Tauturu i te feia e ohipa ra i te fare maˈi o te faaruru ra i te ahoaho

E mero Bryn no te Tomite tuatiraa e te fare maˈi i Carolina apatoerau i Marite o te ohipa ra e te mau fare maˈi o te rapaau ra i te feia maˈi Ite no Iehova.

No te maˈi pee COVID-19, e rave rahi fare maˈi tei opani i te taata ia haere mai e hiˈo i te feia maˈi. Ua niuniu ïa Bryn, i te faatere o te haapao ra i te feia maˈi e to ratou fetii i te pae faaroo, no te ite e nafea oia e nehenehe ai e tauturu i te feia maˈi Ite no Iehova.

Ua paraparau râ Bryn i te taata tauturu a te faatere. No te opanipaniraa, ua ani Bryn e nehenehe anei oia e horoa i ta ˈna numera niuniu i te feia maˈi Ite no Iehova no te paraparau ia ratou. E ua fariihia ta ˈna aniraa.

Ua manaˈo atoa Bryn i te feia o te ohipa ra i te fare maˈi. Ua parau oia i te taata tauturu e mea au roa na ˈna te ohipa ta ratou e rave ra, e te tiaturi ra oia mea maitai to ratou ea. Ua parau atoa o ˈna e ua taio oia mea nafea te mau taata na te mau vahi atoa, te feia iho â ra e ohipa ra i te fare maˈi, i te faarururaa i te ahoaho no te maˈi parare.

Ua haapapu te taata tauturu e ua haafifi iho â te COVID-19 i te oraraa o te feia e ohipa ra i te fare maˈi.

I muri iho ua parau Bryn: “I nia i ta matou reni natirara te vai ra te mau haamaramaramaraa o te tauturu i te feia o te faaruru ra i te ahoaho. Ia haere oe i nia i te jw.org e ia patapata oe ‘ahoaho’ i roto maimiraa, e ite mai oe i te tahi o te mau tumu parau faaitoito mau no ta outou feia rave ohipa.”

A paraparau noa ˈi raua ua haere te taata tauturu i nia i te natirara e ua patapata te taˈo “ahoaho” i roto maimiraa e ua ite mai oia i te mau tumu parau. Ua parau oia: “Iae! E faaite au i te reira i te faatere. E tauturu atoa te reira i te feia rave ohipa e te tahi atu. E haere au e nenei te tahi mau apî parau e e opere au na ratou.”

Tau hebedoma i muri iho, ua paraparau Bryn i te faatere, e ua haapapu oia e ua haere ratou i nia i te reni natirara, e ua nenei i te mau apî no nia i te tumu parau o te ahoaho e te tahi atu tumu parau. Ua opere ratou i te reira i te mau tuati maˈi e te tahi atu mero o te fare maˈi.

Ua parau Bryn: “Ua haamauruuru te faatere ia ˈu no ta tatou ohipa e no te mau tumu parau tei papai-maitai-hia. Ua tauturu mau â te reira ia ratou.”