Te faataa ra te hoê taata hamani matini uira i to ˈna faaroo

Eaha ta oe tiaturiraa i na mua ˈˈe?

E Katolika to ˈu na metua aita râ raua e haere na i te fare pureraa. I to ˈu apîraa, aita vau i tiaturi e te vai mau ra te Atua. Ua haapiihia vau e o te tauiuiraa o te mau mea ora te tumu o te ora. Ua farii iho â vau i te reira. Noa ˈtu e no ˈu aita e Atua Poiete, te vai ra râ te tahi i hau ê ia tatou. No te ite o vai, haere atura vau i te mau haapaoraa Bouddhisme, Hindouisme, e Taoïsme, aita râ ratou i pahono i ta ˈu mau uiraa.

No te aha oe i anaanatae ai i te ite aivanaa?

I to ˈu tamarii-riirii-raa, ua faahiahia vau i te mau matini. E pinepine au i te tatara e i te faahoˈi i te mau taoˈa o ta ˈu mau hauti uira. O to ˈu papa atoa te tumu. Mea ite roa o ˈna e nafea te mau ratio e niuniu paraparau e tere ai. E rave rahi uiraa ta ˈu e ui ia ˈna.

Eaha ta oe ohipa ei aivanaa?

I haapii na vau no nia i te mau ravea roro uira i te Fare haapiiraa teitei i Gênes, e i muri iho, ua faahohonu vau i to ˈu ite ia noaa mai ta ˈu parau tuite no te hamani i te mau matini uira. No reira, ua faaaravihi au ia ˈu i roto i te hiˈopoaraa i te faanahoraa o to tatou mata e e nafea ia faaohipa i te reira no teie mau matini.

No te aha oe i anaanatae ai i te faanahoraa o te mata?

Eita to tatou mata e hiˈo noa e taa atoa râ ia ˈna i ta ˈna e ite ra. Mea faahiahia mau! Ei hiˈoraa: Ia haru oe i te hoê popo, eaha te tupu? A horo ai oe e haru i te reira, o te hohoˈa o te popo ta oe e ite. Ia au i te tere o te popo e te vahi ta to mata e hiˈo ra e hauti tera hohoˈa i roto i tei parauhia rétine, te hoê ïa iri rairai o te mata. Noa ˈtu eaha to muri i te popo, o te reira anaˈe ta to oe mata e hiˈo.

I tera taime, e taa i te faanahoraa o to oe mata i te vitiviti o te popo e te vahi e tae ai. Te mea maere, e haamata te rétine i te taa i te tereraa e manaˈohia o te popo ia au i te vai ra i muri mai. E faatae te uaua uira o te mata i te mau haamaramaramaraa i te roro a faaue atu ai ia oe ia haru i te popo. Mea faahiahia mau te taatoaraa o teie faanahoraa.

No te aha oe i tiaturi ai i te hoê Atua Poiete?

I 1990, ua faaea vau tau avaˈe i Dublin, i Irelane, no te rave i te mau maimiraa i Trinity College. A hoˈi ai i te fare, ua feruri ta ˈu vahine, Barbara e vau i te oraraa no a muri aˈe o ta mâua mau tamarii. Faaoti aˈera mâua e haere e hiˈo i to ˈu tuahine Ite no Iehova. Ua horoa mai oia i te buka La vie: comment est-elle apparue? Évolution ou création?, piahia e te mau Ite no Iehova. Ua faahiahia vau no te mau maimiraa i ravehia i roto. Ua taa ˈtura ia ˈu e ua farii noa vau i te haapiiraa o te tauiuiraa o te mau mea ora ma te ore e hiˈopoa e mea mau anei râ. Ei hiˈoraa, ua parau vau e te turu ra te mau ivi tahito i tera haapiiraa. Ua hape râ. Oia mau, rahi atu â vau i te hiˈopoa i te reira, rahi atu â vau i te papu e aita to te reira e niu.

Ua feruri aˈera vau i ta ˈu ohipa e te mau matini uira. Na vai i hamani i te faanahoraa o te mata taata ta ˈu e hiˈopoa nei? Eita e haere ia ˈu ia hamani i te hoê matini uira o te nehenehe e haru i te popo mai ia tatou. E nehenehe te matini uira e na reira ia au noa i te mau tupuraa i porotaramahia i roto ia ˈna. Ua rahi aˈe to tatou ite i to te mau matini uira e e taata hamani hoi to ratou! No tera tumu i faaoti ai au e te vai ra te hoê Atua poiete.

No te aha oe i riro ai ei Ite no Iehova?

Te tahi tumu, no te mea ua au roa mâua Barbara i ta ratou mau ravea haapiiraa. Ua faahiahia iho â vau i te mau maimiraa i ravehia i roto i ta ratou mau papai. Mea au na te taata e hinaaro e ite i te mau tuhaa rii roa i te reira. Mai tera ˈtoa vau. Ei hiˈoraa, mea anaanatae roa na ˈu i te parau tohu Bibilia e rave rahi. Maoti ta ˈu i haapii i papu ai ia ˈu e no ǒ mai iho â te Bibilia i te Atua ra. I 1992, ua bapetizohia mâua Barbara ei Ite no Iehova.

Ua iti anei to oe faaroo no te ite aivanaa?

Aita, ua haapuai te reira i to ˈu faaroo. Te tahi hiˈoraa, ei taata e taa ia tatou i te hohoˈa mata o te tahi atu. E nehenehe te hoê aiû e na reira tau hora noa i muri aˈe i to ˈna fanauraahia mai. E nehenehe oe, oia ˈtoa vau e ite oioi i te hoê taata ta tâua i matau noa ˈtu e tei rotopu oia i te nahoa taata. E taa ia tâua eaha to ˈna huru, mea maitai anei aore ra aita. Aita râ tâua i ite noa ˈˈe mea nafea to tera rahiraa haamaramaramaraa i tae oioi i te roro.

Ua papu râ ia ˈu e no ǒ mai i te Atua ra o Iehova te hamaniraa faahiahia o to tatou mata. No te haamauruuru ia ˈna no ta ˈna mau ô, oia atoa hoi te Bibilia, e faaite au o vai o ˈna ia vetahi ê. Inaha, no to ˈu au i te parau-tia, ua turai te reira ia ˈu ia parau e o ˈNa iho â te tumu o te mau mea atoa.