Faaohiehia te neneiraa no te tauturu i “te mau huru taata atoa”

Te hinaaro ra te Atua ra o Iehova ia noaa i “te mau huru taata atoa . . . te ite papu i te parau mau.” (Timoteo 1, 2:3, 4) Teie râ, te paraparau nei to tatou mau taeae e tuahine e te feia atoa ta tatou e poro ra na roto hau atu hanere reo. I te mau matahiti atoa, te neneihia ra fatata 2 miria papai na roto i teie mau reo. Eaha tei ravehia no te faaineine i te maa pae varua na roto e rave rahi reo maoti te mau ô faaohipa-maitai-hia?

Ua iti te mau vahi neneiraa maoti te matini neneiraa maitai aˈe

A 40 matahiti i teie nei, ua neneihia te mau vea i roto hau atu 40 fenua. Mai reira mai, ua haamaitai-mârû-noa-hia ta tatou ohipa neneiraa e i teie nei e 9 noa fenua tei faaohipahia. I taua noa mau area matahiti, ua tataipae te numera o te mau reo o te mau papai ta tatou e nenei pinepine nei! E nafea tatou e nehenehe ai e nenei na roto hau atu â reo inaha ua iti mai hoi te vahi neneiraa? Maoti ïa te mau matini neneiraa maitai aˈe.

E nehenehe te mau matini neneiraa apî e nenei e rave rahi papai i roto i te hoê area taime poto aˈe. I te matamua, mea titauhia te taime no te taui e no te faaineine i te mau matini no te nenei i te tahi atu papai. I teie nei, maoti teie mau matini apî ua tataimaha te vitiviti o te ohipa neneiraa e e nehenehe e rave te tahi atu mau ohipa mai te neneiraa i te mau papai na roto i te mau reo aita e paraparau-rahi-hia. E no teie mau papai tataitahi ua titauhia te mau iri auri neneiraa apî. Aita i maoro aˈenei, i roto hoê matahiti fatata 2 mirioni tara Marite tei haamâuˈahia no te hoo mai i tera noa mau iri auri. Area râ no te mau papai faito nainai, ua faaohipahia te mau matini neneiraa ê atu o tei ore e titau i te iri auri neneiraa. Ua iti mai ïa te mau haamâuˈaraa.

I roto i na toru matahiti i mairi, ua haamâuˈahia hau atu 10 mirioni tara Marite no te faaapî i ta tatou mau matini neneiraa. E hiˈo mai tatou mea nafea te tahi matini i faaohipahia no te pia i te mau Bibilia. I na mua aˈe, ua hau atu 40 tuhaa ohipa ta te mau taeae e tia ia rave hou te neneiraa mai te niraraa, tâpûraa, haamaninaraa e te faaneheneheraa. Na te mau taeae atoa e afai e e haaputu i te mau Bibilia i te roaraa o na tuhaa tataitahi. I teie mahana, e ahuru noa ïa tuhaa ohipa tei titauhia maoti te mau matini apî. Na teie mau matini e taˈitaˈi i te mau Bibilia i te roaraa o te ohipa. Ua iti mai ïa te ohipa i te faito 55 i nia i te hanere ta te mau taeae e rave no te pia i te Bibilia. I te vahi hamaniraa buka i te amaa no Tapone, e titauhia vau hora no te pia 2 000 Bibilia e i teie nei e 35 000 Bibilia ïa!

Ua iti te mau haamâuˈaraa no te iti o te vahi haaputuraa papai

Mai tei faahitihia, ua nehenehe tatou e haaputu i te moni o te mau ô horoa noa. Ei hiˈoraa, no te iti o te mau papai neneihia e no te vitiviti o te ohipa, ua iti atoa mai ïa te mau papai haaputuhia i te vahi neneiraa. Te na ô ra Gary, e tavini ra i te amaa no Marite: “I te haamataraa, mea fifi ia taa mea maitai aˈe ia nenei pinepine te mau papai i te hoê faito tano noa e ua manaˈo matou mea au aˈe ia nenei faarahi.” Te parau atoa ra o ˈna: “I roto noa hoê matahiti, ua maraa te mau haamâuˈaraa i te faito 60 000 tara Marite no te hoo mai i te mau iri auri neneiraa e te papie. I taua noa â râ matahiti, ua haaputu tatou hau atu 1,5 mirioni tara Marite no te mea ua iti mai te haamâuˈaraa no te haaputu te papie e te mau buka.” No reira, ua nehenehe tatou e faaohipa i tera moni haaputuhia no te patu i te mau Piha a te Basileia e no te tauturu i tei ati.

Ei faahopearaa, mea rahi te mau vahi haaputuraa papai neneihia tei vata, ua nehenehe ïa e faaohipa i teie mau vahi no te tahi atu mau hinaaro a te mau amaa. E no te mea ua iti mai te mau vahi neneiraa, ua nehenehe atura ïa e patu i te mau amaa apî nainai aˈe. Ei hiˈoraa, mai 2018 na te amaa no Europa no ropu e te tahi atu mau vahi neneiraa e haapao te tuhaa neneiraa i ravehia na e te amaa no Beretane. Maoti teie mau faatanoraa, e mirioni tara Marite tei haaputuhia i nia i te mau haamâuˈaraa e o tei faaohipahia no te patu i te amaa apî no Chelmsford i Beretane.

“Ua haamanaˈo oe ia ˈu!”

Te mea faahiahia roa, ua tauturu teie faanahoraa apî i te mau taata ia faafatata ˈtu â i te Atua.I teie nei, e nehenehe tatou e nenei i te mau papai na roto e rave rahi reo noa ˈtu e hanere noa papai neneihia tei hinaarohia. Ei hiˈoraa, 35 000 taata e paraparau ra te reo Wallis i Taratoni e i Wallis e Futuna. I Atete 2024, ua matara mai Te Bibilia, Huriraa o te ao apî na roto i te reo Wallis. Te na ô ra te taata poro o Selafina tei iˈoa: “Ua matau vau i te taio i te mau taˈo na roto i te Bibilia reo Farani taˈu i ore e taa. I te matararaa mai te Bibilia na roto i te reo Wallis, ua taˈi au. Ua pure au: ‘E Iehova, ua haamanaˈo oe ia ˈu! E Atua maitiiti ore oe.’”

Noa ˈtu aita i hau atu i te 500 000 taata e paraparau i te reo Sanga i Repupirita manahune no Congo, te vai ra râ te buka Ia ora oe e a muri noa ˈtu! na roto i tera reo. Te parau ra Josué, tei roto i te hoê amuiraa reo Sanga: “E titauhia te mau tutavaraa rahi ia faataa aore ra ia tatara te tahi mau taˈo i te mau piahi Bibilia. E noa ˈtu râ, i te tahi taime mea fifi no ratou ia taa eaha ta te buka e parau ra. Auê ïa haamaitairaa a matara ˈi teie buka na roto i te reo Sanga! I teie nei, ua taa maitai i ta ˈu mau piahi i te mau haapiiraa e aita e faufaa faahou ia tatara pauroa.”

Te pia e te opere nei tatou i te mau papai niuhia i nia i te Bibilia i te mau taata atoa na roto e rave rahi reo, mai te ore i itehia aˈenei. Na ta outou mau ô horoa noa, oia atoa tei pûpûhia i nia ia donate.jw.org i tauturu ia matou ia na reira. Mauruuru rahi no to outou aau horoa noa.