Eaha te manaˈo o ta oe haapaoraa no nia i te moni?

I haere pinepine na Estellea e ta ˈna e maha tamaroa e e toru tamahine i te pureraa. Te na ô ra o ˈna: “Ua ani vau i to matou orometua ia haapii mai i te Bibilia.” Aita roa ˈˈe râ oia i farii. Ua faaea ˈtura o ˈna i te haere i te fare pure. Ua na ô faahou: “A papai mai ai te mau tia haapaoraa, ua taa ia ˈu e, noa ˈtu e eita vau e haere i te fare pure, e mea tia ia hapono atu vau i te moni. Manaˈo aˈera vau e ‘Aita ratou e tâuˈa ra e tae atu anei au; ta ratou e hinaaro, ta ˈu ïa moni.’”

Ua na ô Angelina, te tahi vahine faaroo: “I ta matou fare pure e i te mau pureraa atoa, e titauhia mai te moni e toru taime, e mea tia iho â ia horoa matou. Hopea ore te titauraa moni. No ˈu, aita te varua o te Atua ia ratou ra.”

I to oe vahi, ua rau anei te ravea a te mau haapaoraa no te faahepo i te taata ia horoa i te moni? Ua tuati anei te reira i te manaˈo o te Bibilia?

EAHA TA TE BIBILIA E HAAPII RA?

Ua na ô Iesu, tei haamau i te amuiraa Kerisetiano: “I horoa-noa-hia mai ta outou, e horoa noa hoi outou.” (Mataio 10:8) Mea tamoni ore te poroi o te Bibilia. E mea tia ia faaroo te taata atoa e hinaaro ra i te reira.

Ua nafea te mau Kerisetiano matamua no te aufau i te mau haamâuˈaraa no te amuiraa?

Ia horoa te taata i “ta ˈna i opua i roto i to ˈna aau; eiaha ma te nounou, e mai te mea e no te titau: o te taata horoa noa hoi ta te Atua e hinaaro.” (Korinetia 2, 9:7) Ua na ô te aposetolo Paulo: ‘Ua rave au i te ohipa i te rui e te ao, ia ore te hoê o outou ia teimaha ia matou, i te parauraa ˈtu ia outou i te evanelia.’ (Tesalonia 1, 2:9) Ei taata hamani fare ie, na Paulo iho â i aufau i te mau haamâuˈaraa no ta ˈna taviniraa.—Ohipa 18:2, 3.

EAHA TE FAANAHORAA A TE MAU ITE NO IEHOVA?

E putuputu te mau Ite no Iehova i roto i te mau vahi tano noa parauhia Piha a te Basileia. E nafea te mau haamâuˈaraa e aufauhia ˈi? Eita roa e titauhia te moni ma te faahaere i te tahi farii aore ra ma te hapono atu i te hoê aniraa ô. Ua au anaˈe te taata i te mau putuputuraa, ma te ore e faaiteite, e nehenehe oia e tuu i te ô horoa noa i roto i te afata ô i te Piha a te Basileia.

Mea papu e ua aufauhia te neneiraa e haponoraa o teie vea. I roto, eita oe e ite noa ˈˈe i te tahi poroi faatianiani aore ra titauraa moni, i te parau mau o te Bibilia râ.

Eaha to oe manaˈo? Ua tano anei teie faanahoraa i ta Iesu mau parau e te hiˈoraa o te mau Kerisetiano matamua?