumbikile Ocikasia ca Yehova, vepia lia Yehosua u Bete-Siemese, lia linga ndombangi toke koloneke vilo. 19 Pole, Suku wa ponda alume vo ko Bete-Siemese, momo va vanja Kocikasia ca Yehova. Eye wa ponda 50.070* kuenje omanu va fetika oku lila calua, momo Yehova wa ponda omanu valua.+ 20 Omo liaco, omanu vo ko Bete-Siemese va pula vati: “Helie o tẽla oku talama kovaso a Yehova, o Suku+ eyi yi kola kuenda pi a enda noke yoku tu siapo?”+ 21 Ovo va tuma olomunga komanu vo ko Kiriyata-Yeari+ oco vi popie hati: “Va Filisiti va tiuwiya Ocikasia ca Yehova. Enjui oco vu cambati.”+

7 Alume vo ko Kiriyata-Yeari veya kuenda va tikula Ocikasia ca Yehova va ci tuala konjo ya Avinadave+ kowulu kuenje va nõla omõlaye Eleasa oco a tate Ocikasia ca Yehova.

2 Tunde keteke Ocikasia ceya ko Kiriyata-Yeari, pa pitile otembo yalua okuti, 20 kanyamo kuenje onjo yosi ya Isareli ya fetika oku sanda* Yehova.+ 3 Samuele wa sapuila onjo yosi ya Isareli hati: “Nda wa tiukili ku Yehova lutima wene wosi,+ poku upa pokati kene olosuku viñi,+ loviñumañuma via Asitorete+ kuenda vu tiamisila ovitima viene ku Yehova loku vumba lika eye,+ eye o ka vu popeli peka lia va Filisiti.”+ 4 Va Isareli va nyõla ociñumañuma ca Baale kuenda ca Asitorete kuenje va vumba lika Yehova.+

5 Kuenje Samuele wa popia hati: “Ongololi va Isareli vosi ko Misipa+ oco ndi vu likutililiko ku Yehova.”+ 6 Ovo va liongoluila pamosi ko Misipa kuenda va tapa ovava loku a pesila kovaso a Yehova kuenje va likandangiya oku lia keteke liaco.+ Ovo va popia vati: “Tua lingila ekandu Yehova.”+ Kuenje Samuele wa linga onganji+ ya va Isareli ko Misipa.

7 Eci va Filisiti va yeva okuti va Isareli va liongoluila ko Misipa, olombiali via va Filisiti+ via katukila va Isareli. Eci va Isareli va ci yeva, va kuatela usumba va Filisiti. 8 Va Isareli va sapuila Samuele vati: “Ku ka liwekepo oku likutilila ku Yehova Suku yetu, oco a tu kuatise+ loku tu popela peka lia va Filisiti.” 9 Samuele wa tikula okameme ka nyama, wa ka lumba ndocilumba coku pia elisi+ ku Yehova; kuenda Samuele wa likutilila ku Yehova oco a kuatise va Isareli kuenje Yehova wo tambulula.+ 10 Osimbu Samuele a kala oku eca ocilumba coku pia elisi, va Filisiti va tunda oku ka liyaka la va Isareli. Keteke liaco, Yehova wa tuma ocilemĩlo+ cinene ku va Filisiti kuenda ca va kokela esakalalo+ kuenje va yuliwa la va Isareli.+ 11 Noke alume vo ko Isareli va tunda ko Misipa, va landula va Filisiti loku va ponda toke va pitahãla ovaimbo o kombuelo okuti, ko Bete-Kare. 12 Samuele wa tikula ewe limue+ loku li kapa pokati ko Misipa lo Yesana kuenje wa li luka hati, Evenese,* momo eye wa popia hati: “Yehova wa tu kuatisa toke cilo.”+ 13 Va Filisiti va yuliwa kuenda ka va tiukile vali vocikanjo ca va Isareli;+ kuenje eka lia Yehova liamamako oku katukila va Filisiti oloneke viosi via Samuele.+ 14 Alupale ana va Filisiti va tambuile ku va Isareli a tiuwiyiwa vali ku va Isareli, oku upisa ko Ekirone toke ko Gati kuenje va Isareli va tambula vali ovikanjo viavo peka lia va Filisiti.

Pokati ka va Isareli la va Amori, pa kalavo ombembua.+

15 Samuele wamamako oku kala onganji yo Isareli vokuenda kuomuenyo waye wosi.+ 16 Unyamo lunyamo eye wa enda oku linga ungende kocikanjo co Betele,+ co Giligali+ kuenda co Misipa+ kuenje wa tetuluila o Isareli kovitumãlo viosi evi. 17 Pole, eye wa enda oku tiukila ko Rama,+ momo onjo yaye oko ya kala kuenda oko a endavo oku tetuluila o Isareli. Eye wa tungilako utala wa Yehova.+

8 Eci Samuele a kuka, wa nõla omãla vaye oco va linge olonganji vio ko Isareli. 2 Onduko yomõlaye uveli Yoeli kuenda yomõla wavali Aviya,+ ovo va kala olonganji ko Beresieva. 3 Pole, omãla vaye ka va kuamẽle ongangu yaye; va tiamisilile lika ovitima viavo kolombongo,+ va enda oku tambula ovitukiko+ kuenda va pengisile esunga.+

4 Vokuenda kuotembo, akulu vosi vo ko Isareli va liongolola kuenda va enda ku Samuele ko Rama. 5 Ovo vo sapuila vati: “Tala! Ove wa kuka ale, pole, omãla vove ka va kasi oku kuama ongangu yove. Kaliye tu nõleleko osoma yimue oco yi linge onganji yetu ndeci olofeka viosi vikuavo.”+ 6 Pole, ca sumuisa* Samuele eci ovo va popia vati: “Tu ĩhe osoma yimue oco yi linge onganji yetu.” Kuenje Samuele wa likutilila ku Yehova, 7 Yehova wa sapuila Samuele hati: “Yevelela cosi omanu va ku sapuila; momo haveko va kasi oku ku likala, pole, ame va kasi oku ndi likala ndosoma yavo.+ 8 Ovo va kasi oku linga ndeci va linga tunde keteke nda vopa Kegito toke etaili; ovo va ndi yanduluka+ oco va vumbe olosuku viñi+ kuenda eci oco va kasi oku lingavo kokuove. 9 Kaliye yevelela eci ovo va popia. Pole, va lungula lutõi; va sapuila okuti soma o laika oku va viala, o ka kuata omoko yoku va kisika ovina vimue.”

10 Kuenje Samuele wa sapuila olondaka viosi via Yehova komanu va kala oku u pinga osoma yimue. 11 Eye hati: “Osoma yimue yi ka kuata omoko yoku vu kisiki ovina vi kuãimo ndeci:+ Eye o ka tuma omãla vene+ oco va talavaye kakãlu avo+ kuenda va linga vakuakuendela kotuvalu tuaye+ kuenje vamue va ka yolokela kovaso yakãlu aye. 12 Kuenje eye o ka nõla vamue pokati kavo ndasongui ohulukãi yomanu,+ lasongui vakũi atãlo komanu,+ vakuavo va ka lima ovapia aye,+ loku ungula, va ka panga ovimalẽho viuyaki+ kuenda ovimalẽho viakãlu aye.+ 13 Eye o ka tambula omãla vene vakãi oco va pange onguendu,* vakuakuteleka kuenda vakuakupanga olombolo.+ 14 Eye o ka tambula ovapia ene a velapo, oviumbo viene viayuva, violiveira+ kuenda o ka vi eca kapika vaye. 15 Eye o ka tambula onepa yekũi yolomema ovapia ene, locumbo cene cayuva kuenje o ka vi eca ku vakesongo kelombe liaye kuenda kapika vaye. 16 Eye o ka tambula apika vene valume lapika vene vakãi, olongombe viene via velapo, lovimbulu viene kuenda o ka talavaya lavio kupange waye.+ 17 Eye o ka tambula onepa yekũi yolomeme viene+ kuenje ene vu ka linga apika vaye. 18 Ku iya eteke vu ka lisiõsiõla omo liosoma wa nõli,+ pole, keteke liaco Yehova ka ka vu tambululi.”

19 Pole, omanu ka va tavele oku yevelela kueci Samuele a kala oku va sapuila kuenje ovo va popia vati: “Ka ci kuete cimue, etu tua nõlapo oku kuata osoma yimue. 20 Noke tu kala ndolofeka vikuavo kuenda soma o ka linga onganji yetu loku tu songuila kuyaki.” 21 Samuele noke yoku yevelela olondaka viosi viomanu, wa vi pituluila ku Yehova. 22 Yehova wa sapuila Samuele hati: “Yevelela kokuavo kuenda va nõlelako osoma yimue.”+ Samuele wa sapuila omanu vo ko Isareli hati: “Omunu lomunu a tiukile kolupale luaye.”

9 Kua kala ulume umue u Benjamini, onduko yaye Kisi,+ eye omõla a Aviele, omõla a Sirore, omõla a Bikorata, omõla a Afiya u Benjamini+ haeye wa kala ohuasi. 2 Eye wa kuata omõla umue o tukuiwa hati, Saulu okuti,+ wa kala umalẽhe umue wa posoka calua, pokati ka va Isareli ka pa kaile ulume umue wo velapo keposo kuenda pokati ka vosi eye wa lepelepo vali; okuti vakuavo vo pitĩlile lika kapepe.

3 Eci ovimbulu* via Kisi isia ya Saulu, via nyelela, Kisi wa sapuila omõlaye Saulu hati: “Pañinya umue pokati koloñuatisi oco vu ka sandiliyi ovimbulu.” 4 Ovo va pita kovaimbo a kasi kolomunda vio Efarimi kuenda kofeka lio Sailisia, puãi ka va vi sangele. Va pitavo vofeka lio Sialime, pole, ovimbulu ka via kailemo. Noke va ñuala ofeka yosi ya va Benjamini, lopo ka va vi sangele.

5 Ovo va iñila vofeka yo Sufe kuenda Saulu wa sapuila oñuatisi yaye wa kala laye hati: “Tu tiukile, sanga isiange o ka sakalala vali letu okuti, lovimbulu ci sule.”+ 6 Pole, oñuatisi ya popia hati: “Tala, volupale lulo muli ukuenje umue wa Suku okuti, wa sumbiwa calua. Cosi eye a popia ci tẽlisiwa.+ Tu endeko. Citava okuti eye o ka tu yilikila onjila tu sukila oku kuama.” 7 Noke Saulu wa sapuila oñuatisi yaye hati: “Nda tua endako nye tu ambatela ulume waco? Vakolombele etu ka muli ombolo; ndaño ombanjaile yimue oco tu yece kukuenje wa Suku yocili. Nye tu kuete?” 8 Oñuatisi ya sapuila Saulu hati: “Tala! Ñuete osiekele yopalata* kuenda ndi ka yeca kukuenje wa Suku yocili kuenje eye o ka tu lekisa onjila tu enda.” 9 (Kosimbu ko Isareli, eci omunu umue a yongola oku vangula la Suku eci a popia ceci: “Tu ende kukuavinjonde.”+ Kosimbu uprofeto wetaili wa enda oku tukuiwa hati, ukuavinjonde.) 10 Saulu wa sapuila oñuatisi yaye hati: “Eci wa popia ca sunguluka. Tu ende.” Ovo va enda volupale muna mua kala ukuenje wa Suku yocili.

11 Osimbu va kala oku lamanela volupale, va ñualẽhela lafeko vamue veya oku tapa ovava. Ovo va pulisa afeko vaco vati: “Ukuavinjonde+ hẽ o sangiwa pocitumãlo cilo?” 12 Afeko va tambulula vati: “Eye o kasi kulo. Tali, o kasi kovaso yene. Lupuki, eye wa pitĩla etaili volupale, momo omanu etaili va ka eca ocilumba+ vocitumãlo ca lepa.+ 13 Eci wiñili volupale, vu ko sanga osimbu eye ka lamanele handi vocitumãlo ca lepa oku ka lia. Omanu ka va li osimbu eye ka pitĩlile, momo eye o sumũlũisa ocilumba. Noke vana va lalekiwa, citava oku lia. Omo liaco, lamaneliko lonjanga kuenje vu ko sanga.” 14 Kuenje va lamanela volupale luaco. Osimbu va kala oku iñila volupale, va mola Samuele wa kala oku iya oku lisanga lavo oco a lamane vocitumãlo ca lepa.

15 Hẽla lia pita osimbu Saulu ka pitĩlile, Yehova wa sapuila* Samuele hati: 16 “Hẽla liya kelivala ndeli, ndi tuma ulume umue kokuove o tunda vofeka yo Benjamini.+ U waveka oco a linge usongui womanu vange va Isareli+ kuenda eye o ka popela omanu vange peka lia va Filisiti. Momo nda mola ohali yomanu vange kuenda oku lila kuavo kua pitĩla kokuange.”+ 17 Eci Samuele a mola Saulu, Yehova wo sapuila hati: “U eye ulume una nda ku sapuila hati: ‘Eye o ka viala omanu vange.’”*+

18 Kuenje Saulu wa amela ku Samuele pombundi kuenda wa popia hati: “Mange ohenda, ndi sapuile pi ku kasi onjo yukuavinjonde?” 19 Samuele wa tambulula Saulu hati: “Ame ndukuavinjonde. Livanga kovaso yange kuende kocitumãlo ca lepa kuenda etaili o lia lame.+ Hẽla ndi ecelela okuti, enda kuenje ndu ku sapuila ovina viosi o yongola oku kũlĩha.* 20 Catiamẽla kovimbulu via nyelela oloneke vitatu,+ ku ka sakalale lavio, momo via sangiwa. Ovina viosi via velapo vi sangiwa vo Isareli via tiamẽla ku lie? Siti via tiamẽla kokuove kuenda konjo yosi ya isiove?”+ 21 Saulu wa tambulula hati: “Ame hẽ siu Benjaminiko ukuavikoti vitito pokati kovikoti via Isareli?+ Siti epata liange ka li kuete esilivilo pokati kapata osi ocikoti ca Benjamini? Momo lie ove o sapelela lame lonjila ndeyi?”

22 Kuenje Samuele wa kuata Saulu kumue loñuatisi yaye, wa va ambata vohondo yoku lila kuenda wa va ĩha omangu ya velapo pokati ka vana va lalekiwa; kua kala eci ci soka 30 kalume. 23 Samuele wa sapuila ukuakuteleka hati: “Nena onepa nda ku ĩha cina nda ku sapuilile siti: ‘Oyo yi likalile.’” 24 Ukuakuteleka wopa ocikalo cocinyama leci ca kalamo, wa vi kapa kovaso a Saulu. Samuele wa popia hati: “Eci ci kasi kovaso yove oco ca ku pongiyiwila. Lia, momo ovo va ku pongiyilako oco o lie vepuluvi eli. Nda va sapuila hati: ‘Nda laleka akombe.’” Kuenje keteke liaco, Saulu wa lia pamosi la Samuele. 25 Noke va tunda kocitumãlo ca lepa,+ oco va ende volupale kuenje Samuele wamamako oku vangula la Saulu volusoka luonjo. 26 Ovo va pasuka selo kuenda komẽle, Samuele wa vilikiya Saulu wa kala volusoka luonjo loku popia hati: “Lipongiya, oco tu liusike.” Kuenje Saulu wa lipongiya kuenda eye kumue la Samuele va tunda. 27 Osimbu va kala oku loka poku tunda volupale, Samuele wa sapuila Saulu hati: “Sapuila oñuatisi+ oco yi pite kovaso yetu,” noke oñuatisi ya pita kovaso. “Pole, ove o siala palo, oco ndu ku lomboluile ondaka ya Suku.”

10 Samuele wa nyañula ociwala culela kuenda wa u pesila vutue wa Saulu.+ Wo sipula kuenda wa popia hati: “Siti Yehova wa ku nõla oco o linge usongui+ womanu vaye?*+ 2 Etaili eci o tiukila, o ka sanga alume vavali ocipepi leyambo lia Rahele+ vocikanjo co Benjamini ko Selisa kuenje va ka ku sapuila vati: ‘Ovimbulu wa kala loku sandiliya via molẽha, pole, isiove ka sakalalele lavio,+ wa sakalala love. Eye wa popia hati: “Pi ndi sanga omõlange?”’ 3 Noke kuende toke eci o pitĩla puti unene wo ko Tavore, o ka sangapo alume vatatu va kasi oku lamanela ko Betele oco va ka fendele Suku yocili,+ umue wambata olohombo vitatu, ukuavo wambata olombolo vitatu kuenda ukuavo wambata esanga linene liovinyu. 4 Ovo va ka ku lama kuenda va ka ku ĩha olombolo vivali kuenje tambula olombolo viaco. 5 Noke o ka pitĩla kowulu wa Suku yocili, kuna ku sangiwa ocimunga casualali va va Filisiti. Eci o ka pitĩla volupale, o ka sanga ocimunga cimue covaprofeto va tundilila kocitumãlo ca lepa, osimbu ovo va kasi oku imba owanji ku ka sikiwa kovaso yavo ocikuata covisikilo ca pangiwa lovikolo, opandelu, olumbendo kuenda ohalupa. 6 Espiritu lia Yehova li ku wila+ kuenda o ka imbila owanji kumue lavo kuenje o ka pongoloka omunu wokaliye.+ 7 Eci ku lingiwa olondimbukiso viaco, linga cosi eka liove li pondola oku linga, momo Suku yocili o kasi love. 8 Livanga kovaso yange ko Giligali+ kuenda oko ndu ku sanga oco ndi lumbe ovilumba vioku pia elisi lovilumba viombembua. O sukila oku kevelela oloneke epanduvali toke eci ndi pitĩla kokuove. Noke ndu ku sapuila eci o sukila oku linga.”

9 Eci Saulu a ñualapo oco a siepo Samuele, Suku wa fetika oku pongolola utima waye oco u kale ndowu womunu ukuavo kuenje olondimbukiso viosi via tẽlisiwa veteke liaco. 10 Ovo va tundako, va enda kowulu kuenje wa ñualehẽla locimunga covaprofeto. Espiritu lia Suku lio wila+ kuenje eye wa fetika oku imba owanji+ pokati kavo. 11 Eci vosi vana vo kũlĩha vo mola okuti o kasi oku imba owanji lovaprofeto, va livangula pokati vati: “Nye ca pita lomõla a Kisi? Anga hẽ Saulu o kasivo pokati kovaprofeto?” 12 Noke ulume umue ukuimbo liaco wa popia hati: “Isiavo elie?” Eli olio esunga lieci ku molẽhela olondaka* viokuti: “Anga hẽ Saulu o kasivo pokati kovaprofeto?”+

13 Eci eye a mala oku imba owanji, wa enda kocitumãlo ca lepa. 14 Noke manji a isia ya Saulu wa pula Saulu loñuatisi yaye hati: “Pi wa endeli?” Saulu wa tambulula hati: “Tua ka sandiliyile ovimbulu,+ pole, ka tua vi sangele kuenje tua endele ku Samuele.” 15 Manji a isia ya Saulu wa pula hati: “Ndi sapuile, nye Samuele a popia kokuene?” 16 Saulu wa tambulula manji a isiaye hati: “Eye wa tu sapuila okuti, ovimbulu via molẽha ale.” Pole, Saulu ko sapuilile eci Samuele a popia catiamẽla kondaka yoku viala.

17 Noke Samuele wa kovonga omanu vosi kovaso a Yehova ko Misipa+ 18 kuenje wa sapuila va Isareli hati: “Ca popia Yehova Suku ya va Isareli ceci hati: ‘Ame ndopa va Isareli Kegito loku va popela peka lia va Egito+ kuenda kolosoma viosi vio talisi ohali. 19 Pole, etaili wa likali Suku yene+ una wa kala Upopeli wene kovina viosi vĩvi kuenda kohali yosi kuenje wa popi hoti: “Sio, tu yongola okuti o tu nõlelako osoma yimue.” Cilo, talami kovaso a Yehova epata lepata kuenda ovikoti viene.”’

20 Kuenje Samuele wa nena ocipepi ovikoti viosi via va Isareli+ kuenda ocikoti ca Benjamini oco ca nõliwa.+ 21 Noke wa nena ocipepi ocikoti ca Benjamini epata lepata kuenda kua nõliwa epata lia Matari. Oku sulako, kua nõliwa Saulu omõla a Kisi.+ Pole, eci va kala oku u sandiliya, ka vo sangele. 22 Ovo va pula ku Yehova vati:+ “Omunu waco hẽ o kasi ale palo?” Yehova wa tambulula hati: “O kasi oko, wa salama pokati kovikuata.” 23 Ovo va lupuka va ko wupileko. Eci a talama pokati komanu eye wa lepelepo vali okuti, omanu vosi vo sulila ño kapepe.+ 24 Samuele wa sapuila omanu vosi hati: “Vu lete hẽ omunu Yehova a nõla+ okuti pokati komanu vosi ka pali omunu wa lisoka laye?” Omanu vosi va fetika oku kaluka vati: “Soma a kale hũ lomuenyo!”

25 Samuele wa sapuila omanu catiamẽla komoko yolosoma+ kuenda wa vi soneha velivulu, yu wa vi seleka kovaso a Yehova. Noke Samuele wa tuma omanu vosi oku tiukila kolonjo viavo. 26 Saulu wa tiukilavo konjo yaye ko Givea kuenje wa kuamiwa lasualali vana Yehova a vetiya ovitima viavo. 27 Alume vamue ka va silivila va popia vati: “Ulume u o tu popela ndati?”+ Ovo vo pembula kuenje ka vo nenelele ombanjaile.+ Pole, eye ka popele lacimue.*

11 Noke Nahase u Amoni+ weya kuenje wa tungila ocilombo konele yo ko Yavesi+ ko Gileada. Omanu vosi vo ko Yavesi va sapuila Nahase vati: “Linga ocisila* letu kuenje tu ku vumba.” 2 Nahase u Amoni wa va sapuila hati: “Ndi linga ocisila lene, pole, cimosi lika ndu kisiki okuti: vosi yene vu tofuiwa ovaso ene ondio. Ndi ci lingila oku pembula va Isareli vosi.” 3 Akulu vo ko Yavesi vo tambulula vati: “Tu ĩhe oloneke epanduvali oco tu tume olomunga kovikanjo viosi vio ko Isareli. Nda ka kua molẽhele u o tu popela, tu lieca kokuove.” 4 Eci olomunga via pitĩla ko Givea+ kimbo lia Saulu, va sapuila olondaka viaco komanu vosi kuenje omanu vosi va fetika oku lila calua.

5 Pole, Saulu wa kala oku tunda vepia loku kuama ocunda, Saulu hati: “Nye ca pita lomanu? Momo lie va kasilili oku lila?” Vo lomboluila olondaka vialume vo ko Yavesi. 6 Eci Saulu+ a yeva olondaka viaco wa kuata onyeño yalua noke espiritu lia Suku lio wila. 7 Eye wa tikula olongombe vivali via pama, wa vi teta vovinimbu, yu wa vi eca peka liolomunga loku vi tumisa kocikanjo cosi ca va Isareli kuenje wa popia hati: “Wosi ka kuama Saulu la Samuele, eci oco ci ka lingiwa lolongombe viaye!” Kuenje omanu va fetika oku kuatela usumba Yehova kuenda va kuata ocimãho cimuamue.* 8 Kuenje wa va tenda ko Beseke okuti va tẽla 300.000 ya va Isareli kuenda va Yuda va tẽla 30.000 kalume. 9 Ovo va sapuila olomunga vieyile vati: “Eci oco vu sukila oku sapuila kalume vo ko Yavesi ko Gileada hati: ‘Hẽla eci utanya u tua, oco vu ka popeliwa.’” Olomunga via enda via ka sapuile olondaka viaco kalume vo ko Yavesi kuenje ovo va kuata esanju lialua. 10 Alume vo ko Yavesi va popia vati: “Hẽla tu lieca kokuene kuenda vu linga letu eci co sungulukili.”+

11 Keteke lia kuamamo, Saulu wa tepisa omanu vovimunga vitatu kuenje va enda toke eci pokati kocilombo komẽle ociteketeke, yu va fetika oku ponda va Amoni+ toke eci utanya wa tua.* Vana va supapo va lisandula okuti, ka kua sialele omanu vavali pamosi. 12 Noke omanu va sapuila Samuele vati: “Velie va pulile vati: ‘Anga hẽ Saulu eye o linga soma yetu?’+ Alume vaco va kuatiwe oco tu va ponde.” 13 Saulu wa popia hati: “Ka ku pondiwa omunu laumue etaili,+ momo etaili Yehova wa popela o Isareli.”

14 Noke Samuele wa sapuila omanu hati: “Enjui, tu endi ko Giligali+ oco tu ka imbile uvangi wokuti Saulu eye muẽle soma.”+ 15 Omanu vosi va enda ko Giligali kuenda oko va vialekela Saulu ndosoma kovaso a Yehova. Kuenje oko va ecela ovilumba viombembua kovaso a Yehova+ kuenda Saulu lomanu vosi vo ko Isareli va yolela calua.+

12 Samuele wa sapuila va Isareli vosi hati: “Nda linga* cosi wa ndi pingi kuenda ndo nõleliko osoma yimue oco yi ku viali.+ 2 Kaliye u eye soma o ka vu songuili!*+ Ame nda kuka ale kuenda ñuete owele, omãla vange va kasi kulo lene+ kuenje ndo songuili tunde vumalẽhe toke etaili.+ 3 Ame ulo. Njimbili uvangi kovaso a Yehova lombuavekua yaye:+ Ku lie nda punda ongombe pamue ocimbulu cimue?+ Ale helie nda kemba pamue oku talisa ohali? Nda tava hẽ oku tambula ovitukiko komunu umue omo lieci a linga?+ Nda nda ci linga, ndi ci tiuwiya.”+ 4 Ovo va popia vati: “Ove kua tu kembele pamue oku tu talisa ohali, ale oku tambula ovitukiko peka liomunu umue.” 5 Eye wa va sapuila hati: “Yehova ombangi yene kuenda etaili ombuavekua yaye ombangivo yokuti, ka wa sangeli lacimue coku ndi lundila.”* Ovo vati: “Eye ombangi.”

6 Noke Samuele wa sapuila omanu hati: “Yehova una wa nõlele Mose la Arone haeye wopa vakukululu yene vofeka Yegito,+ ombangivo. 7 Kaliye kali apa vu kasi kuenda ndu vu sombisili kovaso a Yehova, omo liovilinga viosi via sunguluka vina Yehova a linga kokuene kuenda ku vakukululu yene.

8 “Eci Yakoba eya Kegito+ kuenda vakukululu yene va fetika oku vilikiya ku Yehova oku pinga ekuatiso,+ Yehova wa tuma Mose+ la Arone oco va songuile vakukululu yene oku tunda Kegito loku va nena oco va tunge vocitumãlo cilo.+ 9 Pole, ovo va ivalako Yehova Suku yavo kuenje eye wa va eca*+ peka lia Sisera+ usongui wolohoka via Hasore, peka lia va Filisiti+ kuenda peka lia soma yo ko Moavi,+ yu va liyaka lavo. 10 Ovo va likutilila ku Yehova oku pinga ekuatiso+ loku popia vati: ‘Tua linga ekandu,+ tua yanduluka Yehova loku vumba va Baale+ loviñumañuma via Asitorete;+ kaliye tu popele peka liovanyãli vetu oco tu ku vumbe.’ 11 Yehova wa tuma Yerubaale,+ Bedane la Yefita+ kuenda Samuele+ oco a ku popeli peka liovanyãli vosi vo ñuali okuti vu kolapo.+ 12 Eci wa limbuki okuti, Nahase+ soma ya va Amoni wo katukili, wa ndi sapuili hoti: ‘Eci hacoko, etu tua nõlapo oku kuata osoma yikuavo!’+ ndaño okuti Yehova Suku yene eye Soma yene.+ 13 Kaliye u eye soma una wa nõli, haeye wa pingi. Tali! Yehova wo nõleliko osoma yimue.+ 14 Nda vu sumbila Yehova+ loku u vumba,+ oku pokola kondaka yaye+ kuenda ka vu sinĩla ocihandeleko ca Yehova kuenje ene kumue la soma o viala pokati kene vu kuama Yehova Suku yene, ciwa. 15 Pole, nda ka wa pokuili kondaka ya Yehova loku sinĩla ocihandeleko ca Yehova, Yehova o vu yambuli kumue lolonjali viene.+ 16 Kaliye kali apa vu kasi kuenda tali ocina eci ci komõhisa Yehova a kasi oku linga kovaso ene. 17 Etaili hẽ siti eteke lioku ungula otiliku? Ndi likutilila ku Yehova oco a nene ocilemĩlo lombela; kuenje vu limbuka loku kuata elomboloko liokuti wa lingi eci cĩvi kovaso a Yehova poku pinga osoma yimue.”+

18 Samuele wa likutilila ku Yehova kuenda Yehova wa tuma ocilemĩlo lombela keteke liaco kuenje omanu vosi va kuatela usumba walua Yehova kuenda Samuele. 19 Noke omanu vosi va sapuila Samuele vati: “Likutililako akuenje vove+ ku Yehova Suku yove, ka tu yongola oku fa, momo kakandu etu tua vokiyako vali ocina cikuavo cĩvi poku pinga osoma yimue.”

20 Samuele wa sapuila omanu hati: “Ko ka kuati usumba. Cosi wa lingi cĩvi. Pole, ko ka liwekipo oku kuama Yehova+ loku vumba Yehova lutima wene wosi.+ 21 Ko ka yapuisiwi poku kuama ovina viaño,*+ vina ka vi kuete esilivilo+ kuenda ka vi popela, momo ovina viaño.* 22 Yehova ka ka yanduluka omanu vaye+ omo lionduko yaye yi kola,+ momo Yehova wa nõlapo oku vu lingisi omanu vaye.+ 23 Pole, ame lalimue eteke ndi ka liwekapo oku vu likutililiko ku Yehova kuenda ndi kamamako oku vu longisi onjila yiwa haiyo ya sunguluka. 24 Ndi pinga lika kokuene siti, sumbili Yehova,+ u vumbi lekolelo* lutima wene wosi, ivaluki ovina viosi vi komõhisa eye a linga kokuene.+ 25 Pole, nda wa lingi eci cĩvi,+ ci kaile ene kuenda soma yene vu ka kunduiwa.”+

13 Saulu wa kuata . . .* kanyamo eci a linga osoma+ kuenda wa viala o Isareli anyamo avali. 2 Saulu wa nõla 3.000 kalume va Isareli; kuenda ci soka 2.000 kalume, va kala la Saulu ko Mikimasi kuenda kovaimbo a kasi kolomunda vio ko Betele, ci soka 1.000 va kala la Yonatão+ ko Givea+ yo ko Benjamini. Omanu vakuavo, wa va tuma oku tiukila omunu lomunu vombalaka yaye. 3 Noke Yonatão wa kundula ocimunga casualali a va Filisiti+ va kala ko Geva+ kuenda va Filisiti va ci yeva. Kuenje Saulu wa sika ombinga+ vofeka yosi loku popia hati: “Va Heveru va ci yeve!” 4 Va Isareli vosi va yeva esapulo liaco liokuti: “Saulu wa kundula asualali a va Filisiti kuenda va Filisiti va kuatela va Isareli esuvu.” Kuenje omanu va kovongiwa oco va kuame Saulu ko Giligali.+

5 Va Filisiti va lipongiyilavo oku ka liyaka la va Isareli, vongolola 30.000 kakãlu wuyaki kuenda 6.000 ya vakuakuendela kolokavalu, va pongiyavo asualali valua ndeseke li kasi kohulo yokalunga;+ ovo va lamana kuenda va tunga ocilombo ko Mikimasi kutundilo wo Beta-Vene.+ 6 Kuenje alume vo ko Isareli va limbuka okuti va kala lovitangi, momo va laikele oku liyaka lovanyãli vavo; omanu va fetika oku salama valeva,+ vovitunu, vasenje, valungi* kuenda vovitunu viovava. 7 Va Heveru vamue va yoka o Yordão va enda kofeka ya Gadi kuenda ko Gileada.+ Pole, Saulu wa siala ko Giligali kuenda omanu vosi vo kuamele va kala lusumba walua. 8 Eye wamamako oku kevelela oloneke epanduvali toke ya pitĩlapo otembo Samuele a tukula,* pole, Samuele ka kaile oku pitĩla ko Giligali kuenje omanu va kala la Saulu va fetika oku lisandula. 9 Oku sulako Saulu wa popia hati: “Neni kokuange ocilumba coku yoka kuenda ovilumba viombembua.” Kuenje eye wa lumba ocilumba coku yoka.+

10 Noke eci a mala oku eca ocilumba coku yoka, Samuele wa pitĩla. Kuenje Saulu wa enda oku ka ñualehẽla laye loku u lama. 11 Samuele wa pula hati: “Nye wa linga?” Saulu wa tambulula hati: “Nda limbuka okuti omanu va kala oku ndi yanduluka+ kuenda ove kueyile votembo wa tukula kuenje va Filisiti va liongoluila ko Mikimasi.+ 12 Nda popia lame muẽle siti: ‘Kaliye va Filisiti va ka liyaka lame vo Giligali kuenda ame sia pingile ocali ca Yehova.’ Kuenje nda sima okuti, ndi pondola oku lumba ocilumba coku yoka.”

13 Samuele wa sapuila Saulu hati: “Eci wa linga uveke. Kua pokuile kocihandeleko Yehova Suku yove a ku ĩha.+ Nda wa pokuile, Yehova nda wa pamisa usoma wove ko Isareli otembo ka yi pui. 14 Pole, cilo usoma wove ka u kala otembo yalua.+ Yehova o ka sanga ulume umue o sanjuisa utima waye+ kuenda Yehova o ko nõla oco a songuile omanu vaye,+ momo ove kua pokuile kueci Yehova a ku handeleka.”+

15 Kuenje Samuele wa tunda ko Giligali wa enda ko Givea yo ko Benjamini kuenda Saulu wa tenda omanu va kala laye; eye wa siala leci ci soka 600 kalume.+ 16 Saulu lomõlaye Yonatão kuenda omanu va kala laye va siala ko Geva+ yo ko Benjamini kuenje va Filisiti va tungila ovilombo ko Mikimasi.+ 17 Noke asualali va tunda vocilombo ca va Filisiti vovimunga vitatu. Ocimunga catete ca endela konjila yo Ofira kofeka yo Siuwale; 18 ocimunga cavali ca endela konjila yo Bete-Horone;+ kuenda catatu ca endela konjila yi pita kongave yi kasi kovaso yocimbota co ko Sevomi okuti, lia imba ovaso vekalasoko.

19 Vofeka yosi yo Isareli ka mua kaile ukuakutela utale, momo va Filisiti va popia vati: “Sanga va Heveru va ka panga osipata ale unga.” 20 Kuenje va Isareli vosi va sukilile oku enda ku va Filisiti oco va va lepikileko olosungu violosaluwa, atemo avo, olondiaviti kuenda olomĩla. 21 Upange woku lepika olosungu violosaluwa, atemo, lovikuata vi kuete ovayo atatu, olondiaviti kuenda oku va songelako olombueti, wa kuatele ondando yo pim yimosi.* 22 Keteke liuyaki, omanu va kala la Saulu kuenda la Yonatão ka va kuatele osipata layimue ndaño unga; Saulu lomõlaye Yonatão+ ovo lika va kuatele ovimãleho viaco viuyaki.

23 Ocimunga casualali* a va Filisiti va endele kekungu lio ko Mikimasi.+

14 Eteke limue Yonatão+ omõla a Saulu wa sapuila oñuatisi yaye ukuakuambata ovimãleho viaye viuyaki hati: “Enju, tu ende konele yikuavo kocilombo ca va Filisiti.” Pole, eye ka sapuilileko isiaye. 2 Saulu wa kala konele yimbo lio Givea+ vemẽhi liuti wo romã ko Migirono kuenda ava va kala laye va tẽla eci ci soka 600 kalume.+ 3 (Ahiya omõla a Ahituva,+ manji a Ikabode+ omõla a Finehase,+ omõla a Eli+ ocitunda ca Yehova ko Silo,+ eye wa walele evendalia.)+ Pole, asualali ka va limbukile okuti Yonatão wa tunda pokati kavo. 4 Vonjila Yonatão a kala oku pita oco a pitĩle kocilombo ca va Filisiti, konele yimue kua kala esenje limue lia lisetahãla lovayo, konele yikuavo kua kala esenje likuavo lia lisetahãla lovayo; onduko yesenje limue Bosesi, onduko yesenje likuavo Seneha. 5 Esenje limue, lia kala ndongunji konele yo konano lina lia imba ovaso ko Mikimasi kuenda esenje likuavo lina lia kala kombuelo lia imba ovaso ko Geva.+

6 Yonatão wa sapuila ukuakuambata ovimãleho viaye viuyaki hati: “Enju, tu ende konele yikuavo kocilombo calume olondingaĩvi.+ Pamue Yehova o ka tu kuatisa, momo lacimue ci pondola oku tateka Yehova oku tu yovola, ci kale valua ale vatito.”+ 7 Ukuakuambata ovimãleho viaye viuyaki wo sapuila hati: “Linga eci utima wove u yongola oku linga. Kuende oku o yongola kuenje ndi kuama eci utima wove u yongola oku linga.” 8 Yonatão wa popia hati: “Tu ende toke apa pa kasi alume vaco, tu li lekisa kokuavo. 9 Nda va tu sapuila vati: ‘Kali apa vu kasi toke eci tu pitĩla kokuene!’ tu ka kala apa tu kasi kuenda ka tu lamanela kokuavo. 10 Pole, nda va tu sapuila vati: ‘Enjui oco vu liyaki letu!’ tu ka lamana, momo Yehova o ka va eca peka lietu. Eci oco ci kala ondimbukiso yetu.”+

11 Kavali kavo va enda kocilombo ca va Filisiti. Va Filisiti va popia vati: “Tali! Va Heveru va kasi oku tundilila vovitunu muna va salamẽle.”+ 12 Asualali va kala vocilombo va sapuila Yonatão lukuakuambata ovimãleho viaye vati: “Enjui kokuetu oco tu vu longisi cimue!”+ Yonatão wa sapuila ukuakuambata ovimãleho viaye hati: “Ñuame, momo Yehova o ka va eca peka lio Isareli.”+ 13 Kuenje Yonatão wa lamana lovoko kuenda olomãhi, ukuakuambata ovimãleho viaye viuyaki wa kala konyima yaye; kuenje Yonatão wa fetika oku liyaka la va Filisiti kuenda ukuakuambata ovimãleho viaye viuyaki wa kala oku va pondela konyima yaye. 14 Kuyaki watete Yonatão lukuakuambata ovimãleho viaye viuyaki va linga, va ponda 20 kalume vocinãla ci soka onepa yimue yepia.*

15 Kuenje usumba wa lisanduila vocilombo kuenda komanu vosi va kala vocilombo,+ asualali va pita kovaso va kalavo lusumba. Ongongo ya fetika oku luluma kuenda Suku wa koka usumba walua pokati ka va Filisiti. 16 Olondavululi via Saulu ko Givea+ yo ko Benjamini via mola okuti, ombuanja ya kala oku lisanduila kolonepa viosi.+

17 Saulu wa sapuila asualali va kala laye hati: “Mangi ohenda, tendi omanu vosi oco vu moli nda pa kamba umue.” Eci ovo va tenda, va limbuka okuti, Yonatão lukuakuambata ovimãleho viaye viuyaki ka va kailepo. 18 Saulu wa sapuila Ahiya hati:+ “Nena kulo Ocikasia ca Suku yocili!” (Kotembo yaco* Ocikasia ca Suku yocili ca kala la va Isareli.) 19 Osimbu Saulu a kala oku vangula locitunda, ombuanja vocilombo ca va Filisiti ya kala oku livokiya calua. Kuenje Saulu wa sapuila ocitunda hati: “Liwekapo oku linga eci o kasi oku linga.”* 20 Saulu kuenda asualali vosi va kala laye, va liongolola kuenje va enda kuyaki, eci va pitĩla va sanga okuti, va Filisiti va liñualelapo losipata omunu lukuavo kuenda kua kala ombuanja yalua. 21 Va Heveru vana va kala konele ya va Filisiti haivo va lamanẽle kumue lavo vocilombo, va likongela ku va Isareli vana va kala oku songuiwa la Saulu kuenda Yonatão. 22 Alume vosi va va Isareli vana va salamele+ kovaimbo a kasi kolomunda vio Efarimi, eci va yeva okuti va Filisiti va tila, va likongelavo kuyaki loku va landula. 23 Keteke liaco, Yehova wa popela va Isareli+ kuenje uyaki waco wa lisanduila toke ko Beta-Vene.+

24 Pole, alume vo ko Isareli va kavele calua keteke liaco, momo Saulu wa lingile ocisila lasualali hati: “Omunu wosi o lia okulia* kumue osimbu ka kua tekãvele kuenda osimbu sia yulile ovanyãli vange, o siñaliwa!” Omo liaco, pokati komanu lomue wa lia cimue.+

25 Kuenje asualali* vosi va iñila vusenge kuenda owiki wa kala posi. 26 Eci asualali va iñila vusenge, va mola okuti owiki wa kala oku pita, pole, lomue wa liako, momo va kala lusumba wocisila. 27 Pole, Yonatão ka yevele eci isiaye a linga ocisila caco+ lasualali kuenje wolõla osungu yombueti ya kala peka liaye kuenda wa yi pitisa kasĩla owiki. Noke yoku liako, wa kavuluka.* 28 Kuenje umue pokati kasualali wa popia hati: “Isiove wa linga ocisila lomanu loku popia hati: ‘Omunu wosi o lia okulia kumue etaili, o siñaliwa!’+ Eli olio esunga lieci asualali va kavela calua.” 29 Yonatão wa popia hati: “Isiange wa nena ovitangi* vialua vofeka. Tali ndomo nda kavuluka omo nda mahako kowiki. 30 Nda asualali va lile lelianjo+ etaili kovina va punda kovanyãli vavo nda ca kala ciwa! Momo nda kua pondiwa va Filisiti valua.”

31 Keteke liaco, vamamako oku ponda va Filisiti oku upisa ko Mikimasi toke ko Ayalone+ kuenje asualali va kavele calua. 32 Noke asualali va lupukila locipululu kovina va punda, va tikula olomeme, olongombe lolonãle kuenda va vi pondela pocitumãlo caco kuenje va lia ositu losonde yaco.+ 33 Va ci sapula ku Saulu okuti: “Tala! Asualali va lingila ekandu Yehova poku lia ositu losonde yaco.”+ Eye wa popia hati: “Ene wa lingi usuanji. Tiñuluili lonjanga ewe limue linene toke kokuange.” 34 Saulu wa popia hati: “Lisanduili pokati komanu loku va sapuila hati: ‘Omunu lomunu a nene ongombe yaye, lomeme yaye, loku vi pondela kulo kuenda oku vi lia. Ko ka lingili ekandu Yehova poku lia ositu losonde yaco.’”+ Kuenje kuteke waco omunu lomunu wa nena ongombe yaye loku yi pondela pocitumãlo caco. 35 Saulu wa tungila Yehova utala umue.+ Owo wa kala utala watete eye a tungila Yehova.

36 Noke Saulu wa popia hati: “Tu landuli va Filisiti vokuenda kuteke loku punda ovina viavo toke eci ku ca. Lomue tu supisapo.” Ovo va popia vati: “Linga eci ca ku sungulukila.” Ocitunda ca popia citi: “Tu pulisi Suku yocili pocitumãlo cilo.”+ 37 Saulu wa pulisa ku Suku hati: “Citava okuti ndi landula va Filisiti?+ Ove o ka va eca hẽ peka lia va Isareli?” Pole, Suku ko tambuluile keteke liaco. 38 Saulu wa popia hati: “Ene asongui vomanu, enjui kulo, sandiliyi ekandu lia lingiwa etaili. 39 Ndeci Yehova a kasi lomuenyo una wa popela va Isareli, ndaño omõlange Yonatão nda eye wa ci linga, eye o sesamẽla oku fa.” Pole, lomue pokati komanu wo tambulula. 40 Kuenje eye wa sapuila va Isareli vosi hati: “Ene vu ka kala konele yimue, ame la Yonatão omõlange tu ka kala konele yikuavo.” Omanu va sapuila Saulu vati: “Linga eci ca ku sungulukila.”

41 Saulu wa sapuila Yehova hati: “A Suku ya va Isareli, tambulula pocakati co Tumimi!”+ Kuenje Yonatão la Saulu va nõliwa, pole, omanu va puluka. 42 Saulu wa popia hati: “Imbi ocela+ oco vu nõli pokati kange lomõlange Yonatão.” Kuenje kua nõliwa Yonatão. 43 Saulu wa sapuila Yonatão hati: “Ndi sapuile, nye wa linga?” Yonatão wo sapuila hati: “Nda mãha lika owiki losungu yombueti ya kala peka liange.+ Ame ulo! Citava okuti, ndi fa!”

44 Saulu wa popia hati: “A Yonatão, Suku a ndi kangise calua nda ove kua file.”+ 45 Pole, asualali va sapuila Saulu vati: “Anga hẽ Yonatão o sesamẽla oku fa, una wa nena eyulo* linene+ ku va Isareli? Ka ca sungulukile! Ndeci Yehova a kasi lomuenyo, lalimue esinga liutue waye li kupukila posi, momo eci eye a linga etaili, Suku eye wo kuatisa.”+ Asualali va popela* Yonatão kuenje ka file.

46 Noke Saulu wa liwekapo oku landula va Filisiti kuenda va Filisiti va tiukila kocikanjo cavo muẽle.

47 Saulu wa pamisa uviali waye pokati ka va Isareli kuenda wa liyaka lovanyãli vaye kolonele viosi ndeci, va Moavi,+ va Amoni,+ va Edome,+ olosoma vio Sova+ kuenda va Filisiti;+ kuenje kuosi eye a endela wa va yula. 48 Eye wa yaka lutõi kuenda wa yula va Amaleke+ kuenje wa popela va Isareli peka lia vana va enda oku va punda.

49 Omãla valume va Saulu vava: Yonatão, Yisivi la Malikisua.+ Eye wa kuatelevo omãla vavali vakãi; onduko yomõla uveli Merava,+ onduko yomõla umalẽhe Mikale.+ 50 Onduko yukãi wa Saulu Ahinoame, omõla a Ahimasi. Onduko ya kesongo kolohoka viaye Avinere,+ omõla a Nere manji a isia ya Saulu. 51 Kisi+ wa kala isia ya Saulu kuenda Nere+ isia ya Avinere, wa kala omõla a Aviyele.

52 Saulu wa liyaka la va Filisiti otembo yosi vokuenda kuviali waye.+ Saulu eci a enda oku mola ulume umue wa pama haeye ukuotõi, u kovonga oco a tiamẽle kolohoka viaye.+

15 Samuele wa sapuila Saulu hati: “Yehova wa numa oco a ku waveke ndosoma yomanu vaye va Isareli;+ cilo yevelela eci Yehova a popia.+ 2 Eci Yehova ukualohoka a popia ceci hati: ‘Ndi ka kangisa va Amaleke omo lieci va linga ku va Isareli poku va talisa ohali eci va kala vonjila oku tunda Kegito.+ 3 Kaliye kuende ka ponde va Amaleke+ loku va nyõla+ kumue lovina viosi va kuete. Ku ka va popele;* o va ponda+ ci kaile alume lakãi, omãla loloñaña, olongombe lolomeme kuenda olongamelo lovimbulu.’”+ 4 Saulu wa kovonga omanu kuenda wa va tenda ko Telahimi: Kua kala 200.000 kasualali va endela posi kuenda 10.000 kalume vo ko Yuda.+

5 Saulu wa enda toke volupale lua va Amaleke kuenda wa va lavekela vocimbota.* 6 Saulu wa sapuila va Keni+ hati: “Kuendi, tundi pokati ka va Amaleke, sanga ndu nyõleli kumosi lavo.+ Momo wa lekisi ocisola ka ci pongoloka komanu vosi va Isareli+ eci ovo va tunda Kegito.” Kuenje va Keni va tunda pokati ka va Ameleke. 7 Noke Saulu wa kundula va Amaleke+ oku upisa ko Havila+ toke ko Siuri+ yi kasi ocipepi lo Egito. 8 Eye wa kuata Agage+ soma ya va Amaleke, pole, omanu vosi vakuavo wa va ponda losipata.+ 9 Saulu kuenda omanu, va popela* Agage lovinyama via velapo okuti, oviunda lolongombe via lẽla kuenda olomeme lovina viosi viwa.+ Ovo ka va yonguile oku vi kundula. Pole, ovina viosi okuti ka via kuatele esilivilo haivio via vĩha, va vi kundula.

10 Ondaka ya Yehova yeya ku Samuele yiti: 11 “Nda livela* oku nõla Saulu oco a linge osoma, momo eye wa liwekapo oku ñuama kuenda ka pokuile kolondaka viange.”+ Samuele wa sumuĩle calua kuenje wa likutilila ku Yehova uteke wosi.+ 12 Eci Samuele a pasuka omẽle ociteketeke oco a ka lisange la Saulu, Samuele vo sapuila hati: “Saulu wa enda ko Karimele+ kuenda wa litungilako ociñumañuma conjivaluko.+ Noke wa ñualapo wa lokila ko Giligali.” 13 Eci Samuele a lisanga laye, Saulu wo sapuila hati: “Yehova a ku sumũlũise. Ame nda pokola kondaka ya Yehova.” 14 Pole, Samuele hati: “Momo lie njevitile onjuela yolomeme lonjuela yolongombe?”+ 15 Saulu hati: “Ovio via tambuiwa ku va Amaleke, momo omanu va popela* olomeme via velapo lolongombe oco va vi lumbile ku Yehova Suku yavo; pole, ovina vikuavo tua vi kundula.” 16 Samuele wa sapuila Saulu hati: “Liwekapo! Ndu ku lomboluila eci Yehova a ndi sapuila vuteke wa pita.”+ Eye hati: “Vangula!”

17 Samuele wamisako hati: “Eci wa linga utue wovikoti via Isareli leci Yehova a ku waveka oco o linge osoma yo Isareli,+ siti ove wa simĩle okuti ku silivila?+ 18 Noke Yehova wa ku tuma oku linga upange umue loku popia hati: ‘Kuende, ka nyõle va Amaleke vakuakandu.+ Liyaka lavo toke eci o va kundula.’+ 19 Momo lie kua pokuilile kondaka ya Yehova? Pole, ove wa lupukila locipululu kovina via pundiwa+ kuenje wa linga eci ka ca sungulukile kovaso a Yehova!”

20 Kuenje Saulu wa sapuila Samuele hati: “Pole, ame nda pokola kondaka ya Yehova! Nda tẽlisa upange Yehova a numa kuenje nda nena Agage soma ya va Amaleke, pole, nda kundula omanu va Amaleke.+ 21 Kovina via pundiwa, omanu vopako olomeme lolongombe okuti, ovina via velelepo pokati kevi via nõliwile oku nyõliwa kuenje va vi lumbila ku Yehova Suku yove ko Giligali.”+

22 Samuele wa popia hati: “Anga hẽ Yehova o sanjukila ovilumba vioku pia elisi lolombanjaile+ okuti oku pokola kondaka ya Yehova ci sule? Tala! Oku pokola kua velapo okuti, ocilumba ci sule+ kuenda oku yevelela kua velapo okuti, ulela wolomeme u sule;+ 23 momo esino+ lia lisoka lekandu lioku tãha+ kuenda ocipululu ca lisoka lumbanda loku fendela oviñumañuma.* Omo okuti, wa likala ondaka ya Yehova+ eye wa ku likalavo okuti, ku kala vali osoma.”+

24 Saulu wa sapuila Samuele hati: “Nda linga ekandu, omo sia pokuile kocihandeleko ca Yehova kuenda kolondaka viove, momo nda kala lusumba womanu kuenje nda linga eci ovo va popia. 25 Kaliye mange ohenda, ecela ekandu liange kuenda tu tiukile kumosi oco ndi ka kekamẽle kovaso a Yehova.”+ 26 Pole, Samuele wa sapuila Saulu hati: “Si tiukila love, momo ove wa likala ondaka ya Yehova kuenje Yehova wa ku likalavo okuti, ku kala vali osoma ya va Isareli.”+ 27 Eci Samuele a ñualapo oco a ende, Saulu wa kuata kongenge yocikutu caye ka ci kuete ovoko kuenje ca toka. 28 Kuenje Samuele wo sapuila hati: “Etaili Yehova wa ku upa uviali wa va Isareli kuenda o weca komunu umue okuti, wa ku velapo.+ 29 Handi vali, Una wa velapo ko Isareli+ ka ka liwekapo oku tẽlisa ondaka yaye+ ale oku pongolola ovisimĩlo viaye,* momo Eye hamunuko okuti, o pongolola ovisimĩlo viaye.”*+

30 Eye wa popia hati: “Nda linga ekandu. Pole, ndi sumbile kovaso yakulu vosi vomanu vange kuenda kovaso ya va Isareli. Tiukila lame oco ndi ka kekamẽle kovaso a Yehova Suku yove.”+ 31 Kuenje Samuele wa tiukila la Saulu kuenda Saulu wa kekamẽla kovaso a Yehova. 32 Samuele hati: “Ndi neneli Agage soma ya va Amaleke.” Agage wa enda kokuaye lusumba,* momo Agage wa popele lutima waye muẽle hati: ‘Ohele* yoku fa ya pita ale.’ 33 Samuele wa popia hati: “Ndeci osipata yove ya ponda omãla vakãi valua, ina yove ka ka kuatavo omãla.” Noke Samuele wa teta Agage vovinimbu kovaso a Yehova ko Giligali.+

34 Noke Samuele wa enda ko Rama kuenda Saulu wa tiukila konjo yaye ko Givea ya Saulu. 35 Samuele ka muile vali Saulu toke keteke lioku fa kuaye, momo Samuele wa sumuĩle calua omo lia Saulu.+ Kuenje Yehova wa livela oku lingisa Saulu osoma oco a viale va Isareli.+

16 Yehova wa sapuila Samuele hati: “Toke otembo yipi ove o sumua omo lia Saulu+ una nda likala oku viala ndosoma ko Isareli?+ Yukisa ocikuata* cove lulela,+ kuende. Ndu ku tuma ku Jese+ u Beteleme, momo pokati komãla vaye nda li nõlelapo osoma yimue.”+ 2 Pole, Samuele wa popia hati: “Ngenda ndati? Saulu nda wa ci yeva, o ka ndi ponda.”+ Yehova wa tambulula hati: “Ambata onãle yimue kuenda popia hati: ‘Ndeya oku eca ocilumba ku Yehova.’ 3 Laleka Jese oco a endevo koku lumba kuaco; noke ndu ku sapuila eci o ka linga. O sukila oku mbuavekela omunu ndi nõla.”+

4 Samuele wa linga eci Yehova o sapuila. Eci a pitĩla ko Beteleme,+ akulu vo volupale va kala lusumba poku u sanga kuenda va popia vati: “Oku iya kuove ku lomboloka ombembua?” 5 Eye wa popia hati: “Ku lomboloka ombembua. Ndeya oku eca ocilumba ku Yehova. Liyelisi ene muẽle kuenda enjui lame koku eca ocilumba.” Kuenje eye wa yelisa Jese kuenda omãla vaye valume, noke wa va kovonga oco va ende koku eca ocilumba. 6 Eci va pitĩla, Samuele wa mola Eliyava+ kuenje wa popia hati: “Ocili okuti, u eye ombuavekua ya Yehova.” 7 Pole, Yehova wa sapuila Samuele hati: “Ku ka vanje ño keposo liaye,+ pamue koku lepa kuaye, momo ndo likala. Ndomo omunu a vanja, hacoko Suku a vanja, omunu o vanja lika eci ci molẽha kilu, pole, Yehova o vanja vutima.”+ 8 Kuenje Jese wa kovonga Avinadave,+ wo pitisa kovaso a Samuele, pole, Samuele wa popia hati: “U haeyeko Yehova a nõla.” 9 Noke Jese wa pitisa Siama,+ pole, Samuele wa popia hati: “U haeyekovo Yehova a nõla.” 10 Jese wa pitisa omãla vaye valume epanduvali kovaso a Samuele, pole, Samuele wa sapuila Jese hati: “Yehova ka nõlele laumue pokati kava.”

11 Samuele wa pula Jese hati: “Ava ovo omãla vosi valume o kuete?” Eye wa tambulula hati: “Kua kamba umalẽhe;+ eye o kasi oku lisa olomeme.”+ Samuele wa sapuila Jese hati: “Tuma oku u vilikiya, momo ka tu tumãla oco tu lie osimbu eye ka pitĩlile.” 12 Kuenje wa tuma oku u vilikiya. Umalẽhe waco o kusuka, ovaso aye a finile kuenda eye wa posokele.+ Yehova wa sapuila Samuele hati: “Votoka, u waveka, momo u eye nda nõla!”+ 13 Samuele wa tikula ocikuata culela+ kuenda wo wavekela kovaso a vamanjaye. Espiritu lia Yehova lia wila Daviti tunde keteke liaco.+ Noke Samuele wa votoka kuenda wa enda lonjila yaye ko Rama.+

14 Saulu espiritu lia Yehova lio tunda+ kuenje espiritu lĩvi lia tunda ku Yehova lia kala oku u sakalaisa.+ 15 Akuenje va Saulu vo sapuila vati: “Espiritu lĩvi lia tunda ku Suku, li kasi oku ku sakalaisa. 16 A ñala yetu, handeleka akuenje vove oco va sande ulume umue wa loñoloha koku sika ohalupa.+ Eci espiritu lĩvi li tunda ku Suku li ku wila, eye o sika kuenje ove o liyeva ciwa.” 17 Saulu wa sapuila akuenje vaye hati: “Mangi ohenda, ka sandiliyi ulume umue wa loñoloha koku sika, noke u neni kokuange.”

18 Umue pokati koloñuatisi wa popia hati: “Tala! Nda mola omõla umue wa Jese u Beteleme okuti, wa loñoloha koku sika kuenda eye ukuotõi haeye esualali lia pama.+ Eye o vangula ciwa, wa posoka+ kuenda Yehova o kasi laye.”+ 19 Noke Saulu wa tuma olomunga ku Jese loku popia hati: “Numise omõlove Daviti, una o kasi lolomeme.”+ 20 Noke Jese wa longeka ombolo kocimbulu, lonjeke yocipa yovinyu, lohombo yimue kuenje wa vi tuma ku Saulu kumue lomõlaye Daviti. 21 Kuenje Daviti wa pitĩla ku Saulu, yu wa fetika oku u vumba.+ Saulu wo solele calua kuenda eye wa linga ukuakuambata ovimãleho viaye viuyaki. 22 Saulu wa tuma esapulo ku Jese liokuti: “Mange ohenda, ecelela okuti Daviti amamako oku linga upange wange, momo eye wa sanga ohenda kovaso ange.” 23 Eci espiritu lĩvi lia Suku li wila Saulu, Daviti o tikula ohalupa kuenje o sika kuenda Saulu o tulumũha loku liyeva ciwa noke espiritu lĩvi li tunda kokuaye.+

17 Kuenje va Filisiti+ vongolola asualali* oco va linge uyaki. Vongolokela vo Sokoha+ okuti, ya tiamẽla ko Yuda kuenje va tungila ocilombo pokati ko Sokoha lo Aseka,+ ko Efese-Dami.+ 2 Saulu lalume vo ko Isareli va liongolola kuenda va tunga ocilombo Vocimbota* co Ela+ kuenje va limalẽhela oku ka liyaka la va Filisiti. 3 Va Filisiti va kala konele yimue yomunda kuenda va Isareli va kala konele yikuavo yomunda kuenje pokati kavo pa pita ocimbota.

4 Noke vocilombo ca va Filisiti mua tunda esualali limue lia pama, onduko yaye Goliata,+ eye u Gati+ kuenda vutunga wa kuata ovikeya epandu lepaluma.* 5 Eye wa wala ocikoko cosipi kutue waye kuenda ocikutu covivela okuti, cakaka osipi. Ocikutu+ caco ca lemẽle 5.000 kolosiekele.* 6 Eye wa walavo oviteyuilo viosipi kovolu kuenda wambata unga+ wosipi kapepe aye. 7 Ocikundo cunga waye ca kala ndomakina ya vakuakupota+ kuenda ulame wutale wonjelia yaye wa lemẽle 600 kolosiekele.* Kuenje ukuakuambata ociyepelo caye wa pita kovaso aye. 8 Noke wa talama kuenda wa kalukila asualali a va Isareli+ loku va sapuila hati: “Momo lie wa limalẽheli oku yaka? Siti ame ndu Filisiti kuenje ene siti wapika va Saulu? Nõli ulume umue pokati kene oco a liyake lame. 9 Nda eye wa tẽla oku liyaka lame loku ndi ponda, tu linga apika vene. Pole, nda ndo yula ene vu linga apika vetu loku tu vumba.” 10 U Filisiti wamisako hati: “Etaili ndi liyaka* lolohoka via va Isareli.+ Tumi ulume umue oco a liyake lame!”

11 Eci Saulu la va Isareli vosi va yeva olondaka viu Filisiti, va yokoka kuenda va kuata usumba walua.

12 Daviti wa kala omõla u Efarata+ wo ko Beteleme+ yo ko Yuda o tukuiwa hati, Jese+ una wa kuata omãla ecelãla+ okuti, koloneke via Saulu wa kukile ale. 13 Omãla vatatu va Jese okuti akulu, va kuama Saulu kuyaki.+ Olonduko viomãla vaco vatatu va endele kuyaki vievi: watete Eliyava,+ wavali Avinadave,+ watatu Siama.+ 14 Daviti eye wa kala kuasula+ kuenda va huvaye vatatu va kuama Saulu.

15 Daviti wa endaile ku Saulu noke wa enda oku tiuka oku ka lisa olomeme+ via isiaye ko Beteleme. 16 Vokuenda kueci ci soka 40 koloneke, u Filisiti wa enda oku amela kokuavo loku limalẽhela uyaki komẽle lo koñolosi.

17 Eteke limue Jese wa sapuila omõlaye Daviti hati: “Tikula o efa* eyi yolomema via kangiwa lolombolo ekũi kuenje ka vi tuale lonjanga ku va huvove kocilombo. 18 Ambata olonepa ekũi viondeki* kusongui wohulukãi; kũlĩhĩsavo va huvove ndomo va kasi kuenda nena ondimbukiso yimue yi lekisa okuti va kasi ciwa.” 19 Ovo va kala la Saulu kumue lalume vosi vakuavo vo ko Isareli Vocimbota* co Ela+ oku liyaka la va Filisiti.+

20 Daviti wa pasuka selo komẽle kuenda wa handeleka umue oco a lave ocunda colomeme; eye wa lipongiya kuenje wa enda ndeci Jese o tuma. Eci a pitĩla kocilombo, asualali va kala oku enda kuyaki, loku imba ocisungo cuyaki. 21 Va Isareli kumue la va Filisiti va lipongiyila oku yaka, ava konele yimue ava konele yikuavo. 22 Daviti wa siapo lonjanga ovikuata viaye kuenda wa tuma oku vi lava kukuakulava ovikuata kuenje wa lupukila kocitumãlo cuyaki. Eci a pitĩla, wa pula nda va huvaye va kala ciwa.+

23 Osimbu a kala oku vangula lavo, Goliata+ ukuavita, u Filisiti wo ko Gati weya. Eye wa tunda pocitumãlo cuyaki ca va Filisiti kuenje wa pitulula olondaka viaye viatete+ kuenda Daviti wa vi yeva. 24 Eci alume vosi vo ko Isareli va mola ulume waco, va yokoka kuenje vo tila.+ 25 Alume vo ko Isareli va popia vati: “Vu lete ulume o kasi oku iya? Eye o kasi oku iya oco a liyake* lo Isareli.+ Ulume wosi wo ponda, soma u wĩha ovokuasi alua kumue lomõlaye ufeko+ kuenje onjo ya isiaye ka yi feti vali elisimu kuenda ka va vumbi vali soma.”

26 Daviti wa pula alume va kala ocipepi laye hati: “Nye ci ka lingiwa lulume o ponda u Filisiti loku malako esepu ku va Isareli? Helie u Filisiti waco ka seviwile evamba okuti, o liyaka* lolohoka via Suku o kasi lomuenyo?”+ 27 Omanu vo tambulula ovina vo sapuila ale vati: “Eci oco ci ka lingiwa lulume u ponda.” 28 Eci Eliyava+ huva a Daviti a yeva okuti eye wa kala oku sapela lalume vaco, wa temẽla Daviti loku popia hati: “Momo lie weyilila kulo? Kuenda olomeme wa vi sia lelie vekalasoko haivio vitito?+ Nda kũlĩha ciwa epela liove, lovisimĩlo vĩvi viutima wove; weya lika kulo oco o mole uyaki.” 29 Noke Daviti wa tambulula hati: “Nye nda linga? Ame nda pula ño!” 30 Eye wa tunda wa enda komanu vakuavo loku linga epulilo limuamue+ kuenje omanu vo tambulula lonjila yimuamue.+

31 Olondaka via Daviti via yevala komanu kuenje va vi sapuila ku Saulu. Noke eye wo tuma oku u vilikiya. 32 Daviti wa sapuila Saulu hati: “Lomue ka ka pue utõi omo liu Filisiti waco. Ukuenje wove o liyaka laye.”+ 33 Pole, Saulu wa sapuila Daviti hati: “Ove ku ka tẽla oku liyaka lu Filisiti u, momo ove wumalẽhe+ kuenda eye esualali* tunde vutila waye.” 34 Daviti wa tambulula Saulu hati: “Upika wove ukuakulisa olomeme via isiaye,+ eci kueyile ohosi lokanyani, ocinyama locinyama copa omeme yimue vocunda. 35 Ame nda yi kuama noke nda yi ponda kuenje nda yovola omeme komẽla walio. Eci oyo ya kala oku iya kokuange, nda yi kuata posingo* kuenje nda yi ponda. 36 Upika wove wa ponda ale ohosi lokanyani, cimuamue haico a ka linga lu Filisiti u okuti, ka seviwile evamba, momo wa sanumũla* lolohoka via Suku o kasi lomuenyo.”+ 37 Daviti wamisako hati: “Yehova una wa ndi popela peka liohosi lokanyani, o ka ndi popelavo peka liu Filisiti u.”+ Noke Saulu wa sapuila Daviti hati: “Kuende, Yehova a kale love.”

38 Kuenje Saulu wa walisa uwalo waye ku Daviti. Wa kapa ocikoko caye cosipi kutue wa Daviti, noke wo walisa ocikutu covivela. 39 Daviti wa somẽha osipata vuwalo waye kuenje wa seteka oku enda, pole, ka ci tẽlele, momo ka la wala ovina viaco. Daviti wa sapuila Saulu hati: “Si tẽla oku enda lovina evi, momo sia la wala ovina viaco.” Kuenje Daviti wa vi lula. 40 Eye wa tikula ombueti yaye kuenda wa nõla ovawe atãlo vocimbota* loku a kapa vonjeke yaye yungombo, epipili+ lia kala peka liaye. Kuenje wa fetika oku enda toke ku Filisiti.

41 U Filisiti wa fetika oku amela ocipepi la Daviti kuenda ukuakuambata ociyepelo caye wa pita kovaso aye. 42 Eci u Filisiti a mola okuti Daviti wa kala umãlehe umue wa fina haeye o kusuka, wa fetika oku u pembula.+ 43 U Filisiti wa sapuila Daviti hati: “Anga hẽ ndi mbua+ okuti wiya kokuange lombueti?” Kuenje u Filisiti wa siñala Daviti vonduko yolosuku viaye. 44 U Filisiti wa sapuila Daviti hati: “Enju kokuange kuenje ngeca etimba liove kolonjila viovailu lo kovinyama viovusenge.”

45 Daviti wa tambulula u Filisiti hati: “Ove wiya kokuange losipata, lunga kuenda onjelia,+ pole, ame ndiya kokuove vonduko ya Yehova ukualohoka,+ haeye Suku ya va Isareli ukualohoka una ove o yongola oku liyaka* laye.+ 46 Etaili muẽle Yehova o ku eca peka liange;+ kuenje ame ndu ku ponda loku teta utue wove; etaili ngeca ovivimbi viasualali a va Filisiti kolonjila vio kovailu kuenda kovinyama viovusenge vio kilu lieve; kuenje omanu vo kolonepa viosi violuali va ka limbuka okuti ko Isareli kuli Suku umue.+ 47 Vosi va liongoluila palo,* va ka limbuka okuti, Yehova ka popela losipata,+ ale lunga, momo uyaki wa tiamẽla ku Yehova+ kuenda eye o ka eca vosi yene povaka etu.”+

48 Noke u Filisiti wa kala oku amela ku Daviti, pole, Daviti wa lupuka lonjanga toke pocitumãlo cuyaki oco a liyake lu Filisiti. 49 Daviti wa kapa eka liaye vonjeke kuenje wa tikula ewe limue, wa li kapa vepipili kuenje wa limba longusu. Ewe liaco lia iñilila pupolo wu Filisiti kuenje wa kupuka locipala posi.+ 50 Daviti wa yula u Filisiti lepipili kuenda ewe; Daviti wa veta u Filisiti loku u ponda ndaño okuti Daviti ka kuatele osipata peka.+ 51 Daviti wa yoloka kuenda wa talama kovaso yu Filisiti. Eye wa pola osipata yu Filisiti+ kuenje wa malusula oku u ponda poku u teta utue. Eci va Filisiti va mola okuti, onõi yavo ya fa, ovo va tila.+

52 Noke alume vo ko Isareli kuenda vo ko Yuda va votoka kuenda va fetika oku kaluka loku landula va Filisiti oku upisa kocimbota+ toke kolombundi vio Ekirone+ kuenje ovivimbi via va Filisiti via lisanduila vetapalo lio Siarai+ oku upisa ko Gati toke ko Ekirone. 53 Va Isareli noke yoku landula va Filisiti, va tiuka kuenje va punda ovilombo viavo.

54 Daviti wa tikula utue wu Filisiti kuenje wa wambata ko Yerusalãi, pole, ovimalẽho viu Filisiti wa vi kapa vombalaka yaye.+

55 Eci Saulu a mola okuti Daviti wa kala oku enda oku ka lisanga lu Filisiti, eye wa pula Avinere usongui wolohoka hati: “A Avinere,+ helie isia yumalẽhe u?”+ Avinere wa tambulula hati: “A ñala yange, ndomo o kasi lomuenyo, A soma, ame sio kũlĩhĩle!” 56 Soma wa popia hati: “Kũlĩhĩsa nda helie isia yumalẽhe u.” 57 Eci Daviti a tiuka noke yoku ponda u Filisiti, Avinere wo ambata toke ku Saulu kuenda Daviti wa kala lutue wu Filisiti+ peka. 58 Saulu wo pula hati: “Omalẽhe, helie isiove?” Daviti wa tambulula hati: “Ndimõla wupika wove Jese+ u Beteleme.”+

18 Eci Daviti a mala oku sapela la Saulu, Yonatão+ la Daviti va linga akamba* kuenda Yonatão wo sola ndeci a lisole eye muẽle.+ 2 Tunde keteke liaco, Saulu wa kala la Daviti kuenda eye ka tavele okuti, Daviti o tiukila vali konjo ya isiaye.+ 3 Yonatão la Daviti va linga ocisila cimue,+ momo Yonatão wo solele ndeci a lisole eye muẽle.+ 4 Yonatão wa lula ocikutu caye ka ci kuete ovoko, wa ceca ku Daviti kumue luwalo waye wuyaki, losipata yaye, lohonji yaye kuenda uvia waye. 5 Daviti wa enda oku kuata onima yiwa*+ kuosi Saulu a enda oku u tuma. Kuenje Saulu wa nõla Daviti oco a linge usongui wolohoka,+ eci ca sanjuisa calua omanu vosi kuenda apika va Saulu.

6 Eci Daviti kumue lasualali vakuavo va tiuka noke yoku kundula va Filisiti, akãi va tunda valupale osi o ko Isareli oco va ka lisange la Soma Saulu loku piluka kuenda oku imba ocisungo+ lolopandelu+ kumue lovikuata viovisikilo vi kuete ovikolo vitatu. 7 Akãi va linga ocipito loku imba ndoco:

8 Saulu eci a yeva ocisungo caco wa sumua kuenda wa tema calua,+ eye wa popia hati: “Ovo va tendela Daviti ekũi liolohulukãi, pole, ame va nendela lika olohulukãi. Pa kamba ño oku eca usoma kokuaye!+ 9 Oku upisa keteke liaco, Saulu wa fetika oku suvuka Daviti.

10 Keteke lia kuamamo, osimbu Daviti a kala oku sika ohalupa+ ndomo a endaile oku ci linga, espiritu lĩvi lia tunda ku Suku lia wila Saulu+ kuenje eye wa kala ndu okuti eyui* vonjo yaye. Saulu wa kala lunga waye peka,+ 11 kuenje wa imba unga+ loku popia vutima waye hati: ‘Ndi tomẽla Daviti vocimano!’ Pole, Daviti wa puluka olonjanja vivali. 12 Noke Saulu wa kuatela usumba Daviti, momo Yehova wa kala laye,+ pole, wa yandulukile Saulu.+ 13 Saulu wopa Daviti kupange waye kuenje wo wĩha ocikele cusongui wohulukãi yasualali loku va songuila kuyaki.*+ 14 Daviti wamamako oku kuata onima yiwa*+ kovina viosi a lingaile, momo Yehova wa kala laye.+ 15 Eci Saulu a limbuka okuti Daviti wa kala oku kuata onima yiwa, wo kuatela usumba. 16 Pole, va Isareli vosi la va Yuda va solele calua Daviti, momo wa enda oku va songuila kovoyaki avo.

17 Noke Saulu wa sapuila Daviti hati: “U eye omõlange uveli o tukuiwa hati, Merava.+ Ndu weca kokuove oco a linge ukãi wove.+ Pole, ove o sukila oku amamako oku ndi vumba lutõi loku linga ovoyaki a Yehova.”+ Momo Saulu wa popia lutima waye hati: ‘Si olũila eka liange kokuaye. Eye a file peka lia va Filisiti.’+ 18 Kuenje Daviti wa sapuila Saulu hati: “Ame elie, vangandiange velie kuenda velie epata lia isiange ko Isareli oco ndi kuele lomõla ufeko wa soma?”+ 19 Eci otembo ya Saulu ya pitĩla yoku eca omõlaye Merava oco a linge ukãi wa Daviti, eye wa eciwile ale ku Adriyele,+ u Maholati oco a linge ukãi waye.

20 Mikale+ omõla a Saulu wa solele Daviti kuenje eci va ci sapuila Saulu, eye wa ci sanjukila. 21 Omo liaco, Saulu wa popia hati: “Ame ndu weca kokuaye oco a kale ndonjanjo okuti, o kupukila peka lia va Filisiti.”+ Kuenje Saulu wa sapuila Daviti onjanja yavali hati: “Etaili o kuela lomõlange ufeko.” 22 Handi vali, Saulu wa handeleka apika vaye hati: “Sapeli la Daviti pokolika kuenda u sapuili hati: ‘Tala! Soma wa ku sanjukila kuenda apika vosi va ku sole. Cilo tava oku kuela lomõla ufeko wa soma.’” 23 Eci apika va Saulu va sapuila ovina viaco ku Daviti, Daviti wa popia hati: “Ene vu sima okuti ca leluka kokuange oku kuela lomõla ufeko wa soma, ame nduhukũi haime nda sepuiwa?”+ 24 Apika va Saulu vo sapuila vati: “Evi ovio olondaka via Daviti.”

25 Saulu wa popia hati: “Eci oco vu sapuila ku Daviti okuti: ‘Soma ka yongola oku pinga ondando+ yoku lomba ufeko, eye o yongola lika 100 koviyuvuluila+ via va Filisiti oco a fetuluinye ovanyãli va soma.’” Momo Saulu wa kala oku tumbika ongombo oco Daviti a file peka lia va Filisiti. 26 Apika vaye va sapuila olondaka viaco ku Daviti kuenda Daviti wa sanjukila oku kuela lomõla ufeko wa soma.+ Osimbu otembo ya sokiyiwa ka ya tẽlele, 27 Daviti wa enda lalume vaye, yu va ponda 200 ya va Filisiti kuenda Daviti wa nena oviyuvuluila viavo viosi ku soma oco a kuele omõla ufeko wa soma. Kuenje Saulu wo wĩha omõlaye ufeko Mikale oco a linge ukãi waye.+ 28 Saulu wa limbuka okuti Yehova wa kala la Daviti+ kuenda omõlaye Mikale wo solele.+ 29 Eci ca lingisa okuti, Saulu o kuata usumba walua la Daviti kuenda Saulu wa linga unyãli wa Daviti vokuenda kuomuenyo waye wosi.+

30 Olonjanja viosi eci olombuale via va Filisiti via seteka oku ka linga uyaki, Daviti wa enda oku kuata onima yiwa* okuti, apika vosi va Saulu+ va sule kuenda onduko yaye ya sumbiwile calua.+

19 Saulu wa sapuila omõlaye Yonatão lapika vaye vosi ocisimĩlo caye coku ponda Daviti.+ 2 Omo okuti Yonatão omõla a Saulu wa solele calua Daviti,+ Yonatão wa sapuila Daviti hati: “Isiange Saulu o yongola oku ku ponda. Hẽla lomẽle lunguka kuenda kala pocitumãlo cimue cohã, salama. 3 Ngenda la isiange pocitumãlo ove o ka kala. Ndi vangula la isiange catiamẽla kokuove, nda nda limbuka cimue, hu sapuilako.”+

4 Yonatão wa vangula ovina viwa ku isiaye Saulu viatiamẽla ku Daviti.+ Eye wo sapuila hati: “Soma ka ka linge cĩvi kupika waye Daviti, momo eye ka ku lingile lacimue cĩvi kuenda eci eye a linga ca ku kuatisa. 5 Eye wa kapa kohele omuenyo waye oco a ponde u Filisiti+ kuenje Yehova wa eca eyulo linene* ku va Isareli vosi. Ove wa ci mola kuenda wa ci sanjukila. Momo lie o lingila ekandu lioku pesela osonde yomunu wa pua eko poku ponda Daviti ndaño ka lingile cimue?”+ 6 Saulu wa yevelela Yonatão kuenda Saulu wa lisila hati: “Ndeci Yehova a kasi lomuenyo, Daviti ka pondiwa.” 7 Noke Yonatão wa vilikiya Daviti kuenje wo sapuila ovina viosi evi. Omo liaco, Yonatão wambata Daviti ku Saulu kuenje Daviti wamamako oku vumba Saulu ndeci a ci lingaile ale.+

8 Noke kueya vali uyaki kuenda Daviti wa tunda oco a liyake la va Filisiti, yu wa ponda omanu valua kuenje va Filisiti vo tila.

9 Osimbu Daviti a kala oku sika ohalupa, espiritu lĩvi lia tunda ku Yehova lia wila Saulu+ eci a kala konjo yaye lunga waye peka.+ 10 Saulu wa seteka vali oku toma Daviti vocimano lunga, pole, Daviti wa tila Saulu una wa imba unga vocimano. Daviti wa tila kuenda wa puluka vokuenda kuteke waco. 11 Noke Saulu wa tuma olomunga konjo ya Daviti oco viu lavekele loku u ponda lomẽle,+ pole, Mikale ukãi wa Daviti wo sapuila hati: “Nda kua tilile uteke ulo, hẽla o ka pondiwa.” 12 Mikale wa lowisila lonjanga Daviti ponjanela oco eye a tile loku puluka. 13 Mikale wa tikula ociñumañuma,* wa ci kapa pula kuenda wa kapa owanda wovonya ohombo konele Daviti a enda oku kapa utue kuenje ukãi wa ci sikĩlĩla luwalo.

14 Saulu wa tuma olomunga oco vi kope Daviti, pole, ukãi hati: “Eye o vela.” 15 Saulu wa tuma olomunga oco vi ka tale Daviti kuenje wa vi sapuila hati: “U neni kokuange lula waye, oco a pondiwe.”+ 16 Eci olomunga via iñila vonjo, via sanga ociñumañuma* pula lowanda wovonya ohombo ponele pa siata oku kala utue wa Daviti. 17 Saulu wa pula Mikale hati: “Momo lie wa ndi pakuila poku kuatisa unyãli wange+ oku puluka?” Mikale wa tambulula Saulu hati: “Eye wa ndi sapuila hati: ‘Ecelela okuti ngenda, sanga ndu ku ponda!’”

18 Daviti wa tila, yu wa puluka kuenje wa enda ku Samuele ko Rama.+ Daviti wa sapuila Samuele ovina viosi Saulu a linga kokuaye. Noke eye la Samuele va enda, yu va kala ko Nayota.+ 19 Kuenje va sapuila Saulu hati: “Tala! Daviti o kasi ko Nayota ko Rama.” 20 Saulu wa tuma olomunga oco vi kuate Daviti. Eci ovio via mola ovaprofeto akulu oku imba owanji kuenda Samuele wa talama oku va songuila, espiritu lia Suku lia wila olomunga via Saulu noke ovio via fetika oku imba owanji.

21 Eci va ci sapula ku Saulu, eye lonjanga wa tuma olomunga vikuavo kuenda ovio via kala oku imbavo owanji. Kuenje Saulu wa tuma vali olomunga vikuavo okuti, ocimunga catatu kuenje ovio va fetikavo oku imba owanji. 22 Noke eye wa endavo ko Rama. Eci a pitĩla pocisimo cinene ci kasi ko Seku, eye wa pula hati: “Samuele la Daviti va kasi pi?” Ovo vati: “Va kasi ko Nayota+ ko Rama.” 23 Osimbu Saulu a kala vonjila oku enda ko Nayota ko Rama, espiritu lia Suku lio wilavo, yu wamamako oku enda loku imba owanji toke eci a pitĩla ko Nayota ko Rama. 24 Saulu wa lula uwalo waye, wa imbavo owanji kovaso a Samuele kuenda wa pekela posi luwalo wo kosi lika eteke liaco liosi kuenda uteke wosi. Eli olio esunga lieci ovo va popela vati: “Anga hẽ Saulu o kasivo pokati kovaprofeto?”+

20 Daviti wa tunda ko Nayota ko Rama. Weya ku Yonatão loku popia hati: “Nye nda linga?+ Eko lipi ñuete kuenda ekandu lipi nda lingila isiove oco eye a sande omuenyo wange?” 2 Yonatão wo sapuila hati: “Eci ka ci lingiwa!+ Ove ku ka fa. Tala! Isiange ka ka linga lacimue cinene ale citito okuti, ka ndi sapuilako. Momo lie isiange a ndi limbikila ocina cimue ndeci? Eci ka ci lingiwa.” 3 Daviti wa lisinga hati: “Isiove wa kũlĩha okuti nda sanga ohenda kovaso ove+ kuenje wa popia hati: ‘Yonatão ka ka ci kũlĩhe, sanga o sumua.’ Pole, ndeci Yehova a kasi lomuenyo kuenda ndeci ove o kasi lomuenyo, ndopo ndi fa!”+

4 Yonatão wa sapuila Daviti hati: “Cosi o popia ndi ci linga.” 5 Daviti wa sapuila Yonatão hati: “Hẽla ocipito cosãi yokaliye+ kuenda soma o lavoka okuti, ndi tumãla konele yaye oco tu lie; ecelela okuti ngenda kuenda ha salama vusenge toke koñolosi keteke liatatu. 6 Nda isiove wa mulisa popia hati: ‘Daviti wa minga oco a ende lonjanga kolupale luaye ko Beteleme,+ momo va ka linga ocipito coku lumba ocilumba ceciwa unyamo lunyamo kumue lepata liaye liosi.’+ 7 Nda eye wa tambulula hati: ‘Ciwa,’ ci lomboloka ombembua kupika wove. Pole, nda eye wa tema, ove o limbuka okuti eye o yongola oku ndi lemẽha. 8 Lekisa ocisola ka ci pongoloka kupika wove,+ momo wa linga ocisila cimue lupika wove kovaso a Yehova.+ Pole, nda ndi kuete ekandu,+ ndi ponde ove muẽle. Momo lie o ñualela ku isiove?”

9 Yonatão wa popia hati: “Eci ka ci lingiwa kokuove! Nda nda limbuka okuti isiange o yongola oku ku lemẽha, anga hẽ si ku sapuilako?”+ 10 Daviti wa pula Yonatão hati: “Helie o ka ndi sapuilako nda isiove wa ku tambulula lonyeño?” 11 Yonatão wa sapuila Daviti hati: “Enju, tu endele kumosi vusenge.” Kuenje kavali kavo va enda vusenge. 12 Yonatão wa sapuila Daviti hati: “Yehova Suku ya Isareli a linge ombangi yokuti, hẽla ale keteke liatatu kowola ndeyi, ndi linga apulilo amue ku isiange. Nda eye wa kuata ovisimĩlo viwa viatiamẽla ku Daviti, anga hẽ si tumi oku ku sapuilako? 13 Pole, nda isiange o yongola oku ku lemẽha, Yehova a kangise calua Yonatão nda sia ku sapuilileko loku ku tuma lombembua. Yehova a kale love+ ndeci a kala la isiange.+ 14 Anga hẽ ove ku ka lekisa ocisola ka ci pongoloka ca Yehova kokuange osimbu ñasi lomuenyo ndaño ceci ndi fa?+ 15 Amamako oku lekisa ocisola ka ci pongoloka ku vakuanjo yange,+ ndaño ceci Yehova a kundula ovanyãli vosi va Daviti kilu lieve.” 16 Kuenje Yonatão wa linga ocisila lonjo ya Daviti hati: “Yehova o ka kundula ovanyãli vosi va Daviti.” 17 Yonatão wa pinga ku Daviti oco a lisinge vali omo liocisola o kuetele, momo wo solele calua ndeci eye a lisole eye muẽle.+

18 Yonatão wo sapuila hati: “Hẽla eteke liocipito cosãi yokaliye+ kuenda va ka ku sandiliya, momo omangu yove yi kala upolokoso. 19 Keteke liatatu va ka ku sandiliya calua kuenda o sukila oku enda pocitumãlo wa salamẽle eteke lia pita* loku kala ocipepi lewe eli. 20 Ngasa ovisongo vitatu konele yimue yewe, ndu okuti ñasi oku imba kocina cimue. 21 Eci ndi tuma oñuatisi ndi ka popia hati: ‘Kuende, kope ovisongo.’ Nda nda popia koñuatisi okuti, ‘Tala! Ovisongo vi kasi konele yove eyi, ka vi upe,’ ove citava okuti o tiuka, momo ndeci Yehova a kasi lomuenyo eci ci lomboloka okuti, ovina viosi vi kasi ciwa kokuove kuenda ka kuli ohele. 22 Pole, nda nda popia koñuatisi okuti, ‘Tala! Ovisongo vi kasi konyima yove,’ ove kuende, momo Yehova o kasi oku ku tuma oku enda. 23 Catiamẽla kohuminyo tua linga+ ove lame, Yehova a linge ombangi pokati ketu otembo ka yi pui.”+

24 Kuenje Daviti wa salama vusenge. Eci lia pitĩlapo epuluvi lioku linga ocipito cosãi yokaliye, soma wa tumãla komangu yaye oco a lie.+ 25 Soma wa tumãlele pomangu yaye pana a siata ale oku tumãla konele yocimano. Yonatão wa tumãla komangu ya imba ovaso kokuaye kuenda Avinere+ wa tumãlele konele ya Saulu, pole, ocitumãlo ca Daviti ca kala upolokoso. 26 Eteke liaco, Saulu ka popele lacimue, momo wa vangula lutima waye hati: ‘Citava okuti, kua pita cimue kuenda eye ka li yelisile.+ Ocili, eye pamue wa li vĩhisa.’ 27 Keteke lia kuamamo okuti keteke liavali liocipito cosãi yokaliye, omangu ya Daviti ya kala vali upolokoso. Noke Saulu wa pulisa omõlaye Yonatão hati: “Momo lie omõla a Jese+ keyilile oku lia ci kaile hẽla kuenda etaili?” 28 Yonatão wa tambulula Saulu hati: “Daviti wa ndi pinga oco ndu ecelele oku enda ko Beteleme.+ 29 Eye wa popia hati: ‘Mange ohenda ngecelele oku enda, momo epata liange li ka eca ocilumba volupale kuenda huvange wa mbilikiya. Nda nda sanga ohenda kovaso ove, linga ngende oco ndi ka lisange la va huvange.’ Eli olio esunga lieci eye keyilile komesa ya soma.” 30 Kuenje Saulu wa kuatela onyeño Yonatão kuenda wo sapuila hati: “Ove wumõla wukãi umue wa sina, wa sima hẽ okuti sia ci kũlĩhĩle okuti o kasi oku nõlapo oku tiamẽla konele yomõla a Jese okuti, ci ku kutisa osõi ove muẽle, loku kutisavo osõi ina yove?* 31 Osimbu omõla a Jese a kasi lomuenyo kilu lieve, ove luviali wove ka vu kolipo.+ Kaliye tuma umue oco o nenele kokuange, momo eye o sesamẽla oku fa.”*+

32 Yonatão wa pulisa isiaye Saulu hati: “Momo lie eye a sesamẽlela oku pondiwa?+ Nye eye a linga?” 33 Saulu wo wimba unga oco o ponde+ kuenje Yonatão wa limbuka okuti, isiaye wa yonguile muẽle oku ponda Daviti.+ 34 Yonatão wa votoka lonjanga komesa lonyeño yalua kuenda ka lile lacimue keteke liavali noke yocipito cosãi yokaliye, momo wa sumuĩle calua omo lia Daviti+ kuenda isiaye wo kutisa osõi.

35 Komẽle Yonatão wa enda vusenge loñuatisi yaye oku ka lisanga la Daviti.+ 36 Eye wa sapuila oñuatisi yaye hati: “Mange ohenda, lupuka ka nõle ovisongo ngasasa.” Oñuatisi ya lupuka kuenda Yonatão wasa usongo konyima yaye. 37 Eci oñuatisi ya pitĩla pocitumãlo Yonatão asa usongo, Yonatão wa pulisa oñuatisi hati: “Usongo hẽ ka u kasi vali kovaso?” 38 Yonatão wa sapuila oñuatisi hati: “Lupuka! Kuende lonjanga! Yayulako!” Kuenje oñuatisi ya Yonatão ya tikula ovisongo kuenda ya tiuka ku cime caye. 39 Oñuatisi ka ya kuatele elomboloko liolondaka viaco; Yonatão la Daviti ovo lika va kũlĩhĩle elomboloko liaco. 40 Kuenje Yonatão wa eca ovimãleho viaye viuyaki koñuatisi yaye kuenda wo sapuila hati: “Kuende, vi ambata volupale.”

41 Eci oñuatisi ya enda, Daviti wa tunda vocitumãlo a kala ocipepi konele yombuelo. Kuenje wa petamisa ocipala caye posi kuenda wa kekama olonjanja vitatu, va lisipula omunu lukuavo loku lilila kumosi, pole, Daviti wa lilapo vali calua. 42 Yonatão wa sapuila Daviti hati: “Kuende lombembua, momo kavali ketu tua lisila+ vonduko ya Yehova okuti, ‘Yehova a linge ombangi pokati kange love kuenda pokati kocitumbulukila* cove locitumbulukila* cange otembo ka yi pui.’”+

Kuenje Daviti wa votoka, yu wa enda kuenda Yonatão wa tiukila volupale.

21 Noke Daviti weya ko Nove+ ku Ahimeleke ocitunda. Ahimeleke wa fetika oku luluma eci a lisanga la Daviti kuenje wo pula hati: “Momo lie weyilila lika liove okuti, lomue wa ku kuama?”+ 2 Daviti wa tambulula Ahimeleke ocitunda hati: “Soma wa numa oku linga cimue, pole, wa popia hati: ‘Ku ka sapuileko laumue upange nda ku tuma lolonumbi nda ku ĩha.’ Nda likunda lakuenje vange oco tu lisange pocitumãlo cimue. 3 Kaliye nda o kuete olombolo vitãlo, vi nyĩhe ale cimue cikuavo o kuete.” 4 Pole, ocitunda ca tambulula Daviti citi: “Ka kuli ombolo yaño, kuli lika ombolo yi kola,+ citava okuti, vu yi lia nda akuenje vove ka va la lipekela lakãi.”+ 5 Daviti wa tambulula ocitunda hati: “Kolela okuti, akãi va kala ocipãla letu ndeci olonjanja vikuavo eci tua endele kuyaki.+ Nda kupange waño atimba akuenje vaco a kola, ca piãla enene etaili te a kola!” 6 Ocitunda co wĩha olombolo vi kola,+ momo ka pa kaile vali olombolo vikuavo te lika olombolo via taliwa, vina viopiwa kovaso a Yehova oco vi piñanyiwe lolombolo viokaliye keteke va viupapo.

7 Keteke liaco, upika umue wa Saulu opo a kala. Eye wa kisikiwa oku kala kovaso a Yehova. Onduko yaye Doege+ u Edome,+ haeye usongui wangombo va Saulu.

8 Noke Daviti wa sapuila Ahimeleke hati: “Anga hẽ ove o kuete unga umue ale osipata? Sia nenele osipata yange, ale ovimãleho viange viuyaki, momo upange soma a numa wonjanga.” 9 Ocitunda citi: “Kulo tu kuete osipata ya Goliata+ u Filisiti, una ove wa ponda Vocimbota* co Ela,+ ya muñiwa vuwalo konyima yevendalia.+ Nda o yongola oku yi tikula oco yi kale yove citava, momo oyo lika tu kuete kulo.” Daviti hati: “Ka kuli osipata ya lisoka leyi. Yi nyĩhe.”

12 Daviti wa sokolola kolondaka viaco kuenje wa kuatela usumba+ Soma Akisi wo ko Gati. 13 Osimbu a kala pokati kavo*+ eye wa likembisa ndeyui. Wa fetika oku soneha olondimbukiso polombundi kuenda wa ecelela okuti ovate aye a lokila kolonjele. 14 Noke Akisi wa sapuila apika vaye hati: “Ene wa moli okuti, ulume u eyui! Momo lie wo neneli kokuange? 15 Siti ndi kuete ale alume valua ayui, handi vu ndi nenela vali umue? Momo lie ulume u a eceliwa oku iñila vonjo yange?”

22 Kuenje Daviti wa tundako,+ yu wa tilila veleva lio ko Adulama.+ Eci va huvaye la vosi vakuanjo ya isiaye va ci yeva, va enda toke oku eye a kala. 2 Vosi vana va kala lovitangi, la vana va kuatele olofuka kuenda vana va sumuĩle, va likongela kokuaye kuenje eye wa linga usongui wavo. Alume va kala laye va tẽla 400.

3 Noke Daviti wa tundakovo, wa enda ko Misipa ko Moavi kuenda wa sapuila soma yo Moavi hati:+ “Mange ohenda, ecelela okuti isiange la ina yange va kala love toke eci ndi kũlĩha eci Suku a ka ndi lingila.” 4 Eye wa va sia la soma yo Moavi kuenje ovo va kala laye otembo yosi Daviti a kala vocitumãlo ceteyuilo.+

5 Vokuenda kuotembo, Gadi+ uprofeto wa sapuila Daviti hati: “Ku ka kale vali vocitumãlo ceteyuilo. Tundamo, kuende vofeka yo Yuda.”+ Omo liaco, Daviti wa tundamo, yu wa enda vusenge wo Herete.

6 Saulu wa yeva okuti, Daviti lalume vaye va sangiwa. Saulu wa kala ko Givea+ wa tumãla pokamunda vemẽhi liuti wo tamargueira lunga waye peka kuenda apika vaye vo ñuala. 7 Saulu wa sapuila apika vaye vo ñuala hati: “Ene a va Benjamini yeveleli. Anga hẽ omõla a Jese+ o ka eca ovapia locumbo cayuva ku vosi yene? Anga hẽ o ko wĩhi ocikele casongui volohulukãi kuenda casongui vovita?+ 8 Vosi yene wa ndi ñualelipo! Lomue wa ndi sapuila okuti, omõlange wa linga ocisila cimue lomõla a Jese!+ Lomue pokati kene o ñuetele ohenda yoku ndi sapuila okuti, omõlange wa vetiya upika wange oku ndi ñualelapo loku ndi lavekela ndeci ci kasi oku lingiwa cilo.”

9 Noke Doege+ u Edome una wa kala kumue lapika va Saulu, wa tambulula hati:+ “Nda mola omõla a Jese eci eya ko Nove ku Ahimeleke omõla a Ahituva.+ 10 Ahimeleke wa pulisa Yehova vonduko yaye kuenda wo wĩha okulia. Wo wĩhavo osipata ya Goliata u Filisiti.”+ 11 Noke soma wa tuma oku vilikiya Ahimeleke omõla a Ahituva ocitunda, lovitunda viosi vionjo ya isiaye vina via kala ko Nove. Kuenje vosi yavo va enda ku soma.

12 Saulu wa popia hati: “Amõla a Ahituva, yevelela!” eye wa tambulula hati: “Ame ulo, a ñala yange.” 13 Saulu wo pula hati: “Momo lie wa ndi ñualelapo, ove kumue lomõla a Jese poku u wĩha ombolo losipata loku pulisa Suku vonduko yaye? Eye wa ndi ñualelapo kuenda o yongola oku ndi lavekela ndeci ci kasi oku lingiwa cilo.” 14 Ahimeleke wa tambulula soma hati: “Helie pokati kapika vove okuti wa koleliwa* ndeci Daviti?+ Eye omõla ufeko wa soma+ kuenda usongui wolondavululi viove, haeye wa sumbiwa konjo yove.+ 15 Anga hẽ etaili lika nda pulisa Suku vonduko yaye?+ Kokuange, eci o kasi oku popia ka ca sungulukile! Soma ka ka linge lacimue kupika waye kuenda konjo yosi ya isiange, momo upika wove ka kũlĩhĩle lacimue catiamẽla kondaka eyi.”+

16 Pole, soma hati: “Ove a Ahimeleke, o fa muẽle+ kumue lonjo yosi ya isiove.”+ 17 Soma wa sapuila olondavululi* vio ñuala hati: “Kuendi, ka pondi ovitunda via Yehova, momo via nõlapo oku tiamẽla konele ya Daviti! Ovio via kũlĩhĩle okuti eye wa kala oku tila, pole, ka via ndi sapuilileko!” Pole, olondavululi via soma ka via yonguile oku oluĩla eka liavo oco vi ponde ovitunda via Yehova. 18 Soma wa sapuila Doege hati:+ “Kuende, ka ponde ovitunda!” Doege u Edome+ eye muẽle wa ponda ovitunda. Keteke liaco, wa ponda 85 kalume va walele evendalia liovalatanya.+ 19 Eye wa kundulavo losipata olupale luo Nove okuti,+ olupale luovitunda; wa ponda losipata alume lakãi, omãla loloñaña, olongombe lovimbulu kuenda olomeme.

20 Kuenje umue pokati komãla va Ahimeleke, omõla a Ahituva o tukuiwa hati, Aviyatare+ wa puluka kuenda wa likongela ku Daviti. 21 Aviyatare wa sapuila Daviti hati: “Saulu wa ponda ovitunda via Yehova.” 22 Daviti wa sapuila Aviyatare hati: “Nda limbuka okuti+ keteke lina Doege u Edome a kalako, eye wa laikele oku sapuilako Saulu. Ame, ame muẽle ñuete eko liolofa viomanu vosi vo konjo ya isiove. 23 Kala lame. Ku ka kuate usumba, momo wosi o sanda omuenyo wove, o sandavo omuenyo wange; pole, ame ndu ku teyuila.”+

23 Noke va sapuila Daviti vati: “Va Filisiti va kasi oku yaka la va Keila+ loku punda ocimbandi.” 2 Daviti wa pula Yehova hati:+ “Anga hẽ citava okuti, ngenda oco ndi ponde va Filisiti ava?” Yehova wa tambulula Daviti hati: “Kuende, ka ponde va Filisiti loku popela o Keila.” 3 Pole, alume va Daviti vo sapuila vati: “Tala! Osimbu tu kasi kulo ko Yuda+ tu kuete ale usumba, ca piãla enene nda tua enda ko Keila oku ka liyaka la va Filisiti!”+ 4 Kuenje Daviti wa pula vali Yehova.+ Kuenje Yehova wo tambulula hati: “Votoka; kuende ko Keila, momo ngeca va Filisiti peka liove.”+ 5 Daviti wa enda ko Keila lalume vaye kuenda va liyaka la va Filisiti; Daviti wa ponda omanu valua kuenda wambata ovinyama viavo kuenje wa yovola olonungi vio ko Keila.+

6 Eci Aviyatare+ omõla a Ahimeleke a tila oco a likongele ku Daviti ko Keila, eye wambatele evendalia limue. 7 Noke va sapuila Saulu vati: “Daviti weya ko Keila.” Saulu wa popia hati: “Suku wo weca peka liange,*+ momo wa iñila volupale lumue lu kuete olombundi lovikundiko.” 8 Saulu wa kovonga omanu vosi oku enda kuyaki, loku lokila ko Keila oco va ñuale ocingonja Daviti lalume vaye. 9 Eci Daviti a limbuka okuti Saulu wa sokiya oku u linga eci cĩvi, eye wa sapuila Aviyatare ocitunda hati: “Nena kulo evendalia.”+ 10 Noke Daviti hati: “A Yehova Suku ya va Isareli, upika wove wa yeva okuti Saulu o yongola oku iya ko Keila oku nyõla olupale mekonda liange.+ 11 Anga hẽ asongui* vo ko Keila va ka ngeca peka liaye? Anga Saulu iya muẽle ndeci upika wove a ci yeva? A Yehova Suku ya va Isareli mange ohenda, sapuilako upika wove.” Yehova wa popia hati: “Eye iya muẽle.” 12 Daviti wa pula hati: “Anga hẽ asongui vo Keila va ka ngeca peka lia Saulu kumue lalume vange? Yehova wa tambulula hati: “Ovo va ka ku eci.”

13 Noke Daviti wa votoka leci ci soka 600 kalume vaye+ kuenda va tunda vo Keila va enda kocitumãlo cikuavo. Eci Saulu a yeva okuti, Daviti wa tunda vo Keila, eye ko kuamẽle vali. 14 Daviti wa kala vekalasoko kocitumãlo cimue ca tĩla oku pitĩlako okuti, kovaimbo a kasi kolomunda vekalasoko lio Sife.+ Saulu wo sandiliya olonjanja vialua,+ pole, Yehova ko wecele peka liaye. 15 Daviti wa limbuka okuti,* Saulu wa kala oku sandiliya omuenyo waye osimbu Daviti a kala vekalasoko lio Sife ko Horesi.

16 Yonatão omõla a Saulu wa enda ku Daviti ko Horesi kuenda wo kuatisa oku sanga ongusu* ku Yehova.+ 17 Eye wo sapuila hati: “Ku ka kuate usumba, momo isiange Saulu ka ku sangi; ove o ka linga soma yo Isareli,+ ame ndi ka linga soma yavali noke liove; kuenda isiange Saulu wa ci kũlĩha.”+ 18 Kavali kavo va linga ocisila+ cimue kovaso a Yehova kuenda Daviti wamamako oku kala ko Horesi kuenje Yonatão wa enda konjo yaye.

19 Noke alume vo ko Sife va enda ku Saulu ko Givea+ kuenda va popia vati: “Siti Daviti wa salama ocipepi letu+ kocitumãlo cimue ca tĩla oku pitĩlako okuti, ko Horesi+ kowulu wo Hakila+ u kasi kombuelo* yo Yesimone?*+ 20 A soma, eci o nõlapo oku lokilako citava oku iya kuenje tu u weca peka lia soma.”+ 21 Saulu wa popia hati: “Yehova a ku sumũlũisi, momo wa ñuateli ohenda. 22 Kuendi ka sandiliyi apa eye a kasi kuenda pulisi omunu wo mola, momo va ndi sapuila okuti, eye ukuatutu. 23 Sandiliyi lutate ovitumãlo viosi eye a siata oku salama kuenda tiuki kokuange londimbukiso. Noke ngenda lene kuenda nda eye o kasi vofeka ndi ko sandiliya pokati kapata* osi a Yuda.”

24 Noke va votoka, va enda ko Sife+ okuti, va pita kovaso ya Saulu osimbu Daviti lalume vaye va kala vekalasoko lio Maona+ ko Araba+ kombuelo yo Yesimone. 25 Saulu weya lalume vaye oku sandiliya Daviti.+ Eci va ci sapuila ku Daviti, eye wa lokila vesenje+ limue kuenda wa kala vekalasoko lio Maona. Eci Saulu a ci yeva, wa ka sandiliyile Daviti vekalasoko lio Maona. 26 Osimbu Saulu a enda konele yimue yomunda, Daviti lalume vaye va enda konele yikuavo yomunda. Daviti wa tila lonjanga+ Saulu, pole, Saulu lalume vaye va kala oku amẽla ku Daviti lalume vaye oco a va kuate.+ 27 Pole, omunga yimue ya sapuila Saulu yiti: “Enju lonjanga, momo va Filisiti va kasi oku punda ofeka!” 28 Saulu wa liwekapo oku sandiliya Daviti+ kuenje wa enda oku ka liyaka la va Filisiti. Eli olio esunga lieci ocitumãlo caco ci tukuiwila hati, Esenje Lioku Litepa.

29 Kuenje Daviti wa tundako, wa enda lonjila yaye kuenda wamamako oku kala pocitumãlo cimue ca tĩla oku pitĩlako okuti, ko En-Gedi.+

24 Eci Saulu a tiuka poku kuama va Filisiti, vo sapuila hati: “Tala! Daviti o kasi vekalasoko lio ko En-Gedi.”+

2 Saulu wa nõla 3.000 kalume pokati ka va Isareli vosi kuenda wa enda oku ka sandiliya Daviti lalume vaye kovawe olohombo violomunda. 3 Saulu weya koviunda violomeme kohulo yonjila okuti, via tungiwa lovawe muna mua kala eleva limue kuenje wa iñilamo oco a lipopele* osimbu Daviti lalume vaye va salama konyima yeleva liaco.+ 4 Alume va Daviti vo sapuila vati: “Lilo olio eteke Yehova a ku sapuila hati: ‘Tala! Ñasi oku eca unyãli wove peka liove+ kuenda o pondola oku linga laye eci ca ku sungulukila.’” Noke Daviti wa votoka kuenda lutate walua wa teta kongenge yocikutu ca Saulu ka ci kuete ovoko. 5 Noke utima* wa Daviti wa kala oku u vetela evelo+ omo lioku teta kongenge yocikutu ca Saulu ka ci kuete ovoko. 6 Eye wa sapuila alume vaye hati: “Ka ca sungulukile kovaso a Yehova okuti, ndi linga ocina caco ku ñala yange ombuavekua ya Yehova, loku olõla okuokuo kuange kokuaye, momo eye ombuavekua ya Yehova.”+ 7 Daviti wa tateka* alume vaye lolondaka viaco kuenda ka ecelele okuti ovo va ponda Saulu. Kuenje Saulu wa tunda veleva kuenda wa enda lonjila yaye.

8 Noke Daviti wa tunda veleva loku vilikiya Saulu lolukandi hati: “A ñala yange, a soma!”+ Eci Saulu a vanja konyima, Daviti wa petamẽla loku nyoñamisa ocipala caye posi. 9 Daviti wa sapuila Saulu hati: “Momo lie o tavela kolondaka viokuti, ‘Tala! Daviti o kasi oku sandiliya oku ku lemẽha’?+ 10 Eteke lietaili wa mola lovaso ove muẽle ndomo Yehova a ku eca peka liange veleva. Pole, eci umue a ndi sapuila oco ndu ku ponde,+ ame nda ku kuatela ohenda loku popia siti: ‘Si olõla okuokuo kuange ku ñala yange, momo eye ombuavekua ya Yehova.’+ 11 Cilo a ñala yange,* tala ongenge yocikutu cove ka ci kuete ovoko peka liange; eci nda teta ongenge yocikutu cove ka ci kuete ovoko sia ku pondele. Kaliye o tẽla oku limbuka okuti, si kuete onjongole yoku ku lemẽha, ale oku linga usuanji kuenda sia lingile ekandu lalimue kokuove,+ ndaño ove o kasi oku ndi sandiliya oco o ndi ponde.+ 12 Yehova a linge onganji pokati kove lame+ kuenda Yehova a ku fetuluinye vonduko yange,+ pole, si oluĩla eka liange kokuove.+ 13 Olusapo lumue luosimbu lu popia okuti: ‘Kolondigaĩvi ku tunda evĩho,’ pole, si oluĩla eka liange kokuove. 14 Anga hẽ soma ya Isareli o kasi oku ndi sandiliya? Pole, ame elie? Ndi kasi ndombua yimue ño ya fa. Ñasi ndo nambue yimue.+ 15 Yehova a linge onganji, eye a linge onganji pokati kove lame kuenda a konomuise ocitangi cange+ loku ndi sombisa kuenda oku ndi yovola peka liove.”

16 Eci Daviti a mala oku u sapuila olondaka evi, Saulu wa popia hati: “Amõlange a Daviti,+ eyi ondaka yove?” Saulu wa fetika oku lila lolukandi. 17 Eye wa sapuila Daviti hati: “Ove wa velapo kesunga ame ndi sule, momo wa ndi tata ciwa, pole, ame nda ku tata lãvi.+ 18 Ocili okuti, etaili wa ndi sapuila ovina viwa wa ndingila, pole, kua ndi pondele eci Yehova a ngenca peka liove.+ 19 Ulume upi okuti, o sanga unyãli waye kuenje u ecelela oku enda okuti ko lingi lacimue cĩvi? Yehova o ka ku ĩha onima yiwa+ omo lieci wa ndingila etaili. 20 Kaliye tala! Nda kũlĩha okuti o ka viala ndosoma+ kuenda usoma wa Isareli wamamako oku kala peka liove. 21 Cilo, lisila lame vonduko ya Yehova+ okuti, ku ka nyõla ocitumbulukila* cange ci kuamamo kuenda ku ka nyõla onduko yange konjo ya isiange.”+ 22 Kuenje Daviti wa lisila la Saulu, noke Saulu wa enda konjo yaye.+ Pole, Daviti lalume vaye va enda kocitumãlo ceteyuilo.+

25 Noke yotembo yimue, Samuele+ wa fa kuenje va Isareli vosi va liongolola oku u lila loku u kenda ko Rama+ ocipepi lonjo yaye. Noke Daviti wa votoka, yu wa lokila vekalasoko lio Parane.

2 Kua kala ulume umue ko Maona+ okuti, oviunda viaye via kala ko Karimele.*+ Ulume waco wa kala ohuasi; eye wa kuata 3.000 kolomeme, 1.000 kolohombo kuenda wa kala oku pemũila olomeme viaye ko Karimele. 3 Onduko yulume waco Nabala+ kuenda onduko yukãi waye Avigaile.+ Ukãi waye wa kuatele olondunge kuenda wa posokele calua, pole, ulume waye okuti, ukuepata lia Kalembe,+ wa tatamẽle kuenda wa temẽle calua.+ 4 Vekalasoko, omo Daviti a yeva okuti, Nabala wa kala oku pemũila olomeme viaye. 5 Noke Daviti wa tuma kokuaye ekũi liakuenje vaye kuenda Daviti wa va sapuila hati: “Kuendi ko Karimele, eci vu pitĩla ku Nabala u pulisi vonduko yange ndomo eye a kasi. 6 Kuenje popi hati: ‘Kala komuenyo otembo yalua, kala luhayele uwa,* vakuanjo yove va kale ciwa kuenda ovina viosi o kuete vi kale ciwa. 7 Nda yeva okuti, ove o kasi oku pemũla ovinyama viove. Eci angombo vove va kala letu ka tua va lingile lacimue cĩvi+ kuenda ka va nyelisile lacimue otembo yosi va kala ko Karimele. 8 Pulisa apika vove oco va ku sapuile. Akuenje vange va sange ohenda kovaso ove, momo tueya votembo yesanju.* Mange ohenda, eca kapika vove kuenda komõlove Daviti cosi wa panga.’”+

9 Akuenje va Daviti va enda kuenje va sapuila ovina viosi evi ku Nabala vonduko ya Daviti. Eci va mala oku vangula, 10 Nabala wa tambulula akuenje va Daviti hati: “Helie Daviti kuenda elie omõla a Jese? Koloneke vilo kuli apika valua va kasi oku tila vacime cavo.+ 11 Momo lie ndi tikuila ombolo yange, lovava ange kuenda ositu yovinyama nda pondela apika vange vakuakupemũla loku vi eca kalume va tunda kocitumãlo sia kũlĩhĩle?”

12 Noke akuenje va Daviti va tiukila loku u lomboluila ovina viosi Nabala a popia. 13 Vepuluvi liaco, Daviti wa sapuila akuenje vaye hati: “Omunu lomunu a li malẽhe losipata yaye!”+ Kuenje vosi yavo va li malẽha lolosipata viavo kuenda Daviti wa li malẽhavo losipata yaye kuenje ci soka 400 kalume va enda la Daviti, pole, ci soka 200 kalume va siala lovikuata.

14 Noke umue pokati kakuenje wa sapuila Avigaile ukãi wa Nabala hati: “Tala! Daviti wa tuma olomunga via tunda vekalasoko oku pasuisa cime cetu, pole, eye wa va sepula.+ 15 Akuenje vaco va tu tata ciwa. Lalimue eteke va tu lingile cĩvi kuenda ka tua nyelisile lacimue otembo yosi tua kala lavo vusenge.+ 16 Utanya luteke ovo va kala ndocimbaka ceteyuilo ca tu ñuala, otembo yosi tua kalela kumosi oku lisa ocunda. 17 Kaliye kũlĩhĩsa eci o linga momo eci ci ka nena ocitangi ku cime cetu kuenda ku vakuanjo yaye vosi,+ omo cime cetu ulume umue wa tatama*+ calua okuti, lomue o tẽla oku vangula laye.”

18 Avigaile+ wa tikula 200 kolombolo, asanga avali anene ovinyu, olomeme vitãlo, olonjongo vitãlo violosea* violomema via kangiwa, 100 kakende a pangiwa layuva, 200 kakende a pangiwa lakuyu kuenda wa vi longeka viosi kovimbulu.+ 19 Noke ukãi wa sapuila akuenje vaye hati: “Piti kovaso yange; ndu ku kuami.” Pole, eye ka sapuilile lacimue kulume waye Nabala.

20 Osimbu ukãi a kala oku loka poku endela kocimbulu vonjila yimue ya salamisua komunda, Daviti lakuenje vaye va kala oku iyilila konele yaye kuenje ukãi wa lisanga lavo. 21 Daviti wa popia hati: “Nda likavisa ño oku teyuila ovina viulume u ndeti via kala vekalasoko. Lacimue caye ca nyelela,+ pole, uwa ndo lingila o kasi loku u niuwila leci cĩvi.+ 22 Suku a linge cimuamue kovanyãli va Daviti* loku vokiyako, nda ngecelela okuti, ulume* umue o puluka toke komẽle.”

23 Eci Avigaile a mola Daviti, wa tuluka lonjanga kocimbulu kuenda wa petamisa ocipala caye posi kovaso a Daviti. 24 Ukãi wa petamẽla kolomãhi viaye kuenda wa popia hati: “A ñala yange, ekandu liaco li ndi wile; ecelela okuti, upika wove o vangula love kuenda yevelela olondaka viupika wove. 25 Mange ohenda, ñala yange ka ka yevelele u ndeti Nabala+ wa tatama, momo eye wa tuwa ndonduko yaye. Onduko yaye Nabala* kuenda ka kuete olondunge. Pole, ame ndupika wove sia muile akuenje ñala yange a tumile. 26 Kaliye a ñala yange ndeci Yehova a kasi lomuenyo kuenda ndeci ove o kasi lomuenyo, Yehova eye wa ku tateka+ oco ku ka kuate eko liosonde+ poku fetuluinya* lovaka ove muẽle. Ovanyãli vove kuenda vana va sandiliya oku linga cĩvi ku ñala yange, va kale nda Nabala. 27 Cilo ombanjaile*+ eyi upika wove a nena ku ñala yange yeciwe kakuenje va kasi oku kuama ñala yange.+ 28 Mange ohenda, ecela ekandu liupika wove, momo Yehova o ka eca muẽle ku ñala yange onjo yimue yi kala otembo ka yi pui,+ omo ñala yange o kasi oku linga ovoyaki a Yehova+ kuenda ka kua sangiwile ũvi laumue kokuove vokuenda kuoloneke viove viosi.+ 29 Eci umue a seteka oku u kuama loku sandiliya omuenyo wove, omuenyo wa ñala yange u selekiwa ciwa vonjeke yomuenyo ponele ya Yehova Suku yove, pole, ovimuenyo viovanyãli vove eye o ka vimba kupãla ndovawe a imbiwa lepipili.* 30 Eci Yehova a ka linga ovina viosi viwa a likuminya ku ñala yange loku ku nõla oco o linge usongui wa va Isareli,+ 31 ñala yange ka ka livela* vutima omo lioku pesela osonde elivova, pamue oku fetuluinya* leka liove muẽle.+ Eci Yehova a ka lingila ovina viwa ku ñala yange, ivaluka upika wove.”

32 Daviti wa sapuila Avigaile hati: “Yehova Suku ya Isareli, una wa ku tuma kokuange eteke lietaili, a sivayiwe! 33 Olondunge viove vi pandiyiwe! Love o pandiyiwavo omo wa ndi tateka oku kuata eko liosonde+ loku fetuluinya* lovaka ange muẽle. 34 Ndeci Yehova Suku ya Isareli a kasi lomuenyo, una wa ndi tateka oku ku linga cĩvi,+ nda ove kueyile lonjanga oku lisanga lame,+ lomẽle nda ka kua supile ulume* laumue wa tiamẽla ku Nabala.”+ 35 Noke Daviti wa tava oku tambula ovina ukãi o nenela kuenje Daviti wa popia hati: “Kuende lombembua konjo yove. Nda yeva eci wa popia kuenda ndi tẽlisa epingilo liove.”

36 Noke Avigaile wa tiukila ku Nabala, una wa kala oku linga ocipito cimue ca lisoka locipito cosoma konjo yaye kuenda Nabala* wa sanjukile haeye wa koluele calua. Ukãi ko sapuilile lacimue toke komẽle. 37 Nabala eci a pasuka omẽle okuti uholua wo pita, ukãi waye wo sapuila ovina viosi. Kuenje utima waye wa kala ndomunu wa fa kuenda wa talama okuti ka lisengi ndewe limue. 38 Noke lioloneke ekũi, Yehova wa veta Nabala kuenje wa fa.

39 Eci Daviti a yeva okuti Nabala wa fa, wa popia hati: “Yehova a sivayiwe una wa tetulula ocitangi cange+ cesepu la Nabala+ kuenda wa tateka upika waye oku linga eci cĩvi+ kuenje Yehova wa tiuwiya ũvi wa Nabala kutue waye muẽle!” Noke Daviti wa tuma ondaka yoku pinga ku Avigaile oco a linge ukãi waye. 40 Eci apika va Daviti va pitĩla ku Avigaile ko Karimele, vo sapuila vati: “Daviti wa tu tuma oku ku upilila oco o linge ukãi waye.” 41 Ukãi wa votoka lonjanga kuenda wa petamisa ocipala caye posi loku popia hati: “Upika wove yu oco a sukule olomãhi+ viakuenje va ñala yange.” 42 Noke Avigaile+ wa votoka lonjanga wa lipongiya, yu wa londa kocimbulu caye kuenda apika vaye vatãlo vakãi va kuama konyima yaye; Avigaile wa kuama olomunga via Daviti kuenje wa linga ukãi waye.

43 Daviti wa kuelavo Ahinoame+ wo ko Yesirele+ kuenje kavali kavo va linga akãi vaye.+

44 Pole, Saulu omõlaye Mikale+ okuti ukãi wa Daviti, wo wecele ku Paliti+ omõla a Laisi wo ko Galimi.

26 Noke yotembo yimue, alume vo ko Sife+ veya ku Saulu ko Givea+ vati: “Siti Daviti wa salama kocilamano co ko Hakila ya imba ovaso ko Yesimone?”*+ 2 Kuenje Saulu wa votoka, wa lokila vekalasoko lio Sife leci ci soka 3.000 kalume va nõliwa ku va Isareli oco va ka sandiliye Daviti vekalasoko lio Sife.+ 3 Saulu wa tungila ocilombo kocilamano co ko Hakila, ca imba ovaso ko Yesimone ocipepi lonjila. Daviti omo okuti wa tungile vekalasoko wa yeva okuti, Saulu weya vekalasoko oku u sandiliya. 4 Daviti wa tuma olondavululi oco vi ka kũlĩhĩse nda Saulu weya muẽle. 5 Noke Daviti wa enda kocilombo kua kala Saulu kuenje Daviti wa mola pocitumãlo Saulu kumue la Avinere+ omõla a Nere kesongo kolohoka viaye, va kala oku pekela; Saulu wa pekela vocilombo ocipepi lasualali vo ñuala. 6 Daviti wa sapuila Ahimeleke u Hiti+ la Avisiai+ omõla a Seruya+ manji a Yoava hati: “Helie enda lame vocilombo ca Saulu?” Avisiai wa tambulula hati: “Ame ngenda love.” 7 Daviti la Avisiai va iñila vocilombo luteke kuenda va sanga okuti Saulu wa pekela vocilombo lunga waye wa tomehiwa posi ocipepi lutue waye; Avinere lasualali vakuavo va pekela okuti vo ñuala.

8 Avisiai wa sapuila Daviti hati: “Etaili Suku wa ku ĩha unyãli wove peka liove.+ Kaliye ecelela okuti, ndu tomela posi lunga onjanja yimosi lika kuenda ka ci ka sukila oku ci linga onjanja yavali.” 9 Pole, Daviti wa sapuila Avisiai hati: “Ku ko lemẽhe, momo elie o pondola oku katuila eka liaye kombuavekua ya Yehova+ kuenje ka kuata eko?”+ 10 Daviti wamisako hati: “Ndeci Yehova a kasi lomuenyo, Yehova eye muẽle o ko ponda,+ eteke limue eye o ka fa ndeci omanu vakuavo+ ale eye enda kuyaki kuenje o ka pondiwa.+ 11 Ka ca sungulukile ku Yehova okuti ndi katuila eka liange kombuavekua ya Yehova!+ Kaliye tu tikule unga u kasi ocipepi lutue waye lesanga liovava kuenje tu ende lonjila yetu.” 12 Daviti wa tikula unga lesanga liovava via kala ocipepi lutue wa Saulu kuenje va enda. Lomue wa va mola,+ ale oku va limbuka pamue oku pasuka, momo vosi va kala oku pekela kuenje otulo tualua tua tunda ku Yehova, tua va kuata vosi yavo. 13 Noke Daviti wa enda konele yikuavo kuenda wa talama kosungu yomunda, ocipãla naito lavo, pokati kavo pa kala ocinãla cinene.

14 Daviti wa vilikiya asualali kuenda Avinere+ omõla a Nere kuenje wo pula hati: “A Avinere, ku tambulula?” Avinere wa tambulula hati: “Ove elie o kasi oku vilikiya soma?” 15 Daviti wa sapuila Avinere hati: “Ove hẽ kulumeko? Helie wa lisoka love ko Isareli? Momo lie kua lavuluile ñala yove soma? Momo umue pokati kasualali weya oco a ponde ñala yove soma.+ 16 Eci wa linga ka ca sungulukile. Ndeci Yehova a kasi lomuenyo, ove o sesamẽla oku fa, momo kua lavuluile ñala yove ombuavekua ya Yehova.+ Kaliye vanja kuosi! Pi ku kasi unga wa soma lesanga liovava+ lia kala ocipepi lutue waye?”

17 Saulu wa limbuka ondaka ya Daviti kuenje wa popia hati: “Amõlange a Daviti, eyi ondaka yove?”+ Daviti wa tambulula hati: “Eyi ondaka yange a ñala yange a soma.” 18 Daviti wamisako hati: “Momo lie ñala yange a sandiliyila upika waye+ kuenda nye nda linga, eko lipi ñuete?+ 19 A ñala yange a soma, yevelela olondaka viupika wove viokuti: Nda Yehova eye wa ku vetiya oku ñatukila, eye a tave* ocilumba cange colomema. Pole, nda wa vetiyiwa lomanu,+ ovo va siñaliwe kovaso a Yehova, momo ovo va ndi tundisa oco si ka pange onepa kocipiñalo+ ca Yehova loku popia vati: ‘Kuende, ka vumbe olosuku vikuavo!’ 20 Kaliye ku ka ecelele okuti osonde yange yi pesekela posi kovaso a Yehova, momo soma yo ko Isareli wa tundila oku sandiliya onambue yimue+ ndu okuti, o kasi oku sanda onguali kolomunda.”

21 Kuenje Saulu hati: “Nda lueya.+ Tiuka amõlange a Daviti, si ku lemẽha vali, momo etaili wa tenda omuenyo wange okuti, u kola.+ Ocili okuti, ovina nda linga viuveke kuenda nda lueya calua.” 22 Daviti wa tambulula hati: “Unga wa soma u kasi kulo. Tuma umue pokati kakuenje oco eye a upe. 23 Yehova o ka tiuwila omunu lomunu onima yesunga+ liaye kuenda yekolelo liaye, momo etaili Yehova wa ku eca peka liange, pole, sia yonguile oku katuila eka liange kombuavekua ya Yehova.+ 24 Tala! Ndeci nda tenda omuenyo wove etaili okuti u kola, Yehova a tendevo omuenyo wange okuti u kola kuenda a ndi yovole kohali yosi.”+ 25 Saulu wa tambulula Daviti hati: “Amõlange a Daviti, Suku a ku sumũlũise. Ove o ka linga ovina vi komõhisa kuenda o ka kuata onima yiwa.”+ Kuenje Daviti wa enda lonjila yaye kuenda Saulu wa tiukila konjo yaye.+

27 Noke Daviti wa popia vutima waye hati: “Eteke limue ndi ka pondiwa peka lia Saulu. Eci ndi sukila oku linga, oku tilila+ vofeka ya va Filisiti; kuenje Saulu o ka liwekapo oku ndi sandiliya kocikanjo cosi co Isareli+ kuenda ndi ka puluka peka liaye.” 2 Daviti wa votoka leci ci soka 600 kalume+ va kala laye, yu va enda ku Akisi+ omõla a Maoki soma yo ko Gati. 3 Daviti wa kala la Akisi ko Gati, eye kumue lalume vaye okuti, ulume lulume lepata liaye. Daviti wambata akãi vaye vavali okuti, Ahinoame+ u Yesirele kuenda Avigaile+ u Karimele okuti ocimbumba ca Nabala. 4 Eci va sapuila Saulu okuti Daviti wa tilila ko Gati, eye wa liwekapo oku u sandiliya.+

5 Noke Daviti wa sapuila Akisi hati: “Nda nda sanga ohenda kovaso ove, ecelela okuti va nyĩha ocitumãlo cimue volupale oco ndi tungilemo. Momo lie upika wove a tungila love kelombe?” 6 Keteke liaco, Akisi wo wĩha o Cikilage.+ Eli olio esunga lieci okuti o Cikilage ya tiamẽlela kolosoma vio ko Yuda toke etaili.

7 Otembo* Daviti a kala vimbo lia va Filisiti ya tẽla unyamo umosi lolosãi vikuãla.+ 8 Daviti lalume vaye va punda va Gesiuri,+ va Girisi kuenda va Amaleke,+ momo va kala olonungi via tungile tunde kofeka yo Telama toke ko Siuri+ loku lokila kofeka Yegito. 9 Eci Daviti a liyaka lofeka yaco, ka sile laumue lomuenyo ci kaile alume lakãi,+ pole, wambata olomeme, olongombe, ovimbulu, olongamelo kuenda uwalo, noke wa enda oku tiukila ku Akisi. 10 Akisi wa pula hati: “Pi wa ka pundile etaili?” Daviti wa tambulula hati: “Kombuelo* yo Yuda,”+ ale “Kombuelo ya va Yerahimele,”+ ale “Kombuelo ya va Keni.”+ 11 Daviti ka sile ulume laumue pamue ukãi oco ka va ka ambatiwe ko Gati, eye wa popia hati: “Oco ovo ka va ka sapule eci catiamẽla kokuetu loku popia vati: ‘Daviti eye wa ci linga.’” (Eci oco eye a enda oku linga otembo yosi a kala kovaimbo a va Filisiti.) 12 Akisi wa kolelele ku Daviti kuenje wa popia lutima waye hati: ‘Ocili okuti eye wa suvukiwa lomanu vaye va Isareli, pole, amamako oku kala upika wange.’

28 Koloneke viaco, va Filisiti vongolola asualali vavo oco va liyake la va Isareli.+ Akisi wa sapuila Daviti hati: “Ove wa kũlĩha okuti ci kaile ove lalume vove tu endela kumosi kuyaki.”+ 2 Daviti wa sapuila Akisi hati: “Ove wa kũlĩha ciwa eci ukuenje wove a ka linga.” Akisi wa sapuila Daviti hati: “Eli olio esunga lieci ndu ku nõlela oco o linge ndondavululi yange otembo yosi.”*+

3 Samuele wa fa kuenda va Isareli vosi vo lila loku u kenda ko Rama vimbo liaye muẽle.+ Kuenje Saulu wa kunduile vofeka omanu vakuakuvangula lolondele kuenda vakuakutãha.+

4 Va Filisiti va liongolola kuenda va tungila ocilombo ko Sunami.+ Kuenje Saulu wongolola va Isareli vosi kuenda va tunga ocilombo ko Giliboa.+ 5 Eci Saulu a mola ocilombo ca va Filisiti, wa kuata usumba kuenda utima waye wa fetika oku luluma calua.+ 6 Saulu wa seteka oku vilikiya Yehova,+ pole, Yehova ko tambuluile, ndaño volonjoi, ale vo Urimi,+ pamue lovaprofeto. 7 Kuenje Saulu wa sapuila apika vaye hati: “Sandiliyi ukãi umue okuti ukuakuvangula lolondele+ oco ngendeko oku ka sapela laye.” Apika vaye va tambulula vati: “Tala! Ko Endore kuli ukãi umue okuti, ukuakuvangula lolondele.”+

8 Saulu wa liluvikiya poku wala uwalo ukuavo kuenda wa enda kukãi waco luteke lapika vavali. Eye hati: “Mange ohenda, tãha poku vangula lolondele+ kuenda mbilikiyile omunu ndu ku tukuila.” 9 Noke ukãi wo sapuila hati: “Ove wa kũlĩha okuti, Saulu wa kundula vofeka omanu vakuakuvangula lolondele kuenda vakuakutãha.+ Momo lie o ndi setekela oco ndi pondiwe?”+ 10 Saulu wa lisila laye vonduko ya Yehova poku popia hati: “Ndeci Yehova a kasi lomuenyo, ove ku ka kuata eko lalimue kondaka eyi!” 11 Ukãi wa popia hati: “Helie o yongola okuti eye ndi vilikiya?” Eye hati: “Vilikiya Samuele.” 12 Eci ukãi a mola “Samuele,”*+ wa kaluka lolukandi kuenda wa sapuila Saulu hati: “Momo lie wa ñembela? Ove Saulu!” 13 Soma wo sapuila hati: “Ku ka kuate usumba, pole, nye wa mola?” Ukãi wa tambulula Saulu hati: “Ndi lete umue o kuete esetahãlo liosuku yimue yi kasi oku tunda posi.” 14 Eye wa pulisa ukãi hati: “O kasi ndati?” ukãi hati: “Ulume umue wa kuka o kasi oku lamana kuenda wa wala ocikutu cimue ka ci kuete ovoko.”+ Saulu wa limbuka okuti, “Samuele” kuenje wa petamisa ocipala caye posi kuenda wa kekama.

15 Kuenje “Samuele” wa pula Saulu hati: “Momo lie o ndi sakalaisala poku mbilikiya?” Saulu wa tambulula hati: “Ñuete ocitangi cinene. Va Filisiti va kasi oku liyaka lame kuenda Suku wa ndi yanduluka, ka nambulula vali ndaño lovaprofeto ale volonjoi;+ eli olio esunga lieci nda ku vilikiyila oco o ndi sapuile eci ndi sukila oku linga.”+

16 Noke “Samuele” wa pula hati: “Momo lie o ndi pulisila cilo nda Yehova wa ku yanduluka+ kuenda wa linga unyãli wove? 17 Yehova o ka linga eci a popele vonduko yange hati: Yehova o kopa usoma peka liove kuenje o ka weca kukuene okuti, Daviti.+ 18 Omo okuti ove kua pokuile kondaka ya Yehova kuenda kua kunduile va Amaleke+ vana va wengula onyeño ya Yehova, eli olio esunga lieci eye a kasilili oku ku tata ndoco etaili. 19 Yehova o ka eca va Isareli kumue love peka lia va Filisiti+ kuenje hẽla ove+ lomãla vove+ vu ka kala lame. Yehova o ka ecavo asualali va va Isareli peka lia va Filisiti.”+

20 Noke Saulu wa kupukila posi lusumba walua omo liolondaka via “Samuele.” Kuenje ka kuatele ongusu, momo vokuenda kutanya wosi luteke wosi ka lile lacimue. 21 Eci ukãi amela ku Saulu kuenda wa limbuka okuti eye wa sakalalele calua, ukãi wo sapuila hati: “Upika wove wa pokola kondaka yove, loku kapa omuenyo wange kohele+ kuenda nda linga eci wa numa. 22 Kaliye mange ohenda, yevelela eci upika wove a ku sapuila. Ecelela okuti ndu ku ĩha okambolo; kuenje lia oco o kuate ongusu yoku enda lonjila yove.” 23 Pole, eye ka tavele kuenje wa popia hati: “Ame si li.” Apika vaye kuenda ukãi, va kala oku u silĩha. Noke eye wa tava kokuavo kuenda wa votoka posi loku tumãla pula. 24 Ukãi wa kuatele ongombe yimue ya lẽla konjo yaye kuenje wa enda lonjanga oku ka yi ponda,* noke wa tikula osema, wa yi tama kuenda wa linga olombolo ka vi kuete etumbisa. 25 Eye wa yeca ku Saulu lapika vaye kuenje va lia. Noke ovo va votoka kuenda luteke va enda.+

29 Va Filisiti+ vongoluila asualali vavo vosi vo Afeke osimbu va Isareli va tungila ocilombo cavo ko Yesirele.+ 2 Osimbu olombiali via va Filisiti via enda lovimunga viavo viocita kuenda viohulukãi, Daviti lalume vaye va kuama konyima kumue la Akisi.+ 3 Pole, olombuale via va Filisiti via pula viti: “Momo lie va Heveru va kasilili kulo?” Akisi wa tambulula olombuale via va Filisiti hati: “U Daviti upika wa Saulu Soma yo ko Isareli, eye o kasi lame unyamo umosi, ale ceci ci pitahãla unyamo.+ Sia limbukile lacimue cĩvi kokuaye tunde eci eya toke etaili.” 4 Pole, olombuale via va Filisiti via temẽla Akisi kuenda vio sapuila vati: “Tuma ulume u oku tiukila.+ A ende kocitumãlo wo nõlela. Ku ka ecelele okuti eye enda letu kuyaki, oco ka ka tu ñualelepo vokuenda kuyaki.+ Nye eye a sukila oku linga oco a sange ohenda ya ñala yaye okuti, oku eca ovitue vialume vetu ci sule? 5 U siti Daviti una va imbila ocisungo eci va kala oku piluka loku popia vati:

6 Kuenje Akisi+ wa vilikiya Daviti loku u sapuila hati: “Ndeci Yehova a kasi lomuenyo, ove wulume umue wa sunguluka kuenda nda sanjuka omo o kasi oku enda lasualali vange kuyaki,+ momo sia limbukile lacimue cĩvi kokuove tunde eci weya toke etaili.+ Pole, oloñala ka via ku kolelele.+ 7 Tiukila lombembua kuenda ku ka linge lacimue ci sumuisa olombiali via va Filisiti.” 8 Kuenje Daviti wa pula Akisi hati: “Momo lie, nye nda linga? Wa sanga hẽ cimue cĩvi kupika wove tunde keteke ndeya toke etaili? Momo lie si endela love oco ndi ka liyake lovanyãli va ñala yange soma?” 9 Akisi wa tambulula Daviti hati: “Kocisimĩlo cange, ove wumunu umue uwa ndungelo umue wa Suku.+ Pole, olombuale via va Filisiti via popia vati: ‘Ku ka ecelele okuti eye enda letu kuyaki.’ 10 Pasuka selo komẽle kumue lapika va cime cove vana veya love; kuenje tiukili lomẽle osimbu ku ca.”

11 Kuenje Daviti lalume vaye va pasuka selo komẽle oco va tiukile vimbo lia va Filisiti kuenje va Filisiti va enda ko Yesirele.+

30 Eci Daviti kumue lalume vaye va pitĩla ko Cikilage+ keteke liatatu, va Amaleke+ va linga uyaki ko Negeve* kuenda ko Cikilage kuenje va katukila o Cikilage loku yi timĩha londalu. 2 Ovo vambata akãi+ la vosi va kalamo, ci kaile vatito lava vanene. Ovo ka va pondele laumue, pole, va vambata kuenda va enda lavo. 3 Eci Daviti lalume vaye va pitĩla volupale, va sanga okuti oluo lua timĩhiwa kuenje akãi vavo lomãla vavo valume lomãla vavo vakãi vambatiwa kumandekua. 4 Kuenje Daviti kumue lalume va kala laye va fetika oku lila lolukandi toke eci ka va kuatele vali ongusu yoku lila. 5 Akãi vavali va Daviti va ambatiwavo kumandekua okuti, Ahinoame wo ko Yesirele kuenda Avigaile ocimbumba ca Nabala u Karimele.+ 6 Daviti wa sumuile calua momo, alume vosi va temẽle calua kuenda va yonguile oku u sasõla lovawe, omo omãla vavo vakãi lomãla vavo valume vambatiwa. Pole, Daviti wa sanga elembeleko ku Yehova Suku yaye.+

7 Daviti wa sapuila Aviyatare+ ocitunda, omõla a Ahimeleke hati: “Nena kulo evendalia.”+ Kuenje Aviyatare wa nena evendalia ku Daviti. 8 Daviti wa pula Yehova+ hati: “Citava okuti ndi landula vana vambata ovina vietu viosi? Anga hẽ ndi ka va sanga?” Eye wo tambulula hati: “Va landula, momo o ka va sanga loku tambula ovina viosi vambata.”+

9 Vepuluvi liaco, Daviti leci ci soka 600 kalume+ va kala laye va enda toke Kekango* lio ko Besore, vamue pokati kavo oko va siala. 10 Daviti kumue leci ci soka 400 kalume vamamako oku va landula, pole, ci soka 200 kalume va siala konyima, momo va kavele calua kuenda ka va ponduile oku yoka Ekango lio ko Besore.+

11 Ovo va sanga ulume umue u Egito vepia, vo wambata ku Daviti. Ovo vo wĩha okulia lovava oco a nyue, 12 lovinyanyuila viakende akuyu kuenda akende avali ayuva a kukuta. Noke yoku lia, eye wa kuata vali ongusu,* momo wa pita ovotanya atatu lovoteke atatu okuti, ka lile ndaño oku nyua ovava. 13 Daviti wo pula hati: “Wa tiamẽla kulie kuenda pi wa tunda?” eye wa tambulula hati: “Ndu Egito, ndupika wulume umue wo ko Amaleke, pole, cime cange wa ndi yanduluka, momo nda kala oku vela oloneke vitatu. 14 Etu tua punda kombuelo* ya va Kereti+ kuenda kocikanjo co Yuda, lo kombuelo* ya Kalembe+ kuenje o Cikilage tua yi timĩha londalu.” 15 Noke Daviti wo pula hati: “Citava okuti o ndi songuila kalume vaco vakuakupunda?” Eye wa tambulula hati: “Nda wa lisila lame vonduko ya Suku okuti, ku ndi pondi kuenda ku ngeci peka lia cime cange, ame ndu ku songuila kalume vaco vakuakupunda.”

16 Kuenje ulume waco wambata Daviti toke vofeka mua kala vakuakupunda okuti, va kala oku lia, loku nyua, loku sambiliya, omo liovina viosi va punda vofeka ya va Filisiti kuenda vofeka yo Yuda. 17 Noke Daviti wa va ponda oku upisa komẽle ociteketeke toke koñolosi; pa supa+ lika 400 kalume vana va tila lolongamelo. 18 Daviti wa tambula cosi va Amaleke va pundile+ kuenda wa yovolavo akãi vaye vavali. 19 Lacimue ca kambapo, oku upisa kutito toke kunene. Ovo va yovola omãla vavo valume lomãla vavo vakãi kuenda ovina viavo viosi;+ Daviti wa yovola ovina viosi via pundiwile. 20 Daviti wambata olomeme viosi lolongombe viosi kuenje ovo va songuila ovinyama viaco kovaso yovinyama viavo. Ovo va popia vati: “Evi ovio ovina via pundiwa via Daviti.”

21 Noke Daviti wa tiukila kalume va soka 200 vana va sialele, omo va kavele calua kuenda ka va tẽlele oku enda la Daviti, haivo va sialele konyima Yekango lio ko Besore+ kuenje va ka lisangele la Daviti kumue lomanu va kala laye. Eci Daviti a pitĩla ocipepi lalume vaco, wa va pula ndomo va kasi. 22 Omo liaco, alume olondingaĩvi haivo ka va silivila okuti va endele la Daviti, va popia vati: “Omo okuti ovo ka va endele letu, ka tu va ĩha lacimue tua ka pundile, omunu lomunu ambate lika ukãi waye lomãla vaye kuenje va ende.” 23 Pole, Daviti wa popia hati: “A vamanjange, ko ka lingi eci lovina Yehova a tu ĩha. Eye wa tu popela kuenda wa eca povaka etu alume va punda ovina vietu.+ 24 Helie o tava kovina vu kasi oku popia? Onepa yeciwa komunu wa endele kuyaki yi lisoka leyi yomunu wa kala oku lava ovikuata.+ Vosi va ka tambula onepa yimue.”+ 25 Tunde keteke liaco, Daviti wa kolisa ondaka yaco kuenje ya linga ocihandeleko kuenda ocisila cimue ku va Isareli toke etaili.

26 Eci Daviti a tiukila ko Cikilage, wa tuma onepa yimue yovina via pundiwa kakulu vo ko Yuda okuti, va kala akamba vaye, loku popia hati: “Eyi ombanjaile* yene ya tunda kovina via pundiwa kovanyãli va Yehova.” 27 Eye wa tumavo ombajaile yaco ku vana va kala ko Betele,+ la vana va kala ko Ramote yo ko Negeve,* ku vana va kala ko Yatiri,+ 28 ku vana va kala ko Aroere, ku vana va kala ko Sifimote, ku vana va kala ko Esitemoa,+ 29 ku vana va kala ko Rakala, ku vana va kala kalupale a va Yerahimele,+ ku vana va kala kalupale a va Keni,+ 30 ku vana va kala ko Horima,+ ku vana va kala ko Borasiane, ku vana va kala ko Ataka, 31 ku vana va kala ko Hevirone+ kuenda kovitumãlo viosi Daviti kumue lalume vaye va kala.

31 Va Filisiti va kala oku liyaka la va Isareli.+ Kuenje alume vo ko Isareli va tila va Filisiti kuenda valua va pondiwila Komunda Giliboa.+ 2 Va Filisiti vamamako oku landula ocipepi Saulu kumue lomãla vaye kuenje va Filisiti va ponda Yonatão,+ la Avinadave kuenda Malikisua okuti, omãla va Saulu.+ 3 Uyaki woku katukila Saulu wa livokiya kuenda vakualohonji vo sanga kuenje eye wa lemẽhiwa calua la vakualohonji.+ 4 Noke Saulu wa sapuila ulume ukuakuambata ovimalẽho viaye viuyaki hati: “Pola osipata yove, ndi ponde, sanga alume ava olondingaĩvi ka va seviwile evamba+ va ka tiuka kuenje va ka ndi tata lãvi loku ndi ponda.” Pole, ulume ukuakuambata ovimalẽho viaye viuyaki ka tavele, momo wa kuata usumba walua. Omo liaco, Saulu wa tikula osipata, yu wa kupukila kilu liaco.+ 5 Eci ulume ukuakuambata ovimalẽho viaye viuyaki a mola okuti Saulu wa fa,+ eye wa kupukilavo kilu liosipata yaye muẽle kuenje wa fa. 6 Omo liaco, Saulu lomãla vaye vatatu, lukuakuambata ovimãleho viaye kumue lalume vaye vosi, va fila kumosi eteke liaco.+ 7 Eci omanu va Isareli vana va kala vimbo li kasi vocimbota* kuenda vimbo lio Yordão va mola okuti alume vo ko Isareli va tila kuenda Saulu lomãla vaye va fa, ovo va fetika oku tunda valupale loku tila;+ kuenje va Filisiti veya kuenda va a piñala.

8 Keteke lia kuamamo, eci va Filisiti veya oco vongolole ovivimbi, va sanga Saulu lomãla vaye vatatu okuti, va fila Komunda Giliboa.+ 9 Kuenje ovo va teta utue waye kuenda vo lulisa, vo upa ocimalẽho caye cuyaki kuenda va tuma ondaka kofeka yosi ya va Filisiti oco ku sandekiwe esapulo liaco+ volonjo* viavo vioviteka+ kuenda pokati komanu. 10 Kuenje ovo va kapa ocimalẽho caye konjo yociñumañuma Asitorete kuenda va tulika ocivimbi caye kocimbaka co Bete-Sani.+ 11 Eci olonungi vio ko Yavesi-Gileada+ via yeva eci va Filisiti va linga ku Saulu, 12 asualali vosi va katuka, va linga ungende uteke wosi kuenda vopa ocivimbi ca Saulu, levi viomãla vaye vina via kala kocimbaka co Bete-Sani. Kuenje va tiukila ko Yavesi kuenda oko va vi yokela. 13 Noke vopa akepa avo+ kuenda va a kenda vemẽhi liuti wulemba ko Yavesi+ kuenje va likandangiya oku lia oloneke epanduvali.