E “sionistes” anei te mau Ite no Iehova?

Aita roa ˈtu. E Kerisetiano te mau Ite no Iehova o te niu nei i ta ratou tiaturiraa i nia i te mau Papai. No te tahi mau haapaoraa, ua taaihia te haaputuputuraa o te mau ati Iuda i Paretetina i te parau tohu Bibilia. E ere râ te manaˈo o te mau Ite no Iehova. Aita ratou e tiaturi ra e ua tohu te mau Papai i teie tupuraa poritita ma te taa maitai. Aita te mau Papai e turu ra hoê noa ˈˈe faatereraa taata aore ra e faatiatia ra i te hoê nunaa aore ra pǔpǔ taata. Ua faaite papu Te Pare Tiairaa, te vea a te mau Ite no Iehova: “Aita te mau Papai e turu ra i te sionisme poritita.”

Te faataa ra te Encyclopædia Britannica i te sionisme mai te hoê “pǔpǔ here aiˈa ati Iuda o te hinaaro e haamau e e turu i te hoê hau ati Iuda i Paretetina.” E pǔpǔ faaroo e poritita teie. No te mau Ite no Iehova, e ere te sionisme i te hoê haapiiraa faaroo e eita roa ˈtu ratou e amui atu i te sionisme poritita.

E haapaoraa te faanahonahoraa a te mau Ite no Iehova o te ore e turu i te tahi noa ˈˈe faanahoraa poritita. I te sionisme atoa ïa. Ua faataa-papu-hia te tiaraa amui ore o te mau Ite no Iehova. No reira te mau Ite i hamani-ino-hia ˈi i te tahi mau fenua. Ua papu ia matou e o te Basileia i te raˈi a te Atua anaˈe te hopoi roa mai i te hau i te fenua nei. Aita e faatereraa e e pǔpǔ taata te nehenehe e na reira.

Te hoê faaueraa tumu faufaa o te tiaturiraa a te mau Ite no Iehova na te ao, o te auraroraa ïa i te mau ture a te mau faatereraa taata. Eita ratou e patoi i te mana faatere aore ra e faaô i roto i te tamaˈi.