E faahepo anei te mau Ite no Iehova i te mau taata ia taui i ta ratou haapaoraa?
Eita roa ˈtu. Teie tei papaihia i roto i Te Pare Tiairaa, te vea matamua roa ta matou e pia nei: “Mea ino te faaheporaa i te mau taata ia taui i ta ratou haapaoraa.”a Teie te mau tumu e ore ai matou e faahepo i te taata:
Aita Iesu i faahepo aˈenei i te taata ia farii i ta ˈna mau haapiiraa. Ua ite oia e mea iti te taata e faaroo i ta ˈna poroi. (Mataio 7:13, 14) I te huru-ê-raa te tahi o ta ˈna mau pǐpǐ i ta ˈna mau parau, aita o ˈna i faahepo ia ratou ia faaea mai, ua vaiiho râ ia haere.—Ioane 6:60-62, 66-68.
Ua haapii Iesu i ta ˈna mau pǐpǐ eiaha e turai ia vetahi ê ia taui i ta ratou mau tiaturiraa. Ia imi ratou i te mau taata e farii i te parau apî oaoa o te Faatereraa arii, eiaha râ e faahepo i te feia eita e hinaaro i te reira.—Mataio 10:7, 11-14.
Te haamoriraa ma te aau atoa anaˈe ta te Atua e farii. Aita ïa e faufaa ia faahepo i te taata ia taui i te haapaoraa.—Deuteronomi 6:4, 5; Mataio 22:37, 38.
E faatauiraa haapaoraa anei ta matou ohipa?
Parau mau, e haaparare matou i te poroi o te Bibilia “tae noa ˈtu i te hopea o te fenua,” “i mua i te taata e na tera e tera fare,” ia au i te faaueraa a te Bibilia (Ohipa 1:8; 10:42; 20:20). E mai te mau Kerisetiano matamua, i te tahi taime, e parihia matou i te faatauiraa i te haapaoraa ma te ofati i te ture. (Ohipa 18:12, 13) Mea hape râ teie mau pariraa. Eita roa ˈtu matou e tamata i te faahepo i te taata ia tiaturi atoa i ta matou mau tiaturiraa. Mea tia râ ia taa i te taata eaha ta matou e tiaturi nei. I muri iho, e nehenehe ïa ratou e maiti i ta ratou e hinaaro e rave.
Eita matou e faahepo i te taata ia taui i te haapaoraa, eita atoa matou e rave i te ohipa poritita a parau atu ai e e ohipa faaroo te reira. Eita matou e peta i te taata ma te horoa ˈtu i te tahi mau tauihaa aore ra tiaraa. E ere matou mai vetahi e parau nei e e Kerisetiano ratou, o te faatura ore nei râ i te Mesia ma te rave i teie mau peu.b
E nehenehe anei ta te hoê taata e taui i te haapaoraa?
Ua faarue Aberahama i te haapaoraa a to ˈna na fetii
E, te faaite ra te Bibilia e e tiamâraa to te mau taata e taui i ta ratou haapaoraa. Te faahiti ra hoi te Bibilia e rave rahi taata tei maiti eiaha e pee i te haapaoraa a to ratou fetii, e haamori râ i te Atua mau ma te aau tae. O Aberahama, Ruta, te tahi mau taata no Ateno e te aposetolo Paulo vetahi tei na reira. (Iosua 24:2; Ruta 1:14-16; Ohipa 17:22, 30-34; Galatia 1:14, 23) Te faaite atoa ra te Bibilia e e tiamâraa to te taata e rave i te faaotiraa tano ore e faarue i te haamoriraa fariihia e te Atua.—Ioane 1, 2:19.
Te tiamâraa e taui i te haapaoraa, ua turuhia ïa e te Parau faaite i te tiaraa o te taata na te ao nei, piihia e te Nunaa Amui “te niu o te ture nunaa rau no te tiaraa o te taata.” E taiohia i roto i teie parau faaite e “e tiamâraa to te taata atoa e taui i te haapaoraa aore ra tiaturiraa” e “e imi, e apo mai, e e horoa i te tahi mau haamaramaramaraa e manaˈo,” te mau manaˈo faaroo atoa.c E titau-atoa-hia râ ia faatura ratou i te tiamâraa o vetahi ê e tapea i ta ratou mau tiaturiraa e e patoi i te mau manaˈo aita e tuati ra e to ratou.
E faatura-ore-raa anei i te fetii aore ra i te mau peu tumu te tauiraa i te haapaoraa?
E ere. Te faaitoito ra hoi te Bibilia ia faatura i te mau taata atoa, noa ˈtu e e haapaoraa ê ta ratou. (Petero 1, 2:17) E pee atoa te mau Ite no Iehova i te faaueraa Bibilia e faatura i to ratou mau metua, noa ˈtu e e tiaturiraa ê ta ratou.—Ephesia 6:2, 3.
E ere râ pauroa te taata te farii i te manaˈo o te Bibilia. Ua parau te hoê vahine tei paari i te fenua Zambie: “I roto i to ˈu tuhaa oire, ia taui te hoê taata i ta ˈna haapaoraa . . . , e au te reira i te hoê ohipa taivaraa, te taivaraa i to ˈna utuafare e to ˈna tuhaa oire.” Ua faaruru teie vahine i teie tupuraa i to ˈna taurearearaa, ua haamata hoi oia i te haapii i te Bibilia e te mau Ite no Iehova e ua faaoti, i muri rii noa ˈˈe, e taui i ta ˈna haapaoraa. Teie ta ˈna i parau: “Mea pinepine to ˈu nau metua i te parau mai e ua riri roa raua ia ˈu no te taivaraa ia raua. Mea fifi roa teie tupuraa no ˈu, mea faufaa roa hoi no ˈu ia farii raua i ta ˈu faaotiraa. . . . To ˈu maitiraa e tapea i to ˈu taiva ore ia Iehova, eiaha râ e pee i te mau peu tumu faaroo, e ere ïa te auraa e te taiva nei au i to ˈu utuafare.”d
a A hiˈo i Te Pare Tiairaa o te 1 no Tenuare 2002, api 12, paratarafa 15.
b Ei hiˈoraa, i te area matahiti 785, ua haamana Charlemagne i te hoê faaueraa e haapohe i te mau taata no Saxe o tei patoi ia bapetizohia ratou ei Kerisetiano. I roto atoa i te Faaauraa parau no te hau i Augsbourg i te matahiti 1555 tei tarimahia e te mau Katolika e Porotetani i te Hau emepera moˈa Roma, ua faaotihia e ia riro te faatere o te fenua taitahi ei Katolika Roma aore ra ei Porotetani e pee ra i te mau haapiiraa a Luther. E mea tia i te mau taata atoa o te tuhaa fenua a tera aore ra tera faatere ia pee i ta ˈna haapaoraa. Aita anaˈe, e titauhia ïa ia haere ratou e ora i te tahi atu vahi.
c Te vai atoa ra tera mau tiaraa i roto i te Pǎpǎ ture Afirika o te tiaraa o te taata e o te nunaa, te Faaauraa parau Marite no te tiaraa o te taata e ta ˈna hopoia, te Pǎpǎ ture Arabia o te tiaraa o te taata i te matahiti 2004, te Faaauraa parau no te tiaraa o te taata a te taatiraa o te mau nunaa Asia apatoa hitia o te râ, te Pǎpǎ ture Europa no te tiaraa o te taata, e te Faaauraa parau nunaa rau no te tiaraa tivira e poritita. Tera râ, noa ˈtu e te parau nei te tahi mau nunaa e e haamana ratou i tera mau tiaraa, aita ratou e tapea ra i ta ratou parau.
d O Iehova te iˈoa o te Atua mau, mai tei papaihia i roto i te Bibilia.