Eaha ta te mau Ite no Iehova i faaruru i te tau o te Taparahiraa a te mau Nazi?
I rotopu i te mau 35 000 Ite no Iehova tei ora i Heremani e i roto i te mau fenua faaterehia e te mau Nazi, 1 500 tiahapa Ite no Iehova tei pohe i te tau o te Taparahiraa a te mau Nazi. I roto i te tahi mau huru tupuraa, aita i itehia te tumu i pohe ai ratou. I te mea e te haere noa ra te mau maimiraa no nia i te reira, e faatanohia ïa te mau numera e te tahi atu mau haamaramaramaraa i te taime tano.
Nafea ratou i pohe ai?
Mauhaa haapoheraa faaohipahia e te mau Nazi
Te mau haapoheraa: Fatata 400 Ite no Iehova tei haapohehia i Heremani e i te tahi atu mau fenua faaterehia e te mau Nazi. Ua afaihia te rahiraa i mua i te mau fare haavaraa, ua faautuahia ratou i te utua pohe e ua tâpûhia to ratou upoo. Ua pupuhihia aore ra ua rîhia te tahi atu ma te ore e fanaˈo i te tahi haavaraa.
Te mau tapearaa ino roa: Hau atu 1 000 Ite no Iehova tei pohe i roto i te mau aua haavîraa Nazi e te mau fare tapearaa. Ua pohe ratou no te mau ohipa rahi faahepohia, te mau hamani-ino-raa, te ereraa i te maa, te toˈetoˈe, te maˈi aore ra no te mea aita ratou i fanaˈo i te mau ravea rapaauraa maitai. No te mea ua hamani-ino-hia ratou, ua pohe te tahi atu i muri noa mai i to ratou faatiamâraa i te hopea o te piti o te Tamaˈi rahi.
Te tahi atu mau tumu: Ua pohe te tahi mau Ite no Iehova i roto i te mau piha ua tuuhia te mǎhu taero. No vetahi ê, ua pohe ratou no te mea ua ravehia te tahi mau tamataraa i te pae rapaauraa i nia ia ratou aore ra ua patiahia ratou e te raau taero.
No te aha ratou i hamani-ino-hia ˈi?
Ua hamani-ino-hia te mau Ite no Iehova no te mea ua pee ratou i te mau haapiiraa Bibilia. A ani ai te faatereraa Nazi ia rave te mau Ite no Iehova i te mau ohipa opanihia i roto i te Bibilia, ua patoi ratou i te reira. Ua faaoti ratou i te “auraro” i te Atua, “eiaha te taata.” (Ohipa 5:29) Ua faaite ratou i te reira i roto i to muri nei na tuhaa.
Aita ratou i faaô i roto i te mau ohipa poritita. Aita te mau Ite no Iehova tei ora i te mau fenua faaterehia e te mau Nazi i faaô i roto i te mau ohipa poritita. E na reira atoa te mau Ite no Iehova i teie mahana i te mau fenua atoa. (Ioane 18:36) No reira, ua patoi ratou i te
Rave i te mau ohipa taaihia i te ohipa tamaˈi.—Isaia 2:4; Mataio 26:52.
Maiti i te tahi pǔpǔ poritita aore ra apiti i te mau faanahonahoraa a te mau Nazi.—Ioane 17:16.
Faahanahana i te svastika aore ra ia Hitler.—Mataio 23:10; Korinetia 1, 10:14.
Ua haamori ratou i te Atua. Noa ˈtu e ua opanihia ratou i te haamori i te Atua, ua tamau te mau Ite no Iehova i te
Putuputu no te pure e no te haamori i te Atua.—Hebera 10:24, 25.
Poro i te poroi a te Bibilia e opere i te mau papai Bibilia.—Mataio 28:19, 20.
Hamani maitai i to ratou taata tupu, oia atoa i te ati Iuda.—Mareko 12:31.
Tapea i to ratou faaroo ma te ore e tuurima i te parau mana e faaite ra e te faarue ra ratou i ta ratou mau tiaturiraa.—Mareko 12:30.
Ua parau te aivanaa o Robert Gerwarth e o te mau Ite no Iehova anaˈe te “pǔpǔ i raro aˈe i te faatereraa Nazi a Adolf Hitler tei hamani-ino-hia no ta ratou mau tiaturiraa noa.”a Ua maere roa te tahi atu mau taata tei tapeahia i roto i te aua haavîraa a ite ai i te taiva-ore-raa o te mau Ite no Iehova. Ua na ô te hoê taata tei tapeahia, no Auteteria oia: “Aita ratou e haere i te tamaˈi. Mea au aˈe na ratou ia haapohehia ratou i te haapoheraa i te tahi atu.”
Ihea ratou i pohe ai?
Te mau aua haavîraa: Ua pohe te rahiraa o te mau Ite no Iehova i roto i te mau aua haavîraa. Ua tapeahia ratou i Auschwitz, Buchenwald, Dachau, Flossenbürg, Mauthausen, Neuengamme, Niederhagen, Ravensbrück e Sachsenhausen. I te aua haavîraa i Sachsenhausen noa, ua tapaohia e 200 tiahapa Ite no Iehova tei pohe.
Te mau fare tapearaa: I roto i te mau fare tapearaa, ua pohe te mau Ite no Iehova no te mau hamani-ino-raa. Ua pohe te tahi atu no te mau hamani-ino-raa ravehia i te roaraa o te mau uiuiraa o te mau Nazi.
Te mau vahi haapoheraa: Ua haapohehia te rahiraa o te mau Ite no Iehova i roto i te mau fare tapearaa no Plötzensee, Brandebourg e Halle-sur-Saale. Ua tapaohia 70 atu vahi i reira i haapohehia ˈi te mau Ite no Iehova.
Te tahi mau Ite no Iehova tei haapohehia
Iˈoa: Helene Gotthold
Vahi haapoheraa: Plötzensee (Berlin)
Ua tapeahia o Helene e rave rau taime. E piti tamarii ta ˈna. I 1937, ua taparahi-ino-mau-hia oia e ua marua ta ˈna pêpe. I te 8 no Titema 1944, ua tâpûhia to ˈna upoo i te fare tapearaa no Plötzensee, i Berlin.
Iˈoa: Gerhard Liebold
Vahi haapoheraa: Brandebourg
E 20 matahiti to Gerhard a tâpûhia ˈi to ˈna upoo i te 6 no Me 1943. Piti matahiti na mua ˈtu, ua tâpûhia te upoo o to ˈna metua tane i te hoê â fare tapearaa. Ua papai oia i roto i ta ˈna rata hopea i to ˈna utuafare e i to ˈna vahine momoˈa: “Aita anaˈe vau i fanaˈo i te puai o te Atua, aita vau e nehenehe e faaruru i tera tupuraa.”
Iˈoa: Rudolf Auschner
Vahi haapoheraa: Halle-sur-Saale
E 17 matahiti noa to Rudolf a tâpûhia ˈi to ˈna upoo i te 22 no Tetepa 1944. I roto i ta ˈna rata hopea i to ˈna metua vahine, ua papai oia: “Mea rahi te mau taeae tei faaruru i te hoê â tupuraa, e na reira atoa ïa vau.”
a Te buka Te taata haapohe a Hitler: Te oraraa o Heydrich (Beretane), api 105.