Ua taui te haapiiraa Bibilia i to raua oraraa

Ua taui o ˈna i to ˈna hiˈoraa no nia i te moni no te fanaˈo i te oaoa mau

I to ˈna tamariiraa, ua faaruru Lanh Văn Nguyễn i te tamaˈi, te fifi poritita e te veve. E i te roaraa o te tau, ua haamata oia i te tiaturi e oaoa hoê taata ia rahi ta ˈna moni. I 1988 ua haere o ˈna i Heremani no te imi i te ohipa. Ua ohipa noa oia, te po e te ao, ia rahi mai ta ˈna moni.

Ahuru matahiti i muri iho, ua farerei Lanh i te mau Ite no Iehova. Ua faaite ratou i te buka a Maseli, e ua anaanatae mau oia i te reira, mea au hoi na ˈna i te mau parau paari. I to ˈna iteraa i te reira i roto i te Bibilia, ua hinaaro oia e ite hau atu â. Ua ani oia i te Ite ia hoo mai i te hoê Bibilia na ˈna. Ua parau atu te tuahine ia aparau oia e o ˈna e ta ˈna tane no nia i te Bibilia, e horoa noa raua na ˈna i te hoê Bibilia. I te farerei-faahou-raa raua, e Bibilia ta te tuahine e te buka Te ite e aratai i te ora mure ore.

I to ˈna haapiiraa i te Bibilia e te mau Ite, ua haamata Lanh i te ui ia ˈna iho mai te peu e tia ia ˈna ia tamau i te rave i ta ˈna ohipa, hoo mai e hoo atu i te mauhaa tamaˈi. Ua taa roa ia ˈna e titauhia ia faarue i ta ˈna ohipa. I muri aˈe râ i to ˈna raveraa i te reira, ua iti mai ta ˈna moni. Ua pure ïa oia i nia i te reira e ua haamata i te hoo atu i te tahi atu mau mauhaa. E ua ite mai o ˈna ua rahi mai ta ˈna moni.

Ua faaoti Lanh i te rave i te taime no te haapii atu i te Bibilia ia vetahi ê. Ua hinaaro oia e faaite i ta ˈna i haapii, aita râ o ˈna i paraparau maitai i te reo Heremani. Ua hoˈi ïa oia i Vietnam, no te haapii i te feia no ǒ i te Bibilia na roto i to ˈna iho reo.

Ua tauturu te haapiiraa i te Bibilia ia Lanh ia taui i to ˈna feruriraa e oraraa. I teie nei e oraraa oaoa to ˈna e ta ˈna vahine e ta raua mau tamarii.

Ua taui oia i to ˈna oraraa ei taata ohipa ino no te hoê oraraa oaoa mau

Ua fanauhia Thắng Viết Phùng i 1976 i Nghe An, i Vietnam. Ua tiaturi oia, i te hoê mahana e riro mai o ˈna ei taata ona. I te 19raa o to ˈna matahiti, ua faarue oia i to ˈna utuafare no te riro mai ei taata moni. Ua haere huna oia i Heremani, i ǒ ua ô o ˈna i roto i te hoê pǔpǔ rave ohipa ino. E pupuhi ta ˈna i te mau taime atoa, e tuu atoa o ˈna i te reira i raro aˈe i ta ˈna turua. E no te mea ua apiti oia i te tahi haruraa taata, ua tapeahia o ˈna e ono matahiti i te fare auri. Ua matara mai râ o ˈna i muri aˈe e piti noa matahiti.

Ua ô faahou Thắng i roto i te hoê pǔpǔ apî rave ohipa ino. Ua tapea-faahou-hia oia aita râ i haavahia, ua mǎtaˈu hoi te feia ite ia ˈna. Ua matauhia o ˈna mai te hoê taata rave ohipa ino. I te pae hopea i muri aˈe i te tahi atu tapearaa, ua faautuahia oia ahuru matahiti i te fare tapearaa, i ǒ ua taa i te feia mau auri e te tiai e taata ino mau oia.

I te hoê mahana, ua titau manihini te hoa mau auri ia Thắng no te hoê putuputuraa a te mau Ite no Iehova i te fare tapearaa. I te omuaraa, aita Thắng i hinaaro. I to ˈna râ apitiraa ua ite mai o ˈna te hau. I taua putuputuraa, ua horoahia na ˈna te buka Eaha ta te Bibilia e haapii mau ra? piahia na te mau Ite. I te hoê po, ua taio Thắng i te buka taatoa. I roto i te hoê o te mau pene, te vai ra te mau irava o te faataa ra aita e ite to te feia pohe, mai te mea ra te taoto ra ratou. (Koheleta 9:5; Ioane 11:11-14) Hou Thắng a taio ai i tera pene, ua tiaturi o ˈna te paruru ra te fetii tei pohe ia ˈna, e ua manaˈo oia no te aha aita ratou i tapea ia ˈna ia rave i te ohipa ino.

Ua tamau Thắng i te apiti i te mau putuputuraa a te mau Ite no Iehova, o te haapii pinepine ra i te taata i te Bibilia. Ua haapii o ˈna mea here na te Atua i te taata e ia ˈna atoa. Ua haapii atoa o ˈna eaha te mea maitai e te mea ino, e ua haa rahi o ˈna no te taui i to ˈna feruriraa i nia i te moni e ia haavî i to ˈna huru ino. E ere i te mea ohie no ˈna ia haavî i to ˈna huru, na te pure e ta ˈna mau tutavaraa râ i tauturu ia ˈna ia manuïa. I 2009, ua bapetizo oia ei Ite no Iehova i te fare tapearaa. I muri iho, ua hoˈi Thắng i Vietnam. Te parau ra oia: “I teie nei, e utuafare oaoa to ˈu e te haamori amui nei matou i te Atua ra o Iehova. Ua faaora oia ia ˈu e ua haamaitai rahi mai. Ia feruri au i ta ˈu i ora na, te ui nei au ia ˈu iho, ‘Mai te aha to ˈu oraraa ahani aita vau i haapii no nia ia Iehova?’”

E nafea te haapiiraa i te Bibilia e tauturu ai i te taata ia riro ei taata maitai?

Ua faaite te haapiiraa i te Bibilia i to Lanh e Thắng taui-maitai-raa. Ua faaea raua i te imi ia rahi mai ta raua moni. Ua imi noa na Lanh ia rahi ta ˈna moni e oaoa ïa oia, i teie nei ua ite mai oia i te oaoa maoti to ˈna faaroo e to ˈna utuafare. Ua ineine Thắng i te ofati i te ture no te riro ei taata ona, i teie nei te haapii ra oia i te tahi atu ia faaite i te haerea afaro e ia auraro i te ture. Ua tauturu raua i te taata ia haapii i te mau faaueraa Bibilia o te tauturu ia ratou ia fanaˈo i te hoê oraraa oaoa e ia riro ei taata maitai, i te tamauraa i te imi ia rahi mai ta raua moni.