Haapiiraa 2
O vai te Atua?
O vai te Atua mau, e o vai to ˈna iˈoa? (1, 2)
Mai te aha te huru to ˈna tino? (3)
Eaha to ˈna mau huru hau aˈe i te faahiahia? (4)
E tia anei ia faaohipa i te idolo e te taipe i roto i te haamoriraa? (5)
Eaha na ravea e piti e nehenehe ai tatou e haapii no nia i te Atua? (6)
1. E rave rahi taoˈa teie e haamorihia nei e te taata. Tera râ, te faaite maira te Bibilia e, hoê anaˈe Atua MAU. Ua poiete oia i te mau mea atoa i nia i te raˈi e i nia i te fenua nei. I te mea e na ˈna i horoa mai i te ora no tatou, O ˈna anaˈe te tia ia tatou ia haamori.—Korinetia 1, 8:5, 6; Apokalupo 4:11.
2. E rave rahi tiaraa iˈoa to te Atua, hoê anaˈe râ iˈoa to ˈna. O IEHOVA taua iˈoa ra. I roto i te rahiraa o te mau Bibilia, ua tatarahia te iˈoa o te Atua e ua monohia e te mau tiaraa iˈoa mai TE FATU aore ra TE ATUA. Teie râ, i te tau a papaihia ˈi te Bibilia, ua faahitihia te iˈoa Iehova i roto, tau 7 000 taime!—Exodo 3:15; Salamo 83:18.
3. E tino to Iehova, e ere râ mai to tatou nei. Te na ô ra te Bibilia e: “E Varua te Atua.” (Ioane 4:24) Te hoê varua, o te hoê ïa mea ora hau aˈe i te teitei ia tatou nei. Aita e taata i ite aˈenei i te Atua. Te ora nei Iehova i nia i te raˈi, tera râ, e nehenehe ta ˈna e ite i te mau mea atoa. (Salamo 11:4, 5; Ioane 1:18) Eaha ïa te varua moˈa? E ere oia i te hoê taata mai te Atua. O te puai ohipa râ o te Atua.—Salamo 104:30.
4. Te faataa ra te Bibilia i te huru iho o Iehova ia tatou nei. Te faaite ra oia e to ˈna mau huru hau aˈe i te faahiahia, o te here ïa, te parau-tia, te paari, e te puai. (Deuteronomi 32:4; Ioba 12:13; Isaia 40:26; Ioane 1, 4:8) Te faaite maira te Bibilia e e Atua aroha atoa oia, te maitai, te faaore i te hapa, te horoa noa, e te faaoromai. Mai te mau tamarii faaroo ra, e tia ia tatou ia tutava i te pee i to ˈna mau huru.—Ephesia 5:1, 2.
5. E tia anei ia tatou ia tipapa aore ra ia pure i mua i te mau idolo, te mau hohoˈa, aore ra te mau taipe i roto i ta tatou haamoriraa? Eita! (Exodo 20:4, 5) Te na ô ra Iehova e e tia ia tatou ia haamori ia ˈna anaˈe ra. Eita oia e horoa i to ˈna hanahana no vetahi ê aore ra no te tahi taoˈa. Aita to te mau idolo e mana no te tauturu ia tatou.—Salamo 115:4-8; Isaia 42:8.
6. Nafea tatou ia ite hau atu â i te Atua? Hoê ravea, o te mataitairaa ïa i te mau ohipa o ta ˈna i poiete e te feruri-hohonu-raa i te mea o ta ratou e faaite maira. Te faaite maira te mau mea i poietehia e te Atua e, e puai e e paari rahi to ˈna. Te ite nei tatou i to ˈna here i roto i te mau mea atoa o ta ˈna i hamani. (Salamo 19:1-6; Roma 1:20) Te tahi atu ravea e nehenehe ai tatou e haapii no nia i te Atua, o te tuatapaparaa ïa i te Bibilia. I roto i teie buka, mea rahi atu â te mau mea o ta te Atua e faaite maira no nia i to ˈna huru. Te faaite atoa maira oia i ta ˈna opuaraa e eaha ta ˈna e hinaaro ra e ia rave tatou.—Amosa 3:7; Timoteo 2, 3:16, 17.
[Hohoˈa i te api 5]
E haapii tatou no nia i te Atua na roto i te poieteraa e na roto i te Bibilia