Uiraa a te feia taio . . .

Mea haumani anei te ora mure ore i roto i te Paradaiso?

▪ E tiaturiraa e ora e a muri noa ˈtu i roto i te Paradaiso i te fenua nei to roto i te Bibilia. (Salamo 37:29; Luka 23:43) Mea haumani anei ia ora e a muri noa ˈtu i roto i te hoê vahi maitai roa?

E uiraa anaanatae mau teie. Ua itea i te feia maimi e e haapeapea, e hepohepo e e rave te hoê taata i te mau mea atâta ua haumani noa anaˈe oia. No te mea paha aita ta ˈna e fa i roto i te oraraa aore ra ua taahoa oia i ta ˈna mau ohipa o te mau mahana atoa. Aita anei e fa to te feia e ora i roto i te Paradaiso? E haumani anei ratou i ta ratou e rave?

A tahi, na te Atua ra o Iehova, te Fatu o te Bibilia, e pûpû maira i te ora mure ore. (Ioane 3:16; Timoteo 2, 3:16) O te aroha to ˈna huru maitai matamua. (Ioane 1, 4:8) Te here rahi ra Iehova ia tatou e te ho maira oia i te mau mea maitatai atoa ta tatou e fanaˈo nei.—Iakobo 1:17.

Ua ite to tatou Atua Poiete e e hinaaro tatou i te hoê ohipa faufaa roa no te oaoa. (Salamo 139:14-16; Koheleta 3:12) I roto i te Paradaiso, eita te mau rave ohipa e riro mai te matini. E faufaa-roa-hia ratou e tei herehia e ratou i tera ohipa. (Isaia 65:22-24) E ohipa taime taatoa anaˈe ta oe, te anaanatae e te au mau, e haumani anei to oe oraraa?

Te piti, eita atoa te Atua ra o Iehova e faatia i te taata atoa i roto i te Paradaiso. No te feia anaˈe e pee ra i te hiˈoraa o ta ˈna Tamaiti Iesu te ô o te ora mure ore. (Ioane 17:3) I te fenua, ua au Iesu i te rave i te hinaaro o to ˈna Metua. Ma ta ˈna mau parau e ohipa, ua haapii o ˈna i ta ˈna mau pǐpǐ e no roto mai te oaoa mau i te horoa-atoa-raa ˈtu eiaha i te rave-noa-raa mai. (Ohipa 20:35) I roto i te Paradaiso, e ora te taatoaraa ia au i na ture rahi roa ˈˈe e piti: te here i te Atua e te here i te taata-tupu. (Mataio 22:36-40) A feruri na e e taata miimii ore anaˈe te haaati ra ia oe, o te here ra ia oe e o te au ra i ta ratou ohipa! E haumani anei oe?

Mai te aha ˈtu â te oraraa i reira? I te mahana taitahi, e haapii tatou i te tahi mea apî no nia i to tatou Atua Poiete. Mea rahi te ohipa faahiahia ta te feia maimi i ite no nia i te poieteraa a Iehova. (Roma 1:20) Mea iti noâ râ ta tatou i ite. A tausani matahiti aˈenei, ua hiˈopoa Ioba taiva ore i ta ˈna i ite no nia i te mau mea poietehia e te Atua e mea tano noâ ta ˈna i parau: “O te tahi pae teie o ta [te Atua] e rave ra, e vahi iti haihai râ ta tatou e ite nei ia ˈna; o te haruru râ o to ˈna puai, o vai ra te ite i te reira?”—Ioba 26:14.

Noa ˈtu te ora mure ore, eita roa ˈtu tatou e ite i te taatoaraa no nia i te Atua ra o Iehova e ta ˈna mau ohipa. Ia au i te Bibilia, ua tuu te Atua i te hinaaro e ora e a muri noa ˈtu i roto i to tatou aau. Te na ô atoa ra râ e eita roa ˈtu tatou e “ite i te ohipa a te Atua mai te matamua mai e tae noa ˈtu i te hopea.” (Koheleta 3:10, 11) E haumani anei oe i te haapii i te mau mea apî no nia i tei Hamani ia oe?

I teie nei â mahana, eita te feia e haa rahi ra ia fanaˈohia vetahi ê e ia faahanahanahia te Atua e haumani hanoa. Ia na reira atoa tatou, papu maitai e eita roa ˈtu tatou e haumani noa ˈtu e e ora tatou e a muri noa ˈtu.

[Faaiteraa i te fatu o te hohoˈa i te api 32]

Fenua: Image Science and Analysis Laboratory, NASA-Johnson Space Center; Haapueraa fetia: The Hubble Heritage Team (AURA/STScI/NASA)