Uiraa a te feia taio

Ua faahitihia anei te mau huru maitatai atoa “ta te varua moˈa e faatupu” i roto i te Galatia 5:22, 23?

“Te mau huru maitatai ta te varua moˈa e faatupu, o te here ïa, te oaoa, te hau, te faaoromai, te hamani maitai, te maitai, te faaroo, te mǎrû, te haavîraa ia ˈna iho.” E iva ïa huru maitatai Kerisetiano te faahitihia ra i roto i teie nau irava. Tera anaˈe râ te mau huru maitatai ta te varua moˈa e tauturu ia tatou ia faatupu?

A tapao na i ta te aposetolo Paulo i papai i roto i te mau irava na mua noa ˈtu: “Ta te tino hara e faatupu, oia ïa te mau peu taotoraa tia ore, te peu viivii, te peu faufau, te haamori idolo, te peu tahutahu, te enemiraa, te mârô, te pohehae, te iria, te tatamaˈi, te amahamaha, te pǔpǔ faaroo amaha, te feii, te taero ava, te arearearaa ahoahoa e te tahi atu mau mea mai tera atoa te huru.” (Gal. 5:19-21) Aita ïa Paulo i faahiti pauroa i te mau mea atoa “ta te tino hara e faatupu” mai tei faaitehia i roto i te Kolosa 3:5. Hoê â atoa ïa no te mau huru maitatai. Taa ê atu i na iva huru maitatai ta Paulo i faahiti, te vai ra te tahi atu mau huru maitatai mai tera atoa te huru e “aita e ture o te faahapa i te reira.” Aita roa ˈtu Paulo i tamata i te hamani i te hoê tapura o te mau huru maitatai atoa ta te varua moˈa e tauturu mai ia faatupu.

Ua haapapu Paulo i te reira i roto i ta ˈna rata i te amuiraa i Ephesia. Ua faataa oia e faatupu te maramarama i “te mau mea maitatai huru rau” ta te varua moˈa atoa e faatupu mai te maitai, “te parau-tia e te parau mau.”—Eph. 5:8, 9.

Ua faaitoito Paulo ia Timoteo ia “tapi . . . i te parau-tia, te haamoriraa i te Atua anaˈe, te faaroo, te here, te faaoromai tamau e te mǎrû.” (Tim. 1, 6:11) I roto i na ono huru maitatai, e toru anaˈe no roto mai i “te mau huru maitatai ta te varua moˈa e faatupu,” oia hoi te faaroo, te here, te mǎrû. E hinaaro atoa râ Timoteo i te tauturu a te varua moˈa no te faatupu i te tahi atu mau huru maitatai mai te parau-tia, te haamoriraa i te Atua anaˈe e te faaoromai tamau.—A hiˈo atoa i te Kolosa 3:12; Petero 2, 1:5-7.

Te auraa, aita te Galatia 5:22, 23 e faahiti ra i te mau huru maitatai Kerisetiano atoa. E tauturu mai te varua moˈa ia faatupu i na iva huru maitatai. Tera râ, te vai ra te tahi atu mau huru maitatai e titauhia ia tatou ia faatupu no te riro mai ei Kerisetiano feruriraa paari e no te “ahu mai i te huru taata apî tei poietehia ia au i te hinaaro o te Atua i te parau-tia e te haapao maitai mau ra.”—Eph. 4:24.