TUMU PARAU MATAMUA: E NEHENEHE ANEI E OAOA I TEIE MAHANA?
E nehenehe anei e oaoa i teie mahana?
“To matou pue mahana i te oraraa nei e hitu ïa ahuru i te matahiti, e ia tae i te vau i te ahuru i te matahiti i te etaeta, e riro râ taua etaeta ra ei rohirohi e ei taiâraa.”—Salamo 90:10.
AUÊ te tano teie mau parau e! I roto i teie ao, e pinepine e riro te oraraa “ei rohirohi e ei taiâraa.” Ua uiui ê na paha oe, ‘E nehenehe anei e oaoa i teie mahana?’
A hiˈo na ia Maria. Na mua ˈˈe e vahine ohipa roa o ˈna. I teie nei râ, e 84 matahiti to ˈna, eita faahou ta ˈna e nehenehe e haere i rapae au i te fare o ˈna anaˈe. Te maitai noa ra to ˈna roro, te tino râ, ua paruparu ïa. E nehenehe anei oia e parau e mea oaoa taua oraraa ra?
E oe? Te uiui nei paha oe i te tahi taime e teihea tuhaa o to oraraa ta oe e tia ia oaoa. E ohipa rohirohi e te haumani noa paha ta oe. Aita paha e tâuˈahia ra ta oe mau tutavaraa. Noa ˈtu e te maitai ra to oraraa, te haapeapea ra râ oe no to ananahi. I te tahi mau taime, e moemoe aore ra e hepohepo atoa oe. Peneiaˈe te fifi ra to utuafare aore ra ua pohe te hoê taata herehia e oe. Mea piri roa André i to ˈna papa tei pohe taue no te maˈi. Ua oto roa ino oia a manaˈo atu ai e eita ta ˈna e nehenehe e faaruru i te reira.
Noa ˈtu eaha te fifi ta tatou e faaruru ra, e hinaaro iho â tatou e ite e e nehenehe anei e oaoa i teie mahana. Na te oraraa ïa o Iesu Mesia tei parahi i te fenua nei a 2 000 matahiti aˈenei e pahono mai i tera uiraa. Noa ˈtu te mau fifi atoa ta ˈna i faaruru, ua oaoa mau oia. O tatou atoa ïa mai te peu iho â râ e peehia to ˈna hiˈoraa.