O vai o Iehova?

Te pahonoraa a te Bibilia

O Iehova te Atua mau o te Bibilia, te Atua poiete o te mau mea atoa. (Apokalupo 4:11) Ua haamori te peropheta Aberahama e Mose ia ˈna, oia atoa o Iesu. (Genese 24:27; Exodo 15:1, 2; Ioane 20:17) O ˈna te Atua, eiaha no te hoê noa nunaa, no “te fenua taatoa” râ.—Salamo 47:2.

O Iehova te iˈoa o te Atua e aita ˈtu mai tei faaitehia i roto i te Bibilia. (Exodo 3:15; Salamo 83:18) No roto mai taua iˈoa ra i te hoê taˈo Hebera “e riro” te auraa, e e rave rahi aivanaa e haapapu ra “Na ˈna e faariro” te auraa o teie iˈoa. E tano maitai teie tatararaa i te tiaraa o Iehova ei Atua poiete e ei Atua o te faatupu i ta ˈna opuaraa. (Isaia 55:10, 11) E haamaramarama mai te Bibilia mai teihea te huru o te Atua ra o Iehova, to ˈna iho â râ huru maitai matamua, te here.—Exodo 34:5-7; Luka 6:35; Ioane 1, 4:8.

Te iˈoa Iehova, o te huriraa ïa na roto i te reo Tahiti i te iˈoa Hebera o te Atua: na reta Hebera e maha o te iˈoa o te Atua יהוה (YHWH). Aita e taata i ite i te faahitiraa tano o te iˈoa o te Atua na roto i te reo Hebera tahito. Tera râ, e ere no teie nei te iˈoa “Iehova” na roto e rave rahi reo. Ua ite-matamua-hia teie iˈoa i roto i te hoê Bibilia reo Beretane i 1530 hurihia e William Tyndale.a

No te aha aita i taahia ˈi e nafea ia faahiti i te iˈoa o te Atua na roto i te reo Hebera tahito?

I papaihia na te reo Hebera tahito ma te faaohipa noa i te mau piri vauera, eiaha râ te mau vauera. Te taata taio ua ite i te reo Hebera, mea ohie no ˈna ia faahiti i te vauera e tano. Tera râ, i te otiraa te mau Papai Hebera (te “Faufaa tahito”), ua pee te tahi mau ati Iuda i te peu tutuu e na ô ra e mea tano ore ia faahiti i te iˈoa o te Atua. Ia taio ratou ma te reo puai i te tahi irava te vai ra te iˈoa o te Atua i roto, e mono ratou i te reira i te tahi mau tiaraa, mai te “Fatu” aore ra te “Atua.” A mairi ai te tau, ua parare roa teie peu tutuu e ua moˈe roa ˈtura i te taata e nafea ia faahiti i te iˈoa o te Atua.b

Te manaˈo ra vetahi o “Yahweh” te iˈoa o te Atua ia faahitihia, area no te tahi atu pae, te tahi atu ïa faahitiraa. Ua hurihia taua iˈoa ra ei Iao i roto i te hoê otaro o te miti Pohe te vai ra te tahi tuhaa o te Levitiko na roto i te reo Heleni. Te manaˈo ra te tahi mau taata papai Heleni no tahito ra o Iae, Iabe e Iaoue te faahitiraa tano, aita râ e haapapuraa e tera iho â te faahitiraa na roto i te reo Hebera tahito.c

Manaˈo hape no nia i te iˈoa o te Atua i roto i te Bibilia

Manaˈo hape: Eiaha te iˈoa o te Atua ia faahitihia i roto i te Bibilia no te mea aita i taahia e nafea mau ia faahiti i te reira na roto i te reo Hebera.

Tupuraa mau: Mai te peu tera iho â, te auraa, te hinaaro ra te Atua ia faahiti te taata atoa i to ˈna iˈoa hoê â huru faahitiraa, noa ˈtu e reo ê to ratou. Tera râ, te parau ra te Bibilia no te mau tavini a te Atua no tahito ra e reo ê to ratou e mea ê ta te tahi e te tahi huru faahitiraa i te tahi mau iˈoa.

E rave mai na i te hiˈoraa o te tavana ati Iseraela ra o Iosua. O Iehosua paha to ˈna iˈoa ia faahiti te mau Kerisetiano matamua reo Hebera, o Iesou râ ta te feia reo Heleni. O te papairaa Heleni ta te Bibilia i tapea no te iˈoa Hebera ra o Iosua, tapao ïa ua tapea noa te mau Kerisetiano i te faahitiraa matauhia o te mau iˈoa na roto i to ratou reo.—Ohipa 7:45; Hebera 4:8.

Hoê â huru atoa no te huriraa o te iˈoa o te Atua. E ere te tanoraa o te faahitiraa tei tapeahia te mea faufaa roa ˈˈe, o te faahoˈiraa râ i te iˈoa o te Atua i to ˈna vairaa mau i roto i te Bibilia.