TE PAHONO RA TE BIBILIA
O vai to te Atua iˈoa?
Ia paraparau tatou e te feia ta tatou e here ra, mai te mau hoa piri roa, e faahiti atoa tatou i to ratou iˈoa
E iˈoa to te mau melo atoa o te utuafare. Oia atoa to te animara! E mea tano atoa ïa ia manaˈo e e iˈoa to te Atua. I roto i te Bibilia, e rave rahi tiaraa iˈoa to te Atua, mai te Fatu, te Atua mana hope, e te Atua Poiete, aore ra tei Hamani. E iˈoa atoa râ to ˈna.—A taio i te Isaia 42:8.
I roto e rave rahi huriraa Bibilia, tei roto te iˈoa o te Atua i te Salamo 83:18. Te na ô ra tera irava: “Ia ite te taata atoa e, o Iehova to oe iˈoa, e o oe anaˈe tei Teitei i te fenua atoa nei.”
No te aha e mea tia ˈi ia faaohipa i to te Atua iˈoa?
Te hinaaro nei te Atua ia faaohipa tatou i to ˈna iˈoa. Ia paraparau tatou e te feia ta tatou e here ra, mai te mau hoa piri roa, e faahiti atoa tatou i to ratou iˈoa. Mea taa ê anei ia paraparau tatou e te Atua? Hau atu â, ua faaitoito Iesu Mesia ia faahiti i to te Atua iˈoa.—A taio i te Mataio 6:9; Ioane 17:26.
No te riro râ ei hoa no te Atua, mea titauhia ïa ia ite atu â tatou ia ˈna, eiaha i to ˈna iˈoa anaˈe. Ei hiˈoraa, mai te aha to te Atua huru? E nehenehe mau anei e haafatata ˈtu i te Atua? E nehenehe oe e ite i ta te Bibilia pahonoraa i teie mau uiraa.