E nafea ia ore ia haapeapea rahi roa?
Ma te haapeapea rahi roa, e nehenehe to oe ea e to oe huru e fifi. E peneiaˈe, e fifi rahi atu â te nehenehe e tupu.
Manaˈo tauturu no te ore e haapeapea rahi roa
Eiaha e mataitai, e faaroo e e taio rahi roa i te poroi peapea. Aita e faufaa ia ite oe i te mau mea atoa no nia i te hoê tupuraa peapea. E faateimaha noa hoi te reira i to oe feruriraa a manaˈo atu ai eita te tupuraa e maitai mai.
Aratairaa Bibilia: “E ere roa . . . te taata i to ˈna puai i te aau hepohepo.”—Maseli 17:22.
“Mea ohie ia hiˈo tamau i te parau apî a haapeapea ˈtu ai. E ere râ i te mea maitai. I to ˈu faaearaa i te na reira, aita vau i haapeapea rahi faahou mai na mua ˈˈe.”—John.
A feruri: E titau-mau-hia anei ia hiˈo pinepine oe i te parau apî hopea?
A faanaho i ta oe e rave i te mau mahana atoa. A tamata i te ara mai, i te tamaa, i te rave i te ohipa fare e i te haere e taoto i te hoê â taime i te mau mahana atoa. Ia faanaho oe i ta oe tapura ohipa, eita ïa oe e haapeapea rahi roa.
Aratairaa Bibilia: “E manuïa iho â te mau opuaraa a te taata itoito.”—Maseli 21:5.
“I te haamataraa te maˈi pee COVID-19, aita vau i haapao faahou i ta ˈu tapura ohipa, horoa rahi atura vau i to ˈu taime no te mau ohipa eita vau e faufaahia. Ua hinaaro râ vau e faaohipa maitai atu â i to ˈu taime. Faanaho faahou atura vau i te hoê tapura ohipa no te mau ohipa e titauhia ia rave i te mau mahana atoa.”—Joseph.
A feruri: Te tauturu ra anei ta oe tapura ohipa ia oe ia oaoa i te hopea o te mahana?
A tiatonu i nia i te mea maitai. E haapeapea rahi atu â oe mai te peu e parau noa oe ahani aore ra ia feruri oe i te faahopearaa ino roa o te hoê tupuraa. Mea maitai aˈe ia tiatonu oe i nia e piti aore ra e toru ohipa o te faaoaoa ia oe.
Aratairaa Bibilia: “Ia mauruuru atoa outou.”—Kolosa 3:15.
“E tauturu mai ta ˈu taioraa Bibilia ia ore e haapao i te mau parau peapea, ia tiatonu râ i nia i te mea maitai. E na ǒ mai paha vetahi: ‘Eaha ïa, mea ohie roa!’ Tera mau râ tei tauturu ia ˈu!”—Lisa.
A feruri: Ua matau anei oe i te feruri noa i te mau fifi e tupu ra i roto i to oe oraraa ma te haamoˈe i te mau tupuraa oaoa?
A tâuˈa ia vetahi ê. Ia haapeapea rahi roa oe, mea ohie roa ia hinaaro e faaea o oe anaˈe. Mea maitai aˈe râ ia tauturu i te feia i roto i te fifi.
Aratairaa Bibilia: “A imi atoa . . . i to vetahi ê maitai, eiaha noa râ i to outou iho.”—Philipi 2:4.
“E oaoa vau ia rave au i te ohipa no vetahi ê. E faaoaoa vau ia ratou e i te hoê â taime, te tauturu ra vau ia ˈu iho no te mea eita vau e haapao faahou i te mea ta ˈu e haapeapea ra.”—Maria.
A feruri: I rotopu i te feia ta oe i matau, o vai te hinaaro ra i te tauturu e eaha ta oe e nehenehe e rave no ratou?
A haapao maitai i to oe ea. A faataa i te taime no te faaetaeta i te tino e no te haamâha i to oe rohirohi. A amu i te maa maitai no te tino. Ma te haapao maitai i to oe ea, e tauturu te reira ia faatupu i te feruriraa maitai i roto i te oraraa e ia ore e haapeapea.
Aratairaa Bibilia: “E faufaa to te faaetaetaraa tino.”—Timoteo 1, 4:8.
“Eita mâua ta ˈu tamaiti e nehenehe e hahaere na rapae mai ta mâua e hinaaro. I te mau mahana atoa, ua faataa ïa mâua i te taime no te faaetaeta i te tino i te fare. Ua tauturu mai te reira ia oaoa e ia faaite i te hamani maitai e te faaoromai i nia i te tahi e te tahi.”—Catherine.
A feruri: E titauhia anei ia rave i te tauiraa no te faatano i ta oe maa e no te faaetaeta i te tino ia maitai atu â to oe ea?
No te ore e haapeapea rahi roa, e rave rahi tei haapao i teie mau manaˈo tauturu. Ua faufaa-atoa-hia râ ratou i te iteraa i ta te Bibilia e fafau ra no a muri aˈe. A hiˈo i te tumu parau “Eaha ta te Faatereraa arii a te Atua e rave?”