PENE 22

E maha pǐpǐ tei riro ei ravaai taata

MATAIO 4:13-22 MAREKO 1:16-20 LUKA 5:1-11

TITAURAA IESU I TA ˈNA MAU PǏPǏ IA PEE TAMAU IA ˈNA
RIRORAA VETAHI RAVAAI EI RAVAAI TAATA

I muri aˈe i to vetahi no Nazareta tamataraa i te haapohe ia Iesu, haere atura Iesu i te oire o Kaperenaumi, i pihai iho i te miti o Galilea tei parau-atoa-hia te “roto o Genesareta.” (Luka 5:1) Ua tupu ïa te parau tohu a te buka a Isaia e parau ra e e ite to Galilea e parahi ra i tahatai i te hoê maramarama rahi.—Isaia 9:1, 2.

Ua tamau Iesu i te faaite ati aˈe Galilea e “ua fatata mai hoi te Faatereraa arii o te raˈi.” (Mataio 4:17) Itea maira ia Iesu e maha o ta ˈna mau pǐpǐ. I pee atoa na ratou ia Iesu, i to ratou râ hoˈiraa e o Iesu na Iudea mai, rave faahou atura ïa ratou i ta ratou ohipa ravaai. (Ioane 1:35-42) Ua tae râ i te taime e pee tamau ai ratou ia Iesu ia faaineine hoi oia ia ratou ia rave noa i te taviniraa ua reva anaˈe oia.

Ia Iesu i haere na tatahi, ite ihora oia ia Simona Petero, to ˈna taeae Anederea e te tahi mau hoa to raua e tamâ ra i te upeˈa. Tapiri atura Iesu, pauma ˈtura i nia i te poti o Petero, e ani atura ia ˈna ia faaatea i tai. Ua atea rii raua, parahi ihora Iesu, e haapii atura i te nahoa tei ruru i tatahi i te pue parau mau no nia i te Faatereraa arii.

Parau atura Iesu ia Petero: “A hôe atu i te vahi hohonu, e a tuu i ta outou mau upeˈa.” Pahono maira Petero: “Orometua, ua taiˈa matou e ao noa ˈtura e aita hoê aˈe iˈa, no ta oe râ parau, e tuu vau i te upeˈa.”—Luka 5:4, 5.

Anederea, Iakobo e Ioane e rohi ra i te huti i te upeˈa i roto i te poti. Petero e tuturi ra i mua ia Iesu

Tuu atura ratou i te upeˈa, e roaa maira e rave rahi iˈa, a mutumutu atu ai ta ratou mau upeˈa! Tarape ihora ratou i to ratou mau hoa ravaai i roto i te tahi atu poti i pihai iho atu ia haere mai e tauturu ia ratou. Fatata roa ˈtura na poti i te tomo, ua î roa hoi i te iˈa e ua teiaha roa. I te iteraa Petero i te reira, tuturi ihora oia i mua ia Iesu e parau maira: “E te Fatu, eiaha e tapiri mai ia ˈu, e taata hara hoi au.” Pahono atura Iesu: “Eiaha e mǎtaˈu faahou. Mai teie atu nei, te taata te noaa mai ia outou.”—Luka 5:8, 10.

Parau atura Iesu ia Petero raua Anederea: “A pee mai ia ˈu, e faariro vau ia orua ei ravaai taata.” (Mataio 4:19) E piti â ravaai ta ˈna i titau, o Iakobo raua Ioane, na tamaiti a Zebedaio. Aita atoa raua i feaa noa ˈˈe i te pee ia ˈna. Faarue atura ratou e maha i ta ratou ohipa ravaai e riro maira ei pǐpǐ matamua o te pee tamau ia Iesu.