Eaha te faaroo?

E NAFEA oe e faataa ˈi i te faaroo? No vetahi, e tiaturiraa matapo ïa. I parau na o Henry Mencken, papai buka e papai vea Marite, i te faaroo mai “te tiaturiraa tano ore e e tupu te hoê ohipa eita e manaˈohia e tupu.”

Area te Bibilia ra, aita ïa e faataa ra i te faaroo ei mea matapo aore ra tano ore. Te na ô ra te Parau a te Atua e: “Te faaroo nei, o te tiaturi ïa i te mau mea e tiaihia [“tiai-papu-raa ïa i te mau mea e tiaturihia,” MN] nei, e te ite i te mau mea aore hoi e hiˈohia nei.”—Hebera 11:1.

No te rau o te manaˈo no nia i te faaroo, e hiˈopoa mai tatou i te mau pahonoraa i teie mau uiraa:

• Eaha te faataaraa a te Bibilia e taa ê ai e to te taata e rave rahi manaˈo i te faaroo?

• No te aha e mea faufaa roa ˈi ia faatupu tatou i te huru faaroo ta te Bibilia e faataa ra?

• E nafea ia haapuai i to oe faaroo?

Te hoê parau faturaa e haapapuraa eita e tia ia patoi

I te papairaahia te rata Hebera, mea matauhia ia faaohipa i te taˈo Heleni tei hurihia ei “tiai-papu-raa.” E ite-pinepine-hia te reira i nia i te mau parau tapihooraa ei haapapuraa i te faturaa i te tahi mea a muri aˈe. No reira te hoê papai e parau ai e e nehenehe te Hebera 11:1 e hurihia mai teie: “Te faaroo, o te parau faturaa ïa o te mau mea e tiaturihia nei.”

Mai te peu e ua hoo mai oe i te tahi taihaa i ǒ te hoê taiete roo maitai e ua tiai oe ia haponohia mai te reira, ua faatupu ïa oe i taua huru faaroo ra. No te parau hooraa i roto i to oe rima, e tumu ïa e tiaturi ai oe i tera taiete. Taua parau hooraa ra i roto i te hoê auraa, o ta oe ïa parau faturaa, ta oe haapapuraa e e tae mai iho â te taihaa ta oe i hoo mai. Ia moe te parau hooraa aore ra ia faarue oe i te reira, e moe ïa te haapapuraa e o oe te fatu. Oia atoa no te feia e faaroo to ratou e e faatupu te Atua i ta ˈna mau parau fafau, e haapapuraa ta ratou e e tae mai iho â te mea ta ratou e tiaturi ra. Area te feia aita e faaroo to ratou, aore ra ua ere ratou i te reira, eita ïa e nehenehe e parau e e fanaˈo ratou i te mau mea ta te Atua e fafau ra.—Iakobo 1:5-8.

I roto i te piti o te parau o te Hebera 11:1, tei hurihia ei ‘ite-papu-raa,’ te vai ra te manaˈo o te horoaraa i te haapapuraa o te tahi mea, tei taa ê roa i te tupuraa mau ia hiˈohia. Ei hiˈoraa, e au ra e o te mahana te ohu e ati aˈe te fenua, e tia mai hoi i te pae hitia o te râ, a tere atu ai na roto i te raˈi, e topa ˈtu ai i te pae tooa o te râ. Ia au râ i te mau haapapuraa a te ihi reva teitei e te matematika, aita te fenua i ropu i te faanahoraa o te mahana. I te taime a ite ai oe i tera haapapuraa e a farii ai ei parau mau, e faaroo to oe e o te fenua te ohu e ati aˈe te mahana—noa ˈtu e e au ra e mea taa ê ta to oe mata e ite ra. E ere to oe i te faaroo matapo. Te faaroo, e ere ïa i te tiaturiraa i te tahi mea ma te ore e taa i te reira. Maoti râ te faaroo e tia ˈi ia oe ia taa i te mau mea ia au i to ratou tupuraa mau.

Eaha te faufaaraa o te hoê faaroo puai?

Tera te huru faaroo ta te Bibilia e faaitoito ra—te faaroo puai niuhia i nia i te mau haapapuraa eita e tia ia patoi, noa ˈtu e e titau te reira ia faatano tatou i ta tatou mau tiaturiraa. Mea faufaa roa tera huru faaroo. Ua papai te aposetolo Paulo e: “Aore e faaroo ra e ore roa oia e mauruuru: o te haamori i te Atua ra, e faaroo oia e, e Atua, e tia ˈi, e o oia te faautua i te feia i imi papu ia ˈna ra.”—Hebera 11:6.

Mea rahi te mea e haafifi ia oe ia faatupu i te faaroo puai. Mai te peu râ e e rave oe i na taahiraa e maha tatarahia i to muri nei mau api, e nehenehe oe e manuïa.