“E ani, e noaa ïa ia outou”

Ua ani te hoê pǐpǐ ia Iesu: “E te Fatu, a haapii mai ia matou i te pure.” (Luka 11:1) Ei pahonoraa, ua faahiti oia e piti faahohoˈaraa no te ite e nafea ia pure ia faaroo mai te Atua. I uiui na paha oe ‘E faaroo anei te Atua i ta ˈu?’ E anaanatae iho â ïa oe i ta Iesu i parau.—A taio i te Luka 11:5-13.

Te faatia ra te faahohoˈaraa matamua no te tahi taata e pure ra. (Luka 11:5-8) I roto i te aamu, e farii te hoê fatu fare i te manihini i te tuiraa po, aita râ ta ˈna e maa. Te haapeapea ra iho â ïa oia. Noa ˈtu te maororaa po, e haere oia i te fare o to ˈna hoa e ani i te tahi faraoa. I te omuaraa, eita to ˈna hoa e hinaaro e tia mai no te mea ua taoto ê na oia e to ˈna utuafare. Aita râ i tuu, ua onoono atu i to ˈna hoa ia horoa mai i te maa.a

Eaha ta teie faahohoˈaraa a Iesu e haapii maira no nia i te pure? Mea faufaa ia onoono, ia tamau i te ani, i te imi e te patoto. (Luka 11:9, 10) Eaha hoi, eita te Atua e hinaaro e faaroo i ta tatou pure? E ere tera to Iesu manaˈo. Te faataa ra râ oia, e pahono iho â te Atua i te mau pure a te feia e tiaturi aore ra, e onoono ia ˈna. E haapapuraa te reira i to tatou hinaaro mau i te mea e anihia ra e i to tatou tiaturi e e horoa mai iho â te Atua i te reira. Ia au râ i to ˈna hinaaro.—Mareko 11:24; Ioane 1, 5:14.

No nia ia Iehova “tei faaroo i te pure” te piti o te faahohoˈaraa. (Salamo 65:2) Te haaferuri ra Iesu: “O vai ïa metua i ǒ outou nei e hopoi atu i te ofai na te tamaiti ia ani mai i te pane ra? e ia ani mai i te iˈa, e hopoi atu anei i te ophi eiaha te iˈa, ia ˈna? E ia ani mai hoi i te huero moa, e hopoi atu anei i te pata?” Mea maramarama te pahonoraa: eita iho â te metua tane e horoa i te mea ino na ta ˈna tamarii. Ia au i ta Iesu faataaraa: Mai te peu e e “horoa” te metua tane tia ore “i te mea [aore ra ô] maitai” na ta ratou tamarii, “e rahi atu ïa to outou Metua i te ao ra i te horoa i te [v]arua [m]aitai,” te ô maitai roa ˈˈe, na ta ˈna mau tamarii i te fenua nei o te pure ra ia ˈna!b—Luka 11:11-13; Mataio 7:11.

Eaha ïa te haapii mai no nia ia Iehova, “tei faaroo i te pure”? E au Iehova i te metua tane î i te here o te haamâha i te mau hinaaro o ta ˈna tamarii. Eita iho â ïa tei haamori ia ˈna e taiâ i te ani atu i ta to ratou aau e hinaaro. Ma te ite e te hinaaro ra te Atua i te mea maitai roa ˈˈe no ratou, e farii noa ïa ratou i ta ˈna pahonoraa noa ˈtu e e ere mai ta ratou i manaˈo.c