Pure

6 E tauturu anei?

E TAUTURU anei te pure ia tatou? Te faaite ra te Bibilia e e, e faaitoito iho â te pure a te mau tavini haapao maitai a te Atua ia ratou. (Luka 22:40; Iakobo 5:13) Inaha, e mea maitai roa te pure no tatou i te pae varua, aau, e tino. E nafea?

Ei hiˈoraa, e tamarii paha ta oe o tei fanaˈo i te hoê ô. E haapii anei oe ia ˈna e e ravai noa ia manaˈo e haamauruuru? Aore ra ia faaite i to ˈna mauruuru? Ia parau roa tatou i to tatou mau manaˈo faufaa, te faaite ra e te haapapu ra ïa tatou i te reira. Mai tera atoa anei ia paraparau tatou i te Atua? Oia mau. Teie te tahi mau hiˈoraa.

Pure haamauruururaa. Ia haamauruuru tatou i to tatou Metua no te mau mea maitai ta ˈna e horoa maira, te tiatonu ra ïa tatou i ta tatou mau haamaitairaa. Ei faahopearaa, e rahi atu â to tatou mauruuru, oaoa, e manaˈo maitai.—Philipi 4:6.

Hiˈoraa: Ua haamauruuru Iesu i to ˈna Metua no to ˈna faarooraa e pahonoraa i ta ˈna mau pure.—Ioane 11:41.

Pure ia faaorehia te hara. Ia ani tatou i te Atua ia faaore i te hara, e haapapu tatou i to tatou manaˈo haava, e faahohonu i to tatou tatarahapa, e e ite maite atu â tatou i te ino o te hara. E mâmâ atoa mai te manaˈo faahapahapa.

Hiˈoraa: Ua pure Davida no te faaite i to ˈna tatarahapa e to ˈna oto.—Salamo 51.

Pure no te ani i te aratairaa e te paari. E tauturu mai te aniraa ia Iehova ia aratai ia tatou e ia horoa mai i te paari e hinaarohia no te rave i te mau faaotiraa maitatai, ia haehaa mau. E haamanaˈo atoa mai te reira i to tatou mau taotiaraa e e tauturu mai ia tiaturi atu â i to tatou Metua i te raˈi.—Maseli 3:5, 6.

Hiˈoraa: Ua ani haehaa Solomona i te aratairaa e te paari no te faatere ia Iseraela.—Te mau arii 1, 3:5-12.

Pure ia ahoaho tatou. Ia haamahora tatou i to tatou aau i te Atua ia ahoaho tatou, e mǎrû mai to tatou aau e e turui tatou i nia ia Iehova, eiaha i nia ia tatou.—Salamo 62:8.

Hiˈoraa: Ua pure te arii Asa i to ˈna faaûraa i te enemi atâta.—Paraleipomeno 2, 14:11.

Pure ia maitai vetahi ê. E tauturu teie mau pure ia tatou ia haavî i te miimii e ia aumihi atu â.

Hiˈoraa: Ua pure Iesu no ta ˈna mau pǐpǐ.—Ioane 17:9-17.

Pure arueraa. Ia arue tatou ia Iehova no ta ˈna mau ohipa e huru maitatai faahiahia, e rahi atu â to tatou faatura e mauruuru ia ˈna. Maoti atoa teie mau pure, e haafatata ˈtu â tatou i to tatou Atua e Metua.

Hiˈoraa: Ua arue Davida i te Atua ma te aau haavare ore no ta ˈna poieteraa.—Salamo 8.

O “te hau a te Atua, o tei hau ê atu i te ite taata” te tahi atu haamaitairaa tei taaihia i te pure. (Philipi 4:7) E haamaitairaa varavara mau â te iteraa i te hau i roto i teie nei ao arepurepu. E maitai pae tino atoa to te reira. (Maseli 14:30) E tupu anei râ te reira maoti noa ta tatou mau tutavaraa? Aore ra maoti te tahi mea faufaa ˈtu â?

[Parau iti faaôhia i te api 10]

Mea rahi te maitai o te pure i te pae tino, aau e varua iho â râ