Parau omuaraa

E hoa here e,

No oe, mea piri anei oe i te Atua? No te feia e rave rahi, eita e nehenehe e faafatata ˈtu i te Atua. Te manaˈo nei te tahi pae, i te mea tei te raˈi te Atua, aita o ˈna e tâuˈa mai ra ia tatou. No te tahi atu, mea faufaa ore ratou, eita ïa ratou e nehenehe e riro ei hoa no te Atua. Teie râ te faaitoitoraa î i te here a te Bibilia: “A faafatata ˈtu i te Atua, e e faafatata mai oia ia outou.” (Iakobo 4:8) Te haapapu atoa ra te Atua i ta ˈna mau tavini: “Te haru nei hoi au, o Iehova to oe Atua, i to oe rima atau. O vau te parau nei ia oe: ‘Eiaha e mǎtaˈu. E tauturu vau ia oe.’”​—Isaia 41:13.

E nafea tatou ia riro ei hoa piri no te Atua? Hou a riro ai ei hoa no te hoê taata, e titauhia ia haamatau na mua ia ˈna, oia hoi ia ite i to ˈna huru e to ˈna mau manaˈo. I muri mai, e ite tatou eaha to ˈna huru maitatai e i reira tatou e au roa ˈi i tera taata. Te auraa, no te riro ei hoa piri no Iehova, e titauhia ia haapii tatou i to ˈna huru, to ˈna mau manaˈo e ta ˈna mau haaraa maoti te Bibilia. E titauhia ia feruriruri mea nafea Iehova ia faaite i to ˈna mau huru maitatai tataitahi, mea nafea Iesu Mesia i te peeraa i te hiˈoraa o to ˈna Metua e e nafea tatou ia faaite atoa i tera mau huru maitatai. E ite mai tatou o Iehova anaˈe te Arii hau ê e te Metua maitai roa ˈˈe. No te aha? No te mea o Iehova te Atua puai, parau-tia, paari e te î i te here, eita roa ˈtu oia e faarue i ta ˈna mau tavini taiva ore.

No reira, ia tauturu teie buka ia oe ia faafatata noa ˈtu â i te Atua ra o Iehova, ia here ia ˈna e ia arue ia ˈna e a muri noa ˈtu.