Te turu ra anei ta oe haapaoraa i te tamaˈi?

E faehau Alberto fatata e ahuru matahiti. Te haamanaˈo ra o ˈna: “Ua haamaitai mai to matou perepitero ma te parau e, ‘Tei ia outou ra te Atua.’ No ˈu râ, te haere ra vau e haapohe i te taata, te parau ra hoi te Bibilia, ‘eiaha e taparahi.’”

I te Piti o te Tamaˈi Rahi, e faehau Ray i roto i te nuu moana. I te tahi taime, ua ani oia i te orometua: “Tei nia oe i te pahi e te pure ra ia upootia te nuu. Te na reira atoa anei te enemi?” Ua na ô atu te orometua e mea fifi ia taa i te mau ohipa a te Fatu.

Mai te peu e aita oe i mauruuru i tera pahonoraa, e ere oe anaˈe.

EAHA TA TE BIBILIA E HAAPII RA?

Eaha te tahi ture rahi roa ˈˈe a te Atua? Ua pahono Iesu: “E aroha ˈtu oe i to taata-tupu mai to aroha ia oe iho na.” (Mareko 12:31) Ua taotia anei Iesu i tera here i te taata o te tahi noa fenua aore ra nunaa? Aita. Ua na ô atu i ta ˈna mau pǐpǐ: “O te mea teie e ite ai te taata atoa e, e pǐpǐ outou na ˈu, ia aroha outou ia outou iho.” (Ioane 13:34, 35) Ua riro ïa te here ei tapao no te Kerisetiano mau. Eita roa ˈtu ratou e haapohe i te taata, ua ineine râ i te horoa i to ratou ora no vetahi ê.

Ua pee atoa te mau Kerisetiano matamua i ta Iesu i parau. Ia au i te tahi buka: “Ua haapapu te mau metua o te ekalesia matamua, mai ia Tertullien e Origène, e i opanihia na te mau Kerisetiano ia haapohe i te taata. No tera faaueraa, aita ratou i faaô i roto i te nuu Roma.”—The Encyclopedia of Religion.

EAHA TE HAEREA O TE MAU ITE NO IEHOVA?

Te ora ra te mau Ite no Iehova i te mau fenua atoa. I rotopu ia ratou, te vai ra te faaea ra i te fenua e tamaˈi ra. Noa ˈtu râ, te tutava ra ratou i te faaite i te here, te tapao o te Kerisetiano mau.

I 1994, aita roa te mau Ite no Iehova i Rwanda i faaô i roto i te aroraa o te nunaa Hutu e Tutsi. Noa ˈtu e e haapohehia ratou, ua faatapuni te mau Ite no Iehova o te tahi opu i to te tahi atu. A itehia ˈi e ua na reira e piti Ite no Iehova Hutus no to ratou mau taeae Tutsis, ua na ô te tahi taata o te Interahamwe, e pǔpǔ faehau Hutu: “I te mea e ua tauturu orua i te mau Tutsis ia horo ê, e pohe orua.” Ma te peapea, ua haapohehia na taeae Hutus e piti.—Ioane 15:13.

Eaha to oe manaˈo? Mai ta Iesu i parau, ua here anei te mau Ite no Iehova ma te pipiri ore?