“Na mua ˈˈe, e taata ino mau vau”

NA MUA ˈˈE:

Mea piri to matou vahi faaearaa i te tapaeraa pahi o te oire o Turku. I reira, mea veve te rahiraa o te taata. E aito motoraa to ˈu papa e mea au iho â ïa na to ˈu teina e vau i te reira. I te fare haapiiraa, i pinepine na vau i te moto. Ei taurearea, ua ô vau i roto i te hoê pǔpǔ taata ohipa ino mau tei turai mai ia apiti i te mau aroraa haavî uˈana. Ua haamata ˈtura vau i te au i te upaupa parauhia heavy metal a hinaaro atu ai e riro ei taata himene rock tuiroo.

Ua hoo mai au i te tahi mau faatete e ua haamau i te hoê pǔpǔ faataˈi upaupa. Aita i maoro, riro atura vau ei taata himene o te pǔpǔ. I nia i te tahua, e taata taehae roa vau oia atoa te toea o te pǔpǔ. Ua atutu to matou parau no to matou huru e faaahuraa. Haamata ˈtura matou i te hauti i mua i te nahoa taata e i te haruharu i te tahi mau pehe. O te himene hopea râ tei au-roa-hia. I 1980, ua reva ˈtu matou i Marite no te faaiteite i ta matou mau himene i New York e Los Angeles. Hou a hoˈi ai i Filelane, ua farerei au i te tahi mau ona haruharu upaupa.

Noa ˈtu e mea au na ˈu e himene, te ere ra vau i te tahi mea. Ua inoino roa vau i te huru e peu a te mau ona haruharu pehe. Aita atoa vau i oaoa i to ˈu oraraa. No to ˈu ino, i riaria na vau i te haere i roto i te po auahi. Ua imi au i te tahi pahonoraa i roto i te mau buka faaroo. Noa ˈtu e e ere au i te taata maitai, ua pure noa vau ia tauturu mai te Atua.

UA TAUI TE BIBILIA I TO ˈU ORARAA:

I rave na vau i te ohipa i te fare rata. I te hoê mahana, ua faaroo vau e e Ite no Iehova te tahi hoa rave ohipa. Hopea ore au i te uiui ia ˈna. No te tano e te ohie o ta ˈna mau pahonoraa i farii ai au na ˈna e faatere i ta ˈu haapiiraa Bibilia. Tau hebedoma i muri aˈe, e parau faaau tei noaa mai i ta ˈu pǔpǔ no te haruharu i te mau pehe e nehenehe e matara i Marite. No ˈu mea faahiahia mau, e farii iho â ïa vau!

Parau atura vau i te Ite e faatere ra i ta ˈu haapiiraa e i muri aˈe noa teie haruharuraa hopea e faaohipa ˈi au i te mau faaueraa Bibilia. Aita oia i parau noa ˈˈe i te tahi mea, ua ani mai râ ia taio i te Mataio 6:24 o te na ô ra: “E ore te taata e tia ia faaroo i te fatu toopiti.” Taa ˈtura ia ˈu ta Iesu parau. Tau mahana i muri aˈe, o te taeae e faatere ra i ta ˈu haapiiraa tei hitimahuta i to ˈu parauraa ˈtu e ua faarue au i ta ˈu pǔpǔ no to ˈu hinaaro e pee ia Iesu!

E au te Bibilia i te hoê hiˈo o tei faaite mai i to ˈu mau paruparu. (Iakobo 1:22-25) Ua taa ˈtura ia ˈu e na mua ˈˈe e taata ino mau vau no to ˈu teoteo e nounou i te tiaraa. Ua matau atoa na vau i te parau faufau, moto, puhipuhi i te avaava e te inu hua i te ava. Ua riri au ia ˈu iho a ite ai au e aita to ˈu oraraa i tuea i te mau faaueraa Bibilia. Ua ite vau e e ere i te mea ohie, ua ineine râ vau i te rave i te mau tauiraa.—Ephesia 4:22-24.

I faahapahapa na vau ia ˈu no to ˈu oraraa na mua ˈˈe, ua tauturu rahi mai râ te taeae i faatere i ta ˈu haapiiraa. Ua faaite mai oia i ta te Isaia 1:18 e parau ra: “Ia uteute roa ta outou mau hara ra, e riro ïa mai te hiona.” Na teie irava e te tahi atu i haapapu mai ia ˈu e e Atua hamani maitai to tatou Metua i te raˈi e te hinaaro ra oia e faaore i te mau pepe o te feia e tatarahapa i ta ratou hara.

I to ˈu iteraa e hereraa ia Iehova, ua pûpû vau i to ˈu oraraa ia ˈna. (Salamo 40:8) Ua bapetizohia vau i 1992 i te hoê tairururaa nunaa rau a te mau Ite no Iehova i Saint-Pétersbourg, i Rusia.

TO ˈU FAUFAARAAHIA:

E rave rahi to ˈu hoa maitai i rotopu i te mau Ite no Iehova. Te amui nei matou no te hauti i te upaupa au mau e no te haafaufaa i taua ô a te Atua. (Iakobo 1:17) Te hoê haamaitairaa taa ê, o to ˈu ïa faaipoiporaa i ta ˈu vahine here o Kristina. Te ite ra mâua i te oaoa e te fifi atoa râ. Hau atu â, te vai noa nei â to ˈu mau manaˈo faahapahapa.

Ahiri aita vau i riro ei Ite no Iehova, ua pohe ê na vau. Na mua ˈˈe, e hepohepo noa vau no te rahi o to ˈu mau fifi e peapea. I teie nei râ, e oraraa oaoa mau to ˈu.