Ua tae mai i te taime tano mau!

“EITA e moehia!” Ta e rave rahi ïa i parau no te faataa i te “Darama o te Poieteraa” (Beretane). Ua tae mai te reira i te taime tano mau e ua putapû roa te feia i mataitai atu. Ua horoa te “Darama o te Poieteraa” i te hoê faaiteraa puai mau no te arue ia Iehova hou rii te faatereraa a Hitler e hamani ino uˈana ˈi i to te Atua nunaa i Europa. Eaha râ te “Darama o te Poieteraa”?

I 1914, ua faaite te pu rahi a te nunaa o Iehova i Brooklyn, i New York (Marite), i te “Hohoˈa Darama o te Poieteraa.” E porotarama pataraa hohoˈa peni rau, hohoˈa taviri e haruharuraa e vau hora i te maoro. E mirioni taata tei ite i te reira. Ua faaite-atoa-hia te hoê â porotarama (Eurêka-Drame), mea poto aˈe râ, i 1914. I te mau matahiti 1920 râ, ua ino te mau hohoˈa, hohoˈa taviri e taihaa no te pata. Tera râ, mea rahi â te taata te hinaaro ra e mataitai i te “Hohoˈa Darama.” Mai te feia no Ludwigsbourg i Heremani o tei ui, “Afea te ‘Hohoˈa Darama’ e pata-faahou-hia ˈi?” Eaha te nehenehe e rave?

No te pata faahou i te Darama, ua hoo mai te mau tia no te Betela i Magdebourg i 1920 te mau hohoˈa taviri a te hoê taiete i Paris (Farani). Oia atoa te mau hohoˈa a te mau taiete hamani hohoˈa no Leipzig e Dresde. Ua amuihia te reira i te tahi mau hohoˈa o te “Hohoˈa Darama” tei ore i ino.

Ua papai te taeae Erich Frost, taata faataˈi upaupa aravihi, i te upaupa e faaroohia ia patahia te hohoˈa taviri e te hohoˈa. No roto mai te tahi mau parau i papaihia i nia iho i ta tatou buka Création. No reira i horoahia ˈi i te “Hohoˈa Darama” apî te iˈoa “Darama o te Poieteraa.”

E vau atoa hora i te maoro te Darama apî. Ua tatuhaahia te reira e e patahia hoê tuhaa i te arui taitahi. E itehia te mau parau rii faufaa no nia i te mau mahana poieteraa, haamanaˈoraa Bibilia e te tuatapaparaa. Ua faaite atoa e ua inoino te huitaata i te haapaoraa hape. Ua ite te feia i Auteteria, Heremani, Luxembourg e Helevetia i te “Darama o te Poieteraa.” Oia atoa te feia reo Heremani i te tahi atu mau vahi.

Te faataa ra Erich Frost: “A haapurorohia ˈi te hohoˈa taviri o te Darama, ua faaitoito vau i to ˈu mau hoa, tera iho â râ i roto i te pǔpǔ faataˈi upaupa, ia faaohipa i te taime faafaaearaa no te opere i ta matou mau buka e buka rairai faahiahia mau i te feia i tae mai. Mea rahi aˈe te papai tei vaiihohia i taua taime ra i tera i tera fare.” Te haamanaˈo ra Johannes Rauthe, o tei faanaho i te mau haapurororaa i Poronia e i te Repupirita Tchèque i teie nei, e mea rahi te taata o tei tae mai tei faaite ihea ratou e faaea ˈi ia farereihia ratou. Ua haere te feia poro e hiˈo ia ratou e ua tauaparau no nia i te Bibilia ma te anaanatae mau.

I te mau matahiti 1930, ua î te mau piha haapurororaa a patahia ˈi te “Darama o te Poieteraa” e tei nia te tauaparauraa a te taata i taua mau oire ra i te mau Ite no Iehova. I 1933, fatata hoê mirioni taata tei haere i te mau haapurororaa faanahohia e ta tatou amaa i Heremani. Te haamanaˈo ra Käthe Krauss: “No te mataitai i te Darama, ua haere avae matou e pae mahana i te maoro, 10 kilometera i te mahana taitahi, na roto i te uru raau, na nia i te mouˈa e na roto i te mau faa.” Te na ô ra Else Billharz e ua haamata o ˈna i te au roa i te parau mau maoti tera haapurororaa.

Te faatia ra Alfred Almendinger e i to to ˈna mama haereraa e mataitai i te Darama, ua oaoa roa o ˈna e ua hoo atura i te hoê Bibilia a imi atu ai i te parau ‘po auahi.’ No te mea aita o ˈna i ite i te reira i roto i te Bibilia, ua faaea oia i te haere i te fare pureraa e ua bapetizo aˈera ia ˈna. Te haamanaˈo ra Erich Frost: “Mea rahi roa te taata tei farii i te parau mau maoti te ‘Darama o te Poieteraa.’”—Ioa. 3, 1-3.

E rave rahi tei maitatai i te “Darama o te Poieteraa.” Aita râ i maoro ua parare roa to Hitler mau manaˈo na Europa e ua haamata ˈtura te peapea. I te omuaraa o te matahiti 1933, ua opanihia te mau ohipa a te mau Ite i Heremani. Mai tera taime e tae atu i te hopea o te piti o te tamaˈi rahi i 1945, ua hamani-ino-uˈana-noa-hia te mau tavini a Iehova i Europa. Ua tapeahia Erich Frost fatata vau matahiti i te maoro. Ua ora mai râ oia e ua tavini i muri aˈe i te Betela i Wiesbaden, i Heremani. Ua tae mai iho â te “Darama o te Poieteraa,” o te ore roa ˈtu e moehia, i te taime tano mau no te faaitoito i te Kerisetiano e rave rahi roa ia tamatahia to ratou faaroo i te roaraa o te Piti o te Tamaˈi rahi!—Haamanaˈoraa no tahito ra no Heremani mai.