E tahoê anei te mau Ite no Iehova i te tahi atu mau haapaoraa?

Ei Ite no Iehova, te oaoa nei matou i te aparau no nia i te faaroo e te feia o te tahi atu mau haapaoraa. Aita râ matou e tahoê nei i roto i te haamoriraa e te feia e ere hoê â tiaturiraa e ta matou. Te faaite ra te Bibilia e te “ohipa amui nei” te mau Kerisetiano mau. E te hoê tuhaa faufaa roa, o te hoêraa ïa o te tiaturiraa. (Ephesia 4:16; Korinetia 1, 1:10; Philipi 2:2) Ua titauhia hau atu â i te farii-noa-raa i te faufaaraa o tera mau huru maitatai mai te here, te aumihi, e te faaoreraa hapa. Ua niuhia ta matou mau tiaturiraa faaroo i nia i te ite mau no roto mai i te Bibilia, aita anaˈe mea faufaa ore ïa to matou faaroo.—Roma 10:2, 3.

I roto i te Bibilia, e amuiraa au ore te tahoêraa i te feia e ere hoê â tiaturiraa no te haamori, e ino hoi te faaroo o te hoê Kerisetiano. (Korinetia 2, 6:14-17) No reira, aita Iesu i faatia ia tahoê ta ˈna mau pǐpǐ i te mau faaroo ê. (Mataio 12:30; Ioane 14:6) Oia atoa, i opani na te ture a te Atua i horoahia ˈtu ia Mose i te mau Iseraela i tahito ra ia tahoê e te feia nunaa ê no te haamori i te Atua. (Exodo 34:11-14) I muri aˈe, ua patoi te mau Iseraela haapao maitai i te tauturu pûpûhia mai o te faatupu i te taairaa faaroo e te feia mea taa ê ta ratou tiaturiraa.—Ezera 4:1-3.

E aparau anei te mau Ite no Iehova e te feia o te mau faaroo ê?

E. Mai te aposetolo Paulo, te hinaaro ra matou e taa i te manaˈo e te mau tiaturiraa o “e rave rahi â taata” i roto i ta matou taviniraa. (Korinetia 1, 9:19-22) A aparau ai, te hinaaro mau ra matou e faaohipa i te aˈoraa Bibilia e faaite i te “faatura rahi” ia vetahi atu.—Petero 1, 3:15.