‘Ua faaore Iehova i ta oe hapa’

Ua haapapu na Edward Herbert, taata tuatapapa Beretane o te senekele 17, i te tumu e hinaaro ai ia faaore mai vetahi ê i ta tatou hapa: I te hoê taime, e ani atu iho â tatou ia na reira atoa mai ratou. (Mataio 7:12) Te vai ra râ te tahi atu tumu. A hiˈo na i ta te aposetolo Paulo i papai: “E faaoromai te tahi i te tahi, e e faaore te tahi i ta te tahi hapa, ia pariraahia ta te tahi i te tahi; mai ta [“Iehova,” Traduction du monde nouveau] atoa i faaore i ta outou na, e na reira atoa outou.”—Kolosa 3:13.

No to tatou huru tia ore, e haapepe iho â tatou ia vetahi ê e e na reira atoa mai paha ratou. (Roma 3:23) E nafea ia vai hau noa e vetahi ê? Ma te turu a te Atua, ua aˈo mai Paulo ia faaoromai e ia faaore i te hapa. Te tano noa ra tera aˈoraa i teie mahana noa ˈtu e ua papaihia te reira a piti tausani matahiti aˈenei. E hiˈopoa maite anaˈe i ta Paulo i parau.

“E faaoromai te tahi i te tahi.” Ua faaite te tahi buka e e faatupu te mau Kerisetiano i tera huru maitai ia “ineine ratou i te faaoromai i te taata e hapa ˈtu aore ra i tei faatupu i te tahi huru ta ratou e au ore.” A na ô ai “te tahi i te tahi,” e ere noa ïa vera ma te tia ia faaoromai mai, o tatou atoa râ. Ma te haamanaˈo e e au-ore-hia atoa paha te tahi o to tatou huru, e tutava anaˈe i te faatupu i te hau e vetahi ê. E nafea râ, ia hara te tahi atu ia tatou?

“E faaore te tahi i ta te tahi hapa.” Ia au i te tahi aivanaa, aita te parau Heleni “faaore i te hapa” “e faaohipahia na no te faaoreraa hapa noa . . . no te haafaufaa atoa râ i te hamani maitai ia faaorehia te hapa.” Te na ô ra te tahi atu taata, “e faahoˈi i te hoê mea maitai, fanaˈoraa taa ê e faufaa” te auraa atoa o tera parau. E na reirahia ïa ia ineine tatou i te faaore i te hapa noa ˈtu e ‘e pariraa ta tatou ia vetahi ê.’ No te aha râ e mea tia ˈi ia na reira? No te mea, ia tae i te hoê taime, e hinaaro iho â tatou ia faaore mai vetahi ê i ta tatou hapa.

‘Mai ta Iehova hoi i faaore i ta outou na, e na reira atoa outou.’ Tera te tumu faufaa roa ˈˈe e faaore ai tatou i te hapa a vetahi ê: E faaore noa hoi Iehova i ta tatou mau hapa. (Mika 7:18) A feruri na i te haamaitairaa rahi ta Iehova e horoa i te taata hara tatarahapa. Aita iho â ta Iehova e hara. Ua ineine râ oia i te faaore roa i te hara a tei tatarahapa mau ma te ite e eita o ˈna e hinaaro i ta ratou faaoreraa hapa. O Iehova te hiˈoraa maitai roa ˈˈe i te mea e ua faaore oia i te hara a tei tatarahapa mau!

No to Iehova hamani maitai, e haafatata ˈtu iho â tatou ia ˈna a hinaaro atoa ˈi e pee i to ˈna hiˈoraa. (Ephesia 4:32–5:1) E uiui anaˈe ïa, ‘I te mea e ua faaore mai Iehova i ta ˈu hapa ma te hamani maitai rahi, no te aha vau e ore ai e faaore i te hapa a te tahi atu taata tia ore tatarahapa mau?’—Luka 17:3, 4.