TAUTURU NO TE UTUAFARE
Mea nafea ia faaite i te here?
A mairi ai i te mau matahiti, peneiaˈe aita te tane e te vahine faaipoipo e faaite faahou i te here te tahi i te tahi. Mai te peu tera te tupu ra i roto i to oe faaipoiporaa, e tia anei ia haapeapea oe?
Te tia ia ite
Mea faufaa roa te here i roto i te hoê faaipoiporaa oaoa. E titauhia ia tamau noa i te amu i te maa e ia inu i te pape no te hoê tino pautuutu e oraora maitai. Oia atoa, e titauhia ia tamau noa i te faaite i te here no te hoê faaipoiporaa oaoa. Noa ˈtu ehia matahiti i teie nei, e hinaaro te tane e te vahine faaipoipo ia faaite pinepine to raua here te tahi i te tahi.
Eita te here mau e imi noa i to ˈna iho hinaaro. E imi râ i te maitai o vetahi ê. Oia mau, eita te hoê tane aore ra vahine faaipoipo e faaite i te here i te taime noa a tupu ai to ˈna hinaaro. E tâuˈa râ oia i te hinaaro a to ˈna hoa faaipoipo ma te tutava i te pahono i te reira.
Parau mau, e hinaaro te mau vahine faaipoipo ia faaite pinepine te tane i to ratou here. Mea here roa paha na te hoê tane faaipoipo i ta ˈna vahine. Tera râ, mai te peu e faaite o ˈna i taua here ra i te poipoi e i te po noa aore ra hou a taoto ai i ta ˈna vahine, aita ïa te vahine e papu te here mau ra ta ˈna tane ia ˈna. No reira, mea maitai aˈe ia faaite i te here i te roaraa o te mahana.
E nafea ïa?
A faaite i te here na roto i te parau. Ia parau oe i ta oe vahine aore tane faaipoipo “ta ˈu hani,” “ta ˈu here” aore ra “ta ˈu poe,” e oaoa roa oia.
Aratairaa Bibilia: “E parau te vaha i te mea e vai ra i roto i te aau.”—Mataio 12:34.
Manaˈo tauturu: E nehenehe atoa oe e papai i te tahi nota, rata aore ra e hapono i te poroi au maitai.
A faaite i te here na roto i te ohipa. Ia parau anaˈe oe “ta ˈu here” e nehenehe atoa ïa e tauahi, e apa aore ra e tapea i te rima. A faaite e te tâuˈa mau ra oe ia ˈna na roto i to oe huru e ma te pûpû i te taoˈa i te tahi taime. A tauturu i ta oe vahine faaipoipo ma te amo i te mau pute, tatara i te opani, horoi i te auˈa, puˈa i te ahu aore ra ma te tunu i te maa. No e rave rahi, e ere noa teie mau ohipa i te tauturu e tapao râ e mea here-mau-hia ratou!
Aratairaa Bibilia: “Ia here tatou, eiaha ïa ei parau noa, ei here ohipa râ.”—Ioane 1, 3:18.
Manaˈo tauturu: A haa ma te here e a haapao i te mau hinaaro o to oe hoa faaipoipo.
A faaherehere i te taime no orua anaˈe. E haapuai te reira i to orua here te tahi i te tahi e e faaite atoa e mau taime auhia e orua. Parau mau, e ere i te mea ohie mai te peu te vai ra te tamarii aore ra te tahi ohipa e titauhia ia rave. Peneiaˈe e nehenehe orua e faataa i te hoê taime no te hahaere pinepine orua anaˈe.
Aratairaa Bibilia: “Ia taa maitai ia outou eaha te mea faufaa roa ˈˈe.”—Philipi 1:10.
Manaˈo tauturu: Te faataa ra te tahi mau hoa faaipoipo i te taime no raua anaˈe, no te faaanaanatae i te po anei aore ra i te hopea hebedoma.
A taa maitai i to oe hoa faaipoipo. Mea taa ê to te tane e to te vahine mau hinaaro i te pae o te here. A tauaparau no nia i to orua mau hinaaro e mai te peu e tia ia rave i te tahi faatanoraa. I muri iho, a faaitoito i te faaî i to ˈna mau hinaaro. Eiaha e moehia mea faufaa roa te here no te hoê faaipoiporaa oaoa.
Aratairaa Bibilia: “Eita te here . . . e imi i to ˈna iho maitai.”—Korinetia 1, 13:4, 5.
Manaˈo tauturu: Eiaha e titau ia here-noa-hia mai. A ui ra ia oe iho: “Eaha ta ˈu e nehenehe e rave ia rahi atu â to ˈna here no ˈu?”