O vai te puaa taehae uteute faahitihia i roto i te Apokalupo pene 17?

Te pahonoraa a te Bibilia

Te faahohoˈa ra te puaa taehae uteute faahitihia i roto i te Apokalupo pene 17, i te hoê faanahonahoraa. To ˈna fa, ia amui te mau nunaa na te ao nei e ia riro ei tia no ratou. I na mua aˈe ua piihia teie faanahonahoraa, te Amuitahiraa o te mau hau faatere e i teie nei, o te Hau amui ïa.

Nafea ia ite o vai teie puaa taehae uteute?

1. E faanahoraa poritita. Te faahohoˈa ra “na afii e hitu” o teie puaa taehae uteute e “hitu ïa mouˈa” e “e hitu atoa ïa arii” oia hoi te mau puai faatere. (Apokalupo 17:9, 10) Te faaohipa ra te Bibilia i te mau mouˈa e te mau puaa taehae no te faahohoˈa i te mau faatereraa.—Ieremia 51:24, 25; Daniela 2:44, 45; 7:17, 23.

2. E hohoˈa no te faanahoraa poritita na te ao nei. Hoê â hohoˈa to te puaa taehae uteute e te puaa taehae e hitu afii faahitihia i roto i te Apokalupo pene 13, o te faahohoˈa ra i te faanahoraa poritita na te ao nei. E hitu afii, e ahuru tara e e iˈoa faaino to teie na puaa taehae e piti. (Apokalupo 13:1; 17:3) No reira, mea tano ia parau, e hohoˈa te puaa taehae uteute no te faanahoraa poritita na te ao nei.—Apokalupo 13:15.

3. No ô mai to ˈna puai i te mau faatereraa. “No roto mai” te puaa taehae uteute i te tahi atu mau puai faatere, te auraa ïa maoti ratou i vai na oia.—Apokalupo 17:11, 17.

4. E taaihia e te haapaoraa. Te parahi ra o Babulonia rahi, oia hoi te faanahoraa o te haapaoraa hape na te ao nei i nia i te puaa taehae uteute. Na te reira e faaite e mana to teie mau haapaoraa i nia i te puaa taehae uteute.—Apokalupo 17:3-5.

5. E faaino i te Atua. “Mea rahi roa te iˈoa faaino na nia iho” i teie puaa taehae.—Apokalupo 17:3.

6. Aita o ˈna e ohipa tau taime noa. Tei roto te puaa taehae uteute i te “abuso,”a te auraa ïa aita o ˈna e ohipa tau taime noa. Tera râ, i muri iho e hoˈi faahou mai râ oia.—Apokalupo 17:8.

Ua tupu te parau tohu Bibilia

E hiˈo anaˈe e nafea te Hau amui e i na mua aˈe te Amuitahiraa o te mau hau faatere i faatupu ai te parau tohu Bibilia no nia i te puaa taehae uteute.

1. E faanahoraa poritita. Te turu ra te Hau amui i te faanahoraa poritita ma te faatura “i te faatereraa o to ˈna mau mero i roto i to ratou fenua.”b

2. E hohoˈa no te faanahoraa poritita na te ao nei. I 2011, ua farii te Hau amui i te 193raa o te fenua i roto i to ˈna mau mero. E nehenehe ïa o ˈna e parau e e tia o ˈna no e rave rahi nunaa na te ao nei.

3. No ô mai to ˈna puai i te mau faatereraa. E vai na te Hau amui e e mana to ˈna maoti te mau nunaa i amui e o ˈna.

4. E taaihia e te haapaoraa. Ua turu noa te haapaoraa na te ao nei i te Amuitahiraa o te mau hau faatere e te Hau amui.c

5. E faaino i te Atua. Ua haamauhia te Hau amui “ia vai noa te hau e te ati ore na te ao nei.”d E nehenehe e manaˈo e fa maitai te reira, tera râ te faaino ra te Hau amui i te Atua ma te parau e o ˈna te ravea ta te Atua e faaohipa no te faatupu i to ˈna hinaaro. Tera râ, o te Faatereraa arii a te Atua anaˈe te nehenehe e rave i te reira.—Salamo 46:9; Daniela 2:44.

6. Aita o ˈna e ohipa tau taime noa. Ua haamauhia te Amuitahiraa o te mau hau faatere i muri aˈe i te Tamaˈi rahi matamua ia vai noa te hau na te ao nei aita râ te reira i manuïa. A haamata ˈi te piti o te Tamaˈi rahi i 1939 aita faahou o ˈna. I 1945, i muri aˈe i te piti o te Tamaˈi rahi, ua haamauhia te Hau amui. Ua hohoˈa maitai ta ˈna mau fa e raveraa i to te Amuitahiraa o te mau hau faatere.